Skip links

 6,534 عدد مشاهداات

حصريا على همس الليل 🖤✨

🤎ممنوعة من النشر🤎

تقديم✨
وفي عيونك ضعت مابين الحيرة والتأمل رأيتك وسط النجوم قمرا لي تفاءلت بالخير فوجدتك لقد كنت بحاجة لابتسامتك كي اشرق كل صباح كاد طريقي ان ينتهى لكنك ابتسمت فكنت لي حكاية اخرى من السعادة🖤🥀

قصة قصيرة مقتصرة على 13, جزء فقط مثل كل ما سبق ليا وقدمت لكم والقصة تحت عنوان

المنتقبة الفاتنة 🖤✨
بقلمي:التباعي ايمان

الاجزاء غيتحطو فنهاية الاسبوع ان شاء الله كنتمنى تنال اعجابكم قراءة ممتعة🖤

المنتقبة الفاتنة 🖤✨
بقلم :ايمان التباعي 🖤
🖤تلك العيون الصغيرة كارثة لقلبي🖤🥀
بارت 1
شتا خيط من السما وهي كتجري فوسط داك الشارع دموعها نازلين من عينيها لي كيبانو من لثامها كتجر فعبايتها لي گاع فزگات بالما وكتقطع فداك الشانطي خاصها تلحق على الامتحان معمرها وقعت ليها تال هاد مرة دارتها بيها عينيها بايتا ليل كامل تحفظ وتوجد فلخر صبحت ناعسة وقفت فسطوب الخضر كتسنا طوموبيلات يدوزو حاسة بدوك الثواني اعوام غير بان ليها الضو الحمر سبقت هي لولا بغات تقطع من زهرها طاحو ليها الوراق لي كانو فيدها جهدت فبكاها وتحنات كتجمع فيهم بازربة وكيطيرو لها
كان حاضيها مكانتش بيناتهم مسافة كبيرة كانت قريبة لطوموبليتو هدشي لي خلاه يلاحظ بكااءها واخا دايرا لتامها عينيها باينين بلي كتبكي شافها فاش طاحو ليها الوراق وكيتزلعو ليها وطوموبيلات كيكلاكصونيو باش تحيد حيت رجع الضو الخضر نزل من طوموبيلتو وتمشى لناحيتها تحنى لعندها كيعاون فيها حتى جمعهم كاملين هزت عينيها فيه وسهى فيها داك سحراتو غير من عينيها لي عامرين دموع مد ليها الوراق هضرت بصوت متقطع

:شكرا

تخطاتو ومشات بزربة خلاتو غير كيشوف رجع لطوموبيلتو وتحرك ولكن عقلو بقى غير معها ترسمت ابتاسمة على وجهو خلات شيفور يهز عينيه يشوف فيه باستغراب عاق براسو وسرعان نا عقد غوباشتو من جديد
دخلت كتجري لقاتهم كملو الامتحان وخارجين سمعت صوت صحبتها كتعيط عليها بسميتها

امال:فيروووزة

تلفت لعندها غير شافتها بدات تبكي تاني. تقدمت عندها امال شادة من كتافها

امال:اويلي اصاحبتي مالكي علاش تعطلتي خلعتيني عليك

فيروزة:راه داتني عيني اختي

امال:دابا شغديري وحنا راه كملنااا

فيروزة:(ببكاء) معرفتش اختي

امال:اجي نهضرو معه

فيروزة:اش غتقوليلي ليه راه ميبغيش

امال:واغير زيدي اصاحبتي

دقو فالباب خداو الاذن ودخلو كان الپروف كيجمع فالوراق باش يخرج تمشاو ناحيتو

الپروف: فيروزة علاش مجيتيش

غلبو عليها دموع مقدرت گاع تهضر وهدي هي نقطة ضعفها غير يبدا يهضر معها شيحد تبكي تصرفت امال كتهضر فبلاصتها

امال:كانت عيانة البارح استاذ ومنعساتش ليل كامل كتحفض وصبحت عيانة عفاك واش تقدر تعاود ليها الامتحان راه والله تا حافضة

الپروف:اوا فهاد الحالة معندي ما ندير لها

امال:غير شوف وكان ااستاذ الله يعطيك ستر ديرها فحال بنتك

الپروف:راه ميمكنش اأمال

امال:عفاك والله تا راه حافضا وتعذبات باش دوز هاد الامتحان
تنهد شافيها هي لي كتبكي عزات عليه

الپروف:واخا غنعطيها اخر فرصة من هنا ل 10 دقايق رجعي لعندي وياجي دوزي

امال:شكرا بزاااف والله لهلا يخطيك علينا

ابتاسم ليهم وخرج طارت عليها معنقاها

امال:حيدييي علياااا قجيتينييي

فيروزة:اييييي شكرااا اختي لهاا يخطيك علياااا معرفتش شنو كنت اندير بلا بك طلبي لييي بغيتييي

امال: زوجيني🙂

دفعتها بعيد عليها تموت على زواج زهوانية تشوف الزين تنسى راسها يوصل وقت امتحانات تبدا تدعي تزوج

فيروزة:تحركي تحركي نتبعو الپروف ونشوف فين اندوز
امال:زيدي

المنتقبة الفاتنة 🖤✨
بقلم :ايمان التباعي 🖤
🖤تلك العيون الصغيرة كارثة لقلبي🖤🥀
بارت 2
وقفت طوموبيل قدام الكلية تلفت الكل كيشوفو فيها كتبان فيها غالية حتى واحد فالكلية ماعندو داك النوع تفتح الباب نزل منها بكل هبة حاط كيتمشى بخطوات ثابتة مخلي اعين الكل عليه البنات كيوشوفو وكيطلعو ويهبطو فيه بإعجاب متسائلين شكون هداا عمرو بان ليهم تمااا

كيوزع نظراتو حتى لمحو واقف كيهضر مع اساتذة وتوجه لعندو غير شافو توسعت ابتسامتو وعنقو

الاستاذ احمد: قصي ولدييي اش هاد مفاااجأة زوينة

قصي:الواليد توحشتك

الاستاذ احمد:حتى انا اولدي قولي امتى جيتي

قصي:غير اليوم وغنمشي اليوم نيت

الاستاذ احمد:علاش هاد زربة كاملة

قصي:عندي الخدمة

الاستاذ:عرفتي شنو.استناني نكمل واحد الاجتماع مع عميد الكلية ونرجع

قصي:متعطلش عليا الواليد

الاستاذ احمد:لالا فيساع

وهوما فعز حديثهم وقفو عليهم بزوج

فيروزة:استاذ واش غتعطيني الامتحان دابا

استاذ احمد:والله ابنتي تا نسيتك ودابا عندي اجتماع

شافت فأمال وعينيها بداو كيتجمعو فيهم دموع

امال:اويلي سكتي ونتي كلمة زوج تبداي تبكي

فيروزة:(برجاء) عفاك واش مكاين حتى حل

استاذ احمد :عرفتي شنو غتمشي لمدرج**** وغيبقى معك تما ولدي تا دوزي واخا نتي متحتاجيش للمراقبة ولكن من ضروري

شافيه قصي باستغراب من كلامو يالله غيرفض و هز راسو فيها وتلاقاو عينيهم بزوج تصدم مكانتش متوقع انه غيرجع يشوفها بقى ساهي كيحقق فعينيها لي مبغاوش يتنساو ليه بنفس االنظرات كانت كتشوف فيه حتى هي ولكن هبطات عبنيها فيساع

استاذ احمد:هانتا ولدي الوقت لي تبقى تستناني فيه بقى مع البنت عندها امتحان وراقبها بينما نلحق عليكم

قصي:واخا مشي مشكل

ابتاسم مكانش متوقع انه غيوافق بهاد السهولة

استاذ احمد: تبعيني يالله

تحركو تابعينو امال مزال حالة فمها فيه شدات فيهااا

امال:اييييي اصاااحبتي شحااال كيحمق ممتيقاش هاد زين كامل مغريبي

فيروزة:(بهمس )سكتي الله يمسخك راه غيسمعك

امال:سعداااااتك اصاحبتي غتبقاي نتي وياه

فيروة:اماال من نيتك

امال؛وصااافي صافيي غير كنضحك

فيروزة:الضحك الباسل

امال:اسيري تعاودي لمخك انا منك نشوف هاد زين نحيد نقابي ولتامي ونقوليه انا ليك اعمري

جمعاتها معها بدقة تا قصحاتها سكتاتها وصلو قدام المدرج مد ليها الاستاذ ورقة الامتحان وعلمها بالوقت لي عندها شرح لها شنو عندها

استاذ احمد:يالله اولدي هاهي البنت فأمانتك تا نجي

امال:نقدر نبقى معهم ااستاذ

استاذ احمد:ولاش

امال:غير نتسناهم

استاذ احمد:زيدي قدامي زيدي خليها بوحديتها راه امتحان هدااا
عقدت حواجبها قربت من فيروزة كتهضر بهمس

امال:عطاتك ليام ابنت نجاة استغلي الفرص

ضحكت وشافت فيه تاني باعجاب ما بقى لها غير تاكلو وتحركو من حداهم خلاوها غتموت بالحشمة كتفرك فصبعانها بتوتر كبير فتح الباب

قصي:تفضلي دخلي

دخلت سابقاه احساس غريب جاها واكثر شيء خافت حيت عمرها كانت مع راجل فشي بلاصة جلست فأول بلاصة لمحتها حطت صاكادو حداها ووراق الامتحان قدامها جبدت ادواتها خدات نفس عميق سمات الله وبدات

المنتقبة الفاتنة 🖤✨
بقلم :ايمان التباعي 🖤
🖤تلك العيون الصغيرة كارثة لقلبي🖤🥀
بارت 3
واقف مقابل معاها مربع يديه وحاضيها دازت تقريبا نصف ساعة هاد المدة كاملة محيدش عينيه عليها ماحسش بالملل بمرة بالعكس مكرهش يجلس حداها ويبقى غير حاضيها فتناتو غير من عينيها الفضول كياكلو كتر وكتر باغي يشوف ها يشوف ملامحها كاملين انتابه لتصرفاتها لي تحولت من هدوء لتوتر عقد حواجبو فاش سمعها كتبكي تقدم لعندها بسرعة بخوف .

قصي:مااالكييي شنو واقع .

فيروزة:(ببكاء)معرفتش نسيت هاد سؤال

قصي:غير تهدني متخلعيش

فيروزة:لا مشا ليا كلشيييي

قصي: لا مامشى والو هدشي غير من سطريس دابا تهدني ما واقع حتى حاجة خودي وقتك وعاودي فكري مزيان مسحي دموعك واخا

حركت راسها بواخا ابتاسم تحرك لبرا بزربة خدا قرعة دالما من البيڤيط كانت قريبة لهم ورجع لعندها مد ليها القرعة

قصي:خودي شربي الما وراتاحي شويا

شدات من عندو القرعة وبقات كتشوف فيه بتوتر نزلت عينيها عاود فهم قصدها وتلفت عاطيها بضهر هزت لتامها كتفتح فالقرعة وبالها معه خايفاه يضور اما هو الفضول كياكل فيه ن داخل باغي يتلفت لعندها ولكن مبغاش يتبرهش ببراءة نطقات

فيروزة :صافي تقدر تلفت

ابتاسم لنبرة صوتها الهادئة والبريئة وتلفت لعندها حاضيها من جديد فات الوقت تفتح الباب

استاذ احمد: تعطلت عليكم

قصي: لا مشي مشكل

استاذ احمد:ياكما مليتي

قصي:(بابتسامة)بالعكس

وقفت من بلاصتها مدت ليه ورقة الامتحان خداها من عندها

فيروزة:شكرا استاذ بزاااف عمرني نسا ليك لي درتي معايا

استاذ احمد:مرحبا بنتي نتي طالبة متفوقة عندي مبغيتكش ضيعي

فيروزة:لهلا يخطيك

تحركت كتجمع فأدواتها فيما هو مزال مراقبها هزت صكادو ديالها وقرعة الما مداتها ليه

فيروزة: شكرا لك

قصي:غير خليها عندك مشي مشكل

فيروزة:واخا شكرا

يالله غيهضر خرجت مع الباب خلاتو غير كيشوف تاني مرة كديرها ليه باغي يعرف غير سميتها بعدا معجبوش البلان عقد غوباشتو وخرج سابق باه لي كان كيهضر مع استاذ اخر طلع طوموبيل ومزال الفقصة كتاكل فيه من داخل دازو. دقائق وطلع حداه ب تحرك شيفور غادي بيهم للدار

احمد:مالك منين خرجتي ونتا ساكت ياكما وقعت شيحاجة

قصي:لا الواليد غير مراشقاش ليا وصافي

شافيه باه بابتسامة عايق به

استاذ احمد:سميتها فيروزة الأحمدي عندها 22 عام طالبة فسلك الاجازة مسلك علم النفس ضريفة وذكية مجتهدة تا واحد معارف ملامحها من نهار دخلت الكلية وهي منتقبة كلشي كيشهد لها انا بنت مزيانة

ترسمت ابتسامة على وجهو والسبب الكلمة الاخيرة لي قال ركز عليها مزيان انه تا واحد معارف ملامحها باغي يكون اول واحد يشوفها هدشي زاد علقو بيها كتر قصي صاحب 32 سنة لي عمرو داها فشي بنت نظرا لخدمتو لي كتاخد منو وقت طويييل بزاف اغلب الوقت كيدوز. فالبحر خدام فلامارين قليل فين كيخرج وقليل فين كيتجمع مع صحابو هدشي مخلي علاقتو بالناس محدودة معمرو فكر فزواج اولا خاص تكون شي بنت فحياتو ولكن اليوم فيروزة قلبت ليه كلشي

المنتقبة الفاتنة 🖤✨
بقلم :ايمان التباعي 🖤
🖤تلك العيون الصغيرة كارثة لقلبي🖤🥀
بارت 4
وصلو للدار طلع لبيتو خدا دوش وبدل حوايجو وعقلو غايب غير كيفكر فيها مد.يديه لطلفون صيفط ميساج ونزل لقاهم.حاطين طابلة دالغداا جلس حدا مو كانت امرأة داخلا فالخميسين من عمرها مزال مهليا فراسها مكتبانش عليها

احمد:لالة غيتة شفتك فرحانة بولدك

غيثة:ومالي لي مانفرح وليدي كنشوفو مرة فالعام

احمد: ايييه الالة وحنا ماعليناش الله

قصي:العام كااامل وهي معك ما كاتبان ليك الغيرة حتى كنجي انا

احمد:هديك راه العمر ديالي اشريييف

قصي:اخويا خليها ليا غير اليوم راني توحشتها

احمد:لا سير تزوج باش متبقاش توحش مراتي انا

غيثة:سكت على الولد قولي اولدي امتى نفرح بك

احمد:هاد المرة بان لي قريب

غيثة:(بفرح) بصح؟؟ صافي رجعتي نتا ومريم لي كنتي معها

قصي:لا الله يهديك الواليدة مريم ساليت انا وياها شحال هدي

غيثة:اهاه وشكون هي كنعرفوها

قصي:راااه مكاااين وااااالو من هادشي مكاينا حتى وحدة شفتي شدرتي لينا دابا

احمد:اناااا مادرت والو بغيت غا تبعد ليا من مراتي نهار كتجي كتنساني

قصي:واش نتا دخلتي فالستينات ومزال كتغير عليها مني

احمد:انا ما كرهت نهار نموت نديرها حدايا

قصي: الله يحفظك واش نتا غا ندويو تجبد الموت

غيثة:ها علاش خاص تتزوج

قصي؛هههه شوف دابا ضورتوني

احمد:واتزوج تزوج

كملو ماكلتهم فجو عائلي وسط ضحكهم هكدا مولفين ولدهم الوحيد نهار كيجي كيعمر عليهم الدار

فتحت باب الدار لي كانت صغيرة وتقلديية صالون و2 بيوت وكوزينة ودخلت اختارقت انفاسها ريحة طاجين بلحم والبرقوق دخلت تجري

فيرووزة:اللله يااااربييي على ريحة شحال كتحمق ايييييي وشحاال تشهيييتو

يالله غنتفتحو تسمع صوتها من الكوزينة كتغوت عليها عارفاها هايشية وتموت على هاد طاجين خرجت هازة فيدها الخبز لابسة پيجامة طويلة جامعة شعرها كعكة مهملة ملامحها فحال فيروزة تماما

نجاة:اديك الهيشة نوضي بدلي بعدا وغسلي وياجي بينما يوصل خوك من مدرستو

فيروزة:بربي لا تسنيييتو

نجاة:تگعديييي

جمعت الوققة داخلا لبيتتها حيدت لتامها تطلق شعرها طويل والعسلي فنفس لون عينيها حيدت عبايتها شافت فالمراية وجها لي ممتلئ هزت فوطتها وخرجت للدوش برا تدوش دازو دقائق وخرجات صلات الضهرو لابسة پيجامتها سروال وتيشرت جمعت شعرها الفوق هزت فيدها پينوار الپيجامة وشال لا ييعود جاي شيحد عندهم دائما كتحطهم.حداها جلست جنب مها فتحت طاجين متسناتش يوصل خوها بدات كتاكل حتى تفتح الباب ودخل لاح شكارتو مشا غسل يديه وجا

اشرف:نتي ما تسنااي حد ياربي السلامة

فيروزة:فالماكلة منعقلش عليك

اشرف:لي يشوفك يقول متحرك دجاجة على بيضها ونتي ياربي السلامة تدخلي فبنادم طول وعرض حناكك رجعو قد طبل

فيروزة: خمسة والخمامس عليا كيف شفتيني تخليني بنادم حناكو داخلين بالجوع وحاضيني

نجاة:صافي كولو وهنيوناا نتوما غير مشادين قوليا نتا شدرتي راه قرب الامتحان الباك مابقى له والو وشفتك غير غادي جاي لديك لاصال والحفاضة والو

اشرف:كوني هانيا الواليدة مابقى والو وراني عارف غير تهناي

فيروزة:البرهوش كبر ولا يقول الواليدة

اشرف؛هانتي شهدي عليها راه غنوض لها نوكلها سنانها

فيروزة:لا سميتك راجل نوض

يالله غينوض لها عطاتها لغوات

فيروزة:واااااااااااماااامااااااا عتقييي

اشرف:ربي لاما سكتي فيك غير الغوات

فيروزة:هانتي شهدي عليه كيمشي لدك لصال يربي الفورمة ويجي يتريني فيا انا

نجاة:كون كنتي تتشدي فمك اسليفعانة گاع ميقرب لك

اشرف:ياربي شي راجل يطيرها عليا

فيروزة:اميييين ياربي واخا دعاويه موحاال واش مقبولين
نجاة:هههه واباز

المنتقبة الفاتنة 🖤✨
بقلم :ايمان التباعي 🖤
🖤تلك العيون الصغيرة كارثة لقلبي🖤🥀
الجزء5
واقف بطوموبيلتو بعيد على باب الكلية شويا من وقتما وصل باه مع 2 وهو تما مراقبها كيستناها تخرج هبط عينيه لطلفون كيشوف فاستعمال الزمن الخاص بها بقات 5 دقايق وتخرج قاريا مرة مرة كيرجع يقرا فالمعلومات لي وصلوه عليها بكلشي عليها بنت نقية كلشي كيشهد لها من نهار مات باها وهي محافظة على سمعتو وسط الناس كان حرايفي فالنجارة مرض ومات وتكفل بهم خالها اما هي من القرايا للدار قليل فاش تخرج ولا خرجت كتكون غير مع مها وخوها قليل
لمحها خارجة مع صحبتها مراقبها كيفاش كتبان بداك اللباس وسط البنات بالنسبة له مميزة بزاف واللون جاها زوين بزاف توادعت معها وشدات طاكسي طريق لدارهم تبعها عقد حواجبو باستغراب فاش شافها نزلت من طاكسي وهي مزال موصلت لدارهم شافها دخلت للحانوت ثواني وخرجت هازة فيدها ساشي عامرا بسقاااطة ضحك ولكن سرعان ما جمع ضحكتو فاش شاف واحد دخل فيها بكتفو وطيح ليها دكشي لي هازة
الولد:مااالك عوراااا يخخخخ على بناااادم كيداير
فيروزة:سمحليا عفاك والله ماشفتك
الولد:سمحليا غنديرها فجيبي واش عورة ولا مالكي؟ نتي مخشية فهاد**** مالك على حالتك لا كنتي اتخشاي فهادشي وتبقاي تدخلي فبنادم غير ***لداركم وريحي فيها حسن
تجمعو دموع فعينيها هضرتو جرحاتها بزااااف معرفت مادير من غير انا بدات كتبكي هي مولفا تسمع هدشي من عند ناس لي كيظلمو البنت المنقبة وعندهم فكرة جاهلة على النقاب
الولد:وابااااز كديرو فيهاااا ملائكة الرحمان ونتوما كااينين شي وحدينات فيكم غير *** على ختها كتخبى تحت من نقاب
يالله كملها حس بحنكو عواج نت دقة لي عطاه زير على فكو ضاغط عليه عطاه ضربة عوجاتو
قصي:فعايل**** لي نتا كابر وسط منهم انا غنوريهم لك مزيان
لصقو مع حيط قاجو تا ولا زرق روحو علاين تزهق الناس تجمعو تا حد ما قدر يقرب له غير كيتفرجو سمع صوتها لي غالب عليه البكا
فيروزة:عفااك طلقو غتقتلو عفاك
ضورو لعندها شانق عليه
قصي:طلب منهاااا سمااااحة
الولد:س محي ليا
قصي:عااااادها انا مسمعتكش مزيااان
الولد:عفاااك اختي سمحيي ليا عفااك
فيروزة: الله يسامح
طلقو دافعو لبعيد غير طلقو هرب مشا يجري نفض يديه تحنات هي كتهز فديك السقاطة واخا تجرحت ما سامحاش فالماكلة
فيروزة: شكرا مرة اخرى الله يجازيك بالخير
يالله غتحرك وقفها ميمكنش ديرها به هاد المرة وقف قدامها مانعها دوز
قصي:عفاك تقدري تعطيني غير 5 دقايق من وقتك نهضر معك
فيروزة:سمحليا اخويا بغيت نمشي لدارناا منقدرش
قصي:غير 2 دقايق گاع
فيروزة:ولكن علاااش
قصي،:غير بغيت نهضر معك نيتي حسنة
حارت مبغاتش تبقى واقفة تما قدام الناس
فيروزة:واخا
فتح طريق قدامو سابقاه وهو وراها وصلو طوموبيل فتح ليها الباب
قصي:طلعي
فيروزة:من نيتك؟
قصي:متفهمينيش غلط غير بغيت نحيدو من هنا
فيروزة:اويلي بغيتي تخطفنييي
قصي:(ضحك) ههه لا متخافيش
فيروزة؛لالا انا غنمشي فحااالي
قصي:صافي صافي غير بقاي هنا
فيروزة:فاش بغيتي تهضر معايا
قصي:بغيت نتزوج بك
طرطقت عينيها فيه فمها تشلل بالصدمة اش كيقول هدااا منين كيعرفها خرج ليها نيشان دوز يدو على شعرو بتوتر شاف فيها عارفها مصدومة
قصي:سمحيلي انا مكنعرفش نهضر فهاد المواضيع عليها جيتك نيشان مبغيتش نبان كنتفلى عليك بغيت نقصد داركم نيشان
فيروزة:(بصدمة) ولكن نتا فين كتعرفني باش تزوج بيا
قصي:هو صراحة مكنعرفكش مزيان غير الصدف لي جمعتنا علقاتني بك دكشي لا ش بغيت نقصد داركم نيشان وناوييك للحلال ونتفاهمو ان شاء الله ويكون خير واخا متأكد غنتفاهمو
فيروزة:(لا رد)
قصي:شنو قلتي؟
فيروزة:معرفتش زربتي عليا منقدر نقوليك والو انا مكنعرفكش خايفا
قصي:متخافي من والو ابنت الناس غنجي لداركم ونجيب والديا ومايكون غير الخير واش تقبلي نجي لداركم؟
فيروزة:(بعد تفكير) واخا مرحبا تا تهضر مع دارنا ونشوف
قصي:(بفرح) صافيي مايكون غير الخير
فيروزة:بلاتي نعطيك العنوان
قصي:(بابتسامة)عارفو
فيروزة: كيفاش؟
قصي؛غير سيري دابا علمي داركم واخا
حركت راسها بواخا شد ليها طاكسي وتبعهها بطوموبيلتو شافها تا دخلت عاد قلب ضورة راجع لدارهم غيطير بالفرحة

المنتقبة الفاتنة 🖤✨
بقلم :ايمان التباعي 🖤
🖤تلك العيون الصغيرة كارثة لقلبي🖤🥀
الجزء6
وصلت للدار دخلت تجري لعند مها فالكوزينة لقاتها كتقاد فالعشا ومجمعة هي واشرف لي واقف كياكل فتفاحة
اشرف؛شنيولة جيتي
فيروزة:السلام عليكم ماما بغيت نهضر معك فشي حاجة ضرورية
نجاة:الله يسمعنا خير
فيروزة:اشرف تقدر تخليني انا وماما بوحديتنا
اشرف؛ مابغيتش .
نجاة:هبط جيب البوطة راه غتسكت
اشرف:ياك الواليدة باقا تديري ليا السبة بالبوطة
نجاة:يالله أولدي الله يرضي عليك
خرج مخليهم فراحتهم حطت دكشي من يديها جرت الكرسي جلست حداها
نجاة:دوي ابنتي خلعتيني
فيروزة:ماتخافيش مهم هانتي(سكتت حشمانة)
نجاة:ياتي دوي اناري
. فيروزة: واحد الولد بغا يخطبني
نجاة:هاااافرحيييييي
فيروزة:شششش واتي سكتي شوهتينا
نجاة: شكون هو هاد الولد كيقرا معك ولا شنو
فيروزة: لا اشمن كيقرا معايا هدا ولد البروف ديالي شافني تما وقالك عجبتو وبغا يخطبني
نجاة:وفاش خدام شحال عندو من عام سولتيه
فيروزة:اويلي اماما راه زرب عليا قاليا قوليها داركم نجي اهاد العشية
نجاة: اويلي على الهايشة اليووووم كي غيدير لها وهدي ،،6 العشية امتى بغا يجي هداااا وحنا مموجدين والو ومزال خالك مافخباروووالو ومالو على هاد زربة
فيروزة:ومعرفت اماما هدشي لي قالي
نجاة:نوضي نوضيي تگعدي وجدي راسك اراي طلفون نصوني لخالك ومراتو اراااااي
مدت لها طلفون تصوني اخوها هو لي مكفل بهم يعني لازم يكون راجل الدار فاش يجيو خبراتو بلي كاين وقالها نص ساعة ويجي ناضت زادت لحم على دكشي لي دايرا عاودات من جديد فيما هي مشات لبيتها صيفطات ميساج لامال تجي عندها مشات دوشت وصلات ورجعت تعاون مها
دخل الدار فرحان لقاهم جالسين مجمعين كيف عادتهم سلم عليهم وجلس جنبهم
غيثة:شفتك فرحان فرحني معك
قصي:وجدي راسك الالة غيثة غتخطبي ليا
احمد:(بابتسامة) هي درتيها وهضرتي معها
قصي:ههه اه صافي وافقات
غيثة:,بصح؟!!!!شكووون هدي علامن داويين
قصي: الواليدة بغيتني نتزوج وهاني غنتزوج نوضي لبسي حوايجك ويالله
غيثة:اويلي دابا فهاد الوقت مموجدين والو
قصي: غير نوضي وجدت كلشي قبل ما نوصل دزت خديت گاع دكشي لي غتحتاجي
غيثة:ولكن شرحو ليا بعدا
قصي:هااالواليد يشرح لك يالله يالله غنطلع نلبس عليا
تحرك لبيتو والابتسامة مفارقاتش وجهو دوش دقائق وخرج لبس كوستار رش بارفانو الرجولي قاد ساعتو ونزل لقاهم واجدين وطلعو طوموبيل فاتجاه دارها
كانت فبيتها لابسة عباية صلاتها وجالسة كتصلي صلاة الاستخارة حاسة بقلبها مطمئن ختمات صلاتها بالدعاء
فيروزة: اللَّهُمَّ إنِّي أَسْتَخِيرُكَ بِعِلْمِكَ، وَأَسْتَقْدِرُكَ بِقُدْرَتِكَ، وَأَسْأَلُكَ مِنْ فَضْلِكَ الْعَظِيمِ فَإِنَّكَ تَقْدِرُ وَلا أَقْدِرُ، وَتَعْلَمُ وَلا أَعْلَمُ، وَأَنْتَ عَلامُ الْغُيُوبِ..

اللَّهُمَّ إنْ كُنْتَ تَعْلَمُ أَنَّ هَذَا الأَمْرَ (هذا الزواج ) خَيْرٌ لِي فِي دِينِي وَمَعَاشِي وَعَاقِبَةِ أَمْرِي فَاقْدُرْهُ لِي وَيَسِّرْهُ لِي ثُمَّ بَارِكْ لِي فِيهِ..

اللَّهُمَّ وَإِنْ كُنْتَ تَعْلَمُ أَنَّ هَذَا الأَمْرَ (هذا الزواج) شَرٌّ لِي فِي دِينِي وَمَعَاشِي وَعَاقِبَةِ أَمْرِي فَاصْرِفْهُ عَنِّي وَاصْرِفْنِي عَنْهُ وَاقْدُرْ لِي الْخَيْرَ حَيْثُ كَانَ ثُمَّ ارْضِنِي بِهِ.
كملت دعائها جمعت سجادتها سمعت الهضرة برا عرفاتهم وصلو وخالها كيستقبل فيهم حطت يدها على قلبها شدتها توتر دخلت امال لعندها

لمنتقبة الفاتنة 🖤✨
بقلم :ايمان التباعي 🖤
🖤تلك العيون الصغيرة كارثة لقلبي🖤🥀
بارت7
امال:مزال ما وجدتي راسك

فيروزة،:وااجدة

امال؛اييي اصااحبتي شحال فرحت ليك تستاهلي والله اصلا كان باين انه تزعط فيك غير من شوفات لي كان كيدير فك دك نهار

فيروزة:سكتي اصاحبتي شداتني الخلعة

امال؛سكتي سكتي اشمن خلعة ياااربي تجيييب ليااا شي راجل فحالو ياااااربييي

فيروزة:هههه تحركي تحركي

شافت فالمراية راضية على راسها جمالها طبيعي مدايرا والو من غير كحل لعنييها لي زاد برزهم وايكخون دارت لتامها ولبست لباس عبايتها وخرجت عندهم جنب امال

هز عينيه كيشوف فيها مبقاش قادر يصبر هاد البنت فتناتو بعينيها وزادت دابا كتر وكتر جلست جنب خالها

احمد:بنتي فيروزة لباس عليك

فيروزة:(غتموت بالحشمة) بخير استاذ لهلا يخطيك

احمد:(ضحك) وااستاذ لهيه اما هنا قوليلي عمي حنا مغنبقاوش غراب على بعضنا ان شاء الله

رشيد:دكشي لي كاين اسيدي الله يجمع شملهم على طاعة الله

احمد:اوا سي رشيد حنا جينا طالبين فبنتكم لولدنا قصي على سنة الله ورسوله يلا قبلتو علينا

رشيد:اسيدي من عندي انا الله يكمل بالخير خاص غير يتافقو بيناتهم

رشيد:اش قلتي الالة

نجاة:يلا وافقت البنت ووافق خالها هو الوصي بعد باها الله يرحمو انا معندي ما نقول

اشرف؛ تا انا موافق

ضحكو كاملين عليه كان باغي غير امتى يوصل هاد نهار

غيثة:نخليوهم بزوج يهضرو مع بعضياتهم واش يتافقو ولالا

احمد:ايييه النظرة الشرعية ربي حللها

جمع الوقفة هو وياها معهم خالها حيت ضروري يكون شيحد من محارم دياولها دخلو لبيتها هي جر خالها الكرسي لي محطوط تما ضور عينيه على بيتها ماكبيرش بزاف ولكن زوين لمح مكتبة فيها انواع الكتب اغلبهم على علم النفس باينين غير من عناوينهم جلست على طرف الناموسية وجلس هو فالكرسي مقابل معها

رشيد:حيدي ابنتي نقابك

مدت يديها كتحيد فنقابها بقات غير بشال دقات قلبو كيتسارعو ظهرو ملامحها هزت عينيها شافت فيه شد فقلبو وترسمت ابتسامة كبيرة على وجهو خلاها تحشم وتنزل عينها تمتم باعجاب

قصي:,ما شاء الله

توردو حنيكاتها بخجل كتفرك فصبعانها بتوتر ملحوظ اول مرة تحيد نقابها قدام شيحد من غير محارمها

رشيد:انا برا هضرو مع بعضياتكم وشوفو شنو شروطكم

حرك قصي راسو بواخا استناه حتى خرج رجع كيشوف فيها بهيام تلفها هزت نقابها بغات ترجعو

قصي:خلييه متحرمينيش منك فهاد دقايق لي عندي

جمعاتو عندها منزلة راسها ابتاسم ورجع شاف فيها بجدية

قصي:,قوليلي شنو شروطك

فيروزة:انا عندي زوج شروط تخليني ناخد اجازة ديالي مابقى ليا والو والثاني مبغيتكش تقوليا شي نهار حيدي النقاب

قصي:(بدون تفكير ) موافق

فيروزة؛ونتا؟

قصي:(بابتسامة) انا معندي تا شرط ولكن خاص تعرفي واحد الحاجة

فيروزة: (بإصغاء) لي هي؟

قصي:انا خدام فلامارين وفمدينة اخرى يعني خدمتي كلها كتكون فالبحر اغلب وقتي تما معندك تا مشكل ؟

فيروزة:كيفاش زعما واش مكتجيش للدار بمرة

قصي:لدارنا مكنجيش يعني يلا تزوجنا غتمشي معايا لمدينة فين خدام

فيروزة:(بخوف)غنبعد على دارنا؟

قصي:اه ولكن الوقت لي توحشتيهم نجييبك عندهم ولا نجي نجييهم عندك فالمناسبات كذلك

فيروزة:(سكتات شويا عاد هضرات) عفاك واش تقدر تخلي ليا وقت نفكر

تبدلت ملامحو كان خايف من هدشي من لول خايف يلا متبغيش تبعد على دارهم وترفض

قصي:صافي واخا خودي وقت لي بغيتي

فيروزة: واخا انا نفكر ونرد عليك

قصي:واخا مرحبا

فيروزة؛نقدرو نخرجو دابا

قصي:اهاه يالله

جمعت الوقفة هزت لتامها وقاداتو سبقها هو خرج وخرجت موراه

لمنتقبة الفاتنة 🖤✨
بقلم :ايمان التباعي 🖤
🖤تلك العيون الصغيرة كارثة لقلبي🖤🥀
بارت8
الوقت كيفوت سيمانة دازت فيساع خدا كونجي لمدة 15 يوم كل نهار كيستنى جوابها كتجمعهم محادثات قليييلة خدا نمرتها ديك المرة معاودوش تلاقاو ولكن هو ديما مراقبها من وقتما يحطها طاكسي قدام الكلية تا كيرجعها تاني و قليل فاش كتهضر معه من غير صباح الخير فاش كتفيق وبالليل فاش كتبغي تنعس تجاوبو ماباغيش يضغط عليها ويسولها مخليها على راحتها واخا هدشي ممريحوش هو باغي يعرف جوابها النهائي و يتهنى خرج من دوش لبس شورط ديالو والفوق عريان تلاح فوق سرير مد يديه لطلفون مترقب ميساج منها فحال كل مرة هز عينيه للسقف ساهي ختى فيقو من سهوتو صوت طلفون تگعد مسند ضهرو على كادر سرير حك دوز يدو على شعرو بتوتر تسارعو دقات قلبو قبل ما يفتح الميساج توسعت ابتسامتو فاش قراها”انا موا فقة ” ضحك بصوت عالي دوز الخط ليها ثواني عاد جاوبات غمض عينيه من نبرة صوتها لي عشقها بقى ساكت حتى عاودات هضرت
فيروزة:الو واش كتسمعني
قصي:كنسمعك شكرا بزاف
فيروزة:(لا رد)
قصي:امتى تبغيني نجي باش نحددو وقت ضريب صداق
فيروزة: وقتما بغيتي معنديش مشكل
قصي:غنجي غدا
فيروزة:(بصدمة) غداا؟؟
قصي:علاش واش مبغيتيش
فيروزة: لالا
قصي:حيت انا بقات عندي غير سيمانة ونمشي بغيت نقاد كلشي
فيروزة:(سكتات شويا عاد جاوبات) واخا ياجي غدا ونتفاهمو على لي بغيتي
قصي:يكفي انني باغيك غير نتي
فيروزة:(بخجل) واخا تصبح على خير
قصي:(بابتسامة) تصبحي على خير
قطعت الخط حطات طلفون حداها وجهها ولا حمر مشي من هضرتو وانما من مها لي كانت فجنبها. هي واشرف وسمعوه حيت كانت زايدا صوت
اشرف:اتي مالك بقا ليك شويا وطرطقي
نجاة:هههه سكت على ختك
اشرف؛واهاد سيد عندك مجهد ياختي كيعرف يتعنب
فيروزة؛ماماااا هضرييي معااااه
اشرف: ياربي امتى يطيرك من حدايا خلااااااص
فيروزة:انا معندي فييين نطييير نهار نتوحش ماما غنجييييبهاا لعندييي
اشرف؛ياك وانا
فيروزة:سير عطيني تيييسااااع شبغيتييتك
اشرف: يااااك اوا عقلي
فيروزة:اجي اجي ازييين ديالي غير كنضحك معك
اشرف:عطييني تيساع قبل مانوض نرفسك سيري تعنبي على دك خطيبك
فيروزة:لهلاااا
نجاة:نوضو نوضو تنعسو غدا تابعانا شحال من حاااجة
نهار جديد
فاقت بكري هي ومها جمعو دار وخملوها جات حتى مرات خالها تعاونهم ماخلاو ما وجدو وصلات 10 سمعت دقان مشات تفتح بلا نقاب بلا والو يحسابلها اشرف لي جا حيت سخراتو نجاة ونسى مداش سوارت
فيروزة:شحال مرة قلتليك الحييماري متنساش سوارت واش انا غنبقى دائما نفتح لك
وسعت عينيها فاش بان ليها قدام الباب بقات مصدومة ثواني ومن صدمتها سدات الباب فوجهو شافتها نجاة وجات عندها
نجاة:اتي مالكي اناري لاش سديتي الباب هكداك على خوك
مخلاتهاش تكمل مشات تجري لبيتها فتحت نجاة الباب لقااتو واقف مصدوم رحبات به ودخلاتو للصالون فيما هو عينيه كيضورو يقلبو عليها منظرها وهي هكداك مبغاش يحيد من بالو غير دوك ثواني لي شافها فيهم بپيجامة والفولار خلات عقلو غايب معها
نجاة:مرحبا ولدي انوض نحط اتاي
قصي: لالا غير خليك انا غنمشي دابا جيت غير ندي معايا شيحاجة د فيروزة باش يقادو ليا واحد الورقة فالخدمة
نجاة:اهاه اولدي قوليا شنو خاصك انا نجيبهم لك
قالها شنو باغي ومشات بقى تما كيستناها على. الله تبان باغي يشوفها مرة أخرى دقائق قليلة ورجعت نجاة فيدها دكشي لي محتاج خداهم من عندها شكرها بغا يخرج وقفاتو
نجاة:ولدي قصي نقدر نهضر معك 5 دقايق من وقتك
قصي:مرحبااا
نجاة:نخرجو برا حسن
هزت شالها لواتو عليها وخرجو قدام الباب رداتو شويا شافت فيه بجدية فيما هو مترقب شنو باغي تقول
نجاة:سمعني اولدي انا فاش شفتك قلبي رتاح ليك وباينا فيك ولد الناس وحتى والديك الله يعمرها دار هدشي باين ومعنديش فيه شك هدشي علاش وافقت نعطيكم بنتي و انا مبغيييت منك وااالو غير تهلى فيها راه هي نور عينيا وراه غير على قد الحال ونية بزاااف مكتعرف والو باها لي كان واقف معها كانت ديما عوالة عليه فكلشي كانت قرببة ليه بزاف نهار مات تهرسات ليا جرحها من جهتو ما بغى يبرا هدا علاش اولدي ديرها بنتك قبل من مراتك تحط عليك الراس راه دابا معندهاش من غيرك وللاعمار بيد الله بغيت نشوفها مرتاحة فحياتها قبل ما نموت نتهنى عليها وخوها عارفاه راجل قاد براسو اما هي غير نية لي دوا معها تبكي عفاك اولدي تهلى فيها
قصي: الله يطول فعمرك تا تشوفي وليدات وليداتنا وغير كوني هانيا فيروزة غنديرها فعيني وميخصها تا خير كيفما هي محتاجاني حتى انا محتاجها وبزاااف اميمتي
نجاة:(بابتسامة رضى) الله يرضي عليك اولدي
قصي،: امين مهم انا نخليك حتال الليل ان شاء الله

لمنتقبة الفاتنة 🖤✨
بقلم :ايمان التباعي 🖤
🖤تلك العيون الصغيرة كارثة لقلبي🖤🥀
بارت9

وصلت 8 دالعشية نجاة واقفة على رجلها هي وخوها ومراتو باغين يكلشي يدوز على اتم وجه الماكلة واجد الذ الاطباق وجداتهم فلوسها ليكانت مخبياهم من نهار مات راجلها جبداتهم تصرفهم فهاد الليلة بغات تصيفط بنتها براسها مرفوع مشات لعندها فتحت عليها الباب كانت جالسة قدام المراية فجنبها امال مناقشة هي وياهاا
فيروزة:واااااللاااااا
امال:اوييلييي واش كاينااا شي عروووسة نهار عرسها مكدييرش مااكياااج واش نتي مريضة ولا مالك
فيروزة:مغنديريوش
امال:خالتي هضري مع بنتك
نجاة:عندها الحق افيروزة بنتي ديري غير شويا يطلع عليك سر العرايسات واخا نتي تبارك الله ممحتاجاهش ولكن لا بد منو
فيروزة:وياااك غنديير النقاااب
نجاة: واخاك ولكن مع العيالات غتحيديه ابنتي الله يرضي عليك
فيروزة:,صافي واخااا(شافت فامال) غديري ليا فحال مونكية غنتفك هنا خبارك يديوها
امال:تي غا تهناي
فيروزة؛يالله ديري نشوف
خرجت مخلياهم كيكملو ونزلت تاهي تكمل شغالها
لبس حوايجو فرحان و بزاف الفرحة كتبان من وجهو خرج هو وولاديه مع بعض من عائلتهم مشي بزاف ناس قراب فقط حيت فيروزة مبغاتش العرس طلبات حفلة صغيرة فضريب صداق وصافي هدشي كتباتو ليه ميساج من بعد ما خدا الوراق ديالها وقفو طوموبيلات قدام الباب بالكلاكصون خلاو گاع جيران كيطلو علاقتهم بهم محدودة العيالات كيصليو على نبي دخلو للداخل حطو رجال بوحديتهم والنساء بوحديتهم كذلك
غيثة:قوليلي حبيبتي فين يحطو هادشي
نجاة:اجي معايا لبيتها
تحركت هي وياها لبيت فيروزة وتبعو ليهم الكادويات دقات نجاة عليها ودخلو
غيثة:الصلا على نبي جيتي كتحمقي ما شاء الله عروستي الغزالة ولدي عرف يختار
نزلت راسها حشمانة نازل عليها سر العرايسات لابسة قفطان فبلوسيال وميكاب خفيف شافت فالكادويات لي كيتحطو فوق سرير بكمية كبييرة ابتاسمت كتشوف عدد من العابايات وبنقاب بعدة اشكال كانت متمنيى انها تلبسهم
نجاة:يالله ابنتي العدول راه وصل
قادات نقابها ولتامها لي كان فنفس لون القفطان وخرجت بزغاريت هز عينيه جاو نيشان فيها كانت كتبان ليه فحال الؤلؤة ابتاسم فاش جلست حداه كتفرك فصبعانها بتوتر عرف ان هاد الحركة فيها بعد اخذ ورد من العدول وموافقتهم بزوج
العدول:شحال عطيتيها فصداق اولدي
شاف قصي فباه مد ليه الغلاف المالي لي خلاه عندو خداه وعطاه العدول وتق الملبغ
قصي: وكتبت ليها ڤيلا فسميتها
خرجت عينيها فيه مكانتش كتوقع هدشي وفنفس الوقت مباغيااش بادلها بابتسامة عطاوهم العدول وقعو صافي واخيرا ولات حلالو تعالات زغاريت نزلو دموعها انتابه لها شد فيدها بخوف
قصي:مالكي شنو وقع
فيروزة:(ببكاء) والو
قصي:علاش كتبكي
فيروزة:تفكرت بابا كنت باغياه يكون معايا
قصي:انا معك من اليوم اننا راجلك وباباك وخوك وكلشي غير تيقي فيا واخا مسحي دموعك مبقيتش بغيت نشوفك كتبكي
حركت راسها بواخا مد يديه كيمسح فدموعها قبل مقدمة راسها بحب وشافيها بابتسامة عاد ر كبو لبعضهم الخواتم عاد غادرت الصالون لفين جالسين العيالات واالطرب الاندلسي مطلوق فالدار كاملة كانت كتبان حفلة راقية وفنفس الوقت بسيطة تليق بمقام العائلات بزوج تحط العشا داز الوقت عاد جا وقت الوداع لي بكاتو فديك اللحظة ما بكاتو غير بوحديتها تعنق فمها وتعاود مساخياش مقادراش تفارق معها
اشرف:(بحزن) واش صافي بصح غتمشي؟
فيروزة:(ببكاء) ياك كنتي باغيني نمشي وض دعي يجي راجل يديني
اشرف:مباغيكش تمشي اختي
عنقها كتبكي مبغتتش تفرق عليه لي يشوفهم يقول هدو مكانوش كيتفارقو
اشرف:عندك تنسايني
فيروزة:واش انا نقدر ننساك الحمق وقتما توحشتك غنهضر معك ولا اجي عندي
اشرف:تهلاي فراسك اختي
فيروزة:قرا مزيان عفاك ورد البال لماما رد البال لدوااها وبقى تهز ساروت مافيها لي يفتح لك كل مرة
شاف فقصي
اشرف:دي مراتك عفاك
ضحك الكل من غيرو هو لي عاقد حواجبو باغيه غير امتى يطلقها غير جاه خوها اما منعرف اش يدير له تما
نجاة:سيري ابنتي الله يرضي عليك
رافقها اشرف تا طلعت لطوموبيل
اشرف:تهلى فيها عفاك
حرك راسو بواخا وطلع ديمارا طوموبيل وتحرك من تما فاتجاه اوطيل

لمنتقبة الفاتنة 🖤✨
بقلم :ايمان التباعي 🖤
🖤تلك العيون الصغيرة كارثة لقلبي🖤🥀
بارت10
حلت لاڤاليز كتقلب شنو اتلبس مزال بنقابها بكلشي خرج من دوش مغير عليه لابس غير شورط كيف عادتو مبغاتش تلفت عندو شافيها مستغرب
قصي:مكاينش معانا شيحد غريب علاش مزال محيدتي لتامك؟
فيروزة:هءء غير بغيت حتى ندوش عاد نبدل عليا فخطرة
قرب ليها بهدوء شد فكتافها ضورها عندو برفق. كانت مغمضة عينيها بخوف وابحراج اكثر هز ليها لتامها حتى ضهر وجهها بقى ساهي فيها داك الميكاب جاها زوين ولي اتيراه كتر العكر لي فشنايفها بارزهم
قصي:حلي عينيك من اش خايفا
فيروزة:(بتوتر) مخايفاش
فتحت عينيها جاو نيشان فيه عاودات نزلااتهم هز ليها راسها باطراف صبعانو حتى رجعت كتشوف فيه من جديد
قصي:انا راجلك فهمتي ومن حقي نشوف هاد زين لي عطاني الله حشومة تحرمينو منو
توردو حنيكاتها بخجل ابتاسم قبل جبينها وبعد
قصي:دخلي تدوشي وغيري عليك
تحركت من حداه فيساع دخلت للدوش سورتات تكات على الباب حاطة يديها على قلبها حاساه غيسكت اول مرة تكون قريبة من شي راجل بهاد الطريقة تلفات حاسة بالفرحة وشداتها الخلعة فنفس الوقت
فيروزة:تهدني افيروزة معندك مناش تخافي هدا راجلك وحلاللك من حقو
خدات وقت دوشات فيه وقادات مسائلها لبست عليها وخرجت ملقاتوش هزت عبايتها لبساتها وقادات شالها سمعت الباب تفتح ودخل شافيها باستغراب
قصي:فين غاديا؟
فيروزة: حتى بلاصة ولكن ياك غنصليو
دوز يدو على شعرو مشات من بالو اصلا هو مكيصليش مرة يصلي مرة يقطع حاس بإحراج من نظراتو فهمت البلان بادلاتو بابتسامة
فيروزة:لبس عليك وياجي نصليو باش ربي يبارك لينا فهاد زواج
قصي:ولكن انا بعيد على الله بزاف افيروزة
فيروزة:حتى واحد ما بعيد على الله سبحانه وتعالى ورحمتو واسعة ربي قادر يغفر لك ذنوبك قدما كانت خاص غير توب وترجع له وتوكل امرك له وباذن الله غتكون عبد صالح وتحافظ على صلاتك
راحة كبيرة اعتاملت قلبو من هضرتها بقا واقف شحال متأمل فكلامها عاد تمشى للدوش دخل توضى ورجع لقاها فرشات سجادة وكنستنى فيه بابتسامة جا قدامها وباشرو فالصلاة احساس زوين بزاف اجتاحو وهي كذلك حتى كملو وقفتجمعت السجادة حست بيه قريب ليها بزاف شاد من كتافها بلعت ريقها ضورها عندو رجعت مقابلة معه
قصي:معرفتش شنو درت فحياتي حتى ربي لاقاني بك
قبل خدها بحب ورجع شافيها فك ليها الفولار حتى بان شعرها قدامو جرها لعندو محاوط خصرها مد يدو كيدوزها على حناكيتها شافها كيفاش خايفا وشنايفها كيترعدو
قصي:بلاما تخافي مغندير حتى حاجة حتى تكوني موافقة بقلبك مرتاح واخا؟
حركت راسها بأه وابتاسم عاود قبلها فخدها وبعد عليها ماباغيش يقرب لها بدون موافقتها خرج مخليها على راحتها جلست فوق سرير ماعرفت هادشي واش مزيان ولالا مزال متملكها الخوف من جهتو بغات تاخد شويا الوقت عاد تشوف شنو ايوقع حيدت عليها العباية لي كانت لابسة بقات پيجامة عبارة عن سروال وضوني طلقت شعرها وتخشات فبلاصتها تغطات غمضت عينيها حتى نعست
دازت حوالي نصف ساعة عاد رجع لقاها نعسات تمشة بخطواتو لسرير وتخشى حداها بقى حاضيها شحال مبتاسم كيدوز يدو على خدها مبعد شعر لي تزلع على وجها حالة فوهة فمها غارقة فسابع نومة نزل شويا واخد شنايفها بين دياولو بهدوء تان قبلها قبلة سطحية وتكا حداها طفى الضو ونعس

لمنتقبة الفاتنة 🖤✨
بقلم :ايمان التباعي 🖤
🖤تلك العيون الصغيرة كارثة لقلبي🖤🥀
بارت11
كملت صلاتها جمعت السجادة وفكت حجابها كتجمع فشعرها الفوق تفتح الباب ودخل شافت فيه بابتسامة قبل جبينها هاد ايام لي دوزو بزوج ما تبدل فيها والو سوى انهم رجعو لدار والديه كيضل نهار كامل غابر مع باه . حتال الليل عاد كيرجعو محادثاتهم قليلة رجعاتو مواضب على الصلاة تفيقو كل فجر يصلي ويرجع للدار يلقاها موجدة ليه كلشي يدخل يتوضى ويصليو بزوج ومع ذلك حسات براسها انها ولفاتو وتعلقت به اما هو راه تعلق بها من نهار لول لي شافها غير صابر حتى يحن قلبها

فيروزة:فيك جوع ننزل نجيب لك متاكل

قصي:لا غير خليك بغيت نهضر معك

فيروزة:خير ان شاء الله

قصي:غيعطولي فالخدمة غيخصني نمشي ومن بعد نجي نديك
تزير قلبها عينيها واحساس فشكل اجتاحها غرغرو عينيها

فيروزة:(بحزن )غتبقى بزااف؟

فرحة واعتاملت قلبو زعما ممكن تكون بداات كتحس بشي حاجة من جهتو؟,شد فيدها جارها معه لسرير جلس وجلسها حداه

قصي:غنرجع نديك معايا خصني غير نقاد شي حاجة باش تقدري تمشي معايا

فيروزة: صافي واخا

نزلت راسها بحزن كتهرب من نظراتو قربها ليه كتر جرها لعندو برفق حاوط خصرهاهز ليها راسها باطراف صبعانو تقابلت معه
قصي:عقلي غيبقى ديما معك بغيت اي حاجة ديرها تقوليها ليا انا تايق فيك لي خصاتك قوليها الواليد يجيبها لك متحشميش منو راه فحال باك صافي خلي طلفونك مفتوح غير نصوني عليك جاوبيني باش منتشوش عليك

فيروزة:علاش كتقولي هكداك ياك قلتي مغتبقاش بزاف

قصي: فيروزة قلتليك انه خدمتي صعيبة وخاصك تولفي هدشي ياك وانا راه غير نكمل نجي لك

فيروزة:يكون خير ان شاء الله

قصي:ان شاء الله

بقى شاد فيدها مزير عليها حط يدو كيتلمس خدها ميل راسو لعندها واخد شنايفها مقبلها ضاغط على خدها ختم قبلتو ماص شنافتها بلهفة عاد بعد مخليها قلبها علاين يسكت حنيكاتها تزيرو

قصي:امتى غتحيدي منك هاد الحشمة خلاص

فيروزة:(بتهرب) اا نا غنجمع لك حوايجك

قصي:(بابتسامة جانبية)غتبقاي حتى تسكتيلي قلبي

ناضت هربانة منو والضحكة على وجهها مشات تجمعلو حوايجو فيما هو دخل دوش دقائق وخرج لقاها حاطة ليه الماكلة وهي مكايناش جلس كياكل حتى كمل عاد ناض غسل وتوضى صلى وتلاح فوق سرير شاد فيدو طلفونو كيخرب فيه حتى دخلت

فيروزة:صافي كليتي صليتي؟,

قصي:اه

هزت براسها وتحركت جمعت دكشي هبطاتو ورجعت دخلت للدوش بدلت عليها وجات جلست حداه لاحظ توترها حط طلفون وشافيها

قصي:قولي شنو بغيتي

فيروزة: باش عرفيتيني بغيت نهضر

قصي:غير هضري

فيروزة:هو صراحة بغيت نطلبك

قصي:آمري

فيروزة:يلا كان ممكن فاش تمشي نجلس مع دارنا شويا حيت كيف شفتي انا غنبعد عليهم وبغيت نبقى معهم غير شويا دالوقت قبل ما نمشي

قصي:(بعد صمت),انا معارفش شحال غنبقى تما ولكن تقدري تمشي تجلسي معهم شي ايام وفاش نخبرك على نهار لي انجي رجعي قبل غتعيطي على الواليد يجيبك مشي تجي بوحدك واخا؟

فيروزة:(بفرح) واخاا كون هاااني
قصي: ولكن بشرط بقاي بعيدة على خوك
قوصت حواجبها شافت فيه باستغراب
فيروزة؛كيفاش مفهمتش
قصي: لي قصدت هو انه خلي بينك وبينو مسافة مكاين لاش داك تعناق بزاف
فيروزة:اويلي هداك راه خويا
قصي:عااارف ولكن فهميني انا راه راجل منبغيش نشوف شيحد قريب لك من غيري واخا يكون منعرت اش يكون غير فهميني
فيروزة:صافي وااخاااا واخا غنحاول
قصي: انا واحد الانسان عندو غيرة كبييرة على المحارم ديالو خصك تعرفي هدشي واخا؟
فيروزة:صافي واخاا.

قصي: هكداك الله يرضي عليك

ابتاسمت ليه وتقادات فبلاصتها باش تنعس و طفة ضو وجا حتى هو حداها بقا شويا الضو داخل من البالكون الهدوء كان محتل الغرفة وهوما مقابلين كيشوفو فبعضياتهم بلا حتى كلمة مد يدو لعندها فيما هي تصرفت مقربة له كتر وكأنها فهماتو حتى توسدت ذراعو جرها كتر حتى ولات مخشية فيه خاشي وجهو سامح لعبير شعرها يختارق انفاسو قلبها كيضرب بسرعة معرفتش علاش دارت وهكدا ولكن حست انها بحاجه لهدشي خاصة وأنها اخر ليلة له معها قبل مايسافر كيدوز يدو على شعرها مقبل راسها حتى حس بها نعست ضمها لعندو كتر ونعسو هكداك فاحضان بعضياتهم لاول مرة

لمنتقبة الفاتنة 🖤✨
بقلم :ايمان التباعي 🖤
🖤تلك العيون الصغيرة كارثة لقلبي🖤🥀
بارت12
توالات الايام فاتت 3 شهور ومزال ما رجع كل كل نهار كتستنى فيه حسات بفراااغ كبييير فاش مشى توحشاتو بزاف مزال ريحتو مبغاتش تفارق بالها من دك الليلة لي نعسو فحضن بعضهم مكانتش عارفا انها غتعلق به بهاد الطريقة دوزت ايام فدارهم على الله تبدل الجو شويا ولكن مقدراتش رجعت فيساع كل قنت فداك البيت كيفكرها فه ريحتو حوايجو اتصالاتو بها قلالت بزاااف كاين مرات لي مكيهضرش معها على سيمانة فهاد المدة علاقتها زادت قوات مابينها وبين شيخها وعدوزتها كيعاملوها على اساس انها بنتهم مشي كنتهم وتقربت منهم بزاف فالاصل هي فيساع كدخل الخاطر ولات كتمشي للكلية مرة مرة حتى خدات الاجازة ديالها تحت اشراف الاستاذ احمد نيت فرحو ليها كاملين وكانت كتمنى كون كان معها باش يشاركها فرحتها
كانت تقريبا 9 ديال الليل صونا وفتحت له الخدامة الباب ورحبت به
قصي:مكاين حد؟
الخدامة:لالة غيثة وعزيزي مشاو لعند شي استاذ صاحبو داير لولدو العرس وعارض عليهم
قصي: وفيروزة
الخدامة:فبيتها تعشات وطلعت تنعس
اومأ براسو وتحرك غادي طالع لعندها كا خطوة كيدير فها 10 باغي غير امتى يشوفها هاد 3 شهور دازت عليه وكأنها 3 سنين كان كيحاول ما أمكن يبقى على تواصل معها ولكن مقدرش خدمتو مكتسمحش له شاغلاه بزاااف ولكن معمرها مافارقات بالو فتح باب البيت ودخل ضور عينيه مبانتش له حتى سمع صوت الما فالدوش سورت الباب ثواني وخرجت لاويا عليها غير فوطة ممدخلتش معها حوايجها دايرا فبالها انها غير بوحديتها غير تلفتت تصعقت فاش شافتو قدامها للحظة جات فبالها انها غير كتخايلو تمتمت بصدمة
فيروزة:قصي!!
قصي:روحي
بدون شعور تحركت بسرعة لعندو تلاحت عليه معنقاه ناسيا راسها انها شبه عارية ضمها لعندو كتر وكتر مبادلها العناق تهزت حاطة يدها على خدو.كدوزها على وجهو كتحقق انها مكتخايلش ودموع فيعينيها
فيروزة:قصي جيتييي
سميتو لاول مرة يسمعها من فمها تخللت مسامعو بنبرتها الهادئة والبريئة خلاتو يبتاسم ب
قصي:جيت اروح قصي جيت
كتعنق فيه بلاما تحس وكيحس بملمس جسدها من تحت ديك الفوطة لي مبقى لها والو وتطيح عليها كيتحكك معه وعات على راسها عاد بعدت عليه شادة الفوطة بيد واليد لوخرا كترجع شعرها الفازگ لور مقدرتش توقف على رجليها بالحشمة ولكم منظرها هكداك كتبان بواحد شكل فاتن ومثيرة بلا قياس بلع ريقو وهوكيشوف فيها توترت من نظراتو
قصي:سيري لبسي عليك وياجي
فحال يلا عطاها الضو الخضر تحركت بسرعة هزت لي بان ليها ودخلت للدوش غير شافت شنو هزت ضربت على راسها بغباء پيجامة حد الفخاض هي باش كانت كتنعس فهاد الوقت ليكانت بوحديتها وكانت حاطاها على سرير مالقات مادير من غير انها لبستها وجمعات شعرها الفوق وكلت امرها لله وخرجت شافها هكداك زادت ما عليه شير بيدو لحداه
قصي:اجي
تمشات تال عندو جرها جات جالسة فوق منو طرطقت فيه عينها جرها عندو كتر خاشي وجهو فعنقها كيهضر بصوت بورشها
قصي: هاد ريحة بالضبط هي لي توحشت
فيروزة:علاش مكنتيش كتهضر معايا قلتي ليا غتمشي غير شي ايام وترجع بقيتي بشهورا مسولتيش فيا
عتابها له كيعكس اشتياقها هدشي فرحو كتر وكتر
قصي:مشي لخاطري والله راني عاودتلك.على خدمتي كيف دايرا
فيروزة؛صافي فهمت
قصي:(ابتسامة جانبية) توحشتينيي اممم
فيروزة:(بتهرب) غيكون فيك جووع
قصي:بزاااف
فيروزة:صافي انا غنوض نجيب لك الماكلة
جات تنوض ورجع جلسها
قصي: كلشي عندك
فيروزة: كيفاش
بلاما يجاوبها قلبها رجعت تحت منو مكالي بيدو بلعت ريقها وهي كتشوف فيه
قصي:مزال مابغى قلبك يحن فيا
فيروزة :(لارد)
هبط راسو لعنقها موزع قبلاتو تما خلاتها تغمض عينيها مستلسمة للمستو كانت عارفا انه غيجي ويدير هدشي ولكن مكانتش متوقعة اليوم يدو واخدة حريتها كتسارا فجسمها وكيتلمس فيها ملمسها الرطب من تحت ديك پيجامة شعرها لي.مزال فازگ قطرات ديال الما نازلين مع عنقها زادوها اثارة هز راسو تلاقو عينيهم بزوج
قصي:فتنتيني افيروزة وملكتي قلبي غير من عينيك

تتمة الجزء 12 :

مجاوباتوش كتافات فقط بابتسامة راضية على كلامو غاص فشنايفها مقبلهم بحب كبير متفنن فيهم متعطش لها بزاف تمادات يدو هز لها الپيجامة سالتها لها مخليها عارية يالله بغا يتهز باش يسقي عويناتو فجسدها رجعاتو لاوية يديها على ضهرو مخلياه خلاتو يتسطح عندها مانعاه انه يشوفها حركت راسها بلا حشمانة بلا قياس ضحك من وجها لي رجع حمر هااد الخجل ديالها كيزيد مابيه كيعشقها فاش كتولي هكدا
قصي:واااش مشي من حقيي نشوووف رزقييي
خشات وجها فعنقو كتخبى من نظراتو انفاسها لي كانو كيضربو فيه خلاه يغمض عينيه مستسلم لها نزل براسو لعندها وهي باقا مخشية فيه هكداك معارفاش ان كل لمسة من يدها كديرها بلاما تقصد راه كتاتيريه كتر وكتر جمع لها يديها الفوق بقبضة يدو ورجع كيوزع قبلاتو ونظراتو عليها فكل انش منها ملمسها الرطب وبشرتها الحليبة جسدها المتكامل لي يعشقو اي راجل ولكن هو عشقها هي كإنسانة قوصت حواجبها وبألم كبير كمشت عينيها مخليها تأوهت بألم أكبر دمعو عينيها قبل راسها بحب كبير مهدنها
قصي:(بفرح )صافي فاتت دابا نتي وليتي مراتي رسميا
سكت شويا حتى رجعت تقابلت معه من جديد تمتم بين شنايفها بهمس وصوت بورشها
قصي:كنبغيك افيروزة
مقداتش تجاوبو تخلط عليها الالم مع الحشمة والفرحة مع كلشي زيرت على كتافو معنقاه ا غطاها مزيان عاد حضنها لعندو وقلبو كيدق بالفرحة واخا مجاوباتو بوالو عارف انها مزال ماولات كتبغيه ولكن على الاقل كتحس بشي حاجة من جهتو فهاد المدة كاملة وانها سلمت راسها ليه برضاها هدشي كافي وفرحان له

لمنتقبة الفاتنة 🖤✨
بقلم :ايمان التباعي 🖤
🖤تلك العيون الصغيرة كارثة لقلبي🖤🥀
بارت13
غاديا جاية فديك الكوزينة بديك الپيجامة القصيرة شعرها مجموع كعكة مهملة فاتت 8 شهور دابا تحولت لدارها جديدة فمدينة اخرى كان صعيب عليها تولف فلول كان فينما يدخل يلقاها كتبكي على دارهم ولكن كان ديما معها حتى ولفت معمرو تشكى ولا مل من تصرفاتها بالعكس
مابقى له والو ويدخل وغيكون فيه الجوع يوماين ما جا للدار قادات العشا فوق طابلة لي كانت كتشهي شافت شنو بقى ناقص
فيروزة:اه عصير الليمون
تحركت كتاخدو وتجبد فالكيسان حتى سمعت حست بخطواتو لاوي ضراوعو على كرشها مقبل عنقها تلفت لعندو معنقاه
فيروزة:جيتي على سلامتك
قصي: توحشتك
فيروزة:حتى انا توحشتك
انتابهت لملامحو الهادئة كيبان عيان بزاف عينيه منفوخين حطت يدها على خدو كتحسس فيه بخوف
فيروزة: مالك واش عيان علاش عينيك منفوخين
قصي:عيان بزاااف افيروزتي
شدت من وجهو بخوف عينيها عمرو بدموع فيساع بدات تبكي
فيروزة:(ببكاء) قصي مااالك خلعتيني. واش نمشيو طبيب
حط يديه كيمسح فدموعها مقبل يديها ابتاسم من خوفها عليه
قصي:ششش متبكيش معندي والو انا غير عيان بالخدمة وراسي كيحرقني شويا وباغي نرتاح
فيروزة:حلف
قصي:هههه والله
فيروزة: واخا طلع دوش وصلي واجي تاكل ومن بعد نعسو باش ترتاح
قصي:واخا
قبل راسها وطلع يدوش وصلى صلاتو ورجع لابس غير شورط كيف عادتو جلس فالكرسي حطاات قدامو مسكن الام الرأس مدات له الما
فيروزة: خود هدو بعدا
قصي:مكنحملش دوا افيروزة والله غير عفيني
فيروزة: وااعفاااك غير باش ميبقاش يحرقك راسك
خداه من عندها قوص حواجبها محاملوش غير داير لها خاطرها ابتسامت وعاودات خداتو من عندو
فيروزة:يالله بدا تاكل دابا انا جاية
قصي: نتي مغتاكليش
فيروزة: لا مقديتش
قصي؛(بخوف) مالكي واش مريضة؟
فيروزة:(بنفي) لالا غير مبغيت ناكل
قصي:يلا مكليتيش مغناكلش
فيروزة:ولكن
قصي:يالله اجي
جرها من يدها جلسها فوق ركابيه لاوية يدها على عنقو
فيروزة:يالله كول
قصي:بغيت ناكل من يدك
فيروزة:قصي باراااكااا من الفشووش
قصي،:صافي مبغيتش ناكل
فيروزة: ههه صافي واخا
مدت يدها كتوكل فيه تحت مداعباتو لي فاش كيحشمها كتخبي وجهها فعنقو كمل ماكلتو كيبزز عليها تاكل وهي ماقادش حابسة راسها جاه اتصال من خدمة ووقفت جمعت دكشي غسلاتو وطلعت عندو للبيت لقاتو مزال كيهضر فطلفون دخلت للدوش بدلت حوايجها بديال نعاس ورجعت تخشات فبلاصتها جرها عندو وفيدو طلفون مزال فاتصالو غير شافتو كمل تگعدت من بلاصتها تقابلت معه
فيروزة:بغيت نوريك واحد الحاجة
قصي:شنو هي
مدت يدها لقجر لي حداها جبدت منو بواطة متوسطة الحجم مداتها ليه
قصي؛شنو هدي
فيروزة:فتحها
خداها من عندها فتحها قوص حواجبو قبل ما يتحولو ملامحو للصدمة شاد فيديه 2 صبيبطات دراري صغار واحدة فالغوز ولوخرا فزرق تمتم بصدمة
قصي:حاملة!!!
فيروزة:(بابتسامة ودموع فعينيها) ههه اه كانو فيا اعراض هاد يوماين ومشيت درت تحليل اليوم فصباح وطلعو اجابيين مبغيتش نقولك والو فلول تا تأكدت
قصي:(مزال مصدوم) دابا نتي حاملة غيتزاد عندنا ولد ولا بنت
فيروزة: خديت هدو بزوج معارفاش جنس الجنين ههه قلت نوريك بعدا
يالله كملت هضرتها حست به هزهااا كيضور بها فديك الغرفة وكيضحك بصوت عالييي وكيغوت بالفرحة حتى دوخها
فيروزة:قصي دخت هههه عفاك حطني
حطها فوق سرير مددها تما كيبوس فيها بفرح وجهالة وهي كضحك بجهد فرحتو باينا على جهد
فيروزة:مكنتي متوقعة انك غتفرح لهاد درجة
قصي: كيفااش منفرحش ونتي غتعطيني اكثر حاجة كنتمناها فهاد دنيا كنبغيك بزاااف والله
سكتت شويا ابتاسمت شدت وجهو بين يديها وقربت قبلاتو فشنايفو قبلة سطحية نطقت بلاما تبعد وسط فمو
فيروزة:حتى انا كنبغيك
وسع عينيه اخيرا اعتارفت ليه فرحتو دابا فرحتين جرها لعندو رجع هو المتحكم فالقبلة كيجر فشنافها بلهفة معبر على حبو وفرحتو انتهى بهم المطاف فأحضان بعضهم كيدوز بيدو على شعرها والابتسامة مفارقاتش وجهو
فيروزة:قصي
قصي:عيون قصي
فيروزة:يلا كانت بنت شنو نسميوها
قصي:(بعد صمت) شنو بانلك فجوهرة؟
تگعدت لعندو مقابلا معه حاطة يدها على صدرو
فيروزة:عجباااااتنيييي بزاااااف اييي غتجي زوينة قصي فيروزة وجوهرة
قصي:غتكوني نتي فيروزتي وهي جوهرتي بزوج بكم غاليين على قلبي
فيروزة: ويلا كان ولد انسميييه على بابا الله يرحمو ” وليد” (ديديكاس لحبي اميمة😌💚) ياك مكاينش عندك مشكل
فيروزة:ومعمرو غيكون
فيروزة:ايييي تحمست
قصي:(بخبث) حتى انا تحمست بزاااف دابا
فيروزة:لاياش؟
قصي:انا نوريك لاياش
زدحها معه مضور يدو على ضهرها العاري ووبيددو لوخراقلبها تحتو
فيروزة:(كضحك) حرام عليك مكتعياش
قصي:(هايم فيها) مكنعياش ومكنشبعش منك
خشى وجهو فصدرها ومعنقها كيداعب فيها فيما هي كضحك لوات يديها على عنقو مخلياه واخد راحتو فيها حتى كمل على خاطرو دخل يدوش غير خرج تلاح على سرير عاد دوشت تا هي دقائق وخرجت تاهي استلقت حداه حط راسو على صدرها ضاماه فحضنها خدات كتابها خاص بعلم النفس كتقرا فيه وفنفس الوقت كدوز يدها على شعرو حتى حست به نعس قبلت راسو بحب وكملت قرايتها والفرحة معتاملة قلبها عمرها كانت كتوقع انها غتزوج به وانها تهز طرف منو فكرشها حطت كتاب جنبها عنقاتو وابتاسمت بحب لنهاية قصتها

النهاية 💚✨