Skip links

قصة عاهرة الحي… ج 5

 4,212 عدد مشاهداات

الحلقة 101:
جبد باكي دخان نتاعه وهز واحد حطه بين شفافه يعدي فيه بلاما يشعله ويخزر بعيد .. جات صورتها بين عينيه من جديد نفخ .. مش فاهم علاه عمل لبارح هكاك على جالها ومش عارف علاه هي بالذات لي قاعد كل مرة ينحط معاها في مواقف كيف هذو .. حتى انو عصبيته تنقص قدامها ويلقى روحه يحاول يكبت غضبه جيهتها …
قلب عينيه ورجع شعله دخانه يتكيف فيه .. وقت لقى تليفونه يصوني هز يرد لقاه خالد ..
_جبل: وي ..
_خالد: وينك ..
_جبل: علاه ..
_خالد: محتاجك وين راك ..
_جبل: فلمول لي وسط المدينة قاعد فلقهوة لي مقابلاته ..
_خالد: اوكي راني جاي .. ماتمشيش ..
_جبل: صحاا ماتبطاش ..
علق عليه ونزل تليفون .. وثاني ربع ساعة كان عنده .. مد دراهم لمول طاكسي ومشى ليه جبد لكرسي وقعد مقابله ..
_جبل: خير ..
_خالد: لازمني دراهم ..
_جبل: شحال ..
_خالد: السلعة تاع لبارح ماقدرتش نبيعها كامل رجعت نصها لاميمة ..
_جبل: واه جات صباح عندي تحوس عليك ..
_خالد: واه جات عندي وعملت فضيحة .. بصح حسابها من بعد .. دوك لازمني دراهم ..تعرف خوها عقله مايخدمش .. مين يقول دراهمي يعني دراهمي .. وانا ماعنديش مين نجيبله …
_جبل: والله حصلتنا .. كون جبت سلعة لي رديتها عليها نعاودو نبيعوها ..
_خالد: ماتنباعش ..لبارح فرصة خاطر عرس ..ترشقلهم على زطلة دوك شكون يشري ..
_جبل: شحال دراهمها .. يعني شحال تسالك ..
_خالد: خمسة ..
_جبل: خمس ملاين .. راك في عقلك من وين تجيبها ..
_خالد: اذا مالقيت عليها كيش .. نسرق وصايي ..
_جبل: اياك .. راني نوصي فيك الا السرقة ولخيانة ..
_خالد: اعطيني حل مالا .. صباح طردتها وعطيتها واش كان في جيبي .. دوك نرجع للحومة نلقى خوها يستنى في دراهمه ..
_جبل: ونتا لبارح شاكنت تدير ..
_سكت وتذكر واش صرا بينه وبين رانيا لبارح ..
_خالد: والو .. شربت ورقدت ..
_جبل: ماعندي مانديرلك هرب وصايي حتى تلقى دراهم .. انا خمسة ماعنديش باش نمدهملك .. نقدر ندبرلك زوج .. وشوف نتا ثلاثة ..
_سكت وماعرفش شايدير .. تصكرت في وجهه ..
جبد كاس لقهوة من قدام صاحبه ترشف منه .. ورجع ركز معاه ..
_خالد: نتا واش تدير هنا ..
_جبل: وصلت ختي وصحبتها وراني نستنى فيهم ..
_خالد: مابان والو على لخدمة ..
_جبل: لااا صايي اخطينا ..
دور عينيه جيهة لباب وقت لمحها خارجة .. فلاول كذب عينيه اما طول تأكد منها وقت شاف ولدها في يدها ..
#نورااا🌹🌹🌹لحلقة 102:
بعد لعركة لي عملتها مع سومية .. هزت ولدها ومشات لرانيا انا بقات حاسة روحها مخنوقة .. خلتها وحدها ونزلت تحت .. وقفت قدام باب لمول هذاك وبقات تتفرج مع طريق .. لمحت كرسي على جنب مشات قعدت ليه وباقي تلعب مع ولدها ..
_بقى مركز معاها من بعيد .. مفهمش واش تعمل هنا .. ماحسش بخالد لي قاعد يعس فيه ..
تلفت ثاني شاف وين قاعد يشوف صاحبه ورجع شاف ليه ..
_خالد: نتا طحت على راسك ضربة وحدة ..
_جبل: اااه.. مفهمتكش
_خالد: نحكي على لي قاعد تعس فيها بعينيك ..
_جبل: مكان والو .. غير ستغربت من وجودها هنا ..
_خالد: المهم قولي دوك انا شاندير .. مين نجيب دراهم .. مااا مسكينة شي نهار يحبس قلبها بسبتي ولا تجيها جلطة ..
_جبل: الشراب لي ماحبيتش تحبسه سباب مشاكلك ..
_خالد: كون غير جات مشكلتي الوحيدة شراب ..
_يحكي معاه وثاني عينيه ورا يخزر معاها وقت عاودت هزت روحها ودخلت للمول ..
_خالد: نوض نوض .. نتا مدام عقلك مش معايا ماراحش تركز ..
_جبل: كيفاه .. راني نسمع فيك هدر ..
_خالد: نوض خلينا ندخلووو ..
_جبل: شاندخل ندير ..
_خالد: انا حاب نشري برفان ليا ..
_جبل: دراهم رضا لي ضيعتهم مكانش بصح لبرفان عندك دراهمه ..
_خالد: ههه لا نتا لي رايح تخلصه ولا علاه هازك معايا ..
_تبسم وضربه على راسه ومشاو مع بعض داخلين لتم …
لمحها وقت طلعت للطابق لي لفوق وين نسا .. مشى هو مع صاحبه لي بقى يحوس على لبرفان لي يستخدمه .. بعدها فد وشاف ليه يحكي ..
_جبل: شوي ونرجع ..
_خالد: روح روح .. كنت عارف فلاخير تمشي تلحقها ..
_جبل: مانبطاش ونجي .. ونحي الافكار هذو من راسك …
مشى مع درجات هذوك طالع بشوي .. حتى وصل لفوق .. ومن زهره اول وحدة لمحها سومية وهي ثانية وقت شافته حطت واش في يديها ومشات تجري جيهته ..
_سومية: جبل ..واش تدير في قسم النسا ..
ماعرفش واش يجاوب .. عدى يده على شعره وكمل يحكي ..
_جبل: جيت نشوف علاه بطيتو ..
_سومية: مابقاش ونكملو ..
كانت هازة لباس في يديها هزاته في وجهه تحكي ..
_واش رايك لونه مليح صح ..
_جبل: واه مليح .. بصحتك ..
جى يعاود ينزل يهرب منها شداته تحكي ..
_سومية: وين ماشي .. خليك معايا .. ممكن تتعود عليا وترجع تخدم روحك معايا ..
شاف ليها وحل عينيها مصدوم يعني تاع الصح ماتحشمش ووقحة في كلامها نطر يديه منها يحكي ..
_جبل: مشي متربية تاع الصح ..
نادين كانت داخل في غرفة تبديل وقت سمعت صوته برا .. فلاول كذبت اما وقت سمعت سومية تأكدت انو هذا هو معاها .. قربت من لباب راح تخرج بعدها ترددت خافت تتلاقاهم ويصرا مشكل بسباب بنت خالته ..
بقات واقفة داخل هكاك تستنى يبعدو باش تقدر تخرج .. اما حديثهم شدها وخلاها تركز معاهم ..
_سومية: علاه وقحة .. بلسانك قلتهالي لبارح .. ولا دوك وقت عاودتهالك رجعت عيب ..
_جبل: تاع الصح مريضة .. أخطيني ..
_سومية: هي صح .. هي لي عقلك معاها ..
_جبل: على شكون تحكي …
_سومية: كلامي واضح …ومش بعيد نتا هنا على جالها مش على جالنا..
_جبل: الله يهديك ..
_سومية: علاه تهرب من لحقيقة .. هي لي واقفة بيني وبينك .. أصلا لكل شافو شي هذا .. ونتا شديت يدها وعيطت وتغاضيت كلام امك ..
_جبل: وين حابة توصلي ..
ضكت وقربت منه تحكي ..
_سومية: نوصلك حاجة باينة .. حاجتي بيك ولا علاه قاعدة نذل في روحي قدامك ..
_حطت يديها على صدره ولي لتم بداو يخزرولهم ..
_جبل: لمي روحك شوي .. وماعندك وين توصلي .. دزها من جديد وهي عاودت طرطقت في وجهه ..
_سومية: ها قول بلي عقلي مع ثانية مشي ماعينيش فلزواج .. وماتقولش انا مانحرك فيك والو .. قول انا نتحرك وقت نكون معاها ..
نادين حلت عينيها على وسعهم وقربت راح تحل لباب وتوقفهم عند حدهم… ماعندهمش حق يحكو عليها من الأصل ..
اما كلامه طول وقفها وكمل على مابيها ودخلها في حيط ..
_جبل: اسمعي مالا …. خاطر نتي وجهك وجه الرخس .. ومرة هذي مانقولش بنت خالتي ..لا خاطرك وحدة ماتحشمش .. ولي تهدري عليها واه نيشان … نبغيها وتبغيني …. ومرضيتني لدرجة انو وقت نشوفك حتى وعريانة مايتحرك فيااا والووو .. دزها ورجع ورااا راح يمشي .. تصدم وجمد في بلاصته وقت لقاها مقابلاته تشوف ليه .. وجها حمر من الغش وعينيها معبيين دموع .. فشل ونهد .. خاطر تاع صح حس روحه رجع معاها للصفر…وين كان لبارح في نظرها الراجل لي حماها منهم كامل .. جى دوك وطبح كل شي فلما … ماعرف يقدم خطوة ولا يرجع ورااا .. الموقف هذا لا يحسد عليه وماعنده حتى تفسير … كلام سومية ستفزه وخلاه يحكي هكاك باش يغيضها … اما ماعملش حساب للشي هذا…
#نورااا🌹🌹🌹
آراءكم فلحلقاااات 😘😘😘الحلقة 103:
رجعت خطوات ورا بلاما تحكي كلمة … دخلت غرفة التبديل ونزلت تهز في ولدها .. تلفتت لقاته دخل وراها وصكر لباب ..
_نادين: واش تدير .. اخرج ..
_جبل: كلام لي حكيته من شوي .. مشي قصدي ..
_نادين: سمعت لي سمعته وفهمت لي فهمته ..ودوك اخرج ..
_جبل: نادين ..
_نادين: ماعادش تنطق اسمي بفمك .. للبارح كنت نقول الراجل طلع مليح ..وعاوني … ودوك قاعد تحكي في شي مامنوش وجود ..انا وقتاش قتلك نبغيك ..وواش هذي مرضياتك ..
سكت يحوس على كلمات يقنعها بيهم قبل ماتزيد لحالة تكبر ..
_جبل: حكيت هاك باش ماتبقاش تلحق فيا ..
_نادين: وانا واش دخلني .. سمعتي على تشوهلي فيها ..واش اذا هي مشات حكات لمك كلامك ولا حكات لحد من لحومة.. معنتها خرجتني انا عشيقتك وكلامهم صح ..
_جبل: نادين… ماعرفتش كيفاه نفهمك بصح مشي هذا لي باغيه انا .. يعني اففف .. افهمي ..
_نادين: بعد من طريقي ..
_تعدت جنبه راح تحل لباب .. كبس على ذراعها يحكي ..
_جبل: مزال ماكملتش هدرتي ..
_نادين: اطلقني ..
_جبل: صحا غلطت وراني مستعرف .. ماتبقيش كل مرة تلقي حجة باش تطلعيني فيها انسان مشي مليح .. كامل نغلطو .. وكلام قلته وانا معصب ماتحسبيهليش ..
نطرت يدها منه تحكي ..
_نادين: خليك بعيد عليا وخلاص هذا لي يكفيني ..
حلت لباب وخرجت لقات سومية في وجها .. قلبت عينيها منها ونزلت تحوس على رانيا ..
_رانيا: نادين يا خي وين كنتي قلبت لرض عليك .. خلينا نمشو ..
_نادين: تعملي مزية ازربي ..
_رانيا: واش صرا تباني مش مليحة ..
_نادين: والو هيا خلينا نخرجو ..
هزتلها راسها تبعتها خرجو مع بعض نازلين للتحت .. مشاو طول دفعو حق لغراض لي شراوهم وخرجو .. رجعت وقفت وطلعت راسها لقاته لفوق متركز على الدروج ويخزرلها ….
_نادين: الله لا تربحك ..
_رانيا: واش كاين ..
_نادين: هيااا ..
خرجت معاها ومشاو طول للمحطة يستنو فلباص يجي باش يركبو ويرجعو ..
الوقت هذاك خالد مشى لفوق لعند جبل .. لقاها واقف وجهه مايتفسرش ..
_خالد: شوف لبرفان هذي تهبل .. ياخي واش كاين .. واش صراا .. تسمع فياا ..
_جبل: والووو .. هيا خلينا نمشو .. تلفت يعيط على ختها جات تجري ..
_ريم: واه ..
_جبل: ترجعو ولا مزال ..
_ريم: مزال شوي ..
_جبل: اوكي راح نمشي عندي خدمة وحتى ترجعو وحدكم…
نزل وخالد يتبع فيه مافاهم والو ..
_خالد: شا صرا ..
_جبل:, والووو .. صرات عفسة قلقتني ..
_خالد: مكانش لي راه في مصيبة قدي وهاني قاعد نحوس على برفان .. على الأقل اذا مت نموت ريحتي زينة ..
ضحك جبل على كلامه ومشاو يخممو فلدراهم مين يجيبوهم …
#نورااا🌹🌹🌹لحلقة 104:
خرجو من المول هذاك ومشاو لكافيتيريا كبيرة ومشهورة وسط المدينة هذيك .. هازين شوي غراض شراوهم ..
_شيماء: الحال ليوم على غير لعادة ..
_ريم: واه قاعدة نشوف ..
وقفت قدام لكافيتيريا هذيك تخزرلها ورجعت شافت ليهم ..
_ريم: علاه جينا هنا..
_شيماء: عندي مدة حابة نجي ليها من وقت فتحت .. لي نعرفهم كامل جاولها .. خلي ندخلو نعملو فطوات ونحطهم فلانستا ..
_ريم: شيماء يعني من كامل ماعجباتك غير هذي ..وزيد دراهم ماعندناش لي يكفو باش تاكلي فيها ..
_سومية: ادخلو وخلاص راه عندي حسبة مليحة ..
خذات نفس ودخلت معاهم ماحبتش تزيد ترفض وتخليهم يشكو ويحوسو يفهمو علاه مش حابة تدخل ..
_ختارت هي طاولة في طرف وين حد مايقدر يشوفهم ..
_شيماء: بلاصة هذي مش مليحة ارواحو هنا ضاوية ويخرجو تصاور يهبلو فيها ..
_ريم: شيماء..
_سومية: عندها الحق خلي نبدلو لبلاصة ..
تبعتهم فوق من قلبها وقعدت وكل شوي تتلفت خايفة تصادفه هنا …
الوقت هذاك جاو خذاو طلباتهم وخلوهم يحكو مع بعض ..
شيماء هزت تليفونها لقات امها تعيط .. علقت عليها ماتحبش تضيع مزاجها لي راه مليح …
#نورااا
قاعد مقابل لحسابات فوق من قلبه … وكل شوي يجبد تليفونه يكونيكتي ويرجع يتبسم وحده ويعاود يكمل يحسب حتى حس روحه فد .. خصه شي جديد يعمله يمتعه ..
جبد لكرسي ورا ومشى وقف مقابل الشباك يخزر للتحت … شوي وستقرو عينيه على طاولة لي قاعدة فيها …
رجع يضحك مش مصدق انو رجع لقاها … صكر عينيه وعاود ثبت في ملامحها لقاها هي صح …
مشى يزرب هز تليفون وحكى مع واحد من الخدامة لي لتم …
_طلع يزرب هذاك عنده دقدق على لباب جاه صوته من ورااا ..
_فيصل: ادخل ..
_دخل النادل هذاك ..
_تفضل مسيو ..
_فيصل: قدم ..
قرب جيهته والثاني عمله اشارة بيده للتحت ..
_فيصل: هذوك لبنات لي قاعدين فلطاولة هذيك ..
_واه .. من شوي جاو ..
_فيصل: واش طلبو ..
_مدله النادل هذاك ورقة من لي طلبوه ..
_فيصل: صحاا اسمع لحاجات هذو لي طلبوهم .. اعطيهم من شي الغالي منه ..
_كيفاه ..
_فيصل: كيفاه هذي كيفاه .. اعمل واش نقولك ..
_مسيو بصح مش هذي طريقة خدمتنا … بوك حريص فلحاجات هذو ..
_فيصل: بويا ماراهش هنا ..ولي موجود هو انا .. مالا خاف على روحك واعمل واش قتلك …
هزله هذاك راسه وخرج .. وخلاه هو واقف من لفوق حاط يديه في جيوبه يتفرج فيها ويضحك …
_فيصل: خلي نشوفو دوك من وين تجيبي دراهم باش تخلصي …
شوي وجاو حطولهم طلباتهم …
شافت شيماء للطاولة وعينيها نحلو على وسعهم …
_ريم: واش هذا نتوما طلبتو هذو كامل ..
_شيماء: لا بصح مفهمتش .. كيفاه جابولنا حاجات خلاف ..
_سومية: كولو وخلاص … ماراحش نقدرو نقولهم يرجعو ..
_ريم: لااا صبروو ..
_شيماء: واش كاين ..
_ريم: ماتاكلوش .. مانقدروش ناكلو وحنا مشي عارفين شعال حقهم .. لبنات فيقو وركزو معايا … مكانش دراهم وماكلة هذي تبان غالية .. شوفو الشوكولا هذي غير ريحتها تحسيها بلاوي ..
_سومية: خلاص انا دوك حطوهم مانقدروش نرجعوهم ..واذا لقيناه غالي نقولوله بلي هو جابهم حنا ماطلبناهمش ..
هزت شيماء وسومية ياكلو ويحكو وهي ساكتة وشادة قلبها .. حاجة داخلها تقولها راه شي هذا مايبشرش بلخير وانو كاين حكاية .. مستحيل النادل هذاك يغلط في طلباتهم …
#نورااا🌹🌹🌹لحلقة 105:
هزت صاكها حطت فيه دراهمها .. وجبدت جلابتها لبستها ورمات خمارها على راسها وخرجت صكرت لباب بلمفتاح وطلعت لعند خيرة .. طبطب وتعاود وثانية مابطاتش وحلت عليها ..
_خيرة: سميحة صباح لخير ..
_سميحة: هياا معايا ..
_خيرة: وين .. دقيقة خليني نفهم ..
_سميحة: هيا ماعنديش وقت خلينا نروحو عند شوافة هذيك لي حكاتلنا عليها نورية قبل مايرجع جبل وريم …
_خيرة: راكي متاكدة ..والله لبارح خممت ونعلت شيطان ..
_سميحة: امشي قدامي .. رجلي على رجلك .. وراح نكركر نورية معانا تكون تعرفها مليح .. خاطر انا اول مرة وراني خايفة نتردد ..
_خيرة: موحال تقبل تجي معانا ..
_سميحة : تجي غير تبعيني …
_خيرة: صحاا دقيقة نلبس ونجيك ..
شوي وكانو تحت فلحومة .. مشاو طلعو مع الدرجات هذوك حتى وصلو للطابق لي لفوق .. الوقت هذاك بشرى قاعدة تسيق في عتبة دارها ..
اول ماشافت سميحة واقفة في وجها خافت والدم جمد فيها ..
_بشرى: خالتي ..
_سميحة: مارانيش خالتك وبعدي من طريقي ..
_هزت بشرى روحها ورجعت وراا تبلع في ريقها .. والثانية بقات تطبطب في باب جارتها وترجع تقحرلها ..
_نورية: صباح لخير ..
_دزو الباب ودخلو يحكو ..
_سميحة: هيا معايا ..
_نورية: وين ..
_خيرة: عند الشوافة لي تعرفيها ..
_نورية: يوووه على عقايبي حابين تجرجروني عند الشوافات .. يالطيف .. من مانتحركش ..
_سميحة: انا وراسك غير تجي معانا …
_خيرة: هيا نورية … رانا جورة ..
_نورية:لا لا .. غير روحو بلا بيا ..
_سميحة: والله نورية وماتجيش معانا غير نخلي حومة كامل تسمع بيك وبلي تعرفي شوافات ..
_نورية: هذي آخرتك يا سميحة … تهددي فيا ..
_خيرة: هيا نورية راهي تضحك معاك .. البسي وخلينا نمشو ..
_قلبت عينيها منهم وناضت تحوس على جلابتها تلبسها وتسب فيهم بين شفافها …
_نورية: الله لا تربحكم راح تبهدلوني .. يالطيف واش راح يصرا اذا طلقت جنونها عليا .. رجعت تسمي وكملت لبست في رجليها وخرجت ليهم ..
_نورية: هياا نوضو .. ومن ليوم تنسو نورية …
_خرجو مع بعض ونزلو للتحت .. طريق كاملة وهوما ياخذو ويعطو مابينهم فلكلام ماشبعوش حتى وصلو للبناية لي عايشة فيها …
_خيرة: واش نورية .. وصلنا ..
_نورية: واه هاي ليكم لبناية نتاعها ..
تلفتت راح تهرب لحقتها سميحة شدتها تجر فيها ..
_سميحة: قتلك رجلي على رجلك .. نتي عندك خبرة وتعرفيها .. تحركي قدامي ..
_نورية: اطلقوني نفهمكم صحا ..
_خيرة: واش كاين ..
جبدت روحها منهم ترد فلنفس وتحكي ..
_نورية: راهي تسالني دراهم ..
ضحكت سميحة تحكي ..
_سميحة: قتلك نتي لفعة بصح انا كثر منك ونعرف خرايبك .. ماتجيش تلعبي عليا وتقوليلي مامشيتش لعندها ..
_نورية: للضرورة احكام ..
_خيرة: وعلاه رحتي عندها يا لالة ..
_نورية: مش على جال بيلسان … بيلسان تزوجت خاطر زهرها طرطق وحده … رحت على جالي كانت عيني في بو نسيبي .. ساعة مات ماعرفت انا ماخدمتش خدمتي نيشان ولا مكتوبه ..
_سميحة: كليتي راس الراجل حتى قتلتيه ..
_نورية: بعيد الشر مات وحده خاطيني ..
_خيرة: صحا ودوك تجي معانا ولا لا ..
_نورية: قتلكم تسالني دراهم .. مين مات حلفت مانخلصهاش ..
_سميحة: صحاا تحركي دوك انا نخلصها في دينك ..
_نورية: صح ..
_سميحة: واه غير امشي ..
_كبست على صاكها وعدلت روحها تحكي ..
_نورية: مالا تبعوني ..
#نوراااا🌹🌹🌹
حلقة للضحك شوي 😂😂 اتفاعلووو شوي ونحطالحلقة 106:
اول ماوصلو للحومة مشاو طول طلعو لفوق .. رانيا كانت حاسة روحها تاعبة دخلت لدار هم ونادين ثانية دخلت حطت ولدها على جنب وقعدت على طرف سرير تحرك في رجليها بعصب .. غايضها تصرفه لي مشي في محله .. كل مرة يعمل حاجة يخليها تكرهه كثر وكثر .. مرة تقول حمد لله كاين ناس ملاح .. بعدها طول يمحي صورة لمليحة لي هزتها عليه ويحط بلاصتها صورة خلاف .. دوك نسات واش عمل لبارح على جالها وعلق في راسها غير لي حكاه صباح فلمول ..
_هزت يدها حلت شعرها فرداته ونحت لجيلي لي كانت لابستها … وجبدت صاكها … حلت بوشاتها تشوف فلدارهم .. بقى قل من مليون .. يعني اذا كثر يشدها شهر ولا نص شهر ….لدوك مالقاتش خدمة ..وحياتها ماشية بلا هدف …
نحت صباطها وتمددت جنب ولدها حضناته وبقات تحكي داخلها …
_نادين: فكري نادين فكري .. لازم تلقي شي تشغلي روحك بيه ..ويكون مصدر رزق ليك ..
هزت تليفونها وسجلت رقم مرت سلفها وبقات تستنى شوي وردت عليها ..
_سامية: وي ..
_نادين: سامية .. هذي انا نادين عرفتيني ..
_سامية: واش تحتاجي ..
ستغربت من طريقة حديثها .. ورجعت قربت تليفون تحكي ..
_نادين: واش كاين ..
_سامية: نتي لي تقوليلي واش كاين ..
_نادين: واش كاين ..
_سامية: حاطة عينك على راجلي يا لالة ومشي حاشمة ..ومحرشة صاحبك فيه ضاربه ..
_نادين: هو حكالك هاك صح ..
_سامية: كون مشي زيرته مايحكيليش .. حشم يحكيلي على تصرفاتك … الله يهديك .. انا حاطاتك كيف اختي ونتي تطعني فيا ورا ظهري ..
_نادين: مشي صح اسمعيني ..
_سامية: واش نسمع … واش بقى ينحكى ..
_نادين: راجلك يكذب .. هو لي جى لحومتي ..وقاعد يهدد فيا … حتى انو طلب مني يتزوجني ..
_سامية: يتزوجك .. ههه سمحيلي بصح نتي مريضة ..كيفاه يتزوجك .. حمزة يتزوجك نتي ..
_نادين: نعرف ماراحش تصدقيني .. خاطره راجلك .. كنت راح نحكيلك قبل وعرفت راح تصدقيه هو ..والله سامية صدقيني علاه نكذب عليك ..
_سامية: الله يلعنك .. نشالله تبقي حياتك مرمدة .. يا كذابة..
علقت عليها قبل حتى ماتكمل تبررلها موقفها ..
خلتها مشوكية .. يعني كل لي عمله هو فيها وفلاخير عمل سيناريو خرج فيه روحه الضحية وهي لي مش مليحة …
مرات من درجة انو نحسو رواحنا نظلمنا ..ومش قادري نبررو ولا ندافعو على رواحنا خاطر مكانش حجة بين يدينا ..تلقي روحك وحدك كتفيتي بلصمت.. تحسيه الوحيد لي يريحك من كل شي …
وهذا شئ لي كانت تعيش فيه نادين وقتها .. ماعندهاش دليل باش تخلي سلفها ينكشف على حقيقته ..ومرته مستحيل تصدقها .. حتى وتشك انو صح … تكذب على روحها وتخاف تواجه حقيقة راجلها …
هزت كاس ما شرباته … ورجعت حطت راسها على لمخدة وجبدت لحاف ليها ..وحطت يديها تحت خدها تخزر لولدها وساكتة .. ممكن الشي الوحيد لي حتاجاته فلحظة هذيك هو الهدوء .. الهدوء لي ماتعمه حتى فوضة …
#نوراااا🌹🌹🌹
تلحق 100 جام نحط لي بعدها … تفاعلوووو 🙄الحلقة 107:
خزرت فيها ورجعت تحكي ..
_شيماء: علاه ماراكيش تاكلي ..
_ريم: ماعينيش .. هيا ازربو خلونا نمشو .. عندي دروس نراجعهم ..
_شيماء: صحاا دوك نمشو .. صبري ..
_ريم: هيااا والله بطينا عندنا نص ساعة هنا ونتوما تاكلو بشوي ازربو ..
_سومية: ياخي شحال نكدية .. مين هام كون ماخرجتيش ..
_قلبت عينيها منهم وجبدت تليفونها تحوس اذا كاش مارسللها .. كون صح راه هنا راح عمل حاجة ..ولا علاه يبقى ساكت .. رجعت شافت فلمااكلة لي قدامها تخمم وتحكي داخلها …
_ريم: زعما هو ورا شي هذا … واش راه يخطط …
واقف لفوق وباقي يتفرج معاهم ويشوف مع الوقت …
شوي وحس عليهم بداو يلمو في غراضهم باش يمشو ..
خزر للمرايا عدل شعره ومشى خرج نازل ..
_سومية: شحال جاونا خويا …
_3000 ختي …
_سومية: كيفاه مفهمتش ..
عضت ريم لسانها ..وعرفت انو هذا كل شي تخطيطه هو …
_شيماء: ماعندناش دراهم هذو خويا .. ديجا لغراض لي طلبناهم مايفوتوش 500 كيفاه هذي 3000 ..
_عطيناكم واش متوفر عندنا …
بقات ريم واقفة تلعب بصاكها. . ورجعت نطقت تحكي ..
_ريم: والحل دوك …
_فيصل: خليهم على حسابي ..
تلفتو للثلاثة على صوته .. جات عينها في عينه قحرتله ورجعت تغلي …
_شيماء: شكون نتا ..
_ماردش عليها قرب هز شاف حسابهم شحال وحط 3000 هذيك قدام النادل لي بقى يخزرله مستغرب …
_سومية: سمحلنا خويا بصح شكون نتا باش تخلص في بلاصتنا ..
شاف لريم وكمل يحكي ..
_فيصل: خلو ريم تحكيلكم شكون انا …
بقات ساكتة وشوي ورجعت مش قادرة تشد روحها كثر …
مشات لطاولتها هزت لصحن لي فيه طرف لباتيسري نتاعها ..ومشات جيهته طول تحكي ..
_ريم: حسابك دفعته ليهم مشي ليا … وهاك هذي حرام ترتمى ونتا مشي دافع حقها ..
بقى يشوف ليها وضحكلها ضحكه صفرا ..
_سومية: ريم تعرفيه شكون هذا …
ماجاوبتهاش وقربت منه طبعت صحن هذاك على تريكوه لي لابسه ..وخلت لي لتم يضحكو ويركزو معاهم .. حتى كاين لي بدى يصور … قربت منه تحكي ..
_ريم: حبس من التصرفات السخيفة هذو .. ماعندك وين توصل معايا ..
كركرت صحبتها وسومية وجات خارجة وقفها يحكي .. وهاز لي سارفيات يمسح بيهم على تريكوه
_فيصل: واش نستنى من وحدة بنت حومة تاع خماج … أكيد هذا واش علموكم .. ماتعرفوش ذرة الاحترام ..
_ريم: تربية خليتها ليك .. بصحتك بيها ومرة الجاية نعطيك للوجه ..
خرجت وخلاته واقف يضحك حتى انو لي لتم ستغربو منه .. تقول مريض نفسي ..
_النادل: واش نعملو دوك مسيو ..
_فيصل: ماتدير والو …ولي صرا دوك مانحب حد يسمع بيه … حتى بويا ..
_طلع لفوق ورجع ضرب لباب وطاح فلبيرو يضرب فيه برجليه ..وكمل عدى يده على وجهه يحكي ..
_فيصل: راح ندمك عليها .. وليام بيناتنا ..
رتمى على لكرسي وجبد تليفونه ركز معاه وراسه فيها .. كلما يقول راح يلقى شي يكسرها بيه ترجع توقف في وجهه وتخليه يخرج الخاسر ..
#نورااا🌹🌹🌹
طفاااعلووووالحلقة 108:
قاعدين مقابلين الحومة ويتكيفو …
_خالد: واش نديرو دوك …
_جبل: ماعرفتش .. نتا حطيتنا فلموقف هذا ..
_خالد: دوك لي صرا صرا .. لازمني دراهم مين نجيبهم ..
_جبل: وين نعرف عليك ..
_خالد: اسمع هذيك نادين .. مشي رانا نسالوها ..
_جبل: نتا مابانتلك غير نادين من هذا كامل … زعما صباغة شحال راه تجيك ملايين .. حتى وتعطيك حقها راح يبقى رضا يسالك بزااف ..
_خالد: صح .. بصح معليش خلي نلم من ومن ..
_جبل: تحب تطلب دراهمك هاي قدامك .. انا مانحتاجش ….
_خالد: نتا تخدم باطل انا لا …
_جبل: هذا اذا قدرت تدخل للحومة ومن بعد ساهل ..
_خالد: المهم زوج ملاين لي حكيتلي عليهم دبرهم وانا ندبر 3 ولبااقي ساهل …
_جبل: صحاا تهنى ..
هزله راسها وناض ماشي جيهة الحومة .. اول مادخل بقى يترقب فلحالة كيفاه .. اذا رضا لتم ولا لا .. ووقت مالقى حد فرح ودخل يزرب .. طالع وقفاته من لفوق تحكي ..
_اميمة: خالد .. .تلفتلها وطلع راسه لمحها من لفوق .. عمللها بيده واش ..
_اميمة: الدراهم .. هزتله يدها بمعنى الوقت ازرب ..
_قلب عينيه منها ودخل للبناية هذيك …
طلع مع درجات هذوك حتى وصل لدار نادين ..
بقى شوي يرتب في كلامه .. خاطر فلاول حط في راسه ماراحش يخلص عليها اما دوك لازمني دراهم ..وكل دورو بقيمته ..
حط يده على لباب يدقدق عليها .. شوي وحلت عليه كانت هذاك وين فاقت من لنوم ..
_نادين: خالد .. تفضل ..
_خالد: ديزولي اذا جيت في وقت مش وقتو .. اما حاجتي بدراهمي ..
دخلت بعضها وحشمت ..
_نادين: لا نتا لي تسمحلي ..كنت حكيت مع رانيا تسقسيك شحال باش نعطيك دراهمك …
_خالد: معليش أصلا انا دوك حتجتهم ..
_نادين: اوكي دقيقة دوك نجيك ..
مشات جابت بوشاتها ..وسقساته على حق خدمته شحال ..ورجعت تجبدله فلدراهم ..وهو مركز معاها حتى وسوسلها شيطان ..وبداو افكار يجوه .. وقت شاف لخاتم لي في يدها .. يبان غالي ..
كيما عمل يلعن فلشيطان وشي ..
_نادين: تفضل ..
شد عليها دراهم وعينه مزال عالقة فلخاتم ..
هزهم عليها وطلع طول لفوق للدار ..
_خالد: واش قاعد نخمم .. سرقة مش حل اذا رجعت سرقت راح نتعود …
نحى تريكوه ومشى طول للدوش باش يرتاح ويزيد يخمم كثر من وين يجيب الدراهم الباقيين …
جبل هو الثاني .. بعدما كامل ڨاروه عفس عليه ومشى دخل للحومة ..
لمح بشرى من بعيد تعس فيه .. ماحبش يركز معاها طفاها وعمل روحه ماشافهاش ..
دخل للقهوة وقعد قاعد .. وجماعة لتم وقت شافوه بداو يتهامسو عليه .. على لي عمله لبارح .. حتى فد منهم وخرج طلع للدار .. لي فيه يكفيه وزايدينه هوما ثاني ..
طبطب على لباب ماحلوش عليه عرف حتى حد فلدار ..قلب على لمفتاح في يجيبه مالقاهش ..
نزل يسب بين شفافه .. جبد تليفونه لقاها يصوني وهي تعيط ..
_جبل: شاكاين ..
_بشرى: نحب نحكي معاك .. معليش تجي ..
_علق عليها …هو هاك ولا هاك ماعندهش وين يقعد خلي يطلع عندها منها يرتاح شوي ويشوف واش خصها .. كركر روحه ماشي جيهة بناية نتاعها ..
#نورااا🌹🌹🌹
تفاااعلوووو 🤗🤗🤗الحلقة 109:
قعدو متضاربين مابين بعضهم شكون طبطب لولا …
_خيرة: ماتدمرونيش لولا .. هاي نورية هي طبطب ..
_نورية: خلاص سكتو .. دوك انا ندق ..
قربت يدها حطتها على لباب دقدق بشوي … وبقاو يستنو .. دقايق ونحل لباب في وجهم ..
_نورية: راهي هنا ..
_صمدو: شكون ..
_نورية: مرتك راهي هنا .. قولها جماعة جاو ليك ..
بقى يخزر فيهم من لفوق للتحت ..ووقت ماعجبوهش عوج فمه ..
_صمدو: قعدو هنا دوك نعطيلها تجيكم ..
_نورية: داير كلحلوف ..وزيد ماعاحبه عجب ..
_سميحة: اششش دوك يسمعك ..
_بقاو واقفين يستنو شوي وجاتهم امينة تحكي ..
_امينة: تفضلو ..
دخلو وراها يتبعو فيها .. دخلتهم للغرفة نتاع العادة وصكرت لباب ..
_امينة: اقعدو ….
قعدو فلفراش مقابلينها ..
_امينة: تفضلو واش حاجتكم ..
_خيرة: مراة هذي مسكينة .. ولدها راهم دايينهلها نسا .. ومضيعينله حياته وباغياته ينهدى وشكت عاملينله حاجة …
_سكتت امينة ورجعت شافت لنورية ..
_امينة: ونتي ..
_نورية: لا انا غير جبتهم ليك .. انا لي قتلهم عليك ..وبلي خدمتك متقونة ..
_امينة: وقتاش ناوية تعطيني دراهمي ..
_نورية: راني نقارع في عقارك يصدق ..ونجيبلك دراهم ..
_امينة: عام .. مشي بزااف ..
_نورية: زهري راه عاد جاي فلطريق واش بغيتيني ندير ..
_قلبت عينيها منها وشافت لسميحة تحكي ..
_امينة: واش بيه ولدك احكيلي ..
_سميحة: ماخصني والو .. غير حاجة تخليه يكره نسا هذوك كامل ويحب بنت خالته ..
_امينة: ماعلاباليش اذا شي لي تحوسي عليه عندي .. بصح راح نعملك وحد دوا .. حطيهله للماكلة ويرجع يشهد بيها ..
_سميحة: من فمك لربي .. هذا واش متمنية ..
_امينة: اعطيني اسمك الكامل واسم ولدك .. واسم بنت خالته ..وارجعي بعد يومين تلقي خدمتك واجدة …
فرحت سميحة وشافت لخيرة توشوشلها ..
_سميحة:احكيلها على بنتك نتي ثاني ..
_خيرة: لا خلي نشوف اذا صدقت معاك راني نرجعلها …
_كملت مدتلها اسمها واسم ولدها وبنت ختها ..وخرجت مع نورية وخيرة راجعين للحومة ..
_نورية: سميحة وخيرة .. عملتلكم واش حبيتو … ودوك كيفي كيفكم .. انا مشيت للشوافة ونتوما ثاني .. نلقى حد يحكي عليا راني ننشركم ..ونخبر جبل ولدك هاني نبه فيك ..
_سميحة: اتهني ..وهيا خلينا نرجعو ازربو قبل مايرجعو لولاد ويحسو بغيابي ..
#نورااا🌹🌹🌹
تفاااعلووووالحلقة 110:
تمشي قدامهم وهوما وراها حتى وصلو للحومة ..طلعو طول للدار ..
هزت لمفتاح حلت لباب ودخلت .. كيما عملت تهدي روحها وشي .. لعبد هذا كل يوم استفزازاته يزيدو … ومرة هذي فضحها قدام صحاباتها .. بصح يستاهل حتى هي عملت فيه لباطل… داخلة وتحكي مع روحها ..
_شيماء: ريم دقيقة .. من قبيل نسقسو فيك ونتي مطفيتنا .. شكون هذاك وعلاه عملتي معاه هكاك ..
_ريم: حتى حد ..
_سومية: كيفاه حتى حد ..
_ريم: قتلكم خلاص صكرو لحكاية ..
مشات طول لغرفتها حطت لغراض لي شراوهم تتفرج معاهم وهوما واقفين فوق راسها .. كيما عملو باش يفهمو لحكاية وشي ماحبت تحكي والو .. مين تعبو مشاو غيرو ثيابهم وقعدو هوما ثانيين يتفرجو مع غراضهم …
_جبدت لبيسي نتاعه ..تتفرج مع اقتراحات الامتحانات تحاول تفهم لحلول باش غدوة تعرف واش تحط ..
شوي ووصلها ميساج فلانستا .. دخلت تشوف لقاته ا كونت جديد .. عرفت يكون هو وراها ..
حلت لميساج تقراا فيه ..
_” راح تندمي على شي لي صرا ليوم صدقيني .. لي كيفك نعرفهم .. تحبي تلعبيها صعيبة ومن بعد تجي ترتمي في حضني .. اخطيك من لعب صامط ..وقوليلي شحال دراهمك من تالي .. ” ..
رجعت تغلي وتعيط في بلاصتها حتى ناضو مفزوعين حطو كاش ماصرا ..
_شيماء: واش كاين واش شفتي ..
_صكىت لبيسي ..وهزت تليفونها وخرجت .. مشات لغرفة جبل وصكرت على روحها ..
بقات تقلب فلقائمة السوداء على رقمه .. ورجعت نحت الحضر وعيطتله ..وهو الثاني مابطاش ورد عليها ..
_فيصل: مرة هذي ماضيعتيش الوقت .. أكيد مادام فيها دراهم .. احكي شحال خصك ..
_ريم: اسمع ..
_فيصل: راني نسمع فيك .. حتى شاك راه في يدي باش نسجل ..
_ريم : روح ###### … وزيد معاها ####### .. يا ######## ..
كملت سباته وعلقت عليه ورجعت حضراته وخذات نفس ووقت حست روحها مليحة تبسمت ورجعت لعند لبنات .. لي بقاو مستغربين من تقلباتها ..
خلاته هو الثاني جامد في بلاصته .. كيف ماكان هاز تليفون بقى .. ستيلو في يده ..ووجهه حمر .. يحاول يستوعب واش سمع من شوي …
بعد تليفون من وذنه .. وجهه حمر راح يطرطق ..
يخزر مع رقمها .. لدوك مش مصدق واش صرا ..
هبط تليفون حطه على طاولة .. ورجع راسها ورااا ..
_تلفت على صوت امه تحكي ..
_كنزة: فيصل واش كاين ولدي ..
_ماردش عليها قربت قعدت مقابلاته تحكي ..
_كنزة: واش كاين ولدي تسمع فيا ..
_فيصل: والو .. راح نمشي لغرفتي .. عندي محاضرات غدوة .. لازم نراجعهم ..
هزتله راسها وهو هز تليفونه وغراضه وطلع فلدرجات هذوك .. مزال تحت صدمة كلامها .. هو راجل وعمره سب بطريقة هذي .. مش مصدق انو بنت وفي سنها هي وصلت سباته بطريقة هذي ( فكرتني في حكاية ويسو 😂😂😂لي تعرفها تضرب النح 🤫🤫) ..
#نورااا🌹🌹🌹
حلقات ليلة وفاو رايكم و توقعاتكم ، ملتقانا غدوة ان شاء الله، ليلتكم زينة 🌹💖الحلقة 111:
حط يده على لباب يدقدق عليها … ورجع تلفت على صوت جارتها لي طالعة فلدرجات هذوك .. طفاها ماحبش يركز معاها .. تعدت جنبه تمتم بين شفافها ..
_نورية: معليش كمل كمل خوضها ليلة ثاني .. وبعد يومين ترجع تجري مورا بنت خالتك ..
رجعت تضحك ..وحدها بينها وبين روحها .. تلفت يشوف ليها ..خلت بلاما تزيد تعمل شي ..
شوي وحلت عليه بشرى لباب ..ولمرة هذي مش كيف لعادة ماعملت حتى جاست ..
دخل هو طول للصالون رتمى مقابل تلفزة ..
_بشرى؛تحب تاكل حاجة ..
_جبل: لا ماعينيش ..
_بشرى: اوكي .. براحتك ..
_جبل: صرات حاجة قلتي تحتاجيني ..
_بشرى: كنت راح نقولك حابة نخدم ..
_جبل: واش تخدمي مفهمتش ..
_بشرى: مشي لي في بالك .. حابة خدمة خلال ..
_جبل: كون جات لخدمة ساهلة راني خدمت انا ..
_بشرى: نعرف اما حابة نجرب نحوس .. المهم مانبقاش قاعدة بلا شي ..
_جبل: اوكي اعملي واش تحبي فلاخير هذي حياتك ..
سكتت وبقات تشوف ليه .. قبل ماكانش يحكي هاك ..وقت تجبد حكاية الخدمة يرجع ياكل في روحه ..
_هزت روحها ومشات للكوزينة بقات تلهي في روحها مع لعشا توجد فيه وهو بقى يتفرج حتى هزاته عينه ورقد …
رجعت تطل عليه لقاته راقد .. بقات واقفة تتأمل فيه ..
بعدها تذكرت كلام امينة .. المرة هذي مش لازم تغلط ..
مشات حافية على رجليها مش حابة تعمل صوت .. جبدت المقص ..ومشات جيهته بشوي .. شدت طرف صغير من شعره وين مايبينش ..وقصت منه ورجعت جبدت روحها بلعقل .. وخرجت تزرب لبرااا …
#نورااا
_نورسين: ياخي نتي عقلك وين .. ركزي معايا ..
_جوري: واش كاين ..
_نورسين: نتي لي واش كاين من وقت بدات سهرة ونتي شادة تليفون ..
_جوري: والو ..احكي ..
_نورسين: شوفي كيفاه لبار معمر رجال .. حنا جايين نخدمو ولا نشدو تليفون ..
_جوري: لي حاجتي بيه مزال مايجي ..
_نورسين: شكون قصدك ..
_جوري: بو عينين زرق ..
_نورسين: مزال ماكرهتيش ..
_جوري: قتلك مانكرهش ..وهزيت رقمه .. راجل طلع متزوج بصح مش متفاهم مع مرته .. هذا واش فهمت من كلامه وقت كان سكران ..
_نورسين: هيه وواش الفرق .. هذيك مرته وحنا بنات ليل .. يعني ماراحش يجي يحكيلك حاجة خلاف من غير مشاكله .. يفضفض ويمشي ..
_جوري: مادام هزيت رقمه .. نقدر نوصل لحاجات بزاف ..وانا دوك حطيته في راسي وحاجتي بيه هو ..
_نورسين: اذا قدرتي علاه لا .. بصح رانا حنا ماكانش لي يقيمنا .. فلاخير يرجع لمرته ..
_جوري: هذوك نتوما .. اما انا .. راني جوري .. جوووري .. يعني اذا حبيت نوصل لشي راني نوصله ..
_نورسين: اذا تقدري علاه لا .. خلي نشوفو …
هزت كاس لي قدامها ترشفت منه .. وبقات تقلب فلتصاور لي عملتهمله وهو راقد وباقي تزومي وتشوف في كل جزء منه ..
_جوري: كمال .. مارانيش مراة اذا ماركعتكش وخليتك تهتري باسمي في بلاصة اسمها ..
#نوراااا🌹🌹🌹🌹
جوري وحورية ( الحرب 😂😂😂)لحلقة 112:
كملت غسلت لماعن نتاعها وسيقت الدار ردتها تشعل .. ومشات لبست بيجامتها ..وكملت بخرت الدار باش ترجع ريحتها مليحة وتقدر ترقد بلاما تفيق …
مشات للدوش تغسل في سنيها وتشوف مع وجها ..شوي تعب باين عليه .. أكيد من التخمام بزاااف .. جبدت فيتاميناتها شربتهم .. ومشات لغرفتها دخلت تحت لحاف وبقات تقلب فلقنوات بيلاما نعست وترقد ..
الوقت هذاك خالد .. كان رايح جاي في غرفته تصكرو الحلول لكل في وجهه ..ووين يلفت وجهه يتذكر خاتم نادين ..وزيد هي الوحيدة لغريبة على لحومة يقدر يسرقها بلاما يخمم .. لباقيين كامل عشرة مايقدرش يمشي يسرق حد منهم ..
خرج بشوي طل على امه لقاها فلصالون راقدة مسكينة .. عاود رجع لغرفته .. غير ثيابه لبس حاجة مافيهاش ريحته باش ماتقدرش تميزه ..
لبس كل شي كحل .. ووقف مقابل لمرايا ..
_خالد: ياربي سمحلي بصح ضطريت ..ولا عمري كنت نخمم حاجة هذي … اذا ماعطيتش لرضا دراهمه راح يعملي مشاكل ..ومانحبش ماااا تتضرر .. راح نهزه خاتمها نسدد ديني ..واول مايكون عندي نرجعلها دراهمه .. خلاص هكا مانكونش غلطت معاها …
قعد قريب نص ساعة وهو هكاك .. ياكل في روحه ..ويحرق في اعصابه ..
مع نص ليل .. هز روحه وجبد سلك صغير لي بلعادة يقدر يحل بيه اي شي ..ودار نادين مش صعيب انو يدخلها ..
هز لماسك لكحل .. ونزل مع درجات هذوك وقت وصل عند بابها لبسه .. ورجع تلفت يشوف مالقى حد ..
حط يده يحاول يحل لباب ..خذا منه خمس دقائق ونفتح ..
دخل رجله بشوي .. دار مظلمة كامل ..
بقى يمشي في وسط العتمة هذيك .. حتى قرب من غرفتها ..حط يده على لباب حله بشوي .. لمحها من بعيد راقدة على سرير وتلفزة شاعلة ..
رجع لعرق ينزل من جبهته من القلق …
بعد يمشي بشوي حتى وصل للسرير نتاعها .. جات عينه في عين صغير لي كان فايق .. بقى يشوف ليه .. ونزل عينيه ليها راقدة في سابع نومة ..
شاف مع يدها لمح لخاتم في صبعها .. حس النفس ضياق عليه .. وغاضاته خاطر صح ماتستاهلش ..ولية وحدها وهو قاعد يستغل في ضعفها .. حب يتراجع ويمشي اما طول تذكر رضاا .. ودراهم لي مش عارف من وين يجيبهم ..
الوقت هذاك جبل كان نزل من عند بشرى ..وستغرب انو لاول مرة ماتصرش عليه انو يبقى .. نزل مع درجات هذوك للتحت يكركر في روحه .. حتى وصل للبناية نتاعهم حط يديه في جيوبه وهز راسه لفوق يخزر مع لبلكون نتاعها وعاود تنهد …
خالد كيما عمل فلاخير لقى روحها مضطر انو يجازف .. حط يده على فمها وهو سكين صغير على رقبتها .. حلت عينيها مفزوعة .. حتى ماقدرتش تعيط ..
_عمللها اشارة بيده تسكت .. هزتله راسها بمعنى اوكي .. ومع لعتمة هذيك ماقدرتش تركز مع عينيه ولا تعرفه …
شاف ليدها ونطر لخاتم ..
رجعو دموعها ينزلو وهو كابس على فمها …
رجع بعد يده وكمل هاز السكين هذاك في وجهها وكمل رجع خطوات ورااا ..اول ماخرج من لغرفة بدات تعيط بأعلى صوتها. ..
الوقت هذاك جبل كان راح يدخل للدار .. حتى جاه صوتها ..
_جبل: نادين ..
الجيران بداو يحلو في بيبانهم .. يحبو يفهمو واش كاين .. طلع هو يزرب لعندها حتى لمح راجل خرج يجري وطلع لفوق …
ماعرف يلحقه ولا يمشي يشوف واش بيها …
اول ماحط رجله عند عتبه البيت حس بيها وقت جات تجري جيهته تبكي .. قبل حتى ماينطق حرف يسقسيها واش كاين رتمات في حضنه ..وكبست عليه بيديها زوج ..
_نادين: عاوني .. عاوني .. كان راح يقتلني .. رجع ظهره ورا وتركز مع لحيط هذاك حتى ماعادش يشد بدنه …
بلع ريقه وقت حس بدموعها لي حرقوه على صدره …
_جبل: شا .. صرا ..
_نادين: سراق .. سراق .. سرقلي خاتمي ..وكان حاب يقتلني …
صكر عينيه كأنو كل شي وضاح قدامه وعرف شكون ورا لعمله هذي … خذا نفس ونزل يديه لي كانو عالقين فلهوا دورهم عليها حضنها .. وكبس عليها كثر .. ونزل شفافه على شعرها حطهم عليها وبقى يمرر في يده على ظهرها يهدي فيها ..وهي تقول ماصدقت لقات حد تلجأ ليه وتلقى الامان عنده .. كبست عليه كثر وبقاو دموعها ينزلو مافايقة بشي ..
#نورااا🌹🌹🌹لحلقة 113:
جبدت روحها منه ورجعت هزت راسها فيها تحكي بصعوبة ..
_نادين: تخيل قتلني … تخيل قتل ولدي .. كان راح يذبحنا .. لدوك .. لدوك مش قادرة نصدق لي صار ..
بقى متركز على لحيط هذاك وباقي حاط يديه على جنابها ومهبط عينيه ليها وهي تحكي .. مش قادر يحكي ولا يجاوبها .. المرأة مرعوبة خاطر اول مرة تصيرلها حاجة كيف هذي .. واي وحدة في بلاصتها كانت راح تكون هذي ردة فعلها …
_هبطو دموعها من جديد ورجعت ترعش .. كأنو قاعدة تعيش فلوضع هذاك من جديد .. حطت راسها على صدره وكملت كبست عليه ..
_نادين: الله يخليك ماتمشيش .. نخاف يرجع .. لباب كان مصكر هو قدر يدخل ..
طلع راسه لفوق .. وتنهد .. يحكي
_جبل: ماتخافيش راني هنا .. ماغادي يصرا والو ..
_هزتله راسها وبقات كابسة عليه ..
الوقت هذاك جات ليها رانيا تجري هي وامها لي واقفة عند لباب تشوف واش كاين ..
اول مادزت لباب لقاتهم جنبه .. ماعرفت واش تحكي … اذا تقاطعهم ولا تخليهم .. أصلا نظن نادين مش بحاجتها مدام جبل معاها …
رجعت خطوات ورااا وتلفتت لامها لي حركتلها راسها بمعنى واش كاين ..
هزتلها كتافها ومشات دخلت ..
_خيرة: مشي كانت تعيط ..
_رانيا: لا نظن لقات حشرات ولا حاجة .. مكان والو ..
_خيرة: ادخلي دخلي .. هذا مابقى منوظتنا وتعيط على جال حاجة هاك ..
_دخلو وصكرو لباب … ونادين وجبل باقي فلحالة هذيك وسط عتمة الدار …
فلوقت هذاك بلضبط خالد كان لفوق .. على سطح البناية .. نحى القناع لي كان حاطه و جع يرد فلنفس .. مشي مصدق انو قدر يعمل حاجة كيف هذي .. هز يده يضرب في راسه ويعاود ..
_خالد: كيفاه قدرت نعمل هاك.. ياربي سمحلي .. نشالله تسمحلي حتى هي ..
هز لخاتم بين يديه يخزرله كيفاه يلمع ورجع تنهد ..
_خالد: مرات لحياة هي لي تجبرنا على الحاجات هذو .. ماراحش نقول انا ماغلطش .. خاطر غلطتي واضحة وباينة .. اما .. ضطريت .. راح نرجعهلك اول ماتجبني فرصة ..
هز راسه يخزر للسما .. وكبس على شفافه .. حتى برزو غمازاته .. عينيه يلمعو من الخوف والقلق والندم والحسرة في نفس الوقت ..
نزل على رجليه وقعد على الارضية نتاع السطح .. ورجع يديه ورا ظهره تركز بيهم … الحال كان بارد ونسمه باردة بدات تضرب … شوي وبداو قطرات مطر ينزلو … صكر عينيه وبقى مطلع راسه … كأنو المطر هذي جات في وقتها باش تغسل ذنوبه لي ماخلاصوش ..وماحبوش يخلاصو …
اليلة هذيك على قد ماكانتش طويلة.. كانت باردة وفيها مشاعر متضاربة ..
رانيا في غرفتها على سريرها … قاعدة تحت لحاف .. محضنة روحها وعينيها ماتصكروش … تخمم فلي صرا صباح … تخمم في كلام امها وقت قاتلها اميمة نزلت من عنده .. على قد ماحاولت تخرجه من عقلها وتنساه تلقى روحها رجعت تخمم فيه من جديد ..
رمات عينها جيهة تليفونها لي شعل وهو محطوط على طابل دونوي ..
تنهدت وهزاته بين يديها تخزر للاسم لي مقابلها …
ماعندهاش نفس تحكي معاه من آخر مرة ولعملة لي عملها .. اول مرة يتجرأ ويقرب منها للدرجة هذيك .. كان مالحقش خالد الله واعلم واش كان راح يدير فيها ..
رجع يعيط من جديد .. رمات لغطى من فوقها وهزت روحها .. لبست في رجليها و رمات الوشاح على كتافها … مدابيها تهرب لأكثر بلاصة ترتاح فيها .. وين تحس روحها قادرة تخمم بلاما حد يقاطعها … من وقت وهي صغيرة وين تتقلق تهرب لتم .. كأنو تحس انو فلبلاصة هذيك راح تلقى واش تحوس …
حلت باب غرفتها بشوي .. وخرجت على طراف صباعها باش ماتسمعهاش امها ..
حلت لباب بشوي وخرجت ..
طلعت مع درجات هذوك للفوق .. وقفت مقابلة دارهم .. وتنهدت بحسرة .. وكملت طريقها مع درجات هذوك حتى وصلت لسطح لبناية ..
اول ماحطت رجليها لمحت حد لتم .. كانت راح تعاود تنزل اما اول مادققت فيه مليح قدرت تعرفه …
بقات واقفة من بعيد تشوف ليه … مش عارفة اذا الصدفة ولا القدر هو لي قاعد يحطه في كل مرة في طريقها …
هزت عينيها للسما وقت فاقت بلمطر لي بدات تقواا …
كبست على شفافها مش عارفة واش تدير ..ولبهلول هذا باين فيه سكران ومش صاحي .. هذا واش جى في بالها ..
كبست على الوشاح هذاك حطاته فوق راسها ومشات تجري ليه .. حتى وقفت على راسه تخزرله .. بلوقت هز هو عينيه فيها … كأنو آخر شي كان يتوقع يشوفه فلحاله هذي هي ..
#نورااا🌹🌹🌹
تفاااعلووو تلحق 100 ونحط لي بعدهالحلقة 114:
تعدو دقايق باش بدات تفيق وحست روحها هدات … حلت عينيها وقت حست على صوت دقات قلبه لي يضربو في وذنها ..
بلعت ريقها ورجعت وراا مهبطة راسها .. هزت صباعها ورجعت خصلة من شعرها ورا وذنها وتبسمت كأنو تحب تهدي الوضع…
_نادين: راح نشوف اياد ..
_جبل:, براحتك ..
مشات تزرب لغرفتها وين خلت ولدها .. هزاته بين يديها تمسح على راسه ..وهو راقد مسكين ..
_نادين: اااه يا ماما سمحلي .. مش عارفة وين طحت وطيحتك معايا ولا واش من بلاصة رانا فيها .. سمحلي ..
قربت شفافها باست راسه وحطاته في بلاصته … ووقفت مقابلة لمرايا .. تخزر مع عينيها المنفخين ووجها لي رجع حمر ..
_خرجت ماشية للدوش راح تغسل ..ورجعت شافت جبل واقف في نفس لبلاصة لي خلاته فيها .. دخلت بعضها .. ومشات شعلت نور باش يقدرو يواجهو بعض .. بلعت ريقها وخذات نفس .. أصلا لحالة لي هي فيها ماتقدر تخمم في شي من غير انو يطلع صباح وهي حية مع ولدها ..
_نادين: صكر لباب وادخل ..
_شاف ليها ورجع هز حواجبه لفوق .. كأنو مشي مستوعب كلامها ..
_جبل: راكي عليا ..
_نادين: واه .. ادخل .. هبطت عينيها على تريكوه لقاته معبي بدموعها ..
_جبل: مفهمتش ..
_نادين: راح نطلب منك شي .. الله يخليك .. احسبه دين ..
_جبل: خير نشالله ..
_نادين: ابقى ليلة هذي هنا ..والله مرعوبة .. لدوك نرجف .. اول مرة يصرالي موقف كيف هاك ..
_بقى ساكت يخزرلها وهي كملت تحكي ..
_نادين: نعرف ازعجتك ..وكثرت عليك .. اما كيما راك تشوف ماعنديش راجل فلدار .. انا وولدي وخلاص .. خايفة يرجع يجي .. لباب قدر يحله .. رجعو تعبو عينيها بدموع كأنو قاعدة تعيش فلموقف هذاك من جديد …
_جبل: معليش تهني .. أصلا ماكنتش راح نخليكم ..
_تبسمت وهزتله راسها ..وعاودت رجعت لغرفتها .. هازة تريكو بين يديها ..
_قربت منه ورجعت شافت ليه ..
_نادين: تفضل ..
_جبل: واش هذا ..
_نادين: تريكوك تبلل .. قصدي انا بللته .. شوف هذا تريكو اذا يجيك .. البسه ارقد بيه .. بينما غسلت تاعك وحددته ..
مد يديه شده من عليها وبقى واقف وهي مشات جيهة الدوش راح تغسل .. عاودت تلفتت ليه تحكي ..
_نادين: تقدر تدخل لغرفة اياد تلبس .. عندي ثقة فيك ..
هزلها راسه بلاما يحكي كلمة … ممكن هذي اول مرة حد يقوله عندي ثقة فيك … حتى بشرى عمرها قاتله نوثق فيك رغم حبها …
خزر لصباطه ونزل نحاه وحطه جنب لباب ..ورجع دز باب لغرفة بشوي ودخل .. قابله ولدها على سرير راقد .. تبسم وقرب جيهته يخزرله … راقد ومش حاسس بامه لي قاعدة تكافح كل يوم على جاله …
عدى يده على لحيته ..ورجع حط تريكو هذاك على لكرسي .. وكمل طلع يديه لفوق نحى تريكوه …
الوقت هذاك هي واقفة مقابلة لمرايا تخزر لوجها ويديها تحت لما لي قاعد ينزل …
هزت قطرات رماتهم على وجها .. تحاول تصحي روحها .. وكملت بللت شفافها وتلفتت هزت المنشفة تمسح في وجها وقت قابلها من ورا المرايا هذيك .. تفزعت فلاول .. اما طول تذكرت انو مايقدرش يشوفها …
بقات تخزرله .. ودقات قلبها مع لوقت زادو .. ممكن هذي اول مرة بنكشف راجل قدامها بعد وليد راجلها …. ماقدرتش انها ماتشوفش لجسمه ولا للرسومات لي عليه …
تبعاته بعينيها كيف هز تريكو يخزرله ورجع شاف للمرايا مقابلها .. دخلت بعضها كانو قاعد يشوف فيها .. قرب من لمرايا ورجع راسه ورا وكمل لبس تريكو هذاك …
تبسمت وهي تخزرله كيفاه يشوف معاه اذا مليح ولا لا …
رجعت لمنشفة لبلاصتها وهزت كرام ترطيب حطتها على وجها ..وكرام ثانية تحت عينيها باش يتنحو لي ساغن ..
طلعت راسها فيه لقاته واقف على راس ولدها يخزرله … وبعدها هبط باسه ..
حلت عينيها ورجعت تبسمت .. يعني حتى لي كيفه يتصرفو طبيعي .. وتجذبهم الامور الصغيرة ولبسيطة … ممكن لكلوشار هذا هو أكثر واحد وقف معاها من وقت حطت رجليها فلحومة هذي ..
طفت ضو الدوش وخرجت ماشية لعنده فلغرفة ..
#نورااا🌹🌹🌹
تفاااعلوووو 🐸🐸🐸لحلقة 115: حلت لباب ..وتلفت هو بلوقت يخزرلها .. تبسمت وشافت ليه تحكي … _نادين: يكون في سابع نومة .. _جبل: شفت انو هادي بزاف من وقت السينيما … سكتت شوي ورجعت بيها الذاكرة للنهار هذاك ..وقت مشاو كامل مع بعض وكانت قاعدة جنبه .. _نادين: صح ..شبه بوه .. _سكتو للزوج وبقاو يخزرو لبعض .. هو لارد وهي لا حكات بعدها … حلت لباب ورجعت هبطت عينيها تخزر لصبعها ..وتعبو عينيها بدموع .. _نادين: كان لخاتم هذا ذكرى مميزة بينا … من صدمة مالحقتش حتى نتحسر عليه .. _جبل: خاتمك هو لي نسرق .. _نادين: واه خاتم زواجي .. سكت جبل يحكي داخله ويسب .. _جبل: الله لا تربحك خالد… ماعرفتش تصبر .. _نادين: مرات نحس روحي منحوسة .. كل شي جميل في حياتي يطير ويتبخر … حتى عايلتي .. ماتو كامل في حادث سير وبقيت انا حية … راجلي مات .. ودوك حتى لخاتم مشى … كل حد يقرب مني تخطفه لحياة … فهمت دوك علاه كل مرة نخاف حد يقرب من ولدي .. خاطره آخر حاجة عزيزة بقاتلي فلحياة هذي … بعد لي عشته ليلة .. حسيت روحي مستعدة نتخلى على روحي المهم مايمسه شي … مارانيش مستعدة نزيد نخسر كثر من هاك .. بقى واقف يسمعلها ومركز مع كل حركة تعملها … كأنو كانت تحوس على حد تفضفصله لي داخلها … ولقاته هو في طريقها … خزر لولدها ورجع مشى جيهتها يحكي .. _جبل: قتلك قبل … وقت كنا عند باب السينيما .. انتي خممتي تنتحري ورغم هاك مانتحرتيش … معنتها انو صح عندك حد ماتقدريش تمشي وتخليه .. هزت عينيها فيه وبقات تشوفله .. عينيها يلمعو وعينيه سود قاتمين .. ورغم هاك لمعتهم باينة … _نادين: في رايك انا ام صالحة .. نستحق انو ربي عطاني الملاك هذاك … _جبل: اكثر من صالحة … الأم لي تقابل الطعنات والضربات لكل المهم تحمي ولدها .. هذي مش غير صالحة .. نظن مكانش ام فلعالم ماتبغيش الخير لولادها … _هزت صباعها مسحت بيهم دموعها قبل ماينزلو وخذات نفس تحكي .. _نادين: مرسي .. ممكن نتا آخر واحد كنت نتوقع يحكيلي شي كيف هاك ..ولا نسمع كلام مليح منك … _جبل: الظروف تقسي ..ومشب كل حاجة نشوفوها من برا هذيك هي .. _نادين: حمزة .. _جبل: كيفاه .. _نادين: الراجل لي ضربته فلعرس .. اسمه حمزة .. سلفي .. _هزلها راسه وكملت هي تحكي .. _نادين: وقت راجلي كان عايش .. كنت نشوف منه غير الخير … حتى ليلة ولدت .. راجلي غايب فلخدمة ومالقيته غير هو هزني للسبيطار وعاوني … حتى من اياد كان يشريله غراض ويجيبهمله .. ويقولي ختي .. تخيل كنت نفرح ونقول عاد عندي خو فلدنيا هذي .. حتى وقت مات وليد .. بكيت على كتفه وشكيتله … منعني شحال من مرة اني ننتحر .. وفلاخير وقف قدامي … قالي يا تخرجي من الدار .. يا تعيشي فيها وتكوني عشيقتي … ووقت مالقاش حل خلاف .. قالي نتزوجك بلفاتحة وبلا علم مرتي … تخيل .. من هذا كامل ماوجعني غير نيتي .. وقت كنت حاطاته اخ ليا صح … ماعدت نوثق في حد جبل … وماعندي حد .. _جبل: انا هنا .. هزت عينيها فيه تحكي .. _نادين: الكلام ساهل … راح توقف معايا مرة وثنين وبعدها في اول فرصة راح ترضخ لافكارك السيئة .. هذي طبيعة الانسان ومانقدرش نلومك .. حنا نتلذذو وقت نعذبو عبد ضعيف ونستغلوه ونعفسو عليه .. _جبل: غالطة .. _نادين: ليام بيناتنا ..وراح تشوف. . _سكت وخذا نفس يحكي … _جبل: اذا حد وثق فيا ومدلي يده .. مانخليش ليد هذيك … ووقت قلت نحرق الحومة هذيك على جالك ماكذبتش … اذا حد حكى عليك كلمة نقلبها عليهم .. _بقاات ساكتة تخزرله وهو الثاني يخزرلها .. عينيها مطلعتهم جيهته وهو منزل راسه جيهتها .. صوت انفاسهم وحده يتسمع … حلت شفافها بشوي تحكي .. _نادين: فراشك فلصالون .. واذا حبيت تاكل شي شوف فلبراد … تصبح بخير .. #نوراااا🌹🌹🌹 تفااااعلوووو … وحطولي اراءكملحلقة 116: بقى يشوف ليها ورجع مد يده جيهة لباب كمل حله وخرج .. وخلاها وراه .. صكرت لباب وتركزت عليه .. هزت يدها حطتها على قلبها تهدي فيه ..وضيقت عينيها مستغربة من شعورها هذا .. كلما يحكي .. صوته مع كلماته الثابتة والقوية يحيرو داخلها حرب .. تنهدت وعدت يدها على شعرها حلاته ومشات جيهة سريرها… دخلت وسطه وجبدت ولدها ليها .. _نادين: راح يكون كل شي مليح … تلفتت شافت للباب ..بعدها عاودت بعدت لغطى من فوقها ومشات بشوي حطت وذنها عليه تحاول تسمع واش يدير … كبست على شفافها ونزلت يدها حطتها على المفتاح ورجعت دوراته بلعقل باش مايسمعهاش .. ويتقلق من الافكار لي جاو في بالها .. خاصة انو هي لي طلباته بفمها يبات لعندها … رجعت لسريرها وصكرت عينيها .. الوقت هذاك هو مالقى مايدير لقاها صح مفرشتله بلاصته وحاطة على جنب قرعة ماا … ومشغلة تلفزة .. جبد تليفونه وكتب ميساج لصاحبه .. _جبل: يعني مالقيت ماتدير غير تسرق خاتم لمسكينة هذيك .. قبل كنت خايف من رضا دروك خاف مني .. ولخاتم اياك وتبيعه خالد راني نوصي فيك .. رجع حط تليفون على جنب ودخل تحت لحاف هذاك وسط لفراش … ماقدرش يرقد وهو يخمم في كلامها وكل حرف حكاته … يعني صح مرات لحياة على قد ماتسرق منك حاجات ملاح تحسي روحك ماتستاهليش السعادة ولا لفرحة .. حتى ترجعي تخافي تقربي من لحاجات لملاح ولا تحلمي .. لانو ببساطة كل شي تتمنيه يتبخر ويطير … دار للجبهة ثانية .. قابلاته صورتها لي على الحائط مع راجلها … عوج فمه وبقى يثبت في ملامحهم .. _جبل: علاه حاس روحي غاير منه … راجل شبع موت ومرته مزالها تخمم فيه وتبكي عليه … زعما صح كاين حب هاك .. رجع راسه يشوف للسقف وحط يده تحته .. _جبل: دوك فهمت علاه موسوسة ولي بمسها تروح تمسح اثاره .. باينة تعتبر حاجات هذو خيانة .. قعد ليل كامل وهو يحكي مع روحه ويفسر في تصرفاتها .. حتى هزه نوم ورقد … #نورااا سميحة مع 4 تاع صباح فاقت .. مشات توضت وصلت ..ومشات طلت على بنتها لقاتها راقدة .. مشات لغرفة ولدها حلتها بشوي حستها باردة ..وريحته مكانش شعلت الضو وصح هو مكانش … تنهظت تحكي داخلها .. _سميحة: ربي يهديك ولدي ..وقتاش تعقل وتحبس سهرات هذوك … مشات للكوزينة طيبت لقهوة حطتها على طاولة .. مدام ليوم الأحد ريم تقرااا .. جهزتلها طاولة ..ومشات للصالون وين كانت راقدة .. شعلت تلفزة وبقات مقابلتها وتحكي مع روحها … _سميحة: شحال زمان صعيب … شبابك مشى يا سميحة .. مشى فلحومة هذي .. مع انسان مايستاهلش .. تزوجتيه ونتي صغيرة .. تمرمدتي مع لعجوز .. ومعاه هو .. يدخل يضرب ويخرج يضرب … قتلو طفولتك وشبابك وحملوك مسؤولية اكبر من سنك … تنهدت بحسرة وحطت يدها تحت خدها .. وكملت تحكي مع روحها … _من وقت عمرك 18 عام ونتي هازة مسؤولية الام … وكملت بيك ارملة مع زوج ولاد … قاسيتي وسمعتي لكلام وصبرتي … زمان محالك حتى طفولتك .. وقت تجي تتفكري ماتقددري تتذكري غير الهم لي عشتيه في حياتك … ودوك رجع عندك راجل ومراة .. مش لازم لي عشتيه نتي يعيشوه هوما .. بقات تقلب فلقنوات وراسها بعيد … بزاف نسا عاشو لي عاشته سميحة .. بزاف نسا تحملو الذل والصوط والسب على جال قسوة المجتمع … خاطر اول ماتطلب طلاق اصابع الاتهام لكل تتوجه ليها … ولكل راح يلومها هي .. وبعدها يرجعو يعسو فيها .. ويشوفو واش تدير بعد ماخذات حريتها من العلاقة هذيك .. مجتمعنا يخلينا مضطرين انو نتحملو حاجات بزاف فوق منا باش نكملو نعيشو بكرامتنا قدام الناس .. وبينا وبين نفسنا خسرنا كرامتنا من زمان … ياما بيوت تضحك من برا ومن داخل تبكي … ياما بيوت كنا نقولو ساسها صحيح ومبنية على الاحترام .. ووقت تدوسي عتبتها يقابلوك مجازر بحق لمراة وكرامتها .. ( المهم خليني ساكتة قلبي راه معمر خلولي تعليقاتكم فلموضوع هذا ) #نوراااا🌹🌹🌹 جام+ اراءكمحلقة 117: هز عينيه فيها مستغرب ورجع نزل يده بلزربة دخل لخاتم في جيبه قبل ماتشوفه .. ورجع شاف ليها .. _خالد: شاراكي تديري هنا .. وقت حست بكلامه عادي .. عرفاته مش سكران جات تمشي ناض بزرب شدها من يدها يحكي .. _خالد: نهدر معاك .. شاراكي تديري هنا .. _رانيا: والو .. طلعت نريح ..نتا لي شاراك تدير هنا .. _خالد: تريحي فلوقت هذا … راه نص ليل .. _رانيا: تصبح بخير مالا .. _خالد: دقيقة … رانيا اسمعيني .. _رانيا: واه خويا .. تفضل احكي … هز حاجبه لفوق يشوفلها .. _خالد: خويا .. _رانيا: ماعجبكش .. _خالد: مارانيش خوك .. _رانيا: نسيت لخو مايخزرش لخته بشهوة .. ولا عين زايغة … _خالد: ترميلي فلكلام .. نطرت يدها منه وقحرتله تحكي … _رانيا: ماراناش نلعبو هنا … ماتبقاش تدور في نفس لبلاصة .. ولكلام لي حكيته مشي جديد نتا بعظمة لسانك حكيتهلي .. شابغيتني نقولك .. _خالد: صح في هذي ماغلطتيش .. أصلا وجودك هنا مشي صح .. _رانيا: أصلا كل شي داير بيه نتا مشي صح … رجعت ندعي ليل ونهار نخرج من لحومة هذي باش ماعادش نشوف وجهك .. _خالد: للدرجة هذي .. _رانيا: سمعت انو خلاصولك لبنات قلبتها على اميمة … ولا حاب تجرب نوع جديد .. _خالد: يهمك الجواب .. _رانيا: أكيد لا .. لي غايضني انو خليتك توصل للي تحب عليه معايا .. _سكت شوي ورجع هز يديه حطهم على كتافها يحكي .. _خالد: للزوج حبينا شي هذاك لي صرا … للزوج تفاعلنا مع بعض .. حتى اني شكيت .. ضيقت عينيها فيه تحكي .. _رانيا: واش شكيت .. كمل .. _خالد: انو عندك مشاعر جيهتي … _جبدت روحها منه وعيطت في وجهه .. _رانيا: تعرف واش الغلطة مشي فيك فياا انا … اذا حاطني لي يجي نبوسه راك غالط … وصح غلطت وقت ماعطيتكش كف صحيح من اول ماحطيت يديك عليا .. خليك بعيد عليااا .. وبعيد على طريقي … _خالد: نتي لي جيتي عندي .. _سكتت ورجعت خطوات ورا … الوشاح لي على راسها يلعب بيه ريح … وقطرات مطر تضرب على وجها … عينيها فيهم نظرة انكسار وتحدي في نفس الوقت … _رانيا: نشالله يبقو مصايب دنيا لكل طايحين عليك … نشالله وين ماتخرج رجل من المستنقع لي نتا فيه توحل رجل ثانية ..ووجهك عمره يعرف لفرحة .. تبسم بمرارة وشاف ليها يحكي … _خالد: علاه حالتي هذي عاجباتك .. راني انا أصلا مستنقع … مدابيا اي حد نحبه مايطيحش فلمستنقع هذاك … خاطر صح لخروج منه صعيب … ماركزتش مع كلامه وماحوستش تفهم .. عطاته بظهرها ومشات راح تنزل بعدها رجعت وقفت تسمرت في بلاصتها تحكي داخلها .. _رانيا: لوقتاش تبقى هاربة من مشاعري لوقتاش نبقى جبانة وخايفة من لي نحس بيه … علاه مانحكيش ونفرغ قلبي بعدها نمضي في حياتي … هزت صباعها حطتهم تحت عينيها تحاول تمنع دموعها ورجعت خذات نفس وتلفتتله … كان عاطيها هو الثاني بظهره مشات جيهته ..جبداته من ذراعه حتى تلفت ليها .. ونطقت تحكي .. _رانيا: تعرف واش … يكفي ماخبيت ..ويكفي ماعشت سنين وانا نستنى فيك نتا تحكي باش نعطي لمشاعري حياة .. حتى مشاعري عندهم قيمة .. مش مشروط تحكي نتا باش يرجع عندي حق في مشاعري … اسمع مالا .. _ضيق عينيه فيها … مستغرب من كل شي تعمل فيه .. رانيا لي يعرفها ولا مرة كانت عندها جرأة كيف لي قدامه .. رانيا لي يعرفها من سابع المستحيلات تقدر تحكي وتعبر على لي داخلها … هذي وحدة خلاف .. مش نفسها لي عرفها … مش نفسها لي خلاته سنين عارف مشاعرها وهي حاطاته مش فاهم … _رانيا: انا نحبك … واه انا نحبك ..ونحبك بجنون .. انا نحب المستنقع هذا لي طحت فيه .. حبيته بعيوبه واغلاطه .. حبيته رغم كل شي … انا سلمت روحي بين يدين خاطرني نحبه … ماعنديش شك فلموضوع .. ومدابيك مايكونش عندك شك … مشي ليوم ومشي ليامس ومشي من شهر … من سنين .. من 8 سنين كاملين .. لليوم قلبي ماقدر يحب غيره ..وعقلي لاقدر يستوعب غيره … حبي ليك هو أكبر ابتلاء بلاني ربي بيه … بقى يخزرلها كيفاه تحكي وترد فلنفس كأنو قاعدة تسابق فلكلمات قبل مايهربولها…. ماحكى شي من غير كلمة وحدة جاوبها بيها .. _خالد: نعرف .. #نورااا🌹🌹🌹 اراءكم في حلقات ليلة .. وملتقانا غدوة نشالله فحلقات جدد .. تصبحو بخير 🌹الحلقة 118: الهدوء خيم على البلاصة هذيك … نفس الشعور وقت نوقفو دقيقة صمت على روح حد … رانيا بقات واقفة ساكتة لدقيقة كاملة عجزت تخرج الحروف وتركب الكلمات … كأنو بصمتها هذا وقفت دقيقة صمت لحبها .. حبها الكبير لي ماحبش يخلاص رغم الفصول لي مشات وليام لي توالت ورا بعض … ترد فلنفس بصعوبة ..وتحاول تفيق بشي لي حكاه .. اربع حروف حكاهم كانو كافيين باش يخلقو حرب داخلها .. حرب ماعرفتش تخلاص غير وقت رجع هو خطوه وراا وعطاها بظهره .. كأنو فاقت على وضعها ..فاقت وين حطت روحها .. وبواش جاوبها هو … #رانيا تحكي … بلعت ريقي ..وهزيت عينيا فيه .. نخزر لظهره لي مقابلني .. لشعره لي نسمات الخريف الباردة تضرب فيه .. نحس في سناني يتصكو مع بعض … والجمود ركبني من ساسي لراسي .. لهذي درجة كلمته البسيطة خلقت شي هذا كامل داخلي … قالي نعرف ..واش يعرف ..يعرف يحبي ليه .. يعرف حقيقة مشاعري لي كبتهم عليه سنين … دقيقة واش قاعد يصرا … انا من شوي عترفت يحبي ليه ورغم هاك ماتفاجأش معنتها كان يعرف صح .. يعرف البهيمة هذي شحال حباته ..ورغم هاك تعمد في كل مرة يستغلني ..ويعطيني امال مامنهمش كيف ماعمل آخر مرة .. كيف ماعمل وخلاني نستسلم ليه … حسيت نار شعلت داخلي … وقوة مش عادية خلقت فيااا … هزيت عينيا ليه بغضب .. نشوف ليه كيفه جبد تليفونه من جيبه .. يقرا فلميساج لي وصله .. ورجع دخله لجيبه بعدم اهتمام … الهروب دوك مشي وقتو .. هذي انسب فرصة باش كل حد منا يحط النقاط على الحروف .. مشيت خطوات رزان جيهته ..وقبل مانوصله تلفتلي يخزرلي … مرة هذي وقف باستقامة وحط يديه في جيوبه .. من شدة لبرد لي على السطح .. الظلام داير بينا … من غير انارة القمر الخافتة .. خرج صوتي من بين شفافي وأخيرا .. وطلقت العنان لكلماتي .. لي جات بسرعة وبلا تقطع .. _رانيا: واش قصدك بنعرف .. انا من شوي عترفتلك بمشاعري ..ونتا مانصدمتش وماستغربتش ..واش تفهم من هذا .. انو كان عندك علم . كنت تعرف بحبي ليك وساكت .. _خالد : راه لبرد الاحسن تنزلي ترقدي … وانسي انك عترفتيلي وانسي اني جاوبتك .. هزيت حاجبي لفوق .. لا فوقها يهرب من الجواب … لهذي الدرجة مشاعري ماعندهمش قيمة عنده … كبست على شفافي بسناني .. لدرجت اني توجعت من كثرية لي نزلت عليهم … بلعت ريقي وهزيت راسي جيهته نحكي .. _رانيا: واش قصدك بكلمة نعرف .. كنت تلعب بيا .. كنت تتلذذ بعذابي صح … ولا دقيقة خليني انا نجاوبك .. عجباتك فكرة انو طفلة تحبك .. عجبك الشعور هذاك تاع نتا مرغوب … وأنا بهلولة لي قاعدة نعيش فلعذاب بسبابك ..ونتا عالم بكل شي … مشيت خطوات جيهته حتى وصلت ليه .. هزيت راسي فيه .. حتى قابلو عينيا عينيه .. _رانيا: انطق .. احكي شي .. علاه ساكت .. _خالد: ماعنديش جواب .. شفت ليه نحاول نقرا شي من ملامحه .. شي برود وجماد .. وجهه مافيه حتى تعبير .. حسيت روحي قاعدة نذل في روحي كثر وكثر … صكرت عينيا كبست عليهم .. وخرجت تنهيدة عميقة من داخلي … كبست على يديا كثر وكثر.. نخمم ونخمم ومش عارفة وين راح نمشي بتخمامي … ماعرفت نلومه ولا نلوم روحي ولا نلوم مكتوبي .. مرات الحب يذلنا لدرجة ننسو انو عندنا كبرياء .. ننسو انو عندنا مشاعر وقلب يتوجع وكرامة تنهز .. نعفسو على كل شي في جال عبد مايستاهلش … حليت عينيا بقوة وقت قابلوني عينيه .. سود قاتمين . ومع ضو القمر الساطع في وجهه رجعت تبان لمعتهم .. لي مالقيتلهاش تفسير .. اذا سبابها ضو القمر ولا شي ثاني .. تبسمت بسخرية ..وكملت نحكي .. _رانيا: راح نعطيك بظهري دوك وننزل .. ونهز خيبتي معايا ..وننسى اني عترفتلك كيف ماحكيت وننسى انك قتلي نعرف .. راح ننزل من هنا ..اما قبل كل شي نحب نقولك كلام خليه داخلك واحفظه .. ليام راح تدور … وراح يجي نهار تحتاج تحكي وتعيط وتقابل وجهي .. وماراحش نتلفتلك .. وماراحش نخسر عليك حتى كلمة انسى كيف ماعملت نتا … راح نتجاوزك ببساطة ونخليك ورايا … صدقني ماراحش يرفلي جفن ..وماراحش نضعف .. واليوم هذا مش بعيد … وعمري ننسى الشخص لي لعب بقلبي ومشاعري .. كملت تبسمت ونزلت وخليته ورايا .. ماحبيتش نتلفت وماحبيتش نستنى نسمع جواب منه .. نزلت ببساطة من الدرجات هذوك وخليته ورايا … #نورااا الدقيقة هذيك باش قدر يصكر عينيه ويخلي العنان لدموعه يطيحو بعدما كبتهم لدرجة كبيرة … نزل في لرض وحضن روحه بيديه زوج .. كأنو لي فلحالة هذي مش خالد لي قلبه متحجر ..ولا خالد لي يخزر للامور بسخرية ويضحك… المرة هذي كأنو طفل صغير ضايع … في بلاصة عالية ومش عارف طريقه اذا يقدم يرمي روحه من الهاوية لي مقابلاته ولا يجازف ويرجع وراا ويلحقها ويحكيلها كل شي عاشه بسبتها ..#نورااا🌹🌹🌹🌹 تفاااعلووو تلحق 100 جام نحط لي بعدها ..لحلقة 119: بقى يهز في رجليه بقلق وخوف كلاهما ماحبش يخرج من راسه .. الخوف من انو يخسرها رجع خيم داخله … خايف لدرجة مش قادر يفكر كثر … تلفت مفزوع يخزر للظلام الداير بيه .. وخرج اسمها من بين شفافه .. _خالد: رانيا .. ممكن ليلة هذي كانت راح تكون اسعد ليله بلنسبة ليه .. كان لازم تكون فرحته كبيرة .. شي لي كان ديما يستنى ليه صار .. رانيا حكاتله على مشاعرها .. وفي نفس الوقت خلاته يعيش الخوف والرعب هذاك لي كل ليلة خايف منه .. خايف يلحق نهار لي تتزوج فيه ويوقف هو من لفوق يتبع فيها بعينيه … شد راسه بيديه زوج يضرب فيه .. _خالد: حمار .. حمار واش درت .. _خذا نفس وناض يزرب .. رايح يجري يلحقها يرجعها .. يحضنها بين يديه يشم ريحتها ويحكيلها على حبه .. حبه ليها لي ممكن اضعاف حبها هي .. لي يحب يضحي .. لي يحب يرضى انو يموت فلنهار ميات موتة المهم يشوفك مرتاح .. يشوفك عايش حياة طبيعية … هو عمل كل شي على جالها .. عمل شي هذا قبل اربع سنين للتالي .. هو وقتها برهن حبه لكبير ليها .. وقتها خسر روحه المهم تكون هي مليحة … علاه مش قادرة تشوف مشاعره كيف ماعمل هو .. حط رجله على اول درجة تنزل للتحت وشد بيده على الحيط .. على قدر الحماس لي حس بيه رجع خيم البرود على جسمه .. وكأنو رجع ربع سنين للتالي للنهار هذاك .. وقت عرف انو ولد الحرام ماعندوش بلاصة فلمجتمع .. وماعندهش حق أنو يحب ولا يعيش كيفه كيف غيره .. نزل على رجليه زوج وقعد على الدرجة هذيك متركز على الحيط … يخزر بعيد .. حالته هذيك تخليك تعرفي لاي درجة قاعد يتألم العبد هذاك .. لأي درجة تحمل ومزال يتحمل ويكافح باش يكون عبد عادي بين ناس … #نورااا #قبل_أربع_سنوات … قاعد فلصالون وكل شوي يعيط على امه يحوس اذا كملت ولا مزال .. _خالد: أمي هياا ازربي نحبك تمشي قبل ماترجع من جامعتها .. _سكينة: هاني نلبس اصبر … _خالد: مانحبهاش تعرف منكم .. نحب ندي القبول من امها وبعدها انا نحكيلها بطريقتي .. ضحكت امه وقدمت وقفت عند باب صالون تحكي .. _سكينة: نشالله نفرح بيك … نشالله تكون مشاعركم متبادلة .. هز روحها وقف .. مشى جيهة امه ونزل باس راسها يحكي .. _خالد: ياودي غير امشي ونتي مصكرة عينيك .. راهي تموت عليا .. ضحكت وهزت بوكي الورد لي شراه .. مع علبة فيها كيكة.. ومشات خارجة .. وخلاته وراها تنهد وصكر لباب .. فرحان .. فرحان خاطر قاعد يعمل فلشي بطريقة صحيحة .. مش حاب لي عاشته امه تعيشه رانيا .. مش حاب يعلقها بيه بلاما تكون حاجة رسمية ولا يستغل مشاعرها ويتهور.. راح يعمل كل شي يشوفه صحيح وحساب الاصول .. #نورااا🌹🌹🌹الحلقة 120: حل عينيه من سرحته على يدين دافيين يمسو في خده … شاف ليها ..ورجعت وضاحت الصورة كثر … رتمى في حضنها يحاول يرمي ثقله عليها .. وهي الثانية مسكينة ماكانتش قل منه .. قعدت على طرف الدروج هذوك وحاوطاته بيديها زوج تمسح على ظهره وتحكي .. _سكينة: واش هو همك ولدي .. واش من هم وصلك للحالة هذي … _خالد: تاعب بزااف ماااا .. ماحاب شئ غير نبقى في حضنك ..وتخبيني من الدنيا هذي الظالمة.. نزلو دموعها وهبطت باست راسه تواسي فيه .. _سكينة: راح يكون كل شي بخير … _خالد: بلا بيها حياتي ظلمة .. راني نبغيها .. نبغيها كثر من ما تتصوري … _سكينة: ماراهيش من مكتوبك ولدي .. طفلة مشي من نصيبك … _سكت وكبس بزوك يديه على امه يحاول يستمد ولو شوي قوة منها باش يقدر يوقف على رجليه … حقيقة انو رانيا ماراحش تكون ليه قاعد تمزق فيه من الداخل كثر وكثر … _سكينة: هيا نوض ولدي .. نوض نرجعو لدارنا .. ترقد على سريرك وترتاح .. _هز روحه وقف وهي شداته من يده تحاول تعاونه .. يخطي فلخطوة بصعوبه … حتى وصل لباب دار .. دزت امه لباب ودخلاته حتى لغرفته … نحتله صباطه ..ومسداته في بلاصته وغطاته تحكي .. _سكينة: خليها على ربي…. هو لي يمشي في كل شي … خلي سرك عنده .. وقت تفرج راهي تفرج .. ماتزيدش تهلك روحك كثر .. هزلها راسه ونزلت هي باسته وخرجت جبدت لباب .. وخلاته في بلاصته .. دار للحيهة الثانية وحط يده تحت خده .. جات صورتها بين عينيه ..وجى نهار المشؤوم هذاك بين عينيه .. #نورااا #فلاش_باك: مافاتتش ربع ساعة وسمع صوت لمفتاح نتاع لباب .. خرج يجري لقاها أمه .. ستغرب انو رجعت بسرعة .. _خالد: ماااا ..واش كاين .. شايفك رجعتي بلخف ..ولا مالقيتيش امها فلدار … _حاولت تتصنع الابتسامة .. وتحكي طبيعي أما ماقدرتش … شادة دموعها بسيف .. _سكينة: لالا …. ولدي انا .. تركزت مع لحيط بيديها زوج ..ومشى هو يجري لقفها قبل لا تطيح .. مش فاهم واش صرااا… مشى يجري جبدلها لكرسي من الكوزينة حطهلها قعدت عليه ..وجابلها كاس مااا تشربه .. _شداته بين يديها يرعشو ترشفت منه ورجعت شافت ليه بانكسار .. _سكينة: سمحلي ولدي .. سمحلي على كل شي .. سمحلي خاطر خليتك تعيش ليام هذو… ضيق عينيه مش فاهم واش صرا .. وقبل حتى مايلحق يسقسيها ولا تجاوبه .. جاع الجواب من ورااا . وقت دزت لباب ورمات بوكي لورد هذاك في لرض ومع لعلبة وشافت ليه تحكي بغضب .. _خيرة: مانلقاكش قربت من بنتي … سمعتني .. هز روحه كأنو ركبت لحكاية في راسه وفهم واش كاين . يعني امها رفضت _خالد: واش صرااا … علاه رفضتي .. ياك جيت من لباب ..وخطبت ..وين المشكل..وزيد حتى بنتك راح تقبل وينو المشكل … _خيرة: بنتي انا .. تقبل بيك نتا .. نتا ولد سكينة لي مشي معروف اصلك … كبس على يديه زوج ..تحس روحه تحطم ونكسر من داخل … ورجعت حالته ممكن اكثر من حالة امه .. عمل حساب لكل شي ونسى أهم شي … كيفاه يقدر يتزوج وهو حتى نسبه مشي عارفه … _خيرة: زوج كلمات حطهم في راسك … ماعندي مشكلة لا معاك لا مع امك .. بنتي تبقى بعيد عليها . حتى وهي تحبك .. مصلحتها اولى .. مانحبش غدوة ولادها يعيشو واش عشت نتا . ولا يبقو يسقسو فيك على نسبهم ..ونظن عشت شي هذا وتعرفه شحال يضر … اذا تحبها صح .. تبعد من طريقها وتخليها تعيش حياتها بكرامة بلا ذل ..وكملت خزرت في امه بمعنى شوف امك حالتها كيفاه … يحس فلكلام وحل في حلقه ..كل شي حكاته صحيح ..كل كلمة قالتها مش غالطة… وماعنده حتى رد .. ومايقدرش يعيط عليها خاطرها تخمم في مصلحة بنتها…. كيف اي ام … رجعت خطوات ورااا وكملت تحكي .. _خيرة: اياك وتضيعلي حياة بنتي .. راني تعبت عليها وكبرتها .. اياك وتكون سبب في انو تعيش تذل .. خليها بكرامتها .. الحب مشي كافي .. كاين حاجات بزاااف اذا نقصو الحاجات هذو .. يموت الحب مع الوقت .. خرجت وجبدت لباب وخلتهم للزوج لتم غارقين في حسرتهم وفي مكتوبهم والقدر لي مانصفهمش … هو وامك وحدهم لي يعرفو الوجيعة هذي وكيفاه مذاقها صعيب … #نوراااالحلقة 121:
حلت عينيها على صوت شباك لي تحل بقوة .. من كثرية الريح لي قاعدة تضرب …
نزلت رجليها على لرض حتى لسعتها لبرودة نتاع الارضية … مشات تزرب تفارع فيه باش تصكره .. عين مصكرة وعين يادوب محلولة شعرها داخل بعضه .. تنهدت وقت ماقدرتش تكبس عليه كثر ..
_نادين: افف .. هزت يديها فركت عينيها كثر باش يتحلو مليح ..وعاودت قدمت كبست عليه مليح وصكراته ورجعت ورا .. شوي وعاود ضرب في راسها لي صرا لبارح ولي عاشته كأنو حلم … بقات واقفة في نص الغرفة .. وحطت يدها على راسها تحاول تخمم .. لبارح دخل سارق وهو خاتمها .. هزت يدها بلزربة لقات الخاتم مكانش صح ..
عاودت بدات تستوعب كثر … هو بايت هنا .. مشات تجري جيهة لباب تحله لقاته مصكر .. معنتها صح مش قاعدة تنوم .. دورت لمفتاح وهزت راسها بشوي تطل .. لمحاته من بعيد راقد. ..
كبست على شفافها .. يعني للدرجة هذي كانت خايفة حتى خلاته دخل دارها …
كملت تمشي حافية على طراف رجليها .. تحاول ماتعملش صوت باش مايحسش عليها …
قربت حتى لعنده .. لقات تلفزة شاعلة .. مشات صكرتها .. وتعدت جنبه صكرت الشباك لي قاعد يعمل في صوت .. ورجعت تعدت جنبه من جديد…. وقفت تثبت في ملامحه … راقد ماحاسس على شي … حواجبه معقودين .. وشفاره دايرين .. ملامحه هادئة .. عكس وقت يكون فايق .. تحسه كرة نار قادرة تلهب في أي دقيقة …
عوجت فمها ورجعت خرجت متفادية انو يفيق ويشوفها .. شافت مع ساعة لي مقابلتها في حائط الكوزينة .. لقاتها 6 نتاع صباح …
احسن شي تعمل دوش تنشط بيه وتمشي تعمل فطور …
مشات لغرفتها هزت ثيابها ومنشفتها ومشات تجري للدوش هذاك .. صكرت على روحها .. وتفقدت لما وقت لقاته ينزل دافئ … تحت ثيابها ومشات وقفت تحته … كل شي تعدى بين عينيها .. من موت راجلها للحادثة لي صراتلها لبارح … وكلما تجي تحوس على حاجة مليحة صراتلها من لوقت هذاك ماتلقى شي .. خاطر صح لدوك مزال مارتاحتش ..ومزال حياتها ضايعة ومش عارفة مسارها وين يوصل …
فاقت من سرحتها وقت قابلها ولدها من لمرايا هذيك يبكي … ضربت راسها تلعن في روحها ..
_نادين : اففف علاه ماعملتش حساب انو ممكن ينوض …
هزت غسلت شعرها بلزربة وتشوف لولدها لي ماحبش يسكت .. أكيد راح يبكي وقت يلقى روحه وحده …
شوي وطلعت عينيها وقت شافته دز باب لغرفة ومشى جيهة ولدها .. تفزعت بعدها تذكرت انو مستحيل يقدر يشوفها … تنهدت براحة على الأقل تقدر تكمل دوشها براحتها ..وحتى من ولدها سكت وقت هزه جبل …
كملت حطت منشفة عليها ومشات جيهة لمرايا مسحت وجهاا ..وكملت نشفت شعرها وهزت ثيابها تلبس فيهم … كملت نظفت لحالة وخرجت ..
مشات لغرفتها طلت عليه …
_نادين : صباح لخير ..
_جبل: خير .. سمعته يبكي عليها جيت نشوفه ..
_نادين: صح .. كنت ندوش وماحطيتهش ينوض فلوقت هذا ..
_جبل: راح نمشي دروك ..
_نادين: اااه … تقدر تقعد تشرب قهوتك وتمشي ..
_جبل: اوكي راح نمشي نغسل …
هزتله راسها ومشات هزت ولدها باسته ورجعت غطاته
كانت راح تكمل تلعب مع ولدها .. بعدها كأنو حد فيقها ولا صب عليها كاس ما … وتذكرت نهار شكت انو شافها وقت غيرت ثيابها ..
خرجت مزروبة جيهته … اول مالمحاته وقفت قدامه تحكي ..
_نادين: لمرايا .. شفتها قبل …
_جبل: لا ستغربت .. كنت غادي نسقسيك عليها …
تنهدت براحة ..وهو لقى الاحسن انو يكذب فلموقف هذا .. خاطر كان يقولها شفتها قبل .. تتاكد انو شافها عريانة ..ومش بعيد ترجع تهرب منه .. وتنحط في موقف محرج ..
_جبل: الاحسن كون تنحيها .. يعني ماعندك علاه تخليها ..
_نادين: صح .. غير مالقيتش وقت .. دوك نبدلها .. هيا امشي رتاح فلصالون .. دوك شوي ونجيبلك قهوتك ..
_حركلها راسه ومشى وبقات هي وراه تخمم وتعاود .. أكيد ماشافهاش .. ولا علاه يكذب .. ممكن هذيك طريقته فلتعبير على الامور .. ماتفاجأش ممكن خاطر شايف كيفها قبل … حاولت انو تخمم بايجابية وماتحرقش راسها كثر .. مشات للكوزينة .. شعلت النار وحطت لما يغلي . وكملت تطيب فلقهوة بينما هو قاعد فلصالون يخمم كيفاه يرجعلها لخاتم بلاما تعرف شكون هزه ولا كيفاه رجعهلها …
#نوراااا🌹🌹🌹الحلقة 122: حلت عينيها على صوت المنبه نتاع تليفونها .. تململت في بلاصتها ..ورجعت حلت عينيها تفرك فيهم بيديها … رجعت تثاوب وناضت لبست في رجليها ومشات طول للدوش غسلت سنيها ومشات للكوزينة تحكي … _ريم: أمي وينك … _جاها صوتها من صالون تحكي … _سميحة: راني هنا .. تركزت على لباب تحكي .. _ريم: صباح لخير سموحتي … _سميحة: واش من خير .. خوك وين راه .. _ريم: علاه مارجعش .. _سميحة: لا … اسمعي مايكونش بايت عند وحدة من هذوك .. _ريم: شكون قصدك .. _سميحة: لي فوقنا وهذيك لي توشم .. _ريم : لاا أمي مستحيل .. يكون مع خالد .. ماتخمميش عليه .. _سميحة: امشي شربي قهوتك وامشي تقري .. راه عندي امال بزاف فيك بنتي … ماتخلينيش … _ريم: ارتاحي أمي … نشالله نجيب الباك ونمشي للجامعة ودوك تفرج علينا المهم نتي ارتاحي .. مانحبش نشوفك عابسة .. _سميحة: فرحتي وقت نشوفكم مهنيين .. وحاجة ماتضركم ..نتي وخوك الحاجة الوحيدة لي كسبتها من لحياة هذي … _هزتلها راسها ومشات للكوزينة .. جبدت لكرسي وقعدت عليه .. هزت الابريق لي فيه الحليب سخون سكباته فلكاس .. وهزت لعلبة لي فيها شوكولا نتاع الغبرة هزت منها مغرف وحطتها وسط لحليب هذاك تحرك فيها وتخزر جيهة لباب لي كان مفتوح .. ومن ورا كاين لبلكون لي يطل على برا وعلى سما لي مضببة … _هزت لكاس هذاك بين يديها تتحسس في سخانته ورجعت قرباته من شفافها تنفخ عليه قبل ماتترشف منه … جى لبالها فيصل .. ضيقت عينيها وعقدت حواجبها تحكي…. _ريم: زعما واش يكون يدير بعد كلام لبارح .. أكيد يكون عرف روحه مع شكون يلعب … ضمت شفافها مع بعض .. تتذكر فلي صار لبارح ..وقت هزت لمورصو هذاك وضرباته بيه على تريكوه … هزت راسها كأنو راضية على شي لي عملاته .. _ريم: يستاهل كثر من هاك .. هو لي حب يلعب معايا … هزت كاسها غسلاته ورجعاته لبلاصته ..ومشات لغرفتها لبست ثيابها وعدلت صاكها .. فردت شعرها على كتافها وخرجت بعدما سلمت على امها .. نزلت مع درجات هذوك وجبدت تليفونها تعيط لشيماء وتعاود والثانية شي ماحبتش ترد عليه .. عوجت فمها وكملت تمشي بحكم انو ليسي لي تقرا فيه مش بعيد على الحومة بزاااف … طريق لي دخلت تمشي منها خاوية … تلفتت وقت حست بطوموبيل تمشي وراها وشي هذا نتبهتله من وقت خرجت من الحومة … فلاول ماركزتش معاها اما وقت وصلت لهنا ومزال وراها معنتها لي داخلها قاعد يتعقب فيها … وقفت جامدة في بلاصتها ونزلت عملت روحها تحزم في خيط صباطها … مافاتتش دقيقة ولقاته ترجل من طوموبيل ووقف على راسها … هزت عينينا بشوي حتى ستقروو في وجهه .. دخلت بعضها ونصدمت .. _ريم: هذا نتا … تلحق فيااا .. _وجهه هادي مايدل على شي .. حاط يديه زوج في جيوبه وواقف .. شعره بلجال معدل ولحيته غازرة … لون عينيه بني قاتم … وملامحه هادية .. عكسها هي .. لي وجها حمر من لغش.. وهازة يديها في وجهه كأنو تحذر فيه … _ريم: ياك عطيتك ردي لبارح علاه باقي تهبل فيااا … _فيصل: اطلعي خلينا نحكو .. _ضمت يديها لصدرها … وكبست على شفافها تقحرله .. _ريم: مزال ماكرهتش .. _فيصل: رانا واقفين تحت دار الناس … مش بلاصة نتاع كلام .. _ريم: وانا ماعنديش الوقت لهدرتك .. هيااا ماشية نقرااا … تلفتت راح تمشي شدها من صاكها جبدها ليه .. مالحقتش تعيط .. حتى حط يده على فمها صكره وكركها جيهة طوموبيخلها وصكر لبواب .. تلفتت راح تحل ماقدرتش رجعت تضرب فلباب .. ستناته اول ماركب وتلاحت عليه تعيط وتضرب فيه … طلع زجاج طوموبيل وين مايقدر اي حد برا يشوفهم … وتلفت يخزر للمرايا يعدل في خصلات شعره لي بعثرتهم … بقات تخزرله تستنى فيه وقتاش يكمل لعب صامط هذا وشي … _ريم: لي تعمل فيه غالط … ماراكش عارف في شكون طحت…. تلفت يشوف ليها ورجع يحكي .. _فيصل: واش لكلام هذاك نتاع لبارح .. سكتت تخمم ومن بعد تذكرت على واش يحكي .. _ريم: تحب تعاود تسمعه راه ساهل … _فيصل: وقحة .. _ريم: حلي لباب يا خرااا عندي قراية … _فيصل:مانحلش ..حتى تعتذري على لي عملتيه قبل ..وبعدها نحكو فلمفيد … _ريم: واش تحتاج مني من تالي … _فيصل: ساهلة .. اخرجي معايا نهار واحد قدام صحابي .. نعطيك دراهمك وبعدها كل حد في طريق … صكرت عينيها بملل .. وطبقت يديها للزوج لصدرها .. وعدت لسانها على شفافها وهو باقي يخزرلها يستنى لي جوابها .. _ريم: اسمع … _تبسم بغرور وقت حسها بدات ترضى .. _فيصل: اطلبي لي حبيتي … _بقات تأخذ في شهيق وزفير ..تحاول تهدي روحها وهو طلع حاجبه مستغرب .. _فيصل: ياخي راح تولدي نتي … شافت ليه وطرطقت في وجهه .. حتى نتفض في بلاصته ورجع ورا _ريم:يااا ##### ########### .. حل لباب #نوراااا🌹🌹🌹لحلقة 123: شاف ليها … ورجع حط يديه على وذنه … ورجع بعدهم بشوي حل فمه على وسعه .. وهي باقي تخزرله .. _فيصل: والله تقول راجل … في شكون طحت انا … _ريم: نعريلك باش تتاكد اذا راجل ولا مراة … حل لهم تاع لباب ..وبعد عليااا .. علاه نمشي معاك انا … واش دخلني فيك وفي صحابك … دور وجهه منها وحرك طوموبيل … تلفتت تخزر للطريق ورجعت تضرب فيه .. _ريم: قتلك نزلني .. _فيصل: مابقاش وقت .. خلي نوصلك ونمشي … بقات تثبت في ملامحه تخمم اذا توثق فيه ولا لا ..ورجعت حركت راسها بواه وكملت عدلت روحها .. لفتت وجها منه ..وخزرت مع لوقت تحكي مع روحها .. _ريم: صح عمل حاجة مليحة خلي يوصلني .. كنت راح نتاخر واذا تصكر لباب ماعنديش واش نعمل ونضطر نهز جبل يدخلني .. وراح يبقى يعمل في تحقيق معايا علاه تاخرت … ولا يتعارك مع لمدير لي يبقى يخزر ليديه الموشمين … اول مافاقت من سرحتها .. لقاته ا ماشي بيها في طريق خلاف .. عكس طريق لي توصل لليسي … شافت ليه تمهمه .. _ريم: وين ماشي … وين رانا رايحين … اسمع .. هاي .. راح نبدا نعيط … ماردش عليها وكمل يسوق .. جبدت تليفونها راح تعيط لشيماء فكه منها يحكي .. _فيصل: نهار هذا راح تعملي واش نطلب منك .. خاطر نتي سبب فلي راني فيه … _ريم: واش قصدك .. اطلق تليفون .. ياخي لصقة نتا … _فيصل: كنتي تعرفي واش تحكي قبل .. _ريم: واش حكيت انا .. _فيصل: تذكري .. _سكتت تتذكر واش عملت باش تسلط عليها لعبد هذا من شهر كل مرة في وجها .. _ريم: ماعملت شي .. لي نتذكره انو نتا خرجت في طريقي ..ومن وقتها تلاحق فيا .. فيسبوكي ماعرفتش مين جبته .. كل حاجة تخصني ماعلاباليش من وين جبتها … وماتبدلش الموضوع قتلك نزلني .. نزلني وين هازني … _حبس طوموبيل على جنب نزل ومشى جيهتها ينزل فيها .. _ريم: واش تدير ..وين جبتني .. _فيصل: عايلتك تقدري تقوليلهم راح تباتي عند صحبتك .. حلت عينيها على وسعهم وشدتها صاكها بين يديها وهو يجبد فيها يحاول يخرجها وشي .. _ريم: واش تحب .. ماتقوليش برك لي في راسي .. حاب تاخضني .. _فيصل: واش كلمة هذي .. _ريم: صح قديمة جداتي تقوللنا الحاج خاصني وانا صغيرة ومافقتش حتى فاتو 10 سنين من زواجنا .. قلب عينيه منها تاع واحد مش فاهم واش تحكي .. _ريم: بعد .. راهي ڨوينة .. يعني مانتفاعلش مع رجال .. بعد من طريقي .. جبدها طاح صاك من يدها وطاحت هي في لرض .. تناثر شعرها على وجها .. بقى يخزرلها ونزل راح يهزها ضربت يده بعيد تعيط … _ريم: واش تحتاج مني … _فيصل: اخرجي معايا ليلة ..وبعدها امشي مانعرفك ماتعرفيني .. _ريم: وقرايتي .. غدوة شكون يدخلني .. اذا لا برااا وزيد هزيتهم يدخلوني يعرفو بلي صرات حاجة .. وانا مانعرفش نكذب .. _فيصل: هيه باين على وجهك .. _ربم: معنتها مكانش حل لازم نمشي .. جات تهرب جرا شدها من كتافها بزوج يدين .. _فيصل: وين هاربة .. قتلك ساهل غدوة نلقى شكون يدخلك .. هيا تحركي قدامي .. _ريم: صحاا خلينا نتفاهمو بلعقل انا واش درتلك .. _فيصل: بسبتك تشهوت سمعتي بين صحابي .. تذكري واش حكيتي قبل من شهر في جماعة… حركت راسها بلا بمعنى ماعملت شي خاطر صح مشي متذكرة .. _ريم: ادخلي .. ودوك ليلة تنشط ذاكرتك مليح وتتفكري واش عملتي .. _بقات جامدة وهو يجر فيها بسيف جيهة دار . وهي تحاول تهرب منه .. #نورااا🌹🌹🌹الحلقة 124: هزت ولدها غيرتله ثيابه .. ورجعاته لبلاصته وخرجت بشوي .. حلت باب عرفتها تخزر لغرفته لي مقابلتها … مزال مش عارفة اذا راه هنا ولا بات برا ليلة لبارح كيف عوايده … مشات بشوي جيهة غرفته حلتها .. وطلت براسها .. لقات سرير منظم … جى لبالها انو بات برا .. رجعت صكراته تمتم بين شفافها ….تعدت طول للكوزينة .. شعلت على النار وعملت حليب لولدها ..ومشات حلت لبراد جبدت قرعة نتاع عصير سكبت كاس شرباته ..وهزت قرعة ولدها تحرك فيها .. وتتفقد في حراراتها .. جبداته لحضنها وبقات ترضع فيه .. وتخمم واش يكون عمل … الوقت هذاك بلذات في غرفة من غرف الملهى هذاك .. كان راقد على سرير هذاك كامل على كرشه … ومصكر عينيه بهدوء .. نفس نتاعه منتظم .. وهي جنبه شعرها مفرود على الوسادة هذيك … وتخزرله .. كأنو تحاول تحفظ ملامح وجهه وتشبع منه قبل مايفيق من سكرته ويخزرلها بنفس البرود لي يشوفلها بيه وقت يكون صاحي … مدت يدها على طابل دونوي لي جنبها هزت تليفونه حلاته قبل مايفيق ودخلت تقلب وسط الصور .. لقات معظمهم لولده .. ووحدة برك لي فيها مرته وبلين مصورها بلاما تفيق .. ضحكت على حالته متحسرة تحكي داخلها .. _جوري: ياحرام …والله حالتك تغيض .. ربي يعطي النعمة للي مايستحقاش .. خسارة هكاك ليها وهي مشي حاسة بقيمة الجوهرة لي عندها … رجع صكرت تليفون حطاته على جنب… عاودت ضربت فكرة في راسها جبدت تليفونها وهزت رقم مرته سجلاته عندها…. ورجعت عملت روحها راقدة … الوقت هذاك هو بدا يفيق .. تململ ا في بلاصته حط يده على جبينه يخزر للسقف .. بعدها كأنو ستوعب هو وين .. ناض بزرب خطف سرواله لبسه ..وعاود رمى عينه جيهتها .. جبد بوشاته حطلها دراهم على طاولة ..وهز شوميزته يلبس فيها مقابل لمرايا … _عملت روحها بدات تفيق … تقعدت في بلاصتها وتعمدت تنزل لغطى من على كتافها تحكي .. _جوري: صباح لخير … _كمال: خير … هبط خطف صباطه يلبس فيه .. كأنو هارب من خطيئته لي عملها وقت كان سكران … ديما يعمل لحاجة هذي… يغلط فليل واول مايطلع نهار يحس بغلطته … _جوري: كمال .. تلفت ليها مضيق عينيه .. _كمال: من وين تعرفي اسمي .. _جوري: نتا حكيتهلي نسيت .. _كمال: تفضلي .. _جوري: شي ..وقتاش نرجع نشوفك .. _كمال:علاه خدمتك تقولك سقسي وقتاش تعاودي تشوفي زباينك … _سكتت وقت حست كلامه صح يوجع .. مرات مانحسوش باغلاطنا غير وقت يواجهونا بيها … تبسمت وشافت ليه تحكي .. _جوري: لي مميزين أكيد نسقسو عليهم … _كمال: عن اذنك راح نمشي .. هز ساعته لبسها ..وكمل مشى جيهتها حط يده على طابل دونوي هز تليفونه حطه في جيبه وخرج وجبد لباب معاه … رجعت رتمات على سرير .. تحكي داخلها .. _جوري: راح تعبني باين .. بصح تستاهل اني نتعب على جالك … خلي شوي شوي ونجبدك ليا .. نقطة ضعفك باينة ونعرف كيفاه نستغلها .. واي راجل في حالتك ..راح يطيح في اول مراة تعطيه الاهتمام لي يحوس عليه ..ولي تحوس عليه نتا عند جوريتك .. (😂😂😂 وينك حورية وينك) #نورااا🌹🌹🌹لحلقة 125: حل عينيه على شعاع الشمس لي داخل من برا وساطع في وجهه .. تململ ورجع حل عينيه .. قابلاته الساعة لي تكتك فلحيط .. رمى لغطى من فوقه ونزل رجليه على لرض .. عدى يده على وجهه وتنهد .. وقف ومعاه طاح لخاتم من جيب لفاست نتاعه … نزل للرض هزه بين صباعه يخزرله … جات صورة ولدها بين عينيه وهو يخزرله … هذاك اكثر مشهد قسمله قلبه .. ممكن يبقى في ذاكرته الباطنية .. ممكن وقت يكبر يتذكر الموقف هذاك … ويتذكر كيفاه كان عاجز انو يعاون امه … هز روحه كأنو خذا قراره … حط الخاتم في جييه. وتعدى للدوش غسل وجهه وكملل بلل شعره بيده رجعه وراا وخزر لروحه فلمرايا حاط يديه زوج على الرخامة … _خالد: واجه مشاكلك .. ماتكونش جبان وتهرب .. اذا تستاهل تخلص حسابك خلصه بلاما تهرب ولا ترمي ثقلك على حد … خهز المنشفة نشف قطرات لمردا لي علقو في لحيته وتعدى خرج طول قبل ماتشوفه سكينة امه … نزل للتحت ووقف قدام دار نادين .. هز يديه حطهم على لباب يدقدق .. _الوقت هذاك جبل قاعد يترشف في قهوته وهي في غرفتها مع ولدها .. وقت سمع صوت لباب مشى يزرب يشوف شكون .. حط عينه على لفتحة نتاع لباب .. لقاه صاحبه حل عليه طول معصب يحكي بشوي باش ماتسمعهش نادين .. _جبل: شا جابك هنا على صباح ربي ..ولا جاي تكمل على لمخلوقة .. دخل خالد يده في جيبه جبد لخاتم هذاك ..وحطهله في يده يحكي .. _خالد: شد رجعهلها وقولها تسمحلي ماكنتش في وعيي .. _جبل: كيفاه .. ادخل نتا عتذر ورجعه .. _نزل وخلاه واقف يسب فيه من وراا .. تلفت على صوتها واقفة ورا هازة ولدها تحكي . _نادين: شكون جى .. تلفت جيهتها مش عارف واش يحكي … صاحبه حطه في وضع مشي مليح معاها ماعملهش حساب من قبل .. _شافت ليه مستغرب ورجعت هبطت عينها ليده كانو مخبي عليها حاجة .. _نادين: واش كاين .. _جبل: خاتمك .. _نادين: واش بيه .. _جبل: قدرت نرده .. قصدي هاهو .. شافت ليه مستغربة ورجعت شافت للخاتم لي في يده .. _نادين: خاتمي .. هذا خاتمي صح .. قربت منه ومدت يدها شداته عليه تحكي .. _نادين: وين لقيته .. _جبل: لي سرقه جى رجعه .. _نادين: شكون هو .. سكت ماعرفش كيفاه يقوللها راه خالد … قاطع حديثهم صوت لعياط لي جاي من برااا.. _نادين: واش كاين .. ضيق جبل عينيه ومشى جيهة الشباك لي يطل على برااا يشوف واش كاين … لقاه ا خالد تحت يعيط .. _جبل: حمار .. شاراك تدير ( تمتم بين شفافه ) ونزل يجري وخلاها واقفة شادة ولدها بيد وليد ثانية تخزر لخاتمها … #نورااا صوت عياطه خلاهم كامل يحلو شبابكم ويطلو عليه .. رانيا راقدة في سابع نومة .. وقت سمعت صوته .. حطت روحها تنوم .. اما صوته ماشي ويعلى .. حتى حلت عينيها وهي مزال باقي تسمع فيه .. تلفتت تشوف مع غرفتها .. ورجعت ركزت كثر .. بعدها نزلت تجري حلت الشباك تبع فلصوت حتى لقاته تحت يعيط .. مفهمتش واش صراله … _خالد: رضااااا .. اخرج راني تحت … يحكي ويبدا يعيط بعدها يسكت شوي .. اميمة لوقت هذاك تغسل فلقش … وتشلل فيه باش تنشره .. بعدها سمعت صوته فلاول كذبت ..ووقت سمعاته يعيط باسم خوها تأكدت بلي هو .. _اميمة: ياربي هذا الحمار واش يدير .. كاين حد يسكر على صباح ربي .. خرجت للبلكون تعيط عليه من لفوق … _اميمة: واش بيك على صباح ربي تعيط … _خالد: عيطي لخوك .. قوله دراهم مكانش بح .. ضرب يديه زوج مع بعض بمعنى مكانش .. _اميمة:, نتا عظامك ياكلو فيك في بالي .. امشي تخبى لا يجي يكسر واش باقي صحيح فيك .. _خالد: رضااااا .. اخرج .. ارواح ادي حقك مني ..دراهم مكانش… #نوراااا🌹🌹🌹

Leave a comment