Skip links

قصة : استئثار ج1

 4,260 عدد مشاهداات

°اســــــتئـــثار°
                              الجزء : 1
                            By : Bella El filali 🍷

كاع داكشي لي بغيت لقيتو .. الا هو، الشخص المثالي لي بغيت نلقاه فحياتي ويكون نصفي الثاني كاع مالقيتو.. ولا غانلقاه.. باش نعتارف انا شخصية معقدة بزاف.. كاع داكشي لي نبغيه بغيت نلقاه بلا زيادة بلا نقصان..
وكنراهن بحياتي ايلا بغيت شي حد.. هندير مافجهدي باش يكون ليا بوحدي!!

تسد كتاب المذكرات اثر بضعة اسطر لي كتبات.. هزات كاس دالما كتروي عطشها وبعض قطرات الما خلاو كرزتيها فازكين..
وقفات حدا شرجمها كتسد فيه بعدما طفات نور المكتب.. تسدحات فالسرير وهزات تيليفونها كتكمل اخر حلقات مسلسلها المفضل
… : ااا شيت.. حمارة فاش تفرقات عليه، ما فيلم ما والو هادا.. “شيرات بالتيلي بحذر فوق الكامة لي حداها و تخشات فالغطا كتطلب نعاسها”

“وعد المرنيسي.. بنت اكبر سياسي فالمغرب.. فاش ماتت مها عاشت مع باها .. كانت هي المدللة طول السنوات لي عاشت فيهم مع باها.. واول مادارت 18 عام مشات لروسيا تعيش بوحدها.. وفسن 24 عام قدرات تكون شركة خاصة بيها ديال تصميم المجوهرات.. وكتعتابر وحدة من ملكات الموضة فالعصر الحالي… “

                   الساعة 10 صباحا .. روسيا
نزلات من سيارتها وهي كتشوف غير لفوق.. علات حاجبها فالكارد لي بالزربة فهم قصدها و ركب فلوطو.. دخلات من باب الشركة وكلشي كيرحب بيها بينما هي كتحرك غير يدها.. ومرةة مرة كتطلع حجبانها وتزيد
قربات ليها مساعدتها الشخصية كتعلمها بالجدول ديالها.. وقفات اول ماسمعات
” عندك اجتماع مع شركة مغربية.. السيد محمد المرنيسي هو لي وصا بشدة على اهمية هاد اللقاء و قال… “
وعد : لغيه
م.ش: ك كيفاش؟
وعد : لغيه.. ساهلة.. ل غ ي ه
م.ش : ولكن علاش.. مبقاش ليهم بزاف ويوصلو
وعد : اخخ تالا.. عاماين ونتي معايا ولكن باقا مكاتعرفيش انا مكانحملش الخدمة بالواسطة.. لا بغاو شراكة معايا خاصهم يوريوني علاش غادي نديرها
تالا : و باش عرفتي بلي باغيين يديرو شراكة مع شركتنا؟
وعد : وشنو متلا باغيين يجيو يعرضونا لعرس؟ عيطي على بابا و علميه..
تالا : امرك!!

يتبع…

°اســــــتئـــثار°
                             الجزء : 2
                           By : Bella El filali 🍷

دخلات للبيرو و هزات كاس قهوتها و راسها حاني على الوراق.. قاطع تفكيرها صوت الفون بالزربة جاوبات
الاب : تبارك الله على بنتي كبرات لدرجة ولات تعارضني فكلامي!!
وعد : اش وصلنا لهاد الهضرة.. حاشا هضرتك هي اللولة غير هي الواسطة لاا
الاب : ا وعد ا بنتي راه شراكة اعوام عندي تم.. نواعدك مغاتندميش
وعد : هفف.. انشوف ابا غنشوف.. تهلا فراسك
قطعات الخط بلا ماتسمع جواب.. علات راسها كتسمع صوت صاحبتها كتهلهل من برا..
وعد : بدينا تاني
بالزربة تسمع صوت دقان مجهد ودخلات منو بنت شهبة.. قصيرة ولي شافها مايعطيهاش 24 عام..

“عبير الياسري..24 عام،من صحاب وعد لي بقاو معاها ملي شدات الباك وطلعات لروسيا معاها.. وحاليا عندها شركة ازياء تابعة لشركة وعد لكن كتبقا هي المسؤولة عليها .. من اب مجهول وام ميتة… “
عبير : وعدوشتيييييي توحشتك يا حسك
وعد : تولي تقولي ديك وعدوشتي نشتف عليك .. العار قولي ليا جايبة شي قصارة تكون محمرة الوجه!!
عبير تسدحات فوق فوطوي صغير تم واخدة راحتها : شوفي نتي .. هاد الدخلة لي درت مكافياش الغرض زعما؟
وعد ناضت عندها : احسن حاجة درتيها فحياتك كلها.. عرفتي شنو! نوضي انا عارضة عليك
عبير : حلفي.. قولي والله تا بصح
وعد : رديتينا دبا كنضحكو!! شتي الضسارة
عبير : محات عليك.. “هزات صاكها” يلاه زيدي

وقفات لوطو فوحدة من افخم المطاعم لي فروسيا ولي ديجا عارفين بلي صاحبها مغربي عندو سلسلة مطاعم فجميع الدول باسمو..
هبطو بكاريزما تخليك تبقا غير حال فمك و عينيك فيهم وجمالهم وهيبتهم…
شافت وعد فالشخص لي ديما كيعرفها وبحيت انها معروفة تم طلعها لجناح خاص بالشخصيات المعروفة وديما كتجي ليه…
عبير : ناري البلاصة زوينة يا الصكعة
وعد : حينت انا لي جايباك ليها متلا!!
عبير : نعل ديلمي انا نيت لي شكرتك
طلعات عينيها بحضور قوي حسو بيه كلهم .. كانو 4 دالرجال جوج لور وجوج قدام، المشكل ان واحد ينسيك فالتاني
… طلعات عينيها بواحد كان وسطهم .. عاقد تخنزيرة على 11 و عينو تابتة فبلاصتها
وعد : الناس تالفة فحياتها وانا تلفني هاد الزين لي دخل!!
عبير : اينا واحد فيهم؟
وعد : لي لابس الكحل
عبير خنزرات فيها بالزربة : وا ز*ي راه 4 لابسين الكحل
وعد : بلا بلا تانتي فحال فحال.. داك الطويل لي فالوسط لابس قميجة مطلعها شويةة.. داير مكانة فالنقري.. اه بصح كاع مداير خاتم كاع مامزوج..
عبير : شتك كتبلاني تم!! كولي كولي ونوضي فحالك راه تابعاني خدمتي
وعد : عبير
عبير وهي كتشرب فالعصير : هممم
وعد : عجبني..هاداك ديالي.. !

يتبع..

°اســــــتئـــثار°
                              الجزء : 3
                           By : Bella El filali 🍷

                           | الفصل الأول |
             15 طريقة للحصول على مالك قلبــك
                           |القاعدة الأولى…
                           الانطباع الأول|

عبير : كححح كح كح
وعد وعات على راسها : سلامتك.. بلا شوهة غتشوهيني!!
عبير : كح كححح.. مستوعبة اش كتقولي ياك؟؟
وعد : ياب ياب مستوعباه مزياان.. عجبني وحطيت عليه عيني.. يعني ديالي
عبير : ا شيت اول مرة نشوف عجباتك شي حاجة.. هاداك راه ديجا مشهور .. سميتو تنسات ليا
وعد : سبحان مبدل الاحوال.. يلاه نوضي فحالك نمشيو فاللخر غانعرفو غانعرفو
عبير : لفين؟
وعد : نغسلو معاهم القشوع.. فين غنمشيو متلا غاديين فحالنا شهاد الاسئلة دالنم!!!
عبير : واخا.. تعطلت انا كاع
دورات راسها جيهت طبلتهم لقاتها خاوية.. تنهدات وشافت فوعد لي هبطات لتحت وخلاتها

                    فالشركة.. الساعة 4 ونصف
حطات ستيلو من يدها كآخر حاجة غديرها.. هزات عينيها فالساعة لقاتها قريبة 5 وهي باقي ماخرجاتش للاجتماع وكيعيطو ليها كتقولهم مشغولة..
هزات صاكها وناضت كتكسل فحال القطة بشويةةة عليها مخاصها والو .. ركبات لوطو ديالها وكسيرات بالزربة للشركة لي غادير معاها شراكة لمدة شهراين.
وقفات حدا قاعة الاجتماعات ودخلات بلا متدق.. كيبان ليها شخص عاطيها الظهر و جالس على كرسي كحل فحال ملابسو.. دخلات للقاعة لي كانت ساكتةة وبدا كيتسمع فيها صوت مشيتها “طق طق طق”
شافت فلاخر لي قلب الكرسي وملامح وجهو باردين.. كان نفس الشخص لي تلاقات معاه فالمطعم ولي بصمات حتا يكون ليها.
وعد بابتسامة ثقة : سيف الدين سلطان ..
سيف الدين بصوت رجولي خلا بؤبؤ عينها يرجف لثانية : وعد المرنيسي.. عرفتي شنو تاني حاجة كنكره مور ندير شراكة؟
وعد : اش
سيف الدين شاف فيدها لي بقات تم منشورة وشاف فيها : هي شي حد يتعطل.. عرفتي شنو درتي نتي؟
وعد فحالا تفيكسات تقول غير اش : اش
سيف : تعطلتي.. “شدها من فكها مزير عليها و همس فودنها بشوية” غانعضرك حينت مكاتعرفينيش.. لكن نقسم لك لا زادت تعاودات مغانعقل لا عليك.. لا على باك!! فهمتي؟
وعد بالزربة حركات راسها كتحس بفكها غايتهرس.. اول ماحيد يدو بعدات عليه كتمسد فيه وهي كتحلف ليه بلي غاترضها ليه متلت مربع.. وكتحمد ربي فسرها حينت القاعة كانت خاوية اما كون مالقات فكرامتها ماتجمع
سيف الدين : الوراق؟!
وعد ببحة خفيفة : ماجبتهمش
سيف الدين : وعلاش بالسلامة؟
وعد هزات كتافها بعدم اهتمام : بغيت وصافي
شاف فيها وضحك ضحكة الغدايد : اكتر انسانة غنكره نتعامل معاها لهاد الدرجة!!
خرج جاب وراق من البيرو الخاص فيه ورجع.. تمات الصفقة وكلشي داز هو هاداك.. هو سنا على شراكة لمدة شهراين.. وانا سنيت فدماغي على 14 قاعدة لي بقات

القاعدة الاولى.. تمت بنجاح.

|القاعدة 2|اجذبي انتباهه|

                         روسيا •6:00 صباحا•
صونا التيلي وناضت كتكسل.. بدات كترمش بعويناتها بشوية كتستاعد باش تفيق.. شعرها مرون للسما و جناب عينيها معمش..
حلات نص عين وبقات قرابة 20 دقيقة غير كتشوف فالسقف،علات يدها حلات الشرجم باش يدخل الهوا ودخلات للدوش باش تطرف حالتها
غسلات لحمها كلوو و هزات حوايج من الماريو كانو ديجا مقادين البارح..
وقفات حدا المرايا كتحط آخر لمسات على ستايلها لليوم هزات التيلي والسوارت وخرجات برا…

                              °فالشركة…°
وقفات حدا شركتها و نزلات ونفس الحركات لي دارتهم البارح عاوداتها وراسها كيشوف غير فالسما.. وقفات حدا تالا “مساعدتها الشخصية” كتشوف فوراق الخدمة لي عندها و رجعات نزلات للباركينغ هزات لوطو و كسيرات لشركة سيف الدين سلطان..!

نزلات من لوطو مبتاسمة على الخطط لي فراسها،هزات يدها وحيدات نظاظر على عينها ضاربين فيهم الشمس.. بتاسمات للكارد وعطاتو السوارت مكملة طريقها فرحانة بلا سبب..
هضرات مع السكرتيرة ديالو ودخلات للبيرو هو لي كان كيشوف لجهة الزنقة وملابسو كلها كحلة
وعد : صباح الخير
سيف الدين سمع صوتها ومابغاش يجاوب.. ناض من الكرسي كيشوف فيها ورسم ابتسامة شر فحالا كيقولها غنجاريك فمصايبك.. علا حاجبو وقال بنبرة رجولية خشنة خلا قلبها يتهز ويبدا يخبط
سيف الدين : صباح الخير !!
وعد : مغاديش تقوليا علاش جيتي؟
سيف الدين بقا كيشوف فيها.. هي عارفاه مغاديش يسولها وهو عارف بلي هي عارفة بلي هو مغاديش يسولها علاش كتوفر على راسها الهضرة!
سيف الدين : وعد..
وعد : نعام
سيف الدين : انا داير مع شركتك شراكة.. حينت باك صديق الواليد من شحال هادا ومابغيتش نرفض،ماشي راجلك لي غتبقاي جاية عندي نهار وليل..
وعد تزيرات ولات حمرة من القمعة لي عطاها.. مرضاتش تبين ليه بلي تقرصاات و خصوصا وهي بانت عليها
سيف الدين : ميبقاش فيك الحال.. باقا غتسمعي لي غايعجبك ولي مغايعجبكش.. وماحدي مكره نخدم معاك.. غير وجدي راسك للاسوء.. ا وعد المرنيسي…
وعد : اهاا.. دبا نشوفو اسي سيف الدين سلطان..

كملات شوفتها فيه باستهزاء وهو طلع وهبط فيها بحدة من شوفتها بطريقة خلاتها تتوتر وتشتت انتباهها.. اما هو نطق بصوت قوي خلاها تقفز
سيف الدين : ويلاااااه واش غنبقاو هناااا !!

جبدات مشروع من صاك صغير كان محطوط وملوي باتقان عطاه ليها باها.. هو نيتو المشروع لي غايخدمو عليه لمدة شهرين و غايخليوه موضة رائجة فالاسواق الروسية وغيرها..
جلسات كتشرح ليه متناسية شنو وقع قبيلة.. بينما هو عاقد حواجبو وراجع على الكرسي باللور كيسمع لها ومرة مرة كيطلع راسو فتعابير وجها و حركات يدها..
سالات و هزات قرعة دالما نزلات عليها دقة وحدة.. بينما هو هز الورقة لي مرسوم عليها نقشات كتيرة كتحدد المناطق لي غيكون فيهم الالماس والمناطق لي غايكونو مزينين.. عملها متقون و مكاين مايقول عليه ولا يعيب..
هزات عينيها فيه بلمعة فخر من انجازها لي سهرات عليه ليالي وهي كتحاول تقاد فيه.. عارفاه عزيز عليه العمل المتقون وهي وفات كتر من حقها..
وعد : شبانلك
سيف الدين ناض عندها وشاف فيها لحظات بصورة مبهمة.. حط يدو على راسها بينما هي تفاجئات وعلات راسها فيه بالزربة : تبارك الله عليك
رسمات ابتسامة عرييضة على وجها ولاخر حيد يدو على شعرها ورجع لتخنزيرتو المعتادة..
سيف الدين : لا ساليتي خرجي..
خرجات عينيها فيه ياك عاد دبا كان كيشكر فيها..
وعد وهي كتجمع وراق المشروع : نسولك؟
سيف الدين: سولي
وعد : واش عندك شي مرض نفسي؟ واش عندك انفصام فالشخصية اي حاجة زعما نقدر نعاونك
سيف الدين بقا لحظات كيشوف فيها ماعرفها منين تسلطات عليه بهاد الهضرة : سيري ابنتي خرجي فحالك انا ضارني الراس ونتي غتكملي عليا بهاد الاسئلة ديالك
خرجت كنجمع فكرامتي بشوية عليا فنفس الوقت مستعجلة حينت باقي شحال من حاجة.. فنفس الوقت انا فرحانة.
القاعدة 2 تمت.. جذبت انتباهو ..

يتبع غدا 💚

°اســــــتئـــثار°
                              الجزء : 5
                          By : Bella El filali 🍷

                     |القاعدة 3|تقربي من عائلته|
خرجات من البيرو و الضحكة واصلة ليها لودنها .. هزات التيلي كتشوف فلي كيعيط ملقاتها غير صاحبتها.. مكانتش باغا تجاوب ولكن حينت فرحانة قررات تكافأها وتسمعها صوتها

وعد : شو حلو حبيبي شو حلوو
عبير : !!!!!! كون غا سكتي وماغنيتيش
وعد : المهم حلي ودنك وسمعيني.. بغيت شي معلومات بساط على عائلة سلطان
عبير : يا جدك باغا تخرجي عليا لا مقادة عليهم …
وعد : واسمعييي قبل ماغاندير لك شي شوهة تسمع من فين وفين
عبير : هاني كنسمع
وعد : بغيت غير نعرف لا كاين فالعائلة شي اخت ولا اخ صغار .. شي حاجات بساط هاكدا
عبير : ولا مامقلباش بغيتي تقلبي عليهم قلبي لراسك مقادة على صداع مع الكبير فيهم.. فخبارك شنو كيقولو عليهم من المافيا
وعد : لا حول ولا قوة الا بالله قالك مافيا .. سيري سيري تلاحي نتلاقاو فالكافي ديال ديما

قطعات عليها وركبات فلوطو بعدما تسنات يجيبوها ليها من الباركينغ.. بينما فبلاصة خرا ومن الاطلالة دالبيرو ديالو مراقب كل خطواتها..
سيف الدين : غير لعبي بديلك.. نهار نلقا عليك شي حاجة غاتخلصيهم بالضوبل…

هز التيلي ودار اتصال بسيط باش يتأكد من هويتها.. واخا باها صاحب باه المرحوم ولكن كيبقا الحظر واجب.. ماشي ديما الخوت كيبقاو معتارفين بدمهم..!

خرج تاهوا من البيرو بهيبــتو الطاغية.. هدوءو طـول ما هـو زوين طول ماهو خايب.. بحيت واخا تطلع للسما وتنزل ماتعرفش اش فدماغو ولا اش فتفكيرو…
خرج من الشركة قاصد الباركينغ والكل كيحيه.. شي كيعطيه الطريق فين يدوز ويبعد عليه وشي كيحيه واخا من بعيد باش يبان راه قاصح ومخايفش منو.. عكس ان هيبتو كتحس بيها طاغية من فين وفين

ركب فلوطو وكسيرا بالجهد ، بدات اغنية ديال الحر و جهد الصوت مخرج يدو من الشرجم و عضلات كتافو كيتحركو مع كل حركة كيديرها

~ مهما كان مهما خانو عشران
واخا يتافقوا عليا فضهري ويعدلو شي بلان
قد ما بخ صدري دخان قد مقهرت العديان
كل مرة كاحط الروايض على لي بدلتني بفلان
ممعايا حد فالقدام زاج كحل فالبيبان
كنشوف كيتحركو الفوام عارفين شكون واخا منبان
كيقولو نهايتي فكفن اولا مور القطبان
كيعاودو على لي ماجي فحال لي مأكدين منو مزيان
فضهري كيقولوا مريض معقد و اناني
سمعوا لي قالو الناس مفهموش كلام لساني
شفوني كيف ما بغاو عرفت بلي عدياني
رسموني بأبشع صورة باش نبان واحد تاني ~
                                          …

وقف حدا الفيلا ديال عائلة سلطان.. الكارد محاوطها من جميع الجهات و الدنيا تم كتصفر غير اشخاص بلباس كحل كيخلعو واقفين تم..
دخل من الكلوار دالفيلا عاقد حواجبوو والكارد كلهم كيعطيوه التحية.. وقف حدا المدخل ديال الجردة كيسمع الغوات والضحك على الجهد.. عارف ختو مكاتقربش من بنات ولكن شنو كيسمع ماعرفش وتخلطات عليه الضحكة مع العصاب..
قرب للمصدر دالصوت كيشوف بنت شعرها قصير حد ودنها “ماريا” مع جوج بنات ماقدرش يعرفهم بحكم انهم عاطيين بالظهر
ماريا : هأ.. خويا جيتي
سيف الدين : شكون معاك؟
ماريا دبلات عينيها بحزن.. من ديما مكانش عاطيها وقت للهضرة.. ومحاسبهاش ختو القريبة منو وماعاطيهاش اهتمام كافي ..على حد علمها.. حمحمات بحرج وقالت : هادي وعد المرنيسي.. وهادي عبير.. بجوجهم صحابات ، واش عاقل على احمد المرنيسي؟ راه بنتو كنت كنلعب معاها شحال هادا فاش كنا فالمغرب
سيف الدين طلعات معاه السخونية .. كيفاش قدات تعرف بلي عندو ختو بهاد الزربة.. هو لي كان ديجا داير بلي ختو وحدة ميتة مع مو وباه!
دورات راسها بضحكة نصر وشافت فيه هو لي مخنزر وعاقد الشوفة فيها .. متنكرش بلي خلعها ولكن مابيناتش
وعد : سيف الدين سلطان..
دوا بصوت خشـن وكانو كيتوعد ليها ببزاف دالحاجات.. وغير صوتو كان كفيل باش يوصل ليها بلي قوداتها هاد المرة بالبيان : وعد المرنيسي!!
يتبع…

°اســــــتئـــثار°
                              الجزء : 6
                          By : Bella El filali 🍷

                 |القاعدة 4|كوني جريئة بشكل انثوي|

علات عينيها فيه متجاهلة خوفها من نضراتو لي كون كانو قرطاس كون قتلوها.. بتاسمات بجانبية عاضة على طرف شفتيها
وعد : سيف الدين سلطان..!
ماريا : ءء.. واش كتعرفو بعضياتكم؟
وعد :  “حولات نضرها لماريا مع حركة سريعة بيدها كتعنث على سيف الدين ” سيف الدين شريك فعمل لخدمتنا.. شفتي الصدفة!!
ماريا : ” بضحكة بريئة مفاهماش شنو ضاير ” يب يب صدفة زوينة.. المهم حبيبتي وعد انا غانمشي دبا عندي خرجة مع صحاباتي.. خويا نقدر نمشي ياك ؟
سيف الدين ملامح وجهو ولات حمرة.. كيشوف فيها كيفاش كتهضر مع ختو وباين بلي مدة طويلة وهي كتدي وتجيب معاها فالهضرة.. دات متدي وتجيب وحيت ختو نية دالله تاقت بيها بسهولة..
سيف الدين : اه خرجي.. لكن ماتعطليش .. زيدي غانوصلك فطريقي
ماريا بفرح حاسة بيه عطاها شوية من وقتو.. بكل فرحة علات راسها وسلمات على وعد وعبير هاد الاخيرة لي بقات كتقفق ملي دخل سيف.. والشوفة لي دار ليهم بعينيه

عطاهم بتخنزيرة كأنو كيقول ليهم نتفاهمو من بعد.. خرج برا و سرعان ماوقفو صوت انثوي جريئ كينده ليه
وعد : مسيو سيف الدين
وقف للحظات ورجع ضار لجيهتهم قارن حجبانو.. ضور راسو بحركة سريعة بمعنى نعام
وعد بصوت محلون : محتاجاك باش تشوف معايا اخر وراق ديال التصميم
سيف الدين : ماشي وقتهم

خرج تابع ماريا بلا مايزيد كلمة ولا هضر بزاف.. حدو جاوبها وخرج فحالو،بينما هي بدات كتلعب فيديها بتوثر و معارفة فاش حطات راسها.. كاع داك الخوف لي كبتاتو داخلها فاش كان حداها بيناتو حدا عبير وحتا هي مكانتش قل منها

عبير : ياااربي فاياش مدخلة راسي معاك.. عرفتي شنو انا اختي ماعندي دخلة فيك .. بيناتكممم
وعد : واسكتيي شوية.. بغيتو هي بغيتو ماسوقييش واخا نفهم ندير لي بغيت
عبير : هادشي راه مااشي منطقي.. اش كتحاولي تصنعي ليا تم؟؟ علاش باغا دخلي راسك فالصدااااع،ديري علاش وصاك باك ودخلي سوق راسك سيتوو
وعد “قربات ليها شاداه من كتفها مخنزرة ومقصحة فيها الشوفة ”  : فاش تبت عليه الشوفة قلت غايكون ديالي.. هي ديالي، طلعات نزلات ديالي وبغيتو.. والحاجة لي كدير عليها وعد المرنيسي عليها كتكون ديالها،باغا تعاونيني مرحبا مباغاش لهلاك..!!
عبير : الله يعطيني الصبر معاك.. زيدي فحالك نخرجو من هنا

                        🍂الساعة 8 مساءا🍂

جالسة فبيت رسم كبيير عندها فدارها.. رامية عليها شال رمادي و يديها ووجها عامرين الوان صباغة.. كملات رسمتها و خرجات من البيت بعدما تأكدات من اغلاقو.. دخلات للحمام وخدات دوش سريع تحيد عليها الوسخ ديال الالوان.

لوات عليها فوطة مغطية مفاتنها وهزات فوطة صغيرة خرا كتنشف فشعرها المبتل.. وقفها صوت التيلي لي كيصوني وحطات الفوطة من يدها
وعد : الو !!
سيف الدين : وعد المرنيسي..؟!
وعد : ءء.. هي انا
سيف الدين : معاك سيف.. سيف الدين سلطان
وعد : اه اه عرفتك .. شنو سبب الاتصال المفاجئ؟
سيف الدين : خاصنا نهضرو.. شوية ونصيفط لك باش تكوني واجدة.

         حطات الفوطة من يدها بالزربة مستغربة.. ماعطاها راس الخيط ماهناها.. ولات تضور من هنا لهنا كتعض فصباعها
وعد : هادا فاش كيفكر؟؟ يا كما باغي يقتلني حينت عرفت ختو؟؟ لا لا كان كيدوي مبرد.. اويلي راه لي كيقتلو كايكونو مبردين!!!!!
وصلها اشعار من تيليفونها وبالخف شافتو من برا.. بغات تدير فيها عزة نفسي وهزات راسها كتمختر كتفكر اش غتلبس

وقع اختيارها على لبيسة بيضة فوقاني سميطات و سروال ديالو واسع من لتحت .. دارت حلقات صغار و سنيسلة هزات التيلي وخرجات بالزربة حدا الباب

وقفات لوطو ديالو حدا باب دارها.. هبط الزاج وماعبرهاش كيشوف من جيهة الزاج لكبير لي حداه
سيف الدين : ركبي
وعد : فين غانمشيو
سيف الدين : لجنهم الحمرة..
يتبع…

°اســــــتئـــثار°
                              الجزء : 7
                          By : Bella El filali 🍷

نطالق بالزربة لوجهتو لي كانت كافي قدام حافة خاوية وكاع مامعروفة.. يلاه غتحط يدها باش تحل الباب تنزل شاف فيها مسولها
سيف الدين : فين الوراق؟
وعد فحال ضربها الضو.. تصمكات و الهضرة مافهماتش تخرجها..
سيف الدين بهدوء كمل على ما بيها : وعد فين الوراق
وعد : ءء الوراق!!! نسيتهم
سيف الدين صبرو تقادا.. مبقاش قاد يستحمل تصرفاتها الطايشة فاللول تعطلات ونسات الوراق و دبا نسات الوراق وحتا وصلو لفين غاديين عاد هي تفكرات

هز يدو حتا هزها ورجع ضربها مع الفولون

سيف الدين : واش كنبان لجدك انا لعبة هنا؟ وااااااش مالقيتي علاامن تسلكطي غير عليا انا؟ حسابليك انا بكلمة جوج غنشوف فيك.. اسمعيني ابنت الناس، اقسم بالله ومتقادي معايا حتا غنوريك الليل فعز النهار

عض شفايفو فاش شافها مغطية راسها بيديها.. شاف فيها للحظات وهبط من لوطو … دقائق ورجع جايب معاه قرعة دالما باردة ليها..
سيف الدين : حيدي يديك من راسك.. مغانقيسكش..

حط يديه على شعرها كيطبطب على راسها بشوية

هزات راسها بشوية وبحذر..  بؤبؤ عينيها كيتحرك بالزربة والدموع مغلغين عينيها!
شدات من عندو قرعة دالما كتروي فعطشها وهو غير كيشوف فيها..

ماشي ضعف منها ولا خوف.. هي فقط من الناس لي مراض ” فوبيا الصراخ.. “وهو من حالتها عرف الحالة لي هيا فيها وشنو خاص يدير باش يهدنها.. حاول يتمالك اعصابو وميديرش حاجة يندم عليها من بعد..
قرب ليها كيدير ليها الحزام و ريحتها الجريئة المتعمدة ديرها خصوصا لهاذ القاعدة.. توقف على الحركة للحظات كيشم عبيرها بينما هي رسمات ابتسامة خفيفة وسط دموعها

سيف الدين : يااربي تخرج هاد الشهراين على خير..

رجع لبلاصتو ودار الحزام لراسو مخليها هي كتكركر بشويةة وبدون حس.. داكشي لي بغاتو وصلات ليه واخا تكون ماعرت فين و تحت اي ضرف..

وقفها حدا دارها بعد مدة من الصمت.. شاف فيها بينما هي كتلعب فيدها بتوثر
سيف الدين : ليوم داز.. يتعاود هاد البلان منضمنش لك.. ا وعد المرنيسي
وعد : واخا.. مسيو سيف الدين سلطان ..
ختمات كلمتها بجرأة.. ماهمهاش قد ماهيا حققات القاعدة قد ماهمها انها كانت بداك القرب منو..

نزلات من لوطو ولاخر مراقبها تا دخلات.. كسيرا مخلي غير العجاج وراه بينما هيا مراقباه من شرجم باب الدار
وعد : مابقا قد مافات ..
يتبع..

°اســــــتئـــثار°
                               الجزء : 8
                          By : Bella El filali 🍷

                   |القاعدة 5|كوني صديقة لعدوه|

هاد المرة كان صباحها مغاير.. فاقت على صوت الفون لي كتر من 5 دالمرات وهو كيصوني.. هزات يديها بثقالة وسمعات صوت خلاها مصدومة لثواني

وعد : عتاااااب
عتاب : وا الله ينعل جدكككككك.. و البيتش راني كتر من ساعة وانا منشورة هنا فالمطار.. وفروسيا مكانعرف تاحدد.. شوفي لا ماجيتيش دبا غانشد اول طيارة ونرجع لاسبانيا
وعد : لا لا العار محتاجاك.. هاني جاية شوية ونكون عندك

” عتاب المرنيسي.. اخت وعد الكبيرة.. مالكة شركة هندسة فاسبانيا.. متفتحة لاقصى درجة.. خبيرة فالهاكر والمجالات الالكترونية.. كما انها وحدة من بزاف دالبنات لي قدو يثبتو راسهم بلا مساعدة حد فبلد اجنبي… “

لبسات حوايج مابيهمش بحيث ان المطار مبعيدش عليها ببزاف.. هبطات سايقة وهي كاتهضر مع ختها فالتيلي باش تلهيها.. عارفاها حمقة وتديرها وترجع فحالها..

شافتها واقفة حدا باب المطار وجالسة على الباليزات.. عندها كلشي عاادي ومامسوقاش لي قالها ليها راسها تديرها.

وعد : عتااااااب الق*ببةة
عتاب : وعد العا***رةةةة
تسالمو باحضان و عناق مايدوزش ليهم بلا تخسار الهضرة..
شافت فيها بحنية : كتشبهي لماما بزااف.. كبرتي وبانو فيك ملامحها كترر
وعد : ونتي كتشبهي لبابا.. ءء، راه كنقولك انا فمي عوج.. زيدي حدايا نمشيو ناكلو هو اللول فيا الجوع

دارو الشانطات ديالها فالكوفر ونزلو لمطعم بعيد على الصحافة حفاظا على مسيرتهم.. حينت لو شافهم شي حد بديك الحالة لي كانو بيها غايخرجو على راسهم مافيهااش الشك

طلبو ماكلتهم وكلاو فجو مايخلاش من الضحك والتقشاب.. من ديما كانو مطلوقين على بعضياتهم والفرحة لي كتكون فاش كيتجمعو مايحبسها حد..

وقفات وعد كتخلص بينما عتاب بقات جالسة كتسنا فيها باش يخرجو بجوج.. وبحيث ان عتاب مكاتفهمش الروسية فاش كتشوف شي جوج كيدويو كتبقا تشوف فيهم فحال الحمقة

… : ياكما الزين مافهم والو هخخ..
عتاب : “طلعات وهبطات فيه باشمئزاز ” وشكون نتا بالسلامة؟؟ كتعرفني؟
… : ءء.. نتي عتاب المرنيسي، بنت بلادي الله ياودي.. مشهورة فالمغرب واسبانيا و روسيا.. فينما مشيت نشوف وجهك ف الاعلانات والاشهرات
عتاب : اهاا.. ونتا شكون بالسلامة؟
… : انا زين ياسر.. لا ماعرفتينيش نقدم لك راسيتتمة البارت 8 💚

” مد يديه ليها ” مالك وحدة من الشركات المعروفة لصناعة المجوهرات
وعد لي كتسمع الهضرة من اللور وعلى محياها ضحكة نصر.. ماعرفاتش اش هاد الزهر كلوو لي عندها …
وعد بينها وبين راسها : هو نيتو عدوه.. الزهر واقف معايا بالرب
عتاب لمحات الضحكة على وجه وعد وراها.. بالزربة غمزاتها وعد باش تكمل معاه الهضرة
عتاب : هي نتا غاتكون صاحب سيف الدين سلطان؟
وعد بجرأة : هخخ عتاب الله يهديك.. واش هو باغي يطيحو من المقام اللول و نتي كتدوي على الصحبة؟!
عتاب : ءء
زين “دمو فار فاش جبدو ليه سيرة سيف الدين.. وبالزربة بانت عليه.. طلعات وعد عينيها فيه متذاركة الوضع.. جنية ومايقد عليها غير لي خلقها “
وعد : هههههه ياكما المش كلا ليك لسانك.. راني غاضاحكة معاك ماتديش هضرتي بالصح.. المهم انا وعد.. وعد المرنيسي راك كتعرفني طبعا..
زين : احم اه كنعرفك
وعد : المهم اني من اشد المعجبين ديالك  .. وتمنيت تكون بيناتنا علاقات خدمة من بعيد وقريب.. فالمجوهرات نتا الافضل..!
زين : هي نتي كتطيحي بخدمتك..؟
وعد علات حاجبها بتحدي : خدمتي لا يعلى عليها.. انا كندوي على لي فالابار ديال خدمتي.. سي زين!!
زين : شخصيتك نافعاني بزاااف.. عندك كاريزما كتر من لي كنت متخيل ولي كانت كتبان فالشاشات.. كنتمنا تكون بيناتنا علاقة خدمة من قريب.. ولا من بعيد .. انسة..
وعد : كنفضل وعد.. وعد ، بلا رسميات
°اســــــتئـــثار°
الجزء : 9
By : BeLlA El filali 🍷

|القاعدة 6|اجعليه ينتبه لك بكل الطرق|

مداتليه يدها كتسلم عليه وهو مكانش مع العاكزين بادلها،توادعو وخرجو فحالهم بحجة ان عتاب خاصها الراحة
عتاب : سااااط.. ديني عند عبير العاار توحشتها
وعد : اصلا ماعندك مديري معايا فالخدمة.. وخا غتجري عليا انا وياك ولكن هانيا والله
عتاب : يسسسس
وعد : هاد البرهوشة تاني.. ماعرفتك واش نتي الكبيرة ولا انا

قلبو الطريق عند شركة عبير لي كانت غاطسة فخدمتها .. اول ماعيطات ليها وعد جاوبات بالزربة
عبير : جات ولا باقي؟
وعد : الحمد لله انا لباس ونتي
عبير : وادوي جات عتاب ولا باقي
عتاب بالجهد باش تسمعها : وهاننني جيت
عبير : عتااااااااب توحشتكككك
وعد : كنحس براسي بيناتكم فحال لي مسخرة
عتاب : سكتي نتي صاحبتك حسن منك
قطعات على عبير وشافت فعتاب
عبير : يلاه نزلي راه شركتها على ليمين
بقات كتشوف فيها مبهوضة ماعرفات اش جاها
وعد : وانزليي خلاص .. خلي الشانطات فالكوفر!!

اول منزلات عتاب كسيرات للدار وبدلات حوايجها بحوايج سخان.. واخا الجو سخون ولكن افكارها مرغمينها تدير هاكداك..
هبطات لبرا ولي شافها كيضحك عليها من داكشي لي لابسة فجو فحال هاكدا..
اما هي لي غير وقفات فالباب طرشاتها الشمس
وعد : يااربي نعرف اش كندير فراسي
وقفات للحظات كتراجع راسها واش تمشي ولا تبقا.. ركبات فلوطو ومشات لشركة سيف الدين

دخلات مع باب الشركة.. الشمس حارة و العرق بدا كيتكون على جبهتها… قربات من البلايص لي فيهم مكاتب العمال والاعين كلهم عليها ..من نيتها هادي لابسة حوايج الشتا فالصيف ؟؟؟

دخلات لمكتب سيف الدين حينت اصلا السكريتيرة كتعرفها
دقات دقات خفاف على الباب ودخلات بعدما سمعات رد بارد من سيف الدين
وعد : سلااام
هز عينو فيها بشوية ..طلع وهبط فيها باستغراب ورد عينو لوراقو بعدم اهتمام ..
خنزرات فيه فاش معطاها تا أهمية ..قربات لمور راسو وبقات واقفة قاصدة باش تشوف اش كيدير
استغرب من تصرفاتها بزاف و دور راسو لعندها مطلع حجبانو
سيف الدين : وعد !
وعد بابتسامة بلهاء : سيف الدين !
سيف الدين : فخبارك بلي تقدري تجلسي حدايا وتشوفي ..علاش واقفة مورايا ؟

فهاد اللقطة الكلاخ ماعرفات منين طاح عليها صغرات عينيها فحالا كيقول ليها شي حاجة غرييبة
وعد : ءء اه اه بصح ولكن ااا زعما انا واخدة راحتي هنا
بقا غا كيشوف فيها ..اما هي قتلاتها الحرارة و الصهد دار فيها حالة ..كتشوف فيه بنظرات فحال ديال الحماق
سيف الدين : مفيكش الصهد ؟
وعد بابتسامة بلهاء فحالا طرشها : نعام؟ وعلاش غيكون فياا الصهد ..لا بالعكس فيا البرد شوف شحال انا باردة
دهشراتو بهضرتها ..دور راسو مكمل خدمتو متجاهلها
أما هيا تنفسات باريحية ودورات راسها كتهضر بوحدها
وعد بهمس : واااعباد الله مت بالحرارة ..واتشوييييت
فديك اللقطة دور راسو عندها حتا كيلقاها كدوي بوحدها جابت ليه الضحكة
يتبع…°اســــــتئـــثار°
الجزء : 10
By : BeLlA El filali 🍷

سيف الدين جمع الضحكة حتا جمع ولكن ماقدرش شاف فيها للحظات وهي بدورها بادلاتو بحرج اما هو طلق قهقهة رجولية خفيفة ..بقاو النظرات بيناتهم مطولة حتا كسرها هو بنوضتو
ناض قرب ليها مطلع حاجب و قرب ليها حتا لاصقها مع الحيط ..

انفاسهم تخالطو من قربهم قلب وعد ولا كيضرب فالميا حالف تا يخلي سيف الدين يسمع نبضاتو .. علا حاجبو فيها ودار يدو مزير عليها فالحيط كيشوف فبؤبؤ عينيها نيشان ونطق بصوت رجولي فيه بحة خفيفة
” اشنو دبا ؟سلاو ليك ؟؟ “
وعد : أأأ

توثرات من قربو وحنوكها حمارو .. بدات غير تعض على شفايفها مدهوشة من تصرفو الغير متوقع نهاائياا
هبط يديه للتريكو لي لابسة و حيدو تحت لمسات يدو الخشنة .. خلاها بديباردور صيفي فالكحل عازل صدرها ..اما هي بقات غير مشوكية بلاصتها

نهائيا مكانت متوقعاه يدير هاكدا .. قاطع تفكيرها شوفتو فيها وعلا حاجبو ..رجع جلس فالبيرو مكمل شغلو أما هي بقات لاقصة فالحيط وراحة يدها على الحيط على نفس الحركة لي دار ليها ..

سرطات ريقها وشافتو كيف خدام مامسوقش ليهاا نهاائياا ..بقات بداك الديباردور نييت باش تعلمو ..
جلسات فالكرسي لي حداه وهاد المرة خدمات من نيتها .. الستيلو على ودنها و شعراتها طايحين على وجهها .. بانت كيوت بشكل ااخخخر ..

سمعو دقان فالباب ودخلات بنت شعرها قصير طويل .. لابسة جيب كحلة عملية و تريكو صيفي فالبيض مخطط فالكحل ..
قربات للكرسي لي جالس سيف الدين وربعات يدها بدلع مصطنع متجاهلة وعد لي كانت كتغليي
اما سيف الدين مطلعش وجهو عندها اصلاا
لوز بدارجة معكلة باينة فيها روسية حاشية راسها فالدارجة صحة : سيف الديين كانت (كنت) قالت (قلت)ليك على آخر تصميم ماعجابنييش (ماعجبنيش ) و نتا وافكتي (وافقتي ) عليه !!
سيف الدين مهبط راسو كيخدم ..مامسوق لا للوز لا وعد طلع راسو فيها وخنزر فيها باش تجمع راسها عليه ..
سيف الدين : ياكما بغيتيني نكتب لك الشركة فسميتك ؟
لوز : لا ادشي (هادشي) فاش انولي مراتك !!

وعد لي كانت هزات كاس دالما كتشرب صدقات بازقاه من نيفها …ضرباتها بضحكةة فاش سمعات ديك مراتك وشافت فيه
وعد لسيف الدين : شنو سميتها ؟؟
سيف الدين ساط : لوز
يتبع ..°اســــــتئـــثار°
الجزء : 11
By : BeLlA El filali 🍷

|القاعدة 7 |كوني هادئة وحكيمة|

غلباتها الضحكة بزز باش حبساتها ولكن ماقداتش تكبح شوية من صوتها ..

وعد : لواه الكركااااع
لوز خنزرات فيها بحكم أنها شادة شويةة المغربية وهضرات بنطقها المعكل تانيي …واخا معارفاش شنو ولكن عرفات بلي ديك لوااه بالطريقة لي نطقاتها وعد فيها إهانة ليها ..
لوز : هيي حتاغمي غاسك !!
سيف الدين ما خلاوه يخدم مخلاوه يهدن المزاج ..صبر حتا عيل وهو يهضر بصوت زعزعهم بجوج
سيف الدين : خرجيي تقو*دييي !!!! تحركيييييي
خنزرات وعد ف لوز لي بالزربة خرجات قبل ماتضربها لها وعد بشي نتفة .. هبطات وعد كتجمع فالوراق باش تخرج حتا قطعها صوتو ببرود
سيف الدين : قلت ليك خرجي نتي ؟
وعد : ءء لا ولكن انا بغيت
سيف الدين : ومعامن تشاورتي
وعد بعصبية : مع راسي !!
سيف الدين : نتي فشركتي وتحت مسؤوليتي .. أي حاجة قلتها تتنفذ ونقطة ..عجبك الحال هو هاذاك ماعجبكش تبعيها !!
وعد بانزعاج وااااضح عليها .. طلعات حجبانها فيها وتنهدت : أها ؟ واخا هنا مقودةةة أسييي سيف الديننننن
هزات وراقها بالنفخة وخرجات قاصدة الباب .. اما هو ضورها عندو بالزربةةةةة قبل ماتحل الباب كيلبس لها التريكو ..

سيف الدين : خرجي عندهم نتي عريانة حسن ؟ ولا عاجبك الناس يتمنظرو فلحمك
وعد : هاانتاا قلتيها لحمييييي هادا

جهلاتو بهضرتها وغير الفكرة دانها كانت غاتخرج بالمعري كتر من المغطي زرعات فيه الأعصاب … وزادتها بتخسار الهضرة من لفوق .. زعامة خايبة هادي .
قرب ليها مخنزر الشوفة فيها ..محسات إلا بحنكها تزعزع من بلاصتو بتصرفيقة منو .. ماخلاش ليها الوقت فين تبردها قرب ليها شادها من لور شعرها و مع كل هضرة كيزيد يزير

سيف الدين : على كل موقف فحال هادا درتيه كوني عارفة اش غا يوقع ..

هزات عينيها فيه لقاتو كيشوف فيها بلا أي معنى مفهوم ..
هزات راسها بالزربة وحلات الباب خارجة من عندو بالزربة ..فتفكيرها حاجة وحدة .. انها غترضها ليها بالضوووبل .

مشات لجيهة الطواليط كتزرب مبغاش طيح دمعة من عينها حدا الناس ..حنكها كتحس بيه كيشوي بالحريق وودنها كتصفر

دارت يدها على الحيط كتشوف فالمرايا حداها وعلى فمها كلمة وحدةة
” أقسم بلي خلقني مغاتبقا فيك “

يتبع .°اســــــتئـــثار°
الجزء : 12
By : Bella El filali 🍷

|القاعدة 8 |لا تخضعي له|

سالا نهارها ورجعات للدار .. حتا سهرتها مع عتاب وعبير مدارتهاش غير دخلات لبيتها ونعسات خلاتهم مبهوضين .. جبدات حوايج صيفية كسيوة بيضة سميطات قصيرة حد الركابي وخفيفة ..حلفات حتا تبرد الحرارة لي حطات راسها فيها البارح .. عمرات لالارم ونعسات بزز بعد فترة طويلة من التفكيير ..

•الساعة 6:00 صباحا•
حلات عينيها معمشين ..شعرها الأشقر مخربق و شاد الريزو لفوووق .. حقدات باقا فيها النعاس وكاع النشاط لي كانت ضارباه للبارح مشا فالزيرو

نسات موضوع الكسوة لي موجدة ليها من كترة نعاسها .. هزات سروال كحل لاصقق مع تيشيرت خفيف سميطات عراض .. و سبادري بيضة
لبسات وسالات و علات عينها فالكسوة لي معلقة كتسلم عليها ..ساطت بغّل ورداتها للماريو ..سالات مع اونص بالظبطط ..
هبطات لتحت وبقات جالسة .. رجعات سدات التلاجة هزات البوشيط فيدها و خرجات برا حاقدة بالجهد
ديمارات لوطو قاصدة طريق بعييدة برا روسيا .. فيها كافي راقية ديما كتمشي ليها..وحينت باقي لها الوقت ستاحلات الهوا لي كيضرب فوجها مخلي شعرها يطير

وقفات فبلاصة الطموبيلات قليل كيدوز ووقفات ليها .. علات عينيها كتسب فخاطرهاا وبقات كتديماري فيها حلفااات لا تحركات نزلات كتشوف فيها من برا وقربات للروايض كتضرب فيهم
وعد : ينعل مو زهررررر
..هزات التيلي عيطات ل تالا “مساعدتها الشخصية ” لي اول ماسمعات الصوني جاوبات
وعد : سيفطوليا وحدة من طموبيلات ديالي لطريق ******
تالا : علاش ؟ ياك لاباس ؟
وعد : لا والو غير مالقيت مندير قلت نخرج طموبيلاتي ؟ اش غنكون بغيتها فبلاصة مقطوعة فحال هادي متلا !!!
تالا : اا ؟؟ يعني اش ؟
وعد كتهضر مفقوصة وهي كتضرب فروايض لوطو كتسمع صوت عند تالا حتا كتغمض عينها
وعد : و الزبللللل لوطو وقفات بيا هنا طلقيييني !!!

فطرف تالا لي سمع سيف الدين الموضوع من اللول كيلعب بسنسلة رجالية فيدو على شكل دائرة .. اما تالا كتشوف فيه شوية وتغمض عينها من العاصفة لي كتهضر معاها
بلاا هضرة ولا جوج حيد لها التيلي من يدها
” شوية ونكون عندك “
يلاه غاتهضر قطع عليها .. خلا هضرتها واقفة فحلقها مالقات كي تخرجها وبدات تحل فالباب وتخبط فيها فحال الحمقةة
وعد بالغوات : حجااارك يشدوكك تفو لاش باغي يجي عندي !!!!!

°اســــــتئـــثار°
الجزء : 13
By : Bella El filali 🍷

ركبات فلوطو كتلعب فتيليفونها كتسناه يجي وهي كتغلي .. دوزات نص ساعة وهي فلوطو و صوت نكيرها واصل فيين وفين
وعد : جاني فحالا فالمدرسة و هاد الأخ جاي يجيبني .. اصلا هو اش دخلو في..

طلعات عينها فاش سمعات صوت الدقان .. كيبان ليها واقف معلي حاجبو و كيشوف فيها فحال شي مخلوق غريب .. كل نهار كتزيد تصدمو بحركاتها
سيف الدين : نزلي
وعد هبطات الشرجم شوية وشافت فيه مفقوصة على الآخر .. رسمات ابتسامة صفرة : لا شكرا منازلاش
سيف الدين : وايلي ؟!

ضورات وجها حدا البلاصة لي هوما فيها .. الدنيا شبه مقطوعة وقليل فين كيدوزو طموبيلات ..سرحات بخيالها وقالت لي ليها ليها والله لا هبطت

وعد : مهابطااش

علا راسو تا للفوق كمحاولة باش يبرد راسو .. شاف فيها ببرود ودخل يدو لداخل كيحل الباب من داخل .. جرها من يدها مهبطها و هزها على كتافو بينما هي كتركل ورا ضهرو
وعد : نزلنيييي والله تا نجمع عليك عباد الله نزلني !!
مجاوبهاش بقا ساكت حينت عارف لا دوا غا يزيد الطين بلة وهو باغي يسايس معاها باش ميبينش لها الفاص التاني ..
حل باب لوطو و حطها .. رجع للباب ديالو حلو وجلس وتاهيا نقصات صوتها حينت عرفاتو مكاين لي يتسوق ليها فهاد البلاصة المقطوعة ..دار الحزام ليه ودار كيقادو ليها مامسوقش لغواتها بالعكس عاجبو الحال

سكتات فاش شافتو متبت وساكت .. بقات كتضرب فرجلها من جيهتها و هو كل مرة مكسيري حتا كيطير لها القلب من بلاصتو .. تبتات بلاصتها فاش لاحظات باراج دالبوليس و رسمات ابتسامة شر بالزربة جمعاتها .. اما هو عاق بيها ضحك باستهزاء بصمت مسايرها فلعبها

وقفوه البوليس وهوما كيشوفو فنوع لوطو وجاتهم شوية مشكوك فامرها ..
وقفوه فالجنب كيتسناو فالشخص يهبط الزاج .. هبط سيف الدين الزاج باش يبانو ملامح وجهو..
البوليسي غير شاف فيه رسم ابتسامة خفيفة جانبية..

غير شافت الزاج هبط بدات تغوت وتقول بلي خاطفني و مبزز عليا نركب معاه .. كاع الصفات الخايبة جمعاتها فيه .. شافت سيف الدين لقاتو داير يدو على الشرجم متكي يدو على راسو مستمتع بغواتها .. والبوليسي غير كيشوف

شاف فيها تا شاف و نطق بصوت بااارد تقول ماشي هو لي كان كيتقال عليه قتال مجرم مغتصب و خطاف ..
سيف الدين : ساليتي ؟
ضربات الطم وهي كتشوف فيه كيفاش مبردد .. رجع شوفتو للبوليسي كيشوف فيه بملل مكره وقفتو.. اما البوليسي عاجبو الحال ولقاها همزة
البوليسي : السلطان .. خاص شي سلعة خرا !
سيف الدين “جمع فيه الشوفة وتنهد.. رجع راسو على الكوسان وعلا حاجبو ” : جاتك!!

ابتسم بلطف مصطنع وعطاه الاشارة باش يمشي..

كسيرا غادي فحالو كيشوف فالطريق مخنزر ولايح يدو على الشرجم بهدوء تا كسراتو وعد.

وعد : كيفاش هادشي لي شفت ؟؟
مدواش وماتكلمش .. خنزرات فيه و ربعات يدها كتسناه يدير شي حركة يشرح لها ولكن والوووو .. وتقول واش بغا يتحرك ولا يدوي ..
يتبع…

°اســــــتئـــثار°
الجزء : 14
By : Bella El filali 🍷

|القاعدة 9|لا تظهري مشاعرك .. نهائيا|

وقفات لوطو حدا اوطيل راقي .. يب يب وحدة من مشارع سيف الدين .. واش هادا فينما كانت شي خدمة داخل فيها ؟

هزات عينيها فالمبنى كان ناطحة سحاب بشراجم زاج … والطراس لفوق مرة كتبان فنةة .. نزلات من لوطو و شافت فيه بمعنى اش كتحاول تدير .. اما هو مامسوقش كاع طلع وهبط فيها .. قرب لها بابتسامة غريبة و بالزربة هزها قالبها على كتفو

طلقاتها بغوتة وكلشي ضار كيشوف .. اما هو ولا كاين فالدنيا غادي مامسوق كاع ..
طلع للجناح ديالو حطها فالسرير وخرج بلا ميهضر ولا يخرج كلمةة .. وقفات كتقاد فحوايجها وتنكر ماعجبها حال ولا غايعجبها ..
شوية ودخلات بنت طويلة لابسة كسوة كحلة منحوووتة على جسمها مبينة طايتها فنةة … طالقة شعرها ودايرة ليه خلالة فالبيض بانت كيوووت .. ملامحها شهبة و عينيها عسليين جمالها عادي ولكن زوينة ..
وعد : شكون نتي تاني ؟
نورة : نتي وعد ياك ؟
وعد : راه انا لي سولت اللولة !
نورة : وانا سولت التانية !
بقات كتشوف فيها صافي داكشي لي بقا ليها غير هادي ..
جلسات حداها ودارت رجل على رجل كتشوف فوعد لي باغا تنوض تقجها
نورة : انا صاحبة ماريا .. فنفس الوقت خدامة مع سيف الدين
وعد : أها ! هي بينك وبينو شي حاجة ؟
نورة : لا لا .. فاللول فاش تعرفت عليه مكرهتش .. ولكن لقيتو خاوي راسو من هادشي .. رحب بيا فخدمتو وعتابرني فحال ختو
وعد : ااه فهمت فهمت ..
نورة : هيا باينة نتي لي بينك وبينو شي حاجة !
وعد ضحكات ضحكة صفرة : انا ؟ لا صافي داكشي لي بقا .. كنكرهو و بزااف .. عرفتي شنو إيلا انا وياه منتلاقاو كاع !!!
نورة : ههههههه وايلي !! هادشي كلو ؟
وعد : و كتر .. قلتي ليا بلي حاسبك ختو الصغيرة ؟
نورة : اييه .. ؟!
وعد : نسولك ؟
نورة : أمم سولي !
وعد : دبا كنا جايين و وقفونا البوليس ..بالزربة بداو يتمتمو فالهضرة و خلاوه يدوز ..صراحة قلت يمكن يكون مافيوزي ولكن هو من النوع لي مكايقدوش يقيسو بنادم .. ” سكتات شوية ورجعات هضرات بشك ” بلاتي ياكما بصح مافيوزي !!!!
نورة : ءء
قاطعهم صوت من وراهم .. كان سيف الدين داير يدو على الباب وجالس كيسمع ليهم
سيف الدين : اييه مافيوزي
يتبع ..

°اســــــتئـــثار°
الجزء : 15
By : Bella El filali 🍷

|القاعدة 10|أثناء القواعد الاخيرة..
تصرفي بلطف|

تصمكات فبلااصتها ويدها كترعدد.. مكانتش متوقعاه غايكون كيسمع ليهم تصدمات وتخربقات ليها الهضرة مع السكتةة
ضورات راسها كترعدد فنطقها وعااد سرات معاها ديك مفيوزي!!
طلعات هبطات فيه مزياان .. كان لابس قميجة بيضة وهنا فين تصدمات بحيت اول مرة يكون لابس البيض.. كان حال جوج صدايف ومخلي صدرو باين شويةة.. مع جاكيط كحل.. اصلا كانت غتوقع شي حاجة لو مالبسش الكحل..
سرطات ريقها من كثلة الرجولة لي كتشوف قدامها.. كملها وجملها بسيگار ففمو كينثر منو وهو كيطلع ويهبط فملامح وجها ببرود
وعد : هه هههه هه غير هه غير ضاحكة ياكما حسابليك بصح.. تأ تأ غا كنضحك اويلي!!
علا فيها حواجبو بسكاات.. اما هي سكاتو كيوثرها مالقات كيف دارت خرجاتها بلا متحس
وعد : واش مغاتدويش؟؟ كتخلعني ابنادم بهاد السكات !
نورة غلباتها الضحكة من طريقة كلام وعد ووصفها حتا لحركات يدها.. جاتها ضريفة وواخا مشهورة مكاتباااانش عليها.. قاطع صوت تفكيرهم بجوجهم كلام سيف الدين
” المشروع غايخصو يتسالا قبل هاد الشهرين.. يعني غايخصنا نزربو.. العمل معاك مكانش موفق نهائيا.. “
وعد : وعلاااش بالسلامة غير موفق!!!
علا فيها عينو من صوتها لي علا.. ميل راسو كأنو كينبهها بينما هي حولات عينها لنورة لي كانت كتلعب فالتيلي مامسوقااش
نغراتها بشوية باش تشوف فيها و خنزرات فيها
نورة : وانعاااام طيبتي ضهرييييي بالنغييييز
وعد : احم دوي بشوية! نسولك سؤال اخر على هاد خوووك الكبير؟
نورة : امم سولي؟!
وعد بصوت مسموع باش يوصلو : قولي ليه يحل ديك التغوبيشة راه كدير التجااعيد اولا.. ثانياا علاش كل هضرتوو على الخدمةةةة طلعات ليا فراسيي
سكتات مخنزرة فيها زعما لا علاقة.. وحتا سيف الدين شاف فيها حتا شاف وجمع شوفتو فيها مخنزر
سيف الدين : قادي حالتك ولا اندير لك كيف جبتك لهنا.. مباغاش تشوفي الدنيا مقلوبة ياك؟
بدات كتقلد فيه وهي كتشوف فنورة كيفاش تسدحاات فوق الفراش فاش خرج سيف الدين.. واخا نص حياتها فروسيا ولكن تبشطح فالفراش بحوايجها لي كانت لابسة حدا راجل عندها حشومةة

ودعو بعضياتهم بعدما داو نوامرهم وقالو بلي غايبقاو على تواصل.. خرجات برا لقاتو راكب فلوطو بورش كحلة وكيدوي فالتيلي.. دار لها اشارة بيدو باش تطلع فوسط هضرتوو وتاهيا ماعطلاتوش.. حلات الباب وركبات وهو كسيرا..

وقفها حدا تل خاويي و تحت منو بحر.. هبط هو اللول وهي غير توضحات ليها الرؤية بدات تنكر فنفسها
” اويلي ياكما هادا ناوي يقتلني!! ناري مشيت فيها كفتةةة والله يامي مايلقاو مايجمعو فياا.. مايكونش زعما ناوي يقتلني؟ لا لا هدا مبقاش ساهل.. “
حولات عينها من البحر لليه هو لي كان حدا الكوفر
” احح على الزين.. شوف شوف كيف عضلات يدو كيتحركو مع حراكاتو.. واش باغي يجلطني؟؟؟؟؟؟؟ “
علات عينها على صوتو لي كيهضر من حدا الكوفر فحالا كيقرا افكارها..
سيف الدين : دخلي للوطو غاتلقاي ملفات لور.. غانبداو المشروع من دبا وغايخصنا منتعطلوش .. اه بصح،متخافيش باقي مغاديش نقتلك.. ” مع غمزة فاخر هضرتو خلاتها ماقادة تضحك مقادة تحشم “
دخلات لوطو هزات اش بغات ورجعات كتشوف فيه .. لقاتو دار جليسة بكراسي بيضين صغار حدا داك التل والبحر كلوو كيبان.. منظر زويين وكيهدي النفس

يتبع..

°اســــــتئـــثار°
الجزء : 17
By : Bella El filali 🍷

جرات فيدها عتاب و عيطات على عبير فطريقها وعلماتها بلي غاتدوز وراها.. ماهيا غير دقايق ووقفات حدا العمارة لي فيها دارها ..
دوزات الخط من جديد وقطعات بالزربة غير باش تعلمها ويمشيو ..
و داكشي لي كان، ركبات فاللور وكسيراو فجو عامر ضحك و تصاور مامسوقينش..

من بعد يوماين ماتلقاش معاها وماقربش ليها.. بصح بقا مراقبها خفافي و حتا الخدمة لي خاص تكمل مبغاش يحگر وقرر يخليلها وقت ترتاح فيه من بعد يرجعو للصح..
صونا الفون وجاوب ومخنزر.. طريقة هضرتو وحراكتو.. هدوءو وبرودو كيخليوك تضرب ليه الحساب بلا متحس..
سمع صوت دقان الباب وراه تحل الباب.. كمل المكالمة لي كانت عندو وطلع راسو بانت ليه السكريتيرة ديالو .. شاف فيها ببرود كيتسناها تنطق وغير دوات دوا تاهوا بلكنة روسية حرشةةة
سيف الدين : قلت ليك دخلي؟
السكريتيرة : سمح ليا مسيو سيف الدين ولكن…!!
-قاطعها ببرود : خرجي ت*ودي فاش تسالي شنو بغيتي تقولي
تنهدات كتشوف فيه وبالزربة دوات جامعة الهضرة : نصر كيتسنا فيك برا.. قال ضروري يشوفوك باش تصدر ليه الس*لاح!!
طلع حجبانو فيها : قولي ليه يدخل!
خرجات بالزربة ورا مسالات هضرتو.. تنهد بصوت خفيف وبانت على ملامحو شبه ابتسامة..
سيف الدين : طلعتي ونقزتي فاللخر جابتك ليام..

دخل عندو نصر.. واحد من اتباع العص*بات لي كيتاجرو فالمخ*درات وكيتاجرو فاع*اء الناس..كيبيعو الس*لاح المسروق ..فنفس الوقت عندو معارف من المافيا الروسية

– دوا بغل كبير..تابعو حقد وكره خارج من القلبب كيحاول يكبحو: سلطاان
تكا على الكرسي برااحة.. مع ابتسامة مستفزة نطق بصوت خفيف وهاادئ : بغيت نعيط باسمك ولكن متستاهلش نطقو .. غاليي عليك!
سرط ريقو كيشوف فيه .. فاهم مزياان اش قصد وشنو ملعوبو.. عارف مزيان دقتو غايردها ليها بالدووبل .. عائلة سلطان مكاتخليش النفس تطلع فلي غدرها..
نصر : جاي نصفي الخواطر.. بيني وبينك شغل خاسو يسالي.. وغنسالييوه بالبيع والشرا.. اش بانلك!!
وقف هاز كاس ديال القهوة فيديه كيشرب مقوس حجبانو : بيع شري معاك مايدوزش ليا .. باغي نصفيو الخواطر كاين بزاف دالطرق.. منها يدوز الدم.. اش بانلك؟

يتبع..
°اســــــتئـــثار°
الجزء : 18
By : Bella El filali 🍷

|القاعدة 11|عرفيه على عدوه|

شاف فيه بغل .. صوتو تغير لواحد باغي ينقض يق*تل ويشوف الد*م .. عض شفايفو كيشوف فيه مامسوووقش ليه .. كون ماحشم ينوض يضحك وسط وجهو.. عاجبو الحال على هاد الفقصة اي داير ليه.. غمض بعينيه كيحاول يبرد راسو
نصر : باقي مباغيش تنسا اسلطان ؟ الماضي مات وفات.. دير لي درتي مغاترجعهااش!!
سيف الدين : الدقة كتبقا واخا ترجع واخا مترجعش.. الماضي عمرو كيموت كيبقا محفر مزيااان.. طال الزمان ولا قصار غاترجع لك.. ” حط يدو على كتفو كيضربو عليه ” قول السلطان مقالهاش!!

سالاها بغمزة خفيفة رجولية.. طلع عينو فيه عارفو مكاايضحكش .. هضرتو عناها وفاتها للهيه.. عارف سيف الدين فاش كينوي على شي حد مكايفلتوش.. وكل هاد الوقت وهو ساكت عليه باغي يدير لو فالاخر سربرايز مض*فاكر.. عزيزز عليه الغدر فالموت.. لي زوين فيه انو كيعلمك ونتا ساين الدقة وفوقاش تجيك.. هو وكانتو .. يقدر يرضها مور عام.. نص عام.. شهر.. سيمانة.. يوماين.. ويمكن غير يخرج من عندو يلقا راسو ميت.. كيلعب على نفسية عدوه بحال الشطرنج وهو لي غالب فيه .. !

وقفات حدا ريسطو فخم.. كتبان ليهم ماريا ” خت سيف الدين ” و نورة.. قربو ليهم .. وعد هيبتها طاغية كيف ديييما كتحسها شي حاجة..
كانو فطابل بعيدة على بنادم واخا هاكداك الاعين مراقبينهم.. وزاادو فاش جلسات وعد وعبير وعتاب .. وعد معروفة خلاص.. بقات غير عتاب لي كيطلعو ويهبطو فيهم..
جلسو وطلبو اش بغاو.. عطاوها للضحك والزهو حتا وقف عليهم واحد كانت كتسنااااه يجي بفارغ الصبر .. علات عينها فيه كتمتل بلي مصدومة.. اما نورة و ماريا خرجو عينهم وقلبهم بدا يخبططط .. شافو فبعضهم وبداو يتمتمو
وعد : اوووو.. زين؟؟
زين بنبرة لعوبة : شرفتيناا انسة وعد!! كي جاك الريسطو بعدا ومتقوليش ليا بلي ماعجبكش!!
ضحكات بمياعة وشافت فيه بصوت حنين وهادئ : وايلي.. كاع هادشي من عندك وتكون شي حاجة خايبة.. حشومة!!
نورة جمعات الوقفة.. كون كانت عرفات بلي هاد الريسطو ديالو كاع متوافق وتجيب ماريا.. سنات علييها بلي لاعرف سيف الدين هادشي غايقبرهم فبلااصتهم ..

نورة : احم سمحوليا !..

نغزات ماريا باش تبعها.. كملو حديثهم بالرزااانة مدة طوييلة..هو ستاحلها وجلس معاهم ،ماريا و نورة مزال مارجعو عبير وعتاب بداو يقفقفو ووعد كانت مبردةة.. ماسوقهاش ومضارباش حساب لاليه لا لغيرو..

يتبع..

°اســــــتئـــثار°
الجزء : 19
By : Bella El filali 🍷

بالوقت لي هو وصلاتو الخبار.. القرودة بداو كيشطحو فوق راسو وفبالو يمشي يروننننها عليهم ويولي يبرد..
سيف الدين : بنت ال*حبةةةةةة !!!!!!!

خرج من الشركة بالزربة وركب فلوطو شاعل جو*ان كيبرد بيه على بال مايوصل.. طول ماهو كينثر والعصب كيزييييد.. بفرط العصب ماحسش براسو تا لقا راسو حدا الكافي
دخل عليهم كي العجاجة.. عبير و عتاب شافوه وجمعو الوقفة مفرفين بالخوف باغين غير يبعدو على انضارو لايجمع حب وتبن..
وعد.. فنفس الوقت مكانتش مخايفاش.. قلبها كيضرب فالتسعين.. بللات فمها لي نشف وشافت فسيف الدين لي داخل كيبان مبرد هدوء ما قبل العاصفة
رسمات ابتسامة صفرة وناضت وقفات.. قصد تعرفهم ببعضياتهم.. غمضات عينيها ورجعات حلاتهم كتكالمي فراسها
شافت فسيف الدين بملامح مبهمة..

وعد : كنت عارفاك غتجي!!

جلس فالكراسى لي كانو على شكل كناب.. علا راسو بفخر وتنهد تنهيدة خفيفة كيشوف فملامح زين المبهمة..

سيف الدين وهو كارز على الحروف : وصلني خبار بلي شريكتي كتعرف عدوي وجالسين فكافي على الروااق .. عادي نشرفهم ونجي باش تكمل الجلسة.. اولا لا وعد المرنيسي؟
وعد : كنت عارفاه بلي عدوك .. تصفية الحسابات زوينة

حول نظرو لزين لي كيشوف فوعد بتمعن.. كيقول فبالو كيفاش هادشي كلو وماقتلهاش سيف شي لعبة تم .. جمعات وقفتها تحت انظارهم بجوج.. قدمات يدها لجيهة سيف الدين وشافت فزين..
وعد : زين.. نقدملك سيف الدين سلطان.. “شافت فسيف الدين وحولات يدها لزين ” نقدملك زين ال..

قاطع كلامها زين بلي بغا يلطف الاجواء بالنفااق طبعا.. شاف فيه بابتسامة صفرة وقدم لو يدو على حسب يتسالمو.. تحت انظار سيف الدين لي غير ساكتت.. منطقش نهائيا وهادشي لي خالع وعد من يلاه دخل..

زين : تشرفت بمعرفتك سيف الدين.. ” سالا كلامو بابتسامة لي استفزاتو بزااف علا يدو على شكل سلام وجمعها معاه نيشان للنيف خلاه كيمسح فيه طريح فالارض.. “

ناض مطيح معاه الطابلة.. عروقو كتضرب فراسو ومنظرهم وهي وياه كيضحكو كيزيد يتشنشط فدماغو كيخليه يزيد يجهل عليه بالعصا.. الناس شي كتشوف شي مامسوقاش وشي تصدمات من العصا لي كيعطيه.. كيهز يدو تاكايهزها ويعطيه للوجه.. الكتف.. الصدر.. فينما كان،هبطات لمستواه مصدومة.. نهائيا مكانت متخيلة بلي غايوصلو لهاد المواصل.. والاهم متخيلاتش سيف الدين بلي غايدير هاد ردة الفعل ..

يتبع..

°اســــــتئـــثار°
الجزء : 20
By : Bella El filali 🍷

|القاعدة 12|اقعيه بمصيبة|

ديما كانت كتشوفو داك الشخص الهادئ ولي مبرد اعصابو.. النص ساكت والنص مامهتمش..

فكل مرة كانت كتكالي كانت كتجي فيها دقة.. اما زين من كترة ما حاول يبعد عليه ولا غير كيشير برجليه ويديه بحال الخروف نهار العيد.. حتا من موالين الكافي فاش شافو سيف الدين مقدوش يهضرو ولا يتكلمو.. فضلو يديرو راسهم ماكايسمعو مكايشوفو..
كملات فيهم الشوفة بجوج وشافت فعبير عتاب ماريا و نورة ب 4 بيهم حدا الباب ديال طواليت مجموعين تم.. قربو يطلقو البولة فسروالهم..

الدنيا ضارت بيها وماعرفات مادير.. الخطة لي كانت فبالها تبدلات وجات بلاصتها وحدة خراا..

هزات التيلي ودوزات الخط للبوليــس.. يدها كترجف من هاد الفكرة لي طاحت فبالها يا ربحة يا دبحة ..
دورات راسها بعد انتهاءها من المكالمة لجيهة سيف الدين و زين لي بعض الدراري كيفارقو فيهم.. قربات ليهم بشوية كتسمع صوت الغوات ديال سيف الدين لي واخيرا دوا..

سيف الدين : الزاااااا** اولد الق… بة!! خليتي كااااااع البنااااات وماشفتي غيرر هاديييي؟؟؟؟؟ “كيسالي من كلمة ويهز يدو تا لفوق.. كيضرب بكل جهدو حاس بالشمتة..

بعد عليه كيحل صدايف القميجة.. الناس تجمعات على زين عطاوه قرعة دالما كيشرب.. وكاين لي كيمسح دم فمو ونيفو..

ضور عينيه كتبان ليه مقنتة فواحد الطبيلة كتشوف من بعيد ورجلها كتقفقف بوضوووح.. لعق شفايفو ومشا عندها حاقد ناوي على خزيت ..
جرها من يدها ، اما هي ماتحركات ما دوات.. خارجين لبرا والعين كلها عليهم..
وعد : طلق مني ضرييتيني!!
سيف الدين : لا ماسكتيش غنوريك النجوم فعز الصباح

سكتات مع فرحة خفيفة مور ماشافات طونوبيل دالبوليس وقفات.. ماداهاش فيها لا هيا لا للوطو حل باب لوطو ديالو ورماها تم شاعط الباب.. دار لجيهتو حتا كيسمع صوت بالروسية.. دار بهدوء كيشوف فيه

ب ” اختصار بوليسي ” : فين غادي بالبنت اسي سلطان؟
سيف الدين : ” بالدارجة ” غادي ن*ويها؟!

Leave a comment