Skip links

قصة : حرة بلا سلاح 4

 3,977 عدد مشاهداات

💔حرة بلا سلاح🖤
#الجزء_76

ناضت جلسات أما جايكوب جاب كرسي و جلس قدامها و كيشوف فيها من الفوق تالتحت .
ضياء عاد ردات البال آش لابسة ،كانت لابسة روب ديال النعاس بسميطات من الحرير و طالع على الركبة واحد مولاتي لاطاي عندها كتبانو لحمها كامل كيبري ، شافت دوك الشوفات لي كيدير فيها مكرهاتش تشق لارض و تبلعها بدات كتحاول تغطي لحمها بيديها .

لاحظ داكشي لي كتحاول دير و بتاسم .
جايكوب : آش كتحاولي ديري.
ضياء : متشوفش فيا هكاك .
جايكوب ناض غادي جيهتها بخطوات تقيلة ،هي متزعزعاتش من بلاصتها ،تحدر لعندها و بدا كيقرب ليها بشويه هز يديه و بدا كيدوزها على وجهها بشوية أما هي وصلات بيها لطوب ديال الأعصاب مكرهاتش تقتلو بيديها مكتحملش تخلي يهودي يقيسها و لكن ماشي من صالحها دير شي حاجة دابا من غير أنها بدات كتشوف فيه بشي نظرات كي القرطاس ،و هو باقي كيدوز يديه على وجهها الرطب طلع يديه لشعرها و خشا يدو فيه و شدها بعنف تا تآوهات .

جايكوب : شنو كنتي كديري فالمستودع ؟
ضياء كتحاول تفك من قبضة يديه : طلق مني و هدر بفمك ماشي بيديك .
جايكوب : مزال زايدة فيه !
ضياء : آش بغيتي .
جايكوب : سؤالي واضح .
ضياء : طلق مني و غنقول ليك كلشي .
طلق منها جايكوب و بقا بنفس الوضعية قريب منها
ضياء : بعد عليا .
بتاسم جايكوب و ناض من حداها مشا لكرسيه جلس كيتسناها تشرح ليه .🖤حرة بلا سلاح💔
#الجزء_77

ضياء : فالحقيقة أنا كنت غاديا عندك فالصباح لبيرو بنعطيك شي وراق و أنا نسمعك قلتي لدايفيد قتلوه .
جايكوب : كملي .
ضياء : أنا الصراحة فضولي قتلني و بغيت نعرف شكون هاداك لي بغيتو تقتلو ، تبعت دايفيد تا وصلت للمستودع و دخلت كنسمع صوت أنين رجعني لزمان (بدات ضياء كتمتل بحالا تفكرات شي حاجة وقعات ليها ملي كانت صغيرة طبعا راه غير كدوب) كنت صغيرة فالخيرية و قدامي تقتل واحد الراجل بواحد الطريقة خايبة و من ديك الساع مكنقدرش نشوف شي واحد قدامي كيتقتل حتى لو كان مجرم داكشي لاش عاونت هاداك لي كنتو باغيين تقتلوه باش يهرب ، (كتحرك راسها يمين و شمال ) أنا عندي عقدة نفسية من القتل ، (بدات كتغوت جاها انهيار عصبي) لالا مكنقدرش نتحمل لا .
هي راه فعلا جاها انهيار عصبي ماشي كتمتل حينت تفكرات صورة ماماها و ختها و هوما مقتولين بديك الطريقة و خصوصا هي واقفة قدام داك لي قتلهم و ماقادرة دير والو ، حسات براسها ضعيفة عاد الدوا لي وصفات ليها الطبيبة مبقاتش كتشربو ملي جات لاسرائيل داكشي باش عاود جاها كريز .
بقات كتغوت و ضرب فراسها من دون شعور .
جايكوب فلول صحابليه كتمتل و لكن بصح حالتها كانت تشفي العدو ناض غادي جهتها باش يوقفها شدها من يديها زير عليها كيحاول يوكضها و لكن من دون جدوى ، تا شوية بدات كتحس براسها فاشلة حبسات لغوات و فقدات وعيها بين يدين جايكوب .

حطها فالناموسية و أمر دايفيد باش يعيط للطبيب .
جا الطبيب شافها و دق ليها ابرة باش تتهدن و خرج عند جايكوب لي كان فالبيرو ديالو كيلعب بلحجر فيديه . دخل عندو الطبيب و جلس .

الطبيب : سيدي المريضة راه جاها انهيار عصبي ، من الواضح أنها مرات من شي فترة صعيبة فحياتها و تفكراتها و مقدراتش تحكم فراسها لذلك لو سمحت حاول تخليها بعيدة على المشاكل هاد الفترة و هادا هو الدواء لي وصفت ليها ، خصها تعود تشرب وحدة يوميا مورا كل وجبة .

جايكوب : تقدر تمشي .💔حرة بلا سلاح🖤
#الجزء_78

مشا الطبيب فحالو و دخل دايفيد عند جايكوب .

دايفيد : سيدي آشنو نديرو معاها ؟
جايكوب : لقيتو أحمد ؟
دايفيد : لا أسيدي قلبنا الغابة كاملة ملقيناهش .
جايكوب كيفكر : امممم
دايفيد : سيدي بما أن سيلينا هربات أحمد فاذن هي كتعرفو .
جايكوب : كتقصد جاسوسة .
دايفيد : اوى اسيدي حنا نصبنا ليها فخ و هي طاحت فيه ، مخصناش منتيقو فيها
جايكوب : مكنتسناكش تقولها ليا ، ملي دخلات للمركز و أنا شاك فيها ، شي حاجة وراها و أنا أكيد غنعرفها .
دايفيد : سيدي تأمرنا بشي حاجة خرى .
جايكوب : سير جيب ليها حوايجها من لوطيل ، خصها تبقى تحت عيني هنا .
دايفيد : واخا أسيدي .
مشا دايفيد و بقى جايكوب كيفكر مدة عاد ناض متوجه لغرفتها وصل و دخل .

سيلينا : مكتعرفش دق الباب .
جايكوب بابتسامة : يمكن راك فداري .
سيلينا جات بتنوض : آه خصني نرجع لوطيل دابا .
شدها من معصمها و جرها عندو .
جايكوب : غتبقاي هنا .
سيلينا : شناهوا ؟؟
جايكوب : كيما سمعتي غتبقاي هنا تحت عينيا .
سيلينا : وعلاش؟
جايكوب : الا سحابليك ديك الهضرة الخاوية ديال انهيار عصبي غنتيقها ههه راك مزال مكتعرفينيش .
تلاقاو نظراتهم بجوج من جديد و قال : آاااخ أ سيلينا حشومة هاد الجمال كلو يضيع حيت كوني أكيدة الا عرفت عليك ضي حاجة مهياش غندمك ا سوسو .
خرج و خلاها .
داز النهار عادي و جا الليل و ضياء مازال فايقة . بقات كتسنى تا وصلات ديك 2 تالليل و تأكدات بلي كلشي نعس ناضت خرجات من الغرفة و غادية بشوية فاتجاه مكتب جايكوب و فنفس الوقت مركبة السماعة و كدوي مع رضى .
رضى : ردي البال أضياء راه كتخاطري .
ضياء : متخافش ، خليك معايا عنداك تحيد السماعات .
وصلات للبيرو دخلات هازا فيديها بيل باش تضوي حيت كاين الظلام .
بدات كتقلب فالأوراق بزربة و كتقراهم لا تلقا شي معلومة و لا شي وراق ضروريين و هي كتقلب تحل الباب فجأة و تكوانسات بلاصتها .
ضياء فخاطرها : لا يا ربي ماشي دابا لا ..
رضى :ضياء مالكي الو جاوبيني ..
يتبع ….
يا ترى شكون دخل واش صافي غتكشف .
آرائكم تهمني 😘💔حرة بلا سلاح🖤
#الجزء_79

كانت كتقلب فالاوراق عالله تلقى داكشي لي بغات و فجأة تحل الباب و تكوانسات بلاصتها ، جاب الله كانت مورا البيرو و ملي سمعات الباب تحل دغيا تحدرات و تخبات و كدعي فنفسها متكونش تكشفات . كان دايفيد لي دخل و شعل الضو.
دايفيد كيدوي فالتيلي و غادي جهة البيرو : وي مستر جايكوب أنا فالبيرو دابا .
جايكوب : *********.
دايفيد : مستر واش كاينين فالخزنة ياك ؟
جايكوب : *****
دايفيد : اوك سيدي .
قطع جايكوب الخط و مشا دايفيد لجهة واحد الخزنة كانت تما مورا واحد التصويرة كبيرة فالحيط هنا ضياء هزات راسها شوية باش تشوف الكود و تحفضو
ركب دايفيد الكود و تحلات الخزنة و جبد منها دوك الاوراق لي قال ليه جايكوب عاود سدها و خرج .
هنا وقفات ضياء تنفسات الصعداء و فنفس الوقت تعصبات حيت دوك الاوراق لي كانت باغية داهم دايفيد . تأكدات بلي الكولوار خاوي عاد ضرباتها بجرية لبيتها و سدات الباب مزيان و دخلات للحمام باش تهدر مع رضى ليكونو دايرين ليها كاميرات فالشومبر .
ضياء( بالعبرية تحسبا لاي حاجة مخصهاش تهدر بالدارجة او الفلسطينية): الو رضى كتسمعني .
رضى : وي ضياء كتسمعك شنو وقع ياكما حصلوك .
ضياء : ماحصلونيش ولكن بففففف لوراق لي مشيت على ودهم جا داك الكلب ديال دايفيد و داهم .
رضى : يعني مشيتي معطلة .
ضياء : ولكن حفضت الكود ديال الخزنة .
رضى : تا هادي مزيانة ، شنو غديري دابا ؟
ضياء : والو صافي مخصني ندير تاحاجة هاد الفترة باش منتيرش الشكوك حيت راه وليت مراقبة من كاع البلايص .
رضى : صافي تهدني أنا غنقول للزعيم بلي مقدرتيش تجيبي لوراق باش ندوزو للخطة لخرى .
ضياء : أشناهيا هاد الخطة لخرى ؟
رضى : من بعد و تعرفي المهم ملي تكملي صنع القنبلة قوليها لينا حيت الخطة غتكون ديك الساع .
ضياء : اوك يالاه في أمان الله .
قطعات ضياء و مشات تنعس .💔حرة بلا سلاح🖤
#الجزء_80

بالنسبة للبنات لي قالو بلي ضياء تكلخات فهاد الخطوة لي دارت و هادا فدابا غنجاوبكم و غتعرفو علاش دارت هادشي ،ملي خرج الطبيب من عند ضياء بقات بوحدها خدمات السماعة و دوات مع رضى .
فلاش باك .
رضى : الو ضياء كتسمعيني.
ضياء : وي كنسمع كاين شي جديد
رضى : عرفنا من واحد الجاسوس زارعينو فالموساد بلي غدا مع الصباح جايكوب غيمشي لامريكا باش يدي أوراق الاتفاقية ديالو مع أمريكا لي فيها بلي كيخططو يديرو إبادة لفلسطين .
ضياء :كيفاش .
رضى : وي ضياء و نتي خاصك ضروري تجيبي دوك الاوراق ، بما أنك دابا فدارو فأكيد الملفات غيكونو فالمكتب تاعو .
ضياء : ولكن علاش غينقلهوم من إسرائيل لأمريكا .
رضى : يمكن حيت فأمريكا فالبيت الأبيض غيكونو فأمان أكثر ، و عرفتي أضياء هاد الاوراق الا طاحو فيدين ايران و الدول الاروبية راه مغيتعاتقوش معاهم .
ضياء: و الأهم غينوض الصداع بين الدول و بهاكا غتحيد أمريكا من منصب رئاسة المفاوضات الفلسطينية الاسرائيلية و بهاكا غنلخصو جهد كبيير .
رضى : بالضبط هدا هو هدفنا و لكن راه خاصك تجيبي دوك الاوراق اليوم حيت غدا غيمشيو لامريكا .
ضياء : صافي كون هاني غنحاول .
نهاية الفلاش باك .
و هدا هو السبب لي خلا ضياء تصرف هاكا من أول يوم ليها .🖤حرة بلا سلاح💔
#الجزء_81

أصبحنا و أصبح الملك لله فاقت ضياء مع السبعة ديال الصباح على صوت الخدامة لي كتفيق فيها .
ضياء : آش كاين ؟
الخدامة : صباح الخير ميس سيلينا موسيو جايكوب أمر باش يجيبو ليك كاع حوايجك و أغراضك من لوطيل لهنا .و من اليوم نتي فاستضافتنا حتى يرجع مستر جايكوب .
ضياء : علاش فين مشا ميستر جايكوب .
الخدامة : غيسافر ا ميس سيلينا .
ضياء : باقي مامشا ؟
الخدامة : لا باقي .
ضياء : صافي تقدري تمشي .
ناضت ضياء دوشات و لبسات باش تمشي للخدمة ،هزات صاكها و يالاه حلات الباب باش تخرج تساطحات مع جايكوب و جات عينيها فعينيه ، رجعات جوج خطوات لور و بقات واقفة .
جايكوب : فين غادية ؟
سيلينا : للخدمة .
جايكوب بنضراتو المعتادة : اوك شوفي أنا غادي مسافر يومين بالأكثر و نرجع الأعين عليك من كاع البلايص يعني تفكري ديري ها و لا هاه ندمك .

سيلينا :و لكن أنا مدرت والو علاش كتعاملني هاكا .

جايكوب بابتسامة : توتوتو ماديريش فيها البراءة حيت مكتعرفيش .
كان غادي و هو يوقف دار رجع عندها و ركز شوفاتو فعينيها و هضر .

جايكوب و هو كيتأمل عينيها : عينيك بحر غامض و مخبيين بزااف و لكن كنواعدك كل موجة فيهم غنعرف سرها .
قال كلامو و مشا خلا ضياء غتاكل راسها بالأعصتب مكتحملوش يقرب ليها كتحس بالذنب .🖤حرة بلا سلاح💔
#الجزء_82

مشات ضياء لخدمتها و فنفس الوقت جايكوب حتا هو سافر .
عند الزعيم .

كان داير اجتماع و هاد المرة فيه قادة إيران الكبار و لي خبرهوم الزعيم بالخطوة لي غيديرو ضد فلسطين و قال ليهم خطتو باش يمنعوهم و فعلا وافقو .
الزعيم : خطتنا غتكون كالتالي *******************.
القائد 1: و لكن غيخصنا بزاف ديال الفلوس و الجنود باش ننفذو هادشي .

الزعيم : من ناحية الفلوس تهناو أنا غنتكلف بكلشي و نتوما جيبو المعدات و الآلات و أي حاجة غتحتاجو .

القائد 2: امتى غنبداو التنفيد .
الزعيم : من بعد ما يكملو صنع القنبلة انشاء الله .

القائد : انشاء الله .
الزعيم : بالنسبة للدعم أنا غنتكلف و نجيبو من المغرب .
القائد 2: هاد الخطوة لي غنديرو غتشكل خطر كبير على إيران أزعيم .
الزعيم : متخافوش أمريكا متقدرش توقف ضدكم خصوصا أنكم كتملكو أسلحة نووية و هادشي غيزرع الخوف فقلوبهم .
القائد : كنتمناو .
الزعيم : عندكم مهلة شهر تجهزو فيها مزيان و خودو موافقة الرئيس و ديك الساع نبداو الخدمة .
القياد : حاضر زعيم .
الزعيم : يالاه الاجتماع سالا .
خرجو و خرج حتى الزعيم مشا لبيروه و دور لرضى .
الزعيم : الو رضى كلشي مزيان عندكم .
رضى : الحمد لله خويا و لكن للأسف ضياء مقدراتش تجيب الاوراق .
الزعيم : كنت متوقع و لذلك تافقت مع القياد فايران باش نبداو الخطة مباشرة مور صنع القنبلة ، مهم ارضى نتا مهمتك تحمي ضياء راه الا وقعات ليها شي حاجة منعقلش عليك واش خويا سمعتي .
رضى : كون هاني اخويا ضياء فعينيا .
قطعو مع بعضهم و كلا واحد مشا يقابل شغلو …🖤حرة بلا سلاح💔
#الجزء_83

عند جايكوب لي كان جالس فقاعة الاجتماعات فالبيت الأبيض مع رئيس أمريكا و أهم الشخصيات فالبلاد و لي مسؤولين على الخطة لي غيديرو ، بعد عدة مشاورات وقعو وثيقة بلي الملفات ولات تحت حماية أمريكا بدل اسرائيل و عاودو تافقو على الخطة و زادو شي حوايج و بهاكا سالا الاجتماع و مشا جايكوب يقضي الاغراض الاخرى لي جا على ودها و منها يطل على شركاتو فأمريكا .

عند ضياء .
كانت خدامة و هاد المرة بتركيز تام باش ميتكررش معاها نفس الغلط لي دارت ديك النهار . و كانت فبالها خطة غديرها للقنبلة و لكن ماشي الآن حتى يقربو يساليوها .

ضياء : دكتور مايكل عافاك واحد الدقيقة .

دايفيد : ميس سيلينا ياكما خاصاك شي حاجة ؟
شافت فيه ببرود و نطقات .
ضياء : سميتك مايكل لا اذن دخل سوق راسك ملي نبغيك راني عارفة سميتك .
مرضاش دايفيد حيت قمعاتو قدام كلشي و مشا .
هي بلعاني دارت ليه هاكاك باش يمشي ميبقاش واقف عليها كي خيالها ستاغلات الفرصة و مشات جهة الغرفة لي فيها القنبلة حيت هوما كينين فغرفة ديال الاختبارات لي كيديرو فيها التجارب .
وصلات و دخلات مشات جهة القنبلة و عاودات درسات الشكل الخارجي ديالها مزيان و حفضاتو باش تدير خطتها بلاما يعيقو بيها الأطباء الخرين ، بعدما كملات خرجات و رجعات تكمل خدمتها في هدوء و كأن شيء لم يكن .
فنظركم شنو خطة الزعيم و شنو خطة ضياء لي غدير فالقنبلة .
آرائكم و توقعاتكم تهمني 😘💔حرة بلا سلاح🖤
#الجزء_84

بعد مرور شهر .
فهاد الشهر متبدلوش بزاف ديال الحوايج غير أن القنبلة كمل الصنع ديالها و الزعيم و قادة إيران ضبطوا الخطة ديالهم و كلشي هو هاداك ، أما بالنسبة لجايكوب فراه رجع بعد يوماين من السفر ديالو و كان مراقب ضياء كالعادة و محيدش الشك ديالو فيها نهائيا و كان كيشرف على مراحل صنع القنبلة و مع ذلك ضياء نفذت خطتها بنجاح و بلاما يعيق بيها حتى شي واحد و بقات ساكنة مع جايكوب فالقصر و كتحاول ما أمكن تجنبو أما رضى مزال مراقبها من بعيد و لكن مكيتلاقاوش نهائيا و اليوم ضياء غتعلن للموساد بلي القنبلة كمل الصنع ديالها .

كانت واقفة مع باقي الأطباء كيشوفو فالإنجاز لي دارو فرحانين من غيرها هي لي كانت كاتمة الغصة فحلقها مقادراش تيق أنها صنعات سلاح يدمرو بيه وطنها لي أصلا هي جاية باش تعتقو من بطش الصهاينة .
قربات شوية للقنبلة و بقات واقفة حداها كتأملها و كتقول فخاطرها .
ضياء فخاطرها : آاااه دابا أنا صنعت السلاح لي غيدمر بلادي ، يا ربي مقادراش نتيق هادشي ، يا ربي تسمح ليا يا ربي ، و لكن أنا تايقة فعدالتك الإلاهية و متأكدة بلي عمر الصهاينة غيقيسو بيتك الشريف القدس أو الأرض المقدسة يا ربي .
فهاد الأثناء جا وقف عليها جايكوب .
جايكوب : اممم فاش كتفكر الباحتة ديالنا ؟
شافت فيه ببرود و كانت غادية و شدها من يديها .
جايكوب : خاصك تكوني فرحانة بهاد الإنجاز لي درتي و لالا .
ضياء سلتات يديها من يدو بهدوء و اصطانعات الفرحة : وي أنا فرحانة و فرحانة بزااف .
جايكوب : ماشي هادشي لي باين ليا .
ضياء : مكيهمنيش شنو كيبان ليك المهم انا باش كنحس و أنا دابا فرحانة .
جايكوب بقا كيشوف فيها مدة عاد قال .
جايكوب : تبعيني لبيرو .💔حرة بلا سلاح🖤
#الجزء_85

تأفأفات و تبعاتو لبيرو وصلات و دخلات لقاتو جالس فكرسيه و كعادتو كيلعب بالحجر فيديه هز نظرة فيها و شار ليها بيديه باش تكلس .
تقدمات بخطوات تابتة كعادتها و جلسات كتسناه يقول آش باغي .

جايكوب : بمناسبة أن القنبلة تمت صناعتها و بنجاح فهادا حدث خصنا ضروري نحتافلو بيه أو لا .

ضياء كتشوف فيه بحقد : لي باليك اموسيو جايكوب .
جايكوب : بون اليوما الاثنين دونك الحفلة غتكون نهار الخميس .
ضياء : مزيان .
جايكوب : خاصك تحضري .
ضياء : لا مون شاف غير عفيني أنا معنديش مع جو الحفلات .
جايكوب : حتا أنا و لكن هاد المناسبة كتستحق و منها نيت نعلنو الخبر باش تزيد تعلى مقامة إسرائيل كونها كتملك سلاح من أخطر الأسلحة النووية .
ضياء تفكرات خطتهم و قالت
ضياء : بالمناسبة امتى غتنفذو خطتكم ؟
جايكوب : توتوتو هادشي مكيهمكش نتي .
ضياء : كيفاش مكيهمنيش راه حتى أنا شاركت فصنع السلاح .

جايكوب : ميس سيلينا مهمتك كانت تصنعي القنبلة فقط لا غير .
ضياء : شنو كيعني هدشي ؟؟
جايكوب : كيعني أن مهمتك سالات ، يعني امتى و فين و كيفاش غتنفذ الخطة هادشي مكيخصكش نتي .
ضياء : لا كيخصني .
جايكوب : هه لا مكيخصكش حيت غنقولو ليك بسلامة دابا .
ضياء : كيفاش بسلامة ؟
جايكوب : يعني الشيفور لي جابك من المطار غيعاود يديك ليه حيت ببساطة مهمتك سالات .💔حرة بلا سلاح🖤
#الجزء_86

ضياء فخاطرها :ويلي ويلي غيتضرب ليا كلشب فالزيرو بفففف لا لا يا ربي .
جايكوب : و بالنسبة للحفلة الحضور إجباري و دابا تقدري تمشي .

ضياء بغيض: واخا موسيو جايكوب واخا .
خرجات ضياء من المكتب فورا سلتات طابلية ديالها و خرجات من المركز غادية فالطريق و كتفكر آش غدير ، على الأقل خاصها تعرف الوقت لي مقررين يديرو فيه خطتهم ، تفكرات السماعات و جبداتهم من ساكها ركباتهم .

ضياء : الو رضى ، كتسمعني .
رضى : وي ضياء كنسمعك .
ضياء : فينك دابا .
رضى : موراك مباشرة و لكن متلفتيش حيت راك مراقبة .
ضياء : خاصني نشوفك ضروري .
رضى : لا ميمكنش لينا ا ضياء شوفي الا عندك شي حاجة قوليها فالسماعات دابا .
ضياء : اليوم ا رضى كملنا صنع القنبلة .
رضى : مزيان أنا غنخبر الزعيم دابا باشنبداو خطتنا .
ضياء : أشمن خطة أ رضى ؟؟
رضى : من بعد و غتعرفي دابا مهمتك تقولي لينا امتى مقررين ينفذو عمليتهم .
ضياء : مبقاش عندي كندير .
رضى : علاش ؟
ضياء : داك اليهودي ديال جايكوب قال ليا بلي سالات خدمتي و خصني نرجع لامريكا .
رضى : شيت بفففف .
ضياء : و الواعرة داير حفلة بمناسبة صنع القنبلة و عارض عليا و على ما قال ليا مورا الحفلة مباشرة خصني نمشي فحالي .
رضى : امتى الحفلة؟
ضياء : نهار الخميس .
رضى : يعني باقي عندك الوقت خصوصا نتي دابا ساكنة معاه فالقصر .
ضياء : شنو غندير .
رضى : جيبي لينا موعد الخطة و الباقي علينا .
ضياء : رض ى شرح ليا من حقي نعرف .
رضى : لي نقدر نقوليك هو حنا غنسرقو القنبلة .
ضياء بسخرية : هههه من نيتك واش عارف شحال ديال الحراسة كاينة فالمقر و الحماية لي عليها .
رضى : تماما و حنا عندنا خطة ديالنا متخافيش نتي دابا غير ديري هادشي لي قلت ليك .
ضياء : اوك غنحاول يالاه بسلامة دابا .💔حرة بلا سلاح🖤
#الجزء_87

وصلات ضياء للقصر و مشات ديريكت لبيتها جلسات كتفكر كيفاش ممكن دير هادشي لي قال ليها رضى …
بعد مرور يومين .
كانت ضياء ناعسة فبيتها حتى دخلات عليها الخدامة . .
ضياء هزات عينيها شافت فيهم و نطقات بصوت نعسان : تفوو
الخدامة : كيفاش ا ميس سيلينا .
ضياء عاد عاقت براسها دوات بالدارجة و هي ضرب فمها بيديها و ظارت عندها .
ضياء : والو والو غير ملي كنكون ناعسة كنولي نطق كلام ممفهومش.

الخدامة : اوك ميس سيلينا ، أشارت لجهة محطوط فيها واحد الفستان ، هاد الفستان سيفطو ليك موسيو جايكوب باش تلبسيه فالحفلة ديال غدا .

سيلينا شافتو : رديه ليه مبغيتوش .
الخدامة : سوري ميس سيلينا منقدرش معنديش أوامر بهادشي .
سيلينا : بفففف صافي خرجي عليا .
مشات الخدامة باش تخرج و هي توقفها ضياء : بلاتي بلاتي ، فين موسيو جايكوب .
الخدامة : كاين فبيتو و من دابا نصف ساعة عندو اجتماع .
سيلينا : اجتماع فالمقر؟
الخدامة : لا مدام فالقصر هنا فغرفة الاجتماعات .
سيلينا : شكون غيحضر فيه .
الخدامة : عالأغلب غيكونو شخصيات مهمة بزااف .
ضياء جاتها فكرة و هي تصدر الخدامة فحالها .
سيلينا : اوك شوفي أنا اليوم مغنخرجش من البيت عيانة شوية فبلاما تجيبي ليا الماكلة و متزعجينيش .
الخدامة : اوك ميس سيلينا ..🖤حرة بلا سلاح💔
#الجزء_88

مشات الخدامة فحالها و ناضت ضيات دوشات بالخف و لبسات غير بيجامة ديال الدار و خرجات من بيتها غادية و كتسلت باش ميشوفها حد وصلات لبيرو ديال جايكوب بان ليها خاوي دخلات ليه و حلات الباب ديال قاعة الاجتماعات حيت كاينة فوسطو .
كانت قاعة كبيرة بزاف بحال داكشي ديال الأفلام و فيها طبلة كبييرة و دايرين بيها بزاااف ديال الكراسا.
بقات كدور عينيها كتقلب على شي بلاصة تخبى فيها باش تسمع آش غيدور فالاجتماع ، و لكن للأسف ملقات حتى شي بلاصة مناسبة يعني غتفرش غتفرش بان ليها تحت الطبلة هو انسب مكان .
ضياء فخاطرها : شناهوا لالا و الله منجلس تحت الطبلة نبدى نشم فصبابتهم تفو اليهود الخرين ، لالا و الله ما نتحنى ليهم .
بففف و لكن هادا هو الحل . هزات يديها كطلب الله : يا ربي مبغيتش نتحنا ليهم بغيت ديما نبقى الفوق و لكن هادا هو الحل يا ربي تسمح لياااااا (غوتات) اااااا لقيتها لقيتها يا ربي نتا كبير هههه .
ملي كانت كطلب الله و هازا راسها بانو ليها دوك قنوات التهوية لي كيكونو فالسقف و هنا جاتها الفكرة .
خرجات كتجري من البيرو و رادا البال لا يكون شي واحد شافها مشات لواحد البيت حتاهو السقف ديالو بحال هاكاك دخلات ليه و من حسن حظها كان فيه غير الكراطن يعني مكيدخل ليه حد جابت طورنيفيس و سلوم طلعات فيه تا وصلات السقف و حلات ديك قناة التهوية و بدات كتسلق بشوية تا دخلات فيها و عادوات سداتها من حسن حظها كانو واسعين و قداتها ، من بعد ما سالات بدات غادية كتزحف فاتجاه البيرو حيت حافضة الطريق واخا فالسقف .
وصلات لبيرو و بقات تما تا عمر القنت و تأكدات بلي كلشي كاين عاد جبدات تيليفونها دارت ليه سيلونس باش مايفضحهاش و بدات كتسجل هدرتهم .
ضياء فخاطرها : يا ربي نتا ديما مكتخيبنيش ، اليهود لخرين يالاه هاني وليت فوق منكم كلاب .
بقاو كيهضرو شي نص ساعة على مواضيع عاديين تا ملات ضياء و حطات يديها على حنكها بملل و هي تسمع داكشي لي قال جايكوب و لي بالنسبة ليها صدمة كبيرة .
قرصانات ترى شنو قال جايكوب ؟
آرائكم و توقعاتكم تهمني 😘💔حرة بلا سلاح🖤
#الجزء_89

بقات كتسمع و كتصدم أكثر و أكثر فداكشي لي قالو حمدات الله بلي سجلات كلشي صوت و صورة حيت دوك الفتحات فيهم تقابي صغار و تما خشات الكاميرا و سجلات أكبر دليل لي ممكن يدمر إسرائيل و أمريكا .
سالاو الاجتماع و ناضو خرجو فحالهم كاملين عاد رجعات تا هي بقات كتزحف تا وصلات لديك الفتحة لي دخلات منها و هاد المرة نقزات للارض بلا سلوم رجعات سدات داكشي و رجعات كلشي لبلاصتو و خرجات فاجاه غرفتها دخلات و سدات عليها الباب و دخلات للحمام تلقات الرشاشة عاد ركبات السماعات باش تدوي مع رضى .
ضياء : رضى رضى الو .
رضى كان ناعس فلوطو تا فيقاتو .
رضى : السلامة يا ربي كتخلعي بفففف .
ضياء : واش هادا وقت النعاس اصاحبي توكض معايا .
رضى : وي هاني كنسمعك كاين شي جديد .
ضياء : عرفتي ا رضى آش عندي ناااااري راه شي حاجة غتزعزع الكيان الصهيوني .
رضى : شنو هادشي .
ضياء : انا غنسيفط ليك فيديو و غتفهم منو كلشي .
رضى : واخا سيفطيه ، آجي و القنبلة امتى غيطلقوها .
ضياء : فالفيديو غتفهم كلشي .
قطعات معاه و سيفطات ليه الفيديو و مسحاتو من عندها عاد خرجات جلسات فناموسيتها كتفكر .
ضياء فنفسها : ولايني يهود ديال بصح تفو الكفرة بالله و لكن غير بلاتي أنا غندمكوم كاملين ، وعد مني غتندمو كلكم ،غير بلاتي .

حسات براصها تعصبات ديال بصح ، داكشي باش ناضت خرجات من بيتها و تلاقات مع دايفيد .
ضياء : دايفيد نقدر نسولك .
دايفيد : تفضلي ا ميس سيلينا .💔حرة بلا سلاح🖤
#الجزء_90

ضياء : كاين شي قاعة رياضة فالقصر ،حاسة براسي تخنقت .
دايفيد : ياس ميس سيلينا تبعيني .
ضياء : بلاتي نلبس حوايجي .
دخلات ضياء للبيت و مشات لبسات سوتيان ديال السبور كحلين مع كولون كحل مزير و سبادري بيضة و جمعات شعرها كوت شوفال و خرجات عند دايفيد لي داها لصالة السبور و مشا .
كانت عبارة عن قاعة كبييرة بزااف و فيها أحدث الآلات الرياضية و جميع أنواع الرياضات ، هي بدات بآلة الجري هو الاول حتى سخنات عاد بدات كدير حركات رياضية من بعد مشات مباشرة لبلاصة الملاكمة .
لبسات قفازات ديال الملاكمة و بدات كضرب بجهدها فالساك ، مع كل ضربة كانت كتخرج معاها صرخة غضب ، مع كل ضربة كانت كتفكر منظر ماماها و ختها بين عينيها و كتزيد تقوي الريتم فهاد الأثناء كان جايكوب واقف فالباب و كيتفرج فيها كيفاش عرقانة و داك العرق زادها جاذبية ، كيشوف عضلاتها لي باينة خدمات عليهم بزاف ، من الشوفة كتبان متدربة مزيان .
بقات كضرب كضرب محساتش بالوقت لي كيدوز و محساتش حتى بجايكوب لي كان كيتفرج فيها و تاهو ماملش .
ما وقفات حتى فركعات داك الساك عاد حبسات كتنهج و هي تشوف جايكوب واقف قدامها و هاز فيديه قرعة ديال الماء ،عطاها ليها باش تهزها مي ما خداتهاش و بقات كتشوف فيه شحال عاد نطقات .
ضياء : مابغيتش نشرب .

جايكوب حط القرعة فوق واحد الرف كان تما و دار يديه بجوج فجيبو و بقا تاهو كيشوف فيها.
جايكوب : شكون نتي ؟؟
ضياء باستغراب و فنفس الوقت خايفة لايكشفها مي مكتبينش .💔حرة بلا سلاح🖤
#الجزء_91

ضياء : كيفاش شكون أنا ؟
جايكوب : ماعرفتش علاش حاس بلي موراك شي حاجة .
ضياء قربات ليه و دوات : ماشي ديما الإحساس كيكون بصح .
دارت باش تمشي و هو يشدها من دراعها ، دارت شافت فيه و فيديه لي شادها تا طلقها .
جايكوب : ههه إحساسي مكيخيبنيش .
ضياء : اممم متيقش فراسك بزاف .
غمزاتو و مشات لبيتها في حين هو بقا واقف شحال كيشوف فداك الساك لي فركعات عاد مشا فحالو .
ضياء مشات لبيتها دوشات و لبسات حوايج ديال النعاس ، كانت غادية فاتجاه الناموسية و هي تبان ليها ديك الساشية لي فيها الكسوة لي جابت ليها الخدامة ، مشات هزاتها حلاتها كان عبارة عن فستان أحمر فلون الدم مزير من الفوق و مفرفر من التحت و فيه شي حجيرات كيبان غالي . ابتاسمات فسخرية و لاحتو فالارض و مشات تنعس ، حيت غدا تابعها يوم شااق …
عند الزعيم لي سيفط ليه رضى الفيديو و كان كيتفرج فيه هو و أعضاء المنظمة لي كانو عينيهم محلولين بالصدمة ديال داكشي لي سمعو .
الزعيم وقف الفيديو و هضر فصرامة .
الزعيم : شفتو شنو كيخططو يديرو ، هاه واش شفتو مدى الحقارة ديالهم .
عضو 1 : سيدي هادشي خطير بزااف .
عضوة 2: آه بصح أزعيم ، خاص القادة و الرئيس ديال إيران يشوفوه لان الضربة غتكون موجهة ليهم .
الزعيم : لالالا هادشي ميوصلش لشي واحد فايران نهائيا حتى نفكو القضية ديال فلسطين بعظا و نفذو خطتنا عاد نساليو لهادشي .
العضو 1 : و لكن علاش ميعرفوش دابا أزعيم .
الزعيم : حيت غتنوض حرب بين أمريكا و إيران و هادشي ماشي فصالح إيران مدام أمريكا و إسرائيل عندهم هاداك السلاح .
العضو 3 : وي زعيم عندك الحق .
الزعيم : قولو لجاسم يتاصل دابا بقادة إيران و قولو ليهم يباشرو الخطة غدا إنشاء الله و دابا سالا الاجتماع .
ناضو كاملين خرجو و بقا الزعيم جالس كيفكر : امممم ضياء يا ضياء ، ولايني راك ذكية ، فييينك اسي يوسف تجي تشوف بنتك ههه غتنوض الحرب العالمية التالتة هادي مفيهاش الشك .
يتبع ….
يا ترى شنو الحاحة الخطيرة لي كاينة فالفيديو ؟؟
توقعاتكم تهمني 😘💔حرة بلا سلاح🖤
#الجزء_92

أصبحنا و أصبح الملك لله فاقت ضياء كيف عادتها مع السبعة ديال الصباح دخلات دوشات و خرجات نشفات راسها و لبسات دجين بيض دارت ليه صمطة كحلة و لبسات تريكو فالسومو خفيف فيه وريدات منو و برودكان أسود ، دارت ميكاب صباحي خفيف و هزات صاكها و خرجات و هي هابطة تلاقات مع جايكوب حتى هو لابس لباس رسمي .
جايكوب : فين غادية عالصباح ؟
ضياء : ناس كيقولو صباح الخير .
جايكوب : سولتك فين غادية ؟
ضياء : هادشي ماشي شغلك .
جايكوب : ا ا ا شفتك بحالا نسيتي معامن كدوي .
ضياء :اففففف كنتي رئيسي ملي كنت باقا خدامة دابا لا يعني ممضطاراش نبرر ليك تصرفاتي .
جايكوب : اممم لا راك غلطي حيت راك فقصري ا مدموزيل سيلينا ، بما أنه آخر يوم ليك هنا فخليني معاك مزيان .
ضياء ضغطات على سنيها فغضب و بتاسمات بزز : اوك مون شاف .
جايكوب : مجاوبتينيش فين غادا ؟
ضياء : كيفما كتعرف اليوم كاينة حفلة و غادية للسونتر بيوتي .
جايكوب : اممم اوك متعطليش الحفلة غتكون مع الستة .
ضياء : اوك شولام (باي) .
خرجات ضياء شدات طاكسي مبغاتش تمشي مع الشوفير و مع ذلك حاسة براسها مراقبة ،وصلات قدام السونتر بيوتي و دخلات ليه ، بقات جالسة شي 10 دقايق و هي تخرج من الباب لوراني حيت ماشي هادي هي وجهتها ، غير خرجات وقف ليها رضى بلوطو طلعات فيها عاد تنفست الصعداء .

رضى : أهلا ضياء صافا ؟
ضياء : ماصافا والو ا رضى ، ولد اليهودية اليوم اليوم ، بفففف عرفتي شناهيا اليوم غينفذ الخطة و الحفلة دايرها غير باش يغطي .💔حرة بلا سلاح🖤
#الجزء_93

رضى : الحمد لله لي علمتينا بكري و وجدنا كلشي .
ضياء : رضى علاش مباغيش تقول ليا خطتكم ؟
رضى : هادو تعليمات الزعيم و لكن تأكدي غطرا اليوم واحد الحاجة لي غتقلب ليهم موازين الخطة كاملة ، مهم الا سمعتي شي خبر فالعشية متصدميش .
ضياء : بفففف كنتمنى و الله .
رضى : مهم من بعد هادشي لي غنديرو غيسهل علينا مهمة سرق القنبلة .
ضياء : أصلا أنا واخدة احتياطي .
رضى : ياكما درتي شي حاجة من راسك .
ضياء : القنبلة .
رضى : مالها ؟
ضياء : ركبت ليها خاصية متطورة و ميمكنش تخدم بلا بيها .
رضى : كيفاش ؟
ضياء حلات صاكها و جبدات منو واحد العلبة صغيرة حلاتها كانت فوسطها واحد اللعيبة دايرة بحال كارت ميموار غير هي كبر من الكارت شوية هزاتها فيديها و قالت .
ضياء : هاد الكارت هي القلب ديال القنبلة كتسمى الرباعيات و بلا بيها القنبلة مكتخدمش ههه يعني دابا هوما ديك القنبلة لي عندهم دايرة بحال لعبة ديال الدراري الصغار .
رضى انداهش من كمية ذكائها : واو ضياء نهار على نهار كتصدميني .
ضياء : و مكتفيتش غير بهاد الكارت درت احتمال لقدر الله طاحت فيدهم هاد الكارت و ركبوها للقنبلة هههه غتخرج ليهم شيفرة او كلمة سر خصهم يركبوها و بطبيعة الحال هاد كلمة السر أنا بوحدي لي عارفاها .
رضى : فالصراحة واو تباركالله عليك ا ضياء و لكن واش مخايفاش يقتلوك الا عرفو .
ضياء : ميمكنش حيت جايكوب بنفسو لي قاليا نرجع فحالي لامريكا و حتى لو كشفوني قبل منمشي ميقدروش يديرو ليا شي حاجة حينت أنا لي عندي كلمة السر .💔حرة بلا سلاح🖤
#الجزء_94

رضى : ضياء من بعد ما تسالي هادشي شنو غديري .
ضياء رجعات راسها لور و سكتات لوهلة عاد دوات : مغنتهنى حتى نقتل جايكوب بيديا و ناخد منو حق ماما و ختي و حق العلماء لي كيقتلو بدم بارد ، عاد ديك الساع نقلب على بابا .
رضى : حتى نتي عندك هاد الفكرة .
ضياء : كيفاش حتى أنا ؟
رضى : حيت الزعيم حتا هو بحالك متأكد بلي سي يوسف عايش و كيقلب عليه .
ضياء فرحات : واش واش بصح كيقلب عليه ؟
رضى :وي هاد تلت سنين كاملة كيقلب عليه و معمرو مل أو فقد الأمل .
ضياء : عرفتي أ خويا رضى ، بغيت غير امتى نتاقم من دوك اليهود و نلقى بابا و نتجمعو تاني أنا وياه و صباح و سيف كعائلة و ديك الساع الا بغات تجي الموت غير تجي .
رضى : ضياء غير تسالي هاد المهمة و صافي حبسي ، رجعي لعائلتك و عيشي حياة طبيعية .
ضياء شافت فيه و قالت : عمرني غندوق طعم السعادة فالحياة مادامني مازال كنتفكر هاداك المنظر قدام عينيا ، أنا صافي حياتي كرستها للوطن ديالي و مغنتهنى حتى نعتقو من يدين دوك الصهاينة .
رضى : حلم بعيد بزااااف ا ضياء .
ضياء : عالأقل نحاول و نموت و أنا كنحاول .
رضى : ضياء نتي باقي صغيرة متخليش نار الانتقام ضيع ليك حياتك غيجي نهار لي غتندمي .
ضياء : أودي ، عرفتي شنو قلب هاد الموضوع ، راني تعطلت و خصني نمشي . هاك هاد الكارت خليها عندك عافاك خبيها مزيان حتى توصلها بأمان للمنظمة .
رضى خدا من عندها الكارت و خباها .
ضياء : يالاه الله يعاونك .
رضى : ردي البال لراسك ا ضياء .
رضى : كون هاني ، شافت فيه و قالت : معرفتش واش مكتاب لينا نتلاقاو مرة خرى .
رضى : ضياء علاش كتقولي هاد الهدرة .
ضياء : معرفتش حاسة بشي حاجة خايبة غتوقع مهم تهلى فراسك و شكر ليا الزعيم هه واخا مكتابش نتشاوفو قوليه شكرا على وقفة الرجال لي وقف معايا .
رضى : نعلي الشيطان متقوليش هاد الهضرة ، انشاء الله تسالي هاد المهمة و نديك تشكريه بنفسك .
ضياء : انشاء الله ، و لكن مكيعلم بالغيب الا الله داكشي باش معارفاش واش غنشوفك مرة خرى و لالا مهم ، لا اله الا الله .
رضى : سيدنا محمد رسول الله ، ردي البال لراسك و خليك على اتصال معايا .
بتاسمات ليه و خرجات من لوطو دخلات لسونتر بيوتي .💔حرة بلا سلاح🖤
#الجزء_95

في حين هو هز التيليفون و دارو فودنيه حيت ملي دخلات عندو ضياء لوطو و هو فاتصال مع الزعيم و الزعيم سمع كاع هضرتها .
رضى : الو ، خويا باقي فالخط .
الزعيم : وي سمعت كاع هضرتكم ، شوف حاول تبقى مع ضياء اليوم كامل .
رضى : بقات فيا .
الزعيم : ماشي وقت هاد الهضرة ا رضى رد ليها البال حتى تسالي الحفلة و جيبها عندي لايران فهمتي .
رضى : اوك زعيم .
قطع معاه و بقى جالس فلوطو قدام السونتر بيوتي .
عند ضياء دخلوها لسبا دارو ليها ماساج رخا ليها العضام ، عاد خرجات صايبو ليها بوكلي و دارو ليها مشيطة خفيفة ديال الحفلات و ميكاب صارخ ركزو ليها على عينيها ولاو ساحرين ، ملي سالات كاع الموضفات لي تما تدهشو فجمالها و جلسو كيمدحو فيه أما هي شكراتهم و خلصات و خرجات فحالها ديريكت للمول شرات كسوة فلون السماء زرق باااارد بلو سييل كتافها طايحين و على شكل حوتة كتبين لاطاي واعرة و كمامها طواال (الصورة👇) . خرجات من المول و رجعات للقصر طلعات لبيتها ديريكت ركبات السماعة و دوات مع رضى .
ضياء : رضى كتسمعني .
رضى : وي كنسمعك .
ضياء : الحفلة قربات تبدى وجدو راسكم .
رضى : حنا واجدين مهم نتي ملي يعرف جايكوب الخبر لي غيصدمو خرجي ديريكت عندي .
ضياء : اوك .
رضى : خلي السماعة فودنيك و غطيها بالشعر راه متبانش .
ضياء : واخا .
مشات ضياء لبسات الكسوة لي جاتها كتحمق اليوم الطايح كتر من النايض .
دارت اللمسات الأخيرة و رشات ريحتها الكلاسيكية الهادئة عاد هزات الصاك ديال الكسوة لي كان صغيور فالأسود مع سندارا فالأسود كعبها عالي .
ولات كتبان بحال الأميرة خرجات من الغرفة و سمعات الصداع لتحت و الموسيقى متلوقة عرفات بلي الحفلة بدات و تمات غادية فالكولوار هي وصلات للدروج باش تنزل و هما يتلفتو ليها كاع الأعين بحكم الدروج كينين فلوسط .💔حرة بلا سلاح🖤
#الجزء_96

كانت نازلة بخطوات تابتة و أنثوية كاع الرجال لي تما كيشوفو فيها شوفات إعجاب كولشي كيتمناها تكون ديالو كانت أميرة بمعنى الكلمة هي كرهات راسها فديك اللحظة ملي شافت اليهود دايرين كي الحيوانات المكبوتين من دوك الشوفات بحالا عمرهوم شافو العيالات كرهات راسها كرهات جمالها كرهات جايكوب لي بزز عليها تجي للحفل ، نزلات تا وصلات للتحت معرفات فين تمشي مكتعرف تاحد تما قررات تمشي لواحد الزاوية معزولة تما فيها طبلة مشات ليها و بقات واقفة كتشوف فيهم واحد بواحد بحقد عارم كانو فديك الحفلة غير شكون و شكون ، أهم الشخصيات فاسرائيل و أمريكا و باقي دول العالم ، هزات تيليفونها بقات كتبقشش فيه تا جا وقف حداها جايكوب .
جايكوب كيهضر و يشوف فالضيوف : مكيعجبكش الأحمر .
ضياء : كيفاش ؟!
جايكوب : حيت ملبستيش الكسوة لي جبت ليك .
ضياء : مطلبتكش تجيبها عندي كسوتي .
جايكوب : على أي حتى هادي مبيهاش .
ضياء : تاحد مطلب رأيك .
جايكوب بابتسامة : معرفتش شنو لي مخليني منقتلكش لحد الآن .
ضياء (ضحكات بشوية ): يمكن طحتي فشباكي .
جايكوب : ولا يمكن موراك سر و غنعرفو .
هزات عينيها فيه و بقات كتشوف فيه ، ابتاسمات بسخرية و قلبات و جهها في حين هو جاب ليه السرباي جوج كيسان ديال الويسكي و حطهم .
جايكوب : هزي كاسك .
ضياء فخاطرها (لا زوينة هادي هادشي كامل و باغيني نشرب الشراب تفو على كنس كي داير): نو مكنشربش كيضرني فالمعدة .
جايكوب : امممم لي باليك.
جرها من يديها و داها لفوسط الحفلة و هضر فالمايك .
جايكوب : مرحبا بيكم كاملين ا ضيوفي الأعزاء فقصر آل سمحون اليوم أنا عارض عليكم بمناسبة امتلاك اسرائيل و أخيرا سلاح نووي و ماشي أي سلاح و إنما واحد من أخطر الأسلحة لي تصنعات فالتاريخ نبغيكم كاملين تشربو نخب هاد الخبر السعيد و تشكرو هاد الفاتنة لي معايا (شاف فضياء) ،بفضل ذكائها صنعات هاد القنبلة نخب نجاح الدكتورة سيلينا بنيامين .
ابتاسمات ليهم بزز و قالت فخاطرها : تشربو السم انشاء الله .
بعد مرور ساعة .
كانت ضياء واقفة و كتشوف الساعة فالتيليفون و كتسنى عفى أحر من الجمر .
هضرات فالسماعة بلاما تبين : رضى يالاه هادا هو الوقت .
ضياء : اوك .
ضياء : واحد جوج تلاتة .
صونا لجايكوب تيليفونو هزو جاوب .
جايكوب : ألو وي .
الشخص : سيدي عتق .
جايكوب : آش كاين .
الشخص : *************
جايكوب : اشناهوا . بفففف شوف لغي الخطة و رجع القنبلة للمقر داباا.
قطع عليه و مشا وقف حدا سيلينا .
ضياء : ياك لاباس ا موسيو جايكوب .
خنزر فيها و هز تيلي ديالو و تاصل بدايفيد .
جايكوب : الو دايفيد دابا وجد ليا دابا عشر آلاف جندي و وجدو المعدات و الأسلحة و الطيارات الحربية دابا .
دايفيد : واخا ا سيدي .
ضياء ستغربات متوقعاتش هادشي يكون خطير لهاد الدرجة .
ضياء : شنو كاين و علاش هاظشي كامل .
جايكوب : نتي غتمشي معايا .
فنظركم شنو وقع ، شنو ممكن تكون خطة الزعيم لي دارت هادشي كامل ؟؟؟
آرائكم تهمني 😘💔حرة بلا سلاح🖤
#الجزء_97

ضياء باستغراب : كيفاش غنمشي معاك و فين ؟؟
جايكوب : شوفي طلعي دابا بدلي هاد الحوايج و جيبي فاليزتك يالاه .
ضياء : واش من نيتك ا موسيو جايكوب راه عندي طيارة مع 6 ديال الصباح .
جايكوب شدها من مرفقها : هدرتي متعاودش سمعتي (طلقها) سربيييي.
ضياء بقات كتشوف فيه بحقد و مشات أما هو مشا فوسط الحفلة و هز المايك مرة خرى و هضر .
جايكوب : سيداتي سادتي ، خرج لينا واحد الأمر خطير لذلك مغنقدروش نكملو الحفلة سوري ، الحفلة سالات .
قال هاد الكلمات و طلع فحالو فاتجاه بيتو .
أما ضياء وقفات تا سمعات داكشي لي قال عاد مشات لبيتها و سدات عليها و هضرات فالسماعات .
ضياء : رضى آش واقع .
رضى : ضياء خرجي عندي دابا .
ضياء : معنديش كندير أ رضى هاداك ليهودي قاليا نمشي معاه .
رضى : بففف شوفي هربي من شي بلاصة .
ضياء : وراه منقدرش الحراسة مشددة .
رضى : صافي سيري معاه أنا غنتكلف .
ضياء : وا فهمني بعدا فين غنمشي معاه واش بيتو تسطيوني .
رضى : غتمشيو لامريكا ا ضياء ، شوفي خاصني نقطع دابا ردي البال لراسك عافاك .
ضياء : الو الو بلاتي بففففف .
مشات للدريسينغ حيدات ديك الكسوة و لبسات سروال دجين كحل مقطع من الركبة شوية مع تيشرت بيض خشاتو فالسروال و سبرديلة نايك فالكحل و كويرة كحلة ، مسحات داك الميكاب و كتافات غير بماسكارا و غلوس ، جرات فاليزتها و خرجات نزلات لباب لقصر لقات جايكوب كيتسناها .
جايكوب : تبعيني .
تبعاتو مشا ركب فلوطو ديالو و هدر معاها من الزاجة .
جايكوب : كتسناي العراضة ؟
خنزرات فيه و ركبات حداه و نطالقو و الوجهة كانت مقر الموساد.💔حرة بلا سلاح🖤
#الجزء_98

وصلو و هي مستغربة كاع الأفكار الخايبة طاحو فبالها .
جرها و دخلها للمقر و وقفو فساحة التدريب لي كانت كبيرة كانت ديك الساع الجوج ديال الليل جا عندو دايفيد و هظر معاه .

دايفيد : سيدي هاهوما عشر آلاف جندي لي طلبتي و كلشي واجد .
كانت الساحة عامرة بالجنود مخلطين بنات و دراري لابسين لبسة الموحدة ديال العسكر الإسرائيلي .
جايكوب : سمعو هادشي لي غنقول مزيان ، لطالما أمريكا عاوناتنا و وقفات بجنبنا و حمات دولة إسرائيل منذ التأسيس ديالها ، و اليوم جا الوقت لي نردو فيه خيرها على بلادنا . اليوم أمريكا كتعيش وضع صعب و خاصنا نوقفو معاها لطالما مصالحنا وحدة . (سكت و شاف فضياء عاد كمل الهضرة ) البيت الأبيض كيتعرض لهجوم من أشخاص باقي مجهولين و تقتلو بزاف ديال الجنود الأمريكيين لذلك أمريكا طلبات الدعم ديالنا و فورا هذا علاش غنسيفط كتيبة منكم كتكون من عشر آلاف جندي باش تحميو البيت الأبيض و الرئيس و دافعو عليه ، ماشي غير هادشي حيت هاد العصابة لي هاجمة على البيت الأبيض كتهدد أنها غطلق غارة جوية من دابا يوماين لذلك غنطالقو دابا لامريكا باش يالاه نوصلو فالوقت و نعتقو الوضع ، بغيتكم تبينو شجاعة رجال إسرائيل و خصوصا الا كانت هاد العصابة من النسلمين بغيتكم تقتلوهم تنحروهم من دون رحمة مفهووم .
الجنود : مفهوم شااف .
جايكوب : يالاه تحركو .
مشاو الجنود ركبو فالطيارات و بقا جايكوب و ضياء واقفين فالساحة .
ضياء : اوك البيت الأبيض كيتعرض لهجوم و الجنود مشاو باش يقدمو المساعدة أنا مالي فهادشي كامل .
جايكوب شاف فيها : يمكن نسيتي بلي راك جندية .
ضياء : كيفاش .
جايكوب : سيلينا نتي دزتي من التجنيد يعني كتعرفي تحاربي و تمسكي السلاح و كلشي سو مكاينش سبب مقنع لي يخليك فاسرائيل لذلك غتمشي تعاوني الجنود فأمريكا .💔حرة بلا سلاح🖤
#الجزء_99

ضياء يالاه بتهدر و هو يقاطعها جايكوب .
جايكوب فصرامة : مكنطلبش رأيك .
جرها من يديها و ركبها فلوطو و مشاو للمطار باش يركبو فطيارة جايكوب الخاصة .
عند الزعيم لي كان فالمنظمة ديالو فايران و مراقب كافة التطورات لي كاتحصل فالبيت الأبيض .
و هادي هي الخطة ديالو أنه يهجم على البيت الأبيض باش أمريكا تطلب الدعم من إسرائيل حيت جنود الموساد كيكونو أذكياء و مدربين مزياان و هادشي غيفتح ليهم المجال أنهم يسرقو القنبلة بدون أي متاعب بحكم أن مقر الموساد مغيكونش ليه الرئيس لي هو جايكوب و مغتكونش الحراسة الأمنية مشددة بزاف يعني الهجوم على البيع الأبيض كان كمين و لكن واخا كمين مغيخرجوش بيديهم خاوية و إنما عندهم خطة أخرى غتعرفوها من بعد .
الزعيم كيهدر مع رضى فالتيلي .
رضى: خويا بما انهم داو معاهم ضياء علاش منكلفوهاش بالمهمة هي .
الزعيم : أشناهوا واش نتا ماواعيش بكمية الخطر لي كاينة تما ها ؟؟
رضى : زعيم حتى هاد المهمة راه خطر و بالعكس إلا سيفطناها هي فهاد المهمة مغيشكوش فيها لانها غادية تحارب معاهم .
الزعيم : رضى قلت ليك لا مغنعرضش حياتها للخطر ، دابا نتا وصلتي لامريكا ياك .
رضى : وي
الزعيم : مزيان بغيتك تحميها و ترافقها بحال ظلها ، راه الا وقعات ليها شي حاجة تحمل مسؤوليتك سمعتي .
رضى : اوك زعيم .

عند ضياء و جايكوب لي وصلو بعد ساعات طويلة لامريكا و بالضبط للعاصمة واشنطن .💔حرة بلا سلاح🖤
#الجزء_100

خرجو من المطار و ركبو فلوطو بينما الجنود النص مشاو فطيارات حربية باش يوقفو الهجمات الجوية و النص مشاو فطموبيلات الجيش باش يحاربو فالأرض و جايكوب و ضياء مشاو فلوطو .
بعد نصف ساعة وصلو و بقاو بعاد شوية على البيت الأبيض ، هز جايكوب اللاسلكي و هضر .
جايكوب : امدرا فين راكم .
الجندي : رئيس ربعة ديال الطيارات قراب يوصلو و البقية متاجهين لشمال غرب واشنطن العاصمة حول .
شاف ف ضياء و نزل من لوطو جاب لبسة كانت فلكوفر عطاها ليها ، كانت عبارة عن سروال ديال العسكر و قاميجة و فوقهم درع الحماية و خوذة فالرأس و حزام كيدور على الخصر فيه الرصاص و كاط كحل ، خداتهم من عندو و لبساتهم حاوها هوما هادوك مع فصالتها .
ستاغلات الفرصة أن جايكوب بعد عليها و مشا كيهضر مع الجنود لي وصلو .
ضياء : رضى الو كتسمعني .
رضى : وي كنسمعك .
ضياء : آش هادشي وحلتوني فيه قلتي ليا خطة ماشي حرب و دابا أنا مضطرة نحارب مع هاد اليهود و نقتل جنودكم .
رضى : ضياء نتي مغتحاربيش .
ضياء : كيفاش .
رضى : شوفي أنا غنكلفك بمهمة واخا الزعيم رافض شوفي غدي *****************.
ضياء : و لكن باش غنعرف أنا بلاصتهم .
رضى : أنا غنعاونك شوفي حاولي تهربي من جايكوب و سيري مورا البيت الابيض للبحيرة الشمالية و تما غنتلاقاك صافي .
ضياء : اوك .
خرجات من لوطو و مشات حدى جايكوب لي كان كيدوي مع الجنود و كيقوليهم شنو يديرو .

Leave a comment