Skip links

قصة : الوحش وذات القزحتين الجزء 2 ( عشق جبابرة) ج78

 38,198 عدد مشاهداات

🟣الجزء 2 من قصة 🟣

♡#وحش_ذات_القزحيتين ♡
والذي بعنوان :
▪︎قصة : #عِڜْڦُ_ٱڷﭳٻَٱٻِږهﮧ▪︎
°° ️#أَحمِـلُ قَلبكٍَ مَعــيِ : متحولينVsسحرة °°

📜الكاتبة•: °chaymae ouaj°
🔮الجزء 760🔮
■■■■■■■
■ ساندرا : أنا ملكة الصنفين فلن أدع خوفي منك و ممّا قد يحصل يمنع ما يمكن ان يحصل….

■جبار :أنا ملك الصنفين ‏أسامح ألف عدو لي ولا أسامح من أمنتها على قلبي فاستهانت بي و به ودمرته …

■■■■■■■

السادسة صباحا …وفعرض البحر الأزرق… محرك يخت اسود متوسط الحجم ..شاق طريقو نيشان بسرعة قصوى وفي خط مستقييم …يخت لي مستحيل يبان فشي رادار أو جهاز تتبع أو أي جهاز بشري آخر ..حيت لي راكبة عليه ساحرة مختارة تحكمت بكل عناصرها السحرية لدرجة أتقنت السحر…ساحرة لي بتعويذة وحدة ألقتها فثواني … أخفت بها موقعها وموقع اليخت واخفت أيضا طاقتها عن العاالم … أي عن أي قوة خارجية عادية او خارقة غاتحاول تتبع مكانها …[(الخارقة هنا كنقصد بها تعاويذ السحرة وقوى المتحولين(قوة الرؤية مثلا )]…وفي مقصورة قيادة اليخت …ناعسة بعمق على جنبها فوق فوطوي طوييل تما وهي محتظة لقردها حتى بدأت كاتخسر ملامح وجهها بسبب الشمس لي ضاربة فيها …تقلبات على ظهرها وهي كاتسرط فريقها وهي مزالة مغمظة عيونها …حتى بدأت كاتسمع صوت غريب …حلات عيونها بثقل وتكعدات جالسة كاتشوف فجنابها كيفاش صبح لحال وهي مستغربة ماعقلاتش تا امتا نعسات ..شافت فقردها لي جالس قدامها وابتاسمات بحزن )

ساندرا : الحمل دايرليا الخمول (حطات يدها على بطنها ) كون ماكنتش حاملة وفنفس هاذ الوضع مستحيل نقدر ننعس او حتى نغمظ عيني من رهبة وخطورة لي مزال تابعني …(القرد غير كايشوف فيها وهي وققات تحركات قاصظة أجهزة قيادة اليخت .. وقفات كاتشوف فالاجهزة والشاشة لي قدامها وجهاز السائق الآلي وبعقلها كاتطرح حسابات بفضل خبرتها فتحديد مواقع الدول بدقة والاحداثيات بسهولة …وأيضا بفظل الأجهزة المتطورة لي فاليخت بسهولة عرفات موقعها الحالي..وشحال دالمسافة قطعات حتى لدابا وشحال باقي ليها تقطع لوجهتها …الشيء لي خلاها خرجاات عينيها وابتاسمات ) كنت عارفاه يخت سريع ومتطور ولكني بمممرةةة ماظنيتوش سريع لهاذ الدرجة.. فأقل من خمس ساعات قطعت اكتر من ربع المسافة (تحنات على ركبتها هزات القرد وعنقاتو فرحانة) هاذشي كايعني أني غانوصل ف 22 ساعة على الأكتر (ابتسامتها اختفت ولونها تخطف ) ه ه هاذشي كايعني أنه بقاتلي أقل من نهار وغانكون فهاذيك الجزيرة (طلقاات القرد ووقفات كاتشوف فجهاز السائق الآلي لقات بلي نظامه مكايسوقش اليخت بأقصى سرعة له ..فا زادت السرعة للحد )

ساندرا : بديتي يا ساندرا فا لا مجال للرجعة او التردد او الخوف ..(ابتاسمات ) أصلا حتى لو نجيت فا مابغايبقالي فين نرجع …قدري الوحدة وأنا استوعبت هاذشي (تنهدات وهي ساهيا فأفكارها ..حتى قاطع سهوها الصوت الغريب لي رجعات كاتسمع ولي سمعو حتى القرد فا بدأ كاينقز عليها )أشنو هاذشي ( بدأت كاضور فمقصورة القيادة وتقلب الاجهزة باش تعرف مصدر الصوت حتى مالقات والو وهي تخرج عينيها ) ناري عنداك يكون الصوت جاي من غرفة المحرك و يكون فيه شي مشكل ويوقفلي اليخت فعرض البحر …(تحركات كاتجري قاصدة غرفة المحرك..وغير حلات باب مقصورة القيادة خرجات لسطح اليخت يالاه ضارت باش تهبط مع الدرج ..حتى وقفات مكانها مبلوكية …منلي بانت ليها واقفة فمؤخرة اليخت مربعة يديها و عاطياها بالظهر …وشعرها الأشقر كايتطااير بقوة بسبب الرياح وسرعة اليخت )🟣الجزء 2 من قصة 🟣

♡#وحش_ذات_القزحيتين ♡
والذي بعنوان :
▪︎قصة : #عِڜْڦُ_ٱڷﭳٻَٱٻِږهﮧ▪︎
°° ️#أَحمِـلُ قَلبكٍَ مَعــيِ : متحولينVsسحرة °°

📜الكاتبة•: °chaymae ouaj°
🔮الجزء 761🔮

(ساندرا سرطات ريقها وزييرات على يديها ….وتحركات بخطوات ثابة حتى وقفات جنبها وبجوجهم كايشوفو فالبحر ….ونطقات ساندرا بهدوء )

ساندرا : أشنو كايعني هاذشي ؟

زليخة : فطورك فمطبخ اليخت …

ساندرا ابتاسمات ) تسللتي لليخت خلسة وجيتي معايا غير باش توجديلي الفطور ؟

زليخة : واحد من الأسباب ..

ساندرا تنهدات ونطقات ببرود ) تيقيني وجودك هنا ماعندو معنى …

زليخة : المهم نأدي واجبي ونرضي ضميري..

ساندرا : واجبك أديتيه منلي وجدتيلي اليخت كيما طلبت… فا تيقيني هاذ الحركة لي درتي ماعندها حتى نفع ..

زليخة : ماقصدتش واجبي تجاهك بل واجبي تجاهو …

ساندرا ابتاسمات ) وزعما كاظنيه غايسمح ليك غيير حيت جيتي معايا (ودورات راسها شافت فيها ) لو بقيتي عالأقل كنتي تسكتي وتتظاهري انه مافراسك مايتعاود …ماتقوليش أنك عاونتيني هكا هو ماغايعرفش أصلا وعمرو كان يلومك أما دابا تيقيني هو ماغاديش يسمح ليك…

زليخة حيدات نظاراتها الشمسية ودارتهم على شعرها ودورات راسها شافت فساندرا ) فكلا الحالتين هو ماغايسمحش ليا ..وحتى لو كنت بقيت ماكنتش غانقدرش نكدب عليه فوجهو …(ابتاسمات ) فا عالأقل نرضي ضميري… أنا هنا باش ندير كل جهدي فحمايتك باعتبارك صاحبتي ووحدة من لستارك ..وباش نردك ليه بخير باعتبارك الليدي الأولى فصنفي وهذا واجبي …

(ساندرا ضحكات بلا خاطرها حتى تسدو عويناتها وضحكتها تسمعات فكل المكان … الشيء لي خلا زليخة تشوف فيها باستغراب )

زليخة : أشنو كايضحك!؟

ساندرا تنهدات ودورات راسها كاتشوف فالبحر ساهية ) واالو أصاحبتي واالو …غير ماتنسايش هاذشي لي قلتيه ليا دابا …قوليه ليه هو ملي يلقاك.. باش يسمح …قولي ليه أنك حاولتي تمنعيني …

زليخة هزات فيها حاجبها ) وأشنو ناويا تقولي ليه نتي باش يسمح ليك ؟

ساندرا شافت فيه ) مافكرتش فهاذشي حيت ماغايعاودش يشوفني…

زليخة خنزرات وغوتات) أشنو كاتقصدي ؟ انك غاتموتي ؟ ياك عاد لبارح كنتي كاتقولي وتعاودي انك قادرة تدمريه و..

ساندرا قاطعاتها )قصدي مت
أو عشت هو ماغايعاودش يشوفني حيت ببساطة لوجه باش غانرجع ليه مابقاش عندي …وحيت انا متأكدة أنه مستحيييييييل غايسمح ليا خصووصا لاوقعات شيحاجة لولادنا …فا علاش غانرجع… باش نكمل حياتي معاه وهو ساخط عليا كنفظل نموت…(واستدارت غاديا )

زليخة كاتنفس بزربة ) : وهاذشي علاش أنا هنا باش نحميك نتي وأجنتك …

(ساندرا ابتاسمات باستهزاء وماجاوباتهاش استمرت فطريقها )

زليخة غوتات ) أفين غاتمشي ؟

ساندرا : لغرفة المحرك حيت ملي كنت فمقصورة القيادة سمعت شي صوت فشكل ….🟣الجزء 2 من قصة 🟣

♡#وحش_ذات_القزحيتين ♡
والذي بعنوان :
▪︎قصة : #عِڜْڦُ_ٱڷﭳٻَٱٻِږهﮧ▪︎
°° ️#أَحمِـلُ قَلبكٍَ مَعــيِ : متحولينVsسحرة °°

📜الكاتبة•: °chaymae ouaj°
🔮الجزء 761🔮

(زليخة تحركات تبعاتها …هبطو بجوج لأسفل اليخت …وقصدو غرفة المحرك دخلو ليه وزليخة تحنات وبدات تقلب فالاجهزة والمحرك لي تما )

ساندرا : واش كاتفهمي فصيانة المحرك حيت أنا لا …

زليخة : آه ..

ساندرا : مزيان إذن شوفي مالو كيشخر ..عنداك يحبس بينا فعرض لبحر…

زليخة تكعدات ) المحرك مافيه والو وأصلا محرك يختي جديد ومتطور وكل شيهراين كنت كنديرلو الصيانة عند مختصين …

ساندرا : إذن منين جاي داك الصوت …

زليخة : ماسمعت انا حتى صوت…

ساندرا تنهدات ) سمعتو قبيلة بحال صوت تخرشيش ماعرفتش … (وخرجو من غرفة المحرك كايتمشاو فكولوار صغير فاتجاه الدرج يالا غايطلعو حتى وقفات ساندرا وبزربة استدارت مخرجة عينيها فزليخة لي خلفها ) سمعي سمعي …

زليخة: آش مم(سكتات منلي سداتليها ساندرا فمها )

ساندرا : شششت سمعي …

(زليخة ديقات عينيها كاتصنت للصوت لي كان خفييف لكنو واصلهم )

زليخة خرجات عينيها ) :هاذ تخرشيش بحال صوت شيحد كيتخنق ..

(ساندرا تحركات بزربة تابعة الصوت وزليخة جنبها حتى وقفو امام باب إحدى غرفتي اليخت لي كان مقفل …….ساندرا فثانية ألقت تعويذة النار شعلو يديها بجوج بالنار وزليخة فعلت قوتها حتى بدأت شرارات كهربائية قوية كاتتطاير من كل جسدها وشعرها ..وبقوة وسرعة حلات زليخة البات هاجمة هي وساندرا حتى وقفو بجوجات مكانهم مخرجات عينيهم وهما كايشوفو فسماح جالسة على الأرض ونصفها العلوي فوق السرير مخرجة تاهيا عينيها فيهم وحاطة يديها بجوج على نيف وعلى فم جمانة…هاذ الأخيرة لي نااااااعسة فوق السرير حالة يديها ورجليها وكاتشخر بقوة وسماح سادالها الفم والنيف تكاتخنق )

زليخة غوتاات ) أوييييلي …

سماح قفزات وغير بانتلها جمانة تخنقات وهي تحيد يدها عليها ووقفات ) احم صباح لخير …

(ساندرا كاتشووف فيهن ببرود …عطاتهن بالظهر وخرجات …أما زليخة فا ماتيقاتش عينيها )

زليخة : ك ك كيفاش وايمتا و و..

سماح قاطعاتها ) بحااالي بحاالك تسللت هنا فليييل ودخلت زعما لهاذ لبيت نتخبع فيه حيت هو الصغير قلت ساندرا غاتنعس فلبيت لاخور لكبير ويالاه جيت نتخبع تحت السرير تاليق الجنية دجمانة سابقاني لبلاصة فا تانا بحاالك ماعرفتها امتا جات ولا كيفاش أصلا خرجات من لقصر بلا مايشوفوها متحولي فرقة العدالة لي حارسينو ..و والله تاكنت غانزلها من اليخت ترجع للقصر ولكن بانتليا ساندرا جاية من بعيد ورجعت انا وياها تخبينا هنا …وهي زمرة دغيا نعسات وليل كولو كاتشخر عييت نسدلها فمها …

(زليخة حالة فمها فيهم وحطات يدها على راسها وغووتات تاقفزات جمانة )تكععععدوووو لسطح اليخت دااابا …

جمانة تكعدات جالسة كاتقاد شعرها ) :هاا شواقع فين انا …(شافت فزليخة ) تانتي هنا ؟🟣الجزء 2 من قصة 🟣

♡#وحش_ذات_القزحيتين ♡
والذي بعنوان :
▪︎قصة : #عِڜْڦُ_ٱڷﭳٻَٱٻِږهﮧ▪︎
°° ️#أَحمِـلُ قَلبكٍَ مَعــيِ : متحولينVsسحرة °°

📜الكاتبة•: °chaymae ouaj°
🔮الجزء 762🔮

جمانة تكعدات جالسة كاتقاد شعرها ) :هاا شواقع فين انا …(شافت فزليخة ) تانتي هنا ؟

زليخة غوتاات ) :أأأأأأع

(سماح طارت على صاكادوها الكبير هزاتو وخرجات كاتجري وجمانة بلا ماتفكر هزات صاكادوها حتى هي وناضت كتجري تبعاتها ….خلاو زليخة كاتغوت صااعرة حتى خرجو عاد سكتات و بقات واقفة مكانها بصدمة كاتتنفس بسرعة وهي كاتفكر فكيييفاش عرفوو…كيفاااش عرفووو الوقت والمكااان وخطة ساندرا ككل …. شكون غايكون قالهاليهم وغير هي وساندرا لي كانو عارفين . ….سرطات ريقها مخررجة عينيها منلي تذكرات انها عاودات كل شيء لهاندا …وتحركات بخطوات سريعة تطلع لسطح اليخت عازمة تردهم ..حتى دارتليها طرن فالرااس و وقفات أمام باب الغرفة التانيا وبلا ماتفكر جوج مرات حلاتو وبلا ماتحتاج تقلب غوتاات )

زليخة : خرجيييي…

(وفلبلاصة تحل باب خزانة ملابس وخرجات حانية راسها ومزنكة )

زليخة : ياااك …

هاندا كاتسرط فريقها ) غ غ غاصبري انشرح و…

زليخة غوتاات سااخطة ) قووو…..دي عليااااا مااتشرحيلي مانشرحلك تحركييي لسطح اليخت ودااااابا …

(هاندا تحركات كاتجري …قاصدة سطح اليخت حابسة لبكية ….اما زلخية تحركات كاتقلب فباقي أركان اليخت …..
اما هاندا فا غير وصلات لسطح اليخت وهي تخرج عينيها فيهن وحتى هن ..وبلا ماتهضر تاوحدة جلسات حداهم…وماكاملاش خمس دقائق حتى طلعات أميرة كاتجري وهي كاتبكي وموراها زليخة الكهرباء كايضرب من كل جسدها )

جمانة مخرجة عينيها فاميرة ) وييلي حتى نتي …فين كنتي مخبيا ؟

أميرة جلسات جنبهن كاتلهث ) ف ف فلي طواليط ..ز ز زليخة غات غاتقتلني …

(زليخة وققات كاتشووف فيهن مستفات وحدة جنب الأخرى ….سماح جنبها هاندا جنبها جمانة جنبها أميرة…فا سرطات ريقها واستدارت شافت فساندرا لي جالسة على كرسي دايرة رحل فوق رجل فيديها كتابها ااسحري )

زليخة : أنا عاودت غير لهاندا كنت محتاجة لمن نعاود وظنييتها (وشافت فهاندا بحقد ) صااااحبتي دبصح لي كااااتكتم الأسراار …

هاندا : أ أنا ماقلتهاش لكل لبنات أنا غير زلقات ليا قدام س(وسكتات مغمظة عينيها منلي غوتات زليخة )

زليخة: سكتييب صااافي (وشافت فساندرا ) ساندرا كنعتادر …

(ساندرا مادارت حتى ردت فعل ماشافتش فيهن أصلا الشيء لي زاااد سخط زليخة فا غوتاات وعينيها على هاندا ) هاااذي هي ثقتي فيييك…من اليوم لابقيت عاودت ليك شيحااجة دفلي عليا

هاندا : أ أنا م ماقصدتش أزليخة و…

زليخة غوتات ) صاافي سكتييي أصلا دااابا غاترجعووو بربعة بيكن للمغرب (ودورات راسها شافت فساندرا لي فقط جالسة على كرسيها ودايرة رجل على رجل وحانية راسها كاتقرأ فكتاب التعاويذ بتركيز …زليخة غوتات )

زليخة : سااااندرا …

ساندرا هزات راسها شافت فيها ببرود ) أمم…🟣الجزء 2 من قصة 🟣

♡#وحش_ذات_القزحيتين ♡
والذي بعنوان :
▪︎قصة : #عِڜْڦُ_ٱڷﭳٻَٱٻِږهﮧ▪︎
°° ️#أَحمِـلُ قَلبكٍَ مَعــيِ : متحولينVsسحرة °°

📜الكاتبة•: °chaymae ouaj°
🔮الجزء 763🔮
ساندرا هزات راسها شافت فيها ببرود ) أمم

زليخة : يختي كايظم قاربي نجااات غانركبهم فييه (شافت فأصابع البنات ) خواتم زواج دأميرة وجمانة وسماح بيهم جبس بسهولة غايلقاوهم رجالهم و…(خرجات عينيها ) اوييييلي جبس نسييتو أويييلي فأي لحظة غايوقف علينا جبااار و..

ساندرا حنات راسها على كتابها وقاطعاتها) مستحيل يحددو موقع اليخت حيت غاحطيت رجلي فيه القيت تعويذة حاجبة لموقعو وحاجبة كل طاقة خارقة فيه وهاذشي علاش أصلا ماحسيتش بطاقاتكن أما كون هبطتكن منو قبل مانتحرك بلخاطر او بالقوة …

زليخة : إذن غير يخرجو من اليخت غايرجع جبس خواتمهن يخدم (شافت فلبنات ) نووضووو تحركو قدامي لقوارب النجات

جمانة خنزرات فيها ) بربي مانتزعز ليكم من هنااا (وووققات كاتشوف فساندرا وكاتغوت ) ياااك قلتي ليااا ماغاديري واالو ياك قلتي ليااا ماغاتضحيش براسك تاني (ابتاسمات ) صدقتي ماشي غير ضعيفة وللمرة التانية غاديا للموت برجليك بل صدقتي كدابة مكاتعرفييييش حتى تكدبي …فا انا غانبقا هنااا باش نحميك بقوة اختراقي ونعاونك على هذاك الوحش لي بين يديك ….هاذشي علاش جيت ..ومكايهمنيش أشنو غايوقع ..أنا خليت الفارس ديالي وكولشي مورايا باش نعاونك بغيتي ولا لا أتوام روحي لكدابة ..

ساندرا هزات راسها شافت فيها ) والغاية من كدبي ولي هي حمايتك ونبعدك على هاذشي ماتحققاتش(سكتات شوي وكملات ) كلها مع الأسف ولكن هانية (وحنات راسها على كتابها ) …

أميرة حنات راسها ) حتى أنا ماراجعاش (عينيها دمعو ) ماعندي فين نرجع …مالك لبارح جا وكان عيان بزاف ومباشرة نعس..وقبل ماينعس حل تلفونو وصلوه مئات الاتصالات وعشرات الايميلات من السكرتيرة ومن الموظفين.. جاب الله كان عيان ونعس قالي يفيق يقلبهم يعني غير غايفييق غايعرف اني خرجت ليه على كل خدمتو (غوتاات ) فااا فين غااانرجع فيين (شافت فساندرا ) خلييني معااك راني قوية وغانعاونك وأنا بغيت نعاوناك …خليني ندير ولو حاجة وحدة صحيحة فحياتي …
(زليخة حالة فمها فيهن )

سماح وقفات كاتشوف فساندرا ) هاذشي عندو علاقة بختي بتوأمي وانا مستحيل نشوفك غاديا للموت برجليك باش تضحي على قبلها ونسكت ومستحيل نعرف أن سميحة بقاليها فقط يوماين فالحياة إيلا نتي ماوصلتيش لهاذيك الجزيرة ونجلس نتفرج ..فا انا هنا باش نتأكد من انك وصلتي بأمان لمكان تدمير لكتاب (سرطات ريقها ) حيت كيما مستحيل نقبل سميحة تتآذى مابغيتكش تتآذااي حتى نتي وغاندير كل جهدي فمساعدتك …

(ساندرا هزات راسها شافت فيها ورجعات حناتو على كتابها بكل برود )

هاندا تنهدات ) أنا أصلا كنت قريب نخوي القصر والبلاد كلها ونرجع لتركيا وكيما كنت قلت ليك من قبل يا ساندرا أنه تقدري تعولي عليا فأي شيء فا انا هنا بخاطري بغيت نعاونك قبل مانمشي فحالي (ابتاسمات بحزن ) واخا دمي ماشي ستارك لكني تربيت وسطهم وتعلمت منهم أنه الكل للواحد والواحد للكل …فا تربيتي مستحيل تخليني نعرف بمخططك وماندير والو …

(وايضا لا رد أو ردت فعل من ساندرا أما زليخة فا قربات تنتف راسها وغوتاات تا صوتها بح )

زليخة :أفااااش غاااتعااونوووها قووولوووليااااا هااا (شافت فجمانة ) عمرك فحياااتك حضرتي لشي معركة حية هااااا (شافت فاميرة ) عمرررك قتلتي شيواااحد هاااا وأصلا واااش تقدري ديييريييهاااا (شافت فهاندا ) ونتيي عمرررك شفتي شيواااحد راسو كايطير (شافت فسماح ) ونتي عمرك حتى قستي دم شيواااحد بيديييك (غوتات ) عمركن خضتو شي تدريييب حربي للقوى ولا وحدة منكن شينهاااار كلفها اللورد جاسم او اللورد جباار بشي مهمة ولو بسيييطة …(غوتات ) او نقدتو شي حياااة أو أصلا واضعف الايمان تحطيتو فشي معركة حية مع سحرة وواجهتو سحرة أو عالأقل مع بني صنفنا ؟؟؟ واااش يحساببيكم هي غاااديا للجنة هاااا … يحسااابليكم إيلا دورونا السحرة غاااتعرفو تتعاااملو معاهم او تنقدو حياااتكم ولمخييرة فيكم استعملت قوتها لمرات قلييلة فحياتها ؟!🟣الجزء 2 من قصة 🟣
♡#وحش_ذات_القزحيتين ♡
والذي بعنوان :
▪︎قصة : #عِڜْڦُ_ٱڷﭳٻَٱٻِږهﮧ▪︎
°° ️#أَحمِـلُ قَلبكٍَ مَعــيِ : متحولينVsسحرة °°
📜الكاتبة•: °chaymae ouaj°
🔮الجزء 764🔮
(لبنات حناو ريوسهن بلونهن لي تخطف وهن مستوعبات لكل حرف نطقاتو زليخة )
جمانة :عمرني درت هاذشي ..من ديما كنت مخبية تحت جناح جاسم وجبار وسليم ووسيم (ابتاسمات ) وفارس لي مستحيل كانو أصلا يسمحولي بهاذشي أو يسمحو نتعرض لشي خطر … فا ماكنتش محتاجة نتدرب وماعمرني حتى فكرت أني نزيد نقوي قوتي لي أصلا قليل فين كانستعملها كيما قلتي أو نصقلها على قبل شي معركة …ولكن هاذشي ماكايعنيش بمرة اني ضعيفة ونتي عارفة يا زليخة أني مؤخرا تحكمت بخاصية قوتي الكاملة فأني نخلي أي شيء ولا شخص لمستو يولي حتى هو قابل للإختراق بحالي فا انا تايقة بقوتي ..ولي عندي قلتو ماراجعاش وغانحمي ساندرا …
أميرة : وحتى أنا ماضعيفاش يا زليخة ويلا عقلتي أني سبق ليا وحميت البنات مرة… وقادرة نعاود ومدة وأنا كانقرأ كتب وكنزيد نمي قوة التحريك الذهني ديالي فا غانكون عون كبير …
هاندا : أنا ماعندي فين او لمن نرجع …آه قوتي دالتحكم بعنصر الماء ضعيفة مقارنة بكن ولكن ماتنساوش انا طبيبة وتقدرو تحتاجوني …
سماح تنهدات ) واخا طاقة قوتي هي الأضعف فكل عشيرتنا حيت طاقة قوة وحدة فقط تقسمات بالتساوي عليا أنا وسميحة باعتبارنا توأم متطابق …ولكني ماضعيفاش وماشي بحال باقي لبنات انا حضرت معاك يا زليخة لتداريب وتداريب لأعضاء فرقة العدالة ودربت صغار المتحولين اكتر من مرة وتعلمت منك كيفاش نركز طاقتي كلها على الهجوم…. وشفت خويا جبار وهو كيدرب عشرات المتحولين وغير بالملاحظة تعلمت منو بزاف فا هاذشي عاطيني أفضلية عن كل لبناات وانا تايقة فراسي ….ونزيدكم حتى أنا بحال هاندا ماااعندي فييين نرجع حيت أنا ووسيم سالينا ..ولابغاوني نرجع للعشيرة يطلقوني منو …
(كلهن من غير ساندرا شافو فيها )
جمانة : كيفاش ..
سماح خنزرات فيها ) كييف سمعتي انا وهذاك خوك الصغير لي طول عمرك فرحانة بيه ولي مااااصدقش … ساالييينا ..
جمانة خنزرات فيها ) : او مالك كاتهضري عليه هااكا ..
سماح : حييت خووك صدق مايسواااش وفيه الدغل صافي ..
جمانة : أي هاي هاي جمعي راسك شفتك تحمستي …
أميرة : تهدنو (شافت فسماح ) اشنو دارليك علاش حقدتي هكا ؟…
سماح : وااالو مدار واالو غير شاف خوتو لكباار حملو عيالاتهم ناض قالي ولدي لياا…. وأنا وهو أصلا متاااافقين مانولدووش دابا ….فا قلت لا مااابغيييتش نكون ام ف 19 من عمري أو من حقيييي وهو ما احتاارمنيش لا انا لا رأيي وناض خدعني بدلي مانع الحمل بمقويات هرمونات مساعدة على الحمل إييييوا وشدني تيح..ني بصباح وبلييل حتى …. (وضربات كرشها بيديها بجوج )قنبلني وبجووووج يعني تواام …
(لبنات من غير ساندرا مخرجات عينيهم فيها … أما زليخة فشلو عليها الركابي وجلسات قدامهم حالة فمها ) …
جمانة ابتاسمات ونقزات وبدات تشطح تما والريح كايطير شعرهل ) يااااي ياس ياااس يااااحليييلي غانولد انا وخوتي بتلاثة فدقاااا …
سماح غوتات ) إواااا يعطيييك دقاااا…
هاندا مخرجة عينيها ) م مكانحسش بطاقاتهم …
سماح : انا كنحس بيهم وبطاقتهم مع كل نفس كناخدو (وخدات يد هاندا حطاتها ليها على كرشها ) تحسسي بتركيز ..
هاندا غمضات عينيها كاتحسس وثواني حتى ابتاسمات ) توأم متطابق …كانحس بطاقة ساااخنة (حلات عيونها )غاتكون قوة النار ..
سماح : موحالش حيت ماشي غير قوة النار لي كاتكون طاقتها ساخنة … فاماعرفتش القوة بالضبط حيت الطاقة مزال مواضحة …
أميرة ابتاسمات ) مبروك علييك (ويالاه دورات راسها حتى قفزات من نظرات زليخة ليها ونطقات بسرعة ) لا لا أنا ماحاملاش والله تمزال ماحاملة وأصلا مالك مستحيل يديرلي كيما دار وسيم لسماح…
سماح غوتاات ) أماتفكرينييش …
جمانة كاتشطح )، يااا وغانولد أنا وخوتي فدقة ياو غانعركوها ولاد …
هاندا نطقات بتحسر ):سعدااتك (تنهدات ) اشنو غاتسميهم …
سماح ضحكات بفرح ) : مزال مافكرت أش غانسمي هاذ الجوج فلالس (خنزرات وغوتات ) ولكن بربي لاسماهم وسيم او حط يدو عليهم وأصلا ماغانرجعش ليه …
أميرة تنهدات وشافت فالساعة لي فيدها كانت تقريبا 6 ونصف ) : ماعارت واش يكون مالك فاق وعرف أني تسببتلو ف فاييت ألبنات ولا مزال …
هاندا : لي وقع وقاااع وهو اه غايتفقص وخاسو سنييين لبغا يرجع يوقف الشركة على رجليها ولكن اش يدير هذا زهرو معاك
(زليخة لي جالسة كاتشوف فيهن حالة فمها مابقاتش قادة تصبر فا وقفات وغوتات )
زليخة : واااااااااااااااالقحب..ااااااات …

Leave a comment

  1. وا القصة زوينة و طووب وغا نعودها كون حطيتي ولد سميحة لي حاملة بيه ايكون ولد ساندارا غتكوو أحسن

  2. اممتااا غيتحطو اجزاء جديدة و متبقاوش تعطلو بلييز راه كنبغيو نحمااقو هههه