Skip links

قصة : نور الياسين جزء 56

 28,840 عدد مشاهداات

🦋نور_الياسين(1117)#فرصة_ثانيةsana mina🐺🦋
الوجع الي استمر من الفجر حتى لعشية اي ازيد من 14ساعة او يمكن اكثر من ذلك …ممكن يستمر اكثر من يوم …ممكن ايام ممكن ليالي على حسب حالة الحامل وحسب الولادة كيفاش غاتكون عندها وبحسب الوضعية ديال التيلاد ..كل وكيفاش دار ليها الله على قول نجود الميمة …
ياسين : نن نوااار؟؟؟”نادا باسمها بصوت مجهد حتى بدا يكرر مناداتها كل ماهي نازلة سخفانة خصوصا الما الي نزل من بين رجليها تا لارض …
يوسف : نوار نوار بنتي مالك …
نوار”خارت قواها مابقاتش قدرات خصوصا مع ديك الوجعة الي جاتها مجهدة حسات بضربة الموت ضربتها ولا شنو داك الاحساس …تا طاحت وشادها يوسف كون ماتدخل ياسين باقصى سرعة طار شدها لاطيح حيث يوسف بوحدو ماقدرش عليها …”
ياسين”غوت بجهد على لفرملية” : فييييييييييييييييييينك …”شاف فنوار كيضرب فحناكها” نوار …
يامنة”سمعات صوته جات تتزرب ” : مالها ؟ “شافت الما تحت منها ” الله ..سقية ولدي هاديك فين الفرملية …
يوسف”كيغوت” : وفين الفرملية فييييييييين …
يلاه بغا يمشي الياس يشوف هو وصهيب ولا واحد فالدراري تا تمات جايا كتجري شافتها “
عرفات حالتها فين وصلات وطارت تجيب ليها كرسي …
ياسين “مقرب ليها” : نوار توگضي معايا …نوار …
نوار”بدات تنين جهدها تقادا مابقا ليها ماتزيد ” : ننننننننن امممممممن اهى …
يوسف : حاولي تشدي فراسك ابنتي ماتحطيش جهدك كلو”شاف فياسين” فين يسرى ؟
يسرى”جات كتزرب من تحت ” : م مالها ؟ نوار ؟؟؟”طلات على الما وهي دير راسها بين ايديها ماعرفات باش تبلات” دااااابا دابا تهبط …
ياسين”هزها بين دراعو عاونو يوسف تا تقادات وغيييير هزها وهي تحس بتحتها “
نوار”غوتات غوتة ضعيييفة حس بيها ياسين فودنيه ضراتو فقلبو براكة عليه حابس راسو مسكين بزز مقوي راسو اما راه فاااشل وعزات عليه وتعذبات وتعذب معاها نفسيا …اش غانقوليك ماكرهش كون كان بلاصتها ؟ ابدا
بالعكس ماكرهش تولد وتحبس براكة كفاية العذاب الي تدوز منو وزوج توام الجمل تضاعف والوجع بالاسام انقباضات فالاشهر الاخيرة …زيادة على انها كتعاني من صرع وغير بالادوية والفيتامينات باش نقصات من خطره على الاجنة وعليها هي …زيادة على رجلها الي عرجة منها والثقل ديال الحمل عذبها معاها لو ما كتلبس صبابط وصابويات وبانطوفات بسوميلا …
نوار”مدات ايدها الي فيها سيروم الي بالنترة وطيحة ولا فبلاصة ميدوز ليها المقوي صدق جابد ليها دم …حطاتها على تحت كرشها وعينيها بغاو يخرجو” : واااا واااا بغا يهبط هادشي اهى واااااا مامااااااا عى هيييييي..”حطها فوق الكرسي بدات تلوى وتخرج عينيها”
يسرى : مالك ؟ “غادي دافعاها الفرملية وتابعها ياسين شاد فايدها”
نوار “كتلوى مابغاتش تبقى جالسة ” : ماما اهى شي حاجة لتحت لتااااااااااحت اهى اهى ممممم….
ماجاوبتهاش تبعو الفرملية الي دافعة بيها خلاو لاخرين تابعينهم تالتحت ساعاك ماخلاوهمش ينزلو من غير يسرى وزوج ديالها الي هو ياسين لا غير …طارو بيها لتحت غاديا وتنين كتحاول ما امكن تعطي طاقتها ولكن القوة ديالها شبه عيات بالمعقول …تا دخلوها لقاعة الولادة …
يسرى : طرطقات سقية …اي جو بونص الوضعية ديال ولادة واجدة …
لمياء”شافت فياسين” : سير معاها تعطيك ماتلبس ودخل اولدي …
مشا بزربة مخلينهم كيعاونو فيها تا دخلات لداخل ووقفاتها تطلع تنعس فوق البياص ديال الولادة …
لمياء”تقابلت مع رجليها الي حلاتهم وحطتهم فوق دوك اللعيبات جنب البياص…وخشات صبعها غاااا هي الي خشاتو تا ضربات فراس خارج ” : نوووووو …
نوار”عينيها فالسقف كتعصر فيهم نفسها دياقت” : مممممممممم اهى اهى …
يسرى مشات حداها كتشوف هو فالعادة ممسموحش ليها دخل غير بالمعرفة تما دخلات وحيث لمياء كانت ديجا زميلتها فالدراسة …طلات عليها وشافت نوار كتبكي وتعصر من جيه ولمياء من جيه …حتى دخل ياسين الي وجهو تزير فاش شافها بداك المنضر حالا رجليها وقدامها يسرى وطبيبة كيقلبو فيها…
لمياء”شافت فالفرملية ” : الي فازي عيطي anesthesiologist (اخاصئي تخدير)
طارت الفرملية تعلمو باش يجي لحالة مستعجلة …حتى سول ياسين …
في هاد اللحضة الي هما مدهييين شي مشا يعيط لاخصائي تخدير وشي كيجري من هنا وهنا …كانت حالة اخرى كتولد بالقرب من نوار فالجهة لاخرا وشي كيتسنى الفرج …ونوار را ربي الي عالم بيها ….ماعندهم حل سوى يتدخلو ويديرو ليها الي قالت طبيبة ل اخصائي تخدير الي دخل ديك ساعة ….
ا.تخدير: دكتوغ …
لمياء : دابا غانديرو ليها seringue anestehsie loco-régional….
ا.تخدير : تودسويت “مشا نيشان يعمر الشوكة ديال تخدير الي غادي تضرب ليها فاسفل الضهر فالحالة ديالها باش تقلل ليها الالم …وبين الولدة البنت لولة الي مع الاسف سبقات راسها يولدوها ريتما يحاولو اخر محاولة باش تقلب ثانية وتولد عادية ….
يسرى”عاونتها من بعد ما صايبات ليها سيروم الي جبد دم بدلاتو ليها الفرملية وهما فغمار التجهيزات …” : تقادي شوي فالجلسة ماما ومتحركييش بينما ضرب ليك شوكة …
نوار”هلكها الوجع تاني بدا يحسك فيها ونطقات بصوت مبحوووح كون ما قربت يسرى ودنيها متسمع والو” : ب بناتي ماما اهى اهى …واااااواوا ممممماماما….
يسرى”شافت فياسين الي عينيه حمرين بغاو ينقزو منهم دموع وشافت فيها” : مابيهم وااالو ماما غير صبري باش تزحمي ونخرجو الخوينزة الي بغات تخرج راسها ماتشاورت مع حد …
#يتبع…🦋نور_الياسين(1118)#فرصة_ثانيةsana mina🐺🦋
لفوق فين كاين الشومبر …يوسف كيمشي ويجي ماعرف اش يدير قهراتو حالتها عزات عليه وعليهم كاملين الي مابكا خلاتو يبكي …شفاتهم حالتها بجهد عليها حمل كلشي وعليها بالصبر لكشي …
يامنة”حطات ايدها على كتف يوسف” : دعي معاها خويا يوسف راك عارف وحاضر لهادشي اش غاتسنى ودير ؟
يوسف”مسح دمعة نزلات ليه” : عزات عليا بزاااااف ايامنة عزات عليا وهشيشة راكي ربيتيها على ايديك وعالمة بحالتها …
نجود : واولدي را هادشي عادي هادي هي الولادة هادشي علاش الجنة تحت اقدام الام هادشي علاش دعوة لام مقبولة وفهاد الحالة لازم علينا ندعيو ليها بالفكاك والوقفة ساهلة وربي كبير سمع مجيب …
يوسف : ونعم بالله …
صهيب”تم جاي جايب ليه كاس القهوة ومعاه فؤاد الي كان برا ” : هاك خويا شرب تهدن شوي …
فؤاد : يوسف ؟
يوسف”هز فيه عينيه تا نزلات دمعة سررررر ” : اخويا …
فؤاد : القلب عالم بيه الله والفم ساكت ؟ اش لازم علينا نديرو ؟
يوسف”هبط راسو تا مسح عينيه” : الله يفك وحايلها ياااربي ..ااخويا عارفني معاها كيداير …
فؤاد : هادي لوقت الي ربي معاها ومعانا …وقت العسر الي ربي ينزل اليسر من عندو…وقيتة جاري بيها العمل وقيتة عايشينها وعشناها وولادنا كبرو وتاهما عايشينها …لا تخلي
فمك شاكت وعطرو بذكر الرحمن والله يفك وحايلها ويفرحنا جميع ايوسف ..”خبط ليه كتفو” توگض الله يرضي عليك …
بقاو واقفين تما كيتسناو فرج الله والي يجي يبشرهم بالي تفكات على خير …الي هي فهاد اللحضة رجل فالدنيا ورجل فلاخرا …الكل على اعصابو برا ماعارفين اش طاري واش غايكون وفين وصلات …بينما الي لداخل فقاعة الولادة …
نوار”جالسة وايدها مكمشة فايد ياسين مشابك ايدو بايدها مزير عليها..كتبكي وماقادراش تحرك باش متديرش شي حركة باش تضرب شوكة كما يجب لان اي حركة غاتأذي لمضاعفات او ممكن يوقع شلل لان المنطقة لازمها تركيز وتضرب مقادة ” : امممممممممم اممممممم واربيييييييييي اهى واااااااربي ربي ربييييي..
ياسين”تاهو مفيكسي معاها حجبانو معقودين ومزييير را غير بارك فنفسو”
ا.تخدير”قاد شوكة بالعبار ضربها بقرون صباعو زوج وقابلها مع ضهرها لتحت الي ذهاتو ليه لفرملية ببيطادين ومعقم بلاصة الي عراو ليها اسفل ضهرها” : حاولي بنتي تبقاي مفيكسيا غير شوي الله يرضي عليك …داكوغ ؟
نوار”حركات ليه راسها” : همممممم امممممم…
ا.تخدير”عاود مسحات ببيطادين تاولات المنطقة قهوية مايلة لصفورة …ووجه الشوكة ضربها ليها نيشان لاسفل ضهر ” : ششش غير صبري بنتي عافاك …اييي …
يسرى”كتشوف فيها غمضات عينيها تا عصرتهم” …
لمياء : بقاي هكاك متحركيش”شافت فالفرملية او القابلة الي غاتولد نوار حيث المهمة ديالها …الاخصائية تقدر تاهي تولدها لكن ديما القابلة هي الي كتولد الطبيعي او بالغراز لان نوار فهاد اللحضة البنت لولة غتولدها طبيعي وخا دارو ليها شوكة ديال تخدير ….
القابلة “من بعد ماتكاوها حطات رجليها حلتهم وتقابلت معاها كتشوف فراس جاي …تدخلو بشكل سريع باش مينشفش الما وهادشي كامل داروه فنص ساعة سرباوها وطبعا واجد لان التدخل سريع ضروري يكون هاذشي واجد …” : بنتي “كانت سيدة فعمر الاربعينات الاخيرة دايرة زيف حجاب ودايرة بافيط وطاقية فوق راسها طبية خشات ايديها من بعد ماعقمات ودارت ليگانت” غاتحسي غير بشي وخيزات(وخز) نقوليك زحمي زحمي واخا…
نوار “بدات كتحس بالوجع كيمشيييي وخا كاينين وخزات كينغزوها” : امممممم ….
القابلة : حاولي دفعي دابا ابنتي …
نوار”كمشات فايد ياسين وبدات اول دفعة عصرات عينيها” : اعنننننمممممممممم ففففف …
القابلة : بلاتي”خشات ايدها بشوي سبقات صباع كتدورها باش تحاول تشد راس والما نازل …” عاودي دابا دفعي بنتي ثاني زحمي …
نوار”كتحس فحال كاكا بغات تخرج من قدام ووخزات لوجع فيها شي شوي مع البنج” : امممممممممممهغعنننننممممم….
يسرى” جات حدا ياسين اي عند راس نوار من شافتو مزير وغير ساكت تا دوزات على كتفو ” : مايكون غير الخير اولدي …
ياسين “تنهد وكيشوف فيها كتعصر وترخااا ” : علاش درتو ليها ديك شوكة ؟؟؟
يسرى : حيث عيات جهد ديالها مابقاش باش تعاونا الوجع مع زحمة غادي نوقعو فما لا يحمد عقباه “مابغاتش تقول شنو التالي” هادي ارحم ليها باش تعاون وتعطي جهد لولادة لولى …ههههه بنتك مزروبة تسبق …غفلتنا السقية الي طرطقات …
القابلة “جابت مقص وهي تضرب ليها البلاصة فين غايخرج راس حيث الوالدة باقا مسدوذة بثلاثة صباع عادة خاصها تكون ربعة صباع اي جهد عشرة سنتمتر فين تدخل ليد وفين يخرج راس باش تولد …”
ياسين “خرج عينيه ” : علاش ؟؟؟؟
يسرى : شش تهدن اولدي ها مغاديش تحس …”دارت ايديها تحت ذقنها جامعاهم تاهي حالتها ميعلم بيها غير الله ” يااربي كون معاها ومعانا ياااربي فكها على خير ياااربي….
نوار”حسات بوخزة تا غمضات عينيها” : ااااا ..
لقابلة : عاودي بنتي دفعي …
نوار “هزات راسها تا حسات بقلبها بغا يسكت ودازو دموعها يجريييو تا مسحهم ياسين وتحنى عندها باس راسها وايدو كتمسح على ايدها الي مكمشة ليه فايدو لاخرا ” : اممممنننننننممننننننممممممم….
ياسين”باسها فجبهتها” : ماعليش نوارتي زيدي صبري “كيهضر فوذنها” تحملي وجيعاتهم باش تشوفي عويناتهم …
#يتبع…🦋نور_الياسين(1119)#فرصة_ثانيةsana mina🐺🦋

يسرى : ولدي ماتخافش و….
نوار”طلقات غوتة حاارة ” : وااااااااااااااااااااااممممممممممممممممم…
القابلة ؛ زيدي زيدي مزال ابنتي زيدي …
لمياء : سيري بنتي دفعي تاني عاونيها …
نوار”كتهضر بصوت متقطع كيتسمع غير بشوييي كيذل على انها بحاات وجهدها عيا ” : …بغيت نرتاااح عيييييت ياسين عيييت اهى اهى …
ياسين : وااخا كاندي واخا”بنفس نبرة صوتها…هز راسو لفوق” ياااربي هون يااربي سهل يا مسهل ….
نوار : بغيت ن اعنننمممممممممممم”عصرات عينيها تاني كتزحم” ففففففف “كتنهج”
ياسين”كيدوز على شعرها الي لصق بالعرق” : تعضي فايدي ؟
نوار”مجاوباتوش عاودت تاني كتعصر” : اممممممممممم واااربي واربي واربيييييييييي اهى ….
ياسين”ماعرف مايدير تاهو ” : فيك العطش …
القابلة : زيدي بنتي هانتي قربتي عطيني صبرك الله يرضي عليك …هاااكاك …
نوار ي واواواو اهى اخى اععمممممم…”كتحط راسها وتشوف لفوووق كتنهج” هفففففف اهى ….
بقات معاها هاديك كتعصر ولاخرا كتخشي ايدها تا بان راس نصو ووجه البنية نص فيه خارج …ماحدها كتعصر ودمايات دايرة مع ضربات ليها بالمقص لتحت باش تعاون على الولادة لان البنت تقبلات وعطات براسها خارج الشي الي خلاهم يسرعو لولادة طبيعية اولا عاد يشوفو البنية تانية …وسيروم ديال الما دايز باش متنشفش …
القابلة : هاحنا قربنا بنتي زيدي عاوتاني وحدة …
نوار”عطاها ياسين ايدو وهي تعضها تا خشات سنانها فيها كتعصرررر وعينيها بغاو يخرجو والعرق نازل شلااال” : اععععععععععععععععععععععففففففغغغغغغغفففف….
ياسين”ماحاس بوالو قلبه مسكين بغا يسكت تاهو عروقاتو تكل” : يااااربي يااااربي يا مسهل سهل ياااارب ياااااا رب…
القابلة”خرج راس البنية شعرها لاصق وهابط على عينيها لاصق عليهم بالماء اللزج وشي بلايص فيهم ما بيض فحال مادة لزجة بيضاء مخلطة بدم …” : هاحنا قربنا ههههه زيدي بنتي تاني …
نوار “رجعات راسها لور” : براكة عييييت اهى اهى ….ماماااا ياسييييين براكة عافاكم …
ياسين “تحنى عند ودنيها” : غزالي الصبارة المفششة ديالي …”كيهضر بصوت كتسمعو غير هي ..” شحال صبرتي وانا بين ايدين رحمن …
نوار “كتهضر مغنغنة ” : هاديك مكنتيش معايا اهى اهى …مكنتيش باش تصبرني وتشد بايدي …مكنتيش باش توحمني وتفششني …هزيت الحمل راسي خمس شهور ماعالم بيا غير الله وخالتي يامنة اهى …
نوار : اهى اهى راك ماحاس ب”جاتها واحد زحمة خطييييييييرة ماحساتش براسها تا دفعات بلهلا يحزقو ليها ههههه” اعنننممممممممممممممم…..تا دفعات بجهذ وهي …
القابلة “جبدات البنية كتجريييي” : امصلي عليك ارسول الله ….
ياسين”شاف فالبنية كلها مطلية بالما والبيوضة ودمايات ومغمضة عينيها شعرها لاسق على جبهتها ومخسرة سيفتها” : الله الله ياربي يااارب …
يسرى : هاااا مامي حنينة جااااات …
‎ نوار”شفارها لصقو بالدموع كتحس بتحت منها كيزدح لكن باش تحس بالالم مزال حيث ضربات ديك شوكة هي الي كتخفف الالم لا غير ماشي تخدير ولكن الي كيضربها هو طبيب التخدير الخاص بهادشي …” : م ماما” صوتها تبح ماسمعها حد مسكينة …”
ياسين”عينيه دموعهم عالطرف كيشوف فديك الصغيورة كبدتو الي خرجات هازاها القابلة من رجليها تا خبطتها لتريمتها زوج خبطات وهي تبدا دير صوت “
البنية : انخخ انن “تا طلقات زواكتها ويسرى كضحك كتشوف فالفريزة الي تزادت لولة …”
ياسين : نقطة لعسل لبكرة …”حيث هي الكبيرة دابا هههه ” …
لمياء “خلات القابلة كتقطع ليها فالحبل سري ديالها” : فازي نشوفو البنية تانية …”بدات تقيص فيها وتقلب مع الايف مزال بنفس الوضعية ” غادي نتسناو شوية الى متقبلاتش غاندوزو لاخر حل …
ياسين “ماسمعهمش حاضي غير الفرخة لولى الي تزادت قلبه كيشطح ويضرب ويركز فشكل واحد الاحساس حس بيه را ميعلم بيه غير الي فنفس حالتو ” …
جات لمياء ومشات لكريشتها تا بدات تدوز بايديها بحركات كتضغط وتماصي فيها وتبرك بايدها كتحاول ما امكن تدور البنية الي بقات …
لمياء : يلاه بنتي يلاه عاونينا عافاك …يلاه …
بقات جهد شي ربع ساعة وهي كتدير فدوك الحركات املا باش تقلب ولكن بدون جدوى البرهوشة حالفة بحلوف اللولة تغرز لمها والثانية قالت ليها سيري اختي الحبيبة ماتعرفي وااااالو …انا لالاك وبنت سيدك “
القابلة : الما غاينشف دكتورة …
لمياء : بون …”شافت فطبيب التخدير” سي العلامي شوف واش مزال لادوز ديال انيستيزي غيجيونال باقيا سي نو ندوزو ل Anasthesie loco regional type Péridurale …
يسرى”غمضات عينيها من قهرتها على هاد تكرفيصة الي كانت عالمة بيها غاتوقع لبنتها ” : الله ياربي …
ياسين”ضار عندها” : شن شنووو ؟
يسرى”عصرات عينيها تا نزلو دموعها” : غادي دوز لسيزاغيان …عملية قيصرية باش نخرجو البنت قبل ماينشف عليها الما وتخنق …
#يتبع….🦋نور_الياسين(1120)#فرصة_ثانيةsana mina🐺🦋
في الوقت الي يسرى كتشرح لياسين وعينيها كتحاول تكتم دموعها الي دايزين …هزو البنية لولة داوها نيشان ينقيوها والفرملية كتسنى تشوف واش طبيب تخدير مزال لادوز الي عطاها ديال شوكة لولة ديال تخفيف الالم ديال المخاض …
ياسين”قرب يفرط ” : ماشي بزاااف ماشي يزاااف عليها يسرى ؟؟؟ …
لمياء : ولدي حاول تصبر هاذشي الي عطا الله كنحاولو ما امكن نعتقوهم بثلاثة …الحالة ديالها ماشي اول حالة كتجينا جاونا من حالتها بزاف…المشكيل الي وقع انه البنت لولة تقبلات والوالدة مزال متحلتش كلها الشي الي عرقل لينا الولادة …ماعليك غير تصبر”كتلبس فليگانت” كلشي غايدوز بيخير …
تخدير : ضروري نديرو ليها Anasthesie loco regional type Péridurale …
لمياء : تودسويت منتعطلوش مكاينش الوقت …
حرك راسو ومشاو الفرمليات ويسرى تا عاونوها ضرب ليها شوكة تاني زادوها دوز على لادوز لولة غير هي خاصة بسيزاغيان …ماهي الا دقائق تا قادوها تاني على الوضعية فين ناعسة وحولوها نيشان لعملية القيصرية ….والعذاااب الاليم دازت منو (حالتها حطيتها باش تستافدو ضيفو لراسكم معلومات جديد لهاد نوع من الحالة ماشي مشهياها فنوار هههه)
لمياء “غمزات يسرى ومشات تبذا فالعملية وهادشي كامل را عبرو ليها ضغط وعبرو ليها كلشي ودارو ليها كيس الدم وجدوه باش تباشر العملية …فهاد اللحضة الي هما كيتقاتلو برا تاهما كيتسناو وشافوهم تعطلو ولا معرفت اش جاهم كلشي عالجمر …تيليفونات محابساش كيسولو عليها وعلى ياسين …”
#برا…
يوسف”تحنى سجد كيدعي ويعاود” : ياااربي تكون معاهم يااربي تعطيها وقفة ساهلة ياااربي الى مكانت ساهلة فكها على خير يااااربي ياااربي سهل عليها ياااربي ” …
#غرفة_الولادة …
يسرى : ياسين حاول تهضر معاها باش ماتغمضش عينيها …
ياسين”حرك راسو وضار تقابل معاها لقاها فاشلة بغات تغمض عينيها” : نوارتي كاندي ديالي …”مبحوح صوت” ششش حلي عينيك حلي…
نوار”كتحل عينيها بشوييي مسكينة فشلات بجهد تا باش تهضر ماقدراتش…تحتها مشرگ ولفوق را بداو من دارو بيطادين وعقمو المنطقة …”
ياسين”كيدوز خصلات شعرها الي لصقو بالعرق” : توگضي معايا وتفكري نهار بغيتك فيه حلالي …شنو دويت ولغيت …
نوار”كتحل عينيها وتسدهم” …
ياسين : فوق الخيل كبرت بيك وعطيتك شان والمرشان الي تستاهليه مقامك عالي وماكاين ماخير من الخيل مولات الخير نطلبك حلالي …بغيتك حلالي الهازة همي والمعايا فالشدة والمحاين والفرح …حنانة ولادي …شحال بغيتيني نتي بداك القد والمقدوذ بغيتك بكتر ….
ياسين مرتو نوار ونوار راجلها ياسين من غير هادو حسبي مكاين والو …قد الي بغيتيني فيه من سنان الحليب قد الي بغيتك فيه بالمتني والمتلت …الوقيتة الي صبرتي وانا ماشي معاك عطيني من صبرك شوية وشدي معايا الهمة وفرحي ب كبدتك الي نوراتك “باسها فشفايفها ماتسوق لتا حد تما …كانت واقفة القابلة كتشوف وشافتهم تا تبسمات ليهم عجبوها وخصوصا شافتو هو كيفاش حاول يصبر رغم ان الوضع قااصح …ولدات بالغراز ودازت لعملية قيصرية راه صبر نيت وعض فالصبر …”
ياسين “عاود باسها فشفايفها وعويناتها وحناكها “
نوار”حلات فمها وكمشات عينيها حيث حسات بوخزة المشرط الي داز عليها باش فتحو ليها” : ااااا …اننننن….
لمياء”حلات ليها الطبقة لولة وتبعاتها ثانية ودازت لثالثة حلتها تا بانت المشيمة …خشات ايديها وزكات الفتحة بواحد اللعيبة كتبقى لاصقة باش تبقى الفتحة محلولة مزياان …وخشات ايدها مزيااان تا جرات راس …خرجات البنية هووووب تا جبدتها بالزربة هازاها من تحت بيطانها تاهي فحال ختها شعرها لاصق هابط على عينيها ومكمشة سيفتها وفمها صغيور …مطلية بالما ودمايات وجبهتها فيها خطوط مكمشين مع لما ديال مشيمة …كيتسمع غير طوووط طييييط طوووووط طيييييط تششش…
لمياء : الي الي الي “عطاتها لقابلة حداها تا ضربتها لمؤخرتها باش تبكي ورجعات طبيبة تنقي لنوار كرشها …. من قاعة الولادة تحولات لقاعة العمليات السريعة …مع الاسف حالتها كانت بهاذ الشكل والبنيات تزادو لكن الفارق بين لولة وثانية ساعة نيشان …تعذبات وتكرفصات ولكن كيبقى العذاب الثاني هو الي غاتعيش من بعد ما يزول البنج …ضورات البنية عندها وعاودت قلبتها راسها لتحت …
ياسين”عض شنايفو كيشوف فنوار الي غمضات عينيها مسكينة مابقات شافت والو حدها كتنين ودموعها دايزين من جناب عينيها تكرفصات بالمعقول”
البنية “طلقاتها بغوتة مجهدة كسرات ليهم البلوك بصوتها رقييييييييوق صغيور تسمعت فالول ” : كخ كخم كخم “كتبغي تخرج صوتها كتسمع فحال عطسة صغيورة هههه وتطلق بكيتها بينما دخل الهواء لرئتيها حتى طلقات بكيتها رقيوقة …
ياسين”دازو دموعو يجرييييييييو تا ماحسش براسو امتا تبسم ودار ايدو على وجهو دوز عليه ونطق بصوت حنييين مصحوب ببحة اب فرحان بازدياد اخر بنية بقات وقال” : اولها شهد بنتي وختامها مسك… بكرات فرحتي(اولى فرحتي زعما) ….
#تصبحن_على_خيييييير….

Leave a comment