Skip links

 810 عدد مشاهداات

————حرفت بوك لا يغلبوك ———–

📖 الكاتبة: فاطنة اوزال. 📖

✉ من شب علي شيء شاب عليه✉

الجزء الاول

شرقات الشمس وضوات المكان…. صوت البهايم كيتسمع فين وفين ….كسر الهدوء وفيق الراكد … خلا لي مبغا افيق افيق بز منو ولي فايق اتوكض واعرف بلي وقت الخدمة وصلات انوض اعري علي كتافو …

بعيد شوية علي الديور لي ملاصقين فالدوار …. كاينة براكة وسط الاراضي الفلاحيةضايرين بيها من كل جهة …. متوسطة فالحجم مبنية غير بالتراب وفوق منها القزدير باينة مولاها علي قد الحال معندهمش ومخاصهمش حامدين الله وشاكرينو علي النعمة ….
داخل هذ البراكة لي كتكون من تلاتة ديال البيوت وطواليط وكوزينة … كيتسمع صوت انتوي غليط لمرا كبيرة فالعمر تكون عندها شي ربعين عام كتعيط بسمية جعفر
الام فاضمة : جعفر … جعفر … وداك المسخوط نوض تفطر راه باك ساير اعيط ليك من الصباح
جعفر (بصوت ناعس): امممم اش باغي لاش كيعيط
فاضمة : اويلي علي غدايدي ونوض تقعد راه العشرة هادي الناس فاقو بكري قضاو شغلهم وانت باقي خامر ليا هنا…. ونوض تكعد
جعفر : وامي ومالي انا الا قضاو شغلهم اش بغيتني ندير ليهم نزعرت وقيلا
فاضمة : اعباد الله واش نتف هك ولا هك واش غتنوض توصل باك تعاونو ولا نجي نكويك راه المجمر فين كيتسناك
جعفر : ارحم ميمتك بلاش هانا نايض صاف
فاضمة : لطيفة …. ولطيفة
لطيفة : نعام امي
فاضمة : حطي ابنتي لخوك الفطور … يلاه نوض غسل حالتك وجي تفطر وخرج عند باك وها وذني منك خرج تاني دور ودير شي مصيبة امجبد البلا راه اجي شي حد اتشكا منك راه غنكويك بدوك القطبان ديال العيد راه غير خامرين فالكوزينة وداك الشعر لي فرحان بيه نكرضو باباه … وهاني قلتها ليك
جعفر (بخوف) : لا غنمشي عند با
فاضمة : المهم هاني تبريت منك———-حرفت بوك لا يغلبوك ————

📖 الكاتبة : فاطنة اوزال 📖

✉ من شب علي شيء شاب عليه✉

الجزء الثاني:

نخلو البطل ديالنا جعفر افطر علي خاطرو بينما عرفناكم علي الشخصيات ديال القصة
جعفر شاب فعمر 24 عام خرج من قرايتو فالابتدائي بسبب الكلاخ ديالو لي ماليه نهاية ومابينو وبين القراية غير الخير والاحسان … شخص شفاف ونية بزاااف وراسو قسح من الحجرة تقول ليه الشرق اقول ليه لا الغرب تقول ليه بيضة اقول ليك لا كحلة ديما مفلق عباد الله بسبب كلمة^ والحمق^
جعفر عندو اخت وحدة صغيرة عليه فعمرها 20 عام ذكية تقولي دات الذكاء ديالها وديال خوها قراية ولكن بسباب الضروف حبسات القراية فالباك…
لطيفة اسم علي مسمي فتاة جميلة عندها حقها فالزين ولكن بسباب عمايل خوها بقات بايرة حداه اي واحد جا اخطبها وجعفر له بالمرصاد تنفيذا لمقولة “يا نتزوجو كاملين يا نبقاو كاملين بايرين “
الاب ديالو احمد فلاح عندو 49 عام بحال اي عروبي شخص قاسح فالطباع ديالو وديما عاقد حداش فالجبهة تقول خدام علي المغرب كامل … متعرفو معصب ولا فرحان المهم الله اهديه اخلي جبهتو تسرح اضرب فيها الهوا وانتوما قولو امين هههه…
الام فاضمة كاي ام مغربية ضروري من النكير مع الصباح وشوية ديال الصرامة ولكن كتبقا ام الحنان والعطف كيغلب عليها شمعة كل بيت لي باقا عندو الله اخليها ليه ولي ماتت ليه الله ارحمها ووسع عليها ضيقات القبور …
بعد ما فطر جعفر مشا عند الاب ديالو لي هاز العتلة وكيسقي فالارض …. وشير ليه اجي اعاونو وهدشي لي دار ….

العروبية معروفة بالفلاحة بفرعيها الزراعة وتربية المواشي حيت عندهم مؤهلات لي كتخليهم اديرو من الفلاحة مصدر عيش : اراضي خصبة يد عاملة جو نقي وهاديء وطقس معتدل … هذشي لي ممتوفرش فالمدينة رغم التطور لي فيها والراحة لي كتوفر الا ان البساطة تكون اجمل …——حرفت بوك لا بغلبوك —————–

📖الكاتبة : فاطنة اوزال📖

✉من شب علي شيء شاب عليه✉

الجزء الثالث:

تعاشات العشية وكلشي مشا لخربتو وكذلك الحال بالنسبة لجعفر لي مصدق طلقو باه مشا كيجري للدار عند مو يبكي ويشكي و يوريها يديه لي عامرين جروح بسباب العتلة لي باينة ممولفهاش وصحتو ماشي ديال تمارة ….

بعد ما كمدات ليه اديه ودارت ليه الدوا تحط العشا لي كان طاجين وتجمعو عليه العايلة كياكلو حتا نطق الاب بنبرة قاسحة وحلات ليه الماكلة فالحلق

الاب احمد : هههي انت اذاك المسخوط غدا غتنوض بكري 6 لقاك فايق تمشي معايا للسوق ولا نرض ليك ضهرك رطب من كرشك. ….. راك ضسرتي رخفنا ليك الحبل بزاأف بحالك راه رجال بشلاغمهم ووالدين الولاد وانت هنا ساير تهرنر بحال الولية
جعفر : و واااخا ابا
احمد : يللللللاه نوض تركد
خلعو مسكين ناض كيجري دخل البيت وسد الباب عاد رتاح ورد النفس…… من ديما الاب ديالو كيخلعو وكيخاف منو الا شافو بحال الا شاف الجن الكحل
حتا بغي انعس عاد تفكر وطلع معاه البلان بلي غدا غيمشي للسوق واخيرا … ناض اشطح وانقز كون مخاف من باه كون غوت وغني ولكن مبيدو حيلة الفرحة خلاتو انعس مبتاسم ببراءة …
جعفر شخص بوهالي معمر رجلو خرجات من الدوار باقي بريء معارف والو علي الحياة وعلي الدنيا فبالو بلي الناس كلهم عايشين بالفلاحة بحالهم ولا مقابلين الحانوت ابيعو السكر والزيت والدقيق … شخص بسيط وتفكير ابسط——حرفت بوك لا يغلبوك —————–

📖 الكاتبة : فاطنة اوزال 📖

✉ من شب علي شيء شاب عليه✉

الجزء الرابع

قبل اذان الفجر ناضت فاضمة متاجهة للكوزينة تدير لراجلها وولدها الفطور .. .. دارت الماء اغلي وصاوبات الفطور حطاتو فوق الطبلة ومشات تفيق راجلها اتوضا باش اصلي عاد مشات تفيق ولدها لي علي غير العادة غبر عيطات عليه نقز ومشا للطواليط اغسل حالتو باش افطر …

السبعة ديال الصباح لقاتهم فالسوق كيهبطو من البيجو لي جابتهم من الدوار وكل واحد اش جاب ابيع ها لي جايب الخضرة هالي جايب الغنم والبقر كل واحد باش كيترزق …. كيدوزو الساعات والسوق كيعمر وجعفر والاب ديالو باقيين كيبيعو الغنم ويتفاوضو مع الناس فالتمن …. بعدما سالاو شراو تقضيا ديال السيمانة ومشاو لصحاب الشوا باش اتغداو في انتظار السوق اخوا باش ارجعو للدوار ….
جعفر خلا باه مجمع مع رجال الدوار وسلت كيدور فالسوق وبكتاشف حتا شاف مول الشفنج بقا كيشوف فيه بغرابة وكيقول فراسو ^ اشنو كيدبر هذ السيد امممم اوا هاااادي حرفة جدبدة مكانتش علي بالي بلي كاينة ^

توالت الايام وجعفر كل مرة كيجي للسوق كيسلت من باه وامشي اقابل مول الشفنج كفاش كيلوي العجينة فيدو وكبحطها فالزيت ويقلبها بالمخطاف جاه داكشي عجب وقال نمشي ناكل ونشوف داكشي كيف داير …
وفعلا داكشي لي دار مشا كياكل ها الاولي ها التانية ها التالتة حتي ضرب 2 كيلو ديال الشفنج تبعو لديك الشواية لي عاد كلا مع باه كون غير كتبان فين النعمة السيد الجلدة لاصقة علي العظم تقول النعمة مكتدوزش ففمو——– حرفت بوك لا يغلبوك —————–

📖 الكاتبة : فاطنة اوزال 📖

✉ من شب علي شيء شاب عليه✉

الجزء الخامس:

ملي رجع من السوق وهو ساهي كيفكر ويخمم ويقارن بين حرفة باه لي هي الفلاحة وبين مول الشفنج وكيقول مع راسو

^ دابا الفلاحة فيها غير تمارة والفياق بكري وشي فلوس مكاينة يلاه كنشرو الماكلة صاف اما مول الشفنج مكيجي حتا العشرة ويبيع ومشي بحالو حرفتو ساهلة وخا هكاك السيد مطور….. مول الشفنج هو سيدهم باينة خاصني نقلب الحرفة ونولي بحالو امممم ولكن خاصني نتعلم ^

ومن داك النهار لي قرر ابدل الحرفة وهو مقابل الكوزينة كيف المش كيشوف فختو ولا مو كيفاش كتعجن وفبن دايرين الدقيق وكيفاش كيشعلو البوطة وملي كيمشي للسوق كيقابل مول الشفنج وهكا دازت عليه سيمانة ….

قرب العرس ديال بنت خالتو وخوات الدار خلاوه بوحدو انش الذبان …. شوية وهو يتوكض كال هادي هي الفرصة نتعلم باش نولي شفنايجي حتا انا
دخل للكوزينة بقا كيقلب وملقاش الزيت فكر شوية وهو اقول
^ لا لا هذي فرصتي منضبعهاش غنمشي نسرق الزيت عند مول الحانوت كاع ميعيق بيا اصلا ثقيل وكاع مكيشوف مزيان مغيجيب ليا الصرف حتا نقضي الغراض ^
داكشي لي كان مشا الحانوت لي فيه راجل كبير فالعمر تقريبا فعقدو الخمسين كال لبه عطيني خمسة ديال الفانيدات وعطاه 5 دراهم مجاب مول الحانوت الصرف حتا سرق ليه جوج قرعات ديال الزيت خباهم فميكا كحلا وخدا الصرف ورجع للدار ….——— حرفت بوك لا يغلبوك —————

📖 الكاتبة: فاطنة اوزال 📖

✉ من شب علي شيء شاب عليه✉

الجزء السادس:

اوا اسيادنا جعفر رجع للدار ودخل للكوزينة حط الزيت ومشا كيقلب علي البانيو ملقاهش لقا غير القصرية فبن كانت كتعجن ختو وبقا كيفكر شنو ادير قال مع راسو ^ مول الشفنج شفت عندو العجينة فالبانيو اذن خاصني بانيو فاش نعجن امممم ولكن بحال البانبو بحال الجفنة ^

قال هدشي وقصد برا الخيمة فين كاينة الزريبة خدا الجفنة حدا الحمارة وخواها من التبن ودخلها للدار غسلها بالماء وخوا فيها خنشة ديال الدقيق لقاها تما وجاب سطل ديال الماء وخوا نصو وبدا اخلط وزيد فالماء زيد بلاك حتي خلط داكشي بلا ملحة بلا والو دقيق والماء كافيين ووافيين بالنسبة ليه

خرج من الكوزينة شعرو رجع بيض وبديه ووجهو وحوايجو عامرين بالعجينة فينما كان كيخلط كيحك الجبهة وبمسح العرق ولا يحك نيفو ولا فمو المهم ولات حالتو حالة كيخلع الميت فما بالك بالحي الذي يرزق هههه
سالا من العجين ومشا جاب القرعة الاولي ديال الزيت خواها فالمقلة ودارها فوق البوطة وبدا خدام فالعجينة اكرص ولوي مخلاها تخمر لا والو السيد زربان علي خبيزتو هههه
الحمد لله خلا الزيت حتي غلات ولاح داك العجب لي صاوب متعرفو شفنج ولا شباكية ولا خبز ….تسمعات ديك تشششش خلعاتو مسكين قفر هارب وضرب المقلة وتخوات الزيت حفظو الله طاحت للجهة الاخري ومحرقاتوش اما اجيب الربحة لي معمرها تنسيه وتخليه اكره الشفنج وماجا منو هههخ——- حرفت بوك لا يغلبوك ——————

📖 الكاتبة : فاطنة اوزال 📖

✉ من شب علي شيء شاب عليه✉

الجزء السابع والاخير

اوا السيد بعد هدشي كامل لي وقع مقنعش من المصايب وقرر امشي للسوق وتما اشوف فمول الشفنج وادير بحالو اهدشي لي اوقع هز البوطة والمقلة وديك الجفنة وحتا القرعة دبال الزيت دارهم فوق الحمارة وقصد السوق

وصل للسوق ولقا الدنيا بقا عامرة بالبشر حط داكشي لي جاب وبدا كيعيط للناس ها الشفنج لي بغا الشفنج بقا كيغوت تما حتي بح ليه الصوت وتقول شي حد وصلو ولا قرب جيهتو وقال مع راسو

^ وراه خاصني نصاوب شي شفنج ونحطو باش اشوفوه الناس وايجو عندي كبجرو ^

المهم السيد بدا فخدمتو ورجع كيلوي فداك العجب وبحط فالزيت ويقلب مكمل حتي غفر ليه الله الذنوب لي دار فحياتو كاملة …. اديه تشوطو وشي مدارو
صاوب شي عجب ميمكن تقول عليه شفنج داكشي خرج ليه شي تشوط وولا كحل وشي بيض وقاسح تضرب بيه راس الكافر اتوب اولي اصلي الليل والنهار ههه
بقا واقف تما العشية كاملة حتا واحد موصلو ولا سولو لي شاف داك العجب لي صاوب وشاف الجفنة عامرة من برة بروث ديال البهايم اهرب ناهيك عن حالتو لي كتخلع
السبد تعصب وطلع ليه الدم وقرر ارجع بحالو للدار لي خلاها مرونة وعرف راسو غياكل ماكلة الطبل نهار العيد حيت رون الكوزينة عاد الدقيق لي خسرو اما باه حريرتو حريرة غيعلقو من شعكاكتو فالخرجة ديال الدوار
مشا فرق ديك العجينة لي بقات ليه للحمير لي تما وحتي داكشي لي صاوب وحلف لا عمرو عاود اقرب لهذ الحرفة لي ماشي ديالو ومكتليقش ليه كما قال المتل” تبع حرفة بوك لا يغلبوك “

》》》النهاية《《《