Skip links

قصة : نور الياسين جزء 60

 28,805 عدد مشاهداات

🦋نور_الياسين(1129)#فرصة_ثانيةsana mina🐺🦋
بقا موسى كيبلق فعينيه …عارفو هبيل من هضرة رميساء عليه فاش طورات علاقتهم من بعد السوء الفهم الي كان وقع على اثرو عرف موسى ان كلاديس هي الي دازت لتيليفونو وجاوبتها على الميساجات وبمساعدة واحد الفام دميناج ديال المشفى تما فليل مغربية هي الي عاونتها حتى انها هي كتبات ليها حيث موسى تيليفونو مدايرش ليه الكود لانه ببساطة رجل بعقلو معندوش مع الكود فالتيليفون ممساليش باش يدير شي كود ولا يبقا راد بالو مع التيليفونات الشي الي سهل على گلاديس تا دخلات لفيس بفضول تعرف البنت الي شغلات تفكير موسى واخا عارفة انها علاقتها بيه غاتسالي فاي لحضة غايبغي ينوي زواج حيث السيد العمر ديالو كبر وناقوس الخطر بدا كيدق عندها واخا عارفة. ومنتاضرة …
#فلاش_باك…
موسى”ملي عرف بشنو دارت…مزير على سنانو” : مليكة “الفام دميناج ” صاحبتك ؟
گلاديس”كتشوف بعينين مغرغرين” : وي
موسى : صاحبتك بزاف ياك ؟
كلاديس : وي مون بيستي …(زعما بيست فريند ديالها)…
موسى : ممم بيااان …الوغ الى بغيتي البيستي ديالك مايجريوش عليها وفوق من هادشي الى فات تا جراو عليها من هنا غانوصي لوديغيكتوغ دلوبيطال هنا يكتب ورقة بانها ماتلقاش خدمة واخا تبغي تدفع فبلايص اخرى …”ابتاسم بغيض كيشوف فيها بواحد نضرة هي عارفاها” الوغ ؟
كلاديس : جو سوي ديزولي موسى …”حبست البكية ” انا الي قلت ليها وانا نتحمل …
موسى : علاقتنا هنا سالات دوموزيل …نتي عارفة كانت غاتسالي فاي لحضة من شحال هادي …مابغيتش نقولها بهاد طريقة ولكن نتي صورتك واحترامي ليك خسرتيه بهاد تصرف كنتي بعقلك …”هز ايدو وشير ليها الي دموعها نزلو ومسحتهم بالخف” تقدري تمشي …الدار غير بقاي فيها غادي نرجع لداري لولة …
كلاديس : داكوغ “حدرات راسها ومشات ماتلفتاتش جيهتو …هاديك مشيتها سنات على كونجي شهر ومشات سافرت باش تزجع وتحول لمشفى اخر بطلب منها ” …
تنهد وبقا شحال كيفكر تا ابتاسم فاش تفكر رميساء الي صعرات عليه وكيفاش صعرتها هبيلة ….بقات العلاقة عادية ماشي ضاصرة عليه ومضاصرش عليها وبحكم السن ديالو …كل نهار تقريبا كيهضرو الا اذا غاب شي اسبوع الي هو داك الاسبوع فاش مشا لافريقيا لبعتة عمل ومؤتمر….
#عودة_من_فلاش_باك…
موسى”جاتو ضحكة من هضرته” : هههههه ياك اسي السباعي …
صهيب “كان بغا يكمل غا نغزو يوسف من لور يتوگض ” : احم ههههه غاتنبسط مع ولدي …ماعلينا مرحبا ولدي مرحبا ..نوصل نعلم خويا نشوفو الوقيتة الي غانكونو فيها تما حيث مزال شي شوي مع ياسين تزادت عندو تريبية ومدهيين معاه …
موسى : مبروووك يتربى فعزكم …”شاف فساعتو” وخا ان شاء الله انا باقي هنا شي شهر هكاك بحول الله …
قطع معاه من بعد ماسلاو الهضرة وضار صهيب عاود ليهم فهمهم مزيان شنو قاليه وشنو كاين …
يوسف : ومالك خضر وهبيل مالك ؟
الياس : رديتي البنت معاقة كاع من نيتك ؟
صهيب “مارضاش” : واااصدمني دخل فالموضوع طول وعرض …
يوسف : عادي مالو اش بغيتيه يعلمك ؟ ناس فاش تبغي تخطب كيقولو اش كاين ولا طالبين ضيف الله وسيد باقي صغير باش يقول هضرة كبيرة …
الياس : جاه نيشان وصافي …
صهيب : وصدمني اصحبي بغا بنتي لزواج !!
يوسف : ومالها ماتستاهلش ؟ يتمناها الف واحد حسن منو كاااع …
صهيب : ماقلنشاي غير هو عرفتو غير بروفيسور وصافي مضنيتش يخطب بنتي يعني مفاجئة وصافي اما بنتي را ميستاهلها حد حيث ثمينة الي نعطيها ليه يديرها فعينيه واخا يعطيني كلمة رجال منتيقش …تانا بنتي را نخشيشتي يحساب ليك غا انت …
الياس : امممم مايتيقشاي …”شاف فيوسف من مراية وضحك” عههههههه
يوسف : صهيب …
صهيب : اش بغيتي …
يوسف : واش خايف على بنتك ولا مراضيش تزوجها باش متولدش وتولي جد ؟
صهيب “بدا يلولب فعينيه” : ياعوذ بالله وتبقى بايرة ؟ الا لا لا را بنتي ميعرف ليها حد من غيري انا باها وخوها وميمتها …وكيييييه …
يوسف : مممممم
الياس”خبط ليه فوق فخدو تا تهز وتحط” : اولله مراضي تجوجها باش متولدش وتولي جد ويعيطو ليك ولادها …باسيدي با سيدي …
صهيب : ابا موك …
يوسف : المسخ لمسخ …كي شتي بلا متولد غاتبقا شباب انت ؟!
صهيب : شباااااب شباب تا شاط الضحكة هي هي والبسمة تحنت عشرة وسوفل يضرب فعشرة …تالموطور…”حبس كان غايتحمس ههه” هنن
يوسف : العيب والشيب والله يتبقي ستر وكان …
الياس : قد ماجلستي تجوجهم اودي اصهيب …واخا يولدو وتولي جد را نعمة سىل يوسف على نعمة الي عندو ولله الحمد …
يوسف : هاااححخ على حفايدي نهزهم نهرب بيهم ليجعلهم ميقولو تا مي لالة…
صهيب”حنحن بابتسامة” : ههههههه اودييي غانضحك غا فاجئني وصافي …الى فالنصيب علاش لا المهم غير يتهلى ليا فيها را صبارة بزاف كتسمعها فوجهها ومكتهضرش شلا معايرناها ومدرنا مكتردش الهضرة براكة عليا غير قرات ووصلات مزيان الله يرضي عليها را عيني هاديك وكبدتي منقدرش نفرط فيها بغيت غير الي يتهلى فيها حسن مني ونكون هاني عليها…
الياس : اجي نسولك وكون بغا علي يتزوج اش تقول من تمشي تخطب ليه ؟
يوسف : خضر هروي هاعلاش فؤاد خاص يكون حاضر اما لا جات عليه ينطق منعرف اشمن عجب غايخرج فيه …
صهيب : لاش علي يتزوج وهو عاجز مسيكين ميقدرش يجيب ولاد …”هز عينيه لفوق ورجع شاف فيهم وبدا يفرنس”
#يتبع…🦋نور_الياسين(1130)#فرصة_ثانيةsana mina🐺🦋
الغذ ليه فالصباح قبل ميدخلو عندها دخلات لطواليط على اساس تبول حتى كيف كنقولو جاب الله تيسير وتنفسات وبهاكا تقدر تشرب الما ولا تاكل لكن غير الاكل الي مفيهش الغاز ولا الي يدير القبط …داكشي باش غايركزو ليها على صوبات بخضر خالية من الغازات …
دوزات ايامها فالمصحة الي قدمات ليها افضل رعاية طبعا كتخلص را يتهلاو فيك شيء طبيعي …دوزات خمس ايام خمس كيف اي نافسة ولدات …حتى تسمح ليها بالخروج وعطاوها كتيب موعد تلاقيح البنيات الي غايكون بعد خمسة عشر يوم …قادو البنيات فكوناتهم كل وحدة فكونة ديالها جداد من Chicco …غطاوهم ….
ياسين”شاد فنوار تا جلسات فكرسي متحرك” : مشينا ؟
نوار”ضارت تشوف فجنابها ” : فيه شامة وزينة ؟
ياسين : تخطفو …
نوار : ههههههه كتضحك “شافتو شاف فيها بمعنى من نيتك هاد سؤال” هههه نسول على بناتي منسولش …
ياسين : مشا الوليد ويوسف داوهم لتحت بينما هبطنا …”باسها فراسها” الحنانة ومعامن جات …
توجه بيها ناحية المصعد ونزلو لتحت خرجو لقاو يوسف وفؤاد دخلو البنيات حطوهم لور وقادو ليهم بلايصهم معاهم يسرى وسارة الي جات بلاصة يامنة الي بقات كتوجد فالفيرما لاستقبالهم …وصلها تالطوموبيل ديالو وركبها لقدام وركب هو ناحية القيادة وفؤاد ويوسف فطوموبيل لاخرا …
ياسين”شاف فالمرايا” : نعسو ؟
سارة : هاد ساعة ناعسات ساعة اخرى الله معاك ههههه
نوار : علاش ؟
يسرى : تعاودي ترضعي تاني هههه كل ساعتين نسيتي ولا مالك …
نوار”غمضات عينيها تفكرت صدرها الي تفلح ليها بالرضاعة كل مكيجرو كيجرو ليها عينيها”
يالي خلاوها هما هاد ساعة راهم ناعسات وبقاو ناعسات تا شدو طريق بالخاطر وصلو لفيرما ودخلو لداخل لقاو فالباب كل من يامنة ونجوى وهاجر ورميساء وجدات نوار …غير وقفات طوموبيل ضارو وخرجو البنيات هازينهم باش يدخلو لدار باهم وامهم ودارهم نيت …
مصطفى “بابتسامة فرحان بدارو الي كبرات وكتر فيها النفوس” : تبااارك الله تبارك الله “باسهم بين عويناتهم حاس بعينيه مدمعين تا قشعوهم وخصوصا يامنة الي عينيها غرغرو “
يامنة : بااا …
مصطفى”نزلات دمعة سررر على حنكو” : عمرتو عليا ولدي عمرتو عليا من بعد ما كانت دويرتي فيها غا الحاجة زينة ويامنة بنتي …
يامنة”تفكرات فاش كانت غير هي وهو وزينة …ايام كانت تجي من مدرسة وتوجد الغذا وتفيق لفجر توجد الفطور قبل متمشي تقرا …الزنگ الي كانو عايشين تحت منو وقطرات الما ديال شتا كيدخل عليهم لدار يعمرها وتضطر بايدياتها صغار تسدو تايبردو عليها بالكز والسمرة …حتى تزوجات ولدات وواحد من
ولادها الي هو بكرها رجع عاش مع باها رباه وعمر عليه هاهو تزوج وتزادوه نفوس وعمرات دار وبسبابو تا تنورات دارو وكبرات …وهاعلاش كيف قالت يامنة ” : نورالياسين …
ياسين”هز فيها عينيه وغمضهم بمعنى سمعتك ورجع شاف فجدو ومشا لعندو قبط ايديه بزوج باسهم وباس راسو بحب” : النور نورك ابا لا خطيتينا خطاتنا البركة …طول ربي فعمرك وتشوف ولاد ولادي ان شاء الله …
مصطفى : ههههه اودي غا من شفت ولاد ولاد بنتي هذاك رباح …الله يرضي عليك اولدي …”نوار قرب باس راسها وباست ليه ايدو” على سلامتك ابنتي يترباو فعزك …
نوار : اميين ابا فعزنا كاملين …
سلمو عليها وجات رميساء هازا طبسيل تمر معمر بالگركاع ولوز مداتو ليها هزات تميرة كلاتها وجات هاجر هازا بلاطو الحليب بما زهر هزات كاس شرباتو …
صفية : على سلامتك اماما ههههه
نوار : الله يسلمك احبيبتي …فين مينة والبقية ..
يامنة : كلشي لداخل فالصالونات بنتي دخلي ترتاحي …
يسرى : دخلي ترتاحي ماما باش فالعشية نسواني ليك لفتحة ..
حركات راسها وهي تدخل غير مدات رجلها ليمنى وهما يتطلقو زغاريت تا قفزو دراري لداخل كان ايساف والحبيب الي سمع صوت وخرج هو وايساف لقاو نوار وياسين داخلين وهازين البنيات …هما كانو جاو قبل متخرج شافوها وسلمو عليهم ودابا فالدار باش يحضرو لصدقة الي غايديرو بالمناسبة ودبيحة ….
نوار”جلسات فالصالون بشوي ” : الله توحشت داري…
نجود : على سلامتك بنيتي …
جات نعيمة وفنيدة سلمو عليها وطلقوها بتزغريتة حااارة وجات صبيحة وام سارة وختها الي كانت فبني ملال تاهي …تجمعو العيالات فالصالون ورجال فالصالون لاخور …تحطو القصاري ديال هربر(قمح مفرتت طايب فالحليب) كملوه وحطو ليهم اتاي الي عمر بالطريقة تقليدية حطو المجامع وصواني تا طاب الما وعمروه فالصالون …اما البنيات طلعوهم جداياتهم لفوق بلايصهم وحطو لنوار لاباراي باش تسمعهم الى فاقو …ورجعو للمة العائلية …
اشرف”شاف فعلي” : فين داكشي انت ؟
علي : اش اش ؟ مدايرش بغيتي عمي فؤاد يعلقني …
اسامة : فين سليمان يهضر معاه يبغي حيث سليمان بعقلو …
اشرف : داك السكوتي يخرج منو العجب والله لا قالها …
ايساف”جا من وراهم” : اش يقول ؟
اسامة : نتااااا الي تحلها …شوف ياسين ميمكنش مايديرش سبوع لبناتو …
ايساف : را غايديرو ديك صدقة وناس الي جامع اش ؟
اشرف : هكاك حرفي ناشف ميدهنو تا بزويتة ؟
ايساف”صغر فيهم عينيه مزيااان ورجع شرعهم” : مكتوبوش ياك ؟ “عرفهم بغاو شيخات تاني” عمر شيخة ماتنسا هزة الكتف الله يمسخكم “ضرب فيهم وزاد”
اشرف “من وراه ” قالتها القحبااااو الي عمرها تنسا ااااحح …عندلمك ماتنفع ماضر كي حليب الحمارة …
#يتبع…🦋نور_الياسين(1131)#فرصة_ثانيةsana mina🐺🦋

تحل الباب ودخلات لبيتهم الي فرشوه مزيان وزادو فيه لمسة الطفولية …هاد المرة تزادو زوج كونات كل كونة مكتوبة فيها سمية البنية مغلفة …
نوار”دخلات بشوييي بحرا كتحرك وترمي الخطوة ماحليتها لفتحة ولا الغراز …تا عاونتها جلسات فوق ناموسية ” : يحفضك سمحي ليا عذبتك…
هاجر : وايلي تانتي هههه “مشات لكونات لقاتهم ناعسات وهضرات بصوت فحال الفحيح” ياختي على خالتو ناعسات …
نوار : مزياان يفيقو تاني يرضعو يدوزوها مني …
هاجر “قربات عندها” : باقي مجروح صذرك ؟ غسليه بصابون الكف مزيان ونشفيه ماديري والو باش ميدوزوهاش لفمهم غير صابون الكف زوييين ودغيا يبريه ليك …
..”يلاه بغات توقف حتى تحل الباب ودخل ياسين جاي باغي يبدل …شافتو هاجر وتبسمات حشمانة …”احم …
ياسين “حرك ليها راسو ” : ختي هاجر …”شاف فنوار” شوية ؟
نوار : شوية لقيتيني بغيت ندخل نبدل…
ياسين : اجي معايا …
هاجر : ههه صافي انا نزل لتحت …”حركات ليهم راسها وخرجات خلاتهم بزوج “
ياسين”مد ليها ايدو تا وقفات بشويي تابطات دراعو وتم غادي بيها” : رجع ليك صداع ؟
نوار : شوية صابرة ليه وصافي …”دخلات تا بدلات لتحت ونقات حالتها مزيان عاونها فينما تبغي تبدل يبدل ليها ويوضيها وخرجات معاه تا جلسات وجاب ليها ماتبدل بيجامتها …عاد مشا هو جبد تيشرت وشورط قصير …
نوار : خارج لتحت ؟
ياسين : بغيت نذبح دوك الحوالا وشي عجولا باش يتفرقو صدقة ولاخرين لطياب صدقة …
نوار : نعطيك تيليفوني عطيه لعلي ولا ايساف ولا اشرف مهم شي حد يصور بيه …
ياسين : دابا نشوف خلي عندك تيليفونك .”لبس ومشا جبد كلاكيطة تصبع ” رتاحي نتي ماحد نقيطات العسل ناعسين …رتاحي وعند راسك حلي المجر الي حدا راسك و هزي شي حاجة من تم …
نوار : هههه واخا …اجي عندي نشوف …
ياسين”رفع حاجبو من اش قالت اول مرة تقولها ” : هاهو لالة …”قرب عندها وشداتو من كول تيشرت وقرباتو ليها باستو فشنايفو بوسة مطولة تا صدماتو خصوصا عينيها فيهم واحد لمعة وفرحة حنييييييينة “
نوار : لهلا يخطيك عليا يا راجلي وبات بناتي …
ياسين”عاودها تاني تا شلقمها” : لهلا يخطيك نتي يا صبارة ديالي وحنانة بناتي “باس راسها” الله يرضي عليك …
لبس فرجليه وتوجه ناحية بناتو باسهم وسما عليهم وخلاها تكات وخرج نزل لتحت ديريكت مشا لورا لفيرما لقا فؤاد ويوسف والياس ودراري واقفين كيشدو مع سالم العجولة ولاخرين مع عبدو الحوالا …اول حاجة بدا ..
ياسين”قادو ليه الحولي لول وشدو من ذقنو جبدو وشد الموس ماااضي وكبييير سما الله باسم البنت الكبيرة هي لولة ضروري” : يا بسم الله بسم الله اسمها زينة زينة …”ودوز تدويزة وحدة خلا دمياتو تشرشر وهو كيخرخر،،عاود جابو ليه الحولي الثاني …وعاود ” بسم الله يا بسم الله اسمها شامة شاامة …”دوز تدويزة وحدة خلاه يشرشر بدماياتو …”
…وصلو لحوالا تانيين وعطا لفؤاد الي يدوز عليه وبالفعل سما الله ودوز وتاني عطاه ليوسف تاهو يدوز عليه ومد الجنوي لصهيب ….
صهيب : غا بالصحة ولدي راني مريض فيا القلب وسكار تنسخف …
ياسين”صغر غيه عينيه شحال “
صهيب: مالك شتك فحال تتحلف عليا شباس مكاين اودي ؟
ياسين”هز ايديه لفوق وحطهم” : الله اودي خوذ راحتك خود راحتك …جلس رتاح تما حدا با …
الياس : ياودي ياودي يالي بغا يتناسب عما قريب …
صهيب : مممم …
اشرف”شاد تيليفون ياسين كيصور بيه …حتى طلع ميساج من واتساب من نوار فيه ” : ياسين الى ساليتي انا كنتسناك باش تسواني ليا الغراز لتحت …”هادشي كااامل قراه اشرف الي خرج عينيه وهبط التيليفون بالدعقة نطق بجهد” ااااااويلي ويلي ويلي …
ياسين”ضار عندو” : شنو كاين ؟
اشرف “رجع تيليفون يصور” : هء ااا والو غير كنصور وشفت علي وداك هذاك …احم”صرط ريقو وفرنس ليه ” هههخه…
رجع ياسين يكمل مع العجل فالسليخ كيسلخوه فلارض ماشي معلق …اما صهيب وقف كيشوف فالحوالا تا بعد حدا دوك الي كيتسلخو معلقين وجا حداه يوسف …
صهيب : دابا هادو ديال سميات ؟
يوسف : ايه هادو ولاخرين على حساب طياب …اجي عيطتي لشركة لهيه ؟
صهيب : الحبيب سولتو قاليك يومين ويرجعو مهم مزيان تما حاط الي يحضي …
يوسف : تانا يسالي سبوع ونتحركو كل يقصد باب دارو رجع مرتي تاهي شتها نبتت ليا هنا …
صهيب : داكشي…ايييه ياليام ..”عوج فمو بضحكة كيشوف ففولات الحولي …” هههههه عرفتي اش تفكرت ؟
يوسف : اش ؟
صهيب”شير ليه جيهة الفولات وتفكر ايام ما نطق فسبوع زيادة ياسين وقال على الفولات كيشبهو لقلاوي فؤاد ” : ههههههه تعقل على هاد الفولات فاش قلت ليك يكونو قد دياول فؤاد الي لاصقين فيه “طرطق بالضحك” ههههههه ورا بصح كيجيوني غير قدهم ….
يوسف : هههه الله يمسخك فين شفتيهم نتا مالك هترتي …
صهيب : ومنعرف غا تفكرتهم وصافي هههه”ضرب على كتفو وجا يدور وهو يلقاه واقف خاشي ايديه فجياب سروال سورفيت وكيشووووف فيه رافع حاجبو ..” ياااااااااااربي نموت ياااااربي …”هز عينيه فيوسف خارجين بغا يمووووت ” لااااااه تمسخووووط لله تا مسخوط “كيبغي يطيح ويشدو يوسف الي فشل بالضحك”
يوسف : وغا تهدن ههههههههه “شاف ففؤاد الي حرك راسو بلا حول ولا قوة الا بالله ومشا” هههههه وصافي اصاحبي …
صهيب “طاح تمرمغ ليه تما تا جا الياس ميت بالضحك” : 34 عام باش يلاه تنسات هاني عاودتها….وييييييييييويويويويوو…
#تصبحن_على_خيييير…هادشي علاش قديت را كنت خارجة ومبغيتش نخليكم بلاش هههه …

اترك تعليقا