Skip links

قصة : ثقتي العمياء بك أبصرت ج 1

 5,134 عدد مشاهداات

🦋■- قصة بعنوان : °#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋
♡الجزء 1♡
■حُضنٌ واحد يا أمّي… وسأنسى أنّك تشبيهينَ السّبع العجاف ■
في أحد أحياء الصفيح …حي مهمش من الأحياء الفقيرة لي كاتتواجد فضواحي مدينة الدار البيضاء …. حي مفتقر لكل ظروف العيش الكريم …بزز موصلين ليه اسلاك الضوء وغير عشوائيا عن طريق السرقة الشيء لي كايخليه فغالب الأحيان كا يتقطع عن كل الحي.. أما الماء فاكاين ولكنه غير صالح للشرب ومع ذلك كيشربوه سكان الحي ويطيبو بيه حيت ماعندهمش البديل . … هاذ الحي لي كايضم داخله عدد كبير من منازل القزدير …المتراصة عشوائيا… شي حدا شي وشي مور شي ..أكتر من ستين منزل يحتوي داخله على أُسر (عائلات) منها الكبيرة ومنها الصغيرة ..عائلات فقيرة اتخذت من منازل الصفيح مأوى وملاذ لها من التشرد ..وهاذ الفئة من الناس هي فئة و حسب نظرة الأغنياء …. تعتبر حثالة البشر : { ماشي غير بسبب الفقر لي كايعانيو منو ولكن أيضا لأن هاذ الأسر او هاذ الحي جامع داخله غير الأمّيين وهو منبع للمجرمين البزنازة الشفارة المغتصبين والمدمنين والعاهرات ….أي أنه حي خطير إيلا ماكنتيش واحد من سكانو أو معروف تما فا صعيب بزاااف تدخل ليه وتخرج منو بخير …} ….. وأمام واحد من هاذ المنازل لي حيوطو وحتى سقفو من القزدير ولي جا مقنت و بوحدو فالصف لي جنب الشارع …واقفة بجسدها الهزيل وقامتها القصيرة أمام الباب الخشبي دمنزلها لابسة سيرفيط كحلة ..جامعة شعرها البني المتوسط الطول لي ماممشوطش عشوائيا سفنجة …ولابسة فرجلها كلاكيطة دصبع مقطعالها السمطة زادياها غير بالخيط …..
(واقفة كاتشوف فواحد من دروبة دالحي لي كايخرج لهااذ الشارع لي عليه منزلها …دايرة يدها على عيونها البنية الديقة المشفرة مدرقة الشمس على وجهها البيضوي الصغير .. مركزة نظرها للأمام .. ومرة مرة كادوز لسانها على فمها الصغير الممتلئ كاتبلل شفتيها الناشفين …. حتى بانلها جاي جار الحصان العجوز لي جارليه لكروصة ديالو….. غير شافها ضحك بفرح وجر الحصان باش يتحركليه بسرعة أكبر ….كان شاب فأواخر العشرينات …طويل شويا ونحيف …وبحالها حتى هو أبيض البشرة بلحية خفيفة سوداء كلون شعرو الرطب داير كاسكيطتو الحمراء المعتادة لي مكاتخطاهش.. ولابس ثياب عادية جينز وبودي وسبرديلة لي كانت بيضاء وولات بنية بالاوساخ حيت عمرها شافت الماء والصابون …شاب وسيم مقارنة بشباب الحي عيونو لوزية بنية كبيرة مشفرة …ابتاسم ليها …وهي غير شافتو وغوتاات )

….. : رويييييشد ( ومشات كاتجري قاصداه حتى تقطعاتلها لكلاكيطة وطارت ليها من الرجل الشيء لي خلاها تعكلات وكانت غاتجي على فمها كونما شداتش توازنها فآخر لحظة .. وقفات مخننزرة فلفردة دلكلاكيطة لي طارت من رجلها وبدات كاتسب )🦋■- قصة بعنوان : °#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋
♡الجزء 2♡

■حُضنٌ واحد يا أمّي… وسأنسى أنّك تشبيهينَ السّبع العجاف ■

…. : رويييييشد ( ومشات كاتجري قاصداه حتى تقطعاتلها لكلاكيطة وطارت ليها من الرجل الشيء لي خلاها تعكلات وكانت غاتجي على فمها كونما شداتش توازنها فآخر لحظة .. وقفات مخننزرة فلفردة دلكلاكيطة لي طارت من رجلها وبدات كاتسب )

….: تفوووووو على جد امك وااااش تاني خاسني نديرليك العملية الجراحية ونخيط ليك مصارنك للمرة الخامسة كاع الخيط قاضيتيه ليا تفووو على ماركة واش مانخيطكش وتبقاي مخيطة بحال خوتك ضاروري ديريليا شوهة ووسط الشارع ..

(وسكتات منلي وقف جنبها كيموت بالضحك ..وهي ماتسوقاتش ليه حتى أنها مشافتش فيه هزات لكلاكيطة دارتها تحت باطها ..وبسرعة قربات من لحصان مبتاااسمة وبدات تلمس شعرو بحنية… رشيد بزز حبس الضحك وشاف فيها سهى فوجهها وابتسامتها لثواني عاد نطق )

رشيد : شري وحدة جديدة أساطة علاش كاتخيطي فيها وتعاودي …

….(نطقات بلا ماتشوف فيه عكسو هو لي ككل مرة كلاها بعينيه) : جاتني مع لخر دشهر أما ناخدها (تنهدات ) هاذ شهر لخدمة كانت قليلة فا جاتني غانص لخلصة …(شافت فيه ) المهم قوليا امضرا كاين شي خبار !! ..

رشيد حرك راسو بلا وهو كيشوف فوجهها البيضوي وخدودها الممتلئة لي كيحمقووه ونطق) للمرة المليون أساطة غانقوليك بلا ماتحتاجي تبقاي واقفة كاتسنايني علنبوري باش تسوليني عليه.. حيت راه غير توصلني عليه شي خبار غانجي بنفسي نعلمك وراني موصي كاع لخضارة ولكزارة دسويقة لي شافو أو عرف عليه شي خبار يعلمني …

…. : (تنهدات بحزن وحولات نظرها للحصان تاني ونطقات موجهة كلامها له ) فين مولاك أسيزار ها ؟ فين با جلول ؟ فينو أسيزار ..

(وقاطعها رشيد لي ماحيدش عينو عليها )
رشيد :زمرد ..!

(زمرد شافت فيه وهو كمل كلامو بنوع من الغضب )..
رشيد : تشي راه أنا هو مول هاذ لحصان وهاذ لكروصة أساااطة ولانسيتي نفكرك … أنااا شريتهم من عند باك جلول قبل مايغبر (وغوت ) فا ولاو ديالي …

زمرد خنزرات فيه ) وغير بشويا عليك …

رشيد : كاااتعصبيني أزمررد حيت فكل مرة كاتقولي للحصان فين مولاك (غوت ) هااا مولاه واقف قدامك هو انااا ونزيدك هاذ لحصان الشارف بدلت ليه السمية لي كان مسميه باك جلول يعني مابقاتش سميتو سيزار ولات سميتو عبمولا …🦋■- قصة : °#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋
♡الجزء 3♡

■حُضنٌ واحد يا أمّي… وسأنسى أنّك تشبيهينَ السّبع العجاف ■

زمرد مخنزرة فيه وبدات كاتهضر بصراخ ) واش من نيتك عرفتي شنو نمشي فحالي حسن صبحنا عالله ييخ

( وجات تمشي لكنو شدها من قب لقبية دسيرفيط ومع ضعيفة و خفيفة وقصيرة عليه…دورها عندو بخفة )
رشيد : وصافي أساطة مالكي دغيا كاتقلقي …
زمرد : راه نتا لي مفشكل فمخك ..غير كانعيط للحصان دبا جلول بسميتو كاتهز شوكتك ..

رشيد قلب عينيه) هااااهيا غاتقووليك حصان با جلول تاني ..(شاف فيها ) تشي دبا غير قولي ليااا شحال دابا ونتي كاتسنايه يبان ها ! … عام ؟ .. عام ونص ؟.. ولا….

زمرد قاطعاتو ) عامين ألمكلخ …

رشيد : نتشي عارفاني معنديش مع لحسابات المهم قولي ليا أساطة ..شحال قدك تبقاي تسنايه ؟ وشحال قدك تبقاي فكل صباح لخميس تاتسنايني وأنا غادي لسوق كل صباح باش توصيني نسوليك عليه لخضارة وفاش نكون راجع تلقاي ليا تسوليني ؟ أو تجي من خدمتك مع ز..ك ليل دقي عليا تسوليني عليه …؟ واش ماعيتيش ؟
زمرد : ماعييتش وماغاديش نعيا …نتا وكاع ناس لكاريان عااارفين أن هذاك الشارف كان بمثابة الأب لي عمرني عرفت ..هو عندو فظل كبييير عليا (أشارت لمنزلها ) حتى من براكتو خلاها ليا بفراشها وبماعنها …بلا مقابل..

رشيد قاطعها ) : إذن علاش نهار بغا يمشي ماجاش يقولهاليك ؟ جا عندي انا باعليا حصانو وكروصتو بثمن طايح وعلق ..بات ماعاود صبح فرفر …

زمرد حنات راسها ونطقات بحزن) ماعرفتش …

رشيد: تشي أنا نقوولك علاش أزوينة ديالي هانتي .. وحدة فجوج… يا غايكون دار شي موصيبة وهرب من لبوليس وتلقايه مخبي فشي عروبية ولا ممكن كاع يكون قتل شيحد داكشي علاش دار ديك لهربة نتشاع بسملهرحمانرحيم …أولا غايكون حرك وكلاه لبحر …

زمرد خنزرات فيه ) نمشي حسن ليا …

رشيد : تشي بلاتي ..قوليلي كيغادا مع لخدمة ؟ …

زمرد مخنزرة فيه) : كيديما وصاف ..تماارة فتماارة وفلخر دشهر كيلوحولنا جوج دريال
رشيد : مايهديكش الله تخلي ديك لخدمة د الشركة وتجي تاخدي بلاصتك معايا فسويقة كيما كنتي مع داك باك جلول ؟

زمرد : لا …

رشيد : تشي راه غامابغيتيش أما كوراك جااالسة فدارك معززة مكرمة كااعمة تمحني راسك (شافها خنزرات فيه تاني وقلب لهضرة ) لمهم أساطة أكما كايضسر عليك شيواحد فديك الشركة ولا..

زمرد قاطعاتو ) لا وبلا ماتبدا ديسك ديالك تاني سير لسويقتك الله يسهل عليك ..
رشيد شدها من دراعها ) وا صبري أساطة مالك زربانة …

زمرد تنهدات ) اااش تاني …

رشيد ابتاسم ) مازال ماهداك الله أزمرد تقوليلي امتا نجيب لواليدة ..ها ؟ شحال من عام دبا وأنا كنطلب فيك ونتسناك ؟ ونتي عارفة أنه من نهار حطيتي رجلك فهاذ لكاريان وأنا كنحماق عليك وصغير ولكبير فهاذ الحي عارفك ديالي فا علاش مقصحة راسك راه كانتشروط عليك..

زمرد جاتها الضحكة بزز حبساتها ونترات يدها منو ونطقات ببرود ) رشييد سير تبيع خضرتك راه غاتلقاهم شدوليك بلاصتك فسويقة …

رشيد خنزر فيها وغوت) مكانتفلاش أزمرد …

زمرد خنزرات فيه وغوتات ) واش من نيتك .. (تنفسات بعمق تهدن نفسها ونطقات ) واخا غانجاوبك الجواب لي كنعطيهليك ديييما … أنا مااابغيتش نتزوج أرشيد وحااليا ماغاانتزوجش…. عاماين وأنا خدامة فديك الشركة دزمر ومزال ماقدرتش حتى نجمع باش ندير حيوط دالياجوور لديك البراكة لي قربات طيح عليا … ونتااا عامااين ونتا خدام خضار بلكروصة دبا جلول وأنا متأكدة أنه ماعندك دابا حتى خمسين درهم كاملة فجيبك حيت كاع لي كاتصورو كاتخسرو فلبلية ديالك شووف غير فمك كيولا كحل بلكمية وبداك السم لي كاتدخلو لذاتك .. عااد هاز هم مك وباك لي مراض..فا بقاااليك غير زوااج .. سير أخويا لخدمتك ولابغيتي تزوج فوت غابابي وتزوج ولا طلق… حيت أنا ماغانتزوجججججش ومستحيل نتزوج واحد مبلي وآخر حاجة غانقولهاليك ..أنا ماديال حتى واحد …

رشيد مد يدو حطها علك حنكها الممتلئ ) : وإيلا واعدتك أنني نقطع لگارو هااا .. (شافها غاتغوت وحيد يدو بزربة )🦋■- قصة : °#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋
♡الجزء 4♡

■حُضنٌ واحد يا أمّي… وسأنسى أنّك تشبيهينَ السّبع العجاف ■

رشيد مد يدو حطها علك حنكها الممتلئ ) : وإيلا واعدتك أنني نقطع لگارو هااا .. (شافها غاتغوت وحيد يدو بزربة) صافي واخا زواج بلاش دابا حتى تقتانعي ولكن اشنو بانليك نتصاحبو وأنا كنواعدك وبروووجولا حتى نقطع لبلية ونجمع لفلوس ون…

زمرد قاطعاتو ) رشيييد خليني معاك مزيانة كصديقة وإلا غانقلب عليك وجهي …

رشيد ابتاسم باستهزاء ونطق ) واخا تشقلبيه هانيا أزمرد …حيت نتي ديالي طال زمان ولا قصااار ديالي أنا بوووحدي نتي ديااالي … وكااااع شماكرية ورجال لكاريان عاارفيني كنتشروط عليك … زمرد ديال رويشد …زمرد مراات رويشد مول لكاسكيطة لحمراء ..زمرد ديال رشيد لبراق(كنيتو) ..زمرد لبراق.. وهذاكشي علاش غير كايشوفوك ولاد ورجال لكاريان كيحنيو الراس حيت عاااارفين أنه لي شاف فيك ولا ضسر عليك نتشقب لديلمو عينو …فا هااانا كانتسناك أساطة ديالي حتاااا تقبلي عليا براااحتشك …أُحِبُوكتشي أحبيبتشي التشميلة (الجميلة ) حتشى فاض بي الحبو …
زمرد تنهدات بملل كلامو لي كايسمعوليها يوميا ونطقات ) الديسك اليومي ديالك وأحلامك الوردية طلعو ليا فراسي… المهم ماتنساش تسول لخضارة على با جلول يالاه تهلا … (واستدارت غادية ناحية براكتها وهي كاتهضر بهمس مخسرة ملامح وجهها ) يخ على ماركة بنادم حازقة عليه الدنيا من كل النواحي وماقاري تاحرف بقالو غازواج تفو لا وزايدها بالشعر المشمكر ديالو (ابتاسمات بزز حابسة الضحكة) ولكن هانية عالأقل دايرلي الحماية والهبة فالكاريان مكايهضر معايا تاواحد منهم بسبابو كايخافو منو ….

(وصلات لبراكتها حلات الباب ودخلات بلا ماتشوف موراها ..أما رشيد فا بقا حااضيها حتى دخلات …هز يدو لي كان حط على خدها وبدأ كايشم فيها بطريقة هستيرية )
رشيد : دياالي أزمرد ..نتي دياالي …طال زمان ولا قصاار غاتولي ديااالي حييييت أصلا ماعندكش الاختيار ..يا أنا (وجبد زوزوار أو شفرة حادة من جيبو ) يا القبر … (ابتاسم قاد كاسكيطتو الحمراء على راسو … وجر الحصان العجوز غادي فطريقو وهو كايشم فيديه …. )..

أما زمرد فا بعدما دخلات لبراكتها ..ليكانت من الداخل عبارة عن غرفة واحدة وطواليط صغيرة …الغرفة مقسمة جهة فين كاتنعس فيها حصيرة وزربية بالية عليهم بونجة مهزوزة شويا على الأرض عليها كاشة باش كاتتغطى وقدامها إيطاجير صغير دلبلاستيك جامعة فيهم حوايجها لقلال وطبلة صغيرة دلبلاستيك علاياش كاتاكل …والجهة الثانية دالغرفة عبارة عن مطبخ صغير بلا بوطاجي… بوطة صغيرة حاطاها على الأرض …وطبلة خشبية مستطيلة متساغلاها كبوطاجي مستفة فوقها ميعناتها بطريقة منظمة..وبواطات فيهم العطرية والسكر وحبوب أتاي..وتحت الطبلة حاطة كوربة أو شبكة كبيرة مستفة فيها شوي خضرة شوي ديسير ومؤونتها القليلة بحكم ماعندهاش ثلاجة …
زمرد جمعات فراشها وخدات شطابة شطبات شويا ..بعدها خرجات لأقرب براكة من براكتها ..ولي كانت عبارة عن منزل كبير شويا بجردة سقفو لي من القزدير أما حيوطو من طوب …وضاير عليه كرياج قصديري مانحو مساحة إضافية ….دقات وفتحاتليها سيدة فالخمسينات تسالمو ودخلات كأنه الدار دارها …
زمرد : مي مينة بغيت لفراكة …

السيدة مينة كاطلع وتهبط فيها) : غاديا وكاضعافي أبنيتي واش مكاتاكليش لخبز …

زمرد تنهدات ) لخدمة كاتعييني أمي مينة وطريق لي كانضرب منهنا للشركة راه فايتة سبور بسيف مايطيح مني نص …
السيدة مينة) ولواه فاش كنتي كارية عندي لبيت لي مور داري كنت مهليا فيك كنتي هاازة ومهبرة بعدا شويا غا تحولتي لبراكة الشارف مول لبغل (السيد جلول)..ونتي تمصي ..

زمرد ابتاسمات ) عارفة أمي مينة وخيرك عليا نتي ودراري عمرني غاننساه وكل نهار كاندعي معاك بطولة لعمر ..
السيدة مينة ابتاسمات ) دخلتك داري وتهليت فيك حيت أبنيتي عرفتك يتيمة وبرانية على لكاريان وشفت فيك نقااا ..حيت من نهار لول لي جابك ليا ولدي لمجيد فهذاك صباح.. شفت فوجهك أنك بنت ناس وقارية ماشي بحال بنات لكاريان لي كلهم خرجو الطريق وتبعو بزناس اللحم دلمعطي لي كايجر لبنات للدعارة الله يعطيه موصيبة فهاد نهار.. نتي بوحدك فبنات لكاريان لي سلمتي منو …وماتجريتيش ليه ..■التتمة 4■
زمرد خنزرات ) تفو ماتجبديليش سيرتو أمي مينة الله يعطيه غبارة هو لي خرج على بنات لكاريان.. وعمرو يحلم نعطيه وقت …

السيدة مينة ) الله يرضي عليك أبنيتي ولامشا تاتعرضلك تاني داك بزناز لحم قوليها لرويشد مول لكاسكيطة لحمرا راه طفل كيبغيك وغالبارح جاعندي تاني سكران تيحزرني نهضر معاك باش تقبلي بيه ..

زمرد قلبات عينيها بملل ) واش زمر مكايفهمش تفو ..

السيدة مينة ) وغاقبلي بيه ابنتي راه ماتلقايش فهاذ لكاريان حسن منو راه واخا هو مبلي وتايسكر مرة مرة ومو لفعة مقطرة وباه قمار راه كايبغيك ..
زمرد حالة فيها فمها ) مي مينة عطيني لفراكة نمشي راني خدامة لعشيا ..

السيدة مينة ) واخا أبنيتي صبري نشللهالك حيت عاد لقيتيني صبنت ..عييت فلمجيد الله يرضي عليه يشريليا ماكينة مابغاش إوا تاجمعت باش نشريها راسي و ناض سرق ليا لفلوس ولد لحرام باش خلص على شماكرية دصحابو خرجهم من لحبس ..وخلاني بلا ماكينة بغيتليه السخط …

(وجاهم صوتو من لبيت )
لمجيد : دابا واش الله يعطيني السخط ولا الرضا الواليداا راك دوختشي الملايكة …

السيدة مينة غوتات ) لمسخوط لحمار ولد لحمار …

(وجاهم صوتو تاني من لبيت )
لمجيد : واايااالاه دازت مني للواليد لي فقبرو …

زمرد لي حابسة الضحكة حيت السيدة مينة معصبة بسرعة نطقات ) :أحم مي مينة لفراكة !

السيدة مينة : واخا واخا قوليلي بعدا واش فطرتي ولا لا ! دخلي فطري مع لمجيد راه عاد فاق الله يرضي عليه …

(وجاهم صوتو تاني من لبيت كيمووت بالضحك )
زمرد ابتاسمات وباست ليها راسها ) أنا نجلس معاه علما تجيبيلي لفراكة ..(وتحركات دخلات لبيت جلاس لي كان مفرش غير بحصيرة وبونجات قصار …ونطقات ) مجيييدو …🦋■- قصة : °#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋
♡الجزء 5♡

■حُضنٌ واحد يا أمّي… وسأنسى أنّك تشبيهينَ السّبع العجاف ■

وقف كايمدغ وقرب منها عنقها ونطق بفمو عامر ) لخوادريا هانيا !! زيدي تخشي فوجهك ..

(زمرد جلسات قدامو وهزات لخبز دهنات فيه الزبدة وهي كاتشوف فيه ..كان شاب اكبر منها بسنوات قليلة.. عامر شويا حيت وكال ديما كايخشي فوجهو.. أبيض البشرة وفيه سيكاتريس ديال ضربة سكين فوجهو …وكايتميز بلحية كثيفة..الشيء لي خلا ناس لكاريان يلقبوه باللحية )

زمرد : كون كانت ماما على قيد الحياة كيفماا بغات تكون … كون حمدت الله صباح وعشيا عليها .. وكون درت فوق الجهد باش نهزها على كفوف الراحة ماشي العكس …فا حمد الله ألمجيد على أم بحال لي عندك وتهلا فيها ..

لمجيد شاف فيها ونطق وهو كاياكل ) غاتبداي تشاني لهضرة دالمسلسلات ..

زمرد تنهدات ونطقات وهي ساهية ) فلوس هاذ الشهر لي غانشد غانحيد منهم شي بركة مناكل ونعطيهم ليك زيد عليهم وخودليها مكينة دالصابون تافقنا ..

لمجيد سكت شويا كيضورها فمخو ونطق ) : وماااانضمنلكش و…

زمرد قاطعاتو مخنزرة فيه ) صاافي غاناخدهاليها بوحدي (وهزات اصبعها كتهديد فوجهو ..) وبربي وتقرب لديك لمكينة او تفكر تهزها تبيعها تانجبد ليك مصارنك بفنيتة ..

لمجيد ابتاسم ) هاي هاي هاي علفنيكيتشا خدمت أسلوب التشهديد دولاد لكاريان (وجمع معاها بقرصة لحنكها لمطبز جروليها حتى ضرباتليه يدو ونطقات)
زمرد : كانهضر بصح ..

لمجيد : وصافي كوني هااانية …
زمرد تنهدات ونطقات وهي كاتاكل ): مزال مالقيتي خدمة ..

لمجيد : خدمتي راك عارفاها …
زمرد هزات فيه حاجبها وهي كاتمدغ ) حتى لإيمتا واش عاجبك تبقا داخل خارج من لحبس ..

لمجيد : حتشا يحن الله …
زمرد تنهدات ) غانحاول نهضر مع مدير لبوسط اليوم يدخلك بخدمة مع دراري لي كيعجنو طوفيطة و..

لمجيد قاطعها ) لا أختشي ديك لخدمة دلعبيد خليها ليك أنا كيعجبني نخدم سوولو وفري مايتباطرونا عليا تشاواحد أنا هو لباطرون دراسي راك عارفاني ماعندييش مع الأواامر ولي يتهز ويتحط عليا.. ولامشيت حتى خدمت معاك وجا داك لمدير دجوج دريال ديالك يأمر فيا وداكشي ..غانصدق جابد لمو مصارنو وبلالز عينيه وغايضربوني بعوشرين عام تلحبس اللهم تشي خليني فتطيار صيكان وضريب جيوب تايلا تضربت بلحبس متنوصلش للعام ..
زمرد تنهدات بقلة حيلة ) فين سيمو …

لمجيد : راه فديك لافااك ديالو تشاهوا تايخرا عالوقت قالك لقراية طررر (خنزر فيها ) كولشي بسببك نتشي لي دخلتشيلو لقراية لدماغو تا مابقا بغا يخرج كمارتو من لكتوبة غايبقا يقرا تشا يشرف فلخر غايجلس يتشومر مع خوتو لمغاربة ..

زمرد خنزرات فيه ) الله يهديك بعد من خوك الصغير والأرزاق فيد الله ماعرفتي قرايتو توصلو لمنصب لي بيه يخرجك نتا ومك من هاذ لميزيريا …

لمجيد : تشوصلو للخرا ماشي للمنصب …أغايبقا يقرأ تشايرطاب حتى لكريساج هو لخر مايقبلش عليه …

زمرد خبطات عليه الطبلة ) أشووف ألمجييد بلا ماطلعلي لقردة لطنطوني بعد من سييمو سمعتي راه نسمعك وقفتيليه فطريق قرايتو أو جريتيه للبلية ماعمررني نسمح ليك وغانجرو هو ومي مينة ونديهم نكريو فشي قرينة كحلة وغاتبقا هنا بوحدك نتا وكاروك …

لمجيد مخنزر فيها) أ قو..د ..و عليا واش أنا مسالي ليه نجرو ولا يجرني أحياتشو هاذييك بغا يتبع لقراية خلييه نشوف أش غايطفرو ..

زمرد شربات كأس اتاي فدقة و وقفات ) غااايطفرو غاعطيه التيساع ..يالاه تهلا ..

لمجيد : معاياش خدامة ..

زمرد : جوج دلعشيا كيديما …

لمجيد :هي غاتجي مع زك ليل تاني ..

زمرد تنهدات ) وعندي شي اختيار اخر ..

لمجيد : واش تبغي نتلقاليك أنا وولاد الدرب تاني ؟

زمرد سكتات شويا كاتفكر عاد نطقات ) بلاش أصلا لخدمة قليلة هاذ المدة ..مع كورونا والحدود مسدودة ومكاينش التصدير لبرا راك عارف ..فمكانبقاوش خدامين حتى ل 10 دالليل كيديما 9 ونص كاع نخرج راه نجي راسي ..

لمجيد : واش متأكدة راه عندك جبداااا ديال الطريق والليل …

زمرد : راك عارف ختك بميات راجل

لمجيد : نتشي تعرفي ألخوادرية ..🦋■- قصة :
°#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋
♡الجزء 6♡

■حُضنٌ واحد يا أمّي… وسأنسى أنّك تشبيهينَ السّبع العجاف ■

لمجيد : نتشي تعرفي ألخوادرية ..

(زمرد لاحت ففمها اخر دغمة خبز بقاتليها فيدها ..ونطقات بمفمها عامر ) يالاه تهلا ..

لمجيد : تشلاحي …

(خرجات زمرد من بيت لجلاس توجهات للكوزينة خدات لفراكة من عند السيدة مينة ..ودعاتها ورجعات لبراكتها ..خدات بانيو وميكة فيها تيد لعبار وجلسات فطواليطها الصغيرة دارت لفراكة فلبانيو وجلسات كاتصبن حويجاتها وهي كاتغني أغنية باللغة الفرنسية لي كانت احسن مادة بالنسبة ليها فاش كانت كاتقرأ ….. دااز الوقت… لي كملات فيه زمرد كل الصابون لي كان عندها نشرات حويجاتها ..و سيقات براكتها …شافت فالساعة كانت 12 ونص… خدات خبزة بايتة عندها سخناتها ودارت فيها بواطة دالسردين كلاتها وناضت غسلات يديها وفمها ..مشطات شعرها جمعاتو مزياان اسفنجة ….هزات صاكاضو ديالها ..وجاكيط سبور بقب .. و لي هي فالأصل رجالية…لبساتها وخدات حوايج لخدمة كيديما دارتهم فصاكاضو ديالها مع قرعة صغيرة دالماء …لبسات تقاشرها وسبرديلة ….تنهدات ودعات فخاطرها كيما كادير كل يوم قبل ماتتحرك لخدمتها … دعات من الله يحميها ويحفظها من شر الدنيا وخبث ناسها ..عاد خرجات سدات باب براكتها بلقفل ..وتحركات للبراكة لي مقابلة معاها طلات على السيدة مينة وطلبات منها غير ينشفوليها حوايجها تجمعهم ليها كيديما حتى ترجع ليهم …عاد تحركات بخطوات سريعة في الطريق لوجهتها ….والتي هي الشركة لي كاتاكل منها طرف الخبز …. تمشات مدة وأي واحد كدوز من حداه من سكان لكاريان كاتسلم عليه بحكم كلهم كيعرفو بعض ….وبقات غاديا فطريقها ومابقاليها والو و تخرج من لكاريان ..حنات راسها كتشوف فيديها لي مشكين ونطقات)

زمرد : تفوو تيد تاني كيرضلي يدي يخ غايبقاولي ناشفين هكا نهار كولو (ومع هزات راسها شافتو واقف فشوكة وعينيه عليها وهو مبتاسم ..قلبات عينيها ونطقات بهمس ) خزيييت على كماارة تفووو غايوقف قدامي غانشقلب دلمو لبرميل لاخر مزب..ب النيف ..

(وهو ماكان غير وصلات لفين واقف ويالاه غاضور مع الشارع متجاهلاه حتى وقف قدامها قاطع عليها الطريق كااايضحك …كان رجل فأواخر التلاثينات من عمرو سميييين الجسد وقصير القامة بالنسبة للرجال تقريبا فايت زمرد فالطول شويااا على علم هي قصيرة ..أصلع بحيث أغلب شعرو طايح بزز عندو شي زغيبات وعندو زبيبة او حبة سوداء كبيرة فنيفو ..لابس تيشورت أزرق…)

زمرد مخننزرة فين نطقات ) غااتحيد من قدامي أبزناز اللحم ولا غانشقلب دنم..ك..

(المعطي ولي هو قو..اد الحي او باطرون الحي .. أو بزناز اللحم كيما ملقبينو …بحيث أن كل بنات الكاريان كايزيدو للدعارة على يدو هو كيدبر ليهم على لكليان ..وكايديهم بيدو لكل منابع وأماكن الفساد ..وكل وحدة كاياخد عليها عمولة …بدا كايطلع ويهبط فزمرد ونطق بسخرية)

المعطي : زوينة غاديا تاني لخدمة تمارة …

زمرد بسرعة جاوباتو ) وسوق م..ك أبرميل شرا..ب..

المعطي تزلع بالضحك ونطق ) عارت الله غير قولي ليا واش هاذ لوجه الطفولي وهاذ ليديات الصغار ديال تمارة …
زمرد هزات فيه حاجبها ) ونتا عارت الله لما قوليا واش كاتعرف بينك وبين الله !

المعطي جمع الضحكة وخنزر فيها) أنا بغيت غير مصلاحتك (وخفض من صوتو ) بربي حتى غاتشدي فالليلة الوحدة تريبل ديال دكشي لي كاتشديه فديك الشركة مرة فالشهر ..

زمرد زيرات على يديها مخنزرة) كنصحك تحيد من طريقي…

المعطي : علاش مقصحة راسك عمرني شفت شي بنت كاتختار تمارة فمقابل عرض بحال هذا (وقرب منها ونطق بهمس تاني ) نتي راك زوينة خاسك غا تلبسي مزيان مع شويا دالمكياج وكانظمن ليك غايتخاطفو عليك الرجال و ..(وسكت منلي عطاتو زمرد تصرفيقة حتى ضار وجهو ..وبعض الشماكريا لي فالشارع ولعيالات لي كانو فشراجم بداو كيضحكو عليه الشيء لي خلاه شاف فيها مخننزر..ويالاه غايشدها حتى شاف الشماكرية صحاب رويشد جايين ناحيتو الشيء لي خلاه تراجع خطوة للوراء ونطق وهو حاط يدو على حنكو )

المعطي : بربي لابقات فيك ألبرهووشة..

زمرد مخنزرة فيه : أعلى مافخيل خياالتك سرجو وركبو أبرميل لخرا ومرة اخرى تقطع طريقي نقطع لدم..ك هذاك لي بين رجليك و لي مضسرك ..

المعطي نطق وهو مززنك بالاعصاب ) دابا ضور بيك ليام وتجي تسعايني وديك ساعة غانلوحك للحوالة(سواعدة) …

زمرد ابتاسمات باستهزاء ) دابا ضور بيا ليام وندوز حداك بطونوبيلتي حلالا طيباً.. ونجيبليك ليكارد ديالي يسلخو دلمك ويغتاص..بوك عالله تبرد وأنا ندفل عليك ونزيد ..🦋■- قصة : °#ثِقتِي_العَمْياءُ_بكَِ___أَبصَرت°
《بقلم》CHAYMAE OUAJDAD
FADMA RAJI 🦋
■ الجزء 7 ■

المعطي مخرج فيها عينيه وهو كايرجع بلور حيت شماكرية قربو يوصلوليهم وتقريبا موراها )
المعطي : حمقة (واستدار كيجري فحالو وهي دفلات موراه)

زمرد : تفووو على ميكروب سير ألمعطي الله يعطيك موصيبة ..(وجاها صوت من الخلف )

…..: واش ألخوادريا بيخير..

زمرد قفزات وبسرعة استدارت وهي تلقا تلاثة دولاد الحي موراها ..قلبات عينيها بملل حيت عرفاتهم كلاب رشيد كيما كاتسميهم ..ماعندهم لا شغل لا هدف فالحياة غير تبركيك ولبليا ولكريساج وحاضيين لي داخل ولي خارج من الحي ورشيد كان رئيسهم قبل مايخدم بكروسة الديسير دالسيد جلول …نطقات بعصبية)
زمرد : بيييخير أ دريس شكرا (وجات تمشي حتى وقفها كلامو )

دريس : واش هذاك المعطي مابغاش يبعد منك غانعلم رويشد..

زمرد خرجات عينيها حيت آخر مرة تعرض ليها المعطي كان رشيد غايقتلو على قبلها بزز فكوه ومع ذلك بقا محلف عليه وإيلا سمع بيه تاني تعرض ليها غايصفيهاليه هاذ المرة الشيء لي خلاها تنطق بصراخ)

زمرد : وااااش سوووقكم أسيييرو قلبو على خدمااا قضيو حاجة فحيااتكم بلاصت ماتبقاو مشومرين وغا حاضيين فالنااس (وشافت فيهم واحد بواحد ) وشكون هو رشييد حتى تعلموه هاا ؟ با !! خوويا ؟

(نطق أحدهم بسرعة)
…. : غاتشكوني مدامتو هو تشايقولهالينا ..

(زمرد مسحات على وجهها مفقووصة ونطقات )
زمرد : إذن سيرو قولوها ليه باش يمشي يقتل لمعطي منها يدخل للحبس ونتهنا منو قبل مايحمقني باحلامو الوردية ومنها يهنيني من المعطي لحمار …

(واستدارت مكملة طريقها مخلياهم كايتافقو واش يقولوها لرشيد او لا …أما هي كاعمة مسوقة ليهم غا بعدات عن انظارهم وقفات شدات قلبها لي كان كايضرب بالخلعة )…

زمرد وهي حاطة يدها على قلبها) ويلي قلبي قرب يسكت ويلي يااربي شبغى عندي هاد المعطي الله يغبر ليه الشقف (بقات كتضرب على صدرها وكاتنفس باش تهدن راسها) تهدني ازمرد تهدني رااه مشاااا صااافي هوووف (سكتات شويا بحالا تفكرات شيء) ويلي صرفقتووو ناري ناري (سكتات شوياا عاد كملات) اصلا مغايدير ليا والو ؟ ااه كايخاف من رشييد مغايدير والو…

(بقاات كاتهدن فراااسها تاتهدنات مزيان عاد سرعات من خطواتها تلحق الطوبيس.. خرجات الكارياان وضربات مساافة على رجليها فواحد لابيست اكتر من نصف ساعة وهي كاتمشى وبخطوات سريعة تاخرجات للشارع الكبير قطعاتو للطرف الاخر فين كاين الطروطوار لي حداه واحد السور.. تمشات محادية مع ذاك السور لمايقارب ربع ساعة عاد وصلات للقنت وهي تدور على اليمين.. خطات خطوتين تاوقفات حدا بلاكة الطوبيس تحت واحد الشجرة لي استظلات بظلها من الشمس.. مفاتت تا جوج دقايق تا بان ليها الطوبيس جاي مع الضورة لي فالقنت الاخر د السور.. علات عينيها تشوف وحيت مابعيدش بزااف بان ليها عاامر وهي تنطق…

زمرد: ياربي غااا نهار واااحد فحياااتي يوصل فيه هاد الطوبيس لهاد السطوب وهو مامشاارجيش هكاا…تفو على زمر ماغانوصل حتى نتبوق تاني بريحت لبيطان وتقاشر ولحزاق يخ …. ( خشات يدها فجيب الجاكيط هزات منو شي صرف فكف يدها ونطقات) غا هاد ثمانين ريال لي نكساب هاذ ساعة نعطيهم لمول الطوبيس تشيطلي غا يدي والريح.. اللهم الطوبيس هكاا ولا نضرب الطريق كاملة على رجلي من الكاريان للشركة ( شافت حداها لقات واحد المرا شادة فيد بنتها الصغيرة وحداهم جوج دراري خرين وكلهم كايشوفو ناحية الطوبيس لي قرب يوصل.. زمرد تاهي ضورات عينيها فاتجاهو تنهدات ونطقات) ٱه نسيت ..عاوتاني دفع فيا ندفع فيك والدافع المجتهد هو الراكب الأول يخ على حياة الغاب تفو …

(ومع سكتات مع وقف عليها الطوبيس.. حل السائق الباب وتقدمات زمرد باش تركب غا بقات ليها خطوة لدوك جوج درجات لي خاصها طلعهم باش تركب وهي تحبس مبلوكية كاتشووف فنقطة وحدة.. تقدم واحد من دوك جوج دراري لي كان تما جا قداام زمرد وطلع وتبعو الثاني.. المراا لي كانت تاهي واقفة كاتسنى الطوبيس طلعات مع بنتهاا.. بقاات زمرد بووحدها لي ماطلعااتش باقا فبلاصتها لونها صفر وساهية ومخرجة عينيها #فالدرج.. مافيقها من سهوتها الا صوت السائق لي نطق..

السائق بصراخ ) : أوااش مغاطلعييش الاخت نسد الباب ؟

(زمرد قفزات و شافت فيه مدة عاد استوعبات اش قاليهاا وعاد عرفات راسها فين هي و اشنو كاديير.. شافت فالدرجات سرطات ريقها وبعد تردد كبير لاحت رجلها فأول درجة.. علات عينها شافت فالسائق لي كايشوف فيها بدورو كايتسناها تركب ومافهمش علاش مترددة وباين فيها مخلوعة .. زمرد غمضات عينيها بجهد عاد لاحت رجلها الثانية فالدرجة الثانية وطلعات كاتجري هاربة من الدرج .. مدات يدها لي كلها كاترعد للسائق عطاتو ديك ربعة دراهم لي كانت معها وقالت ليه وجهتها لي غادية ليها.. وبقاات واقفة فبلاصتها نيت و ملاصقة معاها المرا لي سبقاتها طلعات حيت الطوبيس عامر ومزاحم.. السائق سد باب الطوبيس عاد ديماراا..🦋■- قصة : °#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋
♡ الجزء 8 ♡

■حُضنٌ واحد يا أمّي… وسأنسى أنّك تشبيهينَ السّبع العجاف ■

فنفس هاذ الوقت..ولكن في مكان آخر .. سونطر مدينة الدار البيضاء… .كايتواجد فندق كبير وفخم ..فندق خمس نجوم… ولي كايتعتابر واحد من أهم وأكبر وأجمل الفنادق في شمال إفريقيا.. سواء من حيث الهندسة أو التنظيم.. أو الخدمة والخدمات …وأيضا حيت كايظم داخله مجموعة من المرافق الترفيهية… وأيضا الرياضية بحيث أنه كايمتاز بصالة رياضة أو سبور المصنفة الأولى من نوعها في كل المدينة….. ولكن تحت ارض هاد الاوطيل ..وبالضبط تحت أرض لباركينغ لي أسفل الأوطيل …كايتواجد مختبر #سري واسع بحجم كل الأرض لي مبنية عليها بناية الفندق … مختبر مجهز كليا بمجموعة من الأدوات المخبرية المتطورة والأجهزة الختلفة الّتي يستخدمها علماء المختبرات… وتشمل هذه الأدوات موقد بنزن المجهر فضلا عن معدات متخصصة ودقيقة مثل… مقياس الضوء الطيفي والمسعر… وأيضا زجاجيات المختبر…. مختبر كايحتوي ايضا على مجمووعة من المرافق والغرف للتخزين وللتصنيع والعمل واخرى للاستراحة… في احدى هاد الغرف حيث كايتواجدو طاولات مستفين بتنظيم ..أمام كل طاولة كرسي متحرك.. أما فوسط هاد الغرفة الواسعة كاينة طاولة كبيرة وطويلة كثر من الآخرين… واقف أمامها بكل رجولة مخنزر وهو ..لابس طابليتو البيضاء ونظارات خاصة وكمامة طبية ..وفيديه قفازات زرقاء … وامامو محطوطين عدة انابيب وكؤوس فيهم محاليل ملونة ووبواطات كثيرة فيهم مواد ناشفة كالغبار أو الطحين بألوان مختلفة…..وأمامو أيضا بوطة صغيرة شاعلة أو موقد ….وواقفين قدامو مقابلين معاه …رجلين لابسين بحالو .. الأول عجوز ..والثااني شاب …وبجوجهم مركزين معاه كليااا وهو خدام بكل تركيزو كايخلط فالمحاليل فانبوب واحد بمقدارات محددة ..فحين الهدوء طااغي على المكان كايتسمع فقط صوت الموقد لي شاعل …
أخذ الأنبوب بين أصابعه وبدأ كايحرك فيه باش يتجانسو المحاليل لي حطهم فيه مزياان …كايحرك فيه بطريقة معينة وعينيه على ساعة يدو كيحسب الوقت ..حتى مرت دقائق معدودة عاد شد الانبوب بالملقط و دارو فوق البوطة كايسخن فيه بدرجة حرارة محددة وكايحركو فوق البوطة مدة وعينيه على ساعة يدو كايحسب وقت التسخين ..حتى سها وغاصت به ذاكرته وهو كايتفكر ..شخص مرمي جثة على الأرض وهو على كرشو وظهرو كلها مثقوبة بضربات سكين والدم بركة من تحتو .. وأمام هاد الشخص واقف طفل صغير فالحادية عشرة من عمره… هاذ الطفل لي واقف بجموووود ساهي فدماء أكثر شخص كايبغيه فالعالم ..هاهو ذا مرمي قدامو غارق فدمو.. حنا عويناتو العسلية المخضرة لرجيلاتو الصغيورين لحفيانين ..لي وصلهم الدم لدرجة حس بسخونيتو ..حتى فجأة تحرك الطفل الصغير و تحنى على ركبتيه غاطسهم فالأرض الدامية ..وبيدياتو الصيغورين هز السكين المليوح حداه كايشوووووف فيه والدم لي عليه غرق حتى يد الطفل… لي مدار حتى ردت فعل أخرى فقط ساهي ببرود فالسكين لي بين يديه ..مكايرمشش … حتى قفز منلي تسمعاات صرخة قوية خلاتو يدور راسو ناحية الباب وهو يشوفها واقفة كاتبكي وكاتغوت بصراخ وهي مخرجة عينيها فيه مرة تشوف ليه فوجهو مرة تشوف فالسكين لي بين يديه ..ومع صوت الصرخة الي سمعها فذكرياته دالماضي …تسمع فحاضره صوت رنين هاتفه ..لي خلاه يصحو من ذكرياته … شاف فالأنبوب لي مازالو على الموقذ وتنهد بعصبية .. دار يدو فالجيب هز تيليفون غير شاف سمية المتصل وهو يجاوب بسرعة …

……: نعام ! (سكت كايتسنى يسمع الرد من الطرف الاخر)

== : لقيناه يا نبيل لقيييناه

(غير سمعو وهو يخنزر وشاف قدامو بنظرة حادة وغامضة ونطق وهو ضاغط على الحروف..)

….: تبعو بلا مايعيق حتى نشوفو فين غايمشي .. وتأكد مزيان بلي تا واحد من كلاب باه محاضيه….

== : كون هاني..🦋■- قصة :
°#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋
♡ الجزء 9 ♡

■حُضنٌ واحد يا أمّي… وسأنسى أنّك تشبيهينَ السّبع العجاف ■

(تقطع الخط.. رد تيليفونو لجيبو ….. حيد نظارات المختبر وليكات وطابلية لي كان لابس.. حطهم فوق الطبلة وشاف فالرجلين لي معاه ونطق…)

….:بقات أربع دقائق على تسخين الأنبوب .. كملو البقية بنفس التفاعل من كل محلول ديرو 5 ميليميتر و 7 غرامات من كلا نوع من المواد (شيرو بيدو للبواطات لي محطوطين فوق الطاولة) والتفاعل يكمل فنفس درجة الحرارة.. ولمدة خمس دقائق بالضبط .. تبعو نفس المراحل لي درت وغاتخرج النتيجة المطلوبة.. فاش غانرجع غانتأكد من العينات بنفسي..(شاف فالشاب منهما ) اصصصحك يا أشرف تضيع شي أنبوب هاذ المرة..

أشرف وداك الراجل العجوز لي معاه نطقو دقة وحدة) كون هاني يانبيل …

(استدار وعطاهم بالظهر متوجه للباب…حتى وقفوو الرجل العجوز منلي عيط ليه )
العجوز : هاشم ..؟

هاشم وقف مكانو واستدار شاف فيه بمعنى نعام )
العجوز : الكمية هاذ المرة كبيرة ماغانلحقوش نكملوها منهنا لمساء الغذ..

هاشم : عارف أعم فاضل ..هاذاكشي باش غانقضي الغرض لي عندي وغانرجع نعاونكم ..

(العم فاضل حرك راسو بواخا ورجع لخدمتو فحين هاشم استدار مرة اخرى وعطاه بالظهر متوجه للباب… خرج من المختبر وسد الباب موراه.. كايتمشى بخطوات ثابتة كايشوف قدامو مخنزر بنظرة لا تبشر بالخير وهو كايفكر فالمكالمة لي جاتو قبل قليل وأخييرا لقاه بعد كل هاذ المدة غاياخد انتقامو .. فَكيفاش غايتلذد بهذا الانتقام …كايفكر وهو غادي فممر ضيق منير بإضاءة عالية الجودة على كلا جانبيه …وكايدوز على غرف مغلقة الابواب .. ممر لي طويل فخط مستقيم كايتسمع فيه فقط صوت خطوات هاشم .. تاوصل لٱخر الممر لي فيه دروج مزلجين كايقودو للأعلى … طلعهم بخطوات سريعة حتى بقات ليه اربع درجات وهو يوقف أمام حيط مسدود أي أن نهاية الدرج لي كيقودو للأعلى مسدوووودة … شاف حدا رجليه بالضبط فٱخر زليجة على يمين ديك الدرجة علياش واقف وبالضبط حدا الحيط.. تحنى جالس جلسة القرفصاء وعينيه على ديك زليجة … مد يدو بسطها وحطها فوقها وهي تشعل بضوء أخضر وثواني حتى تحل باب فالحيط لمسدود أمامو وبدون مايصدر منو ولا صوت.. حيد يدو من فوق الزليجة لي كانت فالأصل لوحة الكترونية سرية مديورة على شكل زليجة كتمويه.. مورا ماتحل داك الباب وقف هاشم وطلع الدرجات لي بقااو ليه حتى خرج من هذاك الباب لي كان فالأرض ..فكأنه خرج من باطن الأرض …. وتقدم خطوتين للقدام عاد ضور راسو شاف فالباب لي خرج منو ولي مزالو محلول فالأرض قداامو ولي كان تاهو مربع كبير على شكل مجموعة من الزليجات مستفين وحدة حدا ختهاا.. هاشم شاف بعينيه على يمين داك الباب كايحسب الزليجات بعينيه حتى استقروا على وحدة لي جات ملاصقة مع المدخل وبالضبط جات فالوسط بحيث جوج زليجات من فوقها وجوج خرين تحت منهاا.. بنفس الطريقة لي دار مع الزليجة لي فالداخل جلس وحط يدو على هادي تاشعلات بضوء اخضر عاد حيد يدو.. والباب تسد بهدوء ورجع كأنه أرض مسطحة ….. هاشم وقف وشاف فالمكان حواليه لي كايتواجدو فيه مجموعة من السيارات بماركات وألوان مختلفة…..🦋■- قصة : °#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋
♡ الجزء 10 ♡

نعم كان واقف في مرٱب وااسع خاص بسيارات هاشم نفسه و بعض سيارات باقي أفراد عائلته والشخصين لي خدامين معاه ولي خلاهم فالمختبر المتواجد تحت أقدامو .. وحيت ارضية المرٱب من الزليج فا الباب السري لمختبر هاشم مكايبانش بمرة ومستحيل يخطر على بال شي حد أن أرضية هاذ المرآب تضم باب سري أو أن تحتها مختبر …فا بالاضافة إلى أن الباب مكايبانش ومستحيل يتميز عن باقي أرض المرآب … هو مستحيل يتفتح الا ببصمة يد هاشم وبصمات أيدي لي خدامين معاه فالمختبر..وبصمة يد صديق هاشم ويده اليمنى … فقط…..
مورا ماتسد الباب السري هاشم تحرك من بلاصتو وغير عطى بظهرو للباب دالمختبر لي فالارض …. وهو يتفاجئ بيه واقف قدااامو …
كان وااقف حدا سيارتو السوداء داير يديه فجيب القبية ديالو.. بابتسامته المعهودة لي راسمة ليه غمازة على خدو كايشووف فهاشم …هاذ الأخير لي خنزر فيه وشاف ناحية الباب السري عاد شاف فيه ونطق..)
هاشم: اش كاديير هنا ؟

… جاوبو ببرود ): واقيلا نسيتي انه حتى أنا مسموح ليا ندخل لهاذ المرآب وكانحط فيه سكوتري و سيارتي( شير ليه بعينيه للسيارة) عاد جيت ناخذها.. واصلا راك عارف أنني مانقدرش ندخل لمختبرك حيت مادرتيش بصمتي فسيستيم قفل بابو …فاكون هاني …

(هاشم غي سمعو مزاادش معاه فالهضرة وتخطااه غاادي فاتجاه طونوبيلتو.. يلاه جا يجبد الكونطاك من جيبو وهو يسمع داك الشخص نطق..)

….: فين وصلتي فالتصنيع و امتى التسليم ولأشمن دولة غاتصدرها هاذ المرة أخويا ؟

(هاشم لي عاطيه بالظهر غي سمعو وهو يزييير على عينيه مغمظهم …بغضب …استداار وتقدم عندو بسرعة طار عليه وشدو من الكول ونطق وهو مخنننزر فيه ))

هاشم كايغوت) ماشي سووووقك وللمرة المليووون كانقوليك ماتدخلش فخدمتي يا زين وبعد من شغلي …ومااااتعيطش ليااا خووويا حيييت أناااا ماااشي خوووك…

(زين مخنزر وشااد هاشم من يديه لي شادينلو فالكول ونطق بنبرة هادئة نوعا ما..)

زين: شغلك هو شغلي… و راه حنا خوت راك خوويا لكبيير أ هاشم..بغيتي ولا كرهتي نتااا خويا ..

(( هضرة زين غير زادت استفزات هاشم لدرجة زيير على قضبة يدو.. جرو عندو عطااه بونية قوية حتى استدار وجه زين عاد دفعو هاشم بعييد عليييه.. حتى تخبط مع السيارة لي موراه )

هاشم صاااعر وكاايغوت ) ختي وحدة لي عندي… وغيييرها مكانعرفش…..

(زين شد توازنو و وقف قااد كول قبيتو بيدو والاخرى حطها على حنكو لي تبنج باللكمة دهاشم …. وشااف ليه فعينيه ونطق..)

زين: علاش كاتعامل معايا هكا ؟ أشنووو درت ليك انا ؟ (علا من نبرتو صوتوو شويا ولكن ماشي لدرجة يغوت على هاشم.. و كمل هضرتو) قولي غييير أ شنو درت حتى بين ليلة وضحاها وليتي كاتكرهني لهاذ الدرجة …وقامعني وديما كاتبعدني عليك وعلى أعمالك (وسكت منلي شاف هاشم عطاه بالظهر غادي فاتجاه سيارتو الشيء لي خلاه يغوت ) هااااشم نفس السؤال كانسولو ليك سنيييين هادي علاش مكاتجاوبنيش عليييه ؟ أشنووو درت ليك هااا ؟ من نهار هذاك الحادث لي داز عليه سنيين ونتا مكاتحملنيش علاااش أشنو ذنبي أنااا …!🦋■- قصة : °#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋
♡الجزء 11 ♡
(تتمة اااحداث )
(هاشم وقف …واستدار شاف فيه مخنزر بنظرة لي زين مافهمش ماغزاها واش هي نظرة احتقار ولا اشمئزاز أو استياء وحسرة …ولا امكن نظرة شفقة … وبلا مايجاوبو…. هاشم عطااه بالظهر تاني وجبد الكونطاك حل طونوبيلتووو وجا يركب تا سمعو عيط عليه مرة اخرى..))
زين بصراخ) : هاااشم !!!
هاشم استدار شاف فيه ونطق بنبرة تهديد) عندااااك تبعني فهمتييي !! (هز سبابتو قداامو كايحذرو وكمل هضرتو) لاتبعتيني هاد المرة مغاديش ندوزهاليك بحال كااع المرات يااا زين .. وإييلا لقيت شيواحد من كلابك تابعني غانصفيها ليه بحال لي قبلوو …..
((زين يلاه جاا يهضر تا زرب عليه هاشم لي ماعطااهش مجال …ودغيا ركب طونوبيلتو.. ديمارا ومشا على طوول الطريق د المرٱب لي فجوانبها كاينين البوطويات.. تاوصل للباب د المرٱب لي كان محلول حيت فاش دخل زين يخرج سيارتو خلاه محلول.. هاشم خرج بسيارتو من المرٱب…لي سبق الذكر أنه مرآب جا تحت بناية فندقه …وهو سايق بشويا حتى خرج من منطقة الفندق وصل للشارع الكبير عاد كسييرا بسرعة لوجهة مجهوولة.. مخلي موراه زين فالمرٱب واقف بجمووود …
{{ملاحظة : فندق هاشم ..تحت منو مرآب سيارات العائلة أي مكايدخلوش ليه سيارات زبناء الفندق أو الغرباء …وتحت أرض المرآب ..كايتواجد مختبر هاشم السري }}
((أما هاشم فا كايسوق بسرعة كبيرة عاكسة درجة تصبيتو …مخننزر فالطريق ولكن عقلو فمكان وزمان آخرين…وهو غاطس فذكرياتو حتى تسمعات رنة معلنة على وصول ميسااج في تيليفونو…الشيء لي فيقو مرة أخرى من سهوتو ..هز الهاتف شافو لقااه مساج من الكارد لي حارس الفيلا….^^فيلا آل نبيل ^^ …هاشم غير قرأ الميسااج وهو يفراني بجههد وسط الطريق بسرعة وبدووون اكتراث لحركة السير لي عرقل …. دوز الخط لنفس الكارد وحط تيليفون فوذنو … فالبلاصة تشد الخط وهو يغووت…
هاشم صاعر) كيفاااااش بغاااات تخرج شكووون فيييهم ؟؟؟
الگارد تخلع من عصبية هاشم ونطق بسرعة) سيد هاشم أنسة فرح هاهي منوضا لينا الصداع فالجردة د الفيلا بغات تخرج ولي كارد واقفين ليها فالباب مانعينها تبعا لأمرك يا نبيل ولكن راها كاتغوت مابغاتش تسكت وهزات لحجر كاتضرب بيه ليكارد حتى هرسات زجاج نافذة وحدة من السيارات ….
ماكملتش هضرتو بالغوات لي تسمع حدااه ولي هاشم تاهو سمعو من تيليفون….
فرح : وااااااابغييييت نخخخرررج حيييييد من طريقيييييي رانااا ماااشي فالحبس… وااش بغييتو تحمقوووني جاااية لشهر ماااخرجتش ..فااا شكووون نتووما حتى تحبسووني هاااا قولوو لهذاااك لي عندو لجااامكم ألحميير يجي يحبسني بنفسوووو وااا بعدووو من طريييقي
الكارد: سيد هاشم اوامرك…
(هاشم يلاه جا ينطق تا سمعت ثاني صوت الغوات…)
فرح: واااحييييدووو من قدااامي دبااا وقولوليييه غاااانخرج هي غاااانخرج…ولا والله حتى نعييط للصحاافة نشووووهووو
هاشم..لي مزييير على الهاتف لي ف يديه كايغزز فأسناانو وهو كايسمع لتهديداتها نطق بهمس ضاغط على الحروف)البرهووشة حمدي الله مامساليش ليك اما غانجي نوريك مزياان كيفاش تهددي ..(وغووت موجه كلامو للكارد) ماسوقييييش فيها دخل ولا تخرج المهم عندي هي الاخرى ماتخرجش سمعتووو (غوووت عليه) الشاارفة إيييلا عتبااات باب الفيلا غاننحركم كلكم…
(ومباشرة قطع عليه لابيل ولاح تيليفون فالكرسي لي حدااه بعصبية مخنزر… بقا على نفس الوضع لثواني وهو ساهي فأفكارو …و السيارات لي معرقل خلفو كايكلاكصونيو عليه باستمرار صدعوه …فا ساط بعصبية ويلاه جا يضور الكونطاك يكمل طريقو وهو يضرب الفولون بجهههد.. ورجع هز تيلي واتصل بنفس الكارد السابق تاتشد الخط وهو ينطق…)
هاشم بغوات) قوووووليها إييييلا خرجااات عندهااا ساااااااعة ترجع فيها ساااااااااعة إيييلا زاااادت دقييقة فوق ديك الساعة ومارجعاااتش غاتلقاااني واقف عليهااا وغانندمهااا بطريقة عمرها تحلم تعتب فيها باب تلك الفيلا مرة أخرى …
(غا كمل هضرتو قطع علييه بلا مايتسنى منو الرد وعاود لاح تيليفونو حداه وضوور الكونطااااك وكسيييرا لوجهتوو..
🍀🍀🍀🍀
ونرجعو للمرآب عند زين لي تبع هاشم بعينيه تاخرج …ومسح على شعرو بقلة حيلة.. جلس وهو مستند على واحد البوطو جنب سيارتو تكا عليه هاز راسو للسقف بعينيه المدمعين كايشوف فنقطة وحدة ساهي كايسترجع بعض ذكريات الماضي وبالضبط يوم الحادث …وهو يسأل نفسه =كانت عندو ققط خمس سنوات ..فا أشنو ذنبو ؟ أشنوو ذنبو حتى تعاقبو الدنيا بأنه يخسر باه وخوه فنفس اليوم= …نفس السؤال الذي يطرحه ديما ولا يجد له جواب ..فا بقا هكاك على حالو حتى صونا ليه تيليفون مسح دموعو وشد الخط مجاوب المتصل..))🦋■- قصة : °#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋
♡ الجزء 12 ♡
■حُضنٌ واحد يا أمّي… وسأنسى أنّك تشبيهينَ السّبع العجاف ■
زين: واش كاين شي خبار ؟ واش لقيتيها ؟
….: هاد المرة جمعت معلومات اضاافية ومهمة عليها ولكن بلاصتها وفين كاينة وشنو وقع معها ماعرفتش مزال مالقيتش بلاصتها….
زين نطق بغوات صااعر ) ياا حضرة المحقق انا رااه كانخلصك باش تلقا ليا ختي الكبيرة ماشي كل مرة تعيط وتقول ليا مزال مالقيتهاش…

المحقق: سيد زين راه كاندير جهدي وان شاء الله نلقى بلاصتها ونعلمك….غير هو المعلومات لي لقيت عليها راه أرسلتهم ليك فإيميليك اضطالع عليهم لربما تعرف شيحاجة تنفعني فالبحث
زين: إيلا كااانو معلومات بحال ديما عن مجال عملها والناس معامن كانت كاتخدم كممثلة …فاا أنا ماغااانفعك فوالو .. فااا ماتعطيش عليا حتى تلقاها (يلاه جا يقطع وهو يتفكر شي حاجة ورجع نطق) بلاااتي ..مادامك تقريبا شهر وأنتا كاتقلب عليها ومالقيتيهاش داخل المغرب .. فاا بحث فالرحلات لي خرجو لبرات المغرب واش كاينة فيهم سمية الممثلة #بسمة_النبيل …
المحقق: واخا وكانواعدك غانضاعف الجهوود فالبحث هاد المرة…
(زين بلا مايجاوبو قطع عليه وسهى كايفكر ونطق باستغراب )
زين : مايمكنش هاشم مايكون عارف عليها والو ومبرد بحال هكا وماكايقلبش عليها (ابتاسم باستهزاء ) هي راه الوحيدة فكل العائلة لي باقا عندها بلاصة فقلبو فا مايمكنش مايكون عارف عليها والو …
(وقف من بلاصتو قاد حوايجو شاف قدامو ونطق ..)
زين بصوت حزين) فكل الأحوال أنا غانلقاك أختي …
(وتحرك متوجه لسيارتو ركب وخرج من المرٱب ومشاا فالطريق المعاكسة للطريق لي مشا منها هاشم…
🍀🍀🍀🍀🍀
••• نرجعو لعند بطلتنا ^ زمرد.. لي مسافة نصف ساعة وحطها الطوبيس ف *المشروع* وهو حي سكني مابعيدش بزاف على مدينة كازا وفيه اقامات وعمارات وشقق سكنية .. وبالقرب من المشروع كاين •الحي الصناعي• لي هي متوجهة ليه …هو البلاصة فين كاينة الشركة فاش خدامة بطلتنا.. وفيه ايضا بزاف دشركات مغربية وعالمية كبرى دصناعات مختلفة ..منها شركة العلف وشركة لبلاستيك ..وشركات الكارطون والجلد ..وشركات الاغذية .كلكاشير والمعلبات .. وشركة أوني ..التيد …
وفيه أيضا المقاولات والمصانع ….أي أنه حي صناعي شامل لمختلف المصانع والشركات و مافيهش السكن والديور…..
زمرد حبسليها الطوبيس فالمشروع حيت مكيدخلش للحي الصناعي….. وكيديما غمضات عينيها بقوة عاد هبطات دوك جوج أو تلاث درجاات دالطوبيس وهي كاتجري ماهامهاش طيح …أكتر مكايهمها ماتشوفش فالدرج أو تحس بيه بل تهرب منه كأنه سيبتلعها …..
نزلات من الطوبيس كاتجري وقطعات الشانطي ودازت للجنب الاخر…وهي كاتسوط بيدها على وجهها وكاتلهث )
زمرد : اووف تخنقت المرأة لي لصقاتني فالطوبيس تقووول عام مادوشاتش اووف يااربي يخ اووف (شافت فالانحااء كانت بلاصة لي شوياا خااوية الديور قلال فيها والطونوبيلات كادوز وحدة ولا جوج مرة فشحاال.. تنهدات) ااه.. تابعاني مزال نص ساعة د الطريق تانوصل للشركة وكونما الطوبيس لي شديت كون ضربت ساعتاين د المگانة وانا كانتمشى على رجليا من الكاريان تال الشركة مكانوصل تا مكانبقاش نحس بيهم..
(وتحركات كاتمشى محادية مع الطريق وكاتنهد وهي كاتهضر مع راسها)
زمرد : عادي أزمرد عادي كولو فسبيل نخدم على راسي صبري يا زمرد دابا يحن عليك الله (ابتاسمات ) صبري ازمرد راه لاماخدمتيش على راسك مكاينش لي يرحمد (وضحكات بحزن ) الله يرحمك أبابا لي عمرني عرفتك متي حتى قبل مانحي لهاذ الدنيا والله يرحمك أماما لي مالحقتش نكبر ونعقل عليك حتى خليتيني تربية ومشيتي عند الله..والله يرحمك أجدة ألحنينة لي كنتي ليا الأم والأب وكبرتيني على حساب صحتك ..حتى تقاضا أجلك ومشيتي عند الله ..والله يسمحليك أخالي على كل ماعيشتيني نتا وطريكتك حيت أنا عمرني ماغانسمح ليكم لا دنيا لا آخرة … (وقفات كاتمسح دموعها وابتاسماتووغوتاات بحماس ) الطاقة الإيجابية يا زمرد الطااقة الإيييجابية ونساي عليا بووزبال ..هوف هوف…(وتحركات تاني كاتمشي بخطوات أسرع ) هااكاك أزمرد تزيدي هيلا هو هيلا هوو واخا تعياي كملي وحسبيها كرياضة دابا يحن عليك الله أزمرد داابااا يجيك الفرج وتفرحي وترتااحي فحيااتك غازيدي هييلا هوو هييلا هوو…
(وبقات على نفس الوضع …ككل يوم كاتمشى وكلما عيات كاتشجع نفسها بكلمات مشجعة ومحمسة وهي كاتهضر مع رااسها مامسوقاش لبعض الناس لي كيشوفو فيها باستغراب …غاديا وكاتحاول تسرع من خطواتها وكادوز فطريقها على بنات و رجال غاديين كلا للشركة فين خدام بحكم المنطة صناعية … ….تمشاات خمسة دقائق عاد وصلات لواحد الضورة على الليسر.. ومع استدارت قطعات الشانطي ..وتمشات حتى وصلات للحي السكني دالمشروع لقاات بزاااف د الاقامات والعمارات شي حدا شي فكلا جانبي الطرييق والناس شي غادي وشي جاي..°قصة: #ثقتي_العمياء_بك_أبصرت°

🍂 تتمة الجزء 12🍂

تمشاات نييييشان كيديما كاتمشي فالشاارع ..ومكاتختاصرش عليها الطريق بأنها دوز من زناقي …حيت ماحافضاهمش وكاتخاف تتلف ..وحيت كايكونو خااويين كاتخاف تكريسا أو تتعرض لشي تحرش …فا دييما منهار خدمات فهاذ الشركة البعيدة …وهي كاتمسي وتجي مع الشارع الكبير ووسط الناس ….
زمرد فاتت دوك العمارات بمسافة و وصلات لبلاصة خاوية من البنايات وبهذا تكون خرجات من حي المشروع … تمشات شويا فديك لخويا لي كولها خلا …فقط شارع رئيسي حيت هو لي كيدخل لمدينة الدار البيضاء ..فا كيدوزو منو السيارات بسرعة … قطعات الشارع ..وتمشات مسافة عاد وصلات للحي الصناعي كدوز على مصنعيين واحد دالرخام والثاني دالجلد عاد كاتوصل للشركة فاش خدامة..الشركة لي جات فالوسط ملاصقة مع واحد المقاولة من جهة ومن جهة اخرى كايفصلها واحد الشارع على شركة اخرى.. وهاد الشركة فاش خدامة زمرد …هي شركة عالمية مولاها اسرائيلي أجنبي و سميتها ^موروكان انديستري^ او صناعة المغرب^.. شركة مختصة في تصنيع السكاكر بحال الفانيد كريمو كاراميلو و طوفيطة…. المصاصة كوجاك وأهم صناعاتها هي^ المسكة فلاش..
داكشي علاش العمال لي خدامين فيها معروفة عندهم وكايقولو ليها غا ^شركة فلاش^ ومنتوجات هاد الشركة كايتم تصدير جزء كبير منها للخارج… وهي شادة مساحة كبييرة فديك البلاصة وفيها تلاث طبقات…وعندها معمل خاص بيها ….)🦋■- قصة : °#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋
♡الجزء 13 ♡

■حُضنٌ واحد يا أمّي… وسأنسى أنّك تشبيهينَ السّبع العجاف ■

زمرد وقفاات كاتلهث قدام باب الشركة فين واقفة السيكيريتي لي كانت امرأة في أواخر العشرينات من عمرها بلبسة خاصة بمجال الأمن.. ومن ملامحها كاتبان صارمة …وقفات قدامها زمرد من أجل القيام بالإجرائات الروتينية اليومية لي كايخضع ليها كل عامل وعاملة فهاذ الشركة )

زمرد بابتسامة) سلام ختي فاطمة..

(السيكيريتي فاطمة شدات من عندها
صاكادو كاتقلبو ليها) سلام زمرد..

زمرد: ماجبت معايا والو بلا ماتعذبي راسك فالتقلاب..

فاطمة شافت فيها وضحكات) ههه وانتي عارفة القوانين كايفرضو علينا نقلبو (شيرات ليها بعينيها للكاميرا لي كاينة فوق الباب ونطقات بصوت منخفض) وكلشي كايتورق لي مدارش خدمتو الباب الحباب (شافت فالباب الثاني لي مابعيدش عليهم بزااف ولي واقف فيه سيكيريتي راجل لي بدورو كايقلب الرجال لي خدامين فالشركة قبل مايدخلو ليها) ..

زمرد شافت فين كاتشوف فاطمة عاد شافت فيها ونطقات) أعرااافت لي كاين أختي خوذي راحتك ..

(فاطمة قلبات ليها الصاك مزيان حيت ممنوع على أي عامل/ة يدخلو معاهم تيليفون أو الماكلة او أي شيء آخر ..حيت عندهم مطعم فالشركة كيقدمو فيه وجبة الفطور والغذاء أو لكوتي و العشاء …للعمال على حسب دوامهم واش صباحي ولا ليلي ..ومع كل وجبة كايقطعوليهم من الخلصة ثمن رمزي فقط … بالإضافة لتأكد السيكيريتي فاطمة من أن ثياب الخدمة دزمرد كاينين فالصاك حيت العمال عندهم توني موحد ..هزات ليها من صاك البادج دالخدمة لي فيه صورتها ومعلوماتها الشخصية سميتها وتاريخ الازدياد والعنوان.. مداتو ل زمرد ونطقات)

فاطمة : ديري هذا حول عنقك وأجي نقلبك عاد دخلي..

(زمرد تنهدات وشداتو من عندها دارتو فعنقها ونطقات) دبا انا لي مافهمتوش هو علاش الماكلة ممنوع نجيبو معانا مناكلو من الدار..

فاطمة: راه كاااين المطعم د الشركة غا عشرة دراهم تفطري وتغذاي بهاا..

زمرد ضورات عينيها) اكاتهضري بحالا راه مهلييين فينااا.. وأصلا فالخلصة اللخر د الشهر كايقطعو منها ديك خمسة دراهم للوجبة.. وتخيلي يقطعولك عشرة ظراهم للنهار شحال غاتبقالك فالشهر ..

فاطمة: إوا أختي هادشي لي كاين راه بحالي بحالك بحال كااع لي خدامين هنا نفس القوانين مفروضة علينا كاملين (مدات ليها صاكها لي شداتو منها زمرد وقربات من السيكيريتي لي قلبات ليها جيابها وتأكدات من انهم خاويين شافت ليها فيديها وأذنيعا ورقبتها اكما حاطة شي أكسيسوار حيت ممنوع عاد نطقات ) بامكانك دخلي دباا..

زمرد ابتاسمات ليها ) نهارك مبروك ختي فاطمة..

(فاطمة حركات ليها راسها.. وزمرد دخلات ومشاات نيشان فاتجاه فيسيرات الخاصيين بعمال ليكيب لي خدامة فيه…لي فيسيير لي كانو فأول طبقة هاد الاخيرة لي مقسمة لبزااف د الاقسااام كل قسم عندهم مهام محددة .. وكل قسم بفيسيير خاصة بعمالو فين كايبدلو ثيابهم لثياب العمل ..وكل قسم كايظم أكتر من أربعين عامل/ة وكل قسم كايفرق بينو وبين قسم اخر واحد نص حيط وكل قسم عندو خدمة مختلفة عن الآخر .. كاين لي مكلفين بآلات لومبالاج…. وكاين لي مكلفين بآلات عجن الطوفيطة.. وكاين قسم آخر مكلفين بآلات تذويب السكر وقسم آخر مكلفين بٱلات الطياب وقسم خاص بالديشي ..وغيرها .. وكاين لي مهمتهم يجمعو لي تصنع ويستفوه فالبلاكارات…ومصنوعات الشركة مقسمة لقسمين ..قسم يدفع للبيع محليا وقسم يصدر للخارج حسب الطلب ….

.. زمرد غير وصلات للقسم فين كاتخدم دوزات لبادج ودخلات للفيسيير دالبنات ..بسرعة بدلات ثيابها لتوني العمل لي كان عبارة عن سروال واسع أبيض ..وفوقو طابلية حتى هي واسعة وطويلة بيضاء ..+ بوني دالرأس ابيض تأكدات أن جمع ليها كل شعرها بحيث ممنوع شعر العمال لا رجال لا نساء تبان منو حتى زغبة..دارت كمامتها البيضاء مع قفازات يد مطاطيين حتى هم فالأبيض …دارت لبادج حول عنقها وجمعات حوايجها لي نصلات فصاكاضوها لي خشاتو من بعد فبلاكار صغيرة خاصة بيها لي جات وسط مجموعة من البلاكارات المماثلة ليها الخاصة بكل عاملات قسمها… سداتها بساروتها الصغير دارتو فجيبها من بعد خرجات من لفيسيير نيشان فاتجاه بوسطها غا قرباات توصل وهي تبان ليها جالسة فبلاصتهاا حانية راسها كاتكتب شي حاجة..

زمرد ابتاسمات وشيرااات بيدها) هييه نوووور ..■- قصة : °#ثِقتِي_العَمْياءُ_بكَِ___أَبصَرت°

□■ تتمة الجزء 13 ■□

زمرد ابتاسمات وشيرااات بيدها) هييه نوووور ..

(نور هي صديقة زمرد الوحيدة فكل هاذ الشركة …الصديقة الصدوقة لي تعرفات عليها زمرد فاول نهار ليها فالشركة هاذي عاماين 2ans.. خدامة معها فنفس البوسط ديال لومبالاج.. ومع توالي أيام عملهم جنب بعض تقربو من بعض بحكم شخصية نور المرحة ..لي ارتاحت ليها زمرد…ومع الوقت تاقت فيها كصيقة رغم صغر سنها عن سن زمرد بحيث نور حاليا عندها فقط 19 سنة فحين زمرد حاليا عندها 22 عام ..
فمع مرور الأيام والأشهر على صداقتهم … زمرد زادت عززات سمك حبل ثقتها بنور حيت هاذ الأخيرة عمرها خيبات ظن زمرد فيها بل العكس ..كانت ليها خير بئر أسرار ومنبع للنصح وأذن مصغية ويد حنونة كاتساعدها وقتما احتاجت للمساعدة ..الشيء لي خلا زمرد تعتابر نور بمثابة الأخت لي ماعندهاش ..ولي عارفة عليها الصغيرة ولكبيرة

(نور لي شكلا كاتتميز بشعر متوسط الطول أسود فحمي وعيون سوداء ظلامية لامعة و واسعة ..بشرة متوسطة البياض ..نحيفة الجسد كزمرد وحتى هي قصيرة فنفس طول زمرد .. ..كانت لابسة نفس التوني الخاص بالعمال لي لابساه زمرد وكانت جالسة فلبوسط ديالها مديماريا لاماشين دلومبالاج تبدأ خدمتها وكاتقيد الرابور دالسلعة لي خاسة للقسم ديالهم …غا سمعات سميتها هزاات راسها وهي تبان ليها كاتشير ليهاا الشيء لي خلاتها بتاسمات ونطقات ).

نور : جيتييي تعطلتييي تااني ..

(زمرد قربااات ليهاا عنقاتها من الخلف عاد توجهات لبوسط لاماشين ديالها لي جنب بوسط نور ..جلسات على كرسيها بعياء وبسرعة بدات كديماري لاماشي وهي كاتهضر )

زمرد) بسيف مانتعطل راه تلقالي تاني بزناز لحم دالمعطي الله يعطيه موصيبة (نور بسرعة هزات يديها كاتقول آمين) بقيت مشادة معاه شي ربع ساعة مني منك مني منك ماسكتلوش البرميل لاخر …..🦋■- قصة : °#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋
♡الجزء 14♡

■حُضنٌ واحد يا أمّي… وسأنسى أنّك تشبيهينَ السّبع العجاف ■

نور حطات الدفتر فاش كانت كاتكتب فوق الطاولة لي كانت قدامها هبطات الكمامة من على فمها ونطقات) أكما مد عليك يدو ولا شيحاجة …

زمرد هبطات لكمامة وشافت فيها) حربش يقيصني والله واخا نعرف نوصل أنا وياه للكوميسارية منها نيت نفضح للبوليس كاع ضواصاه واخا نعرف نتقدم فيها ..وزايدون راه غاشاف كلاب رشيد وهو يهرب ..

(نور حبسات الضحكة وبدات كاتهضر بصوت متقطع وحرش وهي كاتقلد رشيد فاش كيكون سكران ومعصب )

نور : ز ز ز زمرررد ديالي زمرد برب لكعععععبة تشا تشا تشا نتي د ديالي أزمررد ر راه يش يش يش يش يشوفيك ش شي مسخوط ندبببب ح مو نتشي ررراك زمرد لورااققققققق(وهي تقج وبدات تكحب وزمرد كاضحك عليها)

زمرد :هههخ تفو

(نور حتى هي بدات كاضحك ونطقات بسخرية) ياختي شكون بحالك عندك روميا من درجة شمكار ..

زمرد : غير سكتي مؤخرا ولا هضرة جوج يجبدليا زواج كيمرضني عيق عليا بهضرتو ..
(وبدات كاتخدم لاهي لا نور وهوما كايهضرو ..كايحركو فلي ماشين ديالهم يد كايديماريو بيها ويريگلو او يضبطو العدد .. ويد كايقطعو بيها بابيي د لومبالاج ..ولتحت برجهم كايضورو واحد العجلة بحال فران دالماشين مع كل باكي دلمسكة كايتأومبالا كاتوقف لاماشي كايبركو برجليهم على ديك العجلة لي قاصحة شويا خاسها الجهد باش كتضور تهبط باش كايدوزلهم باكي تاني …)

نور : ولكن بعدا راه داير ليك لحمية فداك دوار شماكريا لي ساكنة فيه و بلا ماتنكري أنه كونما هو ومي مينة وولادها كون نهشوك حية فداك لكاريان …

زمرد تنهدات ) وبالإضافة لهاذشي رشيد عمرو تعامل معايا شي تعامل ناقص واخا كانظل نتعصب ونغوت عليه ونصدو ..وعمرو قرب مني واخا شحال من مرة كيجي يحيح قدام براكتي وهو سكراان فليل كايقولي فالشعر لمشمكر ديالو حتى كيخرجليه لمجيد يجري عليه ..كايمشي وهو كايضحك .. على هاذشي عزيز عليا…

نور : أممم إذن كاين أمل نشوفك واحد نهار مدار لبراق(كنية رشيد)

زمرد ضحكات بسخرية ) مستحيل …

نور : علاش !

زمرد نطقات وهي ساهية ) : بلا أنه مبلي وفيه بزاف دالعيوب الأخرى ..شخصيتو ضعيفة وبزاف يعني هو من النوع لي كاينبح آه ولكن مكايعضش… وديما فالحي كايدابز ويسلخ غيير مع لي كايعرفهم ضعاف عليه وكايخافو منو عمرك تشوفيه مشاد مع شيواحد قوى منو وعاد شيمرات كانحسو ماشي سوي العقل ماعرفتش كايجيني بعض المرات مزنزن فمخو …

نور : اذن رجل أحلامك خاس تكون شخصيتو قوية تهضري معاه ترعفي ..

(زمرد شافت فيها مخنزرة ) علاش أشنو هي علاقة قوة الشخصية بالعنف !وماشي هاذشي لي قصدت بقوة الشخصية أنا إيلا كنت غانتزوج فا كنفظل عالأقل ناخد راجل لي مكايخافش من ظلام وظلم هاذ الدنيا ومكايبينش قوتو فلحكرة على لي ضعف منو ….وعرفتي شنوو أنا أصلا ماعنديش فارس أحلام حيت أحلامي عااالية على أنها تتمحور حول رجل …

نور تنهدات ونطقات سااهية ) أنا أختي بغيييت حااااجة وحدة فهاذ الدنيا وهي نتزوج … واخا يسلخ دلم..ي بصباح ولعشيا واخا يكون خاايب معوق فقيير مافيه مايتشاف بغيتو غييير يكون كايبغيني من أعماق قلبو وصااافي ..

زمرد :أصلا لاكان كايبغيك عمرو يحط يدو عليك ألهبيلة ..وبقاي كاتحلمي بالمعوق والفقير حتى يديرهاليك الله على قد أحلامك ويكتب عليك شي راجل كسيدة تولي على خر يامك تخرقي (وشافت فيها )فا كاطلبيها إوا طلبييها كبيييرة ..أجي بعدا فين وصلتي مع لكراش الفيسبوكي المجهول لي كاتشاطي معاه…

نور خرجات عينيها) علاش مااقلتش ليك أخييييرا وبعد عاماين دالشاط كل ليلة ..أخييرا قاليا ولبارح شنو سميتو الحقيقية ..!

زمرد : وأشنو هي سميتو ؟

نور : النبيييل …🦋■- قصة : °#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋

♡ الجزء 15 ♡

■حُضنٌ واحد يا أمّي… وسأنسى أنّك تشبيهينَ السّبع العجاف ■

زمرد : وأشنو هي سميتو ؟

نور : النبيييل …

زمرد هزات فيها حاجبها ) قصدك نبيل !

نور حركات راسها بلا) أل ال النبيل ..

زمرد : وهاذا ألهبيلة اسم !

نور هزات كتفيها ) هاذشي لي قاليا نتي عارفاه كيداير فهضرتو شحال غامض راك شحال من مرة حضرتي ليا كانهضر معاه بالشاط

زمرد : ماافهمتش عاماين ونتوما كاتهضرو ومكاتعرفي تاكمارتو كيدايرة! فين ساكن ! شحال فعمرو ! فاش خدام ! مكاتعرفي علييه واالو أ نوور منلي كاتسوليه كايطلعليك vu فالوقت لي نتي قايلالو كوولشي عليك وعلى لباطرونة د خالتك معامن عايشة معاودالو حتى على لحباس دباك وحتى من صداقتي معاك معاودالو عليها تامن فيسبوكك عااامر بصورك يعني عارفك فوجهك وعارف عليك كووولشي ..ومع ذلك هو مجهول بالنسبة ليك ومزال كاتهضري معاه!

نور مبتاسمة ) هضرتو زوينة راك شفتي كانحس بيه شخص ناضج وقااري..

زمرد حركات راسها بآه) متاافقة معاك هاذشي شفتو فهضرتو ولكن أنور راه مزالو شخص مجهول مكاتعرفي عليه واالو وقلتهاليك ألف مرة وغانعاود نقولهاليك راه يقدر يكون غافوكونط شيحد كيعرفك وكيتفلا عليك …

نور حركات راسها بلا ) وراه بدأ كاينفاتح معايا راه قاليا سميتو النبيل ..

زمرد نطقات مفقوصة ) لواه الشهم ..واخا نقولو بصح سميتو نبيل ولا النبيل ..هاذ الاسم لي قالوليك بعد عاماين دلهضرة على هاذ لحساب راه خاسو عاماين وحدة اخرى باش يقوليك عمرو وعاماين باش يقوليك فاش خدام وشكون شاف عشر سنين باش يوريك كمارتو والله وعلم خمسين عام باش يتلاقاك على أرض الواقع …

نور : وشكون قاليك أنا غانتسناه كل هاذ الوقت (تنهدات) وراه غير كانهضرو عادي و..

زمرد قاطعاتها ) عادي من نيتك أنه يقوليك توحشتك عادي ولا يتعصب حيت ماتكونيكطيتيش فالوقت عادي ولا يقوليك عاوديلي اش درتي فنهارك عادي ولا يسولك واش مرتابطة عادي !

نور : هاااه وهانتي قلتيها هو لي كيدير هاذشي ماشي أنا هو لي متعلق بالهضرة معايا أما أنا والله ونتخطب لشيحد كيبغيني دبصح تانتزوج بيه وننسا لكراش النبيل ..

زمرد شافت فيها بمعنى من نيتك ) نفكرك نهار بتي ليل كولو كادمعي منلي غبر يوماين ماتكونيكطاش …

نور خرجات فيها عينيها ) وراه حيت كنت غيكلي الهرمونات وصاف ..

زمرد تنهدات ) تيقتك (حبسات لاماشين ديالها وتحنات كاتماصي رجليها ونور عين على صاحبتها وعين على لاماشين ديالها بلا ماتوقف لخدمة نطقات )

نور : كيضروك تاني ؟

زمرد : راك عارفة طريق لي كانضرب..وعاد هاذ لاماشين قاصحة رجلي طابو والله …

نور : أنتي لي مابغيتيش.. ياك ديما كانقوليك اجي باتي عندي انا كاينة غي حدا الاقامات هنا وقريبة للشركة ومكاتسمعيييش !!

زمرد ميقاات فيها) راك عارفة علاش مابقيتش كانحمل نبات معاك من آخر مرة بيناتلي ديك لفيلة د خالتك حبها الكبيييير ليا …وعارفة علاش مابغيت نخوي داك الكارياان..

نور: عارفة ازمرد ولكن راه با جلول….
(ماكملاتش هضرتها فاش قاطعاتها زمرد لي نطقات)

زمرد : صافي أنور بلا ماتقولي نفس الهضرة دكل نهار …(ورجعات ديمارات لاماشين ديالها )

نور: إواا باااااز ديما كاتسكتيني فاش نبغي نهضر على داك بااك جلول..

(زمرد خنزرات فيها يلاه جات تهضر تانطقات نور بزربة..)■تتمة الجزء 15■

نور: صافي صافي صافي ماااقلت واالو..طلعي كمامتك راه مابقا والو وضور علينا لجنة النضافة …

زمرد طلعات كمامتها ) والديشي (وشافت فباقي بنات قسم لومبالاج لي كل وحدة جالسة فلاماشين ديالها خدامة ) نوبت من اليوم يجمع الديشي..

نور خرجات عينيها )ويييلييي أناااا وماجبتش كارطونة الديشي من الديبو واليوم نوبتي ..نسيييت قودت..ها..

زمرد ابتاسمات ) أنا غانوض نجيبها غاجلسي (ومجات تهضر نور حتى كانت زمرد قد وقفات لاماشين ديالها وناضت متوجهة للديبو …فحين نور ابتاسمات وحنات راسها على خدمتها…حتى بدات كاتسمع التوشويش صادر من طرف بعض لبنات لي خدامين معاها فنفس القسم ولي طاولاتهم كاينين قدام طاولتها هي وطاولة زمرد… سمعاتهم كايوشوشو ويضحكوو فالأول ماتسوقاتش حتى سمعات سمية •زمرد• الشيء لي خلاها حبساات من الخدمة وركزات معاهم باش تعرف علياش كايهضرو…)

البنت1) انا مافهمتش هاد زمرد علاياش معفرة هكا أشنو حاسبة فراسها جا عندها الشاف دليكيب براسو قاليها لابغات تدخل گروب عاملات الميناج ديال لي ماشين… لي كايتخلصو ضوبل ديال داكشي لي كانتخلصوه فلومبالاج ورفضاات !! والله مافهمتهاا !!أنا دفعت لقسم لميناج دليماشين ورفضولي الطلب ..وهي شاف دليكيب يجي تالعندها يقولهاليها وتقوليه لا ..هه زوينة هاذي ..

البنت 2) قالت ليا يامنة لي خدامة فالمطعم بلي ماعمرها طلعات تاكل بحالنا كاملين تما بل غذاها ولا عشاها كيهبطوه ليها صحاباتها حتى للفيسيار وشاف دليكيب فراسو وساكت ..أنا كنقول انها مصاحبة معاه …

البنت 1) وييلي على بنت لحرام أش عجبها فداك الشارف ورااه مزوج …

البنت 2) أش غايعجبها فييه وراه باينة قابلة تصاحب معاه حيت حاجتها فيه شويا تسمعيه توسطليها يعطيوها بوسط فالادارة وعلم الله اش كاتعطيه فالمقابل هههه

البنت3 كاضحك) وااا لا ألحمقات ماشي هكااا قلعووو علاش هي رفضات تدخل لكروب لميناج دليماشين ..

البنت1: علاش ؟

البنت3: حيت ليكيب ديال الميناج خاصو يدير الميناج لكااع لي ماشين ديال الشركة ودالمعمل يعني خاصو يولي يطلع تال الطبقة الثالثة ويهبط وهادشي يومياااا..
البنت1: أااه هادشي عارفااه وفين كاين المشكيل ؟؟

البنت 3بزز حبساات الضحكة ونطقات) سمعت بلي رفضات غير باش ماطلعش الدرووج هههننههه🦋■- قصة : °#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋
♡الجزء 16♡

■حُضنٌ واحد يا أمّي… وسأنسى أنّك تشبيهينَ السّبع العجاف ■

البنت1: من نيتك زعما شرفاات ودروج ديال ثلاثة د طبقاات جاوها بزااااف !!

البنت3 كاضحك ونطقات بهمس) هههه ولاااا قاليك كاتخاف من الدروج هههه
(واخا نطقات بهمس وكل كلامهن وضحكهن هامس إلا أن نور سمعاتهم حيت قريبة ليهم الشيء لي خلاها توقف صاااعرة مخنزرة فيهم

نور مخنزرة) هييه نعييمة جمعي كر..رك ونتي كاتهضري هكاا على البنت فغياابها..
(نعيمة لي كانت كاضحك حتى سمعات نور كاتغوت عليها وهي ضور عندها مخرجة فيها عينيهاا وقفات من بلاصتها وشاافت فالبنت لي حداها عاد شافت ف نور ونطقاات..
نعيمة: وماالي كذبت !! يااك زمرد مابغاتش دخل ليكيب د الميناج غي حيت كاتخاف من الدروج راني سمعتها بوذني قالتها للشاف دليكيب واصلا عمري شفتها طلعات للطبقة الثانية ولا الثالثة ولا طلعات للمطعم حدها كاتبقى هنا فالطبقة اللولة..
(شافت فالبنت لي حداها) حفيظة قولي نتي عمرك شتيها قربات للدروج ؟

حفيظة شافت ف نور لي خلعاتها بغواتها وتخنزيرهاا وشافت ف نعيمة وجاوبتها) لا ماعمرها طلعات للفوق وشحال من مرة صيفطاتني فاش تكون باغا شي حاجة من الطبقة الثانية ولا الثالثة نجيبهاليهاا.. والمطعم لي كاين فالطبقة الثانية ماعمرها مشات ليه دييما نور لي كاتجيب ليها الفطور ولا الغذا واخا ممنوع الأكل يهبط لأقسام العمل وشاف دليكيب عاطيها هي الاذن ماعرفتش علاش…

نعيمة: اوااا شتييييي راه قلت ليك كاتخاف من الدرووج..

(نور معصبة كاتشوف ف نعيمة ونطقات بغوات)آآه هي كاتخااف من الدرج ولكن نتوما معارفينش السبب … راه ماشي لخاااطرهاا وهادي كاتسمى #فوبيا_الدرج سيييرو تقرااو شوويااا ونتوما شاطرين غا فتهضرو على الناس مورا ظهرهم اما باش تعمرو داك الراس وااالو وتقووول..

نعيمة ضحكات جنب) فوبياا الدرج قاليك..

نور: كون كنتي كاتبحثي شوياا كون راه عرفتي شناهياا فوبياا الدرج وعرفتي بلي راها معروفة ب batmophobia.. كون كنتي كتبذلي مجهود ولو صغير فالمطالعة بلاصة ماتشدي التبركيك والضحك على نواقص غيرك … كون عرفتي أن هادي فوبيا بحالها بحال كاااع الفوبيات الآخرين.. بحال لي عندو فوبيا من الاماكن الضيقة فاش كايكون فشي مكان ضيق كايتوثر وكايتخنق ويقدر كاع يفقد وعيو.. نفس الشيء مع لي عندو فوبيا الدرج فاش كايشوف شي درج كايحس بالارتباك والتعرق الزائد ويقدر يوقع ليه ضيق التنفس يعني احتمال انه يفقد الوعي او يدخل فكريز ….. كاع هاد الاعراض كايبانو عندو.. لهذاا لي عندو فوبيا الدرج كايحاول يتجنب الدرج بشكل نهائي يقدر يستعمل المصعد ااه ولكن الدرج لا.. وهاذ الفوبيا على ماعاوداتلي زمرد كان سببهاليها حادث كبير وقعليها فاش كانت صغيورة ….فهمتي دباا علاش زمرد مكاطلع فالدروج !!

الصورة : نور🦋■- قصة : °#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋
♡الجزء 17♡

■حُضنٌ واحد يا أمّي… وسأنسى أنّك تشبيهينَ السّبع العجاف ■

نعيمة ضوراات عينيها) عمري أنا سمعت بهاد فوبيا الدرج..

نور: كون كنتي كاتبحثي وكاتقرااي غاتعرفي ولكن نتي عمرك غاتعرفي شي حاجة..حيت ببساطة جاهلة حتى النخااع..

نعيمة ميقات فيها ) الجاهلة هي خالتك ..

نور ابتاسمات ) إيلا على لباطرونة دخالتي غاسبي مها ..

حفيظة شافت ف نعيمة) أنا سمعت بهاا..

(نعيمة خنزرات فيها وشافت ف نور لقااتها مبتاسمة بشر وكاتشوف فيها بنظرة لي نعيمة فسراتها على أنها كاتنعتها بالجهل..

حفيظة نطقات بتردد) فاش كنت ف لافاك كانت معانا واحد البنت ماعمرها حضراتها للدروس لي كايكونو فالقاعات لي فالطابق الثاني مع أنها كاتحضر لكااع الحصص الخرين.. وفاش سولناها قالت بلي عندها هاد الفوبيا وشرحات لينا عليها شويا وقالت بلي هاد فوبيا الدرج كاتختالف حدتها من شخص لشخص ٱخر..

نور حركات راسها بأه ونطقات) ااه عندها الحق لي كايعانيو من هاد الفوبيا مكايتساواوش فدرجة الحدة.. ولكن زمرد الفوبيا عندها #حادة…

(نعيمة خنزرات ف حفيظة ومشافتش مزال ف نور حيت مارضاتش.. وجلسات بلاصتها كاتخدم بالماشين ديالها د لومبالاج مفقووصة.. من نهار خدمات زمرد فهاد الشركة وهي مكاتحملهاش حيت بشخصيتها كسبات محبة كاع لي ضايرين بها كايعزوها وفاش كاتهضر كولشي كايتصنت ليها.. على عكسها هي لي تاحد مامسوق ليها ومنخلينها.. نعيمة تاهي خدمات فهاد الشركة فنفس الوقت مع زمرد أي قبل عامين وهي كبر من زمرد فالعمر.. طامعة طلع فبوسطها باش تزادها الخلصة ولكن بقات حاصلة فلومبالاج… وزمرد معاها فنفس البوسط ولكن المدير فضلها على نعيمة بفظل جديتها فالعمل ..فا اضطالع على السيفي ديالها ولقا أنها عندها خبرة فالميناج بحيث اغلب لخدامي لي خدماتهم منلي كانت عندها 15 سنة كانو عندهم علاقة بالميناج الشيء لي خلاه يقتارح عليها تدخل ل إيكيب د الميناج ديال لي ماشين لي كايتخلصو كثر ولكن زمرد رفضاتو وبررات موقفها بالفوبيا ديالها لي كاتعاني منهاا…

حفيظة حتى هي شافت قدامها خدامة ومرة مرة كاتشوف بجنب عينها ف نعيمة لي حداها ولي كاتبان بركان على وشك الانفجار.. بقات نور واقفة كاتشوف ف نعيمة مخنزرة تا بانت ليها زمرد جاية ناحيتها هازة كارطونة فيدها.. …. وهنا
غانرجعو لدقائق قبل.. وبالضبط فاش مشات زمرد للديبو.. لي كان عبارة عن غرفة واااسعة فنفس الطابق الاول ديال الشركة … غرفة كبييرة .. عاامرة بالكرااطن مستفين شي فوق شي وبرامل كباار عامرين بالسلع كذلك…

زمرد دخلات وبقاات كاتقلب على شي كارطونة خاوية.. بقات كاتقيس فالكرااطن ولي لقاتهم عامرين كاتفوتهم.. تا وصلات كارطونة حركاتها لقاتها خااوية غي هزاتها من بلاصتها وهو ينقز عليها فار… الشيء لي خلاها تغووت وطاحت للارض فمها بيض وصفاارت بالخلعة … اللون هرب من وجهها وهي مخرجة عينيها كاتشوف فداك الفار لي هرب وتخبى خلف ل كراطن بعيييد عليها..

بقات كاتنفس بجههد وحطات يدها على صدرها لقاات قلبها كايضرب بسرعة تخلعات لدرجة جاتها البكية ..عينيها عمرو دموع وهي كاتتفكر كل ماوقع معاها هاذ الصباح ..من كلامها مع رشيد حتى للخلعة لي دارليها لمعطي ..عاد خوفها من درج الباص …ودابا الفار …كولشي تجمع عليها بزز هدنات راسها ….. جات تنوض يلاه وقفات وفشلو عليها رجليها ورجعات جالسة بقات هكاك جالسة لدقائق كاترد النفس فيهااا تاحسات براسها تهدنات…ابتاسمات بوجهها عكس الحزن الكبير لي داخلها ….وقفاات مرة اخرى وكاتشوف جنابها لايخرج ليها شي فار اخر مشات كاتجري هربات خارجة من داك الديبو وهي هازة الكارطونة فيدهاا….وقفات ومسحات أطراف عيونها الدامعة …خنزرات عاد تحركات قاصدة بوسطهاا …فاش قربات توصل ليها بانتليها نور واقفة دايرة يديها فجنابها كاتشوف قدامهااا ومخنزرة.. زمرد وقفات عليها حطات الكارطونة على الارض ونطقات…

زمرد: أش وااقع ! أماالكي على تخنزيير !!

(نعيمة لي كانت خدامة غير سمعات صوت زمرد حبسات شويا عاد كملات الخدمة بفقصة وكايتسمع تقرقييب دياال الماشين باش خداامة.. …نور شافت فزمرد لي نطقات)

زمرد: آشنو واقع مالكي ؟

نور : واالو هزي خدمي الماشين ديالك..أنا نضور نجمع الديشي …

(زمرد جلسات بلاصتها وطلعات الكمامة كاتخدم.. في حين نور هزات الكرطونة وبدات ضور على كل ليماشين دقسمهم )

{{ 🖇️#توضــــــيـح:🖇️

#فوبيا_الدرج كاينة فالواقع ماشي مكايناش و#لكن ممكن ماتكونش حادة لديك الدرجة.. ممكن يكون وصفنا ليها #مبالغ فيه وهادشي درناه #تماشيا مع #أحداث القصة….. }}

الصورة : نور🦋■- قصة : °#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋
♡الجزء 18 ♡

■حُضنٌ واحد يا أمّي… وسأنسى أنّك تشبيهينَ السّبع العجاف ■

•••دااز الوقت وصلات الساعة الثالثة والنصف بعد الزوال.. و فالشركة ديال فلاش أي واحد كان خدام حبس حيت هذا هو الوقت لي كايتوجهو فيه للمطعم باش يتغذااو.. نوور شافت ف زمرد لي كاتمد يديها وكاتحركهم عياات بالخدمة..

نور: اش نجيب ليك معايا ؟

زمرد شافت فيها ديك نظرة ديال واش من نيتك) ابحالا عندنا الاختيار باش نختارو لي بغينا ناكلوها.. أجيبي لي كااان لي درتيها فطبسيلك جيبيلي منهاا …

(نور حركات راسهاا ومدات يدها بسطاتها قداام زمرد لي كاتشووف فيهاا ونور كاتشير ليها بعينيها ليدهاا.. زمرد تاهي كاتسولهاا غابعينيها اش بغات.. وبدااو كايتحاورو غا بعينيهم هادي تشير ليدها والاخرى كاتسولها بقااو هكاك تاغوتات نوور..

نور كاتغوت) أحطي خمسة دراهم ينعل طبااسلك دايرة راسك مفاهماش اش كانقووول..

زمرد هزات يدها كاتحك بها راسها وبابتسامة غبية نطقات) ماتخلصيش على ختك زعما !!

نور مزالها مادة يدها) بغيتي تغذااي أراي خمسة دراهم ماحطيتيهاش بقااي بالجوع..

زمرد بسرعة شدات يد نور كاترغب فيها) حمييمتك قبل مانجي كليت غاخبييزة بايتة ودرت فيها سريدينة وكرشي دبا كاتصفر بالجووووع (كاتشوف فيها بعينيها لي لونهم قهوي غامض وكاترمش بهم بنظرة بريييئة) خلصي على ختك ونردها ليك فساعة الخيير..

نور : لا أراي لبادج ديالك غانقطع ليك بيه بلا(طبق) دلغذا تايقطعوهالك من لخلصة …

زمرد : لا بغيت لخلصة توصلني كاملة فا بلاش وعقلي فيها ..

نور جرات يدها عندها) ييخخ التريكة الناقصة غاعينيك الصغيورين الفنيونين لي شفعو ليك اما بربي مانزيد درهم على خمسطاش درهم لي كانتسالك..

زمرد كاتمسكن وهي كاترمش بعينيها ورموشهاا الكثار) اراه كانت عندي غا ربعة دراهم وخلصت بها الطوبيس.. ندير لباس ونولي نخلص علييك..

نور ميقات فيها) عولناا بكري لاتسنيناك ديري لباااس وجهك غااا د الفقر…وسرررك كاتكملي الشهر بلحزاق ونتي كاع خلصتك كاتشري بيها لمك مينة اش خاسها وطلعي نتي الصبع دابا

زمرد : وداابا بلا ماتبداي نفس الديسك ..(هزاات يدها كاتشير لوجهها) ودخلنا عليييك بالله واااش هاااد الوجه د الفقر !!

نور: احم احم دبا هاد الوجه المدور الكيوت ماااشي د الفقر ااه ولكن حيت نتي مولاتو يصلاح يكون غا د الفقر فهمتيني ألمنحوسة ؟

زمرد : فهمت ألي زهرها كيهرس لحجر ..نوضي نووضي راه كلنا فالهوا سوى

نور وقفاات من بلاصتها) نمشي نجيب الغذاا حسن قبل ما نلقاو النااس تغذااو وسالاو ويشيط لينااا غا الرييح راه تانا ميتة بالجووع..

(ومع كملات كلامها ناضت مشات كاتجري في اتجااه الدروج لي كانو اونفاص مع باب د الشركة باش طلع للطابق الثاني فين كاين المطعم.. زمرد تبعات ليها العين تاغبراات وهي كاضحك عليهاا عاد رجعات كاتماصي يديهاا ورجليها….
وماشي بزااف د الوقت بانت ليها نور راجعة هازة معاها بلاطو حاطة فيه جوج طباسل فيهم فكل واحد طرييف د اللحم مع المرقة مع جوج خبزات صغار للوحدة طبسيل شلاضة للوحدة مع تفاحة وموزة للوحدة .. حطاتو فوق الطاولة ديالها غسلو يديهم وجلسو كايتغذاو..

نور شافت ف زمرد وهي كاتمدغ) حگا تفكرت واش مزال باغة تاخذي تيليفون جديد ؟

زمرد: علاش ؟

نور: حيت منال الشاف د المطعم الفوق عندها واحد تيلي اوكازيون بغات تبيعو وانا سمعتها البارح فاش مشيت نجيب الغذا قالت للبنات شكون بغات تشريه من عندها… (شافت ف زمرد) اش بانليك تشريه نتي ؟

زمرد ساكتة كاتمدغ وكاتفكر فنفس الوقت تانطقات) راه كنت عوالة ناخذ تيليفون هاد شهر ولكن محال..

نور: علاش ؟

زمرد: بغيت نشري ماكينة د الصابون ل مي مينة..

نور يلاه جات تغمس الخبز فديك المريقة غا سمعات هضرة زمرد وهي تحط الخبز فالبلاطو بزعف وغوتات عليها) واااا ياااالاه هااااحنا فييه (غوتاات) واااش من نييييتك ؟ أجمعيي كرر..ك وااا جمعي فلووسك ..واش غير الخلصة د الشهر الفايت شريتي ليها تلفازة… ودبا كاتقولي غاتشري ليها ماكينة د الصابون ؟! واااش خدامة لراااسك ولا لمي مينة ؟

زمرد: راها مي مينة مسكينة عيات و التصبين باليدين كايعييها وعاد كاتصبن العرام د الحوايج…وشحال من مرة كنلقاها مصبنالي تاحوايجي

نور صعرات عليها) راه مك مينة عندها ولدها يمكن ؟؟ مالو داك الشمكار د المجيد مايمشيش يخدم ويشري ليها ونتي لي شديتيها كاتمشي تصرفيها عليهاا !🦋■- قصة : °#ثِقتِي_العَمْياءُ_بكَِ___أَبصَرت°
《بقلم》Chaymae Ouajdad
Fadma Raji🦋
♡الجزء 19 ♡
■حُضنٌ واحد يا أمّي… وسأنسى أنّك تشبيهينَ السّبع العجاف ■

نور صعرات عليها) راه مك مينة عندها ولدها يمكن ؟؟ مالو داك الشمكار د المجيد مايمشيش يخدم ويشري ليها ونتي لي شديتيها كاتمشي تصرفيها عليهاا !

زمرد: نور ماتبقايش تقولي هكا راه المرا عندها فضل كبير عليا ونتي عارفة هادشي… واش نسيتي بلي هادي 5 سنين ملي كاع البيبان تسدو فوجهي هي لي حلاتلي بابها.. شحال من شهر كانت كاتسمح ليا فالكرا فاش كريت عندها.. شحال من مرة كانت كاتوكلني فالوقت لي مكانلقى فيه مناكل.. وكون ماهي وولادها كون كلاوني ذياب هاد الدنياا.. نتي أ نور عارفة بلي فالوقت لي عائلتي لي من لحمي ودمي خالي وولادو مارحمونيش وماحنوش فيا لقيت الخير فيها هي لي برانية عليا.. وداك الشمكار علياش هضرتي كونما هو كون فاش هربت من تحرش خالي وولادو غانطيح فتحرش ولاد الكاريان هو لي حماني منهم وداني عند مو مينة لي رحبات بيا بلا ماتسولني لا شكون انا لا منين جيت لا علاش جيت بالعكس هي غي شافتني دخلاتني لدارها وكراتلي البيت لي مورا البراكة ديالها وتهلات فيا بلا ماتسنى مني المقابل… خير ديك المرا أ نور عليا عمرني ننساه واخا مانعرف شنو نشري ليها ولا شنو ندير ليها راه عمري ننسا ليها خيرها… والشمكار دولدها لي كاتهضري عليه شحال وأنا ساكنة عندهم عمرو ولو مرة وحدة شاف فيا شووفة ناقصة عكس خاالي لي من لحمي ودمي هو وولادو لي كانو غايتكرفصو عليا…

نور تنهدات ) : أنا عارفة هادشي أختي عااارفااه راك معاودالي كلشي.. ولكن أزمرد خاصك تفكري شوياا فرااااسك الناس راه كايخدمو باش يزيدو للقدام.. نتي بلاصة ماتجمعي فلوسك وتجي تكري معايا جالسة كاتصرفيهم على غيرك ونتي مليوحة فديك البراكة لي كاتموتي فيها غا بالصهد فالصيف وبالبرد فالشتا وباش تجي تخدمي كاضربي طواالة د الطرييق بحالا كاتسافري وفاللخر داكشي لي كاتصوري كاتمشي تعطيه لمينة وولادها لي لمخير فيهم قدو قد البغل ومكايخسر تا ريال على مو ونتي لي مكاتجيهااش كاتصرفي عليها فلوسك كلهم باااازليك والله..

زمرد متجاهلة هضرة نور) عرفتي أختي شنو سالي غذاك وطلعي الطباسل للمطعم باش نرجعو لخدمتنا..

نور: والله مانخليك تشري هاد الماكينة هاد المرة تسبقي راااسك هو اللول.. غي تخلصي هاد الشهر غاتشري تيليفون من عند الشاف منال عاد شهر الجاي خدمي وشري لمك مينة ماكينة د الصابون ولا شري ليها تا طيارة…

زمرد: نسبق ماكينة د الصابون عاد نشوف تيليفون وانا نعدي بداك لي عندي هاد الشهر..

نور: شنو عندك أختي شنو عندك ؟ لابغيت نقوليك ونعاودليك شي حاجة خاصني نتسنى تاااانتلاقى بك عاد نقولوليك.. علاش ؟ حيت عندك واحد تيليفون من زيناتو مسكيييين مخرشش مكايشد ليك لا ريزو لا انترنيت.. دبا غي قوليلي واش كاينة شي وحدة ف 2022 ماعندهاش واطساب ؟

زمرد: وصااافي… مهم تانشووف مع لمجيد لكان ايتعاون معايا ويعطي نص راه انعطي غا نص ونشريو الماكينة وداكشي لي بقا ليا ناخذ به تيلي اوكازيون..

نور: وإييلا ماتعاونش ؟■تتمة الجزء 19 ■
نور: وإييلا ماتعاونش ؟

زمرد: اييواااا الا ماتعاونش راه غانشري الماكينة بوحدي…

نور نطقاات بزعف) خريتيييييي اصاااااحبتيي بهااااد الهضرة والله واعيقتيييييييي كاااااع اااوو ..

زمرد كاتحاول تبردها) واخا واخاا راه غاانشووف يكوون خيييير غاتهدني وكملي غذاك..

نور: شباااااااااااااعت انا صااااافي..

زمرد: هااء ! صافي تانا شبعت غا دي طباسل ديييهم …

نور: تفوو على ماركة من صباح وانا كانطبخ وجايا كاتقولي ني ني غانشري الماكينة بوحدي…

زمرد: أبرديييي ياااااء بردي رااه غانشوف مع لمجيد مسكين راه واخا هكاك كايراعي وغايخلص النص واخا يخلص غا بالكريدي…

نور ميقات فيها) واخاا هاحنا غانشوف..

زمرد: حم (جمعات طباسل فالبلاطو وحطات فيه شياطة د الخبز) هاكي دي هااادو ورجعي نكملو الخدمة..

نور شداتهم من عندها ورجعات البلاطو بطباسلو للمطعم.. عاد رجعات عند زمرد يكملو خدمتهم فنفس الوقت لي باقي العمال كل واحد رجع للبوسط دياالو..

….ومادازت حتى عشرة دقايق تا وقف عليهم الشاف د القسم ديال لومبالاج وهاز فيدو ورقة…

الشاف غووت ) انتباه …سمعوني واحد دقيقة عاد كملو خدمتكم..

((كل عمال القسم حبسو من الخدمة وشافو فيه مركزين معاه..)

الشاف: بالنسبة لهاذ الدفعة لي كاتخدموها دابا ديال كوموند لي ماكثيراش بزااف قلنا نسبقوها نحيدوها عليناا (سكت شوياا وكاع لي خدامين فلومبالاج شي كايشوف فشي عاد هو كمل هضرتو) المهم فالصباح راه جاتنا كوموند جديدة ومستعجلة يعني الخدمة غاضوبل فا لي بغا فيكم يزيد السوايع فالخدمة د هاد الكوموند غاتزادو 150 درهم للساعة حيت هاد الكوموند مهمة بزااف ومربحة للشركة..وخاسنا نسلموها قظرف 43 ساعة (سكت عاوتاني شوياا والعمال شي ضاحك راضي بها وشي كايعاود الحسابات فراسو حيت من قبل فاش كانو كايزيدو السوايع كاتزادهم غا 100 درهم للساعة بالنسبة للخدمة د الليل.. الشاف دلومبالاج كمل هضرتو ونطق) المهم لي غايزيد السوايع يسجل سميتوو فهاد الورقة (هز قدامهم الورقة لي كانت ف يدو) وغايخدم وقت إظافي هاذ الليلة …ولي مابغاش غايخرج فالوقت المعتاد لي هو 10 دالليل ..فا دوزو هاد الورقة بيناتكم واحد عشرة دقايق ونرجع نديها..

(مد الورقة لأول طاولة جات قدامو فاش كانت واحد البنت شداتها من عندو وهو مشاا.. هي سجلات سميتها ودوزاتها لي حداهاا.. وبقااو هكاك كايدوزوها بيناتهم تاوصلات لطاولة نور وزمرد)…يتبع

Leave a comment