Skip links

 3,148 عدد مشاهداات

 

سلام البنات كنتمنى تكونو لباس .. بغيت نشارك معكم قصة الفقيرة المحظوظة من عشرين جزء كاملة هي قصة كاتجمع مابين الكوميديا ودراما والجريمة وحتى التشويق
قصة : الفقيرة المحظوظة
بقلم : #asmae_ely

الجزء الأول
كاينين جوج أنواع ديال الناس فهاد الدنيا .. النوع الأول لي ماعندو زهر تا فخلا دار بوه .. والنوع التاني عندو زهر كايهرس الحجر .. أنا وبكل تواضع من الفصيلة تانية غير هو زهري ماشي كيهرس الحجر كيفرتتو .. احم احم .. مهم أنا هي الحفيدة 31 فطاسيلت الوليد والإبنة التاسعة عند واليديا .. وفعادتنا وتقاليدنا فالمنطقة لي ساكنين فيها وهي عبارة عن قرية صغيرة فأحد الجبال .. الجدة هي لي كتسمي الحفيد والجد هو لي كيدبح على تسمية .. وحيت أنا هي الحفيدة 31 بلا لي ماتو .. جدة تقداو ليها سميات وجدي حلف لا عاود دبح شي حولي من بعد رفسة لي دار ليه أخر أضحية ولي دخلاتو سيمانة فكومة .. لداكشي جابو ليا جزار من المدينة ولي سول جدة على سمية لي غاتسميني بيها وقالت ليه “مايس” زعمة بشلحة مانعرف .. وحيت الجزار مكايفهمش الشلحة يسحابو مايس هي السمية المختارة لداكشي دبح عليها .. بيني وبينكم حسن من رقوش وفطوش إلخ … نكملو فالمهم .. قريت وكملت قرايتي الحمد لله وخديت الباك وكنت أول بنت تاخد الباك فدوار .. يالا فرحتي .. ولكن يالا صدمتي ملي عرفت لباك مكايسوا والو .. لداكشي قررت نكمل قرايتي فالجامعة لي فالمدينة ..و لي مشيت ليها قبل شهر من القراية باش نتأقلم .. عائلتي مكان عندهم تا اعتراض حيت عندنا بنادم بزايد .. الفائض فالموارد البشرية .. إيوا ومشيت لمدينة وضبرت على واحد البويت فسطح للسكن ب 2000 ريال لشهر .. والماكلة من عندهم ههه .. ماتيقتونيش ياك ؟؟ هدا هو الزهر لي قلت ليكم عليه .. وصراحة تا أنا زدت فيه شوية .. لبيت لي قلت ليكم عليه جات قدامو روضة ومول دار سي عيسى هو العساس ديالها .. وحيت ختكم فقيرة + بخيلة .. كناكل غير فصدقات وبعد المرات كنقني على شي ميت الله يسمح ليا وكانتبع عائلتو لدار لعزو .. ولا كنحسب ربعين لشي ميت قديم .. الله يسمح ليا ويغفر ليا ولكن غير نترفح شوية ونشد فراسي نولي نشري ماكلتي .. مهم ندوزو الأمور العملية من بعد ماقلب عليا السعد شي يامات ونظرا لإفتقاري للخبرات لقيت خدمة فواحد سيبير ب 500 درهم لشهر .. خدمة مزيانة صراحة وبالخصوص لوحدة يالاه جايا من العروبية .. ولي مكاتعرف لكلافيي من لاسوري فسيمانة ولا عندي فايسبوك تويتر أنستغرام تمبلر pinterest gmail hotmail فين ما قلبتي تلقاني ووليت مشهورة فعالم تواصل الإجتماعي .. وحاليا أنا فسيمانة تانية وطموحي نولي هاكر إن شاء الله بحال زكريا الولد لي خدام معايا فعمرو شي 27 عام هو ولد مول سيبير وهو لي علمني لبيسي.. مرة كانخدمو بجوج مرة كل واحد فينا كايخدم نص نهار مهم القضية محركة هه

الجزء التاني
فقت ليوم على سرسار ديال ساعة دجاجة لي جبت معايا من البلاد .. مع ختكم ماعندهاش تيليفون للأسف كانقول تايصيفط ليا با لفلوس ونشريه ان شاء الله … خرجت من بيتي كانتكسل فسطح وجيت بغيت نطل على الحياة المشرقة لي كاتسناني فهاد المدينة ساعة مالقيت قدامي غير المقبرة الحزينة احم احم تكمشت ودخلت لبيتي باش نفطر وفطور كان كالآتي جوج حلويات لي بقاو ليا من صدقة ديال المرة لي فاتت دوزتهم بواحد كاس الما ولبست حوايجي وخرجت.. وفالباب تلاقيت مع خالتي سعيدة مترو وسبعين فطول علاش قلت ليكم طولها حيت راجلها سي عيسى طولو مترو وربعة وخمسين كايجيوني كوبل متناقض هي بخيلة وهو كريم هي عزيز عليها تبروفيتي فعباد الله وهو على نيتو مسكين هي حيوية واجتماعية وهو كايدوز وقتو مع الموتى كتر من الأحياء وواخا هادشي مفاهمين واخا ماكايتشابهوش ولكن كايكملو بعضياتهم
– خالتي سعيدة : صباح الخير أمسيسي
– سميتي ميس أخالتي ميس مايس مااايس
– ماعلينا كي ميس كي مسيسي .. قولي ليا سمعت شيشوار عندك لبارح بليل؟ راكي ماكاتخلصيش ضو باش تسفيه لينا
– داخلنا عليك بالله أخالتي واش شعري باينة عليه حالة سيشوار
– بصح شعرك خاصو غازيزوار هههه
– لسانك اخالتي سعيدة جرح زيزوار .. شي حاجة واخرى قبل مانمشي ؟
مشيت وخليتها دزت على سي عيسى فروضة قاد ليا المزاج لي خسرو ليا العجاج ديال مراتو ..تانعاود ليكم مع زكريا لي وصلت عندو لقيتو جالس خاشي وجهو فالبيسي باينة جالس كايكدب على عباد الله فالفايسبوك كي عادتو
– هو : صباح الخير ألفقيرة المحظوظة
– صباح النور يالفقير الحقير … شوف هاد 1000 ريال كي كاتبري يالاه خارجة من البانكة نيشان ليد لالة ميس
– منين جاتك على صباح ؟؟؟
– نعاودها ليك كي الخرافة وانا جايا للخدمة هاد صباح عيط ليا سي عيسى قاليا سيري عند داك المرأة لي واقفة عند داك القبر .. مشيت عندها كانت مرأة كبيرة باينة عليها ماقارياش .. قالت ليا بغيتك تقراي شوية ديال القرآن على ولدي الله يرحمو.. قلت ليها مرحبا انا أصلا واخدة الجائزة الأولى فتجويد القرآن ملي كنت كانقرى فسادس صوتي ماشاء الله عليه داير كيف البلبل
– ماشي كيف الببغاء ههه؟؟؟
– كايقولو بلي الى ماكنتيش غاتقول شي حاجة حسن من سكات غير سكت
– هاهو ساكت ههه ايوا كملي
– مهم قريت ماتيسر من القرآن الكريم ومدات ليا 400 دريال .. قلت ليها بالحرام عليا مانشد شي ريال حيت قريت القرآن أنا ماشي بياعة وشرايا .. ربي بغا ولدك ويسيرني نقراعليه القرآن … ولكن الى كنتي مصرة غاناخدها كصدقة على المرحوم .. شافت فيا وجمعات 400 دريال وجبدات 1000 ريال ومداتها ليا .. الحمدلله حيت ربي يسر لينا الخير فبعضياتنا
– زهرك نابت فالقطن ماشي بحال زهري نابت فالغيس ديال شي مستنقع غارق
– ماتقولش هكاك ماحدك متفاءل وكاتحسن ظن فالله ربي كايزيد يعطيك «لَئِن شَكَرْتُمْ لَأَزِيدَنَّكُمْ »
– ونعم بالله ألفقيرة المتفائلة … براكة ماتشوفي فداك 50 درهم راها غايقطعوها عينيك
– اول مرة يعطيني شي حد هاد الفلوس كاملة .. كانحس براسي في طريق الثراء هه
مهم بدينا كانخدمو هو كايخرج البحوث لتلاميد اما انا الى جا شي حد كانعطيه الورقة بحالا راكبين فالكار هه .. وكاندير حتى فوطوكوبي .. وصلات الوحدة وقت الغدا عرض عليا زكريا نمشي نتغدا معهم فدار وانا سمعتو سيديتي المعهودة
– واش يسحابك أنا يالاه حطني الكار .. أنا راه هادي شهر باش حطني .. نمشي معاك نتغدا حتى نصدق مودنة عليا العشا … انا قالت ليا مي ماتيقي فحتى قندوح
– صافي صافي ندمتينا الله يعطيني تونية الى عاودت حشيتها ليك

الجزء التالث
دازت شهر على فاش جيت المدينة .. واخا توحشت دارنا ولكن بديت نولف هنا .. ليوم هو يوم مميز بنسبة ليا شحال حلمت بيه وليوم تحقق .. هاد نهار غادي نبداو القرايا وأخيرا غانتحول من تلميذة فثانوية للطالبة فالجامعة.. حسيت براسي فخورة بيا وبلي كاع بنات قريتنا حتى هما غايكونو فخورين بيا .. واخا أغلبهن تزوجو وماكملوش ولكن أنا غانتبت لأي واحد قال البنت ماغاتفيدها لقرايا بوالو بلي غالط..مهم بلامانطول عليكم فبلابلا .. مشيت للجامعة هادي ماشي أول مرة نشوفها حيت فايت ليا جيت تقيدت فيها ولكن أول مرة ندخل للقاعة المحاضرات ناااري شحال كبيرة وشحال عامرة بطلبة لي لابسين مزيان بحالا ليوم العيد انا بطبعي ماكاتهمنيش المظاهر ولكن راه بزاف على تفركيس ههه ماشي كلشي طبعا ولكن الأغلبية وانا مزالا مدهولة دخل الأستاذ المحاضر لابس الكومبلي مع الكرافطة جلس وبدا كايهضر معانا فالميكروفون .. واخا كان احساسي بالدهشة طاغي ولكن مانقصش من احساسي بالفرحة
دوزت جوج محاضرات رغم انهم كانو طوال ومليئين بالمعلومات إلا أنني ماحسيتش بيهم حيت عزيزة عليا القرايا .. تعرفت على جوج بنات رباب وجيهان بانو ليا ضريفات هما بقاو يتغداو فلافاك اما أنا خرجت مشيت للمحطة حيت با مسيفط ليا الفلوس مع الكار غادة فطوبيس وكانفكر شنو غاندير بيهم
أول حاجة غاندير غانخرج من الخدمة حيت بغيت نركز على قرايتي
ثاني حاجة غانشري الكتوبة ودفاتر
ثالت حاجة غانتقدا للشهر ومانبقاش ناكل فالجنازات والصدقات
رابع حاجة غانخلص لكرا
والى شاطت ليا شي حاجة غانفركس بها راسي أما تيليفون حتى نشد فلوس المنحة
مهم بقيت كانبني ونعلي حتى جا الكار المقصود .. الله ماقاداني فرحة غانتهنى من جميع مشاكلي المادية ههه
– شيفور ديال الكار : هاكي أبنتي صيفط ليك باك هاد 100 درهم
هاد الجملة بكترة ماتعاود صدى ديالها فراسي تريبو ليا كاع أهدافي لي هادي شهر وأنا أطمح ليهم .. ماعرفتش كيفاش وصلت لدار لقيت سي عيسى عند الباب خلصتو فكراه وطلعت لبيتي توضيت وصليت ودعيت الله يفتح ليا شي باب ديال رزق من حيت لا أحتسب والحمدلله ربي كما ديما استجب ليا وهاد المرة بسرعة البرق .. انا براسي مزال مامتيقاش أشنو طرا ليا ولا حتى كيفاش طرا مهم نعاود ليكم ملي نوصل لسيبير
– زكرياء: مساء الخير أطالبة الفقيرة
– أنا: مساء النور ألفقير المقهور هه
– كيداز نهارك لول فلافاك ؟
– كي وجهك ههه
– رغم أنني جميل وبوگوص وتيتيز حسيت به داز خايب
– هههههه لا لا والله الى زوين .. حسيت براسي بحالا داخلة للكوكب أخر … غادي نولف ان شاء الله
– كايعجبني التفاؤل ديالك .. ولكن كنبشرك من دابا بلي غايدوزو عليك فيها سنوات عجاف هههه
– محطم الأحلام ههههه
– هههه الفرحة لي على وجهك شنو سببها ؟؟؟ حيت حاس بيك شوية وتبداي تنقزي هه
– غير نقز وصاف؟؟ انا ماكرهتش كن كانو عندي جناح ونطير.. نعاودها ليك كي الخرافة تاهادي هه… كنت مهمومة ودزت من حدا الروضة وبانت ليا واحد المرأة كاتبكـــــــــي حدا واحد القبر وقلت نمشي نواسيها ومع كان قلبي طايب مالقيت مانقوليها وبديت كنبكي معها .. هي تبكي وأنا نبكي حتى خوينا قلبنا من بعد قالت ليا بلي ترزات فبنتها فنهار عرسها وعاودت ليها تا أنا على همي .. ولمحاسن الصدف تابنتها كانت كاتقرا القانون قبل ماتموت و بلي مزال فبيتها كتوباتها كما خلاتهم .وقالت ليا الى بغيتيهم يالاه معايا نعطيهم ليك .. صراحة فلول خفت نمشي معاها ولكن توكلت على الله ومشيت معاها .. تخيل عطاتني گاع الكتوبة گاع الملخصات ديال جميع سنوات .. زيد عليها عطاتني حوايج بنتها والبيسي ديالها وعطاتني حتى تيليفونها مافيهشش لاكارط طبعا ولكن باقي جديد كانظن بنتها شراتو اخر اصدار حيت واخا ماتت هادي عامين ولكن راه حسن من تيليفونك أزيكو ههه سمح ليا على هاد الكلمة ولكن هادي هي الحقيقة هه
– الفقيرة المحظوظة عندك زهر كايهرس الحجر.. ولكن واش ماخفتيش تستعملي حوايج وحدة ميتة؟
– علاش زعمة ؟؟؟
– امممم (قلب الموضوع) بنتها ماتت هادي عامين وعاد صدقات حوايجها ماجاتكش غريبة ؟
– قالت ليا ما لقاتش شخص المناسب وأنها مهما احتافظات بأشياء بنتها غايجي الوقت لي تفارق معهم كيما تفارقات مع بنتها اللهم تعطيهم لواحد محتاجهم .. بيني وبينك كانو كايتسناوني نجي ههه
– هههه ايوا بالصحة والراحة يدخلو عليك بالفرحة والهنا
– شكراا أزيكو
– هانية أميسو هه

الجزء الرابع
خرجت من الخدمة ومشيت كنجري لدار وانا ماقاداني فرحة .. لقيت الأشياء لي جبت كما حطيتهم .. حرت شنو نشوف لول لداكشي صليت جوج ركعات حمدت الله فيهم قبل ومن بعد بديت كانشوف الكتوبة هما لولين حيت هما الأهم لقيتهم كلهم باسم إشراق القباب نفس اسم القبر لي كانت كاتبكي عليه داك سيدة .. كانو مرتبين بالأعوام وباينين باقين جداد باينة بلي اشراق الله يرحمها كانت مرتبة فحياتها وبلي كانت مجتهدة .. وحتى أنيقة حيت حوايجها لي شفت من بعد خلاوني غير حالة فمي .. ملي قيستهم حسيت بلي ماشي أنا .. تقول الحوايج لي لبسوني ماشي أنا لي لبستهم هه..فلول حسيت بالفرحة ولكن من بعد طاح عليا ضيم وحسيت بتأنيب الضمير حيت هادشي كلو فالأصل ماشي ديالي واشراق كن ماماتش كاع مايكون عندي هادشي .. بصح ربي لي كايرزق ولكن مشاعري تخربقو فهاد اللحظة لداكشي قلت نصيفط ميساج لزكريا بنمرتي جديدة نقاد بيه المجاج حيت هو الوحيد لي كايضحكني فهاد المدينة
– أنا : salam
– هو : Hola
– الحولة هي عينك اليمنية
– سومية شحال مرة قلت ليك بلي انت هي لب عينيا .. وهاد نوامر لي كاتجربيني بهم كل مرة ماعندهم حتى معنى حيت أنا كانبغيك غير انتيا
– هاي هاي على القافية .. شكون سمية أسي زكريا ؟
– على ماشي نتيا سومية ؟؟
– لا أنا حورية من سعيدية
– أطيب ناس هما ناس سعيدية .. ماقلتيش ليا شحال فعمرك أزين أأ أحورية؟
– أنوض تحرك عليا الله يعطيك تونية وباااااز شحال ماكاتقضاش
– آآآه ميس هادي ؟؟؟؟ عرفتك والله الى عرفتك غير بغيت نشد فيك
– تشدك جنية وتهرس ليك راسك بطوبية
– سبحان الله لسانك كايتطلق فشاط .. أجي تعشيتي ؟؟؟
– لا مزال
– اجي دابا لزنقة المرابطين تلقايني حدا الخزانة د العرس بزربة قبل مايفرقو العشا
سمعت عرس نيشان طاح ليا فبالي الدجاج المحمر ولحم بالبرقوق.. معدتي مسكينة طابت بكسكسو ديال الگنايز.. خرجت كنجري مارديتش البال حتى لشنو مزال لابسة .. فرمشة عين وصلت لزنقة المرابطين دخلت للخزانة لقيت زكريا شاد ليا حداه بلاصة فطبلة جلست بزربة .. حيت العريس والعروسة كانو دايزين باش يمشيوا يبدلو .. الغريب هو أن العريس والعروسة بداو كايشوفو فيا مصدومين .. ناااري ياربي عنداك يسيقو الخبار بلي مامعروضاش ويجريوا عليا ..مرت داك ثواني لي بداو كايشوفو فيا كأنها أعوام ناااري حسيت بالإحراج .. زكريا بدا كايكحز عندي كايخبيني حتى دازو وبدا كايضحك من بعدها.. وبدينا كانهضرو بتوشويش
– هههههه هو ضروري ماكان عليك تلبسي هاد لباس فهاد العرس بدات هههههه
– (عاد حنيت راسي نشوف شنو لابسة .. لقيت بلي مزال لابسة واحد الكسوة ديال اشراق لي كنت كانقيس) على أش فيها ؟؟؟
– وتلبسي لباس الميت فعرس باغا تسدي لينا شاهية ههه
– باش عرفتيه لباس ديال ميت ؟
– خودي كارطونتك ديال الحلوة خبيتها ليك
– اووووه شحال كيوت
بدا كاشوف فيا بتعجب لونو تخطف قال بسم الله الرحمان الرحيم ودور وجهو .. من بعد حطو العشا كليت حتى صافي معدتي عمارت .. الله على نهار شحال زوين صباح كان ماعندي حتى حاجة ودابا لابسة مزيان وواكلة مزيان وبالي مرتاح الحمدلله يارب
خرجنا أنا وزكريا قبل مايسالي العرس ومع كان ظلام قاليا يوصلني وبقينا كانتمشاو وكانهضرو
– نااااري بكترة ما بداو العروسة والعريس كايشوفو فيا قلت دابا وهما جراو عليا ههه
– هههههههه ماتخافيش ماحدك معايا مكاينش لي يجري عليك ولا يأذيك
– هاي هاي على سومية الرومانسية هههه
– ناري غير لبستي هاد اللباس ولا لسانك طويل هه
– قالك اللباس زوين كايزيد الثقة فالنفس هه
– عنداك غير تمشي تسكنك مولاتو هه فراسك بلي العروسة كانت صاحبتها والعريس كان كايبغيها ولكن هي گاع ما كانت كاتشوف فيه حتى شوفة ملي ماتت بداو كايواسيوا بعضياتهم حتى طاحو على زنافرهم وتزوجو هه .. كن كانت حية عمرهم يحلمو بهاد نهار .. عرفتي ملي دخلتي كلشي يسحابو هي .. وتا انتي مادخلتي غير وجهك لوجههم هههههه طيحتي منهم نص
– اويلي أنا دابا لي طيحتي مني نص وربع .. واش هادشي بصح ولاغير كاطنز عليا
– بصح
– اجي واش انت كاتعرفها؟؟؟
– كنا كانقراو فنفس الجامعة
– هي باش ماتت ؟؟؟
– غير قلتي باش ماتت وحنا نوصلو للروضة بسم الله الرحمان الرحيم أنا مسلم وطالب تسليم
– ههههه أجي واش كاتخاف من روضة
– لا .. لا .. أنااااا لاااا
– ومالك كاترجف ؟؟؟؟؟؟
ماكملت هضرتي حتى هرب سيد ههههه
– أنا : وااااا شكراااا على العرس
كنظن گاع ماسمعني حيت بعد ..نيت تا أنا ضرت دخلت لدار … بزز باش طلعت فدروج حيت معدتي كانت متقلة عليا
– زكرياء : ماعرفت علاش كانحس براسي وصلت اشراق لقبرها بسم الله الرحمان الرحيم بسم الله الرحمان الرحيم بسم الله الرحمان الرحيم

الجزء الخامس
دازو ليامات بديت كانولف لافاك ..كنت كانقرا غير صباحات وكنخدم فالعشية وهاكا ولا عندي روتين محترم كانمشي عليه فحياتي .. تقيدت حتى فواحد المكتبة كانمشي ليها كل سبت فصباح كانقرا فيها فابور …نيت أنا دابا فيها كنت بديت كنقرا واحد الكتاب ديال مدخل للقانون الوضعي حتى سمعت شي حد عيط اشراق وانا ندور بحالا تعيط عليا .. وهي فالحقيقة كانت بنت كاتعيط لصاحبتها .. الغريب هو أنني مع دورة كانلقى واحد الراجل كايشوف فيا وجات عيني فعينو .. ناري حسيت بالإحراج وبحنيكاتي حمارو .. دورت راسي فالبلاصة وانا كانقرص رجلي باش ما نعاودش ندور على شي سمية ماشي ديالي .. وصلات 12 ..خرجت من المكتبة ومشيت لواحد سناك تغديت ببوكاديوس ديال 5 دراهم .. ومشيت لسيبير لقيت زكريا تا هو يالاه جا صابح خامر كن يحصلنا باه بلي حالين حتال دابا ينفينا لبوركينافاسو ههه
– هو : سلام ألفقـيرة المحظوظة
– وعليكم السلام أسي زكريا
– اسبحان الله شمن سي زكريا
– قلت نعيط ليك بسميتك باش تبقى تا انا تعيط ليا بسميتي ..أأأو ملي جيت لهنا نسيت سميتي بسبابك .. وليت ندور على سميات ناس لوخرين
– كيفاش ؟؟؟
– نسا
– ماعرفت علاش حاس بلي كاين شي موضوع شيق من ورا هاد نسا ههههه (كانهضرو وحنا محنيين على لpc )
– هو : أش خبار لافاك؟؟
– لباس كاتسلم عليك
– تف تف الله ينجيني منها دوزت فيها 6 سنين عجاف
– هههه انت 6 سنين خديتي فيها الإجازة .. علم الله كن بغيتي تاخد دكتورة شحال غاتجلس
– هادي ميس المتفائلة ولا اشراق المستفزة لي كاتهضر ؟؟؟ ماتبقايش تخلعيني انا معاك بالله وبالشرع
– وراه انت دابا لي كاتخلعني أزمر
– زمر ؟؟؟ عمرك قلتي زمر ؟؟؟
– وراه غير كنولف شي حد كنضسر عليه أزمر .. خلينا من هادشي عرفتي كايقرينا واحد الأستاد تقول خارج غير من تلفازة گاع البنات مزعوطين فيه .. عرفتي عندو واحد الكاريزما واحد صوت واحد طلة وواحد البرفان كايدير يا زكريا طيح زرزور من فوق سور .. عرفتي الحصة كاتكون بلان …ومايمكنش تسالي عندو الحصة بلا مايتجمعو عليه البنات فالبيرو فلخر
– شنو سميتو ؟
– كايعيطو ليه بروف تنوري
– مكانش فعاهدنا .. جديد واقلة
– أول عام عندو فلافاك
– هدا نوع هو لي غايهجرو ليكم فالنقط .. أجي ياكما تا انتي مزعوطة فيه
– غير شفتو قلبي دار زداف زداف ههه غير كانضحك معاك أنا حلمي نتزوج راجل بحال مانويل فوينتيس غيرا
– شكون هدا تاني ؟
– البطل ديال المسلسل المكسيكي الحب الحقيقي ههه
– ههههههههه
– انا أصلا خطيني من الحب وهاد تخربيق أنا بغيت نديها فقرايتي باش نولي محامية ونساعد الفقراء بحالك ههه
– بحالك انتي أما أنا بزاف عليك ..(دار عندي) أجي عندي 2 تذاكر ديال المسرح ضبرت عليهم تمشي معايا
– ماشي هو لي كايطفيوا فيه ضو ؟
– لا هاديك سينما
– ايوا هاد المرة ديني المسرح غدا تديني لسينما واش يسحابك يالاه حاطني الكار واش باغي تفلا عليا أزكريا واش بغيتي تجرني لطريق الانحراف ونتلهى على هدفي النبيل أنني نولي محامية وندافع على الفقراء بحالك
– صافي صافي ندمتيني يالفقيرة القروية قلت غدا الأحد ماعندك مايدار نديك تعرفي على المدينة ولكن انتي أوجه الفقر ماتصلاح ليك غا الروضة
– الروضة هي لي غاتجمعك ملي تولي جثة تعيا مادور أخرتك غا قبر .. على أي شكرا على العرض ديالك المرفوض رفضا قاطعا وباثا
كملناها ضحك وسالينا الخدمة وكل واحد مشا لدارو .. أنا مع دخلة تلاقيت مع خالتي سعيدة وسي عيسى عند الباب
– خالتي سعيدة: بنتي مسيسي لباس عليك؟
واش عمر شي حد تخلع من كلمة لباس عليك .. والله تا انا تخلعت منها حيت خالتي سعيدة لي كاتقولها
– هي : سمعي أبنتي مسيسي أ أأ ميس .. انتي عارفة بلي ليوم السبت .. والسبت كايكونو العراسات وانا وعمك سي عيسى معروضين لواحد العرس .. ومن العائلة المقربة مجاتش مانمشيوش
– أنا: (بحماس) هههه غاديوني معكم (فرحت )
– هي: لا لا ماشي هكاك .. دابا ملي يمشي سي عيسى العرس مكاينش لي يحضي الروضة .. وراكي عارفاه مايدوزش ليا ربع ساعة فلعرس وهو مخلي روضة بوحدها .. لداكشي قلت ليه بنتنا مسيسي والله اما تردها فوجهنا
– أنا: كيفاش شنو المطلوب مني ؟
– هي: غاتحضي لينا الروضة غير على مانرجعو من العرس …وماتقوليش بلي حنا استغلاليين نقصو ليك 400 من الكرا وعشاك هاد ليلة نجيبوه ليك من العرس
– أنا: ومعاش غاتمشيوا ومعاش غاترجعو ؟\
– هي: مع 9 ديال ليل وقبل مايودن الفجر تلاقاينا رجعناااااا
– أنا: ياك غير غانحضي الموتى صافي؟؟؟ .. واخا صافي مشات .. مكاينش لي يتململ مكاينش لي يتزعزع هه
الجزء السادس : ليلة في المقبرة
وصلات 9 ديال ليل مشا سي عيسى ومراتو للعرس وانا بقيت فروضة من بعد ماتسدات الباب حيت زيارات الأحياء سالاو ..جلست فجهة ضو حدا القبورة ديال دراري صغار حيت بصراحة واخا حاسة بالخوف هادي هي جهة الوحيدة لي كنحس فيها براحة حيت عارفة بلي هما ماعندهم حتى ذنب وكلهم غادين للجنة ان شاء الله .. تفكرت جدة ملي كانت كاتعاود لينا على العيالات ديال زمان كانو فين ما كايخرجو من ديورهم يا إما حيت دابزو مع رجالهم ولا جراوعليهم بليل ..كانو كايمشيوا يباتو فالروضة على مايطلع صباح حيت فيها الأمان .. بصح ماعمرو كان فراسي بلي المقبرات عندهم عساس .. واش كايتخباو فشي بلاصة ولا غير حيت هاد المقبرة جات ماخارجاش على المدينة وباقا جديدة لداكشي عندها حارس …ماعلينا خصني نقول لزكريا يزيد ليا هاد الخدمة ف سيڨي هه وانا مزال كانفرس ملي كانتخيل ردة فعلو .. حتى سمعت شي حد نقز من سور لوراني نااااري قفزت هزيت العصا و الكابوس ديال ضو (المسدس الصاعق الكهربائي Taser) لي خلا ليا سي عيسى ومشيت كانتسلت بشوية وانا رجلي بزز باش كايتحركو بالخلعة لي شداني .. بديت كنطل من ورا واحد الشجرة بان ليا راجل فالتلاتينيات من عمرو كان كايقلب بين القبور فواحد لحظة نزل الأرض حدا واحد القبرديال واحد المرأة يالاه تدفنات وسبحان الله الخلعة لي كانت فيا رجعات شجاعة .. ماحس براسو تا خبطتو بزرواطة على ظهرو
– أنا : (بصوت مليء بالحزم) اش كادير هنا المسخوط ؟؟؟
– هو : توحشتهاااا (كايبكي ويتمخصص)
– أنا: (بالتعجب) شكون هيا ؟؟؟
– مراااتي
– (شفت فالقبر وشفت فيه) وهاد مراتك تزادت ف1940؟؟
عرفني عقت بيه وهو يغفلني هجم عليا … بغيت نضربو بالكابوس ديال ضو وهنا أنا لي شواني ضو ملي عرفتو كاع ماخدام ..سي عيسى كان غير كايخلع بيه الشوافات … والمشكل الكبير هو ملي عرفو حتى هو.. رجعنا كي سبع مع الغزالة .. شدني قجني من عنقي ..ناري مشيت فيها وبالخصوص ملي ابتسم ابتسامة الانتصار قلت هادي هي لخرة ليا .. ولكن القدر الحمد لله كان مزال ماقالش كلمتو الأخيرة .. جا واحد الراجل كي درهم دالحلال يكون فأواخر الربعينات أوائل الخمسينات ماعلينا كان لابس الكحل ومگلضم .. دخل فداك المختل بواحد البونية طيحو بيها للأرض وهو يتبعو بدا يعطيه فضرابي حتى دخلو فكومة .. عاد ناض عندي ..كنت مرتاحة ملي كان كايعطيه ولكن ملي ناض عندي شداتني قفقافة خفت غالاتكون هادي نوبتي .. ولكن صوتو رزين هدني
– هو: واش لباس عليك ؟
– شـ شـ شـ شـكون انت ؟؟؟؟؟
– صاطفني سيد لي مكلف بالمقبرة نحضي معاك
– (عاد حسيت بالراحة ) سي عيسى كنت عارفاه مايخلينيش بوحدي .. كنت عارفاه غايحسبني بحال بنتو .. الله يكتر من مثالك ومن مثالوا
عطاني نشرب وجاب ليا الكرسي نجلس باش نسترجع أنفاسي
– هو: مكانش عليه يخلي بنت بوحدها تحضي مقبرة
– ولكن راه صيفطك ليا انت ؟؟؟
– على أي .. ماتبقايش تخليه يستاغلك
– ماستاغلنيش راه قاليا غاينقص ليا من فلوس الكرا .. وها انت تا انت حاضي معايا
– (قالها بالحس) مكلخة
وحنا كانهضرو سمعنا لغوات من قنت أخور .. ولايني ليلة هادي .. لول كان مريض نفسي .. تاني كان شمكار مبوق غاكايهترت .. أنا مع الخلعة لولى شداتني السخفة ماقديتش نتململ .. السيد لي كان معايا الله يجازيه بالخير هو لي مشا تكلف بيه .. وانا جالسة كنتسناه يرجع بديت كندور فعنقي حيت مع كان قاجني داك المختل حسيت بيه تكوفر .. وانا مزال كاندير لعنقي المساج حتى بانت ليا واحد مولات جلابة كاتنبش فواحد القبر .. واينا قبر كان ديال اشراق .. حيت ماتت مزالا بنت كايتعتابر قبرها همزة للشوافات … مشيت عندها هازة زعمة الكابوس ديال ضو وكانعيط لسي عبد الجبار أنا أش عرفني سميتو راه غير بغيت نخلع به زمر .. وهي نيت تخلعات جمعات دغيا الوقفة ولكن قبل ماتهرب قالت واحد الجملة عليا وعلى اشراق خلاتني مبلوكية .. حتى حسيت بشي حد حط يدو على كتفي من لور قفزت كنت غانسخف.. الحمدلله كان غير سي عيسى رجع من العرس كن زاد تعطل شوية كن لقاني ودعت .. أنا يسحابني غانحضي غير الموتى ساعة طحت فأخطر المجرمين من الأحياء .. من بعد مارجعت النفس عاودت ليه على أشطرا
– سي عيسى: ولاد الحرام عرفوني مكاينش هاد ليلة عليها بغاو يديرو سيبة
– أنا: واااجاب الله خليتي داك راجل يحضي معايا أما كن راني دابا في عداد الأموات
– سي عيسى: (بتعجب) اينا راجل ؟؟ أنا ماخليت حتى راجل معاك
هنا طلعات معايا تبوريشة .. بديت كاندور نقلب عليه مالقيت حتى واحد .. لا شمكار لا المغتصب الحگار ولا سي عبد الجبار
الجزء السابع
جا الأحد لي كنت ناوية نستمتع بيه دوزتو كلو فراش .. شداتني تبوريشة والقفقافة والسخانة كلما كانقول نهز راس كانعاود نحطو .. شحال صعيب تمرض وماعندك لي يقابلك .. عائلتك كلها بعيدة عليك وانت فمدينة ماكاتعرف فيها حد والله الى حسيت براسي فالغربة وخا راني غير فالمغرب .. واقلة الغربة مكاتعلقش بالبلاصة لي انت فيها ولكن شكون لي معاك واش ناس عزاز ولا ناس غراب .
جا الاثنين الحمدلله قدرت نوقف على رجليا .. جاب الله ماعندي لافاك تالعشية .. اما صباح قلت نمشي الخدمة اللهم هي ولا هاد 4 ديال الحيوطة لي دايرين بيا .. كل ماطلعات ليا سخانة كانحس بيهم ضياقو عليا .. مهم مشي لقيت سيبير مسدود عرفت زكريا يكون مزال خامر ونيت ماجا حتى وصلات 12
– هو: صباح الخير ألفقيرة المريضة .. ناري كي رجعتي تقول جبدوك من قبر
– انا: قبر ..قبورة ..مقبرة .. أي حاجة فهاد سياق الله يعطيك الستر ماتبقاش دكرها ليا .. شوف عنقي كي ولا بلاطراس ديال القجان
– ناري أش هادشي ؟؟؟؟؟
– كنت غانموت أخويا زكريا ربي جا من جهتي وخلاص وكن ماسي عبد الجبار تاهو كن راني دابا معنقة التراب
– أش طرا؟؟؟؟؟؟ وشكون هاد سي عبد الجبار؟؟؟؟؟
– ماعرفتو انس ماعرفتو جان
بديت كانعاود ليه بالتفصيل الممل .. وهو مسكين غير مصدوم مع كايخاف من الروضة حس بالصهد طلع معاه
– واش تسطيتي باغا تحظي مقبرة فنصاصات دليل واش عندك شي عقل ولا ماتكسابيهش
– وانا قلت نحضي غير الموتى مافراسيش غايخرجو ليا الحيين من جنب
– الفقيرة الغبية .. تعاوديها انا لي غانجي نشق على جدك هاد المرة
– كاتخاف عليا زعمة ههه ؟؟؟
– احم .. ماقلتيش ليا شنو قالت ليك هاديك شوافة فلخر
– قالت ليا لصقي فزكريا راه طالعة ليه طاليان فلفال هه
– حـ حـ حلفي بالله (سيد تحمس)
– نحلف على الكدوب حرام .. راه غير كانضحك معاك قالت ليا ردي بالك راه ضايرين بيك غير الأوغاد .. ماعرفت علاش حسيت بيها كاتقصدك انت كزعيم الأوغاد (طبعا ماشي هادشي لي قالت ليا)
– كدوب انا رجل نزيه ونبيل ونجيب وحميد
– هههه (بجدية) قوليا أزكريا باش ماتت اشراق ؟
– علاش هاد سؤال ؟؟؟
– جاوبني
– قالو ماتت بسكتة قلبية نهار عرسها
– وانت شنو كاتقول ؟
– انا ماعارف غير داكشي لي عارفين الناس
– وشكون هو هاد راجل لي كانت غاتزوج بيه ؟
– انا
– اشنو ؟؟؟
– ههههه رجعي لون لوجهك راه غير كانضحك معاك .. ماعرفتش شكون هو قالو بلي راجل لباس عليه ويقدر يدير أي حاجة .. مثلا واحد المرة صيفط لبوليس لدار اسماعيل.. لولد لي حضرتي لعرسو داك نهار.. كان كايبغيها وتابعها فين مامشات .. واحد المرة وحدة واخرى عطاوه قتلة ديال العصا كان غايموت فيها تاب على يديها ومابقاش كايدور بساحتها .. اشراق اصلا مكانتش غاترضى تزوج بواحد مافحالوش .. كانت بنت طموحة وعزيز عليها المظاهر غاتكوني لاحظتيها من الحوايج لي خلات .. ملي تعرفات على هاد راجل قلبات على كلشي حتى من صاحبتها مابقاتش كاتهضر معاها … وتخيلي تاحد مكان عارف بلي نهار لي ماتت فيه كان عرسها .. مها هي لي من الحرقة والغصة لي كانت شداها بقات كاتقولها فغواتها : رزاوني فبنتي نهار عرسها
– حتى هي مكانتش متيقة بلي بنتها ماتت موت طبيعي ياك ؟
– طبعا
– اممممم وبنظرك انت يقدر تكون ماتت بصح بسكتة قلبية
– عندي 3 ديال الاحتمالات الى مشاو تاطراو تقدر تموت بيهم اشراق بسكتة قلبية نهار عرسها
 الاحتمال الأول: اشراق بنت طموحة.. الى مشا حتى قاليها داك راجل الغني بلي غانحقق ليك كاع أحلامك ..وحيت حلمها تولي محامية بحالك غير يقول ليها نخلص ليك فلوس الأهلية ونحل ليك مكتب المحاماة بابو على باب المحكمة الابتدائية .. قسما عظما حتى تموت اشراق بالفرحة
 الاحتمال التاني : تسيق لخبار بلي راجلها تاجر فالأعضاء ولا رجل مافيا .. وباغي ينصب عليها .. مع هي دغيا كايطيح ليها طونسيو تموت بالفقصة فالبلاصة
 الاحتمال الثالت : نهار عرسها يقوليها داك راجل الغني بلي مابقاش باغيها وبلي كتاشف بلي مزال كايبغي بنت خالتو سميرة .. ومع اشراق ماكاترضاش غاتموت كارمة
– هههه واش كاطنز عليا أزكريا .. والى قلنا ماتت مقتولة أشنوهما احتمالاتك
– نفس الاحتمالات من زاوية الاخرى
الاحتمال الأول: الرجل الغني يقول الإشراق انا بغيت المرأة تجلس فدار ماعنديش مع الخروج ودروج وهي تقوليه ياك واعدتيني نولي محامية .. غايعطيها بواحد تصرفيقة غايطيحها غايجي راسها فوق جنب دسداري لا الفوطوي الأغنياء عندهم الفوطوي
الاحتمال الثاني : غايسحاب الإشراق غادخل للقفص الدهبي ساعة أعضائها لي دخلو السوق السوداء
الاحتمال الثالث : بنت خالتو سميرة هنا هي لي كاتبغيه غاتجي تبغي تقتلو غاتلاح اشراق قدامو .. لا لا اشراق انانية ماديرهاش ..نعاودوها.. بنت خالتو سميرة غاتقتل اشراق نيشان حيت دات ليها فارس احلامها … وهو عااااارف بنت خالتو سميرة هي لي قتلات اشراق ولكن قال اللهم تمشي وحدة ولا يمشيوا جوج
– وناااااري على احتمالات كن تسمعهم اشراق تعاود تموت عشرة دلمرات .. اجي كاين احتمال رابع ؟؟؟
– أوااااه عييت نفكر ماطاحش عليا
– تكون انت لي قتلتيها ؟؟؟؟؟ ديما هداك لي ماكاتشكش فيه هو لي كايطلع المجرم فلخر
– والله ما انا .. انا راه رجل نبيل ونزيه و نجـ
– صافي صافي راه غاضاحكة معاك ههه
– وعلاش ماتكونيش انتي لي قتلتيها ؟
– يهديك الله ازكريا انا عمري حتى شفتها كي دايرة
– اواااه كانت داخلة عندي فالفايسبوك .. اجي نوريها ليك

الجزء الثامن
بقا كايوريني زكريا فتصاور اشراق لي فلفايس .. ماعرفت علاش جاني وجهها مألوف .. يمكن بكترة ماكانشوف سميتها وكانلبس حوايجها جاني بحالا كانعرفها
– أنا : كانت زوينة الله يرحمها فننة .. شكون هاديك لي معاها ؟؟؟
– زكريا : مها
– أنا : (مصدومة): اويلي على مها .. راه ماشي هادي لي كانت كاتبكي على القبر وعطاتني الحوايج
– أواااه تكون هاديك لي تلاقيتها زعمة خالتها ؟؟
– انا قالت ليا بلي أنا مها
– القضية بدات تزعلك .. كاين جوج احتمالات أميس لا ثالت لهما .. يا اما تشيرتي ويبداو يبانو ليك فوسط نهار بسم الله الرحمان الرحيم … ولا يكون عندك داك المرض النفسي لي سميتو الفصام وكايبانو ليك الهلوسات
– (بغضب) زعمة أنا يا حمقة يا حمقة والله يخلف عليك أسي زكريا … (جمعت الوقفة) انا نمشي دابا لداك دار نشوف شكون هاديك المرأة
– تسناي نمشي معاك لا تشوفي تاني شي حد مكاينش (خنزرت فيه) غير كانضحك معاك نونسك فطريق ونحامي عليك الى كانت شي مناتفة
– يالاه زيد قدامي
مشينا كانتابعو كي البط فالغيس .. وصلنا لدار بدينا كاندقو فالباب واااالو تاحد ماخرج عندنا من غير واحد جارة .. هنا كانت صدمة ملي قالت لينا بلي ام اشراق ماتت هادي عام بالسرطان .. سولناها ماساكناش ختها ولا شي حد فعائلتها فهاد دار .. قالت لينا بلي عمر شي حد جا لهنا .. وبلي اصلا دار خاوية كانت معروضة للبيع ولكن تاحد مابغا يشريها .. قالت لينا بلي عندها ساروت الى بغينا نشوفو دار حيت مول دار الأصلي خلاهم ليها الى بغا يجي شي شراي ولا كراي يشوفها .. قلنا ليها واخا نشوفها .. دخلنا لقينا دار خاوية كاتصفر حاجة وحدة لي فيها هي الغبرة .. على عكس اخر مرة دخلت ليها مكاملاش حتى شهر كانت عامرة ومجهزة ودافية .. ماشي بحال دابا باردة بحال الصقيع .. مانقدرش نوصف ليكم أحساسي فهاد اللحظة حيت صدمة بلوكاتني
– زكريا (بزز باش كانبلع ريقي) واش انا دابا لابسة الحوايج ؟؟ هاد تيليفون واش كاتشوفو ؟؟ (بقوة صدمة وليت كانشك فأي حاجة عندها علاقة بهاد لبلاصة وليت كانشك حتى فراسي )
– اه كانشوفهم غير تهدني
– (بالدموع) واش وليت حمقة ؟؟؟؟؟؟
– لا هادشي ضروري مايكون عندو شي تفسير .. انا متيقك أميس غير حاولي تبقاي واقفة على رجليك .. يالاه نخرجو من هاد دار تا انا جابت ليا ضيقة .. رتاحي ومن بعد نفكرو بشوية علينا
الجزء التاسع
خرجنا أنا وزكريا من داك دار وجلسنا فواحد جردة قريبة حيت كنت مصدومة ماقادة لا نهضر لا نتمشى
– زكريا: ناري هادشي لي كايطرا ليك بحال شي فيلم ديال الأشباح ههههه صافي أميس ماتقلقيش أصلا باينة على هاد جارة كدابة وحتى الى مكانش كاتكدب أنا متيقك .. باينة شي تنوعيرة كادور .. مهم حنا غي ناس دراوش ماشي سوقنا .. نساو هاد القصة ديال اشراق .. ونعيشو حياتنا عادي
– (باحباط) انا بان ليا نرجع لدارنا ودوارنا نتكمش ماااااخاصني صداع
– ههههه يالاه جيتي هادي شهرين ونص وباغا تستلمي .. هادي هي تولي محامية وتساعدي الفقراء بحالي .. خصك تولفي على القضايا والأكشن من دابا هه
– اشمن محامية يهديك الله فين هما فلوس الأهلية
– صافي دغيا استسلمتي هه
– شكون لي قالك استسلمت انا راه غانرجع قاضية وندخل جدكم كاملين للحبس
– وعلى مال جدي أنا ؟؟؟ كان راجل مزيان غير هو المرحوم خسر فلوسو على الشيخات وماخلا لينا تا باش نقيوا سنانا .. قالو ليا طلعت نشبه ليه .. جدة فينما تشوفني دفل ليا على وجهي .. انا شنو دنبي؟؟؟ كن أختي ميس نعاود ليك قصتي تبكي حتى تمخصصي .. أنا كنت..
– صافي عافاك لي فيا يكفيني .. يالاه نخليك نمشي للافاك عندي حصة هاد العشية
– يالاه نمشيوا تا انا عندي شي غرض تما
– كيفاش غرض؟
– داير نتلاقاو أنا وسومية عند العتبة )يالاه بغيت نعتارض وهو يزرب عليا ) زيدي زيدي لا تسخفي فالطريق
مشينا تغدينا بعدا وركبنا فطوبيس مشينا لافاك سمحت فيه عند الباب .. كانت عندنا حصة عند الأستاد تيتيز دخلت جلست حدا صحاباتي رباب وجيهان لقيتهم جابدين الفايسبوك ديالو كايتمنظرو فتصاور .. انا طبعا على تصاور لي شفت فصباح حلفت لا زدت شفت شي حاجة .. ولكن مافيها باس تصويرة ولا جوج غير نخضر عويناتي على قولة البنات هما لي حلفو عليا أما كاع ماكنت باغا نشوف .. باينة عليه انسان ناجح فحياتو مقارنة مع الواقع .. تا انا ماخصنيش نستسلم وخصني نقاوم باش نولي ناجحة فحياتي .. شحال داز عليا ملي كنت صغيرة ولكن باقة واقفة على رجلي الحمدلله .. وحتى دابا غانزيد نوقف على رجلي طريق مزالا طويلة وانا يالاه بادية …ماعلينا دازت الحصة فساعة ونص بزربة فوجنا فيها صراحة حيت أستادنا دمو خفيف هه .. اما صاحب الدم التقيل سي زكريا ملي خرجت لقيتو مزااااال حدا الباب شاد جموعات مع البنوتات بحال والو يكون كايعاود ليهم النكات .. سي نورمال طلع يشبه جدو .. أحححح و يسيق ليه باه الخبار بلي ساد سيبير وعاصر ليه قدام لافاك يتبعو لجدو مافيهاش .. مهم شافني وجا عندي
– زكريا: هاي هاي داخلة مغوبشة وخارجة ضاحكة .. تقول دگو ليكم السيروتونين (هرمون السعادة)
فهاد اللحظة داز الأستاد تيتيز فطنوبيل دغيا سكاناه زكريا
– زكريا : فايت ليا شفتو ؟ والله الى فايت ليا شفتو؟
– أنا: (باهتمام شدييييد) فييين ؟؟
– زكريا: جري جري طوبيس دايز .. سوووووميااااا بسلامة تهلاي
مشينا كانجريوا لطوبيس وزكريا كايحاول يتفكر فين شاف الاستاد
– زكريا: فين شفتوووو فين شفتوووو .. اه عرفت
– أنا: فين ؟؟؟
– زكريا: ماشي هو لي متل فالدور ديال الكاهن سيباستيان لي قتلاتو ألطاگراسيا ديل تورو فمسلسل المرأة المجرمة
– (جاوباتو واحد البنت كانت تاهي فطوبيس) : ماشي هي راه مها قتلاتو
– زكريا: أوااااه أنا مزال كانتفرج فيه فقناة هي المرأة العربية مزال ماوصلوش للحقيقة … هي قولي ليا داك شوريفة هي لي قتلاتو خخخخخ وشكون لي قتل وينابينتورا ؟؟؟
انا مصدومة وهو شاد ليا جماعة مع داك البنت وزادو تا جوج عيالات دخلو فالحوار كايناقشو المسلسل .. بقيت واقفة كي شي تمثال ماعرفت باش تبليت .. كايبان ليا انا لي نولي المرأة المجرمة ونقتلو ونتهنى

الجزء العاشر
لرجعت لدار بعد نهار طويل وانا كأنني جثة تتمشى.. مقادرة نفكر فحتى حاجة ولا ندير أي حاجة بغيت غير هاد نهار يسالي .. ولكن ملي شفت تيليفوني بدا كايصوني تأكدت بلي نهار يالاه بدا .. كان المتصل جدة .. وجدة مكاتتصل الا الى كانت شي حاجة طارئة ولا رسمية
– الو جدة لباس عليك ؟؟
– قطعي قطعي وعاودي صوني انتي
واليني وحلة هادي انا ماعندي حتى درهم فتيلفون وهي كاتقولي صوني عليا .. على وعدي وسعدي نضت مشيت لحانوت شريت تعبئة وانا نتلاقى مع صاحبة اشراق بقات كاتشوف فيا .. وانا درت راسي ماشفتهاش ودزت تاسمعتها عيطات ليا
– هي: تسناي
– شنو؟
– واش كاتجي اشراق شي حاجة ؟؟
– لا
– ومنين جاتك الكسوة لي كنتي حاضرة فيها فالعرس
– يخلق من الشبه اربعين فما بالك بلباس .. والى بغيتي صراحة أه كسوة اشراق صدقوها عليا من مور ما ماتت
– ههههه صدقوها عليك ههههه
– مالكي كاضحكي ؟
– والو غير جاتني غريبة حوايج اشراق ماكملات على موتها حتى 3 ايام خداوهم بنات عائلتها وانا كنت حاضرة ملي خداوهم كلهم وداك الكسوة بدات تخدات
– لعجب
– (هضرات ليا فودنيا بالحس) غايكونو باغين يلفتو بيك الإنتباه لشي حاجة وبدارجة باغين يصيدو بيك ردي بالك لا ياكلك القرش
مشات وخلاتني مكوفرة .. مافقت حتى سمعت تيلفون صونا وقطع .. جدة دايرة ليا طرنونو هاد ليلة .. غير وصلت لدار صونيت عليها
– ألو جدة ياك لباس ؟؟
– ياك أشويطينة انا كانعيط غير الى كان الباس … ماتلوحيش عليا انتي شي جوج دراهم فتيليبوتيك تقولي جدة البلارة ياكما ناقصاها شي حاجة .. أودي الى ماسمحتش ليك انتي ومك مايسخنش ليكم لما .. ماعلينا قلبي بيض ودغيا كايسامح .. لبارح أبنتي مايس تعشيت بالحريرة كانت صاوباتها الفرفارة ديال مرت عمك جات حالتها غي الما وزغاريت .. توضيت وصليت واحد جوج ركيعات بالگالسية ماقديت نوض تقلات عليا داك الحريرة .. ايوا نعست وحلمت بيك ابنتي مايس لابسة البيض وتابعينك زغاريت
– (عاد فهمت جدة علاش ناوية لداكشي قلت نختصر عليها طريق) أهاه وشكون هو العريس ؟
– ولد عمك عمر لي فبرا .. جيتو مواتيين واخا هو زوين عليك الحق يتقال ..و سبحان الله حلمتكم بليل .. وهو عيط ليا فصباح .. قاليا جدة الحبيبة راني دفعت ليك القرعة ديال الحج قلت ليه سير ياولدي الله يرضي عليك ويكوْن منك زرع وزريعة .. قاليا هي الى قلبتي ليا على شي زريعة فين يغبر حمصي .. قلت له موجوووووودة سعدية بنت بنتي غزاااالة ديها تبدا ترحمني عليها حياتك كاملة .. قاليا هو بغا شي وحدة قارية .. قلت ليه كاااينة ختها سعاد قارية حد شهادة .. والعالم كلو كايشهد ليا بالشقا ونقا .. قاليا لا بغيت شي وحدة فايتة الشهادة قتليه حتى هادي كاااااااينة سعيدة ختهم لوخرا
– جدة غايقطع ختاصري وكلت عليك أأأ حلفتك بالله
– قاليا من لخر بغيت ميس بنت عمي ادريس.. قلت ليه شغاتگجدر بيها فنيانة ومها سحارة
– (باعتراض) جدااااااااااااااااااااااااا
– تقبتي ليا ودنيا الله يتقب ليك السعد .. صافي ملي باغا تديه وملهوفة عليه ..راني قلت له عطيتها ليك غير عطيوني تيساع .. أه وراه عطيتو العنوان لي عطيتي لباك.. غدا يجي يديك وجدي راسك .. عندك الزهر من بنات دوار بغاك غير انتي امك فقيها صحيح الله يغرق ليها شقف اصلا أنا كنت بغيت نزوج ولدي دريس بنت ختي سعدوشية
– (قاطعتها) لا جدة انا مابا…
قطع تيليفون سالات ليا تعبئة .. ويلي على وحلة طحت فيها … غانحمااق .. واش مكاتجيني مصيبة تا كاتبعها كارثةالجزء الحادي عشر
جا نهار الثلاثاء والحمدلله داز عادي مافيهش الأكشن والرعب .. دوزت صباح فلافاك ولعشية فالخدمة خرجت منها مع 6 ومشيت لدار عيانة وليت كي اللفتة اللاوية .. طلعت لبيتي .. وانا نلقى واحد راجل واقف فسطح وكيطل دار عندي من بعد ماسمع شهقتي .. كان راجل فتلاتينات من عمرو طويل ولابس مزيان ومانكرش بلي زوين كانت مبتسم واحد الابتسامة عريضة وكأنه كايعرفني
– أنا : شكون انت؟؟؟
– هو: مايمكنش ماتكونيش عرفتيني أمايس انا ولد عمك عمر .. بلا شك هضرات معك جدة لبارح .. هي عطاتني العنوان ديالك
– عمر ؟؟؟
– اه
– ومالك زوين أأأأ مالك ماعلمتينيش قبل ماتجي ؟
– ماعنديش نمرتك وجدة علماتك البارح ياك ؟
– اه .. سمح ليا بغيت نستاضفك لداخل ولكن حرام
– ماشي مشكل تا هنا المنظر زوين .. المقبرة مع غروب الشمس كايخليك تمعن فالحياة
– هه بصح (بدينا كانطلو بجوج )
– غروب العمر الذي لا إشراق بعده
– اشراق ؟؟هه مافراسيش ولد عمي شاعر
– لا ماشي ديالي غافايت قريتها فشي بلاصة ههه ماكاتخافيش هنا ؟؟؟
– لا بالعكس كانحس بالأمان .. الى حسيت بالخوف وانا قريبة ليهم .. باش غانحس ملي غانكون بيناتهم ؟؟
– بصح كلنا غانكونو بيناتهم ملي يتقضى الأجل وكلنا غايجي نهار لي غاتغرب علينا فيه شمس اخر مرة
– الله يرحمهم والله يلحقنا بيهم مسلمين
– أمين يارب .. ولفتي المدينة ؟؟
– ماشي بزاف ديما كانحس بشي حاجة ناقصاني .. بحال شي لعبة فيديك ولكن ماشي ديالك
– اممم كاتحسي بيها مكانتاميش ليك .. وكاتخافي تولي تبغيها ويحيدوها ليك
– تماااما
– فهاد دنيا تا حاجة مامضمونة وتاحاجة مادايما .. الحياة قصيرة وهاد المنظر لي قدامك هو أكبر دليل .. تخيلي واحد من الموتى بغا يعطيك نصيحة بنظرك أش غايقول .. سمعي ليه .. والى بغيتي ديري بنصيحتو ديري
– هه واخا دابا نسولو ههه ولكن نسولك انت بعدا ؟ واش بصح داكشي لي قالت جدة ؟
– على الزواج ؟ اه بصح
– بيا انا ؟؟؟؟؟؟؟؟؟؟؟؟؟؟
– اه بيك انتي
– هههههه على قلة البنات
– لا ماشي على قلتهم ولكن على انعدامهم حيت عييت مانقلب على بحالك مالقيتش هه
– (حشمت حنيكاتي حمارو ) هههههههههه كطنز عليا انا أول مرة انشوفك وانت كاتقوليا مالقيتش بحالك
– ههههه ايوا الغلط ديالك الى أول مرة تشوفيني .. انا شفتك شحال من مرة … يمكن حيت عائلتنا كبيرة مكانباش ليك ولكن أنا ديما كانميزك .. نجوم سما كتار ولكن القمر واحد
– واش بصح انت من عائلتنا ؟؟؟ هه حيت اغلبنا طلعنا نشبهو لجدة .. خضرين مانعرفو نهضرو مانعرفو نغنيوا
– ههههه انا طلعت نشبه لعائلة الواليدة
– هههه لالة نفيسة هههه.. (بجدية) عمر انا نجيك للصراحة مكانفكرش فزواج .. بغيت نقرا ونخدم ونحقق أحلامي بيدي .. عارفة بلي تقدر تقوليا باستطاعتي ندير هادشي وانا مزوجة .. مانكدبش عليك انا ماشي قوية تال هاد درجة مانقدرش ندير كلشي فدقة.. و يولي همي هو كيفاش نوفق فالوقت ماشي نستمتع بالمرحلة لي انا فيها .. بصح كاينين نسا قادرات على كلشي ولكن انا لا
– غير كاتحگري راسك
– كاتبيعني العجل أعمر ولكن ماغاديش نشريه هه
– هههههههه كاترفضيني قدام هاد الناس كاملين موقف محرج ههه
– لااا هه ماشي انت لي كنرفضك ولكن فكرة زواج فهاد الوقت هي لي مرفوضة
– جملة ترد للكبرياء بريقه ههه مهم تعطل الوقت خصني نمشي نتلاقاو مرة واخرى ان شاء الله .. وقبل مانمشي غانعطيك هاد الهدية المتواضعة بصفتي ولد عمك
– ههه شكراااااااا اعمر
– بسلامة

الجزء الثاني عشر
دازو ايام الأسبوع و بقات للعطلة يومين وانا ماكرهتش بكل جوارحي نمشي لدارنا .. ولكن لا حالتي المادية ولا العملية ولا دراسية كاتسمح
– أنا: خصني نبدا نوجد للامتحانات وزيد عليها الخدمة و يالاه نتكافى مع فلوس الكرا الى زدت السفر غادي نتزير
– زكريا: ماشي مشكل الخدمة سيمانة مادات ماجابت أنا نتكلف ليك بالحاج (باه) نقوليه جداتها ماتت وباها شداتو لاكريز .. اما الكرا خرجي من عندهم هاد سيمانة وملي ترجعي قوليليهم عاودتاني بغيت نكري .. و الامتحانات رخاااااااااها الله راها كاينة استدراكية ولا يكلف الله نفسا الا وسعها لي مكتابة ليك راه مكتاااااابة
– الله يستر الله يستر كاع اقتراحاتك معوقة
– ايوا جلسي تغملي ليا هنا
– انا عارفاك علاش كاتحفر بغيتيني نسافر باش تانت تسد ودير ليهم كان هنا
– نجيك لصراحة سومية غادة مع المجموعة ديال دار شباب فرحلة وقالت ليا يالاه معانا .. وانتي دايرة ليا العصا فرويضة الى شافك الحاج جالسة خدامة يبقى غارسني حداك فين ما يدور يقول ليا شوف لالاك
– مسكيـــــــــــــن تقطع لقلب .. بغيتي تسافر وتفوج قبل ماتزوج ؟ بغيتي تا انت تولي اجتماعي ومصور فطوغرافي؟ بغيتي تعيش تحديات وتبت راسك قدام صحابك؟ راك كاتحلم نوض جمع الوقفة قبل مانقولها الحاج
– ميس المسيميمة جيتي فلول دريوشة لي يشوفك يقول هاد البنت ماكاتحركش دجاجة على بيضتها
– قالك الديب بغا يشفر البيض وسماها فدجاج .. والله واخا تقول لي قلتي ماتخليني ننحرف على أخلاقي ونغش فعملي
هنا دخل الحاج وباينة سمع الحوار
– الحاج: الله يرضي عليك أبنتي هاكا يكونو بنات الناس .. ماشي بحال هاد العتروس لي ولدت.. باه وشنو دار فيه علم الله البراني .. والله أويليدي ازكريا كن ما مك لي كاتحامي عليك كن جريت على طاسيلتك شحال هادي
– زكريا: الحا
– الحاج: قطع الحس .. سمعي أبنتي ميس الى بغيتي تمشي لداركم هاد العطلة غير سيري عتابريه كونجي .. تا حنا نيت غانمشيوا نشوفو الواليدة فالبلاد مسكينة
– زكريا: (باحتجاج) الا الحاج انا مغاديش
– الحاج: شكون قالك غاتمشي ..اصلا جداتك مكاتحملكش كاتشوفك كاتشدها لحكة .. غاتجلس هنا تخدم بليل وبنهار يالاه تعلم تولي راجل
مشا الحاج وانا بديت كانضحك على زكريا وهو مسكين حادر راسو انا يسحابني مقلق وهو رااااه كايصوني على سومية
– ألو سومية قيدي سميتي معكم فالرحلة نهار اثنين راه الحاج غايسافر
صگع ماقداتو فرحة واخا قلت ليه بلي كايلعب بنار يسيق الحاج الخبار مايعجبو حال قاليا بلي غايرجع قبل مايرجع هو قلت ليه انت تعرف هه …ايوا خرجت من الخدمة ومشيت لدار تلاقيت مع سي عيسى ومراتو واقفين عند الباب .. من بعد ماسلينا السلام وسؤال على الحال دخلنا فصلب الموضوع
– سي عيسى : ماغاتسافريش أبنتي ميس ؟
– أنا: لا
– خالتي سعيدة: حنا بعدا مسااافرين نهار اثنين
– أنا: (عينيا وساعو) وشكون غايحضي روضة ؟؟؟
– سي عيسى : هه ماتخافيش واحد صاحبي هو لي غايتكلف
– أنا : أه ايوا الحمدلله
– خالتي سعيدة:المهم انتي ردي البال غير لراسك
– أنا : واخا طريق السلامة
دخلت لبيتي جاني الإحباط .. أأأو كلشي غايسافر.. غانبقى بوحدي حتى من رباب وجيهان غايسافرو .. ايوا الله يرزقنا من حيت لا نحتسب

الجزء الثالث عشر
سالينا القرايا وجا نهار الأحد كلشي مشغول كايوجد للسفر .. وزكريا كايقليليا فسم كايقوليا ماتنسايش تشري ما زهر وتسقي القبورة كل صباح .. ماكرهتش نخرج ليه من تيليفون ولكن عندو زهر بدا تيليفون كايصوني
– المتصل: ألو ميس
– ألو شكون ؟؟؟
– أنا عمر ؟
– اااااه عمر لباس عليك
– الحمدلله وانت
– الحمدلله
– مهم عيطت ليك باش نقوليك بلي غادي نهار اثنين للبلاد وغادي نرجع الخميس ان شاء الله ..عارف بلي عندك عطلة .. لداكشي قلت نقولها ليك الى بغيتي تمشي
– امممم ماعرفتش
– لمهم فكري على خاطرك حتى تردي عليا فليل
– (زربة عليه) لالا صافي غانمشي
– ههه أوك ندوز عليك غدا ان شاء الله
غير قطع الخط وانا نبدا نقز من الفرحة .. صيفطت ميساج لزكريا نفقصو .. الله غانمشي ندووز 3 ايام فدارنا مع واليديا .. الحمدلله ياربي حيت ديما واقف معايا وعمرك خيبتيني
ماطلع صباح حتى كنت جامعة كاع كتوباتي وكاع حوايجي وموجدة راسي وواقفة عند الباب كانتسنى فعمر لي حتى هو كان عند وعدو وجا فالوقت .. بدا يدخل ليا الخاطري هاد ولد عمي ههه
– صباح الخير ميس
– صباح نور عمر
– مستعدة ؟؟؟؟؟؟
– على أتم استعداد ههه
– ههه من الفرحة لي على وجهك باينة توحشتي عائلتك
– بلا قياس أول مرة مانشوفهمش 3 شهر كاملة .. شكرا حيت بغيتي ديني معاك للبلاد
– كانآمن بواحد المبدأ ديال ان ربي ملي كايبغي ليك شي حاجة كايسخر ليك عبادو .. انا غير مسخر وكن ماكنتش كنتي غاتمشي بأي طريقة حيت ربي هو لي مكتبها ليك
– الحمدلله هه
بقينا كانهضرو فالمواضيع بصفة عامة وحنا شادين طريق .. خرجنا على المدينة وصلنا لواحد البلاصة كانت فيها منطقة تفتيش وقفونا البوليس وهنا كانت المفاجئة قالو لينا بلي خصنا نمشيوا معهم لمركز الشرطة .. طبعا حاولنا نعرفو علاش ؟؟رفضو يعطيونا السبب .. حاولنا نحتجوا وبلي هدا اعتقال تعسفي لكن لا من مجيب .. جبرونا اننا نطلعو لصطافيط وحنا مافاهمين حتى لعبة … المشكل الكبير ماشي هنا ولكن فأنهم ماداوناش للمركز الشرطة كيف قالو … داونا لواحد دار كبيرة وسط الخلا وحطونا .. دخلونا بز منا وحيدو لينا تليفونات.. قالو لينا عتابرو راسكم ضياف لمدة 24 ساعة .. ملي دخلنا كانت صدمة الكبيرة لقينا زكريا وسومية .. صاحبة اشراق وراجلها .. سي عيسى ومراتو .. وشخص أخر مكانعرفوش .. أما الشخص الغير المتوقع كان هو الأستاد تنوري… واخا الموقف محير ومرعب فنفس الوقت .. ولكن زكريا مزال عندو الجهد النكت غير هما هاد المرة مكايضحكوش
– زكريا: ههههههه والله الى انتي أميس لي كنتي ناقصة فرواية جديدة ديال أغاثا كريستي هههه
– أنا وعمر: شنو واقع ؟؟؟؟
– زكريا: ههههههه نتسناو المحقق كونان يجي يقولينا حيت تاحد ماعارف
– الأستاد: هدا كايعتابر اختطاف وكايعاقب عليه القانون
– صاحبة اشراق : عندنا قاسم واحد مشترك بيناتنا هو إشراق
– الأغلبية سولو : شكون اشراق ؟؟
– اشراق القباب
هاد الجواب كان من عند ضيفان الأخيران ..المرأة لي عطاتني حوايج اشراق ولي كان يسحابني بلي هي مها .. والشخص الأخر هو لي كان معايا فروضة ولي سميتو أنا عبد الجبار

الجزء الرابع عشر
حنا 11 بينا فدار وحدة كلنا عندنا تساؤلات وكلنا باغين نعرفو أش طرا وفنفس الوقت باغين نخرجو من هنا فأسرع وقت
– زكريا: ههه ناري حاس بحالا حنا فشي فيلم ديال رعب واحد فينا لي غايخرج حي .. أنا من هاد المنبر كنرشح ميس حيت عندها واحد الزهر كايهرس الحجر هه
– أنا: (بجدية) براكة أزكريا .. بغينا نعرفو شكون لي جابنا لهنا وعلاش حنا هنا ؟؟؟
– عبد الجبار: انا لي جبتكم
– الأستاد: واش عارف أسي بلي هادشي ماشي قانوني
– عبد الجبار: وداكشي لي درتو فبنتي إشراق قانوني؟؟؟؟؟
– منال(صاحبة اشرق) :على اشراق بنتك ؟؟؟
– عبد الجبار: اه
– منال: ولكن هي من ديما كانت كاتقول ليا بلي باها مات
– عبد الجبار: داك القصة ماشي مهمة لي مهم هو نعرف شنو لي طرا فليلة لي ماتت فيها
– الأستاد: أسيدي الى بنتك ماتت سير علم البوليس وهما يحققو ويديرو خدمتهم ماشي تختاطفنا هنا
– عبد الجبار: كلكم كدابين الى ماواجهتكمش مع بعضياتكم ماغاتعتارفوش … دابا عاودو ليا شنو طرا وتقدرو تمشيوا بحالكم وانا مستعد نعوضكم على هاد الوقت لي ضاع
فهاد اللحظة كلشي صقل .. واش من الخوف ولا من الفضول الله أعلم.. كلنا بدينا كانشوفو فبعضياتنا
– زكريا: هاد سؤال أسي عبد الجبار خصك تسولو لراجل إشـ
– عبد الجبار: (قاطعو) بلاتي باش عرفتي سميتي عبد الجبار؟؟؟؟؟؟؟؟
– زكريا: ميس لي قالتها ليا .. سول ميس ؟؟؟
– أنا: ولكن أنا ألمطيور قلت ليك راجل لي كان معايا فروضة سميتو عبد الجبار غير على الله .. ولكن انت باش عرفتي داك راجل هو هاد راجل ؟؟؟ (كلشي فهاد اللحظة بدا يشوف فزكريا)
– زكريا: لي قلتي ليا ماعرفتيه انس ماعرفتيه جان جاني لفضول ومشيت قلبت فواحد الكاميرة فطريق وانا نشوفو .. وتوقعت انه يكون هو حيت هو لي بان ليا براني على الحومة .. وبلا مادورو عليا السمطة حيت أنا معارف حتى لعبة
– عبد الجبار: وانت أميس باش عرفتي سميتي؟؟؟ .. من گاااااع سميات لي فدنيا جبتيها لاصقة سبحان الله
– أنا: تقدر تقول صدفة أو حدس .. غير تيق راه ماعندي باش نتبتها ليك .. وزايدون أنا لاش عطيتوني حوايج اشراق وانا ماعندي تاشي علاقة بموتها .. واش باغين ديروني فصنارة زعمة نجبد ليكم سمك القرش لي قتلها
– عبد الجبار: دابا شوفو بالعقل كل واحد يقولينا شنو كايعرف على إشراق ومن بعد تقدرو تمشيوا
– منال: كنت صاحبة اشراق ولكن ملي قربات تزوج قلبات عليا ومابقيناش كانتشاوفو
– اسماعيل: انا كنت كانبغيها ولكن ملي صافطات هديك العصابة لي كانت غاتقتلني مابقيتش كاندور بساحتها
– زكريا: كنا كانقراو فنفس الجامعة وصاف
– سومية: ماعندي بيها حتى شي علاقة شفتها شي مرة ولا جوج وغير من لبعيد بحكم أننا ساكنين فنفس المنطقة
– خالي سعيدة: كنت صاحبة مها وقليل فين كانشوفها
– سي عيسى: انا عساس على المقبرة فين كاين قبرها .. وقتي كلو كاندوزو مع الموتى لداكشي ملي كانت حية ماكنتش كانعرفها
– الأستاد: ماكانعرفهاش
– رجل الأخر: ماكانعرفهاش
– عمر: حتى أنا ماكانعرفهاش
– زكريا: هاااااا نمشيوا بحالنا يالاه سلام عليكم
– عبد الجبار: (غااضب) كلكم كاتكدبو
– الأستاد: ايوا كن جبتي لينا جهاز كشف الكدب ولا مصل الحقيقة ولا درتو لينا تنويم المغناطيس حسن .. أما تبدا تكدب فينا هاكا بلا حتى دليل راه غير كضيع لينا الوقت
– عبد الجبار: (بحرقة) بغيتي دليل ؟ نتوما كلكم دليل .. كلكم عارفين بلي كاملين كاتكدبو
– الأستاد: واش انت معارفش شنو طرا لبنتك عاد نعرفو حنا
– منال: (باستغباء) والى ماعرفتيش انت الدكتور ياسر شغانقولو حنا ؟؟
– أنا: شكون ياسر آآآه أستادنا .. على هو أشمن علاقة بإشراق ؟
– منال: كان كايقرا الدكتورة ملي حنا كنا كانقراو الإجازة كنا فنفس الجامعة.. كان ديما معاون اشراق فدروس فالبحوث فكلشي تقريبا
– زكريا: (عاد تفكر) آآآآه وانا كانقول فين شفتو داك نهار
– الأستاد: كنت كانعاونها ماشي معناها قتلتها .. شوفي انتي الغيرة ديالك فين وصلاتك ألالة منال
– منال: (باستهزاء) أنا نغير من اشراق ؟؟؟؟؟
– الأستاد: اه من ديما كنتي كاتموتي بالغيرة منها كاتغيري من جمالها من نقطها من حوايجها لي مشيتي فجنازتها بغيتي تاخديهم .. كنتي كاتغيري منها حتى على اسماعيل الشمكار لي كان ديما تابعها وهو لي فلخر قدرتي توصلي ليه
– منال: هه؟؟ وانت لي كنتي غاتموت ملي عرفتيها كاتعتابرك بحال خوها الكبير .. درجة وطلعاتك ..اصلا هي عمرها واعداتك بشي حاجة انت لي كانت نيتك ناقصة يسحابك حيت زوين غاطيح فيك طول وعرض وانت غير انتهازي استغلالي كاتنصب على البنات من بعد ما كاتبين ليهم بلي انت متقف ورائع وناااجح كاتخد منهم داكشي لي بغيتي وترميهم ولكن اشراق عبرات عليك .. تسرطات ليك الحرقة ديالها ولا مزال
فهاد اللحظة قرب مني زكريا وقاليا فودني (شاخدة .. الفلم بدا يزيان ههههه)

الجزء الخامس عشر :
– اسماعيل : وانت أسي زكريا عاجبك الحال ماتكونش انت لي قتلتيها ؟
– زكريا: هههه أنا الحمدلله ماكنت كانغير منها ماكنت كانغيير عليها
– اسماعيل : (باستهزاء) هههه قول هاد الهضرة لشي حد ماكايعرفكش .. كلنا عارفين بلي انت واشراق كنتو كي القط مع الفار
– زكريا: هههه امتى هادشي انا گاع مافراسي لهلا ينزل علينا شي باطل
– اسماعيل : نهار أسي زكريا حصلوك كاتنقل فالامتحان وضربو بيك رابور .. ووقفوك عامين واليديك يسحابهم راك كاتقرا وانت كاظل تعصر قدام لافاكات .. شكون لي فضحك ماشي اشراق.. باك جاتو داك الوقت أزمة قلبية دخلاتو لسبيطار .. من تما وانت حاقد على اشراق وكاتقلب غير كي تنتاقم منها
– زكريا: بالعكس سمحت ليها حيت أنا مكانحقدش بحالك لي كنتي ضال تابعها كاتبسل عليها وصافطات ليك البوليس لدار وواخا هكاك طلعات بنت ناس وتنازلات ليك على وجه مك ولكن انت شنو درتي تبعتيها للروضة فاش مشات تزور قبر باها .. كنتي غاتغتاصبها أولد الحرام فالمقبرة كن ماعويسة (سي عيسى) لي عتقها .. ولكن تاهي من وراها عبرات عليك ملي صيفطات ليك لي يربيك .. أجي ماقلتيش لينا شحال من غرزة خيطوك بيها ؟؟؟؟؟ ههههههه
– اسماعيل: (بغضب واندفاع) غادي نهرس ليك وجهك أ ***********
تلاح عليه فهاد اللحظة كن مافكيناهم كن قتلو بعضياتهم.. عمت لحظات من الصمت كل واحد كايشوف فلاخور بشك
– خالتي سعيدة: (كاتعاير) براهش كلكم براهش
– سومية: ههههههههههههه شوفو شكون لي كايهضر .. لي تقتل وتمشي فالجنازة
– خالتي سعيدة: على انا شنو درت ؟؟؟
– سومية: كنتي صاحبت مها
– خالتي سعيدة: وأش فيها الى كنت صاحبة مها وبحال مها
– سومية: نسيتو بلي ماما حتى هي صاحبتكم .. كنتي انت وخالتي حورية (ام اشراق) ماكاتولدوش وبجوج بيكم كنتو كاتقلبو على بنت تربيوها .. لقيتو اشراق ولكن انت ماخلاكش راجلك وخداتها هي .. واخا كنتي مبيينة بلي راكي راضية ولكن فداخل ديالك كان العكس .. كنتي كاتموتي من لداخل ملي كاتشوفي اشراق كاتقول لحورية ماما.. كنتي ديما كاتحاولي تخييبي علاقتهم .. الأم كنتي كاتقولي ليها زيري بنتك راه خارجة طريق .. والبنت كاتقولي ليها عيشي حياتك مك راه كانت كادووز لي مادوزو حد .. خليتي لبنت مسكينة تشك بلي راها بنت الحرام .. وفنفس الوقت باش تبقى عندك الورقة الرابحة ضبرتي نتي وراجلك على قبر خاوي وقلتو ليها هدا باك .. باش ملي تسيق الخبار تكره مها وتحماق
– زكريا: مرات عويسة قالك شيطان باغي يدير عندك السوايع بشحال تحسبي ليه؟؟؟ههه
دورات وجهها مارضاتش هنا كلشي سكت حيت لي هضر يغرق ولكن زكريا وتقووول واش يسكت
– زكريا: زيد مابقاش شكون لي باقي مادواش ؟ ولد عمك أميس وهاد الراجل الأنيق لي فالقنت .. هما لي تأهلو للنهائيات هههالجزء السادس عشر
– أنا: غروب العمر الذي لا إشراق بعده ..شنو كنتي كاتقصد بيه أعمر ؟
– عمر: كيفاش ؟
– أنا: هاد الجملة كنت قريتها فواحد الكتاب ديال اشراق كاتباها بخط يديها .. وللصدفة سمعتها منك داك نهار ملي وصفتي بيها غروب الشمس على المقبرة .. وعقلتي على الهدية لي خليتي ليا فآخر اللقاء كانت عبارة عن عطر وللصدفة كانت عندو نفس الريحة لي فحوايج اشراق
– عمر: اه بصح كنت كانعرف اشراق .. كان أول نهار تلاقيتيها فيه هو ملي عرفات القبر ديال باها كان كدبة ..ومها حتى هي كانت كدبة وكلشي كان فحياتها كدوب .. وبلي هي غير متبنية ..كانت منهارة لواحد درجة مكاتصورش .. حاولت نواسيها ولكن كان جرحها أكبر من أنه تعالجو الكلمات .. كانت بغات تقلب على والديها الحقيقيين وتعرف علاش تخلاوا عليها يمكن يكون عندهم شي عذر بحال انهم فقراء ومافحالهمش ولا يكونو ماشي بإرادتهم تخلاو عليها.. مزال عاقل قالت ليا الى بغيتي تعاوني هدا هو دوايا خاصني نلقاهم .. قلت ليها واخا ..وبدينا كانقلبو بجوج بحالا كانقلبو على ابرة وسط الخش .. الخيط لي كانقولو يوصلنا الحقيقة كانلقاوه معقود ومكايوصل حتى البلاصة .. رغم انها كانت مجروحة وجنحها مكسور الا أنها فنفس الوقت كانت قوية وعندها واحد الإرادة خلاتني نبغيها بلا مانحس …و أخيرا ومن بعد عامين لقينا واليديها ولكن ماشي كي توقعنا كانو لباس عليهم و بإرادتهم تخلاو عليها .. هنا الشوق واللهفة لي كانت كاتحس به اشراق تحول للكره والحقد ورغبة فالانتقام .. انا فهاد الوقت كانت جاتني فرصة عمل فالخارج.. من ديما كنت كانحلم بيها .. هنا عرضت على إشراق زواج .. وقلت ليها نمشيوا لبرا نبداو حياة جديدة .. ونأسسو العائلة لي ديما كانحلمو بيها ولكن هي رفضات حيت كان الإنتقام عامي ليها عينيها .. حاولت نقنعها بجميع الطرق ولكن هي كانت مصرة .. أخر مرة شفتها قلت ليها أنا عاونتك باش تلقاي واليديك ولكن أنا مانقدرش نعاونك أنك دمري حياتك بيديك .. رغبتها لأخر مرة تمشي معايا ولكن مابغاتش .. ومن تما ماعاودت شفتها .. حتى جيت صيف ديال هاد العام للمغرب كانقلب عليها .. وهاد المرة كنت ناوي نديها معايا وخا نعرف نخطفها .. حيت عمري نسيتها ولا غانساها .. ولكن الصدمة هي ملي عرفت بلي ماتت .. ماقدرتش نتقبل موتها وخصوصا أنه كان بسبب مجهول .. مشيت عند خالتي حورية لقيتها حتى هي ماتت .. وهنا مشيت عند عائلتها الحقيقية (سي عبد الجبار والمرأة لي كانت عطاتني الحوايج) لقيت بلي مافراسهم حتى حاجة واشراق ماعمرها جات عندهم.. تأسفو لحال بنتهم وبالخصوص ملي عرفوها شحاال وهي كانت كاتقلب عليهم ..وحتى هما بغاو يعرفو الحقيقة.. واحد نهار وأنا كانهضر مع جدة قالت ليا بلي واحد بنت عمي (ميس) بغات تجي للمدينة تقرا فالجامعة راه دايرة القانون وباغا تولي محامية وبلي راها دكية خص غير لي يوقف معاها.. هاد الصفات فكروني غير فاشراق .. مهم طلبات مني جدة نقلب ليها على شي بلاصة فين تسكن تكون رخيصة وقريبة للجامعة.. هنا جاتني الفكرة أنني نقلب ليها فشي بلاصة قريبة لسكن ديال إشراق القديم طبعا بلا علم بنت عمي .. الهدف ديالي كان هو أنني نخلي كلشي يتفكر اشراق ويبدا يعتارف .. ولبسنا بنت عمي نفس لباس اشراق نفس ريحة اشراق
– زكريا: صراحة صرعتوها بعد المرات كان يسحابني اشراق كاتسكنها هه
– أنا: (بحرقة) درتوني بحال المونيكة تبارك الله عليكم
– عمر: ماتخافيش كنا مكانرمشوش عينينا عليك … عمري حاولت نغامر بيك
– أنا: (بغضب ) عليها قلتي ليا باغي تزوج بيا .. كدبتي كدبة و تيقتيها يسحابك صافي حيت لبستيني حوايج اشراق غاترجعني كلي اشراق ..مريض نفسي ..(بالغوات) ممكن تخرجوني من هنا حيت مابقيتش قادرة نستحمل تخنفت بنفاق ديالكم
هنا الراجل المجهول لي كان معانا ولي كان غير كايسمع وساكت جا وسط مننا
– هو: واش بغيتو تعرفو شكون لي قتل اشراق ؟؟؟؟؟؟؟؟؟؟
– كلنا: شكون انت بعدا ؟؟؟؟؟؟
– هو: راجلها
– زكريا: اواااه انت هو المليونير ديال اشراق
– هو : اه بغيت اشراق من أول مرة شفتها وحتى هي قالت بلي بغاتني .. كنت عارف بلي حبها ماشي صادق مدام أنها مابغات تعرفني على تا واحد من معارفها وبغات عرسنا يكون سري .. وافقت واخا أنا كنت بغيت نعرفها على العالم كلو بلي هي مراتي .. ولكن قلت ماشي مشكل مور ماغانتزوجو غانخليها تبغيني بصح .. واش بغيتو تعرفو شكون لي قتلها نهار عرسنا؟؟؟ فالحقيقة نتوما.. كل واحد فيكم كان عندو دور فموتها :والديها تخلاو عليها .. أصدقائها قالو لأعدائها ماتعرفوش..وحتى الشخص لي كانت كاتبغي مشا وخلاها …الروح قتلتوها نتوما ولكن الجسد قتلاتو هي .. ماتت منتاحرة .. الى بغيتو دليل رجعو ليا تيليفوني
رجعو ليه تيليفونو وورانا الفيديو ديال كاميرا الفندق لي كانت فيه .. كانت اشراق فواحد الغرفة لابسة لاغوب ديال العرس فلول كانت كاتبكـي بهيستيرية وفالتالي شدات موس وقطعات بيه شرايين يديها ..الدم عمر كسوتها البيضة بدات كاتنزف حتى فقدات الوعي
– هو: للأسف ملي وصلنا لقينا فات الفوت .. وضطريت أنني ندير سبب الوفاة سكتة قلبية باش تبقى ديما صورتها نقية

الجزء السابع عشر
سلات حفلة الصراحة ..كلشي حس بتأنيب ضمير حتى من زكريا ثرثار شداتو اللقوة .. كانو متقبلين ان اشراق تموت بسكتة قلبية .. ولكن تموت منتاحرة كانت صدمة بحالا يالاه ماتت .. وبالخصوص أنها معروف عليها قوية ومكاتعرفش شنو هو الاستسلام أو الانسحاب .. أنها تنتاحر معناها بلي ماتت من داخل هو لول .. علم الله شحال عانات باش تاخد هاد القرار .. لقرار لي عمر شي حد يفكر أن اشراق فكرات فيه .. عييات ماتقاتل وفلخر قتلات راسها …دازو لحظات من الصمت كأنها أعوام .. الأشخاص لي من صباح وهما يدابزو ويتاهمو بعضياتهم رجعو بحال شي أجساد فارغة وكأن العاصفة الأخيرة هبت بأرواحهم ..
– أنا: انا غانمشي بحالي الى بقيت تابعاكم اخرتي غاتكون بحال اشراق
– عمر: تسناي نوصلك
– أنا: غاتوصلني لشي جايحة كتر من هادي
– زكريا: يالاه معانا
– أنا: غير سكت انت كتر منو
خرجت شديت طريق على الله نشوف شي أطوسطوب ترجعني منين جيت … ولكن والو ناشفة بقيت كانتمشي حتى رجليا عواجو .. ولكن لحسن الحظ أو لسوء ماعرفتش … وقفات عندي واحد طنوبيل كان راجل اشراق لي سايگها ..
– هو: طلعي نوصلك
– لا شكرا نفضل نموت كارمة على نمشي معاك
– على انا شنو درت ؟
– بصح هادوك الأوغاد هما سباب فكلشي (طلعت معاه) شوف دخلني غير للمدينة وحطني حدا شي بلاكة ديال طوبيس
– هه واش خايفة مني ؟
– الخوف من الله .. ولكن ملي جيت لهاد المدينة وأنا كانتلقى غير مع نصابة .. يسحابني لقيت عائلتي التانية ولكن هما غير كايستاغلوني .. تخيل سيهم عويسة العساس ديال الروضة هو كايمشي يقصر فالعراسات وانا كانحضي ليه فنصاصات ديال ليل باش ينقص ليا 20 درهم من الكرا .. أما سيهم زكريا دايرني كي المونيكة فسيبير كاندير ليه خدمتو وهو كايخرج يدور ليا مع صحيبتو سومية وكايتخلص من باه على ظهري .. كانقول ماشي مشكل اللهم هاكا ولا يجريوا عليا … والأستاد تيتيز القدوة ديالي وديال أجيال المستقبل طلع كداب و بو بنات .. أما ولد عمي لي من دمي ولحمي دايرني فصنارة ولايحني وسط البحر يانغرق يايضربني البرق .. بيني وبينك بسيف ماتنتاحر اشراق يمكن انا أكتر وحدة حاسة بيها .. وحتى انت تكون حاس بيها حيت كنتي كاتبغيها
– اه كنت كانبغيها بلا قياس ومزال كانبغيها
– آآآآآآآآآآآآاه تفكرت
– شنو تفكرتي ؟
– واحد ليلة كنت كانحضي روضة وجات واحد شوافة للمقبرة .. وملي جريت عليها قالت ليا بلي قدرك غا يكون بحال قدر اشراق… هههههههه عاد فهمتها شنو كانت كاتقصد السحارة لوخرا
– ماتخافيش مايكونش قدرك بحالها
– وأش عرفك .. ماعلينا خصني نرحل بأسرع وقت من داك دار وداك المنطقة كاملة وخصني نخرج حتى من داك الخدمة اللعينة .. خصني نبدا من زيرو ..ولا عرفتي شنو نرجع لدوارنا نتزوج بشي راجل ونتكمش ..ماعندي ماندير بهاد المرض كامل
– ههههه
– مالك كاضحك ؟؟؟؟؟؟؟؟؟؟
– حيت بصح كاتشبهي للإشراق
– ماعرفت واش نعايرك ولا نقولك شكرا هه يخ نسيت تليفوني ماخديتوش من عنداك العصابة .. الله ياسيدي ربي حتى داك شقفة رزاوني فيها
– تقدري تاخدي تليفوني تصوني بيه
– بصح شكرا .. ولكن راني محافظاش رقمي حيت يالاه جديد .. أنا نصوني على داك الكسول ديال زكريا .. اممم تاهو ماحافظاش رقمو .. عندك لانترنيت نحل فايسبوكي نصيفط ليه ميساج
– اه تقدري
– شكرااا ……….. هانا صيفط ليه قلت ليه يجيب ليا حتى ساروت من عند عويسة ومراتو حيت كنت ناوية نمشي لدارنا ندوز هاد العطلة .. ههههه ساعة غانرجع ليها ندوز فيها حياتي كاملة
– ماخصكيش تيأسي بسهولة
– مانكدبش عليك أنا من عائلة فقيرة .. با لمدة 3 شهور صافط ليا 100 درهم عييت بالماكلة ديال صدقات وبعد المرات كانبات بجوع .. واخا هكاك كنت كانعتابر راسي محظوظة ولكن بعد ماعرفت ليوم مصدر هاد الحظ عرفت أنه نحس .. حاسة باحساس داك الجندي لي دخل للحرب عيا يدافع على ولادو وبلادو وفلخر لقا راسو داخل غير اللعبة مقمرين عليها القادة شكون فيها لي غايربح .. سمحليا صدعتك ليوم
– بالعكس كايعجبني نسمع لهموم الناس
– سعداتك انا هادشي لي سمعت ليوم كرهني فحياتي
– بغيت نقوليك بلي داري فدخلة ديال المدينة ممكن نحط شي حاجة فيها ونوصلك من بعدها
– هههه ياكما باغي تخطفني تا انت؟ .. غير كانضحك معاك صافي واخا
وصلنا لدارو بلاتي أشمن دار هادي راه فيلا ماشي بحال داك الخربة لي جمعونا فيها قبيلة .. بقيت غير حالة فمي كي دجاجة
– نزلي مرحبا بيك
– لا شوووووووكرااا غير خليني تااااوكان ترجع على راحتك
– ههه واش خايفة مني ؟
– ومالي مانخافش ولداتك مي أأأأ زعمة قالت ليا مي تاتدخليش لديور رجالا ..لا ثقة فعتيقة
– ماتخافيش كاينين عائلتي فدار
– ايوا ملي كاين عائلتك واخا قولها من صباح ياك بعدا ماعندكمش سدادر قاليا داك الكسول بلي عندكم غير لفوطوي
– علاش؟
– مابغيتش نشوف طلامط هههه
الجزء الثامن عشر
دخلنا لداخل قاليا نجلس الى بغيت شي حاجة نقولها الخدامة تجيبو ليا .. حسيت براسي بطلة ديال شي مسلسل مكسيكي ههه .. جات عندي الخدامة قلت ليها بغيت غير نمشي لطواليط نعتاتو ليا .. دخلت ليه وجلست أكتر وقت ممكن .. خرجت لقيتو كايتسناني
– هو: تعطلتي ؟
– ههه سمح ليا راك عارفنا البنات ماشي بحالكم نتوما رجالا (فهمني شنو كانقصد وبدا كايضحك ) صافي نقدرو نمشيوا ؟
– لا مزال
– علاش؟؟
– غادي ناكلو بعدا شي حاجة .. ماجاتش نديك وتمشي تقلبي على شي گنازة باش تاكلي
– هه ماعرف علاش حسيت بك كاتخشي ليا الهضرة .. راه ماشي ديما كناكل فالجنازات كاناكل حتى فصدقات والعراسات هههههه
– هههه ماقصدتش نقلل منك حاشة
– ايوا صافي ناكلو.. حشومة نرد الماكلة تنقص ليا من صداقي .. ومنها نيت تعرفني على عائلتك
– اهاه مرحبا
مشينا جلسنا فطبلة وعيط للخدامة قاليها تبدا تحط الماكلة .. وتعيط على اسراء
– أنا : اسراء اختك ؟؟؟
– هو: لا مراتي
– أنا: على انت مزووج ؟؟ هه الله يكمل عليكم بالخير .. عندكم شي وليدات ؟؟؟؟
– هو: لا مزال
– اه ايوا الله يرزقكم درية الصالحة
– أمين شكرااا
وجات مراتو اسراء .. فمي تحل على مصرعيه .. أويلي هادي اشراق بشحمها ولحمها .. غير هي كانت رقيقة بزااف علم الله اش دار ليها هاد المسخوط
– هو: ههه لا بلا ماتصدمي هادي ماشي اشراق غير كاتشبه ليها
– أنا: كاتشبه ليها ؟؟ واش حتى انت مريض نفسي بحال عمر هههه صافي الى مكانت اشراق تقلبو على الأربعين شبه ديالها حتى تقاديوهم هههه
– هي: شكون هادي أيونس ؟
– هو: هادي شبيهة اشراق ماشي فلوجه ولكن فالأخلاق هههه
– أنا:هههههه اهاه ياكما تا أنا ناوي تزيدني فتشكيلة لي كاتجمع .. نووووض نمشي بحالي هاد نهار غير ديال الحماق
– هو: ولكن لي دخل لهاد دار عمرو ماغايخرج منها
– أنا: واش بصح أنا غانعيش فهاد ترف حياتي كاملة اللـــــــــــه .. وماتقولش ليا غاتزوج بيا وغانولد ليك الوليدات لي ماولداتهمش ليك اشراق أو اسراء
– هو: اه بصح دكية مع راسك وهاكا غاتكوني حققتي تنبأ الشوافة قدرك وقدر اشراق واحد
– أنا: أممممم واش حتى أنا غادير ليا شي فيديو كانتاحر فيه باش توريه لعائلتي ههه وتقوليهم بلي داك رباعة دالهبل هما لي قتلو روحها ولكن جسدها هي لي قتلاتو
– هو: تماااااااااااااما .. وليت معجب بدكاء ديالك أميس
– أنا: وغاتبدل ليا حتى أنا سمية ؟؟؟
– هو: ختاري وتعزلي مع راسك سمية وحتى الكنية
– أنا: هادشي لي درتي للإشراق حتى هي مسكينة
– هو: هي لي نتاحرات لراسها .. وأنا ملي رجعتها لدنيا وولات ديالي بوحدي
– هي: شكون هاد البنت ومنين كاتعرف هادشي كامل ؟
– هو: ماتخافيش غايكون عندكم الوقت بالأعوام باش تتعاودو مع بعضياتكم .. دابا أميس قولي ليا الانتحار ديالك كيفاش بغيتي يكون باش نوجدو ليه مسرح الجريمة من دابا
– أنا: بلاتي نفكرأممممم ..بغيت ننتاحر من بعد مانكون رتاكبت جريمة قتل وعرفتي شكون لي بغيتو يكون ضحية؟؟؟
– هو: بلا ماتفكري فيها حتى التفكير .. حيت عائلتك كلهم غايكونو ضحايا ديال جريمة قتل شنيعة غاتبقى متورخة
– أنا: هادشي باش هددك أ اشراق حتى بقيتي ساكتة لمدة عامين .. دفنك وانت حية ومزال ساكتة
– هي: انتي مزال ماعارفاش هاد المختل النفسي شنو يقدر يدير
– هو: ماتهضروش عليا الله يخليكم بحالا أنا مكاينش
– أنا: وشكون لي قالك انت كاين .. انت راه بلاصتك صبيطار الحماق (ناض عطاني بواحد تصرفيقة شفت نجوم كايدورو)
– هي: (كاترغبو) عافاك خليها ماضربهاش الله يخليك
– هو: خصها تربى باش تحني راس بحالكم كاتشبه ليكم
– أنا: على شحال نتوما ؟؟؟؟؟؟؟
– هو: ولكن انتي كاتشبهي ليها كتر
قرب لعندي وبدا يضرب فيا واشراق كاتحاول تحامي عليا ولكن عاد مكاتجي دقة فيا دقة فيها .. كن ما وصلوش البوليس و داك رباعة الهم ( زكريا،عمر،عيسى،عبد الجبار.. مهم كلهم) فالوقت كن راه قتلنا ولد الحرام .. رباعة الهم تجمعوا على اشراق حيت توحشوها وماتيقو يشوفوها حية .. وانا خلاوني وجها لوجه مع هداك ولد الهم طبعا شادينو لبوليس أما يكمل داكشي لي خاص
– هو: شكون لي عيط ليكم ؟؟
– أنا: قالك المريض النفسي ملي مكايتعالجش كايولي مريض عقلي داكشي لي طرا ليك أولد الهم تا مارديتيش البال .. يسحابك أنا حمارة نتعبك وتسد عليا .. كنت عارفاك علاش ناوي يسحابك ماكنتش كانشوفك فالمكتبة كي كاتشوف فيا (الى عقلتو ملي قلت ليكم عيط شي حد اشراق وضرت ولقيتو كايشوف فيا) .. واش عرفتي شنو قالت ليا شوافة بصح داك نهار فروضة ..قالت ليا راه هاد القبر خاوي تما طلع معايا تناوي
– وباش عرفتيها بلي مزالا حية وكاينة هنا ؟
– قلت نمشي معاك طلعتي ولد الناس مكاين باس طلعتي ولد الحرام ندخلوك للفران .. وطبعا أنا دايرة احتياطي لداكشي حليت الفايسبوك ديالي فتيليفونك باش يعرف زكريا لبلاصة منين محلول .. ايوا دابا نوض تشلل .. الله ياخد فيك الحق دگدگتني عصا

الجزء التاسع عشر ماقبل الأخير
دازت سيمانة على داك نهار المشؤوم .. كنت ناوية ندوز العطلة عند واليديا ساعة باش من وجه غانقابل معاهم … وجهي عامر كدمات كاع لي كايشوفني كايقوليا طلقي منو وسيري دعيه وماتنسايش تاخدي النفقة علولاد .. يسحابهم راجلي لي فرشخني حسبي الله ونعم الوكيل… والمشكل ليوم رجعنا للقراية جاب الله سومية الله يخلف عليها ديباناتني بشوية ديال الماكياج سترنا به الزروقية والخضورية .. ايوا هدا ماكان رجعت لقرايتي وانا كلي اصرار وعزيمة قوى من لي فات .. عنداك تيقو داكشي لي قلت لهداك المجرم داك نهار غير كنت بغيت نبين ليه بلي فاقدة الأمل و بلي أنا ضحية سهلة الإنفراس وبلي الى ماتحركش دابا راني غانرجع لدارنا وعمرو يعاود يشوفني .. والحمدلله جاب الله تيسير .. وخا عظامي مزال مدگدگين عليا شوية ..علم الله كي دارت إشراق عاشت معاه عامين حابسها فداك الڨيلا وكايهددها بمها لي متبنياها ولي هي فالأصل ماتت مسكينة لعام لي فاتت .. ملي ساقت اشراق الخبار جاها مسكينة انهيار جاب الله كاين معاها عمر كايواسيها وواقف بجنبها .. وحتى داك رباعة الهم ندمو وطلبو منها سماحة ومرة مرة كايمشوا يشوفوها كنتمنى تبرا دغيا وترجع قوية كما كانت
من بعد مادوزت صباح فلافاك .. جيت لعشية للخدمة
– زكريا: هاي هاي على الفقيرة الجميلة جا معاك المكياج
– كيفاش جا معايا المكياج على كنت خايبة بلا بيه
– بلاااا كدوب اه كنتي كي المومياء ديال نيفرتيتي
– (مارضيتش) شكاتعرف فزين ألكسول
– مائة مرة قلت ليك ماتبقايش تقولي ليا الكسول .. أنا ماشي كسول غير الواليد الله يهديه داك الوقت كان مبزز عليا واحد ضومين ماكنتش حاملو وماكنت كانفهم فيه تالعبة .. وبالتالي ماكنتش كانعطي فيه
– ايوا الله يعطينا وجهك
– فراسك بلي عيطو ليا واحد الجمعية ندير لتلاميد ديالها فورماسيون فلانفورماتيك .. وقالو ليا غايخلصوني مزيان .. عرفتي الى مشا صدق ليا هاد البلان شغاندير ؟؟ غانمشي نخطب سوسو (سومية)
– رضا وهاكا نبغيك وانا واعد مني عمري نعاود نقوليك الكسول ألكسول
فهاد اللحظة دخلو عندنا اشراق و عمر
– اشراق و عمر: سلام عليكم
– أنا وزكريا : وعليكم السلام
– زكريا : ختي اشراق هاكي الكرسي ترتاحي ماتبقايش واقفة
– اشراق: لا لا شكرا غانمشي لروضة نزور ماما الله يرحمها .. غير قلنا نطلو عليكم
– زكريا : اه يطل عليكم الخير والربح
– عمر: ميس مزال مقلقة مني ؟؟
– أنا: انا ؟؟ لا بالعكس .. الغاية تبرر الوسيلة .. وانا محظوظة حيت حطني ربي فهاد طريق
– زكريا : مساااامحاك حيت لاقيتيها بيا .. غير حشمات تقولها ههههههه
– أنا: هههههه الله يسمح ليك انت نيت على هاد الكدبة هههه
خلينا عمر وزكريا فسيبير كايقلبو على شي حاجة وأنا واشراق مشينا للروضة .. وبقينا كانهضرو فالطريق
– هي: كي بقيتي شوية ؟
– الحمدلله واخا أنا لي خصني نسولك كي بقيتي؟ باز ليك عشتي مع داك المجرم عامين انا كانتفكر غير داك نهار كايبغي عقلي يخرج من بلاصتو
– كل ماكانلومو كانزيد نعذرو.. انا غير عامين اما هو نص من حياتو
– كيفاش ؟
– مو كانت مريضة نفسية وكانت من صغرو كاتعتابرو كي شي دمية ديما سادة عليه وكاتفرغ فيه هلوساتها وأمراضها .. هادشي لي قدرت نعرف عليه حيت ملي كايتفكرها كايولي واحد أخور بحال داك نهار ملي هجم علينا .. علم الله شنو داز عليه تاهو
تتمة الجزء التاسع عشر
فهاد اللحظة دخلنا للمقبرة ودزنا من حدا قبر اشراق .. اشراق وصلات حداه ووقفات بدات كاتبكي بحرقة بحالا كاتبكي على شي صاحبتها قديمة
– هي : قبري .. ياريت كن كان عامر و ياريت كن كانت هاديك هي موتتي الأخيرة .. واش عارفة أميس بلي أنا مت قبل من هاد المرة .. ملي بديت كانقلب على واليديا الحقيقين عرفت بلي كانو كاتبين قدام سميتي الحقيقية فوثائق الولادة ديال سبيطار متوفية .. ودابا تاني مكتوب على سميتي متوفية .. بحالا القدر باغيني نموت قبل من الأجل
– ممكن نسولك علاش والديك الحقيقيين تخلاو عليك ؟
– حيت كنت غير خطأ ديال زواج دام شهر.. شهر عرفو فيه بلي مامفاهمينش ومايمكنش يكملو مع بعضياتهم.. وحتى حد فيهم مامستعد يتحمل الخطأ ديال هاد زواج بوحدو .. لداكشي قررو يبعدوني عليهم ويعطيوني لشي حد يربيني وهما يقنعو راسهم بلي انا مت وخطأهم تمحى
– واش قدرتي تسمحي ليهم ؟؟
– فلول لا.. لدرجة أنني تخليت على عمر بسبب حقدي عليهم .. ولكن من بعد ماعشت مع يونس وعرفت هو شنو عاش.. قلت الحمدلله أنهم ملي مابغاونيش عطاوني للمرأة صالحة تربيني وتعطيني لحنان لي هما عارفين راسهم مايقدروش يعطيوه .. حسن ما يخليوني عايشة معهم وهما ماحاملنيش
– دابا شنو غاديري ترجعي لحياتك لي قبل؟
– اشراق كانت بنت قوية .. طموحة .. مرحة ..أنانية وكاتبغي راسها .. ولكن أنا دابا لا .. امرأة ضعيفة ..مكسورة.. بئيسة .. وأخر حاجة نقدر ندير فدنيا هو نبغي راسي
– عرفتي شنو ؟؟ هاد القبر الخاوي غير غايضيع هه علاش مانعمروهش بكاع المشاعر الحزينة وكاع صفات الخايبة لي كاتحسي بيهم … انت ماشي غير سمية حداها كلمة متوفية .. انت انسانة قبل كلشي .. سوا كانت سميتك اشراق ولا اسراء ولا حتى انتصار .. كاتبقاي شحص واحد عندو مراحل فحياتو كايعيشهم بأحاسيس مختلفة .. ماتقسميش صفات على سميات .. هه أجي واش عرفتي شنو كاتعني سميت ميس بالشلحة ؟
– لا ماعرفتش
– هي هاديك نيت كاتعني هي مانعرف .. وتخيلي فدوار كلو كايهضر غير بالشلحة وانت سميتك وسط منهم مانعرف هه كنت كانحس براسي بحال شي شبح .. وحتى هما نيت الله يخلف عليهم زادو حسسوني بلي زايدة ناقصة .. وبلي حتى سمية هي لخرة ماعنديش .. عقدوني ملي كنت صغيرة… وبعد معاناة وصراع طويل مع دات .. عرفت بلي سمية غير زواق .. وسمية ماشي هي لي كاتحدد قيمتي .. أنا لي كانعطي لقيمة لراسي .. والى كنت ليوم ضعيفة غدا نكون قوية الحياة ماعندهاش حكم واحد ..صافي تزاديتي قوية غاتبقاي قوية حتى تموتي لا ضروري مانهار تعطيك ونهار تخلي دار عشتك

الجزء العشرين والأخير
مرت بضع أشهر
وأخيرا سالا العام دراسي .. وسالا الشتاء المخيف و الربيع اللطيف وجا الصيف المريح .. الله غانرجع لدارنا عند واليديا .. أنا دابا جالسة فالكار حدا سرجم ودكريات ديال هاد العام كاتدوز من قدام عيني بحال هاد المناظر الطبيعية .. فاش جيت أول مرة للمدينة كان صعيب عليا أنني نتأقلم فبلاصة غريبة ومع ناس غير مألوفة .. ولكن ماعرفتش كيفاش وليت كانحس بلي أنا منهم .. لدرجة أن زكريا فاش مشا يخطب سومية داني مع عائلتو.. العفيريت وفا بوعدو غير شد أول خلصة من خدمتو لي كايبغي مشا خطبها كايجري ودابا ملي ترسم فخدمتو بداو يوجدو للعرس .. والحاج عتارف بغلطو وأن ولدو لي كان كايعيط ليه الفاشل كان فالأصل قرارو هو لي فاشل ملي بغا يبزز عليه شي حاجة ماباغيهاش .. اما اشراق من بعد جلسات العلاج نفسي لي تبعات ولات كاتلقى راسها ومن بعد ماستاعدات عافييتها قررات انها تقبل تزوج بعمر وتمشي معاه لبرا وماشي تبدا حياة جديدة ولكن تكمل حياتها تعلم من أغلاطها وتزيد طور من راسها وحتى علاقتها مع عائلتها الحقيقية رجعات مزيانة ..اما الأستاد تيتيز قدوة الأجيال تزوج وبيناتنا مابقاش كايتفلفل .. منال واسماعيل تزادت عندهم بنت دابا عاد بداو كايحسو شنو دارو فاشراق ملي ولاو كايخافو على بنتهم .. أما سي عيسى وخالتي سعيدة مزال كايكملو حياتهم مقاتلين مع زمان ..وهدا مكان …هاد العام كان عامر بدروس ليا ماشي غير فالقانون ولكن حتى فالحياة .. كنتمنى يدوز العام جاي حسن من هدا .. وكنتمنى كذلك تكون أيامكم الجايا حسن من لي فات شكرااا على المتابعة
تمت بحمد الله

اترك تعليقا

  1. Bsara7a a7san 2 9isa kan9ra fiha bzaf dual l3ibar

    9issa mkhetalfa Feha ba3d mn lwa93 likan3icho❤❤❤👌

  2. قصة وارة بزاف برافو عليك