Skip links

قصة عاهرة الحي… ج 2

 4,484 عدد مشاهداات

لحلقة 21:
بلعت ريقها وهي تشوف في انعكاس رانيا .. واقفة تتصور بلتليفون .. هزت يدها عملتلها اشارة شافتها ماتجاوبتش معاها .. جمدت في بلاصتها وحاجة وحدة جات لبالها .. انو صباح دخلت بنفس لغرفة وغيرت ثيابها .. الوقت هذاك جبل كان هنا يخدم فلسبالة …
خرجت تجري راحت لعند رانيا تعيط ..
_رانيا: ياخي واش صرا فزعتيني .. ماتقوليليش فار وخلاص .. راني نخاف منهم نموت …
_نادين: مش فار .. اما الحقيني تشوفي ..
_رانيا: واش كاين ..
_نادين : ازربي ..
لحقتها تشوف واش كاين ..
_رانيا: واش ..
_نادين: اخزري … المرايا ..
_رانيا: واش بيها ..
_نادين: شوفي .. هذي مش لغرفة لي كنتي فيها .. يعني نقدر نشوف اي شئ يصرا فلغرفة ونتي ماتقدريش تشوفيني ..
_رانيا: صح .. سامية لي كانت هنا قبلك كانت عاملتها هي وصاحبها .. مسميينها مرآة الحب … خخخ
_نادين: رانيا ركزي معايا .. انا قدرت نشوفك واش كنتي تديري .. معنتها حتى هو شافني صباح ..
_رانيا: شكون قصدك …
_نادين: نحكي على لكلوشار هذاك .. لي كان يخدم فلسبالة .. ياربي .. واش من موقف طحت فيه ..
_رانيا: لا مانظنش .. خاطر خرج ..
_نادين: متأكدة ..
_رانيا: هيه شفته خرج اول مادخلتي لغرفة هو خرج .. ممكن ماشافكش ..
_نادين: صح .. فرحتيني والله قلبي كان راح يحبس .. ياك رانيا متأكدة انو ماشافنيش …
_رانيا: هيه اتهني .. كان شافك راه قعد يتفرج علاه يضيع على روحه ههه
_نادين: احشمي ..والله قلبي حب يوقف ..
_رانيا: ارتاحي .. كان شافك راه قعد .. مادام خرج معنتها ماشافكش .. اي راجل بلاصته راح ستغل الفرصة ..
_نادين: خلاص اقنعتيني .. مالا خلينا نكملو نضفو .. وراح نحيها لمرايا هذي .. منحوسة ..
_رانيا: خلاص مالا صبري نحي لباسي ونجيك ..
قضاو ليل كامل وهوما يجرو وينقلو فلاثاث .. حتى جى نص ليل طاحو في لرض مستسلمين للتعب ..
_نادين: مالقيتش كيفاه نشكرك .. تعبتك معايا ..
_رانيا: معليش أصلا انا كان خاصني شكون تونسني وهاكي جيتي نتي ..
_نادين: علاه ماعندكش صحابات لهنا ..
_رانيا: مايتعاشروش .. تمديلها سرك تمشي تخلي الدنيا لكل تسمع بيك ..
_نادين: حتى أنا ماعنديش صحابات .. وليد كان حياتي لكل .. ماكنتش نحتاج لحد بوجوده … تعرفي رانيا .. مزال مش عارفة ومش مستوعبة انو لحياة سرقاته مني ..
_رانيا: كان مريض ..
_نادين: حادث سير .. دخل كومة قعد سمانة بعدها مات ..
_رانيا: أجله كمل نادين .. بصح صدقيني لحياة ماتوقفش .. حتى وماحبيتيش تكملي تعيشي تلقي روحك مجبورة انك ترجعي لحياتك طبيعية وتكملي وين وقفتي ..
_نادين: مانعرفش .. وين ما نشوف نتذكره .. مش قادرة ننساه .. حتى في احلامي ديما حاضر ..
_رانيا: الوقت ينسي … ياما نسا بكاو على رجالهم الدم وبعدها نساو وكملو حياتهم ..وكاين لي عاودو حياتهم من جديد وتزوجو وعملو عائلة ..
_نادين: مانتوقعش شي هذا يصرا معايا .. من سابع المستحيلات نقبل انو حد غير وليد يمسني ..ولا نشارك سرير مع غيره .. حتى النفس لي نتنفسه وانا بعيد عليه نحسه مش نظيف ..
_رانيا: هههه تفكيرك هذا نفس تفكيري في مراهقتي .. الحب رجعني مهبولة .. اذا صار ودخلت ريحة حد ثاني خشمي .. نصكر نيفي ونبعد .. ونهرب بعيد .. كأنو مانحب حد يدخلني غيره .. التفاصيل فلحب ترهق ..ترهقك لدرجة تخليك تبكي على ابسط الامور …
_تلفتت جيهتها وتركزت بيدها تحت راسها تحكي ..
_نادين: مانتصورش نقدر نتخلص من التفاصيل هذو .. خاطرني عايشة على جالهم …
_رانيا: مانعرفش… اما نظن انو مع الوقت راح يتبدلو حاجات بزاف .. ولدك راح يكبر .. راح يحتاج اب في كتافه ..نتي ماراحش تكوني قادرة تتحكمي في كل شي .. سيف يلزمه اب ..
_نادين: مستحيل .. مستعدة نكون الام والاب ومانخليش حد يدخل حياة ولدي وحياتي ويقلبها …
_رانيا: اششش ..
_نادين: واش كاين ..
_رانيا: دقيقة ..
هزت روحها تجري ووقفت قدام لباب تخزر من الفتحة لي ليه .. تسمع في صوت خطواته نازل مع الدروج .. حتى لمحت وجهه كمل نزل ..
_نادين: واش كاين ..
_رانيا: شي .. غير سمعت صوت غريب ..
مشات وقفت قدام الشباك وبقات تتفرج مع عتمة السما .. وبعدها لمحاته نزل تحت واقف قريب من عمود الانارة وهاز تليفون ..
تبسمت بمراراة ورجعت حطت يدها تحت خدها ..
_نادين: هو صح ..
تلفتت شافت ليها لقاتها واقفة جنبها تخزر فلاتجاه لي تشوف ليه هي ..
_رانيا: واش قصدك مفهمتش ..
_نادين: هو حب مراهقتك .. لي واشمة اسمه تحت سرتك .. صح ..
#نورااا🌹🌹🌹
جام + كمنتار تفاعلووو شوي ونحط لي بعدهالحلقة 22:
تلفتت تشوف ليه ورجعت تحكي ..
_رانيا: واش لفايدة اذا كان هو ولا لا ..
_نادين: كاين .. ممكن انتي لي ماعملتيش خطوة جيهته ..الظاهر فيك لدوك مزالك تحبيه ومانسيتيهش ..
_رانيا: هههه تعرفي واش يضحك فلموضوع … انو مش كل شي نتمنوه نلحقوله حتى وكان طاح بين يدينا يبقى بعيد ..
_نادين: مفهمتش ..
_رانيا: تعرفي وين ماشي دوك .. رايح يسهر .. ويصبح راقد في حضن وحدة خلاف .. فلوقت لي انا نكون هنا نبكي عليه . وقلبي يوجع فيا .. هو يكون يستمتع مع وحدة خلاف ..
_نادين: يعرف انك تحبيه ..
_رانيا: مايعرفش ومانحبهش يعرف من الأصل ..
_نادين: علاه يقولك مرتي ..
_رانيا: نفس لكلام لي كان يحكيه قبل سنين .. مرتي ..وقت تكبري نتزوجك .. وانا كمراهقة هزيت كلامه في راسي حطيته صح وقعدت يوم بعد يوم نغرق فيه .. صدقت الحب هذاك ..بعدها بديت نفيق على وضعي وقت نلقاه صاحب نص بنات الحومة ومشى معاهم .. كنت نقول لا ممكن انا يحبني وحاطني للزواج وهوما يضحك عليهم .. تعرفي كلام هذا تاع لبنات لبهاليل .. كنت هاك نخمم .. بعدها يوم بعد يوم وشهر بعد شهر فقت .. انو كلامه هذاك كان مزحة يحكيها مع بنت الحومة نتاعه .. وانو انا لي كنت فاهمة غالط …. هو كان عاملها مزحة وانا لي بنيت حياتي عليها …
_سكتت نادين وبقات تشوف ليها كيفاه عينيها تعبو بدموع رغم انها تحاول تكتمهم ..
_رانيا: قتلك الحب فلحومة هذي مستحيل .. مكانش لي يحب .. ببساطة يكسرو لقلوب ويعفسو عليها … انا مانلومهش خاطر مش ذنبه انا لي خممت بلغالط … اما كل مرة نفيق على صوت خطواته ونشوفه ماشي يسهر .. نحس قلبي يخنق فيا .. كأنو النفس تصكر عليا .. كيف ليلة هذي .. ماشي لبلاصة بعيد ويترمى في حضن مراه خلاف مش حاسس ولا عارف انو كاين بنت فلوقت هذاك بلضبط تبكي عليه .. لو تعرفي يا نادين واش عشت بسبته ..
_نادين: هو الخاسر خاطر ضيع طفلة كيفك .. وزيد كيف ماقلتي مايستلهلكش .. ومايصلحش للزواج من الأصل ..
_رانيا: الكلام ساهل .. هاكي نتي قدرتي تنسي وليد راجلك رغم انو ميت وتحت تراب وماكانش أمل انو يرجع يحيى ..
_هزتلها راسها بلا وكتمت دموعها …
_رانيا: مابالك انا لي عايش ونشوف فيه قدامي كل يوم ..ونحكي معاه ونتضارب معاه ونسبه ..وفي داخلي حب كبير .. مهما فاتو سنين ماقدرتش نتخلص منه ..
_نادين: ماعرفتش واش نحكي صراحة … من غير انو نشالله يجي نهار وتقدري تنسيه وترمي الحب هذا من قلبك ..
_هزتلها راسها ورجعت شافت ليه تحت واقف متضارب مع لفاست نتاعه .. تبسمت وهي تخزرله .. مرات مانحتاجوش نملكو الانسان هذاك بين يدينا .. نحتاجو فقط انو نشوفوه ونعرف ابسط التفاصيل عليه …
_نادين: وقتاش عرسك ..
_رانيا: بعد 6 اشهر ..
_نادين: مابقاش بزاف مالا .. ممكن بعد زواجك تنسيه ..
_رانيا: ههههه تعرفي واش نادين .. انا مقطوع الامل مني … باش ننساه ماننساهش ..حطيها في راسك هذي .. اما قدرت نتعايش مع الموضوع هذا ..وماتخافيش حبي ليه يخليني فرحانة وحتى وكان من طرف واحد .. وغلطتي انا طحت فلشخص لغلط وفلوقت الغلط .. خاطر المراهقة هي أصعب شي ..وانا فوتتها بيه .. ودوك عادي نخمم بعقلي ونعرف خياراتي واولوياتي .. بصح باش ننساه ولا نقدر نخرجه من قلبي موحال .. تعرفي نادين واش هو أصدق حب ..هو الحب هذاك لي مش كامل .. الحب لي يتفرقو فيه زوج حبو بعض بسباب الموت لي تزورهم فجأة ولا الحب من طرف واحد .. لي يعيش رغم كل شي .. تعرفي لغنية هذيك تاع “أنا في الحب ” تمثلني بالضبط … خلي لي فلقلب يبقى فلقلب …
رجعت دورت راسها تبع فيه بعينيها وهو ماشي خارج برا الحومة هذيك .. لبلاصة بلنسبة ليها حبل مشنقة لقلبها .. ولحبها …
#نورااا🌹🌹🌹لحلقة 23:
حل عينيه على صوت تليفون يفيبري وسط جيبه جبده يشوف شكون وسط العتمة لي راقد فيها …
_جبل: واه .. الوو ..
_خالد: ياخي وينك راني تحت نستنى فيك .. هذي هي نسهرو راك راقد ..
_جبل: سمحلي صاحبي بصح ماغاديش نقدر نجي غير روح بلا بيا ..
_خالد: واش كاين ..
_جبل: والو .. غير حاس روحي مش مليح .. خلي غدوة نهدرو ..
_خالد: اوكي براحتك مالا ..
علق عليه ورجع شاف للصالون .. شاف مع لوقت نص ليل ..
رجع راسه ورااا وبقى يخمم .. حياته بلا هدف .. بلا اي شئ .. عايش وخلاص .. اكثر شعور يقتل الانسان انو يعيش حياته بلا هدف .. انو ايامه تكون هاك بلاش شي .. كل يوم يشبه للي قبله .. مكانش تغيير ولا شي يفرح ..
تنهد وهز روحه وقف خارج ..بعدها رجع سكت وقت سمع اصواتهم ..
_حورية: يا بهيمة علاه ماتحبيش تفهمي .. نتي أصلا قعدتك هنا بلا فايدة جايبة لهدرة لروحك وخلاص ..
_بشرى: اسكتي صحااا راح ينوض ويسمعك ..
_حورية: خلي يسمعني .. أصلا عندي شحال ساكتتلك وقاعدة نقول خلي راهي كبيرة وتفهم وحدها .. اما نتي ماشي وتقبلي بلذل …
_بشرى: يعني راح نتقابضو دوك ..ولا كيفاه .. دار أصلا هو كاريهالي وهو يصرف عليا ..وبسبته حبست رقص فلبار هذاك ..
_حورية: وعايشة هنا على اساس عاهرة ليه ..وقت يكون متضايق يجيك صح ولا مش صح ..
_بشرى: علاه ديما ماتحبيش تفهميني .. راه جبل مش كيفهم .. هو أصلا ولا مرة حسسني اني مانسواش كيف ماراكي تحكي ..ولا مرة حكى معايا بكلام مش مليح .. عكس لي لابسين قناع رجولة وهوما مايسووش حتى ريحتها ..
_حورية: واش قصدك .. تشري على راجلي بلكلام هذا ولا واش ..
_بشرى: واش من راجل … راجل لي يغيب بسمانة على مرته ويجي يضرب ويمشي مع صحباته .. راني ساكتة ونقول راهي ختي معليش .. بصح با مدام راجلك يظل ساهر فلبار لي كنت فيه ..ويضيع في دراهمه على لي كيفي .. وتجي نتي دوك تلوميني وتلومي جبل ..
_سكتت ختها ووجهها مشى اشكال والوان … ماقدرتش نزيد حرف معاها .. هي صح تعرف راجلها وعاداته بصح ماتصورتش انو كاين شكون يعرف بلي يعمله .. خاطرها ديما مصوراته بطريقة باهية قدامهم …
_حورية: يعطيك الصحة بشرى .. ماخليتي ماحكيتي .. يعطيك الصحة ..
_بشرى: ماكنتش نقصد .. بصح هذا هو الواقع .. نتي لي مرته وماشي لبنات الحرام .. جاية تلومي في جبل لي مش متزوج حتى بيا…
_حورية: خلاص صكري الموضوع ودبري راسك واش تحبي تعملي ..
شوي وسمعو صوت لباب تاع برا تصكر .. شافت ليها بشرى مفزوعة وخرجت تجري للصالون مالقاتهش .. مشات تجري للباب سمعت صوت خطواته نازل مع الدرجات ..
_بشرى: اففف أكيد يكون سمع كلامنا ..واش راح يدير دوك .. أكيد راح يبعد عليا .. اففف كل شي بسبتك مليون مرة قتلك صكري السيرة هذيك عليا …
_حورية: خليه يسمع ممكن يفيق على روحه هاك …
#نورااا
اول ماخرج للحي نتاعهم بقى واقف تحت سما هذيك ..ونسمة باردة قاعدة تضرب .. ولمطر كانت غير كيف حبست ..
مشى جيهة لبناية نتاعهم وطلع مع درجات هذوك حتى وصل للايطاج نتاعهم.. قعد على درجات هذوك وشد تليفونه بين يديه ضايع ومش عارف واش يدير .. كل شي يمسه ولا يحط عليه يده يخربه ويضيعه … حتى روحه ماعادش طايقها من الأصل .. رجع راسه مع لحيط وصكر عينيه على لحالة هذيك ..
الوقت هذاك رانيا ونادين كانو فرشو زرابي في لرض وحطو لحافاتهم وغطسو فلنوم بعد تعب نهار طويل …
ليلة هذيك كانت طويلة وباردة على كل حد منهم ..وفي نفس الوقت طيرت النوم من عينيهم كامل …
خالد فلبار هذاك يشرب في كاس ورا خوه .. رغم انو لبنات دايرين بيه .. وقاعد يستمتع الا انو مش فرحان .. مش لاقي السعادة لي يحب عليه … كأنو انسان ضايع هو الثاني .. وين مايحب يهرب يجي للبلاصة هذي لي رجعت هي بذاتها مش مريحاته …
كاس مور خوه حتى رجع مش صاحي .. خرج لبرا يمشي مع طرقان هذوك .. كأنو داخله يحب حد يضربه يعيطه طريحة تاع كلاب تفيقه على الوضع لي هو فيه … لمح جماعة قاعدين بعيد قعد يسب فيهم ويستفز فيهم غير باش يجو ليه … وعلى قد ما طفوه قعد مصر .. ماشي جيهتهم وباقي يسب .. مارتاح حتى طاحو فيه يضربو بكل جهدهم من كل جيهة وطريق .. مابعدو عليه غير وقت رجع دم ينزل من فمه وجسمه مكسر كامل يحس فيه مرضرض … تبسم وهو هكاك في لرض وقعد يخزر فلسما .. داخل كل حد فينا وجيعة كبيرة ماحاس بيها حد غيره .. ومايحب يشاركها مع حد مهما كان … مرات فلالم نلقو راحتنا .. نلقو ملاذنا نحسو انو خلاص بعد شي هذا راح ترجع حياتنا طبيعي أما اول ماتطلع شمس نهار .. يرجع لحزن يزور قلوبنا واليأس يحاوطنا …
نادين هي الثانية .. عينينها ماتغمضوش .. التخمام ماحبش يبعد من راسها .. انو فجأة بين ليلة و نهار حياتك تتبدل 180 درجة وتلقي روحك وسط ناس جدد .. بعيد على لبلاصة لي نتي كنتي تشوفيها عالمك الخاص بيك .. كاتمة صوتها ودموعها ينزلو ماتحبش رانيا تسمعها ولا تنزعج بيها .. على قد ماحاولت تفوت نهارها بقوتها .. الا انو اول ماطاح ليل وحطت راسها على لوسادة رجعت الذكريات حاوطتها من كل جيهة وحرمت النوم من عينيها …
تلفتت شافت لرانيا عند بالها راهي راقدة ..والثانية ماكانتش قل منها .. حاطه يدها على الوشم لي تحت سرتها .. ودموعها ينزلو … مش كل عبد يضحك معنتها فرحان مش كل عبد يحكي معنتها خرج لكلام لكل .. الحزن ديما مكبوت الداخل .. كابتينه بطريقة مانحبو حد يشوفه …
الحياة على قد ماهي بسيطة معقدة في نفس الوقت … شي الوحيد لي تعلمته من الحياة انو مانحكمش على العباد من الغلاف .. ومانعطيش احكام ومواعظ قبل ماننحط في نفس الوضع لي لحد هذاك فيه ..
#نوراااا🌹🌹🌹🌹لحلقة 24 :
بعد ليلة طويلة باردة .. طلعت شمس نهار جديد .. وعلى صوت لمنبه نتاع تليفونها حلت عينيها .. هزاته بين يديها طفاته ورجعت دورت عينيها لولدها لي راقد قريب من صدرها .. عدت يديها على ظهره بحنانة وقربت باسته من راسه ..وجبدت روحها منه بشوي قبل مايفيق ..
شافت للجيهة ثانية لقات رانيا مزال غاطسة فلنوم .. حتى هي تعبت معاها لبارح وعاونتها بلا مقابل ..
هزت روحها وقفت ومشات للدوش طول .. شعلت النور نتاعه وتفقدت السبالة لقات لما ينزل …
رجعت حلت فاليزتها جبدت منشفة نتاعها ولي برودوي لي تستعملهم .. اول مادخلت للدوش صكرت لباب وكملت هزت غطى .. حطاته على لمرايا هذيك بينما نحتها ..
حلت لما لي بدا بشوي يدفى .. طلعت يديها نحت لباسها وحلت شعرها وقربت وقفت تحت لما هذاك لي بقى ينزل عليها ويغسل في كل جزء منها .. شوي شوي حست روحها رتخفت وبدات ترتاح …
#نادين تحكي …
نحس في كل جزء مني مهدود .. وفي نفس الوقت نحس انو حد قاعد يضغط على قلبي … مانعرفش اذا راح نرتاح مع الايام الجاية ولا لا … مش خايفة من المستقبل .. لي خايفة منه اني نمشي بلا هدف .. مش عارفة حياتي في أي ميناء راح ترسي … كأنو العاصفة لي داخلي راح تبقى مستمرة حتى تغرقني ..وتقلب بيا الزورق لي انا فيه …
ماراحش نقول حياتي كانت كاملة قبل مايدخل وليد حياتي .. خاطر حتى حد ما حياته كاملة .. اما وقت دخلها هو حسيت روحي وصلت للكمال مع انو مستحيل حد يوصل للنقطة هذيك .. سعادتي كانت في وردة حمراة يجيبهالي ولا حضن دافي يمدهلي ..ولا كلمة حلوة نحل عينيا بيها .. حياتي على قد ماكانت بسيطة كنت نحسها كاملة …
حلت عينيا وتركزت مع الحيط وخليت لما ينزل عليا كامل … ممكن لي مصبرني هو ولدي صغير .. وقت تحسي انك مسؤولة على حياة حد ..وانو اذا حاولتي ترمي روحك للهاوية راح تجريه معاك حتى هو … ماعنديش عايلة .. عائلتي الوحيدة كانت وليد … وحتى هو سرقاته الحياة مني ..مش حابة حتى ولدي يعيش واش عشت انا .. مش حاباته يكبر وحيد .. وتمشي الالوان من حياته … يكفي اني نكون انا موجودة معاه .. ونشد يده في كل خطوة يعملها ..
تنهدت ..ورجعت صكرت لما هذاك وهزيت المنشفة حطيتها عليا ووقفت قدام لمرايا نخزر مع ملامح وجهي .. مانعرفش واش تبدل فيا .. ممكن خسرت خمسة كيلو ولا كثر ..ولا ممكن طفات الشمعة الضاوية لي كانت في حياتي …
هزيت يدي نمسح فلبخار لي علق فلمرايا هذيك .. نثبت في ملامح وجهي الباردة .. وفي تفاصيلي لي يوم بعد يوم قاعدة تذوب وتتبخر …
نزلت دمعة سخونة مع خدي خلاني نتفض في بلاصتي .. مش وقت لبكا .. اذا بقيت على الحال هذي لي يجي يشفق عليا ويعفس على كرامتي .. كيف ماكان راح يعمل حمزة .. اول مايشوفو امراة مكسورة وضعيفة يجرو ليها ويتلفو بيها ويحبو يسرقو واش بقى حي فيها …
حليت باب الدوش هذاك وخرجت .. لقيت رانيا فاقت وقاعدة تلعب مع سيف لي يضحك ويحاول يشد يديها ياكلهم …
_رانيا: صباح لخير ..
_نادين: صباح نور .. اذا حبيتي ادخلي اعملي دوش حتى نتي ..
_رانيا: لا خلي دوك شوي ونشمي للدار .. جايينا ضياف ليوم لازم نعاون أمي ..
_نادين: اذا حتجتو شي قوليلي نعاونكم ..
_رانيا: نشالله ..
_نادين: راح نلبس ونجي نعمل قهوة نشربو مع بعض ..
_رانيا: اوكي راح نمشي نغسل حتى انا ..
هزيتلها راسي وتعديت للفاليزة .. هزيت واش نلبس ومشيت للغرفة هذيك صكرت لباب وقعدت نلبس في ثيابي ونخمم بعيد … ماعرفتش واش يلزمني باش نخرج من الاكتئاب لي قاعدة نعيش فيه .. ماعرفتش اذا انا مرضت صح .. مرات نبقى نخمم فلانتحار ونلقى روحي مستعدة ليه بعدها طول كأنو حد يجي يعطيني كف يفيقني على لي قاعدة نعمل فيه …
خفت نهبل .. خفت نرجع مريضة مع الايام ونضر ولدي … حتى قبر وليد ماحبيتش نمشيله .. آخر مرة مشيت وخليت سيف فلدار .. مارجعتش حتى مع ليل لقيت جارتي كسرت لباب وهزاته من كثرية لي بكى حتى قريب يموت …
وقتها حسيت روحي ام فاشلة .. انو مانصلحش نكون ام ..ولا زوجة ولا ابنة .. مانعرفش واش حسيت .. لقيت روحي لا اراديا نحضن في ولدي ونبوس فيه ونوعد فيه انو ماعادش نزور بوه ونخليه …
مالقيتش شكون يوقف معايا في محنتي هذي .. مالقيتش لي ينصحني ولا يشد يدي ويوريني طريق صحيح … ممكن لحياة قاعدة تحاول تختبر صبري وقوتي … اما ديما يقولك الحياة مفاجآت ممكن بين لحظة وختها تفاجأك وتخليك تشوفي حاجات ماكنتيش متوقعتهم …
ممكن هذاك واش كانت تخمم نادين وقتها وهي واقفة مقابلة لمرايا تنشف في شعرها .. انو الحياة ظلمتها ومانصفتهاش ..وممكن حتى خذاها تفكيرها انو الله مش عادل وختارلها حياة ناقصة .. وكتبلها قدر مش عادل ليها ولا لولدها … اما لي ماكانتش تعرفه دقيقتها .. انو قصتها كانت بدات فلحظة هذيك وقت حطت رجلها فلحي هذاك ..وقت قررت انها تعيش بين ناس حطتهم اكثر شي سيء راح تعيشه
. اما نسات انو الظروف تحللنا عينينا .. تقوينا وتعلمنا كثر وكثر … وانو الانسان مش لازم يصكر على روحه بين اربع حيوط ويقول خلاص حياتي كاملة وانا عشت واش عشت … الحياة لازم تتكبدي فيها ..وتكافحي باش توصلي للنقطة لي تقولي فيها خلاص انا عشت حقي من دنيا هذي … 28 سنة لي عاشتهم في حياتها ماكانو شي قدام لي راح تعيشه الايام الجاية …
#نورااا🌹🌹🌹لحلقة 25:
حل عينيه على صوت لبواب تاع لبناية ينحلو .. وصوت صغار لي برا ماشيين يقرووو .. يحس في رقبته توجع فيه .. تلفت يلقى روحه قاعد في نفس لبلاصة لي قعد فيها لبارح على درجات هذوك …
عدى يده على وجهه وهز روحه وقف وحط يده على لباب يطبطب شوي وحلت عليه خته تحكي ..
_ريم: صباح لخير .. ياخي وين كنت بلحالة هذي ..
_جبل: مااا وين راهي ..
_ريم: قاعدة فلصالون تتقهوى .. ادخل لعندها ..
_جبل: ريم اسمعي… اذا عاود قلقك لكلب هذاك قوليلي ..
_ريم: اتهنى أصلا شكون عندي غيرك .. قربت باسته من خده ومشات لغرفتها تعدل في صاكها باش تمشي لليسي ..
_وقف قدام باب الصالون لقاها قاعدة مقابلة تلفزة وحاطة لغطى عليها ..وقدامها بلضبط طاولة صغيرة حاطة فيها قهوتها مع كسرة الدار وصحن صغير حاطة فيه الزبدة والصحن الثاني حاطة فيه حبات تمر ..
شافت ليه بنص عين ورجعت عملت روحها مش مركزة معاه .. تعرفه جاي يرضيها بعد عملة لبارح ..
عملت روحها مركزة مع نشرة الاحوال الجوية لي قاعدة تمشي قدامها …
_جبل: سميحتي. … سمحيلي على لي صرا لبارح ..
_سميحة: كرشي جابتك ومن بعد تمشي وتخليني على جال بنت الحرام هذيك ..
_جبل: قتلك طفلة خاطيها علاه تظلي تعايري (تسبي) فيها ..وزيد راه عندك بنت ماتخافيش غدوة يجي شكون يهدر عليها ..
_سميحة: بنتي متربية وعندها عائلة وتعرف حدودها… مش تدخل في راجل غريب لعندها فلدار …
_سكت ورجع تنهد ومشى قعد على حافة سرير مقابلها ..
_الصالون مظلم من غير شعاع تلفزة لي خالهم يشوفو في بعض ..
_جبل: شا راكي باغيتني ندير .. طفلة جات هنا على جالي .. وحبت توب .. شاندير نقولها لا روحي كملي لي راكي تديري فيه .. خممي شوي مااا ..
_سميحة: اااه ومالقات مع شكون توب غير معاك .. هاك ياك .. يا انا غير هذيك لكلبة لي تظل توشم لي ماتدخلش داري وهذا آخر كلام ..
_جبل: صحا بلعقل .. ريحي ماغاديش تعاود تجي ..
_سميحة: امشي دوش وغير ثيابك .. الله واعلم واش كنت ساهر تدير نتي وياها .. عليها جايني بصدرك عريان ..
_جبل: استغفر الله .. راني كنت بايت قدام لباب تاع دار ..
_حطت لكاس من يدها وشافت ليه بقلق وخوف ..
_سميحة: يا ولدي نوض عمل دوش ولبس دفي روحك تكون شربت لبرد هذاك كامل تاع لبارح .. وهيا ليوم خالتك جاية لعندنا وحتى بنت خالتك جاية نحبك تقعد معاها وتحكي معاها ..ولا نقولك عشية هزها هي وريم وامشو للسينيما شوفو كاش فيلم …
مالقاش كيفاه يقوللها لا وهو ماصدق رجعت تحكي معاه عادي ..
_هزلها راسها وناض ومشى جيهتها نزل باسلها راسها وخرج مشى لغرفته صكر لباب وبقى واقف وسط لغرفة يخمم… حتى كلام بشرى وختها مامشاش من راسه .. لقى انسب حل انو ماعادش يمشيلها باش تكره وترجع تبعد عليه .. خاطر كلام ختها صح قاعدة تحرق في روحها معاه باطل ..
حط يديه على سرواله هبطه وهو المنشفة وخرج دخل للدوش وصكر لباب على روحه …
ووقف تحت لمرش هذاك يحس في جسمه يابس من البرد تاع لبارح .. شوي شوي مع سخانة لما عاد باش رجع الدم يمشي فيه …
كمل وهو المنشفة حطها عليه وخرج رجع لغرفته لبس ثيابه .. ومشى للصالون وين امه .. قعد جنبها يشرب في قهوته ويخمم فلورطة تاع بنت خالته .. يعني يا يقبل ويرضي امه يا يبقى كل هو يوم هامل من الدار …
#نورااا🌹🌹🌹
جام+كمنتار اراءكم 🙄🙄الحلقة 26:
قعدو مع بعض فطرو ومشات رانيا لدارهم وهي قعدت نكمل ترتب في غراضها …
جرت سرير هذاك خرجاته لبرااا خاطر ديجا ماتحتاجهش .. وجبدت سريرها هي ومسحاته من الغبرة وحطاته فلوسط وحطت جنبه طابل دنوي وعليها فازة فيها ورد حمر اصطناعي .. ولكادر لي فيه صورتها هي وراجلها عدت صباعها عليها ورجعت قربتها من شفافها باستها …
_نادين: الله يرحمك .. عمري ننساك … راح تبقى ديما داخلي في قلبي وعقلي وذاكرتي …
خذات نفس ورجعت كملت ترتب ..حتى من الشباك غيرتله شراشف وحطت بيضين وعليهم ورد حمر كيف ماتحب (قصدي كيف مانحب😂😂) وكملت علقت كوادر في لحيوط … بعد ثلاث ساعات كانت خلصت كلش .. وكل حاجة رجعت تهبل .. دار لي كانت قديمة وتبان مهجورة رجعت فيها الحياة مع الالوان لي حطتهم نادين عليها …
مشات للمطبخ ومسحت لبراد وحطت غراضها لكل وسطه .. وحلت الشباك خلت هوا نقي يدخل …
ورجعت شعلت تلفزة وحطت قناة قرآنية .. مدام الدار جديدة خلي تحط فيها قرآن باش يجيها الانس فيها …
شافت لولدها يحاول ياكل يديه .. نزلت لعندها تبوس فيه وتمسح على راسه ..
_نادين: واش يدير حبيب الماما اااه قولي .. واش تدير .. هزاته في حضنها وهو يضحك ويلعب بيديه … بقات هكاك مستلقية على سرير وتخزر مع تلفزة..وقت صونا تليفونها .. شافت رقم جديد ماعرفتش شكون علقت عليه رجع يصوني من جديد … حطت ولدها على جنب وردت ..
_نادين: الووو ..
_حمزة: عاش من سمع صوتك ..
_نادين: دقيقة .. هذا نتا .. من وين جبت رقمي .. علاه مزالك تعيط …
_حمزة: بشوي علاه تاكلي في روحك … ليلى تحب تحكي معاك ..
_نادين: ليلى.. قصدك مرتك واش تحب مني ..
_حمزة: تعرفي نسا وكلام نسا .. قالت تحب تجي عندك وتطمن عليك .. رغم كل شي تبقي مرت سلفها…
_نادين: قاعد تستفز فيا صح .. واش تحب مني .. ياك خرجت وخليتلك الدار .. راح تبقى عقابي نتا …
_حمزة: حاجتي بيك نتي … علقتي في راسي ..واش حبيتيي ندير …
_نادين: والله لا تحشم .. ريحة رجولة ماتسواهاش .. اخطي جدي…
_حمزة: ممكن وقت ننحط تحت تراب نخطيك .. مدامني نتنفس عمري نخطيك ..
_نادين: مالا واش نقولك الله يجيبلك موت وفي اقرب وقت نشالله وماعادش تعيط ..
ماخلاتهش يزيد كلمة وعلقت عليه …
تحس في اعصابها تلفت بسبته .. هزت روحها ومشات جيهة الشباك وقفت جنبه تحاول تتنفس وتهدي روحها .. دوك رجعت متأكدة انو مستحيل يخطيها .. عنوان دارها وجابه.. رقمها وعرفه .. مش بعيد تلقاه واقف قدامها لهنا .. كانت حاطة انو بمجرد ما خرجت من الدار ماعادش يدور بيها وصار العكس …
مشات للكوزينة جبدت قرعة نتاع ماا شربت منها ورجعتها ..
ضربت في راسها انو راح تبقى هنا تخلص لكراا ولما .. وفوقها لازم تاكل وتوكل ولدها .. دراهمها لي عندها ممكن يشدوها شهر مايزيدوش .. يعني لازمها خدمة ..
مشات لصاكها جبداته تحسب واش باقيلها .. شافت مع خاتم يدها وكبست عليه . مش حابة يجي وقت وتضطر تبيعه حتى هو … للحظة جى كلام رانيا بين عينيها انو سيف لازمه اب وهي مش قادرة على المسؤولية كيف ماكانت حاطة قبل .. تنهدت وعدت صباعها وسط خصلات شعرها .. تدعي داخلها ربي يفرجها في وجها وين تقدر تصرف على روحها بلاما تضطر تمد يدها لحد…
رجعت جنب ولدها وقعدت سارحة بعيد بعدها تذكرت انو لكلب هذاك ماحطاتهش فلروجوتي .. رجعت حطاته وكملت غطست في تفكيرها .. لي مهما بعدت بيه ترجع للنقطة لي تذكرها انو وليد مات وماعادش موجود ..
#نورااا🌹🌹🌹الحلقة 27:
حلت عينيها على صوت ولد ختها لي يجر فلطاولة ويلعب .. عامل ضجة كبيرة .. تنهدت وهزت روحها .. شافت حورية ختها في سابع نومة .. ناضت بشوي وصكرت لباب باش مايوصلهاش صوت ولدها لي عامل ضجة فلكوزينة …
مشات طول للصالون ووقفت عند لباب تخزر لبلاصته لي كيف ماخلاها داخلة بعضها .. لحاف مرمي على جنب ومخدة في جيهة .. وحتى تريكو لي مداتهله منحيه وراميه .. كبست على شفافها ورجعت مشات لبلاصته تعدي في يدها عليها بعدها هزت تريكو هذاك تشم فيه … فكرة انو جبل يبعد عليها وحدها تخليها تهبل … بلنسبة ليها هو الحياة جديدة لي ربي عطاهالها .. معاه تنسى ماضيها وتنسى ذنوبها … مهما صرا مستحيل تخليه يبعد .. بأي شكل من الأشكال …
فاقت من سرحتها على صوت ختها من ورا تحكي ..
_حورية: هيه اندبي عليه اندبي ..
_بشرى: مش قلتي ماعادش دخلي روحك .. يعني حتى بيني وبين نفسي تحبي تدخلي في افكاري … خليني براحتي ..
بقات ختها ساكتة ورجعت مشات جيهتها وقعدت مقابلتها تحكي ..
_حورية: للدرجة هذي تحبيه ..
_بشرى: وأكثر مما تتصوري ..
_حورية: مالقيت واش نقول .. يعني انا كمال متزوجين بصح مانحوسش اذا حبني ولا حبيته .. المهم يصرف ويقوم بواجباته جيهتي وجيهة صغار وخلاص ..
_بشرى: جبل غير .. جبل عكس شي هذا كامل .. تعرفي انو وقت كنت نرقص فلبار هذاك كامل كانو يعاملوني على اساس وحدة رخيسة. . واجبها تلبي رغباتهم الحيوانية .. حتى حد ماحاس بمشاعري ..كنت ناكل الصوط والسب .. لي يجي يعفس عليك ويمشي يرمي دراهمه عليك ونتي لازم تسكتي ..واذا حليتي فمك وحبيبتي دافعي على روحك يقول نتي وحدة ق$## كيفاه تخلي في فمك وتردي ..
_حورية: الله لا تربحهم …
_بلعت دموعها وتبسمت تخزر لتريكو جبل وتحكي ..
_بشرى: اول ماجات عيني عليه قاعد يشوفلي .. مانعرفش اذا كان صاحي ولا لا .. اذا كان تايه فيا ويخمم بعيد ولا لا .. مانعرفش واش كان يتخيل فيا دقيقة هذيك .. اما حسيت من نظراته الصدق .. قلت بشرى هذا لي تحوسي عليه .. هذا لي كنتي تتمني تجي ليلة وتعيشي واش تمنيتي معاه ..ومن زهري ماكان فايق بشي .. اول ماقربت منه ولمسته حسيت روحي طفلة صغيرة .. مراهقة هذاك وين بدات تستكشف فلحب .. نسيت علاقاتي لكل .. نسيت انو انا عاهرة ومانسواش كيف مامسمييني .. حتى من لمساته حسيت روحي كأني نعيش في علاقة لاول مرة .. لا سبني لا ضربني .. بلعكس عاملني باحترام .. تخيلي إذا هذا طفلة مايعرفهاش ..وحدة رقاصة تخدم خدمة عوجه وعاملها هاك .. مرته كيفاه .. بنته خته ..امه .. لبارح حد دار بخته عمل حرب على جالها .. كيفاه مانتمناش يكون في حياتي .. افهمي .. الراجل مش لي عنده مال دنيا .. مش لي عنده الزين والوهرة .. الراجل هذاك لي تحسي روحك مراة ونتي جنبه .. تحسي روحك بامان وهو في حياتك … جبل يمثل هذو لحاجات لكل بلنسبة ليا … نحب نكون جزء من حياته .. نحب نحط راسي على نفس لمخدة لي يرقد عليها .. نحب نشاركه في كل شي يعمله …
_حورية: متاكدة انو ماعندهش وحدة في حياته ..
_بشرى: نبصملك بلعشرة انو مكانش .. مشكلته ماعينهش فلزواج ..
_حورية: راكي مثبتة بشرى .. يعني ماضيك مايهمهش ..
_بشرى: مانتوقعش عنده مشكل .. هو يقول انو مش انسان كامل وانو اي حد يغلط وهو معبي اغلاط .. مانتصورش راح يقارني بيه .. حتى بنت خالته ماحبش يتزوجها قال انو مايناسبهاش ..
_حورية: مالا نقولك واش نديرو ..
_بشرى: واش نديرو ..
_حورية: هذا تريكوه صح ..
_بشرى: واه .. اما علاه ..
_حورية: نعرف وحدة اذا طلبتي منها حاجة تحضر…
_بشرى: مفهمتش واش قصدك .. ستني دقيقة تحبيني نسحره ..
_حورية: مش سحر اسكتي .. ماوصلناش للدرجة هذيك .. اما تعرف تشوف .. حساب ماسمعت انو ليلة سبعة وعشرين نضربت تعاركت مع راجلها وطاح ضربها ومن وقتها وهي لي تقصدها تحكيلها كل شي عليه بمجرد ماتحط يدها عليها ..
_بشرى: يالطيف ماتقوليليش مشيتيلها ..
_حورية: لا مامشيتش .. ماجاتش لفرصة .. بصح خلي مادام نتي جيتي فلطريق نمشو ..
_بشرى: لا مستحيل نعمل شي هاج جبل مايستاهلش ..
_حورية: قتلك مش تسحريه .. اما هزي تريكوه نخليها تحكيلك واش مستقبله ..واش راح يصرا اذا راح تكوني ليه .. هذاك نقطعو الشك انو مكانش مراة راح تدخل حياته ولا تفكه منك …
_بقات ساكتة تخزر لختها وتدور فلحكاية في راسها ..
_حورية: ياخي مزالكي تخممي .. نوضي هزي روحك البسي وخلينا نضربو لحديد وهو سخون ..
_بشرى: اسمعي حورية راح نمشي معاك ونشوف كيفاه هذي لمراة .. اذا لقيتها مش مليحة مانبقاش دقيقة ..
_حورية: صحا حنا ماخاسرين والو نروحو ونشوفو ..
هزتلها راسها وشافت لتريكوه .. الفضول قتلها .. اذا صح لمراة هذي تعرف تقرا المستقبل .. مدابيها تعرف اذا جبل راح يكون ليها ولا قدره في بلاصة خلاف ..
#نوراااا🌹🌹🌹الحلقة 28:
لبسو وهزو رواحهم نزلو للتحت .. تمشي كابشة في ختها خايفة يشوفها جبل ولا يعرفها وين ماشية وماتزيدش تحلم تشوف خياله .. طريق كاملة وهي مترددة خايفة انو لي تعمل فيه يخرج بلعكس ويصدمها ويرميها خطوات ورا ويبعدها عليه .. ماعرفتش واش تدير .. بصح ختها كبشت وماخلتهاش ترجع في نص طريق .. شي نص ساعة ولقاو رواحهم قدام بناية في وسط لمدينة ..
_شافت لختها تحكي ..
_بشرى: مثبتة انو هنا ..
_حورية: هيه هنا .. خلي نسقسي كاش صغير على رقم شقتها ..
_بشرى: والله خايفة قلبي قريب يحبس اول مرة نجي لبلاصة كيف هاك ..
_حورية: قتلك حنا ماخاسرين والو .. ندخلو نشوفو كيفاه تخدم وواش تحكي اذا ماعجبناش نمشو ..
_بشرى: صحاا على ربي وخلاص .. هيا خلينا نشوفو حد نسقسوه ..
الحال برا كان بدا ينقلب .. ولمطر رجعت تطيح من جديد وماشي تقوى ..
طلعو مع درجات هذوك .. لقاو طفلة هابطة شدوها يسقسو فيها .. فلاخير عرفو انها ساكنة فلايطاج الثالث …
وصلو حتى لباب دارها .. شافت حورية في بشرى..
_حورية: سمي قبل ماندخلو ..
_بشرى: زعما مايضربناش كاس جن من جنونها بعيد الشر .. رجليا ثقلو عليا ..
_حورية: ياخي علاه تنكدي اسكتي ..
هزت يدها طبطبت فلباب وبقاو يستنو … شوي وحل عليهم لباب راجل كبير شوي فلعمر ..وكرشه دازة لقدام وهذاك وين ناض من رقاد .. شاف ليهم من تحت للفوق ..وطول نظراته ليهم تبدلت وقعد حال عينيه فيهم ..
_ صمد: شكون نتوما ..
_نطقت حورية تحكي ..
_حورية: نحوسو على مراة تسكن هنا اسمها امينة .. بعثونا ليها ..
_صمد: اممم .. جايين تشوفو عندها ولا حباباتها ..
دخلو بعضهم وماعرفوش واش يجاوبو .. خافو يقولوله صح ينوض يطردهم ..
_بشرى: لا حنا حباباتها .. عندنا شحال ماشفناهاش .. معليش تعيطلها اذا هنا ..
_صمد: امينة .. امينة .. ارواحي كاين شكون يحوس عليك ..
مشى دخل وخلاهم هكاك واقفين قدام لباب .. وبشرى تسب في ختها ..
_بشرى: هذو الأشكال جايبتني ليهم .. شفتي كيفاه قعد يشوف فينا تقول حاب ياكلنا ..
_حورية: ياخي سكتي .. دوك تجي مرته نشوفو معاها …
_شوي وسمعو صوت خطواتها .. حتى وقفت قدامهم تتبسم ..
_امينة: تفضلو ..
_حورية: وين راهي امك ..
_امينة: مفهمتش ..
_بشرى: قصدها نحوسو على امينة لي تخدم شوافة ..
_امينة: هيه انا هي تفضلو ..
للزوج تصدمو خاطر ماتوقعوش تكون صغيرة ..وفوقها هيئتها مش تاع شوافة كامل .. بلعادة شوافات يجو مش نظيفات .. وهيئتهم وحدها ترعب ..
دخلو تبعوها وهوما باقي مصدومات .. قعدتهم فلغرفة لي تخدم فيها بلعادة ورجعت خرجت وصكرت لباب وراها وخلتهم وحدهم ..
_حورية: شفتي كيفاه عاملة .. ماتوقعتهاش تكون هاك ..
_بشرى: خسارة والله .. باينة بسباب بوكرش هذاك .. ضربها حتى مرضت ..
_حورية: هيه رجال كلاب .. كان جيت في بلاصتها راني عملتله سحر اسود قتلته ..
سكتو طول اول ماحلت لباب ودخلت هازة صينية .. فيها قهوة ..
تبسمت وحطتها قدامهم تحكي ..
_امينة: اول مرة تجولي صح ..
_حورية: هيه حكاتلي وحدة عليك عليها جينا …
_امينة: هيه واش مشكلتكم ..
_حورية: المشكلة تاعنا بسيطة… ختي هذي لي معايا ..
قاطعتها تحكي قبل ماتكمل كلامها ..
_امينة: تحب واحد ولد حومتها وحاياته يتزوجها وهو منحي زواج من راسه ..
حلو فامهم مصدومين حتى قريب يهرب لكلام من شفافهم ..
_بشرى: كيفاه عرفتي ..
_امينة: خدمتي ..
_حورية: تقدري تعرفي واش راح يصير فلمستقبل .. يعني عليه هو مش عليها هي ..
_امينة:مانقدرش مدام ريحته مش موجودة ..
_حورية: عندنا تريكوه تقدري تعرفي بيه ..
_امينة: هيه هاتي مالا ..
مدتلها بشرى تريكو شداته بين يديها ورجعت شافت لبشرى تحكي ..
_امينة: نوصي طفي الضو ..وارواحي قعدي قدامي ..
_ناضت تبلع في ريقها خايفة ..
طفت الضو هذاك والثانية .. حطت شمعة شعلتها وشكت تريكو هذاك بين يديها وصكرت عينيها .. شوي شوي بداو عينيها يتضيقو .. ورجعت تحكي في كلام مش مفهموم. تقول مش هي نفسها لمراة لي كانت تتبسم معاهم من شوي ..
_حورية وبشرى رجعو يعرعدو في بلاصتهم حتى انهم خممو يمشو يهربو حتى صدمتهم بصوتها ..
_امينة: اقعدووو ..
هزولها راسهم وقعدو ..وهي حلت عينيها وشافت لبشرى طول تحكي .. كأنو خافظة لكلام ..
_امينة: كاين مراة …
_بشرى: مراة ..شكون ..
_امينة: ماتقاطعينيش ..
_بلعو ريقهم وهزولها راسهم مركزين ..
_امينة: مراة هذي جات من بعيد .. من بلاصة بعيدة ودخلت حومتكم … لمراة هذي قبل ماتجي ضيعت حاجة ( اححح لحمي تشوك حسيت روحي شوافة 🥺🥺)
سكتت شوي وكملت تحكي ..
_امينة: راح يعشقها حد الجنون ..
بلعو ريوقهم وبشرى عينيها تعبو بدموع…
_بشرى: مستحيل ..
_امينة: لمراة هذي مش بعيدة قريبة بزاف ليكم ..
_بشرى: كاين غير بنت خالته .. بصح مايحبهاش ..
_امينة: مش من دمه هذي .. قتلك مراة جات من بعيد .. ضيعت حاجة قبل ماتجي .. اسمه يبدا بلجيم صح ..
_بشرى: هيه اسمه جبل .. احكي الله يخليك قلبي راح يحبس .. راح يعشقها ولا يتزوجها ولا واش راح يصرا ..
سكتت امينة وصكرت عينيها كانو شافت شي جديد ..
_حورية: واش كاين .. خير ..
_امينة: راح يعادي حومة كاملة على جالها .. راح يجري شهور وراها … وراح يكون الذرع الحامي ليها ..
_بشرى: هذو لحاجات كامل عملهم على جالي .. مثبتة تحكي على مراة ثانية ..
_امينة: راح تسرق قلبه وسنين عمره الجايين ..
_حورية: صحاا وهي .. هي تحبه ..
_امينة: مانعرفش .. اما لي ظاهر عندي انو هو راح يحبها حد الجنون … راح يدخل الحباس على جالها ..تابع للحلقة 28
_بشرى: يالطيف .. نوضي خلينا نمشو ماعدتش قادرة نزيد نسمع كثر من هاك ..
جات ماشية جيهة لباب تخرج وقفتها تحكي ..
_امينة: راح يعاود يجيك ويدخل فراشك….
تبسمت حورية فرحانة كأنو شي لي خططتله صرااا ..
_حورية: وقتاش شي هذا .. يعني قبل مايحب المرأة هذي ولا بعدها ..
_امينة: الأحداث مش مرتبين عندي … اما المرأة هذي راح تقلب حومة على راسها ودخل رجال في بعضهم ..وحد ماراح يسلم منها …
_بشرى؛ شكون هي .. شكون هذي ..
#اول ماخلصت كلامها طفات الشمعة هذيك .. وخلتهم كامل ساكتين ..
هزت بشرى يدخل شعلت نور الغرفة هذيك وشافت ليها تحكي ..
_بشرى: انا لي جيت من بعيد ودخلت الحومة هذيك .. وانا لي ضرب كل حد حب يقربلي .. انا لي قلبت الحومة .. كيفاه تحكيلي وتقوليلي مش نتي راهي مراة خلاف ..
_امينة: هذا واش ظهر عندي .. زوج نسا نتي وهي لي فلطرف الثاني ..
_حورية: يعني ماكانش طريقة نوقفو بيها الحب هذا ..
_امينة: مانعرفش اذا تقدرو تبدلو المكتوب اما اذا عرفتوها شكون هي ممكن تبعدوها عليه .. هذا اذا قدرتو ..
_بشرى: كلامك كله غالط مستحيل نصدقك ولا نصدق حرف منه .. نتي كذابة ..
_امينة: أمورك . حبيتي تصدقي ولا لا .. بصح راجل هذا راح تدخل بينك وبينه مراة ..ومش هي لي راح تدخل حياته هو لي راح يدخلها ..وهو لي راح يخرجها من كل عثرة تطيح فيها ..
حست روحها خلاص راح تهبل .. حلت باب لغرفة هذيك وخرجت تجري لقات صمدو راجلها في وجهه .. قحرتله وكملت حلت باب برا وخرجت نازلة مع درجات هذوك تجري برااا هايمة .. فوقها همها زادت هم ثاني وين كانت تحوس تقنعه يتزوجها زادت هم لمراة هذي لي جات من بعيد .. وراح تدخل بينها وبين جبل …لحلقة 29:
عدت نص نهار وهي قاعدة شادة ولدها في حجرها وتخمم فلكلب لي ماحبش يخطيها .. كلما تقول خلاص بعدت ورتحت يرجع يخرج في وجها ومش بعيد يجيها لهنا …
نفخت وهزت روحها جمعت الزبل كامل لي عندها لي حاطاته في اكياس بلاستيكية .. لبست شلاكتها ومشات حلت لباب نازلة اول ماوصلت للايطاج لي تحتها لقاته في وجها خارج يلبس فلفاست نتاعها .. هو الثاني اول ماجات عينه في عينها .. تذكر موقف لبارح لي نحط فيه معاها .. دخلت بعضها لمجرد جاوها افكار انو ممكن يكون شافها مش كيما حكاتلها رانيا …
حطت راسها ونزلت تجري .. عوج فمه منها وطلع لفوق لعند خالد ..
اول ماوصلت تحت شافت للبوبال لي محطوطة في آخر الحي مشاتلها تزرب حطت الزبل هذاك وسطها وتلفتت تخزر للحي كيفاه فارغ ونسمة باردة تضرب … بقات تتفرج ليه وللحيوط والعمارات لي فيه …
مايشبهش للبلاصة لي كانت ساكنة فيها جملة .. لفت يديها لصدرها وقت حست بلبرد يضرب فيها ورجعت تزرب دخلت للبناية نتااعهم .. بقات طالعة مع الدرجات هذوك حتى وصلت قدام باب الدار لي خرج منها قبيل شافت مراة واقفة تسيق والظاهر كبيرة فلعمر جى لبالها طول تكون امه .. ضيقت عينيها وقت تذكرت انو نفسها لي كانت واقفة في وجهه لبارح وقت كان يعارك …
_نادين: الله يعاونك ..
تلفتت سميحة شافت ليها وجاوبتها ..
_سميحة: امين … شكون نتي اول مرة نشوفك هنا ..
_نادين: جارتكم جديدة .. نسكن فوقكم ..
_سميحة: اااه مرحبا بيك .. ماتولهتلكش .. من وقتاش تنقلتي هنا ..
_نادين: من يومين ..
_سميحة: مرحبا بيك بنتي…
_نادين: وبيك .. نهارك زين ..
هزتلها راسها وجات طالعة وسميحة تبع فيها بعينيها …
اول ماوصلت باب دارها لقاته ثاني هابط من فوق … كانت راح تدخل وعاودت ترددت وتلفتت ليه تحكي ..
_نادين: صباح لخير ..
بقى ساكت يستنى في كلامها لي بعدو ..
_نادين: كنت راح نقولك انو راح نرسلك دراهمك مع رانيا ..
_جبل: براحتك ..
جى نازل وقفاته تحكي ..
_نادين: دقيقة ستناني دوك نجي ..
دخلت تجري داخل وهو بقى واقف عند لباب .. جات عينه على صغير فوق سرير من بعيد يلعب …
تبسم لا اراديا وهو يتفرجله كيفاه يتحرك في بلاصته .. شوي وسمع صوت خطواتها جاية رجع ورااا ..
_نادين: تفضل ..
_جبل: شاوا (واش ) هذا …
_نادين: نعرف تريكوك ماعادش يصلح باش تلبسه .. ومانحبش نبقى مديونة لحد .. شريتلك واحد مش كيفه صح بصح يشبهله .. نتمنى تتقبله ..
_جبل: شكون قالك همني تريكو ..
_نادين: معليش انا خممت هاك .. ونرجع نقولك ديزولي على لي صرا كامل .. نتا ديما كنت تعاوني وانا بدل مانردلك المعروف كنت ندخل كل شي بعضه ..
_جبل: مفهمتش ..
_نادين: فلباص .. من يومين عطيتني بلاصتك نسيت ..
_جبل: اي واحد في بلاصتي كان غادي يدير كيفي .. ماتستاهلش ..
_هزت عينيها فيه تحكي ..
_نادين: كل حد كيفاه يخزر لامور .. عن اذنك دوك ..
مد يده راح يشده عليها لاحظ كيفاه تمد فيه وخايفة يدها تمس يده .. المرأة جاته غريبة كأنو عندها عقدة منه ولا من الرجال ..ولا ممكن عندها هوس تاع نظافة. . ستغرب .. مداتهله ودخلت تزرب صكرت لباب ..
خلاها دخلت ورجع يقلب فلتريكو وهو وسط الساشي نتاعه …
تبسم على جنب ونزل طول للدار ..
_سميحة؛خير وين كنت .. مزالك تدورلي مع صاحبك هذاك لي مايصلحش ..
_جبل: مااا عيب ..
_سميحة: واش لي عيب ..وواش هذاك لي في يدك .. ماتقوليش قاعد يمدلك في غراضه نخبيهم .. راح يباصيك لكلب ..
_جبل: تريكو مااا .. تريكو … و.تديري مزية تحطيه في غرفتي انا نازل ..
_شداته من عليه تقلب فيه وتحكي …
_سميحة: تريكو جديد هذا من وين .
_جبل:, راني نازل نخليك دروك..
_سميحة:, ماتنساش خالتك وبنتها جايين عندنا رجع بكري .. ولا والله مانفوتهالك ..
_جبل: صحااا فهمت ..
نزل مع درجات هذوك وهي باقي تخرنن وراه ..
#نورااا🌹🌹🌹
جام +كمنتار … راني نكتب شوي وتوجد لي بعدهالحلقة 30:
هزت روحها حورية تخزر لأمينة لي تترشف في كاس قهوتها عادي وملاحها هادية ..بلعت ريقها وجبدت صاكها حطتلها دراهم في حجرها تحكي …
_حورية: سامحينا على كلام ختي .. ممكن كلامك صدمها .. اعذريها ..
_امينة: عادي انا حكيت واش شفت ..
_حورية: صحاا قوليلي اذا جبنالك اسم لبنت تقدري تعملي حل ..
_امينة: اذا لقيتوها جيبولي غرض من غراضها باش نعرف نقرالكم واش راح يصير معاها ..
_حورية: نشالله … نرجعولك بعد سمانة بربي ..
_امينة: تفضلي مالا ..
هزت حورية صاك ختها وتريكو جبل لي محطوط على طاولة وخرجت تجري نازلة مع الدرجات هذوك تحوس على ختها وين ..
_حورية: بشرى .. بشرى يا مصيبة وين مشيتي ..
_لمحتها من بعيد واقفة تحت شجرة وحاضنة روحها بيديها زوج مشاتلها تجري حتى وصلت لعندها بقات ترد فلنفس وتحكي ..
_حورية: نتي واش في راسك .. تخرجي هاك وتخليني ..
_بشرى: سمعتي كلامها .. جبل راح يحب وحدة خلاف .. سمعتي كلامها ..
_حورية: هيه سمعت بصح مايعنيش انو لي حكاته راح يصرا .. قاتلك راح يرجع يدخل فراشك .. معنتها ممكن فلاخير يكون ليك ..
_طرطقت في وجها تعيط ..
_بشرى:, وعلاه مش ممكن شي هذا يصير قبل مايتعرف على المرأة هذي .. لا لا .. لازم نلقاها .. شكون لي جات جديدة للحي نتاعنا … شكون لي راح تدخل بيني وبينه راح نهبل ..
_نزلت حورية لعندها كبست على كتافها تهدي فيها وتحكي ..
_حورية:, اسكتي وركزي معايا .. حد ماراح يهزه منك .. لمراة هذيك امينة قاتلنا حوسو عليها وجيبولي غرض من غراضها .. وبعدها نرجعو لعندها وتحكيلنا واش شافت عليها .. ممكن هي ماراحش تحبه ..ممكن ماراحش تكون معاه ..
_بشرى:, بصح هو راح يحبها .. راح تسرق قلبه .. هو لي ماحب حد جات هي وراح تخليه يحبها … لا وفوقها يعادي حومة على جالها ويدخل لحباس .. تعرفي واش معنتها .. معنتها انا من هذا كامل مكانش ..
_حورية: ماتكونيش ضعيفة .. راكي تقولي تحبيه وتعشقيه .. مالا ماتخليش شكون تهزه منك ..
_بشرى: واش ندير مالا ..
_حورية: نوضي هزي روحك تشوف … وخليه يحس بقيمتك … ويعرف انو ماكانش وحدة تصلحله غيرك ..
_بشرى:, كيفاه ..
_حورية:, اتحركي قدامي .. راح نرجعو للدار ولتم نفهمك واش تعملي .. وزيدي نسنسي شكون تنقلت جديدة لحيكم ..ومانعرف واش ضيعت الهم هذي قبل ماتجي ..
_بشرى: راح نلقاها ..وراح نخليه يبعد عليها .. ومستحيل حبها يدخل قلبه مهما صرا .. جبل ليا انا وحدي ..
_حورية:, مالا تحركي مش وقت تندبي وتبقي تتفرجي اذا ماتحركتيش راح يطير من بين يديك …
هزتلها راسها وناضو مع بعض راجعين للحي نتاعهم اول ماوصلو للدخلة نتاع الحي شافت لختها تحكي..
_بشرى: زعما في أي بناية ساكنة .. شكون زعما ..
عزت عينيها تخزر لكل عمارة ..وين تلمح طفلة واقفة تنشر تبقى تثبت فيها مليح .. تشوف اذا شافت وجها قبل ولا اول مرة …
شوي ولمحاته هو خارج من البناية نتاعهم .. بقات تبع فيه بعينيها وقلبها يضرب بلقاوي ..
_حورية: فيقي على روحك .. علاه تخزريله هاك تقول منه مكانش …
_كأنو مش قاعدة تسمع في كلام ختها .. وانو ماكان حد فلحي هذا غيرها هي وهو .. تشوف ليه وماشية جيهته .. هو كان ماشي حتى لمحها من بعيد وقف يشوف معاها مستغرب واش خرجها .. اما وقت شاف ختها فهم انو مشات معاها …
هز حاجبه لفوق وهو يشوف ليها ماشية وتقرب جيهته حتى وصلت قدامه… عينها في عينه تخزرله بحب وشوق …
الجيران لي كانو لفوق رجعو كامل يطلو عليهم وينسنسو … واش كاين ..
حتى من نادين لي كانت واقفة تنشر في قشها فلبلكون وقفت تشوف ليهم ..
بقات مركزة كيفها كيف اي وحدة ثانية ولفضول قتلها …
_جبل: واش بيها حالتك هاك ..وعلاه راكي برا امشي رجعي للدار ..
ماخلاتهش حتى يكمل كلامه ..ورمات روحها في حضنه … ولفت يديها على ظهره .. لي لتم لكل رجعو يتفرجو عليهم .. لي عاجبه لحال ولي يدعي عليهم خاطر رجعو دوك يعملو فلعيب على المباشر …
ماعرفش واش يدير بقى جامد هكاك ويشوف لبعيد ..
وهي الثانية معانقاته بقوة .. كأنو حابة لكل يشوف انو جبل ليها وحتى المجهولة هذي لازم تشوف ..
طلعت عينيها وهي كابسة عليه تحوس عليها من بناية لختها …
حتى ستقر نظرها لنادين … حلت عينيها على وسعهم وهي تشوف ليها .. اول مرة تشوفها فلحي ..وزيد في نفس البناية لي عايش فيها جبل ..
نادين الثانية مابعدتش عينيها من عليها تشوف فيها ومستغربة علاه تشوفلها …
#نوراااا🌹🌹🌹
تفاااااعلووووووووووو
بنات كيف ما وعدتكم زدتلكم 10 حلقات … اتفاعلو وحطو رايكم و توقعاتكم مش تقراو وتهربو…. و ملتقانا فليل ان شاء الله مع حلقات جدد … يمكن اذا طلعتولي حلقات ل 90 جام فما فوق نحط 30 حلقة 🤭🤭 نتوم و شطارتكملحلقة 31:
شوي وحست بيه نزل يديها من عليه وقرب شفافه من وذنها يحكي ..
_جبل: عيب … راهم ڨاع (كامل) يتفرجو فينا .. امشي طلعي للدار ..
بعدها من عليه ورجع شاف ليها لقاها تخزر لفوق .. هز عينيه هو الثاني شافها تشوف لنادين ستغرب وجرها يحكي ..
_جبل: اتحركي طلعي ..
_بشرى: شكون هذيك ..
_جبل: شكون لي شكون …
_بشرى: هذيك لي كانت تشوف لينا ..
_جبل: وحدة رحلت جديد .. بشرى ماتجهلينيش تحركي .. قبل ما تشوفك مااا وتعاود سيناريو لبارح ونعشي عالق معاها على جالك ..
_فكت روحها منه تحكي ..
_بشرى: تعرفها نتا ..
_جبل: شاراكي تهدري ..
_بشرى: هذيك لي رحلت جديدة تعرفها ..
_جبل:, من وين نعرفها انا ..وعلاه راكي تسقسي ..
جات تحكي حست بيد ختها جبدتها تحكي ..
_حورية: سمحلنا خويا .. ختي شوي تاعبة .. راح نهزها انا ..
جرتها وهي باقي متلفته تخزر لجبل لي واقف وراها ولنادين لي واقفة لفوق تتفرج فيهم ..
_بشرى:, هي ..والله هي ..
_حورية: صحاا تحركي .. بتصرفاتك هذو راح تخليه نتي يركز معاها ويحبها مايحتاجش يتعب روحه .. فيقي على وضعك .. وواش لكشفة لي عملتيها قدامهم كامل .. ترمي في روحك على الراجل .. وهو يقولك اطلعي ..احشمي .. راه هو محترم روحه ونتي لا …
_بشرى: شفتيها ..والله هي .. كانت تشوف لينا ..وساكنة فوقه .. راح يحبها … راح تخطفه مني ..
_حورية: الله يهديك.. واش بيك .. تحركي طلعي قدامي ..
_هزتها طلعتها لفوق ..تحاول تهديها وتفهمها كيفاه لازم تتصرف وتتحكم في مشاعرها المتهورة لي ماراح تجيب بيهم حتى نتيجة ..
#نورااا
عوجت فمها ودخلت بعدما كملت نشير الثياب .. سمعت صوت لباب مشات تحل لقاتها رانيا ..
_رانيا: شظي شدي من يدي .. هذا مسفوف عملاته أمي .. شدي ..
_نادين: علاه تعبتو رواحكم ..
_رانيا: معليش .. راهي عملاته بيك ولا بلا بيك ..
_دخلو مع بعض حطو الصحن هذاك على طاولة وقعدو يحكو ..
_نادين:مزال ضياف ماجاوكمش ..
_رانيا: مزال بعد الظهر نشالله .. تحبي تجي تقعدي معانا ..
_نادين: مانعرفش .. رانيا اسمعي ..
_رانيا: هيه ..
_نادين: نحب نطلب منك شي وحاشمة ..
_رانيا: علاه تحشمي احكي …
_نادين: نحب نعمل وشم ..
_حلت فمها تشوفلها مستغربة ..
_نادين: تسمعي فيااا ..
_رانيا: هيه نسمع فيك اما علاه .. واش من وشم ..
_نادين: تفكرت كلامك وقت قتيلي انو الوشم لي حطيتيه يفكرك بحبك .. نحب نوشم شي يخليني نتذكر وليد ..
_رانيا: متأكدة تحبي تعمليه ..
_نادين: هيه متأكدة ونحب نمشي عند طفلة هذيك تاع الحومة ..
_رانيا: قصدك بشرى ..
_نادين: هممم ..
_رانيا: الحق صدمتيني .. من اول يومين بديتي تتأثري بينا ..
_نادين: مش هذا الموضوع … نحب نعمل شي هذا وخلاص ..
_رانيا: اوكي .. دوك لعشية وقت يمشو ضياف نمشيلك عنده ونحكي معاها ونهزك ..
_نادين: اوكي مرسي ليك …
شوي وسمعو صوت دقات على لباب .. مشات حلت لقات طفلة ماعرفتهاش ..
_نادين: تفضلي ..
_ريم: نحوس على رانيا امها قالت راهي عندك ..
_نادين: دقيقة .. رانيا كاين شكون يحوس عليك ..
_رانيا : واه هاني … اااه ريم هذي نتي ..
_ريم: هيه انا .. اسمعي تمشي معانا لعشية للسينيما .. تشفي آخر مرة قلتيلي وقت تحبي تمشي قوليلي ..
_رانيا: علاه ماشيين ..
_ريم: هيه رايحين انا وبنت خالتي سومية وجبل .. ارواحي معانا..
_رانيا: اوكي خلي نحكي مع أمي بلاول ..
_ريم: حكييت معاها وقاتلي اوكي .. ارواحي مالا .. رجعت شافت لنادين تحكي ..
_ريم: اذا تحبي ارواحي نتي ثاني .. سينيما مش بعيدة بزااف ..
_مشات وخلتهم واقفين مع بعض ..
_نادين: هذي خته صح ..
_رانيا: مالا خلينا نمشو للسينيما نبدلو جو شوي ..
_نادين: لا هبلتي .. علاه نمشي معاهم ..
_رانيا: راح تمشي معايا انا … ومنها نبدلو جو ..
_نادين: مانعرفش .. دوك من بعد ونشوف اذا نقدر ..
_رانيا: اوكي انا نخليك دوك من بعد نرجعلك ..
هزتلها راسها وصكرت لباب وراها وبقات تخمم فلوشم لي راح تحطه ..
#نوراااا🌹🌹🌹الحلقة 32:
_هزت تليفونها من تحت لمخدة وبقات تشوف ليه .. راقدة هكاك على سرير وتخزر لتصاوره .. طالعة هابطة فلانستغرام نتاعه شوي ووصلتها نوتيفيكاسيون انو حط فوطو جديدة .. دخلت تشوف واش فيها حلت عينيها على وسعهم وهي تشوف لوجهه كيفاه آثار الضرب عليهم ..فوقها حاط لفوطو ويتبسم … رمات لغطى من فوقها وهزت روحها تجري .. رمات وشاح نتاعها على كتافها ولبست شلاكتها وخرجت تجري عرضتها امها تحكي …
_وين يا لالة ..
_رانيا: راح نمشي لنادين ونرجع مانبطاش ..
_اوكي ماتطوليش خالتك قريب توصل من شوي قاتلي انو حتى تامر جاي معاهم ..
_رانيا: ماقاليش انو راح يجي ..
_مانعرف احكي معاه وسقسيه ..
_رانيا: صحا دوك شوي ونجي نحكي معاه ..
طلعت تجري لفوق .. اول ماوصلت قدام الدار .. عدلت روحها وشعرها ورجعت قرصت خدودها ..وخذات نفس وحطت يدها على لباب دقت دقات خفاف ورا بعض .. شوي وجاها صوت امه من ورا لباب ..
_سكينة: دقيقة راني جاية ..
شوي وحلت عليها لباب ..
_رانيا: اهلا خالتي ..
_سكينة: مرحبا بيك بنتي تفضلي ..
_رانيا: نحتاج خالد .. اذا هنا معليش ندخل عنده ..
_سكينة: واه دخلي ..ولاد الحرام لبارح طاحو فيه تعارك معاهم ..
_رانيا: راه مليح ..
_سكينة: واه حمد لله ادخلي راه في غرفته قاعد ..
هزتلها راسها ومشات جيهة غرفته حتى وصلت لقدام لباب .. خذات نفس وحطت يدها تدقدق عليه ..
_خالد: ادخل شكون ..
_حلت لباب ودخلت راسها تحكي ..
_رانيا: هذي انا ..
_خالد: وانا نقول مرتي بطات عليا ..
_رانيا: راح نمشي .. حبس سماطة تاعك ..
_خالد: نضحك معاك ادخلي .. راني ديجا كاره وحدي ..
دزت لباب وخلت نصه محلول ماحبتش تصكره كامل حشمت من امه ..
مشات جبدت لكرسي وقعدت مقابلاته ..
_رانيا: واش صرا لوجهك ..
_خالد: تعاركت ..
_رانيا: كنت ساهر باينة …
_خالد: هههه متابعة اخباري مليح .. تعسي فيا .. شوفي فيا تشوف علاه حاسك تعسي فيااا.. زعما دوك جيتي صدفة ولا كيفاه .. غير حطيت لفوطو مافاتوش خمس دقايق جيتي ..
_رانيا: الحق مشي عليك عليا انا لي جاية ليك ..
مد يده شد يدها قبل ماتمشي يحكي ..
_خالد:, خليك خلاص راح نسكت ..
قحرتله وفكت يدها من يده تحكي ..
_رانيا: كان كسرولك فمك احسن .. بربي علاه قاعد تتبسم ..عمري شفت واحد كالي طريحة يضحك ..
_خالد: نضحك على روحي … كثرة الهم تخليك تضحك صدقيني ..
_رانيا: واش هو همك ..
_خالد: ماتعرفيش احسن .. قوليلي تشوف واش عندك ليوم .. راح نمشي مع جبل للسينيما تمشي معانا ..
_رانيا: لا بزاف هاك .. راح تروح نتا ثاني مش مريض زعما ابقى هنا …
_خالد: يعني ماتحبينيش نمشي معاكم ..وفي نفس الوقت جاية تشوفيني ..
_رانيا: علاه تعاركت ..
_خالد: على جال وحدة … قعدت نبزنس فيها وهي مع صاحبها جاب صحابه وضربوني ..
_سكتت وتبسمت بمرارة …
_رانيا: راح نمشي … خالتي وخطيبب جايين لعندنا ..
_خالد: رانيا ..
_رانيا: واه ..
_خالد: والو .. ردي بالك على روحك ..
_هزتله راسها وحلت لباب خرجت ..
وهو هز لمخدة هذيك ضربها على لحيط ونفخ …
#نورااا🌹🌹🌹الحلقة 33:
قاعدين فلصالون هذاك .. واصواتهم طالعة يحكو … الوقت هذاك حل هو لباب ودخل .. وصله صوتها نفخ عرفهم هنا ..ودوك امه ماتطلقهش حتى تلصقها فيه ..
حب يمشي طول لغرفته اما وقفاته امه تحكي ..
_سميحة:, جبل ارواح سلم على خالتك راهي هنا ..
تلفت ورجع رسم ضحكة على وجهه يحكي ..
_جبل:خير خالتي راكي مليحة ..
_فاطمة: مليحة ولدي ونتا كيراك .. مليح ..
_جبل: مليح حمد لله .. دور عينيه للجيهة ثانية شافها قاعدة مقابلاته وتخزرله ..
_جبل: كيراكي ..
_سومية،: لباس حمد لله ..
_سكينة: امشي سومية مع جبل .. اذا حبيتي تشمي هوا … ولا نقولك امشو للسينيما مع بعض .. هاي حتى ريم راح تمشي مع جيرانا لفوق ..
ثانية تقول ماصدقت الحال هزتلها راسها وباقي تشوف ليه ..
_جبل: ربع ساعة ونجيكم ..
مشى طول لغرفته وصكر لباب … عدى يده على لحيته وجبد تليفون سجل رقم خالد .. شوي ورد عليه ..
_خالد: واه صاحبي. …
_جبل:, ماتقوليش راح تطرطقهالي كيما درتلك لبارح .. ياك رايح معايا ..
_خالد: ماتخافش انا مشي كيفك .. بصح واش بيها بنت خالتك مشي زينة باش خايف تقعد معاها وحدكم ..
_جبل: مشي هذا المشكل .. طفلة مشاء الله بصح ماااا قاعدة تفهم فيها بلي هي راح تكون كنتها ..وانا مشي باغي نتزوج أصلا ..
_خالد: صحااا نمشو واحكي معاها وفهمها باش ترفض هي ..
_جبل: واه راني نخمم فيها .. صحا البس ربع ساعة ونلقاك تحت ..
_خالد: اوكي ..
علق عليه ورجع مشى غير ثيابه .. ونزل يعقد في خيوط صباطه .. وقرب وقف من لمرايا يخزر لملامح وجهه …
شاف للجيهة ثانية لمح تريكوها لي شراته .. قرب هزه وحله يخزرله .. نحى تريكوه ورجع لبس تريكو تاعها .. جاه سوا سوا .. ستغرب كيفاه قدرت تجيب على نفس مقاسه …بعدها تذكر انو تريكوه ديجا كان عندها ..
طلع يديه لفوق راح ينحيه ويرجع تاعه .. حتى تحل لباب لقاها واقفة وراه .. هبط تريكوه بلزربة ..
_جبل:, ماتعرفيش تطبطبي .. كون كنت عريان ..
_سومية: هذا وشم حقيقي ..
قربت منه وعدت يدها على ذراعه .. ضيق عينيه وجبد روحه منها يحكي ..
_جبل: شاراكي تديري ..
_سومية: انا وريم نستنو فيك ونتا بطيت قلت نجيك ..
_جبل: استني برااا ..
_سومية:, هاك واجد هيا خلينا نمشو ..
_نفخ ورجع هز تليفونه وخرج خرجت وراه تبع فيه ..
ماعرفش كيفاه يتخلص منها هاي طلعت لصقة .. وماتحشمش .. عكس الحجاب لي حاطاته على راسها …
_خرج لبرا لقى خته تستنى ..
_جبل: اتحركو ..
نزلو مع بعض .. للتحت .. دور راسه يحوس على خالد مالقاهش ..
_ريم:راح نستنى رانيا حتى هي جاية ..
_جبل: عيطيلها تنزل ..
_ريم: عيطتلها دوك تجي ..
#نوراااا
رانيا: هيا نادين ..والله راح نفوتو وقت شباب .. وزيد حتى تامر ماشي معانا .. هيا الله يخليك في وجهي ..
_نادين: والله حشمتيني .. صحا صبري نلبس بلزربة وشوفي اياد عاونيني لبسيه صباطه ..
_رانيا: اوكي غير تحركي ..
دخلت لبست ثيابها .. وحطت مونتو فوق من كتافها … وشعرها فرداته على ظهرها . وحطت مكياج خفيف يخفي العيوب لي عليها .. وحطت أحمر شفاه غامق ..وخرجت لعندها ..
_رانيا: راكي تهبلي .. هاك نحبك .. الحياة قصيرة ارمي ثوب الحزن من عليك ..
_نادين: لا شي هذا غير في وجهك .. ماعادش تحرجيني منا وروح سمعتي ..
_رانيا: ههه صحاا هيا ريم راهي تعيط وتعاود ..
خرجو مع بعض . وتامر اول ماشاف نادين عينيه علقو فيها . ورانيا لاحظت شي هذا اما ماحبتش تدقق كثر ..
نزلو مع بعض للتحت .. حتى سمعو صوت خالد وراهم ..
_خالد: سلام عليكم ..
_شاف ليها ورجع شاف لتامر ..
_تامر: وعليكم السلام ..
_رانيا: تامر هذا جارنا خالد … هو ثاني ماشي للسينيما معانا ..
_تامر: احسن مانكونش راجل وحدي ..
_خالد: تفضل مالا …
نزلو مع بعض للتحت ..
جبل كان مهبط راسه يلعب بالتيليفون .. وقت سمع صوت خطواتهم هز راسه لمحهم من بعيد .. دقق كثر حتى شافها معاهم .. ستغرب بعدها طول تذكر انو لابس تريكوها .. دخل بعضه مالقاش كيفاه يعمل .. هز لفاست نتاعه صكرها من لفوق للتحت .. يعني حس روحه نحط في موقف محرج ..
وهي ثانية ماغابش عليها شي هذا ..
اول مانزلت لمحاته لابسه ..
_رانيا: ههه شايفاتك عطيتيه تريكو فوقها لابسه .. خير واش كاين بينك وبينه ..
_نادين: مكان والو .. رديتله غراضه وخلاص ..
_رانيا: نشالله يكون كلامك صح ..
خرجو مع بعض من الحي هذاك .. وهي تمشي وهازة ولدها في حضنها ..تلهي في روحها بيه ..
شي ربع ساعة وكانو وصلو قدام قاعة السينيما ..
#نورااا🌹🌹🌹لحلقة 34:
هزت عينيها تخزر لقاعة السينيما لي مقابلتهم .. ورجعت تدور في راسها جيهة الطريق … نسمة باردة تضرب .. وريح خفيفة مخلطة مع قطرات مطر ..
شوي وسمعو صوت وحدة جاية تجري تلفتت تشوف شكون لقاتها طفلة قربت منهم تحكي ..
_شيماء: السلام وعليكم ..
_ريم: مزية جيتي خفتك ماتجيش ..
_رانيا: شكون هذي ..
_ريم: صحبتي .. شيمااء ..
_جبل: الله يبارك جبتي قبيلة معاك للسينيما .. هيا خلونا ندخلو …
دخلو مع بعض كامل ..وبقاو يستنو حتى شراو تيكيات نتاع المقاعد ..
_نادين: رانيا دقيقة نحتاجك ..
_مشات جيهتها تحكي ..
_رانيا: صار شي ..
_نادين: معليش تهزي اياد من يدي .. راح ندخل للحمام ..
_رانيا: ياخي لباس ..
_نادين: لباس اتهني ..
_رانيا: اوكي راح نسبقوك ندخلو .. حتى تلحقينا ..
_هزت اياد من يدها .. ونادين مشات تحوس على الحمام وين .. شوي ولمحاته من بعيد مشات تزرب .. دخلت وصكرت لباب وراها .. وقفت قدام لمرايا..ورجعت خذات نفس .. حلت السبالة وهلت لما ينزل…. للحظة جات صورته بين عينيها .. آخر مرة خرجت كانت معاه هو .. عمرها مشات بلاصة بلا بيه .. تعبو عينيها بدموع .. المرة هذي جات مع ناس غرباء .. جات بلا بيه هو .. كبست على شفتها .. ورجعت تحاول ترد النفس .. حطت يديها تحت لما وهزت بللت رقبتها ورجعت تخزر مع ملامح وجها ..
_نادين: ربي يصبرني على فراقك .. مش عارفة كيفاه مازلت هازة روحي وواقفة على رجليا .. الله يرحمك ..
خذات نفس ومشات حلت لباب خارجة لقاته في وجها واقف .. وحتى هو الثاني دخل بعضه .. ماعرفش واش يحكي .. ضيقت عينيها فيه تحكي ..
_نادين: علاه واقف هنا ..وين رانيا ..
_تامر: دخلو حجزو المقاعد … شفتك قبيل مش مليحة حبيت نجي نطمن عليك ..
_نادين: راني مليحة .. كان بقيت مع رانيا احسن .. جات تمشي .. وقفها يحكي ..
_تامر: قاتلي رانيا انو راجلك مات .. الله يرحمه ..
_نادين: امين ..
_تامر: نعرف احساس المرأة كيفاه وقت تضيع راجلها .. تكون وحيدة .. خاصة إذا عندها صغير … راح تحتاجي شكون يوقف معاك …
تلفتت شافت ليه وركزت مع كلامها .. نفس الكلمات لي ستخدمهم حمزة وقت حب يقرب منها ويوصل للي حاب ..
_نادين: حد قالك كلام هذا .. حد قالك اني محتاجة شكون يوقف معايا ..
_تامر: مش حتى تحكي .. اي ارملة راح تمر بنفس الظروف لي راكي تمري بيها ..
_نادين: عن اذنك .. نظن لي تحوس عليه مش عندي ..والاحسن تتلهى بخطيبتك هي لي تحتاجك كثر ..
هزاته وحطاته ومشات تزرب هاربة منه وتسب بين شفافها . يعني اشكال حمزة راح تلقاهم في كل بلاصة .. هاو هذا مع خطيبته وماحشمش انو تمشي تحكيلها ..
رجعت تدور من بلاصة لبلاصة .. حتى وصلت لقاعة سينيما .. بقات تقلب عليهم وسط العتمة هذيك ..
حتى لمحت راس رانيا وفي حجرها اياد ..
نزلت تزرب مع بداية الفيلم ..
وصلت للصف لي قاعدين فيه ..
ومع كلام لي قاعدين وراها ياكلو في رواحهم انو قاعدة تضيع عليهم في مشاهد ة الفيلم .. قعدت فلكرسي لفارغ .. ورجعت ترمي في عينها جيهة رانيا لي قعدت تطمن فيها انو اياد مليح عندها ..
خذات نفس ورجعت نحت مونتوها وركزت مع لفيلم لي قاعد يمشي قدامها …
#نوراااا🌹🌹🌹
توصل لحلقة 100 جام ونحط لي بعدها 😘😘😘لحلقة 35:
نادين تحكي …
تلفت على صوت خطواته وقت دخل هو الثاني ومشى قعد جنب رانيا .. كلامه قبيل خلاني نتنرفز .. تاع الصح رجال كلاب .. ماتكفيهمش وحدة ..لازم يعملو غلطة ويخدعو ولا مايرتاحوش ..
هزيت عيني جيهته لقيته يشوف جيهتي .. نفخت ..ورجعت نشوف مع لفيلم .. مانعرفش شحال فات من وقت وانا نخزر للفيلم وعقلي شارد بعيد .. نخمم في كل شي .. هزيت يدي حطيتها على لكرسي تركزت بيها تحت خدي ..
وخذيت نفس حسيت روحي متضايقة .. مانعرفش كيفاه حسيت بصوته .. لي مش غريب عليا ..
_اذا ماعجبكش لفيلم تقدري تخرجي ..
دورت راسي جيهته لقيته قاعد جنبي .. المصيبة مش عارفة كيفاه قعدت جنبه بلاما نلاحظ شي هذا …
نزلت يدي لقيت روحي حاطتها فوق يده ومتركزة عليها … جبدتها طول نحكي ..
_نادين: ديزولي .. لبلاصة معتمة بزاف خنقتني ..
_ماردتش عليا هز يده حطها تحت لحيته وبقى مضيق عينيه فلفيلم …
سكت مازدتش حكيت معاه .. اما شي هذا مامنعش اني نبقى كل مرة نرمي عيني جيهته .. مانعرف علاه نحس هو الوحيد لي مايخزرليش بطريقة مش مليحة .. ولا ممكن هو الوحيد لي انا بالذات مانعجبهش .. رميت عيني جنبه لمحت طفلة قاعدة تشوف ليه هي الثانية ..
رجعت دورت عينيا منها طول ..
_نادين: شحال باقي ويخلاص لفيلم هذا ..
_جبل: ساعة ..
_نادين: على واش يحكي .. ماعرفتش نركز معاه ..
_جبل: كيفك مارانيش مركز معاه ..
_حىيت فمي وقعدت نخزرله .. يعني من قبيل يشوف للفييلم ومش فاهم على واش يحكي ..
_نادين: في واش مركز مالا .. فاتت ساعة وعينيك على الشاشة
_جبل: حتى نتي تشوفي ومش مركزة .. وانا ماسقسيتكش وين عقلك ..
_سكت ورجعت نشوف مع لفيلم لي ماعدت فاهمة منه شي .. اما للحظة حسيت نقطة خلتني نشوف معاه .. وكأنو فهمت واش يحكي ..
مراة عندها صغير عايشة في قبو .. هذا اول شي لاحظته … بعدها لاحظت انو صغير مايعرفش واش هو ضو الشمس .. نسيت لي جنبي ورجعت مركزة مع لفيلم .. كأنو عاد شي الوحيد لي يهمني انو نفهم القصة على واش تحكي …
مع مرور الوقت جى مشهد وين الام خبت ولدها فلخزانة وطلبت منه يرقد فلوقت لي وصل راجل حل لباب ودخل .. جرها للسرير ورقد معاها وولدها راقد فلخزانة هذيك .. صراحة مفهمتش واش قاعد يصرا .. حتى شفت الراجل هذاك فليوم الثاني خرج وصكر عليهم لباب .. فهمت انو مراة هذيك محجوزة فلقبو هذاك مع صغيرها .. لي عاش حتى عمر سبع سنين مايعرفش العالم الخارجي … يقابل شاشة التلفاز ويشاهد الناس ..وهو حاطهم من عالم ثاني ..وانو عالمه هو العالم الحقيقي .. عالمه لي عبارة عن قبو طوله مترين .. فيه ثلاجة وتلفزة وسرير وام قاعدة تحاول تتقاوى على جال صغيرها ..
مانعرفش علاه ربطت حكايتي بحكايتها ..ولا علاه تعبو عينيا بدموع وانا نشوف ليهم .. حسيت اني ام فاشلة .. ام كانت مستعدة تموت وتنتحر وتخلي صغيرها وراها … مانعرفش كيفاه بقاو دموعي ينزلو يحرقو على خدي. ..
هزيت عينيا نحوس على ولدي .. حسيت روحي حابة نحضنه بقوة ونطلب منه يسامحني. . خاطرني ظلمته . وكنت انانية ..
اول ماهزيت عينيا جات عيني في عينه يخزرلي بطريقة غريبة تاع واحد مستغرب مني . ومن تصرفاتي .. مانعرفش شحال تعدى من وقت وحنا نخزرو لبعض …
_جبل: علاه راكي تبكي ..
_نادين: نحب على ولدي .. تقدر تجيبهلي ..
هزيت روحي خرجت طول خارج الغرفة هذيك وبقيت نستنى فيه وقتاش يخرج ويجيبلي ولدي معاه …
#نورااا🌹🌹🌹
توصل 100 جام ونحط لي بعدها .. حطو اراءكملحلقة 36:
وقفت برا ترد فلنفس … مش عارفة واش صرا ولا علاه فجأة هاك رجعت حساسة .. تجينا لحظات نطيحو في مواقف يفيقونا على وضعنا .. لدرجة انو نرجعو متهورين ومش عارفين واش نديرو ولا كيفاه نخرجو من شي لي طحنا فيه .. ممكن هذا انسب تفسير للشي لي طاحت فيه نادين … عقلها وقلبها ومشاعرها لكل تخلطو ودخلو بعضهم كأنو فاقت بغلطتها وبشي لي كانت قاعدة تعيش فيه …
تلفت مفزوعة على صوت ولدها لي يضحك .. ويحكي في كلام مش مفهوم .. شافته جاي وهازه من بعيد .. نزلو دموعها وجرات جيهته شداته من عليه تبوس فيه من كل بلاصة ..
_نادين: سامحني على كل شي .. سامحني خاطرني كنت ضعيفة وكنت مستعدة نموت ونخليك.. سامحني على ضعفي ..
جبل كلامه صدمها وخلاه يركز معاها بدل مايدخل ويخليها ..
_جبل: راكي مليحة ..
_نادين: ركزت مع لفيلم صح ..
_جبل: يهمك لموضوع …
_نادين: احكيلي المرأة هذيك كيفاه حتى وصلت للقبو ..
_جبل: نخطفت ..
_نادين: يعني راجل .. هذاك .. لي كان .. يغتصب فيها .. خاطفها ..
_سكت وهزلها راسه ..
_نادين: قعدت سنين فلقبو هذاك ..كل يوم تتعرض للضرب والاغتصاب ورغم هاك عاشت صح ..
_جبل: نورمالمون هاك ..
_نادين: تعرف انو انا جبانة .. تعرف انو كنت مساعدة ننتحر ونلحق راجلي ونسمح فلصغير هذا ..
_جبل: بصح مادرتيهاش ..
سكتت وهزتله راسها بلا ..
_جبل: علاه تلومي في روحك …
_نادين: خاطر في وقت من الاوقات تصرفت بأنانية ..
_جبل: نظن مكانش انسان فلعالم مش اناني .. كامل نخممو في رواحنا .. ويجي وقت نفيقو .. ممكن ليوم فقتي ..
_كلامه طمنها شوي وهداها .. ماتعرفش علاه رجعت حساسة للدرجة هذي وأبسط شي يخليها تبكي وتنهار …
تبسمت وشافت ليه تحكي ..
_نادين: مرسي ..
_جبل: راح ندخل دوك ..
_نادين: اسمع …
_جبل: واه ..
_نادين: تريكو .. جى عليك احسن من لي قبلو ..
_هزلها راسه وتلفت داخل ورجع تبسم .. وبقات هي واقفة لبرا .. متركزة على الحيط تخزر مع سما صافية ..وكل شوي تبوس ولدها .. كأنو الشي لي صرا ليوم اشارة ليها باش تنفض غبار الضعف من عليها .. وتخمم في سنين حياتها الباقية وفي صغيرها .. صح حبها لوليد عمره يمشي وعمرها تنساه .. اما دوك لازم تتقاوى على جال ولدها باش اشكال حمزة وتامر مايستغلوهاش …
#نوراااا
شوي ورجعت دخلت للداخل وقعدت جنبه من جديد شادة ولدها ومركزة مع لفيلم … لقاتها قريب يخلاص .. ولي فاجأها انو لمراة هذيك وولدها قدرو يخرجو من لقبو هذاك ويهربو .. فرحت وكملت لفيلم للأخير ..
ومع خلاص بداو العباد يخرجو … خرجت هي وبقات تستنى في رانيا لي خرجت مع تامر مشبكة يدها مع يده …
ماحبتش تركز معاه وماحبتش تحكيلها شي على تصرفه قبيل باش ماتضيعش بينهم ..
_رانيا: كيفاه جاك لفيلم ..
_نادين: يهبل .. عجبتني نهايته ..
_رانيا: هيه يعني مش ضياعة وقت .. قوليلي واش حابة تعملي دوك .. انا وتامر راح نمشو مع بعض .. تحبي تجي ..
_نادين: ااه لا لا خلي راح نرجع
_رانيا: دقيقة مالا .. ريم ..ريم ..
_ريم: واه ..
_رانيا: راكم راجعين للدار صح ..
_ريم: هيه ..
_نادين: مالا خلي نادين ترجع معاكم احسن ماترجع وحدها ..
_ريم: هيه نادين ارواحي معانا ..
هزتلها راسها ورجعت كبست على ولدها ومشات جيهتهم …
#نورااا🌹🌹🌹
تلحق 100 جام نحط لي بعدها جايين حلقات نار 😍لحلقة 37:
رايحة جاية فلصالون ..وكل شوي ترمي عينها من الشباك تشوف اذا رجع ولا مزال .. تليفون كلاته وهي تعيطله وشي تلقاه مصكر ..
_قعدت على لكرسي تنفخ ..وتخزر مع ولد ختها لي قاعد في لرض يتململ ..
_بشرى: زيد نتا على مابيا .. اقعد تتكور هاك في لرض ..
_حورية: علاه راكي تاكلي في روحك ..
_بشرى: لدوك مارجعش .. شفته صباح وقت مشى مع بنت خالته .. وزيد مايردش عليا ..
_حورية: خلاص هدي روحك .. أصلا بنت خالته مش مشكلتنا .. خلي نشوفو لمراة هذيك جديدة .. نعرفو اسمها ونجيبو شي من غراضها وبعدها ساهل ..
_بشرى: راح يضيع من بين يديا وانا نتفرج علابالك راح نختنق .. بسبته هو ..
_حورية: علاه عاملة في روحك هاك…
_بشرى: اسكتي ..
ناضت تجري للشباك وهزت الريدو تشوف .. لقاتهم صح راجعين .. قعدت تثبت في ملامح كل حد فيهم ..
حتى جات عينها على نادين ..
_بشرى: هاي ليك .. مش قتلك هي .. هاهي معاهم ..
_قربت ختها من الشباك تخزر معاها لمحت نادين وهازة صغير ..
_حورية: بصح شوفي .. المرأة هازة صغير .. يعني متزوجة ..
_بشرى: صح .. زعما متزوجة ..
_حورية: هذا واش راني نشوف ..وشوفي جبل .. يمشي قدامها مش جنبها ..الظاهر مايعرفهاش غير نتي راكي قاتله عمرك بلتخمام .. ممكن كلام الشوافة مش صح .. ممكن هي غلطت ..
_بشرى: مانعرفش .. هزت تليفونها من جديد تعيطله بدا يصوني .. رد عليها ..
_جبل: وي ..
_بشرى: وينك ..
_جبل: تحتاجي شي ..
_بشرى: راني مريضة .. ارواحلي ..
علقت عليه طول وتلفتت لختها تحكي ..
_بشرى: راح يجي عندي .. مانحبهش يعرف انو نتي هنا .. نحب نقعد معاه ونحكي لي في قلبي .. ونشوف واش يحكي ..
_حورية: واش تحكي ..واش حابة تطلبي منه .. ماتكونيش بهيمة ..
_بشرى: امشي للكوزينة وهزي ولدك وصكري لباب ..
_عوجت ختها فمها وهزت ولدها ومشات عملت كيف ماطلبت منها والثانية .. مشات عدلت روحها وبقات تستنى فيه وقتاش يجي متاكدة انو راح يجي مدام قاتله مريضة مستحيل انو مايجيش ..
#نوراا
هبط تليفون من وذنه .. يخزر لبنت خالته لي مركزة معاه ..
_سومية: صرا شي ..
_جبل: والو .. اطلعو لفوق راح تبدا تمطر ..
_سومية: ونتا وين ماشي .. مزال ماقعدناش وحكينا ..
_جبل: عندي خدمة ..
طفاها ورجع مشى جيهة العمارة لي عايشة فيها بشرى .. يعيطلها ماتردش ..وهي تقصدت تعمل هاك .. باش ياكلها لفضول ويجي يعرف واش بيها ..
_ريم: هيا سومية خلينا نطلعو ..
_سومية: خوك عنده شكون في حياته ..
_ريم: مانعرفش ..
_سومية: علاه ماشي للجيهة هذيك ..واش كاين لتم ..
_ريم: سومية هيا علاه تسقسي بزاف خلينا نطلعو ..
نفخت وبقات تمشي داخلة وكل شوي تتلفت تشوف وين ماشي صح …
_سومية: خوك واش يحب .. يعني دوك انا كيفاه نخليه يحبني ..
_ريم: خويا مايحب حد .. ماتعبيش روحك باطل .. خلي مااا هي لي تحبك .. اذا رضات عليك هي .. معنتها راح تكوني ليه ..
_سومية: يعني مصيري معاه بيد خالتي ..
_ريم: ايوااااه خليها هي تحبك وتشوف انو تناسبي ولدها ..وهو اخطيك منه راح تتعبي باطل ..
_سومية: فلسينيما كيما عملت نتقرب منه وهو يصدني حتى حسيته بارد ..
_طرطقت ريم بلضحك ..
_ريم: بارد .. راكي في عقلك .. غير ممكن نتي ماشعلتيهش هذا مكان .. امشي امشي راني جيعانة خلينا نفطرو ة وعندي دروس نكملهم ..واذا راح تبقي تحكي على جبل أخطيني من دوك ..
_سومية: خلاص خلينا من سيرته .. هيا ندخلو ..
دخلو مع بعض .. وسومية بقى كلام ريم في راسها وقت قاتلها انو مااا اذا رضات عليك يكون هو ليك ..
#نورااا🌹🌹🌹
توصل 100 جام نحط لي بعدها .. تفاااعلووووالحلقة 38:
حطت ولدها على سرير ..وعلقت مونتوها ومشات قعدت قدام لمرايا وهزت وحدة لانجات وقعدت تمسح فلمكياج لي على وجها .. وتخزر مع سما لي مقابلتها من الشباك ..
هبطت يديها نحت الكعب لي كانت لابساته ورجعت راسها ورا تتنهد .. شوي وصونا تليفونها شافت ليه ..ورجعت ضيقت عينيها فلاول ترددت انو ترد عليها بعدها خذات نفس وهزت عليها ..
_نادين: الوو ..
_سامية: نادين واش راكي ..هكا تعملي تقاطعيني حتى انا ..
_نادين: حاشا نتي واش دخلك .. ادغير ماكنتش مليحة ماحكيت مع حد ..
_سامية: تعرفي أمور الوراثة مايفضوش .. انا حكيت مع حمزة وقال انو هو خاطيه خاطر خوته لباقيين حبو على الدار خاطرها فلاصل ترجع لبوهم ..
_نادين: نعرف وتفهمت الموضوع وخرجت وخليتلهم المفاتح ..
_سامية: معليش .. احكيلي على اخبارك .. وين عايشة كيفاه مسلكة أمورك ..
_نادين: عايشة برحمة ربي .. ولباقي على ربي ..
_سامية: اذا حتجتي شي قوليلي .. ياك تعرفيني نحبك .. هاني نحكي مع حمزة باش يجيبني لعندك نحب نشوفك .. ونبقو على تواصل .. راكي بمقام ختي ..
_نادين: ربي يخليك .. اتهلي في روحك ..
علقت عليها ورمات تليفون على طاولة تنفخ .. وين تقول خلاص هربت منهم يرجعو يخرجولها من جديد ..
مشات هزت ولدها رضعاته .. ووقت تأكدت انو رقد .. دخلت عملت دوش ريحت بيه راسها ونحت تعب نهار ليوم ..وخرجت لبست جيبة نتاع دار ..ونشفت شعرها ودخلت للكوزينة .. شعلت على الما تحت النار وحلت الشباك باش تتهاوا ويدخل هوا نقي .. كملت حطت لقهوة خلتها تغلي وجبدت حبات حلوى حطتهم في صحن صغير ..وطفت على النار .. ومشات قعدت مقابلة تلفزيون تتفرج وتترشف في قهوتها …
الوقت هذاك رانيا كانت طالعة مع الدرجات هذوك بعدما وصلها تامر حتى لىدخلة نتاع الحي ومشى ..
_خالد: شايفك فرحانة ..
قفزت في بلاصتها خاطر كانت شاردة وصوته خرج فجأة في وجها ..
_رانيا: رعبتني ..
شاف ليها من فوق متركز على لحديدة نتاع الدروج يحكي ..
_خالد: وين مشيتي معاه ..
_رانيا: واش دخلك ..
_خالد: تعرفي انو مارتحتلهش ..
_رانيا: شكون سألك على رايك ..
كملت طلعت حتى وصلت ليه تحكي ..
_رانيا: خليني نطلع ..
قطع عليها طريق يحكي ..
_خالد: واذا مابعدتش واش راح تديري .. تعيطي لتمورة تاعك يضربني ..
_رانيا:طريحة لي راك كاليها بزاف عليك وين حاب تزيد ..ودوك بعد من وجهي …
_خالد: تعرفي انو مان يبزنس في صحبتك ..
_رانيا: واش قصدك .. شكون صحبتي ..
_خالد: الظاهر فيك راقدة على وذنيك ..بصح قوليلي وحدة غبية كيفك واش راح تفهم .. امشي طلعي ..
_رانيا: واش تقصد بكلامك هذا .. تحب تعمل مشاكل بيني وبينه صح …
_خالد: آخر حد نخمم نعملو مشاكل هو نتي .. قاعد نحكيلك فلحقيقة باش من بعد ماتتصدميش ..
_رانيا؛ نتا هاك تحب كل شي ليك .. الاهتمام ليك والاضواء ليك ..وخاطر ماوصلتليش قاعد تعمل في مشاكل بيني وبينه .. بصح نتصور تعرف الفرق بينك وبينه وهو بعيد عليك واحسن منك في كل شي .. مالا حبس ماتتبلى فلناس ..
دزاته وطلعت تجري مع الدرجات هذوك وخلاته واقف كابس على الحديدة هذيك .. كلامها ستفزه وحسه انو صغير قدامها وهي قاعدة تقارن فيه مع خطيبها لي مايسواش دورو ..
#نورااا🌹🌹🌹
جام+. اراءكم .. توصل 100 ونحط لي بعدهاالحلقة 39:
طلعت تجري مع الدرجات هذوك ..ووقت وصلت قدام لباب راح تدخل حست بيده جبدها وحصرها مع لحيط ..
هزت عينيها فيه مصدومة ..
_رانيا: واش راك تدير ..
_خالد: راح تسكتي وتسمعيني ..
_رانيا: واش نسمع … بعد يديك من عليا ..
_خالد: لهذي الدرجة انا مش مليح وهو مليح واحسن مني حتى تبقي تقارني فيا بيه .. دنيا لكل مليحة غير خالد لي مش مليح ..
_رانيا: هبلت نزل يديك من عليا واش اذا شافنا حد ..
نادين كانت ماشية ترجع كاسها للكوزينة وقت سمعت اصوات قدام لباب .. مشات جيهة العين وبقات تطل منها حتى لمحتهم مع بعض .. حطاته كاش مايعمللها .. حلت لباب طول ..
_نادين: واش قاعد يصرا هنا .. رانيا واش يعملك هذا ..
ماستناهاش حتى تكمل كلامها وجر رانيا من يدها ومشى جيهة دار نادين دز لباب ودخل بيها لعندها ..
_نادين: ياخي واش تعمل ..
_رانيا: فك يدي هبلت ..
_خالد: احكي دوك .. واش مشكلتك معايا كلما نجرب نكون مليح معاك نلقاك تسبي فيا وتسمعيني فلكلام .. راني صح نضحك وماندققش اما مش لدرجة تبقي تقارني فيا بلي يسوى ولي مايسواش ..
_رانيا: ماقارنتك بحد نتا تحب تعمل مشاكل .. كيفاه تحكي كلام هكاك عليه ..
_خالد: علاه كذبت .. هاي صحبتك قدامك وسقسيها …
_رانيا: كنت تقصد في نادين بكلامك مالا ..
_نادين: واش كاين حد فيكم يفهمني ..
_خالد: علاه كلام لي نحكيه انا ماتصدقيهش .. علاه اي شئ نقولهلك تحطيني نكذب وخلاص ..
_رانيا: خاطر كلامك عمره كان جدي .. وانا عمري صدقته ..
_خالد: تعرفي واش .. من ليوم ماعادش نتدخل فيك اما وقت تفيقي ويطلع كلامي صح وقتها تعرفي حجم لغلطة لي عملتها معايا ..
_رانيا: مايهمنيش موضوعك ..وحكاياتك لفارغة من الأصل ..
عض لسانه يحاول مايخصرش معاها لكلام .. على قد ماحاب يعطيها كف يفيقها بيه على وضعها .. على قد مابقى ساكت ..
_خالد:, الله يسهلك في حياتك ..نتي وطرطور تاعك .. انا قلت بنت حومتي لي يضرها يضرني .. بصح طلعت غالط …
ضرب يديه مع زوج ومشى حل لباب خرج وضربه وراه ..
_شافت ليها نادين تحكي مستغربة ..
_نادين: مفهمت والو واش كاين ..
_رانيا: والو .. جيبيلي كاس مااا .. حلقي نشف بسبته …
هزتلها راسها ومشات جابتلها كاس ما وحطتلها كرسي تقعد عليه ..
_رانيا: نادين راح نسألك ..
_نادين: هيه احكي ..
_رانيا: كيفاه جاك تامر .. يعني وقت شفتيه واش اول انطباع هزيتيه عليه ..
_نادين: علاه تسألي ..
_رانيا: جاوبيني …
_نادين: مانعرفش .. انسان عادي .. يعني … وزيد ماحكيتش معاه عن قرب باش نعرفه ..
_رانيا: نادين معليش نحكو من بعد حاسة روحي مش مليحة .. لكلب هذاك نكد عليا بلي عمله من شوي ..
_نادين: اوكي براحتك ..
خرجت وصكرت نادين لباب وراها وبقات تخمم في كلام خالد .. لي كان يحكي فيه صح .. تامر هذاك يبان انو مايناسبهاش خلاص ..
#نورااا🌹🌹🌹
لبنات راني نطول بسباب لكونيكسيون راهي ثقيلة عنديالحلقة 40:
قعدت رايحة جاية فلدار تستنى وقتاش تسمع صوته من ورا لباب … اول ماسمعت صوت خطواته .. مشات تزرب حلت عليه لباب وجبداته دخلاته لعندها ..
_جبل: شاكاين ..
_صكرت لباب من داخل وتلفتت شافت ليه ..
_بشرى: امشي للصالون نحب نحكي معاك …
_جبل: كاش ما صرا ..
_بشرى: قريب يصرا ..
مشات للصالون وتبعها هو .. صكرت لباب باش مكانش لي يسمع كلامهم .. ورجعت تلفتت شافت ليه ..
_بشرى: وين كنت ..
_جبل: علاه ..
_بشرى:وين مشيت …
_جبل: معنتها جايبتني هنا باش تديري معايا تحقيق ..
_بشرى: جبل بربي احكي معايا .. جاوبني .. مع شكون كنت …
_جبل: تاع الصح راني نضيع في وقتي ..
جى ماشي جيهة لباب .. مشات تجري وقفت سدت لباب وشافت لعينيه تحكي ..
_بشرى: جبل راني نذل في روحي .. شوف حالتي كيفاه راهي ..
_جبل: بصح انا شا درتلك مفهمتش .. شا كاين ..
_بشرى: شكون هذيك .. لي كنت معاها صباح ..
_جبل: شكون .. يا رب العالي باغية تجهليني ..
_بشرى: لي تسكن فوقكم .. شكون هي ..
_جبل: وين نعرفها انا .. جايبتني هنا تسقسيني على وحدة مانعرفهاش أصلا ..
_بشرى: قاعد تخون فيا صح ..
_جبل: استغفر الله .. يا بنت الناس راني بديت نتنارفا بعدي من وجهي عندي خدمة تستنى فيا ..
_بشرى: تكذب .. شفتك صباح راجع معاها من برا .. كانت معاكم ..
_جبل: شكون هذي .. يا كنت مع ختي وصاحبي وبنت خالتي ..وتعرفي بلي ماعندي حاجة فيها ..
_بشرى: ولي كانت هازة صغير ..
_جبل: صغير …
سكت شوي وضربت نادين في راسه ..
_جبل: نادين ..
_بشرى: هاك طلعت تعرف اسمها ..
_جبل: مانعرفهاش يا سيدي .. جابتها رانيا معاها وسمعتها تقولها نادين .. نكذب عليك دوك ولا شاه ..
_بشرى: اضربني .. عيط وضربني .. شوف كيفاه تاكل في روحك عليها ..
عض لسانه باش مايحكيش كلام يخليها تنجرح بيه .. ضرب لباب نزل فيه غشه خلاها تنهز في بلاصتها ..
_جبل: آخر مرة .. آخر مرة تجيبيني هنا وتديري معايا تحقيق .. مارانيش ناقص هدرة وتصداع الراس .. لا عيني لا في نادين لا غيرها ..ونهار نبغي نخونك واصلا قوليلي علاه نخونك حنا بيناتنا حاجة رسمية .. ماتتحكميش فيا .. سمعتي ..ولا هذي آخر مرة تشوفي فيها وجهي ..
_بشرى: جبل ..
_جبل: صااايي .. كملت الهدرة .. ودروك بعدي من قدامي خليني نخرج …
_بشرى: جبل انا خايفة .. خايفة يبعدوك عليا ..
_جبل: وانا شادخلني اذا نتي راسك قالك هاك .. شا دخلني فهميني ..
_بشرى: سامحني ..
جبدت روحها من على لباب وخلاته حله وخرج ..
تبعاته بعينيها حتى خرج لبرا وضرب لباب .. تهزت في بلاصتها .. وتلفتت شافت ختها خرجت تقحرلها ..
_حورية: هااا بصحتك .. اذا ماكانش حاط نادين في راسه دوك بكلامك هذا يحطها .. قتلك حمارة ولا ماقلتش ..
_بشرى: الله يخليك أخطيني لي فيا يكفيني ..
_حورية: راجل أكره حاجة عنده لمراة لي تزن على راسه وتشك فيه ..دوك نتي خليتيه يتأكد انو معاك ماراحش يلقى راحته ..
_بشرى: خلاص ماعادش ندخل كلام شوافة هذيك في راسي .. لا عيني في مشاكل لا والو .. مادام هو قال ماعندهش علاقة بيها معنتها مكانش ..
_مشات وخلت ختها تخمم في كلام الشوافة .. ضربت في راسها انو عندها اسم نادين .. دوك حاجتها بغرض من غراضها وبعدها تتأكد اذا صح هي ولا لا ..
#نورااا🌹🌹🌹لحلقة 41:
تعدت ليلة هذيك هادية في أولها ومافيها حتى جديد .. نادين رقدت مع ولدها طول غلبت بسباب نهار ليوم جاها طويل … رانيا بقات ليلة كاملة على سريرها تتقلب وتعاود في كلام خالد في راسها .. علاه كلشي نحكيه ماتصدقيهش .. علقو كلماته في راسها وماحبوش يمشو ..
مع نص ليل شافت مع لوقت .. وهزت روحها مشات للتوالات ورجعت بللت وجها ورقبتها .. تحاول تهدي روحها وتطرد الافكار السيئة من عقلها وشي … دخلت للكوزينة هزت كاس ما شرباته .. ورجعت راح تمشي لغرفتها وقت سمعت صوت خطوات قدام باب الدار .. ستغربت ومشات تطل من العين نتاع الباب .. لمحاته طالع مع درجات هذوك يتمايل ..
كبست على شفتها .. كانت راح ترجع لغرفتها وعاودت ترددت .. حلت لباب تخزرله ..وهو دايخ مش قادر يصلب طوله ..
_رانيا: واش راك تدير ..
هز عينيه فيها دايخ .. ورجع يتبسملها ..
_رانيا: راك سكران .. اععق ريحتك توصل حتى لهنا ..
_خالد: يعني .. نتي .. لازم .. تشوفيني .. ديما .. فلحالة هذي .. يحكي في كلمات متقطعين ..
_رانيا: هياا اطلع اطلع لفوق ..
_خالد: علاه .. ماصدقتينيش ..
_رانيا: اششش راح يسمع حد صوتك ..
_عمللها اشش بصبعه ..ورجع يحاول يطلع فلدرجات ثانيين لي يوصلو لداره ..
ماقدرش ..
_رانيا: يعني لازم انا لي تفيق في هذا الوضع وتباصي بيك .. جبدت لباب ومشات جيهته تحكي ..
_رانيا: تركز عليا خليني نطلعك ..
_خالد: علاه تعاوني فيا ..
_رانيا: قلبي حنين الله غالب ..
هزاته طلعاته درجات هذوك .. بعدها جبد روحها منها وقعد عليهم وركز ظهره مع لحيط يحكي ..
_خالد: علاه تعامليني هاك ..
_رانيا: كيفاه يعني ..
_خالد: هاك ..
_رانيا: راح نمشي .. راهي فايته 12 نتاع ليل .. اذا شافنا حد هنا مانعرف واش يحكي ..
_خالد: يهمك راي ناس يعني ..
_رانيا: مايهمنيش .. اما مانحبش حد يفهم بلغالط ..
_خالد: خليك معايا ..
_سكتت شوي ورجعت هزتله راسها وقعدت جنبه .. بقاو ساكتين يشوفو لقدام .. شوي وحست بحرارة يده على يدها وقت حط كفه مع كفها وكبس عليها ..
_رانيا: خالد واش تدير ..
_خالد: خليك جنبي .. حاس روحي وحيد ..
_رانيا: علاه عامل في روحك هذا كامل مفهمتش .. يعني واش لي موصلك للموصل هذا .. علاه تمشي تشرب .. علاه تبهدل في حالك هاك ..
_خالد: في رايك نتي انا حاب على روحي هاك ..
_رانيا: مانعرفش.. اما واش سبب .. واش شي لي يخليك فلحالة هذي ..
شاف ليها حب يحكي بعدها تراجع وجبد يده من يدها ..
_خالد: تأخر الوقت .. هيا امشي ..
هز روحه وقف وحب يطلع رجع يتمايل قريب لا يطيح ..
نفخت وناضت تجري شداته …
_رانيا: خلي نكمل نوصلك ..
هزاته طلعو باقي درجات حتى وصلو للباب ..
رجع يحوس وسط جيوبه على المفتاح ..
_رانيا: مش راح تطبطب …
_خالد: لا مانحبهاش تشوفني فلحالة هذي ..
_جبد لمفتاح مدهلها وصكر عينيه تركز مع لحيط ..
_حلتله لباب ورجعت تشوف ليه ..
_رانيا: هيا اتحرك ..
_شداته تكركر فيه بشوي ..
_رانيا د: هيا عاوني لا نطيح بيا بيك ..
تبسم وكبش فيها يمشي ..
دزت باب غرفته ودخلت بيه حطاته على سريره وجات تمشي شدها جبدها لعنده …
_رانيا: يا هم اطلقني .. واش تدير ..
لف يديه عليها وهي هكاك فوق صدره .. وقرب شفافه من وذنها يحكي ..
_خالد: خليك … خليك جنبي .. ممكن نتي اكثر حاجة مليحة في حياتي ..
كلامه صدمها وخلاها تسكت وين كانت تحاول تبعد عليه ستسلمت وحطت راسها قريب من قلبه وبقات هكاك تسمع في صوت دقاته .. ممكن هذي اول مرة رغم الظروف لي هوما فيها .. حست انها فرحت بكلامه .. عكس لكلام لي كان يحكيه وقت يكون صاحي ..
تبسمت وصكرت عينيها .. بلنسبة ليها لحظة كيف هذي ماتتعاودش .. وممكن عمرها تعيشها معاه وقت يكون في عقله
#نوراااا🌹🌹🌹
تفاااعلوووو مزال باقي حلقتينالحلقة 42:
اول ماخرج من عند بشرى مشى طول برا الحومة هذيك .. تايه.. كون يرجع للدار يلقى امه تستنى فيه مع بنت خالته لصقة ..وكان يمشي لعند خالد تكمل بيه سكران للصباح .. لقى احسن حل يمشي وحده وبعدها يرجع ..
ماعرفش رجليه لوين وصلوه .. حتى لقى روحه قدام المقبرة .. قعد متردد بين انو يدخل ولا يمشي .. وفلاخير قتنع انو يدخل ..
خذا نفس ومشى يحوس على قبر بوه حتى وصله .. نزل قعد لعنده ..الحال بارد والهوا يضرب .. حضن روحه بيديه زوج ..وبقى يتفرج مع اسم بوه المحفور على الرخامة .. خذا نفس يحكي …
_جبل: علاه ماعلمتنيش بلي عيب نقرب من الحاجات الحرام … علاه ماشديتش يديا ودخلت بيا للجامع .. علاه وقت بديت نهرب من قرايتي ونمشي نتكيف ماضربتنيش .. علاه وقت شفتني نمشي مع جماعة مشي مليحة مانوضتنيش منها …
علاه خليتني نخرج هاك .. جبل لي اي حد يشوفه يقول كلوشار .. واعر .. علاه وقت نفوت في بلاصة نشوف من وجهم الخوف .. تعرف شحال يجرحني قلبي وقت نشوف وحدة تخبي في صاكها قدامي وهي تخزر لعينيا .. تعرف شحال كنت ننقهر وقت يقولولي عندك كفاءات بصح شكلك هذا مايخليكش تخدم …
لهذي الدرجة انا مشي مليح .. علاه ماكنتش تضربني وقت نغلط … علاه ماعلمتنيش انو الرجلة مشي بلضرب والدخان .. علاه خليتني نخرج كيفك .. ونتا عارف بلي كلشي غالط ..
_عدى يده على وجهه يحاول يتمالك روحه وكمل يحكي ..
_جبل: لي غايضني مش هذا كامل .. غايضني انو مهما حاولت نكون مليح المجتمع مستحيل يخليني نتبدل ..وصمة العار تبقى تابعاتك حياتك كامل … قولي وين نلقى لي يشدلي يدي ويمشيني الطريق الصح .. اذا بويا بيده رماني فلطريق هذي …
هز راسه للسما ورجع خذا نفس ووقف يحكي ..
_جبل: الله يرحمك ويسمحلك ..
حط يديه في جيوب لفاست نتاعه وخرج لبرا راجع من نفس الطريق لي جى منها .. اول ماقرب من الحومة .. لمح زوج ولاد شادين طفلة ويحڨرو فيها وهي تبكي وتحاول تهرب منهم …
مشى جيهتهم يحكي ..
جبل: بعدو يديكم عليها …
شافو ليه ورجعو ماداوهاش فيه وقعدو يجرو فلطفلة معاهم جيهة طوموبيل …
نفخ ومشى يجري جيهتهم .. ضرب واحد منهم للوجه جابه لرض ..ورجع شاف ليها يحكي ..
_جبل: اهربي ..
هزتله راسها ومشات تجري ..
اول ماتلفت حس بضربه على راسه ..
حط يده عليها .. ورجع تلفت ليهم لقاهم للزوج واقفين دايرين بيه ..وواحد منهم هاز سكين ..
قعد يدور في عينيه عليهم .. واول ماهجم واحد منهم عليه .. ضرب يده وعوجله ليد لي فيها السكين .. قعدو متعاركين .. حتى سمعو صوت زوج من رجال الشرطة جايين يجرو جيهتهم ..
هز راسه حتى حس بواحد غدرة بلخدمي للجنب ..
كتم صوته ورجع خطفه من يده وضربه بيه ..
اول ماحس بصوت رجال هذوك قربو .. مشى يجري داخل للحي نتاعهم .. وصلو رجال هذوك لقاو واحد طليح مضروب على جنبه وصاحبه فوق راسه ..
_الشرطي : واش كاين .. شكون ضربه ..
_واحد يا سيدي ..واحد ولد حرام حب يسرق دراهمنا ومين ماحبيناش نمدوله ضربنا .. هاي طوموبيل تاعنا جبنا وصلناه ..
_الشرطي : تعرفوه ..
_لا مانعرفوهش ..بصح راه دخل فلبناية هذيك ..
اول مامشاو رجال الشرطة هذوك لاحقين جبل .. هزو رواحهم هذوك زوج وهربو ..
#نورااا🌹🌹🌹الحلقة 43:
دخل للبناية نتاعهم حاط يده على جنبه .. لكلب هذاك غدره وضربه اما جاب ربي الجرح مش عميق غير سطحي ..
ماحبش يرجع للدار خاف تشوفه سميحة وتتقلق .. كمل طالع لفوق لعند خالد ..
تركز على لحيط وهز تريكوه يخزر مع لجرح ..
نفخ وحط يديه فوق من تريكو يحاول يحبس الدم لي بدى ينزل .. شوي وسمع صوت خطوات وكلام تحت .. رمى عينه من الشباك تاع العمارة .. شاف زوج رجال شرطة جايين يجرو ليه .. نفخ وطلع يزرب وهو يسمع في صوتهم تحت وماشي ويقرب ..
اول ماوصل للايطاج الثالث .. حس روحه ا خلاص مش قادر يزيد خطوة .. مع الدم لي قاعد ينزل منه ..
حط يده على بابها بلاما يفيق بلاما يعرف عند شكون جى ..
هز يده دق مرتين ..
جاب ربي هي كانت فايقة الوقت هذاك .. ناضت بسبة ولدها لي ناض وماحبش يعاود يرقد .. ماجاش لراسها انو يكون اي حد .. تعرفها رانيا ومكانش غيرها لي يجيها في اي وقت ..
بقى يدق من جديد .. باش تزرب تحل عليه خاصة انو سمع اصواتهم فلطابق لي تحت .. يسالو فلراجل اذا شاف حد دخل هنا وانو ضرب واحد وهرب ..
_نادين: دقيقة راني جاية ..
هزت لخيط نتاع لباسها طلعاته على كتافها ومشات تحل عين مصكرة وعين محلولة ..
_اول ماحطت يديها على لباب حلاته .. حست بشكون دزها وصكر لباب .. جات تعيط حط يديه على فمها .. حصرها مع لباب وقرب عينه من الفتحة تاع لباب يشوف وين وصلو .. رجعت تتحرك في بلاصتها وسط العتمة هذيك تحاول تبعده من عليها …
_قلبها يضرب من الخوف .. ويديها يدزو فيه على صدره ..وهو مش معاها جملة حاط يده على فمها ..ويخزرلهم .. قرب وذنه يسمع فيهم يحكو ..
_شوف قطرات دم هنا .. زعما هذا الدم نازل منه ..
نفخ عرفهم راح يكشفوه .. شوي وسمع صوت دقات على لباب ..
جبد روحه منها وباقي حاط يده على فمها .. جات عينه في عينيها ..
_وهي كأنو نصدمت وقت شافته ..
_جبل: هذي نتي ..
رجعت تضرب فيه يفكها ..
كبس على فمها وجرها دخل بيها للغرفة لي مقابلة ..
اول ماصكر لباب شاف ليها يحكي ..
_جبل: راح نبعد يدي من فمك .. ماتعيطيش ..
_هزتله راسها .. جبد يديه من عليها .. رجعت ترد فلنفس ..وهو بقى واقف يشوفلها .. حتى هدات ..ورغم هاك دقات على لباب ماحبتش تحبس ..
حتى انو ام رانيا وبوها حلو لباب يشوفو واش كاين ..
_خيرة: خير واش كاين ..
_الشرطي : شكون عايش لهنا ..
_خيرة: جارتنا جديدة .. علاه كاش ماكاين ..
_الشرطي : نحوسو على واحد هارب ممكن دخل عندها ..
#نورااا
_نادين: واش تحب تدير .. واش جابك لعندي ..
_جبل: مانعرفش… اسمعي هذو لي برا يلحقو فيا ..
_نادين: انا واش دخلني .. واش درت حتى لحقوك ..
نزلت عينيها وقت لمحت بقع نتاع دم ..
_نادين: دم .. شكون نتا .. واش تحتاج مني .. أكيد قتلت حد .
_جبل: اسمعيني .. مش كنتي تظلي تقولي انا عاونتك .. رجعيلي المعروف .. عاونيني ..
_نادين : بصح شريتلك تريكو .. سكت يخمم ورجع طلع يديه نحى تريكو .. رماه جيهتها
_جبل: خلاص رجعتلك تريكو .. معنتها مزلتي مديونة ليااا ..
_ناظين : هبلت نتا .. اخرج من الدار ولا نعيطلهم .. جات تحل لباب جبدها كبس عليها مع لحيط وقرب شفافه من وذنها يحكي ..
_جبل: اذا ماعاونتبنيش صدقيني ماتبقيش دقيقة فلحومة هذي .. حنا هنا مشي متعودين نعملو حاجات هذو .. مادام دخلتي حومتنا تمشي بقواعدنا .. ودوك راح تعملي واش نقولك ..
_تاع الصح كلامه خوفها ورعبها .. هزت عينيها فيه ترعش وهزتله راسها ..
_جبل: هكا نكونو متفاهمين مالا ..
بعد من قدامها هبط سرواله وبقى بشورط لي لابسه .. طلعه شوي وين قدر يخبي الجرح .. وشاف ليها ..
_جبل: شوفي ليا ..
_دورت راسها تحكي ..
_نادين: تعري في روحك قدامي راك في عقلك .. واش نشوف
_جبل: صحا سمعيني راح نحلو لباب .. اذا سقساك شكون انا قولي صاحبك ..
_نادين: واش هبلت ..
_جبل: راهم حكاو مع لي مقابلاتك يكونو سقسوها اذا عايشة وحدك كان تقولي راجلك يفيقو ..
هز يديه حرك شعره خلاه يدخل بعضه على اساس كان راقد .. وجرها من يدها حتى وصلو قدام لباب وقف وراها ورجع نزل يده حاوطه خصرها بيها جبدها ليه حتى شهقت …. قرب شفافه من ورا جيهة وذنها يحكي ..
_جبل: مانعاودش هدرتي مرتين … اذا حاولتي تلعبي معايا لحومة هذي تنسيها .. ودوك حلي لباب ..
_دورت راسها ليه بشوي وسط العتمة هذيك .. عينها في عينه وانفاسهم قراب من بعض .. صوت دقات قلبها لي ساكنهم الخوف .. ونظراته هوما لي كلهم تحدي .. … هزتله راسها لفوق وتحت وحطت يدها على لباب حلاته ..
#نورااا🌹🌹🌹🌹
جام + كمنتار نحب اراءكملحلقة 44:
بلعت ريقها وهي تشوف لزوج رجال من الشرطة واقفين يخزرولهم .. حالتها هذيك وهي هكاك واقفة قدامهم خلتها تكرهه وتكره روحها كثر .. حتى انو لسانها نعقد ماعرفتش واش تحكي … عكسه هو لي بقى واقف وراها كابس عليها وملصقها معاه وين مايقدروش ينتبهو لجرحه لي قاعد الدم ينزل منه …
_الشرطي: نتوما عايشين مع بعض ..
كبس عليها وقت جات تجاوب كأنو يحب يفكرها انو اي غلطة منها راح تخلصها غالي ..
هزت راسها للشرطي هذاك .. ورمات عينها جيهة دار رانيا لمحت والديها واقفين من ورا لباب ينسنسو ..
_جبل: تحتاجو شي …
بقى الشرطي هذاك يثبت في وجهه ويحاول يرمي عينه ورا ..
_الشرطي: مادخل عندكم حد .. جارتكم لي مقابلة قالت انو مراة عايشة وحدها ..
_جبل:, كيما راك تشوف عايشين مع بعض ..
شاف ليها الشرطي يحكي ..
_راجلك هذا ؟ ..
بلعت ريقها تحس في دقات قلبها تزيد .. اي كلمة راح تخرج من فمها راح تخليها تخلص غالي ..
شافت جيهة دار لي مقابلتها .. اذا قالتلهم صاحبي راه من غدوة ترجع جريدة الحي هذا … واذا قالت راجلي راح يفيقو انو تكذب …
نزلت يديها بشوي حطتهم على يده لي حاطها على حزامها .. وشافت للشرطي تحكي ..
_,نادين: لا .. موش راجلي ..
_الشرطي: واش يكون مالا … من شوي طلع واحد لهنا .. الراجل لي معاك من وقتاش هنا ..
_نادين: مانعرفش على شكون تحكي .. اما هذا .. صاحبي .. وليوم عيد ميلادي حب يجي يفاجأني ويقعد جنبي …
بقى الشرطي هذاك يخزر لوجهها ولوجهه ورجع طلع لفوق مع الدرجات هذوك ..
جبد جبل يديه من عليها ورجع ورااا حاط يده على الجرح .. بقات واقفة تخزر لام رانيا لي تهز فيها وتحط بنظرات تاع وحدة ماتسواش .. خاصة انو جبل بايت لعندها وقبل رانيا حكاتلها انو لمراة مليحة وخاطيها لحاجات هذو ..
_خيرة: الله لا تربحهم .. قلت جاتنا جارة نظيفة هاي طلعت اوسخ من لي قبلها ..
دخلت هي وراجلها وضربو الباب في وجها …
بقات واقفة هكاك دموع معبيين في عينيها .. ماعادتش قادرة تتحرك ولا تتكلم … الشي لي عاشته من شوي مشي ساهل .. انك دخلي راجل لدارك غريب عليك فوقها تقولي راه صاحبي ..ونخليه يتجرأ يلمسك بلطريقة هذي وقدام ناس نتي قبل كنتي في نظرهم وحدة مليحة …
رجعت خطوات ورا .. صكرت لباب وتركزت عليه بيديها زوج ترد فلنفس ..مع صوت ولدها لي قاعد يبكي على سرير … تسمع في خطواته هو وراها .. وقت مشى هز لفاست نتاعه وسرواله لبسهم ورايح يخرج. .. اول ماحست بيه وراها .. تلفتت عطاته كف … كف خلاه يجمد في بلاصته ويكبس على يديه الزوج يحاول يستوعب لي صرا من ثواني قليلة ..
#نوراااا🌹🌹🌹حلقة 45:
بقات واقفة هكاك وسط الظلمة شعرها هابط على وجها .. تحاول ترجع النفس .. الكف لي مداتهله قعد يحرق لي يدها حتى هي .. تشوف ليه بتحدي وغضب …
قبل حتى ماتحكي شي .. حست بيده نحطت على رقبتها دزها مع لباب .. حتى ضربت ظهرها معاه وخرجت ااااه من شفافها … كبس على رقبتها يخنق فيها وهز يدها لي ضرباته بيها كبس عليها يحكي ..
_جبل: راكي في عقلك نتي … تعطيني صفعة … مفهمتش قاعد نتخيل ولا شاه ..
هزت يدها ثانية تحاول تبعد يده من على رقبتها .. وجها رجع حمر حتى ماعادتش قادرة تخرج حرف …
بقات تشوف ليه تحاول تفهمه انو راه قريب يخنقها وشي .. هزت يدها تضرب فيه على صدره ..ووقت مالقات عليها كيفاه .. نزلت يدها على الجرح ضغطت عليه وغرست ظفارها فيه .. باش يبعد ..
وهذا لي صرا اول ماحس بوجيعة الجرح هذاك .. جبد يده من عليها طول ودزها ..
هربت تجري منه هزت ولدها ووقفت فلزاوية نتاع لغرفة ..
كبس على شفافه ومشى جيهتها يسب …
وهي كابسة على ولدها وعيونها معبيين دموع ..
_نادين: اخرج من داري .. اخرج ..
_جبل: #### .. شادرتي من شوي ..
اول ماوصل ليها هاز يده عليها نصدم وقت لقاها حاضنة ولدها مخبياته بين يديها .. وين ماعادش راسه يبان ومصكرة عينيها بقوة ودموعها ينزلو….
كأنو للحظة فاق بروحها واش قاعد يدير … هبط يده ورجع ساكت يشوفلها .. تذكر لي صرا صباح .. وقت قعدت جنبه وقت بكات على ولدها .. يعني حقها كان عطاته كف ..هو من شوي شوهلها سمعتها …
بلع ريقه ورجع قرب خطوات جيهتها .. يحاول يلقى الكلمات لي يقدر يخرجهم ..
_جبل: ماغاديش نضربك .. مارانيش عارف واش صرا .. نتي ضربتيني …
بقات ساكتة تشهق بلاصتها …
بقى يشوفلها مصدوم … كأنو حاجة داخله تزعزعت…. دقات قلبه قعدو يضربو بطريقة خلاته يخاف كأنو الشي لي عمله من شوي غالط … قعد يحاول يلم لكلام بين شفافه .. يلقى من وين يبدا ولا واش يحكي .. قعد متردد حتى نطق اسمها بين شفافه ..
_جبل: نادين ..
كبس على يده يحكي ..
_جبل: سمحيلي .. مشي قصدي .. والله ماقصدي نخوفك ..ولا نتقاوى عليك .. يعني اول مرة تصير معايا حد يعطيني كف ..
_نادين: الله يخليك اخرج .. اخرج راح يشوفوك عندي يحكو عليا بسبابك ..
_جبل: مكانش لي يحكي عليك … اذا راكي على عائلة رانيا انا نحكي معاهم .. كون ماعملتش هكاك راهم هزوني معاهم .. خاطرني ضربت واحد … قصدي تعاركت مع واحد …
نفخ وعدى يده على لحيته يحكي ..
_جبل: صحااا علاه راكي تبكي .. ماراح نديرلك والو ..
_ماعرفش واش يعمل .. حس بالذنب جيهتها .. يعني لمراة تبان عاقلة وخاطيها وهو لي حطها في موقف كيف هذا …
بقى واقف عاجز بين انو يقدم جيهتها وبين انو يرجع خطوات ورا ويهرب منها ومن روحه..
#نورااا🌹🌹🌹الحلقة 46:
جبدت روحها من فوقه وقت حساته غطس فلنوم .. هزت راسها تخزرله .. وهزت يدها بشوي حطتها على لحيته .. خايفاته يحس بيها .. تبسمت وقربت شفافها منه .. نفس نتاعه مخلط مع نفس نتاعها .. قربها منه خلق داخلها شعور بنين .. شعور ممكن تدفع عمرها لكل غير باش تحس بيه .. وكيفاه ماتفرحش وهي بين يدين راجل تمناته يكون ليها وحلالها .. اما الظروف كانت أقوى منها ومنه .. عدت لسانها على شفافها ورجعت تراجعت .. لي تعمل فيه غالط .. مش وقت انو تبقى تعذب في روحها كثر .. خالد وهي عمرهم يكونو لبعض ..ونش بمجرد حضن دافي وزوج كلمات حكاهم وهو سكران تمشي ترمي روحها عليه وتصدق وتبقى تتخيل وتحلم .. الشي لي عاشته في مراهقتها مش لازم يتكرر .. جبدت روحها منه هبطت يديه من على جنابها ونزلت من فوقه .. تلفتت تخزرله مافايق بشي .. راقد وخلاص …
تنهدت ورجعت عدلت تريكو بيجامتها هبطاته ولبست في رجليها ..وقربت جيهته تحكي ..
_رانيا: الحلم يبقى حلم … مامنوش وجود فلواقع .. كيفك نتا .. عمرك كنت موجود في واقعي ..وعمرك لا راح تكون …
حطت يدها على شعره تعدي فيها بشوي ..
_رانيا: تصبح بخير ..
مشات جيهة لباب بشوي .. ورجعت وقفت وقت سمعت اصوات تاع رجلين قدام لباب .. هزت عينها تطل لقاتهم شرطيين .. ماحبتش تحل لباب حتى تفهم واش يعملو هنا … شوي وشافتهم رجعو نزلو .. ضيقت عينيها ورجعت حلت لباب بشوي ونزلت مع درجات هذوك حبه حبة ..
اول ماوصلت لقات لباب مصكر تاع الدار .. رجعت تضرب في خدودها وتسب .. كيفاه راح تدخل دوك .. كان طبطبت راح تفيق امها بيها انو كانت برااا .. رجعت مترددة ومش عارفة واش تعمل .. الشي لوحيد لي جى لبالها انها تمشي لنادين وتعمل روحها كانت عندها بايتة وخلاص ..
مشات بخطوات ثقال جيهة لباب ورجعت حطت يدها تدق عليه ..
#نوراااا
بقى واقف يشوفلها .. بعدها خزر للجرح الدم باقي ينزل .. حتى حس دوخة لعبت عليه .. قرب جيهتها يحكي ..
_جبل: صحاا سمعيني .. لي صرا من شوي ..
_نادين: قتلك اخرج من داري ..
_جبل: صحاا سمعيني .. راني مش كيما في بالك .. قصدي ماكنتش باغي نضرك ..
_نادين: خنقتني ..وهزيت يدك حاب تضربني … عملتلي رعب داخلي .. مش عارفة كيفاه مزالني واقفة على رجليا ..
رجعت تبكي وتشهق ..
_نادين: تاع الصح المرأة لي كيفي تحڨروها .. كان عندي شكون في كتافي عمرك توصل تعمل فيا هاك ..
تقول بعملته زاد المازوت على النار شاعلة داخلها .. قعدت تحكي وتبكي بحرقة وهي تتذكر في راجلها لي ماكانش يخلي شوكة تدڨها ..
_ماعرفش كيفاه مشى جبدها يحضن فيها وهي تدز فيه تحاول تبعده من عليها … وشي كبس عليها بين يديه زوج وولدها وسطهم … يحكي ..
_جبل: وحياة ماااا لا قصدي نحڨرك .. ولا نيتي نضرك .. كل شي جى صدفة .. سمحيلي .. وحد ماراح يحكي لي صرا .. دوك نمشي نحكي معاهم ونفسرلهم ..
ياديني اذا حبيتي نرجع دوك نعيط للرجال الشرطة نفسرلهم اني دخلت دارك بلغصب ونخليهم يهزوني يحبسوني .. غير اسكتي …
#نورااا🌹🌹🌹الحلقة 47:
هزت يدها حطتها على لباب تدق في دقات خفاف خايفة بوها ولا امها يفيقو بيها ..
تلفت هو على صوت لباب ورجع جبد روحه ا منها يحكي ..
_جبل: خلاص أهدي .. حطي صغير راكي خنقتيه بين يديك ..
هز لفاست نتاعه حطها فوقه مشى جيهة لباب .. قرب عينه من فتحة لباب يشوف شكون ..
وهي بقات تبع فيها ورجعت هربت جيهة عرفتها وصكرت لباب على روحها ..
_تلفت مالقاهاش .. نفخ وكمل عدى يده على وجهه ..
_رانيا: نادين .. هذي انا حلي لباب ..
حط يده على لقفل حللها لباب .. شافت ليه ورجعت ضيقت عينيها تحكي ..
_رانيا: جبل .. واش تدير هنا ..وين نادين ..
_جبل: ادخلي ..
دخلت ورجع هو صكر لباب ..
_جبل:، نسقسيك معليش ..
_ رانيا: خير واش كاين خوفتني وين راهي نادين ..
_جبل: صحبتك عندها حساسية من رجال …
_رانيا: علاه ..
_جبل: روحي عندها للغرفة هدري معاها .. قوليلها راني ماناكلش .. وكون مشي الظروف انا ماندخلش دارها ولا نمسها ..
_رانيا: منك صح واش درتلها نتا .. مشات تجري جيهة غرفتها وتدق على لباب ..
_رانيا: نادين .. حلي هذي انا رانيا .. حلي خلينا نحكو ..ماتخافيش راه مايعملك والو ..
_خزرت لولدها لي محطوط على جنب ..ومسحت دموعها ومشات جيهة لباب ترعش .. حاسة كل أثر من لمساته عليها قاعد يخنق فيها .. كأنو شي لي عمله لطخها .. ونحى ذكريات وليد من عليها .. انو جى راجل خلاف قرب منها ومسها بلطريقة هذيك لي ماتجرأ عليها حد من غير راجلها …
لفت يديها على كتافها ورجعت حلت لباب بشوي .. اول مافتحاته جات عينها فيه واقف بعيد يخزرلها ..
جبدت رانيا من يدها ورجعت صكرت لباب ..
_رانيا: واش بيها حالتك هاك واش صرااا ..
_نادين: كان راح يضربني .. هو مسني ..
وقف ورايا وجبدني ليه .. حط يده هنا وهنا .. خلاني نقول انو صاحبي قدام بوك وامك .. رجعت تبكي وتشوف ليها ..
_امك صكرت لباب في وجهي وسبتني بسبابه .. عمري نحطيت في موقف كيف هاك ..
_رانيا: صحاا هدي روحك .. علاه نهاريتي هاك .. تحكمي في اعصابك .. راه مش غير جبل لي ممكن تصادفيه في حياتك … راه كاين بزاف كيفه .. اذا لقيتي كل مرة تنهاري كيف هاك واش راح تستفادي ..
_نادين: قوله يبقى بعيد عليااا .. ..
قرب من لباب وقت سمعها تحكي ..
_نادين: نكرهه عمري كرهت حد كيفه .. حتى سلفي لي كان يتحرش بيا ماكرهتهش قده هو … الله لا تربحه .. كيفاه متحملاته امه وصحبته هذيك .. بسبته تشوهت سمعتي .. بسبته حطيت راسي في لرض ..
دز لباب على وسعه شاف ليها نتفضت في بلاصتها وتخبت ورا رانيا ..
_جبل: رانيا تحركي عيطي لبوك وامك ..
_رانيا: كيفاه ..
_جبل: ولا نقولك خليك دوك انا نهدر معاهم ..
مشى يزرب خرج ورجع يضرب فلباب .. حتى ناضو يجرو حلو عليه ..
_جبل: ارواحو معايا ..
_طاهر: واش كاين ولدي ..
_جبل: جيب مرتك وارواح ..
تبعوه مافاهمين والو .. حتى دخلو لقاو رانيا لتم ..
_خيرة: رانيا .. شاراكي تديري هنا مع لمراة هذي ..
_عيط في وجههم يحكي ..
_جبل: المرأة هذي خاطيها وراهي نظيفة ونقية انا لي كنت هارب من لبوليس وانا لي جيت دخلت دارها وهددتها تعمل هاك .. ودوك كملت لحكاية .. واذا سمعت شي هذا خرج برا راني نقلب الدنيا عليكم ..
شاف ليها ومشى جيهتها يحكي ..
_جبل: ودوك هاي سمعتك رجعتلك والاحسن ليك امشي تعالجي .. راكي مراة مش عادية نظن .. وكلامك تاع من شوي عمري ننساه .. وراح ندمك عليه ..
بلعت ريقها خممت تجاوبه بعدها ترددت ..
هز يده حطها على جبهتها يحكي ..
_جبل: وتاع الصح مافيك شي يعجب باش نخمم نمسك .. راه كون مشي الظروف يدي ماتنحطش عليك ..
دزها ومشى خرج وخلاهم كامل واقفين يخزرو في بعض ..
#نورااا🌹🌹🌹
اراءكم 😘😘😘حلقة 48:
ضرب لباب ونزل مع الدرجات هذوك يعاود في كلامها في راسه .. تاع الصح اول مرة يصادف وحدة كيفها .. كان راح يعتذر منها وماعمللها شي من غير انو كانت وسيلة باش لبوليس مايشكوش فيه ..
تركز على لحيط ورجع يضرب فيه رجع غشه كامل عليه ..ونزل يزرب للتحت .. هز تليفونه عيط لريم خته تحل عليه بلاما تحسس امه . وهذا لي صرا حلت عليه لباب بشوي تحكي ..
_ريم: وين كنت ..
_جبل: شوفيلي معقم ولا أي حاجة تحبس الدم ..
دخل يزرب لغرفته وهي مشات جابتله واش طلب ودخلت عنده تحكي ..
_ريم: واش صرا معاك .. شبيها حالتك هاك ..
_تسطح فوق من سرير ورمى لفاست نتاعه على جنب .. وهبط سرواله شوي وين رجع الجرح ظاهر .. شهقت وهي تشوف فيه ..
_ريم: شكون عمل فيك هاك احكي ..
_جبل: هاتي المعقم ..
_ريم:قيقة راح نعقملك انا ..
قربت منه بللت القطن ورجعت تعدي فيه على لجرح ..
_ريم: تعاركت مع حد باينة … والله وتشوفك سميحة تقلب عليك الدار ..
_جبل: اذا نتي ماهدرتيش قدامها ماتعرفش ..
_ريم: تهنى ماراحش نحكيلها .. بصح لوقتاش تبقى هاك .. علاه ماتتزوجش وتعقل ..
_جبل: اااه نتي ثاني عداتك مك .. شكون نتزوج بنت ختها ..
_ريم: هيه واش بيها سومية مشاء الله عليها .. بنت خالتك ومتربية وفوقها راك عاجبها .. يعني نتا مش حاب تعطيها فرصة ..
_جبل: هيا ريم .. هيا تصبحي بخير خليني نرتاح ..
نفخت وجبدت روحها من فوقه بعدما ضمدت لجرح ..
_ريم: هيا تصبح بخير ..
هزت روحها وخرجت برا لغرفة وصكرت لباب عليه وخلاته قاعد فوق من سرير …
جبد لمخدة لصدره ورجع راسه ورا يخزر للسقف يعاود في كل شي صرا .. في كلامها فلكف لي مداتهله … حتى في دموعها .. يعني لمراة مش عادية هذا لي لاحظه .. كأنو عندها عقدة … ولا تخاف من اي شئ غريب ..
رمى لمخدة من عليه ونفخ .. ماقدرش يصكر عينيه .. كلما يقول نرقد ترجع الافكار تدور في راسه .. ويعاود يتذكر واش صرا من ساعة للتالي ..
#نورااا
بقاو واقفين هكاك يخزرولها ويخزرو لرانيا لي واقفة هي الثانية ..
_خيرة: من وقتاش راكي هنا نتي ..
_رانيا: من شوي .. جيت لعندها ..
_طاهر: نظن خلاص العرض نتاع ليلة هيا تحركي للدار ..
شافت لنادين وهزتلها راسها بمعنى سمحيلي لازم نمشي ..
حركتلها نادين عينيها بمعنى راني متفهمة .. خرجت ومشات هي صكرت لباب وراهم وتركزت عليه .. رجعت خطوات وراا تتذكر كل شي صرا معاها ليلة هذي … حست كل شي ملوث فيها وفلهوا لي قاعدة تتنفس فيه ..
مشات هزت ولدها بدلتله ثيابه ورقداته .. ومشات نحت ثيابها كامل .. وهزت لي برودوي لي عندها ووقفت تحت لما .. تغسل وتعاود .. تفرك في لحمها ..وفي أي بلاصة ممكن يكون حط يده عليها …
#نورااا🌹🌹🌹لحلقة 49:
تعدى اسبوع هادي مافيه حتى جديد بعد ليلة هذيك نادين رجعت ماتخرجش من الدار خايفة غير اذا تصادفه ويعمللها حاجة .. حتى وقت تسمع صوت دقات على لباب تترعب وترجع خايفة يكون هو لي جاها ولا جى يطردها من الدار … ماتهدى غير وقت تسمع صوت رانيا ..
جبل هو الثاني تلهى بلخدمة مايرجع غير مع نص ليل يطيح فراش ويرجع غدوة من صباح يمشي يخدم … حتى انو نسى وجودها ونسى واش صرا بينه وبينها …
نهار الخميس مع لعشية قعدت رايحة جاية فلدار .. لبراد فرغ ورجع لازم تخرج تصرف .. ماعرفتش واش تدير .. مشات لعند رانيا طبطب فلباب .. حلت عليها امها هزتها من لفوق للتحت ..من آخر مرة وقت شافتها مع جبل مارجعتش حاملتها .. وديما تحكي كلام تحت فمها وقت تشوفها …
_نادين:اهلا خالتي ..
_خيرة: خير … واش تحتاجي …
_نادين: نحب على رانيا اذا راهي هنا …
_جبدت لباب باش رانيا ماتقدرش تسمع واش راح تحكي معاها وقربت منها تحكي بشوي ..
_خيرة: اسمعي يا بنت ناس .. راني ساكتة في وجه رانيا خاطر ديما تضرب عليك قدامي .. وثاني خفت من لفضيحة لي ممكن يعملهالي لكلوشار ولد سميحة ..
_سكتت نادين وهبطت راسها وهي تسمع في كلامها لي يوجع لقلب ..
_خيرة: مايهمنيش واش بينك وبينه .. ياخضك تاخضيه الله يسهل عليكم ..
شهقت وشافت ليها تحرك في راسها بلا وعينيها معبيين بدموع ..
_خيرة: خليني نكمل … انا لي يهمني بنتي مانحبش سمعتها تتشوه بسبتك .. وتعملي مزية تقطعي علاقتك بيها … واياكي نلقاك حكيتيلها انو انا لي قتلك بعدي عليها ..وقتها صدقيني نرجع سيرتك على كل لسان ..
حطت يدها على فمها تكتم في دموعها ومشات تجري دخلت لدارها وصكرت لباب تركزت عليه ترد فلنفس بصعوبة …
دموعها رجعو شهقات آخر شي كانت تتوقعه انو يوصل حد يحكي معاها بلطريقة هذيك ويلصق فيها حاجات هي بيدها خاطيها فيهم …
قعدت في لرض وحضنت روحها تبكي وشعرها هابط على وجها .. لي غايضها انو قبل شهور كانت عايشة في نعيم مع راجلها وولدها .. وفجأة الاوضاع تقلبت ورجع لي يجي يطعن فيها ويمشي .. مرات الانسان مايتحسرش على لحاجات لي ماعندهش .. بلعكس يبقى يتحسر غير على لحاجات لي كانو عنده وضاعو منه .. يوصل لدرجة انو نوم يطير من عينه .. ويتمنى يرجع زمان بيه لورا وين يقدر يعيش غير نهار من لفرحة لي كان عايشها قبل …. بقات تمسح في دموعها وهوما ينزلو ..وترجع تسبه خاطره لوحيد فلي قاعد يصيرلها دوك … ولا خلي نقولو تسبه هو ولكلب لي بسبته جات للحومة هذي…
صوت تلفزة عالي ..وشباك محلول لهوا يدخل منه ويضرب في ولدها لي بدا يبكي وقت حس بغياب امه ..
نفضت روحها ومشات تزرب جيهته هزاته بين يدينا تسكت فيه ..
_نادين: سكت يا روحي سكت ..والله ماعادش حاملة لاصوات ولا حاملة روحي بربي سكت ..
تقول زادت شجعاته على لبكى بدا ماحبش يسكت وهي تحاول معاه وشي …
رجعت تسمح على ظهره ..بعدها حست بحاجة .. تفزعت وطلعتله تريكوه ..لقات كلكرة صغيرة خارجة في ظهره وحمرة…
وهو باقي يبكي ..
_نادين: ياربي واش هذا …
حطاته ومشات تجري تطبطب في دار رانيا ماعرفتش واش تدير .. حتى أنها مفهمتش هذيك واش ..
وقت لقاتهم طولو باش يحلو نزلت تجري للتحت .. تحوس على حد ممكن يساعدها الوحيدة لي جات في بالها هي سميحة ام جبل ..
وقفت قدام باب دارهم تحاول تتمالك روحها .. بلعت ريقها ورجعت عدلت شعرها ومسحت دموعها وحطت يدها على لباب تدقدق عليه ..
ماطولتش حتى لقاته حل لباب وواقف يشوف ليها …
عينيها علقو فيه ماعرفتش اذا تهرب منه ولا ترجع تحكي انها محتاجة حد يعاونها …
#نورااا🌹🌹🌹الحلقة 50:
كبست على عينيها ورجعت حلتهم وطلع صوتها من بين شفافها تحكي وتحاول ماتظهرش خوفها ..
_نادين: امك هنا ..
_ضيق عينيه فيها ورجع يحكي بنبرة سخرية ..
_جبل: جاية تشكيلها مني ..
_نادين: الله يخليك عيطلها نحب نسألها على حاجة ..
_جبل: ادخلي ..
_نادين: هاه..
_جبل: راهي فلصالون ادخلي عندها ..
سكتت وقعدت تشوف ليه خايفة .. تحاول تصدق كلامه انها صح هنا .. ولا واش يضمنلها انو الدار فارغة وهو يحب يدخلها ويضرها ..
_جبل: والله عرفتها .. مرض توسويس لي فيك وحده نتي .. اقعدي دوك نعيطلها …
دخل وخلاها برااا واقفة تفرك في يديها مع بعض وتستنى .. مابطاتش وخرجت امه لعندها. . مراة يمشي عمرها للخمسين .. ورغم هاك جايبة روحها .. اما تبان عند روحها ومش ساهلة …
_سميحة: خير بنتي .. قالي جبل تسألي عليا ..
_نادين: الله يخليك خالتي انا مانعرف حد هنا .. ولدي يبكي بطريقة غريبة .. ووقت شفت ظهره لقيت حبة حمرة فيه ..
_سميحة: وين راه دوك ..
_نادين: خليته لفوق وجيتك ..
_سميحة: صحاا ازربي جيبيه وارواحي نشوفه ونقولك واش بيه ..
هزتلها راسها وطلعت تزرب لفوق .. اول مادخلت لقات رانيا عنده هازاته بين يديها وهو مش حاب يسكت ..
_رانيا: ياخي وين كنتي وولدك هنا وحده يبكي ولباب محلول …
_نادين: راه مريض .. هاتي راح نهزه لجارتنا تشوفه واش بيه ..
_مداتهلها وجات تلحقها تلفتتلها نادين تحكي ..
_نادين: الله يخليك خليك فلدار نخاف يدخلها حد .. انا مانبطاش ونجي ..
_رانيا: اوكي راني هنا .. ماتنسيش طمنيني …
_نادين: اوكي ..
كبست على ولدها في حضنها ونزلت تزرب لقات لباب محلول حتى جاها صوت سميحة من صالون ..
_سميحة: ارواحي راني هنا ..
حطت شلاكتها عند لباب ودخلت ليها ..
_سميحة: اعطيهلي نشوفه ..
_مداتهلها بقات تقلب فيه .. ورجعت دققت مليح وكملت تحكي ..
_سميحة: ماتتقلقيش .. نظن هذي غير جرثومة مش حاجة كبيرة .. تكون شي حجرة لسعاته ..وولدك تحسس منها ..
حطت يدها على جبهته لقاتها سخونة ..
_نادين: واش كاين ..
_سميحة: حرارته عالية .. كيفاه ماركزتيش مع ولدك ..
_تعبو عينيها بدموع ورجعت تحكي في كلام متقطع من لحرقة ..
_نادين: مانعرفش .. عقلي مش معايا .. ماركزتش مع حالته ..
_سميحة: معليش بنتي .. دوك نشوف جبل يمشي يشريله دوا من عند لفارماسي .. مش حاجة لي كبيرة وتخوف ..اطمني ..
خرج من غرفته رايح لبرا وقت سمع صوتها ..وقف ورا باب صالون يسمع في كلامهم ..
_سميحة:, راجلك وين ..
_نادين: توفى ..
_سميحة: اااه الله يرحمه .. والله راني حاسة بيك ..حتى انا راجلي توفى وخلالي جبل في عمر 16 وريم عندها قريب عام .. نعرف كيفاه تحسي وانو المسؤولية تكون كبيرة عليك ..
تنهدت وهزتلها راسها ..
_سميحة: معليش بنتي .. لي ماعنده حد عنده ربي معاه ..
_نادين: مش عارفة كيفاه نكمل حياتي بلا بيه .. حاسة روحي مش ام مليحة لولدي .. ديما ننساه ونشرد بعيد .. كأنو مش موجودة فلعالم هذا … جسمي حاضر اما عقلي تايه بعيد ..
_سميحة: كل عقبة يظر بيها الانسان تفوت ..وقت يكبر ولدك قدام عينيك ترجعي تنسي كل شي وتقولي مانعيش غير ليه .. وترجعي تهتمي بابسط التفاصيل لي تخصه .. ويرجع هو عالمك الوحيد .. صدقيني رانا كامل عشنا وفات علينا واش فات عليك تحلي بلصبر …
هزتلها راسها وتبسمت كأنو كلام لمراة هذي لي من شوي كانت خايفة منها رجع كيف لبلسم لقلبها وجروحها ..
_سميحة: هاو جبل ..
عمل روحه هذاك وين وصل شاف لامه يحكي ..
_جبل: خصك حاجة ..
_سميحة: ولد نادين حرارته طالعة .. نحبك تجيبله من نوع دوا هذا الظواهر حاجة لسعاته .. هزلها راسه وقت مشات تقلب على اسم دوا فلقجور ..
دور عينيه جيهة نادين لي مهبطة راسها وشادة يد ولدها ..
#نورااا🌹🌹🌹

Leave a comment