Skip links

قصة : نور الياسين ج 52

 29,892 عدد مشاهداات

🦋نور_الياسين(1099)#فرصة_ثانيةsana mina🐺🦋
حيث اول شعور الابوة ليه تحركات فيه لداخل تا قلبه رفرف ياسين الشخصية العصبية عالجهد الايام والاعوام والمشاكيل الي حكاتو خلاتو يتحك حتى هو …فاش كان شخص مرابطاه تا علاقة زواج وماربط معاه تا بنت الناس را كان محتك بتمارة وغيييير معصب على الحاجة لكن العصبية الي فيه ىشدان ضد كان فالحاجة الي عارف فيها مصلاحتو ومصلاحة الطرف لاخور…حتى رتابط بنوار وحكوه المشاكيل معاها تعلم ورطاب وتعلم يرطاب مع طرف لاخور وعرف
انه را عايش ومعاه نفوس خاصو يتنازل ويعدل الكفة ميكونش هو طالع ولاخور عنيد غايبقا راسو فوسط معمعة المشاكيل وصداع ونقاشات اغلبها وهذا اذا ماكانت ديما عقيمة ….اللهم يدير بمبدأ سلك تسلك وترتاااح ….
الصباح الباكر صوت الديك وصوت الابقار والعجول صوت الحمير (حاشاكم) كيهرنطو صوت الكلاب كاتنبح صوت عباد الله واللغا فدوار طبعا هادشي طبيييعي يكون …
ياسين”خرج من الدوش كينشف وجهو عريان من لفوق غير بشورط كحل نايك قصير …تا شافها خارجة من بيت الحوايج فين كيبدلو هازا قميجة بلومارين ووحدة بيضة كرشها طالعة لفوق بقات ليها سيمانة وتدخل فتاسع …” : كاندي”باس جبهتها وطول تا بدا يتمايل بيها”
نوار”غمضات عينيها وضحكات” : ههههه نعااام “تاهي كتمايل معاه” صباح نور …احم هانت شوف واش هادي ولا هادي ؟ بزوج اختاريتهم …”هزات فيه عينيها كترمش “
ياسين : بلومارين…
نوار”حركات راسها” : صافي واخا …غاتعطل ؟
ياسين “دخل لبيت كيبدل فالبوكسر وكيهضر” : تت نتغذا ونرجع …
نوار : شنو غادير معاهم ؟
ياسين “عوج فمو ” : نشوف هما شنو بغاو ..”خرج عندها غير ببوكسر فين جلسات وهز سروال فصالة كحل الي حطات ليه” هما الي عيطو …
نوار : معاش عندك تران ؟ علاش متمشيش فطوموبيل ؟
ياسين”لبس ضوني قطن رجالي بيض عاد لبس قميجة كيسد صدافيها ونطق” : نواار مزال مانقدرش على طريق بعيدة مزال رجليا كيتبلوكاو شوي عليا تران ساعتين وهاني فكازا لا بغا الله نقضي معاهم ونرجع دغيا …”تحنى لجم شفايفها بقبلة ” بعادي عليك غير نهار بالي مشغول اللهم نقضي دغيا ونرجع …ونيت دوزو حنتكم بخاطركم …
نوار”تبسمات ليه وعضات شفايفها تا كمشات عينيها ” : اممم
ياسين : ماالك ؟
نوار : حسيت بالفارة تحركات…
ياسين : فارة !! تت ..”حك لحيتو كيشوف بجنب تا لمح ساعتو مشا هزها كيعقد فيها” نقيطات العسل نوار نقيطات العسل مانبغي لمعيور لبناتي …
نوار : وبناتي تا انا”وقفات كتنهج وتوجهات ليه كتعقد ليه فالكرافاط وهو هاز راسو لفوق ومطلع حاجبو” راني هازاهم فكرشي وتسعة شهور قربت نكملها ههه
ياسين : وااخا الالة …
نزلو لتحت سلم على يامنة ويسرى ونجود الي جات تحضر لحنة ثامن وخا بقا ليه سيمانة ويخرج …اما دراري را باقين خامرين حيث ماجاو من سفر تالفجر ..هز كاس اتاي من بعد ما فطر وسلم عليهم ومشا لبرا يكمي …
يسرى : حبسي كترة المشي انوار بقاي غير متكية هاد الاسابيع زوج الي جايين …
نوار : واخا غير بغا يمشي ونزلت معاه …
يسرى : عندك الحوض ديالك واسع مابغيناش الوالدة تحل فهاد الشهر ركزي على راحة بنتي منبقاش نوصي فيك بزاف …
يامنة : زاورك الوجع تاني احنينة ؟
نوار”بنفي”: لا خالتو من داك نهار غير الحركة كيتحركو ليا ههههه “وقفات” هاني معاه برا تيمشي …
خرجات لعندو برا لقاتو لاح الكارو عسف عليه وكيهضر فالتيليفون مع باه الي غايجي فالعشية من موسكو …كمل وشافها شادة ورا ضهرها بايد وايد فوق كرشها وجايا بشوي تال عندو …
ياسين”جبد بزطامو شي فلوس ومدهم ليها كاع الي عندو خلا غير ميتين درهم باش يتحرك تيوصل مراكش ويتيري…حيث مكاينش فين تيري بالكارط الي عندها كيستاعنو بالفلوس الي فالكوفر اصلا ديال صير ديال دار لداخل والكوفر تحتاني لصير ديال فيرمات والاراض والكوريات ودار لحليب” : الى خصاتك شي حاجة لماكلة الي دايرين جبدي من لكوفر الي فالبيت …بلا منقولها ليك …
نوار: غذا خاصنا نمشيو نشوفو دوك الكونات الي وصينا عليهم …
ياسين : يكمل صباغ لبيت ديك ساعة نعلمهم يجيبو لفراش كومبلي الي دوموندينا عليه …ماعندك فين تحركي را هضرنا بقاي متكية مرتاحة شحال ونوصي ومك توصي مال راسك قاصح ؟ “خنزر فيها”
نوار : نقوليك غير بسلامة وندخل …”رمشات فيه ببرائة يلاه بغات تهضر معاه وهي تكمش عينيها شداتها وجعة خفيفة “
ياسين : شش مالك ؟
نوار: والو غير دوك لوجيعات ديما ففف صافي مشات ..”باش ميبداش يتعصب تخشات فيه عمقاتو مبعدة كريشتها بزاف تا كوزت هههه ” ماتعطلش …
ياسين : مااامعطلش غير سيري دخلي تركني لارض سييري سيري يلاه …
نوار”عرفاتو عايق بيها وهزات راسها فيه وتقادت فالوقفة وضارت مشات دخلات خلاتو حاضيها تا دخلت ومشا ركب فسيارته باش يتوجه لمراكش لمحطة تران ..”
وصلات العشرة ونص ديال صباح تا تم نازل واحد من دراري الي هو علي عين مغمضة وعين محلولة ومخنزر ضارب مية فسبعين وشعرو مخربق مشعكك حاقد محقد كاره …جاي ويحك فكرشو تا وصل عند دخلة لقا حسناء جايا داخلة هازا مقدية وجايا وتنهج تا شافتو وهي ترجع بلور …
حسناء : امي خلعتيني …
علي”خسر سيفتو ونطق بصوت مبحوح بالنعاس” : سيري ونتي كي لوصلة ديال لخبز ميعرفوك غاديا ولا جايا …
حسناء “غوبشات فيه حيث هي غليوضة ماشي ضعيفة لي يقوليها هكاك ” : واسير ونتا مكاملش فطياب “حيث بيض وشهب هههع”
علي”طلعها وهبط ومشا داز دخل”
حسناء : الله يتبقي ستر “صرخ علي من داخل” على لعما وزحاف ازحاف العما..
#يتبع…

🦋نور_الياسين(1100)#فرصة_ثانيةsana mina🐺🦋
دخل عليهم مخربق لابس تيشرت صفر مكتوب بالاسود وسروالو كحل مكتوب بالصفر واصل عند سيقان وضياق على شكل باندة تالتحت …باس راس نجود ويامنة ويسرى ومو اما نجوى مكايناش فدارهم فدوار لمجاور …
علي : فين بنتك ؟
سارة : خرجات لدارنا عند خالاتك ومي بغاتها …مالك صابح خاسر …
علي”كيحك راسو لور ” : ماليش ماشابعش نعاس انا الي بقيت سايق من طنجة تال هنا وانا نطحن فطريق تا كلب فيهم ما بغا يشد عليا لاحوني لسوگان …
يامنة : كون قلتيها لسليمان …
علي “شاف فيها” : شتي داك سليمان ؟ هذاك هو دوز على الواد الهرهوري مدوز على سكوتي شخصيا …عندلمو …”هز ايدو قبل متهضر سارة” معايرتش نجيوة (نجوى كيقولو ليها نجيوة ) عايرت مو …
سارة “بات ترمش فيه تا نطقات” : نجيوة البغل ؟! مزيودة معاك فنفس النهار ؟
علي : وااا الوليدة “باس راسها” هاني سموحات الخااالة نجوى …
يامنة : فطر اولدي لاخرين مافاقوش ؟
علي : لا ميمتي باقين جابدين عليه …انا الي فقت دابا عندي منقضي …”ضرب قرفادتو بجهد. واحد ناموسة سمرات ليه لتم” يخخ فين داك سبراي ديال ناموس؟
سارة”عاد ردات لبال لوجهو وشعرو” : اهيا ناري مالك ؟ مالك فهاد الحالة ؟
علي : ماليش بغيت نفطر وطالع لمراكش نجيب طوموبيلة ياسين من باركينغ تران …
حسناء”مدات صخرة لسارة ” : خالتي سارة گالت لك مي مروان را فاق وخرج مع خالي عبرحيم”عبد الرحيم” لفدان لفوق…
علي : فين داه ؟
حسناء : لارض فين كيحشو الفصة على حساب العيد الكبير.لحوالا …
علي : ينطحوووك ابنتي ينطحوووك …
سارة : علي ياك لباس ؟
حسناء”دارت راسها مسمعاتوش ” : خالتي اشوية وغايجيبو معاه فالكرويلة …
علي”خنزر” : سيري جيبي لبرهوش دروك تسمر ليه شي لفعى تما ولا عگرب …
حسناء : ممسالياش انا سير جيبو نتا …
علي : وراني نجيبو بلا بيك حاير فموك …
سارة “خنزرات فيه ” : خوك را مع خالو دوز تفطر وتگعد جيب طوموبيلة ولد عمك البغل كتر فيك شلا وشوية نتا …
علي : امممم …
يسرى”وقفات” : انا نوض عند نوار باش تهبط تعوم فالحمام قبل ميسخن الحال بزاف وتعگز…
يامنة : را كلشي واجد “شافت فحسناء” ياك لحنة جبتيها من عند جداك ؟
حسناء : اه وقلت ليها معاش يدوزو …
سارة : سيري عند صبيحة ختي قولي ليها ماتنساش لكحل الي مصايبة عدوزتها(عگوزتها) …وتجي دابا تحك لنوار …
يسرى : اويلي لا انا نحك ليها ولا تحك غير علاش قدات اويلي تدخلي المراة هكاك تكرفص …
سارة : الالة دخلي سوق راسك خليها بغات تكرفص نوار راها بنتها ولات بنت دوار خليها بغات لاجر اش مشا ليك يااا مرت لوسي …
يسرى : ههههه واخا لالة اش عندي منقول…
فطر علي تحت هضرتهم شي يهضر شي يسول ونجود ناضت هي ويامنة لكوزينة ينقيو نعناع وربيع باش يبذاو طياب لحنة ثامن الي غاتكون غيييير بيناتهم صافي لاخرين تعدر
عليهم المجي بحكم الانشغالات والبعد ربعمية كلمتر ديال طريق را كتكرفص رغم ذلك …
فهاد اللحضة كان عاد وصل لكازا راكب فطاكسي صغير حمر ديال لمدينة حتى داه قدام لبنك احد لفروع رئيسية ديالو الي متواجدة تما نيت خلصو ودخل عطا الاسم وتوجه لعند واحد القاعة فين نعتات ليه لاسيسطونت تما ودخل لقاهم مجموعين منهم زوج رجال كيعرفهم وعمر الشخص الي كان خدام معاه فمراكش الي شافو ووقف صاحك فرحاان بيه وبرجوعه…
عمر : ولدي على سلاامتك وقفتي على رجليك ورجعتي بيخير…
ياسين : يعمر دارك ويسلمك عاش من استبشر بشوفة وجهك …
عمر : الله يرضي عليك …جلس …
ياسين “حرك ليهم راسو وتاهما وجلس وبدا معاهم الاجتماع بحكم عيطو ليه هما ” …
اما لالة ومالي نزلات شادة كرشها بشوية تا ضارت جيهة الحمام ودخلات لقات لفراشة مفرشة وماعنها محطوطين وسطولة معمرين والفوطة فالجليسة هي وحوايجها …حطات حوايجها بقات غير بالكيلوط فحال سترينغ وبدات تخوي عليها الما وتغمض فعينيها كتحس بالما كيكمد ليها عضامها ويجمعها …دارت صابون بلدي حتى دخلات صبيحة تتفرنس حيدات حوايجها تاهي وتقابلت معاها…
صبيحة : اش كاين اجارتي هههه مالك تلهتي …
نوار : ههههه سخفوني …
صبيحة “دارت الكيس يرطاب فالما ” : ويادلي اخر شهورك هذا
نوار : ..احم سخنتوه بزاف لا ؟
صبيحة : وااه سخون انا نبدا ليك يلاه قبل ماتسخفي…هههه تسحليتيها…بلاتي تولدي وتجي ختي لاخرا محجوبة من بني ملال ديك ساعة ولادها قربو يدخلو لمذرسة غاتكون وتجمعك …
نوار : بصح كيضر جميع ؟”بدات تحك ليها وتهضر”
صبيحة : وجميع بعد الولادة ضروري لا ولدتي عادي ديك ساعة من بعد ماتمشي لحمام ولا ولدتي بالفتيح تبداي تبراي وتجمعك …
بقات تحك ليها وتهضر معاها نيت باش متسخفش وتستافد منها تاهي …كملات وخرجات من الحمام حناكها حمريييييين ونيفها كذلك وتنهج سخفاات مابان ليها غا اشرف جاي وهي تمد ليه ايديها…
نوار : ااااجي شد فيا راني سخفت فففف…
اشرف “لقاتو مبوق عاد فايق هاربة ليه الحقيقة ماعرف باش تبلى ومشا شدات فيه كتنهج “
نوار : ففف سخفت عتقتيني…
اشرف : الي عطاك دقة تا نفختي كرشك مالو ميعتقك ؟ اويلي شتكم من كنتو تهزو دقات”زعما تهزو رجليكم ههه ” مالك ماعيطتي ليا نعتقك ولا ديك ساعة تا سميتك كنتي ناسياها …
نوار”خرجات عينيها زادت تزنگت كتر وماعرفاتو مالو تطلق تاهو ههههه ” اويلي …
اشرف : زيدي دخلي وسكتي ونتي كي فاطنة حاملة بالراگد…
#يتبع…🦋نور_الياسين(1101)#فرصة_ثانيةsana mina🐺🦋
ريحة طياب بدات تعطي ريحة دجاج محمر بدغميرة وريحة لبسطيلة دالحوت …خرجات يامنة من الكوزينة لابسة تشامير مطروز فالشويبي جامعة شعرها بفيليل ومكحلة العينين نعماسيدي بحكم غير هما عيالات فالدار لداخل …حدو جا باها عيط ليها وهزات شالها لاحتو عليها وخرجات عندو قدام الباب …
يامنة : ا با هاني …
مصطفى : بنيتي دوا معايا راجلك را قرب يدخل بهنا عيط ليك فتيليفونك ما واجبتيه …
يامنة : بالدعقة خليتو فالبيت ومشيت نطل على طياب مع العيالات جاو …واخا انا ندوز نهزو ونهضر معاه …ياكما فيك جوع ابا نعطيك متاكل ؟
مصطفى : لا بنتي الله يرضي عليك تايجي راجلك وناكل معاه ..تا ياسين قولي لنوار را عيط ليها راه جاي وتاهي ماجاوباتو يهديكم الله على هاد تيليفونات ههههه كي العدوزة كي الكنة ههه
يامنة : ههههه واخا با كون هاني …”حرك ليها راسو ومشا وتاهي دخلات تزرب مشات لبيتها هزات تيليفون مع هزاتو صونا وهي تجاوب عارفاه غايصعر عليها” فؤاااد …
فؤاد”سايق بغا يدخل لدوار شمش العصر ضاربة ليه فعينيه وعاقد غوباشتو ” : هاد لفعايل ايامناااا هاد لفعاايل …
يامنة : راني تدهيت مع طياب وخليتو فالبيت يتشارجا تهدن افؤاد …
فؤاد : خرجي عندي هاني داخل …
يامنة : واااخا ياكما بغيتي ترتاح ندير ليك طريق طلع لفوق ؟
فؤاد : نوصل مدبرها حكيم …”قطع معاها وتمشا مسافة تا وصل لفيرما وضار دخل لداخل تا وصل حدا الباب ووقف بانت ليه واقفة شادة شال على راسها وبداك تشامير شيبي تحلفي عليها ما والدة ثلاثة الرجال كل واحد يحنت لاخور وقريب تولي جدة …قربات عندو مع حل الباب وبقا لداخل كيجبد فشي وراق ويقاد ..تا وقفت عليه …
يامنة : على سلامتك”خمسطاش ليوم مشافتو”
فؤاد”خرج من طوموبيل ووقف شاف فيها يلاه بغا يعنقها حتى قشع لكحل مبين عينيها لخضرين وهو عميه فعينيه ويامنة مدير الكحل ولدو لولاد وقربو يوليو جدود والغيرة حاكماه والله يستر…عض فمو وجرها عنقها وباس راسها وقابلها معاه” : عينيك !!
يامنة : غير حنا عيالات يتحط العشا يمشيو ونحيدو مكاين براني غير ولاد لواسي وولادي افؤاد هههه يهديك الله قربت نولي جدة …
فؤاد : حروف زينك ميبدلهم لا زمان لا مكان …الله يرضي عليك حيديه بلا متناقشيني ..
يامنة : وايهديك الله …
فؤاد”ماغوت ما تعصب حدو نطق اسمها بختورية بنبرة تقولي غوت وتعصب ومينطقها بهكاك ” : ياامنااا …
يامنة : واااخا واخا ندخل نحيدو …يلاه طلع ترتاح ؟
فؤاد : ندوش ونتكا شوي …نوار ولبنات ؟
يامنة : لباس عليها ولباس عليهم دعي يفك الله وحايلها وها نقيطات لعسل جايين وتولي جد هههه”حطات راسها على صدرو”
فؤاد”شاف قدامو ” : جد بالفرحات ..”عنقها بجنب وتمو غادين داخل…طلعات معاه لفوق تا عطاتو حوايجو وجداتهم ليه غير فوقية وبوكسر ووجدات ليه دوش “
يامنة : كنتي غاتجي ديك لمرة ومابقيتي جيتي كانت لخدمة مزيرة ؟
فؤاد : ماكتابش …
خلاتو دخل يدوش ونزلات لتحت حيدات لكحل بلهلا يطريه ليها ومشات تاكدات من طياب خلات نعيمة وفنيدة مقابلينو ودخلات عند العيالات لصالون جالسة نوار فبلاصتها لابسة تشامير بيض وجامعة شعرها لفوق مكحلة عينيها بالكحل الي جابت ام سارة ومعكرة بعكر حمر خفيف وجالسة مادا رجيلاتها الي تنفخو بالحمل كتطلي ليها ام سارة لحنة مخلطة دورات ليها صوفة على الكعبة حددات ليها وطلاتها ماشي نقشات حنينة فيها روايح زوينين وماتشدش ليها لون ونفس شيء دارتو ليها لايديها …خلاتها ليها شوي وحيداتها وجلسات عادي …كيضحكو ناشطين تا جمعوهم فالطوابل وحطو ليهم الماكلة على حقها وطريقها …كان المغرب كياذن …
نوار”صونا تيليفونها كان ياسين ” : ياسين ههه ياسين : ساليتو ؟
نوار : مزاال …وصلتي ؟
ياسين : مع الوليد حدا الشهلة …
نوار : بغيت نجي عندك …
ياسين : رتاحي بلاصتك وكان تساليو نجيو …
رجعات كملات جموع معاهم تا دارو اتاي عمرات نجود وجات نجوى فالنص لحقات عليهم عاد جابها سليمان اما الياس را فازرو وجات رميساء لتاحقات قبيلة من دار جدها …وجلسات حدا نوار تا وصلها ميساج فالواتس من بعد اسبوع مهضروش حيث كان فبعثة لصومال …
موسى : بونجوغ مابيل …
رميساء”تبسمات وجاوباتو” : بونجووغ على سلامتك عاد وصلتي …”صونا ليها وناضت تجاوب بعيد فالبيت لداخل”
موسى : وييي مي ماشي ففرنسا…
رميساء : وايلي ممشيتيش ليل ؟
موسى : لا انا دابا ففاس …
رميساء : بصااح …
موسى : تقدري تجي لفاس نشوفك ولا نجي عندك لازرو ؟ ضروووري ومؤكد نشوفك هههه
رميساء : منقدرش نمشي لفاس وحدي الا اذا كانت شي حاجة نمشي على قبلها …
موسى : كاين انا وكاين حاجة مهمة …
رميساء : ههههه الله اودي ولكن انا ماشي فازرو عاد شي ايام باش جيت لجوايه مراكش عند دار ولد عمي ياسين ودار جدي هنا نيت…
موسى : اااه امتا تقدري ترجعي حيث عندي جيست اين سومين ..
رميساء : هههه “عضات شفايفها” ضروري ؟ هههه خفت نحرقك تاني..”سمعات ضحكتو رجولية كيضحك بثقالة “
موسى : مرحبا لالة غير حرقي …”حنحن ونطق بجدية” رميساء ضروري نشوفك بغيت نهضر معاك ماعنديش الوقت هنا مزير بزاف …
#يتبع…
🦋نور_الياسين(1102)#فرصة_ثانيةsana mina🐺🦋
كملات معاه ورجعات ادراجها لصالون مع العيالات الي تحط ليهم اتاي وتسربات ليهم الحلوى والفاكية …بقاو شحال تا وذن العشا وخرجو فحالهم ضاحكين ناشطين ومديين معاهم الماكلة الي بقات من طياب لولادهم ك باروك …ناضت نوار معگزة عاونتها رميساء تا وقفات ايديها حمرين بالحنة ورجليها الي خشاتهم فبانطوفتها نمرة 41 يالاه قدات ليها رجليها مع نفاخ…خرجات برا وجلسات فديك الجليسة كتبرد داخل معاها صهد الحمالة …تا شوي تم جاي ياسين وفؤاد ودراري ومنهم سليمان نيت …
ياسين”باس راسها” : مرتاحة ؟
نوار”تبسمات ليه ” : شي شوية الحمد لله …
فؤاذ”باس راسها تاهو وعنق رميساء بجنب تاهي باس راسها” : ماعليش فسبيل الله الله يسمح لينا من الواليدين …
رميساء”منخششة ففؤاد وخا كتخاف منو لكن غير كيعنقها كتنخشش فيه عزيز عليها كتحس بالامان من جيهتو تاهو …”
فؤاد”حدر راسو ليها” : هدية نجاحك غذا توصلك ….
رميساء : لهلا يخطيك اعمي “هزات ايدو باستها تا قال الله يرضي عليك”
نوار”كتشوف فيه باس راسها وبارك ليها نجاحها لماستر الي كان ممكن لو كملات تاهي قرايتها غاتكون وصلات فين بغات لكن للقدر كلام اخور مكتابش ليها تكمل اش بدات ما ربما ف حاجة اخرا…لاحض ياسين لمعة عينيها وفهم انها تفكرات قرايتها ومشا جلس حداها عنقها بجنب خشاها فحضنو “
ياسين : لعلم ماعندو سن انوار…وتربية نهزها عليك تا توصلي فين بغيتي راجلك معاك بناتك معاك ورزقك عندك …تفكي على خير وانا معاك..
اصبح يوم جديد حلات عينيها على ايديه الي كيقيصو فوجهها كيتفحصها وعاقد حجبانو …تا شافها حلات عينيها …
ياسين : نوار “حط شفايفو على جبهتها ببوسة ” شوية ؟
نوار”جمعات حجبانها” : علاش مالي ؟
ياسين “رفع حاجبو” : مكنتي حاسا بوالو فالليل ؟ “نوضها بشوي تا جلسات وحط راسها على كتفو كيدوز على حناكها بكفوف ايدو “بايتة دعقي شوية سخن ليك راسك …
نوار”حسات بوجيعة فكرشها” : اووو ممم ماحسيتش ماعقلتش اش كنت كنحلم …”كمشات عينيها”
ياسين “طل عليها ” : رجعو ثاني ؟”الوجيعات”
نوار”حركات راسها” : مممم وكيمشيو …
ياسين : بقاي جالسة غير هنا ولا نزلي وجلسي حداهم متحركيش الله يرضي عليك يقرب شهرك وديك ساعة نبقا نخرجك تمشاي …
نوار : واخا …بغيت نفطر بشي حاجة باردة …
ياسين : شنو عصير ؟
نوار : بغيتو ديال دلاع “شافتو بغا يبدا يعرعر حيث اخر مرة ضرها دلاع كترات منو تا حلف عليها” عاااافاك عااافاك …
ياسين “ناض وقف ” : هاني نازل تلاحي غسلي وجهك ونزلي تفطري بلا هضرة زايدة نبقاو نعاودو فنفس سيجي الله يرضي عليك لا تجعرينيش …”مخلاهاش تجاوبو وخرج من البيت خلاها ضور فعينيها “
ناضت من فراش ودخلات قضات حاجتها وتوضات وخرجات كتنشف لبسات عباية وشال تا صلات غير جالسة كتحس بكرشها جيهة هابطة وجيهة طالعة …كملات وحيدات العباية بقات غير بضراعة عريضة ومبردة فالخضر جمعات شعرها اسفنجة مزيان مع صهد …لبسات صندالتها ونزلات لتحت بشوي تالقاتو طالع ليها باغي ينزلها حيث عارفها ولات بطيئة
وعيانة فمشيتها مدللها على الاخر غا هي راسها قويصح الي مخاصهاش ديرو كيجيها مسكينة عالگانة …تابطات دراعو حابسة ضحكة كيتعصب عليها ويرجع فالبلاصة …
ياسين “قشعها حابسة ضحكة ” : طلقيها المفششة طلقيها وكان …
نوار : ههههههه والله مكنديرها بلعاني غير نفسي واش جابت ليا …
ياسين”خلاها تا وصلات صالون فين مجموعين ونطق ليها فوذنيها” : خلي النفس عندك تزيد فالمجيبة وانا معاك هاد ليلة ..”شافت فيه وغمزها تا بغات تهرب وتخلي ليه كرشها عندو بالمجعور السلگوط عارف نقطة فين يحطها فحوايجها “
نوار”طلقات منو ودخلات وجهها حمر بالدعقة جلسات وسط اشرف واسامة تا تنشرو لهيه “
اشرف : اررعد…
اسامة : سلامة سلااامة سلاامة …اتي مالك
نوار : نجلس حداكم توحشتكم…
اسامة : واهيهي اخيتي يتوحشك لخير ورباح…
اشرف :وصبري نكحزو راك عصرتينا الدبة ..”دارو ليها بلاصة تا جلسات مرتاحة
نوار”شافت فياسين الي جالس كيهضر بجدية مع جدو وباه واحد شخص جدي
يلاه ضورات عينيها لحايط الي قدامها وهي تكمش عينيها ورجعات شافتو تا تاكدت وهي تحلهم على جهدهم وطلقاتها بوااااحد مولاتي الغوتة تا ناض ياسين واقف نقز لعندها …اسامة طار ونزل ولاخرين كيطلو عليها مالها تا شافو فين كتشوف وهما يقشعو واااحد مولاي العقرب من نوع العقربان ذكر كحل والمشكيل ياسين فالفيرمات بزوج كيلقاهم غير فالفدادن دار مداوي عليها ميدخلوش وقليل اصلا
فين كيكونو فالفيرما حتى انه جاب فقيه عزم عليهم مايدخلوش لدار وداير لقطران يعني جميع الوسائل باش ميدخلوش وهذا كيدار دخل الله اعلم ….اسامة بالدعقة بغا يهزها مسكين مشا هز اشرف بين دراعو وتم غادي خارج بيه وهما كيتغاوتو لاخرين عمرهم شافو عقرب …اما نوار بالخلعة نزل منها البول بين رجليها وبدات ترعد …مشا علي بغا يقتلها حتى سمر ليه لايدو بشواطتو لي فيها سم تا غوتات سارة لربي الي خلقها …
#تصبحن_على_خييير…
🦋نور_الياسين(1103)#فرصة_ثانيةsana mina🐺🦋
العقربان “ذكر العقرب” او العقرب الاسود black scorpions 🦂 هو نوع من العنكبوتيات او القراد او العث بحيث كتصنف على انها مفصلية الارجل وتعتبر من الزواجف اللافقارية…تسمى بالعقرب الاسود نضرا للونه الاسود القاتم …يوجد من نوعه فالعالم بزاااف اي ما يعادل الفين نوع من لونه …كما
انه كاين بزاف فيه الالوان كاين الاصفر الي لدغة ديالها ماشي صعيبة كيف هاد الكحلة وحتى علاجها كيكون سهل على الاسود وكاين لون اخر هو الاحمر …بزاف الانواع وكل نوع متفرع لانواع من جنسه …
سارة “غوتات بسميته حيث شافت العقرب شوط ليه بشواطتو ” : عليييييييييييييييي …
فؤاد”طار لعندو جرو من حداه اما ياسين مشا كيجري هز غير بانطوفة ديالو قبل ميتحرك من تما فضربة وحدة بقجو مع الحايط حيث اصلا ضرب بشواطتو قبل ميعاود نزل عليه …”
علي”كمش عينيه كيحس بداكشي طالع معاه ومزال مبداوه الاعراض جلس لارض وناض ماعرف باش تبلى وقلبه بدا يضرب بجهد”
ياسين”ضار عند يسرى ” : نواار ..علي تحرك معايا يلاه “شاف فنوار عاد نتابه لضراعتها فازگة من تحت وجهو ولا بيض يحساب ليه الما ديال سقية طرطق ليها تا جلس لارض ” نوار مالك ؟
نوار : اهى اهى ممم علي اهى
يسرى “قاصت الما بصبعها وشماتو عطاتها ريحة البول هههه حمدات الله ماشي سقية ” : نن ماشي سقية ..”قاست كرشها حسات بتحركات البنيات وعاودت قلبت وسولتها” باش كتحسي ؟
نوار”باقي كترعد وحاضية العقرب الي تبقج تا ضار ياسين وشاف ف جدو باش يحيدو من تما عليهم عيط لحسنا مشات تجري جابت بالا باش تهزو عاد ضارت بان ليها عليى متكي وجهو تزنگ وقف عليه فؤاد ووقفوه دراري باش يطيرو بيه لسبيطار …”
ياسين : يلاه تمشي لسبيطار”شاف باه وقف علي غادين بيه ” انا تابعكم
يامنة : نوضها معاكم ماحدكم غادين تما…ياربي سلامة ياااربي …
تلفو مساكن معرفو اش يديرو حيث اول مرة تضرب عقرب شي حد مزال ياسين فايت ليه لكن فتريب وكان عندو الاسعافات دغيا كينضي راسو تما …
نوار : غير سيرو ديوه انا ماحاسا بوالو غير تخلعت فاش شفتو …ديوه قبل مينتاشر ليه سم عافاك …
ياسين”وقف ووقفها معاه ” : الخالة جيبي ليها شي حاجة تبدل …
فهاد اللحضة خارج علي معاه دراري وجاههم صفرين بالخلعة عليه اما سليمان غادي ويعصر ليه فيها …
سليمان : باش كتحس دابا ؟
علي”وجهو مزنگ” : صداع فيها صداااع “كمش عينيه ” ففف …
غاديين حتى جات حسناء كتجري هازا فايدها زلافة مخلطة خضرة وفيها لبيوضة …
حسناء : عطيه يشرب هادي يعتق قبل ميوصل سبيطار را بعيد …
فؤاد : شنو داكشي ؟؟؟
حسناء”حادرة راسها” : خاضو يشربها باش يتقيا بعدا قبل ميطلع ليه سم ويتنشر …وهادي …”شدات زيزوارا وهي تمدها لمصطفى شد ليه لعضة وضربو ليها بزيزوارا غفلو تا شرشر دم من ايدو وغوت تا بح صوته…
علي : واااععععععع خرااا
سارة : اهى اهى وااااااااااا ربيييي …
علي”قرب باس راسها وهو مسكين بدا العرق يتكب عليه وقلبه كيضرب يضرب تا حس بضبابة فعينيه …” : مغايوقع والو ميمتي غير تهدني …
فؤاد”عيط ليهم يجيبو طوموبيل حتى لحق عليه ياسين كيشوف فايدو دايزة “
سليمان : مزيان شرطها ليك
مصطفى : هادشي باش كايداويو هنا …
ياسين : مولفين مولفين …فين طوموبيل ؟؟؟ “كيشوف فعلي حالتو ماهياش عينيه جنابهم فيهم العرق وجبهتو خلاص ” تت
سليمان “شاف فنجوى” : الوليدة داك لالكول الي جبنا معانا الله يحفضك …
نجوى : واخا ولدي”طارت لصاكهم ديال اسعافات وهزاتو ومداتو ليه وحلو بقا يخويه على لسعة الي ولات جرحة يخوي ويعاود …
سليمان”كيزيد يعصر ليه فيها” : شنو داكشي فزلافة ؟
حسناء : هادي لحنة مع الحليب خاص يشربها باش يتقيا جاب الله لقيتها بقات من بارح بوحدها فالحنة …
علي : لا لا بلاش …
اسامة : اععع اش غايدير بيها…
مصطفى : شربها بلا هضرة باش تخرج ليك سم راه مزيانة هي الي كنديرو هنا …اش بغيتي دير تبقا تسناه تايتمكن منك …عصر ليه دم اولدي وزيد شرب…

فؤاد : سمع الهضرة …
علي”عطات حسناء لسليمان زلافة ومدها ليه باش يشربها سد منخرو وتكا عليها كاملة غير تنفس شم ريحة حس بمصارنو بغاو يتلاحو من فمو غادي ويقول اععع اوووععع …”
مصطفى “جات طوموبيل” : دي شي ميكة ولا طاسة باش تقيا …
يلاه غايركبو وهي تم جايا نجود جايبة شي حاجة فايدها معاها يامنة تا وصلو عندهم وشدات ليه ايدو لقاتها دايزة وهي تكمش عينيها …
نكتندغ بفمها وتندغ ويامنة جابت ثلج وحطاتو ليه فوق اللسعة
يامنة : بقا شادها ليه متحيدهاش…
سارة”شافتو كيحرك راسو وعينيه كيلوبو ويهز راسو ياخذ الاكسجين ” : م مالك اولدي ؟
ياسين”صغر عينيه” : علي ؟!!
#يتبع…

Leave a comment