Skip links

 3,910 عدد مشاهداات

🚫لايحلل النشر الا بعد أخذن الاذن مع الاحتفاض بالاسم والتقديم 🚫أجيو نضحكو شوية!!!!
قصة قصيرة
بعنوان خطيبة مصيبة
بقلم: أمين.. ODJ
مسموح النشر فجميع الكروبات والصفحات😇
🤗🦋
قرائة ممتعة….🦋
✅ التعاليق داخل الرد
✅ 200 جيم نحط القصة كاملة
ياااالااااااه الأبناااات حبيباتي💞

تقديم….
مراد كايبغي نوال و حتى هي كاتبغيه. أحلامهم ما كاتحد و بالخصوص نوال. هي حساسة و رومانسية بالزايد. وهارب ليها و بالعكس هو ما عندوش مع التعبير، يعني مافيهش الهضرة بزاف. نوال كاتحاول تهضرو و تجبد أي موضوع باش مايبقاش ساكت و لكن الغالب الله والو. بعض المرات كتساءل اشنو اللي عاجبها فيه.

☄️المشهد الاول☄️
اليوم اتافقو يمشيو جهة البحر. الدنيا مشمشة و الحال سخون. شحال هادي ما خرجو و ديما وقت ما تاصلات بيه وطلبات منو اخرجها كايكون مشغول. هاد النهار قرر يلبي ليها الطلب ولكن شرط عليها ما يتعطلوش! ساعة و لا ساعتين اضربهوم ريح البحر و يرجعوا.
فضلو اتمشاو عوض اجلسو فقهوة. الشاطئ عامر واخا سلات العطلة. مرة مرة نوال كاتحاول تشد ليه يدو وتكى على كتفو و حسات بيه كايتهرب:
– قول لي أ مراد، ياك ما حشمت بيك؟
– لا….علاش؟
– شتك وقت ما حطيت يدي عليك كتهرب مني!
– لا… غير ما كانترتاحش الى قاسني شي حد ملي نكون كانتمشى!
– أها!!! زعما واخا انا خطيبتك!
– أوكي ماشي مشكل، شدي فيدي و تكاي على خاطرك!
– شتك كاتقولها و انت معصب. الى ما عجبكش نشد ليك يديك بلاش ما دير ليا الخاطر! صافي، بناقص!
– اش هاد الهضرة كا تقولي؟
– كيف كاتسمع! ديما كاديرها ليا!
– اش كاندير ليك؟
– كاتبغي تعصبني بالعاني!
– أوف مالك ديما كاتخيلي شي حوايج ما كايناش. عرفتي اش اجيك مليح؟ يالاه نرجعو بحالنا. بناقص من هاد الخرجة!
نوال باش تقلب الموضوع تحنات، و بدات تقلع فالسبرديلة اللي عاد شرات و بلا ما تشوف فيه:
– ويلي حبيبة! راه غير كانضحك معاك. دغيا تقلقتي؟
مراد ما جاوبش و تم غادي كيتمشى ساكت. نوال بقات اللور و كاتزرب باش تلحق عليه!
– مرااااد!!! واش جينا بجوج ولا جيتي بوحدك؟
وقف كايشوف فالبورطابل. بانت ليه واحد الحجرة كبيرة، مشى جيهتها و اجلس كيتسناها.
– أوف عييت! دير ليا فين نجلس. كون ريحنا فالقهوة حسن و لا هاد التسخسيخة!
-انتي اللي بغيتي تمشاي!
هزت عينيها للسماء و بدات كتمنظر…
– الله…. مراد !
-مالك؟
– شوف النجوم كي مزينين السماء تقول مصابيح!
– واش كاتحلمي؟ اش من نجوم وحنا فوقت الظهر و الشمس حارقة وجوهنا؟
– مراد شوف شوف دوك الطيور فوق ديك السحابة. هز عينك الله شحال غزالين!
– ما كاتبان لي غير طيرة بقر (les mouettes ) كتطلع و تهبط فوق الماء!
– ياه! امالك أصاحبي؟ خليك رومانسي شوية!
– اش من رومانسي ولا فرنسي! نتي مخرجاني و الحال مطنطن و تقولي ليا الرومانسية! طبت بالشمس و حواجي لصقو عليا من كثرة العرق!
– صافي بلا ما تبقى تقلب على السبة! قول ما كاتبغينيش و صااافي!
– آش جاب النجوم و الطيور لعلاقتنا؟ أ للا كانبغيك و كانموت عليك!
– شتي ها نتا عتارفتي بأنك ماكاتبغينش!
– باش عتارفت و إمتى؟
– عاد دابا قلتيها! انت كاتبغي شي وحدة سميتها للا.
انا اسميتي نوال!
– اوكي غانعاود من الأول! كا نبغيك أللا نوال! صافي قتانعتي؟
– لا هادشي كدوب! انت ماكاتبغينيش!
– واش نمشي نلوح راسي فالبحر باش تقتانعي و تصدقي بلي كانبغيك؟
بدات تبكي:
– لا أ مراد انت تبدلتي! منهار جات ختك من الطاليان ما بقيتش نتا هو نتا. اش قالت ليك عليا؟ اهئ اهئ. ..
– فين عمرها شافتك و لاعرفاتك باش تقول عليك؟
– ما نعرف! امكن وصفتيني ليها، و ما عجبتهاش!
– هاهاهاهاها! إوا هادي زوينة!
– ها للي قلنا! عندي الحق ياك؟
– شوفي آخر مرة غانقولها ليك وتيقي ولا ما تيقيش: والله الى كانبغيك!
– بلى ما تكدب عليا و تحاول تصالحني! قلت ليك تبدلتي هي تبدلتي، و هادشي اللي درتي ماشي ترجليت!
– هي دابا انا ما بقيتش راجل؟ إوا الله إخلفك عليك!!! داخلنا عليك بالله غقولي ليا اشنو درت؟
نوال ما جاوباتش و عطاتها للبكاء!
– ما لك كاتبكي؟ اش وقع؟
– صافي مليت! طلقني!
– اوا حتى نتزوجو بعدا عاد نشوفو الطلاق!
– و باقي زايد فيه! ما بغيتيش تطلقني؟
– واش دابا كتسطاي عليا؟ تفوو على نهار! اش داني نخرج!!!
– ياك امراد كاتقوليا تفووو! هادا ما سويت عندك فآخر أيامي ياك! دابا وليت أنا اللي مخرجاك بزز.! إوا أسيدي لهلا يحوجك!
– سمحي ليا! قلتها بدون شعور. انا ما جايش نتخاصم! ماباقيش غانهضر باش تهناي!
– لهاد الدرجة عصبتك؟
– صافي سالينا! قلتليك ما تليتش حامل نهضر!
– هي دابا انا وليت كانجبد الصداع على والو ياك؟
مراد وجهو تزنك و ودنيه حمارو و طلعات ليه السخانة و كايحاول ما بديرش شي حاجة اللي يندم عليها.
– ما جاوبتنيش! دابا انا مولات الصداع ياك؟
– لا انا اللي ما مزيانش و ما كنصلاحش و كنجبد الصداع! صافي؟….ارتاحتي؟
– اشنو زعما؟ رديتني برهوشة و باغي تسكتني بهاد جوج كلمات و لا كيفاش؟
– صافي أ نوال سمحي ليا واري داك الراس نبوسو!
– يا سلام! بهاد البساطة، بغيتي تنسيني كل شي!
✍️ المشهد الثاني
مراد صبر حتى عيا ومشى كايجري و تلاح فالبحر و خا ماكيعرفش اعوم. نوال شافتو كايغرق و بدات تغوت:
– مراد! مراد! واش كاظن زعما الى غرقتي غانسمح ليك؟ والله لا سامحتك! باش نشوفو شكون اللي معاه الحق أنا و لا نتا!
من حسن الحظ شي بنات كانوا قراب و كايعرفوا يعومو. داروا اللي فجهدهم وقدروا يعتقوه قبل ما يفوت الفوت. بصعوبة قنعوا نوال باش يديروا ليه البوش أبوش حيث هي ما عارفاش و جاتها الغيرة. ملي عرفات ان حياتو فخطر شرطات عليهم ما يقولو والو و ما يبقاوش حداه الى رجع لوعيو! وافقوا و ملي كانوا تايحولوا ينفسوه دورات وجها جيهت البحر و مرة مرة كتطل عليهم. غير حسات بيه بدا يحل عينيه، شكرات البنات و طلبات منهم إبعدوا!!! ملي تمو غاديات سمعات وحدا فيهم قالت لصاحبتها: ياختي شحال معقدة هاد الصفريطة!! كون ماشي هو اللي بقا فيا كون خليناه اموت بين يديها! جاوباتها لخرى: زيدي و سكتي لا تسمعك! كاتبان ليا مهاوشة و ساكنها شي عفريت هههههه!!! سمعاتهم و دارت بحال الى ماسمعات والو…اللي كيهمها هو مراد! فاق و أول حاجة قالها:
-فين انا؟ اشنو وقع؟؟؟
نوال كانت تاتسنا غي هاد الفرصة!
نوال: ياك امراد ياك!!! بغيتي تيتم ولادك و تخليني هجالة؟؟؟ هادي هي كاتبغيني؟
مراد: علاش كدوي راني ما فاهم والو!
نوال: ما فاهم والو؟ قل أوكان تسحليتي التنفس الاصطناعي! عييت ما نفيق فيك حتى جاو هادوك…..
مراد: شكون هادوك…؟؟؟
خافت ما بكون فخبارو والو و تولي هي اللي فاضحة القضية! فضلات تجمع الموضوع حسن ما يبقى يسول شكون هاد البنات!
نوال: لا والو غي شي دراري هما اللي عتقوك!
-مراد: صافي دابا تفكرت! غرقت ياك؟؟،،
نوال: يمكن…ما نعرف! المهم تلاحتي فالماء و شربتي كثر من القياس و فقدتي الوعي و…..
مراد( قاطعها): هي غرقت!
نوال: شتك كاتقولها وانت فرحان! ياكما حسيتي بشي حاجة؟
مراد: شي حاجة بحالاش؟
نوال: لا صافي نسى!
مراد: فينهم هاد الدراري بغيت نشكرهم و نتعرف عليهم؟
نوال: لا صافي! ركبوا فوق ماطرهوم و ديماراو…من قبيلا مشاو!!!
مراد: كاع ما كين ليتراس ديال الروايض!!! فينهم؟
نوال: هاد النوع ديال الماطر ياقي جديد كايمشيو عموديا بحال الهليكوبتر. تقدر تقول كايطيرو داكشي علاش ما خلاو أثر!
مراد: همممم ما كانتش فراسي! قولي آش تانديرو هنا؟ وييييي دابا ذكرت!!! عصبتيني و كنت غانتاحر!
نوال: مازال ما بغيتيش تحشم! هي دابا انا وليت مجرمة؟؟؟ ياك هادشي اللي بغيت تقول! كون ما غوت و ندبت حناكي و ترجيت الناس كراك متي! دابا هادا هو خيري!

🤷المشهد الثالث و الأخير!!

مراد مع العيا ما تلاش قادر يهضر و حاول حتى وقف و تم غادي بلا ما يعرف فين. نوال تبعاتو ماللور كتجرجر حيث قهرتها الرملة و ما قادراش تلحقو..
نوال: مراااااااد واش تسناني ولا غانرمي راسي فالبحر؟؟؟ و الله او مايكون راجل اللي يدير ليا البوش ابوش لا فقت! يلاه!!! باش تعرف تفيق بالبنات!
مراد سمعها و وقف حتى وصلات. بدا يشوف فيها بحال الى اول مرة غيعرفها. النظرة ديالو كانت مخيفة و اول مرة نوال كتشوف مراد آخر.
مراد: آش من بنات على من تتهضري؟ (قالها و هو معصب كثر من قبل)
نوال خافت و ما بقاتش عارفة آش تقول. فضلات تنازل شوية و تنقص من النكير لا يولي هو اللي مغرقها. بطريقة كلها غنج و دلال دارت بحال الى عضتها شي حاجة فرجلها وبدات تبوحط:
-أاااااا مراااااد حبيبة! مامااااا شي حاجة عضتني فرجلي. ناري السم السم. غانموت أحبيبي و نخليك!… واعدني ما تخونيش ملي نموت. ياك ما غاتخونيش؟ عارفاك كتبغيني…. اااااااه عتقني
مراد ما بقى عارف واش يكدب ولا يصدق. تحنا تايقلب فرجلها ما لقا تا جرح…
مراد: ما كاين والو!!!
نوال: امكن قرصاتني و هربات. خلات فيا السم بنت الحرام و مشات اهئ اهئ اهئ
مراد: شنو هي؟
نوال: ما نعرف! يمكن شي لفعة ولا عقرب ولا شي حشرة ديال البحر
مراد: كاين شي حشرة ديال البحر؟؟؟
نواال: صافي حبيبة ما بقاتش كضرني… باقي ما غانموت، ولادنا ما غايتيتموش ونا ما غنوليش هجالة!
مراد: ياك؟ إوا الحمد لله على سلامتنا!!!
نوال: حبيبي، كجاتك هاد الخرجة؟ زوينة ياك؟ و فيها المغامرات ههههههه. آش بان ليك المرة الجاية ندوزو النهار فشي جبل؟؟؟
مراد: لا بلاش!
نوال: و علاش أحبيبة؟ تما الجو نقي وصحي و تايكونوا الناس بزاف!
مراد: حيث الى تعصبت غنتكركب من الفوق و ما تلقاي ما تجمعي فيا باقي! بغيتي تولي هجالة؟؟؟
نوال: ما سمعنا فالك! يلاه صافي بلاش!
مراد شاف فيها وتبسم و شدها من يدها و قال:
مانعرف آش شادني ليك؟ و ما عرفتش علاش تانبغيك و ماعرفتش فين غايوصلني هاد الحب!
نوال: عند العدول!!!
مراد: ولا برشيد!!! زيدي وكان! يالاه نمشيو جيهت الحوت فيا الجوع!
نوال شدات فيدو و تكات على كتفو و مرة مرة تلوح شي بوسة ملي تبان ليها الطريق خاوية
نوال: عارفة راسي حميمقة و ما عندك الا تصبر احبيبة!!!☺
مراد: همممممم هههههه
انتهى!
بنات دخلو صحاباتكوم وتفاعلو مع الأجزاااء باش نحطو قصص خرين✅🍯