Skip links

قصة : حديث ومغزل كاملة

 926 عدد مشاهداات

✨ تــــــقــــديـــَــــم. ✨

إيوا يا بناتي قصصنا كتر فيهم العيب ، يعصا القليب ويعمر الجيب ، يولي الراجل يعلم القتيلة للربيب ،يضرب ويزكل ويصيب ،

هاد الزمان هو لي قالو عليه جدودنا ، الوقت لي النمل ياكل فيه النمل ، ينتاشر فيه المرض ويهمل ، المرأة تحكم والراجل يتبهدل ،
الدين يبيعوه ،والحرام يتبعوه ، والدري من صغرو فالفلوس يحمل ويكبر فالدل ،
مشا الحيا وقراءة القرآن ،ويكثرو الأديان ويقل الماء فالوديان ، ويتخالفو العرب مايبقالهم لا قيمة لا شان ،

البنت وسط الرجال تبرح ، وملي تعرف على شي حد مها لي تفرح ، والراجل يرجع كي لبنت يغني ويضبح ،

إيوا يا لالياتي ، ولدنا جيل مجلجل ، يقسم الخبز بالمنجل وياكل بالارطال ويشرب بالاسطال ، ويركد الليل وما طال ويقول مازال الحال !
هاد الجيل , ماكلتو نجارة ، ولبستو خسارة ،وهضرتو دسارة ،
الراجل يقلع العمامة ، والمرا تقلع الكمامة ، وسييييييري يا دنيا بسلامة

قالو جدودنا الحق يتشنق ، والباطل يسبق ، ولي يقول كلمة الحق يتسما حمق ، وانا إلا مادفعتونيش هنا نكعد تال صباح نحاجي ونقاقي بلا مايكمل صداقي ..

💜 صيامكم وقيامكم مقبول

✨حديث ومغزل✨
🌙️بقلم سمسم 🌙️
🌸الجزء1🌸

فصباح جديد من أيام الربيع خيوط الشميسة الرقيقة متخلخلة وسط فدان الذرة هدوء خفيف هو لي مخيم لكن وسط الفدان مخبعة بنت مورا سيقان ، كاضور فعينيها الكحلين من تحت لتامها ضحكة منها كافية تخلي الطير يتغزل فزينها تشبه لورد الريحان فجمالو ،إلا تبسمات نورها شمس يضوي لمكان، ويلا ضحكات دمها فالخد يبان ، ولايني فعايلها فعايل إبليس والشيطان ،بنت صغيرة قد كلة الميزان، ولسانها تطلب منو تسليم ولامان ،

باقا تشوف ليمن وليسر وتزيد للقدام ،خرجات من الفدان وزادت ثبتات ورزنات فمشيتها دخلات للكوري وهي طير على دجاج عيباد الله تنحي فيهم وتسرق فالبيض ،

سمعات مولات الدار الدجاج يقاقي نفضات يديها من القمح لي كانت سايرة تنقي فيه وهي تضرب طليلة للكوري قشعاتها تخوض فالدجاج عرفاتها هادي يامنة بنت رقية جنون ويطلبو منها تسليم خدات بلغتها وتبعاتها تجري وتقول شي ماجريتو

…. : أجي لهناا يا سراقت البيض ، والله أبنت رقية لابقات فيك يخليييك فالخلا

يامنة : الله يا ربي الله أيامنة إلا عندك شي رجلين عري عليهم إلا شداتني غاتخرج فيا حق داك الدجاج لي ريشت

باقيين كايتجاراو وسط الفدادن تا وصلات يامنة. لدارهم دغيا حيدات لتامها وهي دخل وتخشات وسط فراشها قبل تشوفها مها مدة قصيرة ووصلات مولات البيض تغوت وتنوح وتدق فلباب خرجات رقية تحل بسرعة وتحضر السلامة

رقية : أمالنا ألالة كلثوم صبحنا على الله ونبي رسول الله

كلثوم : علاه بنتك خلات فيها شي صباح ؟ غير بجقات عينيها وهي دوز للكوري ؟

رقية : ذكرنا السمن والعسل أينا وحدة فبناتي ؟

كلثوم : ديك الشيطانة ديامنة من نهار قالت واع عمر شمش طلعات فنهاري

رقية : شفت عيبك ولا قريب تعايري ليا فكبدتي فوجهي ؟

كلثوم : أنا كون كانت عندي شي كبدة بحالها نقطعها كديد عيطي ليها لهنا

وافيقو يا نعاسات 😂

🌙️حديث ومغزل🌙️
🌙️بقلم سمسم 🌙️
🌸الجزء 2🌸

يامنة : “خرجات لعندهم” سمعت يامنة يامنة الله إمن علينا بخيرو
كلثوم : لي تربات على القناعة ما تخاف منها ما تخاف عليها

يامنة : الزيت يخرج من الزيتونة،والصياد يفهم لغة الطير ،ولي مايخرج كلمتو موزونة ،يخليها في فمو خير

كلثوم : نربي الحناش والكلاب ولا نربي بنت ماتسواش

رقية : “عرات على يديها ” شفتيني ضريفة وضعيفة وحالي مافحالوش (نقزات على كلثوم وشداتها من راسها)ولايني لي جبد عرضي ما نبقا معاه عفيفة

كلسات رقية تريش فيها ويامنة مكمشة وراء الباب تتشفا فكلثوم شعلات العوافي ورجعات اللور تا بانت ليها بلي كلات خلا عشها عاد دارت صباعها فيديها وسارت تغوت

يامنة : وييك ويك اعباد الله شااي الله أقبيلة عبد القادر الجيلالي قاصدين معاونتكم والمقصود الله ولي قصد ربي عمرو مايخيب

كان سي التيباري سارح الغنم حتى سمع غوات يامنة زاد قرب وشاف العيالات كايتناتفو دخل بيناتهم تا فرقهم وحلفهم يصليو على النبي

يامنة : “كاتحلون ودايرا الدموع بالدفال ” إوا هانتا تشوف اعمي تيباري ماقدها لباطل لي رمات عليا وجات تبرد غدايدها فمي

تيباري : اش هادشي ألالة كلثوم ما بانو ليك غا هاد الوليات

يامنة : الفروج يا الفروج يا مول الأوقات الصحيحة ،لوكان تصلي وتصوم مادوز فيك الدبيحة

كلثوم : هادي راه شيطانة وياك تامن فيها ،رد بالك من محبتها الشارب والقلب هارب ،دابا فحضورك تتحب وفغيابك تشبع سب ، إوا يا رقية الله إخلف عليك ونتي يا تريكت إبليس خليتك لخالقك هو لي عارف ليك

رقية : إوا يا كلثوم لي عقدها بيديه يفكها بسنيه،

دخلات لدارها وكلثوم عاونها تيباري تا شقات طريقها لخربتها ويامنة ههه باقا مارتاحت لبسات خيمارها وغادة تشوف فين تشعل العوافي ما خلات دار ما خلات دوار لي شافها شادة تيقار ولي قربها تكويه كي المجمار…

🌸حديث ومغزل 🌸
🌙️بقلم سمسم 🌙️
🌸الجزء3🌸

إوا يا بناتي لي عندو لسانو نجاه من الخطية خلاتها قصة اللحلاحة والسحارة الله إذكرهم بخير ، أش جاب الصوف للحرير ،واش جاب الخيل للحمير ، النسر ملي يطير ، الدجاج يغير ، الله غالب ،واحد يطير وواحد يسير ، العودة عمرها ماتولد البعير ،والحوت عمرو ياكل الشعير ، والرخيس عمرو ينطق بالخير ،لوكان تلبسو الحرير ،
الملح يبنن الطعام والصح يبنن الكلام والرجلة افعال ماشي وشاام ،والسحار مادوز فيه تا سلام،

إوا فين خلينا يامنة قشعات عمارة اليتيم لي كايتسخر للناس لي فالدوار سارح البكر والغنم تحنحنات وتقادات فالوقفة إيوا هادي خدمة نقية ، بقات غادة لجيهتو وكاتهضر

يامنة : إيييه لوكان العيب فالجيب ،النعجة ما تخاف من الديب ،لي شراك بالفلوس عمرو مايكون ليك حبيب ،فالرخا قريب وفالمحنا يقولك راك غريب

عمارة : “ضار عندها” اصباح الخير والرباح

يامنة : “بدات تدمع وعطات لعمارة الخبز لي فيديها” هاك اعمارة ولا تردها فوجهي باينا فيك معدب مع البهايم ،ساير تقابل لي ماشي ديالك

عمارة : يامنة ؟ نتي فيعال الله

يامنة : أجي نسولك سي بوشعيب مريض ياك عليها خلاك تسرح ليه الغنم

عمارة : وراه مسكين شاد فراشو مايرمش مايتكلم

يامنة : أهاااه وديك مرتو كلثوم ولا ماعرت أش سماها الله خلات ليه جوج دراري واحد مقابل الزرع واحد يالاه صغير يترعرع

عمارة : أمالك تاتسولي باغا تصبحي ضرة لكلثوم ؟

يامنة : هانتا سمعني ونقي ودنيك ،أيام العز مشات ،واليوم الناس جياحو ،منهم العيالات قباحو وقلوبهم قساحو ،منهم تا رجال مقاماتهم طاحو حتى لحبيب يفكر غا فصلاحو ، وسي بوشعيب إلا مات الله إنجيه دابا أما من بعد راه كولنا ليها ، ولادو راهم يتعاركو كي الحناش ،يقسمو الأرض وعداوتهم ماتبراش ونتا لي تسرح ليهم فملكهم اليوم ، غدا مايعقلو عليك

يامنة واااحد الكدابة منها مكاين راها تربيت يدي 😇😂

💛حديث ومغزل 💛
🌙️بقلم سمسم 🌙️
🌸الجزء4🌸

عمارة : كلثوم خيرها سابق ،وسي بوشعيب خازن ليا رزقي فالمحابق

يامنة : هكاواا على المحابق راه آعطيهم لك تا لبراني ، عطاك شي نعجات شي بكيرات شي فديدنات زعما راه مخدمك من نهار ونتا صغير

عمارة : عطاني كلمتو بلي غايدير ليا رزقي بين ولادو فالورت

يامنة : أويلي حييي انا عارفاك نية والريح لي جا يديك هانتا أجي نديرو واحد الحيلة لمرت سي بوشعيب نشوفو واش هي بصح ماسة مخبية فنحاسة

عمارة : واخا اجي نجربوها ولي طلع معاه البرهان يمشي عليه لامان أما هي ؟

يامنة : راه كلثوم تعطيك عينيها وماتعطيكش نعجاتها راها علماتهم وحدة بوحدة باقا نعقل نهار ضاعت ليها البكرة خرجاتها لسي بوشعيب مسكين من عينيه ، إوا سمع اش غانديرو غاتعطيني نعجة نديها معايا نخبيها ونتا كمل السريح حتال العشية ودير راسك ماقلت والو ، أوا يا مولاي فالعشية فاش ترد الكسيبة سير عندها وقوليها راه توضرات ليك النعجة وماقدرتيش تلحقها طلعات ليك مع الجبل ونتا مريض مقادر على جرا

عمارة : اييه وهانتي غاتوشفي غاتسمحليا من بعد نرجع ليها النعجة

يامنة : الله يرضى عليك وهاني نتخير فشي نعيجة ونديها عندي للدار ودير لا عين شافت لا قلب وجع

تحزمات وترزمات وتخيرات فلالاهم دات النعجة السمينة والعاطية للعين وعينيها كايجريو بالسم جراتها معاها وهي تقصد دار لالة كلثوم دقات لباب بعدما دارت الدموع بالدفال غير حلات لباب وهيتنقز عنها تنق وتبوس

يامنة : الله اربي الله اخالتي هزيت نصلي واحد جوج ركعات وكملتهم غا بالبكا راك عارفاني عزيز عليا لبيض عليها هزيت وحيدة فالصباح

كلثوم : وحيدة ؟

يامنة : وعار الله لا ما سمحيلي ملي نشوف الخيل نبغي الركوب ،وملي نشوف الجنايز نبغي نتوب ،ملي نشوف الفتاين نبغي الهروب ،وملي نشوف البيض قلبي يذووب يذووب

🌙️حديث ومغزل 🌙️
💛بقلم سمسم 💛
🌸الجزء5🌸

كلثوم : ماعلينا الشهوة تغدر والحال مايشاور ،ماحدك صغيرة مسامحاك

يامنة : انا عارفا قلبك كبير بحالي ومعزتك عندي معالم بيها غير ربي لي خلقني نية وعزيز عليا الخير ماعرفت تا كيفاش غانقولك هاد الخبير
كلثوم : عارفا لي فقلبك على نيابك غا طلقي

يامنة : تانا تصدمت وقلت فراسي يامنة رجوع الله عمارة مايديرهاش ولايني كولشي باين اححح دموعي هبطو

كلثوم : تي دوي مال عمارة

يامنة : ما مالوش راهو صحة سلام ولكن نتي لي مالك نية ورزقك كايتكال بلا خبارك ، إوا هاد الصباح مشيت نطل عليه ندي ليه الخبز راك عارفاني عزيز عليا الخير وانا نلقاه كايتخير فالنعاج ويختار السمينة فيهم وداها لراس الجبل عقدها وخباها إوا وسمعتو فاش كان كايكلم واحد خونا فالله وقاليه بلي ليوم ناوي يشوي عليها ختار وتخير

كلثوم : لا لا عمارة مايديرهاش

يامنة : رجوع الله وهاد النعجة لي مورايا ديالمن ؟؟؟ قلبيها شوفي

قربات كلثوم لرجل النعجة لقاتها معلمة وعرفات بلي ديالها ولكن ماتيقاتش يامنة وخبراتها بلي عمارة واحد الشفيفير كاياكلهم فرزقهم وهي تمشي رمات الحطب للعافية وخلاتها تشعل بالشوي

إوا يا لالياتي ماديرو كيف يامنة لي تشم الريحة وماتعرف البنة ، تحكم بالمظهر بلا ماتعاشر الناس ، القناعة الدايمة كنز عمرو يفنى والذهب الحر عمرو ما يرجع نحاس ، العافية عافية عمرها ترجع جنة ولي يسمع لهضرة الناس عمرو يدير لاباس ،لي يتسنى حسن من لي يتمنى ، والمتمني حسن من لي قاطع الياس ، قولي الصح ونعسي بالهنا ، الكذوب والزور عمرهم يطلعوالساس ،الفتنة والزور يقلبو السفينة بحال حكاية الراعي والخماس ،كثرت الهم ماتعيشك غا فالغبينة ، وكثرت التخمام تولي وسواس ، ديها مني وصية مافيها باس ،

✨ فالمساء ✨

الشمس بدات تغرب والليل بدا يقرب ، وعمارة مرجع البكر والنعاج للكسيبة

🌙️حديث ومغزل 🌙️
🌹بقلم سمسم 🌹
🌸الجزء6🌸

الشمس بدات تغرب والليل بدا يقرب ، وعمارة مرجع البكر والنعاج للكسيبة عيط على كلثوم يجربها يشوف واش هضرة يامنة صحيحة ولا غير داويا بلا لجام

عمارة : “كايدق فالباب” مي كلثووم ، وااا مي كلثووم

كلثوم : هانا أوليدي غسل يديك واجي تشرب معانا اتاي

عمارة : الله إجعلو فميزانك مقبول واخا تربط لساني مالقيت مانقول

كلثوم : قول باسم الله ودوي

عمارة : واحد النعجة غفلاتني وهي تهرب لراس الجبل إيوا انا مريض مالحقتش نتبعها

كلثوم : “كاتحرك راسها بقلة حيلة” هااا يا شفار لصقتي الذهب غالي والشرف أغلى منو ، والحديد رخيس والخااااااين أرخس منو

عمارة : والاهيلا خلاتها بنت رقية المكسي بديال الناس عريان ،صمت وصمت وفطرت على نعجة يا تريكت القنب

كلثوم : يااك اعمارة مايبقا فالواد غييير الجبال لي مايتلاقاوش وانا لي بقا فيا غير النية العوجة لي درت فيك ، دوز على الواد الهرهار ومادوزش على الواد السكوتي ،شحال من سكوتي دمر الديار وشحال من هرهار عمرو كان غدار

عمارة : الحاصول السكات حكمة وتفرقو منو الحكايم وعتبة دارك عمري نجي ليها هايم

كل واحد فيهم عطا بظهرو للاخر ودايرين فبالهم بلي كلام يامنة صحيح الغدارة لي قلبات المحبة عداوة فرمشة عين ، الثور ملي يطيح يكثرو مواسو ، واللحم ملي يريح يهزوه ناسو ، الغدار ملي تقيمو يعلا ساسو ، ولي كبروه المحاين يشيب راسو ، ولي تعاونو فالحرث يهرب بفاسو ، دارت الدنيا والرجال راهم يتقاسو ،حتى الحمار سمح فحلاسو ، سي بوشعيب خانو عساسو ، والذيب راهو يتحكم ويتنوع فلباسو ، ودجاجة تشطح للديك ليلة عراسو ،

واقفا بعيد متخبية فستار الليل من مورا الشجرة كاتسمع فهضرتهم وغواتهم بتاسمات بحال الذيب الغدار وهي ترجع ملي قضات الغدار وصلات لدارهم لاحت بليزار لي لابسة وهي تربع فرجليها وكلسات تحاجي

🌙️حديث ومغزل 🌙️
🌹بقلم سمسم 🌹
🌸الجزء7🌸

يامنة : واا مي واا خدلج أجيو تسمعو الدوار مقلوب من راسو لساسو

رقية : “هزات العشا فيديها ” تي فين كنتي تا طاح الليل

يامنة : كنت تانجمع فالخبير ، وانا لي فرقت الجوقة قبل يطيح الروح ، راه كانقول ليكم أنا بجوادي ديما ربي تايحطني نحل لمصايب بحال السمن على العسل

رقية : بنتي خدوج اجي تعشاي ، ونتي دوي خلاص اش صرا وجرا

يامنة : ياك أمي تانقول ليك بلي كلثوم هبيلة شتي اش دارت ليوم ولالا ، جرات على عمارة وقالت ليه عمرك تعاود تعتب باب داري إوا ليتيم مسكين مشا اش إيدير

رقية : “ضربات فخاضها بيديها” اويلي حاااي اش دار ؟

يامنة : علاما سمعت بلي سي بوشعيب كايتسافط مع عزراين إوا وخافت كلثوم لا يدخل معاهم عمارة فالورث وناضت جرات عليه وقالت ليه بلي نتا سراق نعاج ، اييييه

رقية : “تأثرات وبدات تدمع ” اييوا يا عمارة مسيكين ،لي بغا يربح العام طويل ،مايبكيك غير شفرك ، ومايحكليك غير ضفرك ، ومايهزك غير رجلك

بقات يامنة كاتشوف فالطبلة معجبة ووجها معبس
يامنة : مي ؟ فين لبيض ؟

رقية : هاختك كاطيبو ، الله إطيب ليك الجناب

يامنة : شتي أمي راه قلت ليك أنا بجوادي ويلا بغيتي نعيشك فالزهو حطيني فشي كوري دالبيض ونسايني ، امممممم

رقية : نوضي سوسي جنابك اشمن كوري حمدي الله لقيتي لخبز لي ربا ليك الركابي

دخلات مع الباب بنت مرزنة فمشيتها حروفها الغجريين كايشبهو ليامنة مكحلة بالكحل والسواك دايراه فمها

يامنة : “بمكر” خاصك غا السواك يا عوجة الحناك
خدلج : ماعرفت أمي أشمن خطية درتي حتى رزقك الله بهاد الخليقة

رقية : أجي أخديديج يا مولات السوالف ،”كاتغزل فيها ” هاي هاي على بنتي غاتولي عروسة

يامنة : عروسة ؟ “قالت بينها وبين راسها هادي خدمة نقية”
يامنة : واقيلا سمعت شي هضرة واقيلا واقيلا صماكيت بلاتي نسمع لجواد

🌙️حديث ومغزل 🌙️
🌹بقلم أسماء 🌹
🌸الجزء8🌸

يامنة : واقيلا سمعت شي هضرة واقيلا واقيلا صماكيت بلاتي نسمع لجوادي اش قال (سكتات شوية) زوااج ؟؟ العرس ؟؟ ميي ياكما تخالطو عليك العرارم وباغا تعرسي فآخر يامك ؟؟؟

خدلج : “هازة حاجب ومنزلة لاخر” أنا لي جاو فيا الخطاب وغانتزوج بولد الفقيه

يامنة : داكشي بقا لينا غير الفقهة .. نفطرو بالجنون ونتعشاو بيهم وانا مي ماتزوجينيش ؟

رقية : كاين لي خطبك وقلنا ليه لا ؟

( خدلج هو تصغير لإسم خدوج نعود )

يامنة : “كحزات عند خدلج وشدات يديها ” أش يسوى الليل بلا قمر ، واش يسوا العود بلا وتر ، واش تسوى العين بلا بصر ، واش تسوا الدنيا بلا صبر ، صبرتي وربي جازاك وان شاء نتبعك عن قريب القريب ولكن انا مانخليش مي بوحدها واخا يجي سلطان القبيلة يبوس رجلي مانخليش رقية بوحدها ،

رقية : “عرفاتها غير تاحراميات دياولها هادو ” إوا الله إكتر من متالك

يامنة : السما إلا طاحت شكون يبنيها ؟ والبحر ألا نشف شكون يسقيه ؟ السلطان إلا فقر شكون يغنيه ؟ والحبيب إلا غضب شكون يرضيه ؟ ومي إلا مات شكون يحيها ؟؟

خدلج : “خنزرات فيها” من فمك لقاع البير الله إطول فعمرها

رقية : هانتي تشوفي فالعافية كاتفكر لموتي وانا باقا حية

يامنة : “بدات تلحلح وتبكي وتاكل ” سولوني عليك أخدلج وزادو فالسوال ، ومن كثرة سوالهم شداتني الغيرة ،ماخلاو فيك مايتقال ،قالو خدوج بنت سيد الرجال، وبنت الدار الكبيرة ، ماشاء الله إية فالجمال ، وتريبيتها مجبودة على كل سيرة ،عيونها سحارة وبسمتها قصيرة ،سلطان جاي على فمو قالك عندي قصر وخدلج وسطو أميرة ،(سالات ماكلتها مسحات دموعها وهي تنوض ) تمسيو على خير

رقية : “شهقات بصدمة” ويلي بنت الحرام لهاتنا بالهضرة وكلات العشا كامل

خدلج : شتي أمي راك مربية حنش كلات كولشي وخلاتنا بالجوع انا دوخاتني هضرتها

رقية : لوكان مانعرفك يا بنتي يامنة نقول عليك إبليس

🌙️حديث ومغزل 🌙️
🌹بقلم سمسم 🌹
🌸الجزء9🌸

تخشات يامنة ففراشها بعدما عمرات كرشها ومخليا مها وختها بالجوع مالقاو مايديرو تا هوما نعسو ، الليل هادئ ونشر نجومو فالسما وضوء القمر داخل من شقة دالباب حلات يامنة عينيها فنص الليل تكعدات وتقادات فالكلسة وبقات تقرص فراسها وتطرش فوجها باش تبكي بغات تخرجهم بالزز ، شوية طلقات غوتة اتنوض الميت من قبرو

يامنة : اااااععععع التسليييم تسلييم

فاقت رقية وخدوج مفزوعات هادي مالها تنهق فنص الليل

رقية : اويلي يا بنتي باسم الله عليك نوضي جيبي ليها شوية دالحليب

خدلج : شعلي أمي الشمع ماتكون غير شي شنيولة لي قرصاتها ومقفزانا

يامنة :”شادة فقلبها” خدم يا الخطيب تصيب ،إلا ماجات فالبقرة تجي فالحليب

رقية : امالك ؟

يامنة : با الله إرحمو ويزيد ليا فالعمر ،خرج عندي فالمنام احح ادموعي (بدات تمسح فعينيها) قاليا موك ثم امك ثم امك لا تخليهاش

خدلج : هادي راه قالها النبي العدنان

يامنة : من نهار بغيتي تزوجي وانا نحلم غا بالميتين حلمت ببا الله ارحمو وعاد حلمت بسي بوشعيب

رقية : باقي بوشعيب حي

يامنة : وراه قلت ليك غايموت ،لا لا انا الزواج مارتاحيتش ليه ،راه غايبحك ويسلخك انا طاسيلت الفقهة مادخلاتش خاطري

خدلج : المذبوحة تعاير فالمسلوخة والمقطعة شبعات ضحك ،سري امي اتنعسي راه نتي لي عارفا عجينة يديك اتفووو

🌸اصبحنا واصبح الملك لله 🌸

صباح جديد حط رحالو على الدوار المتحزم سرح اغنامو والمترزم سقا بهايمو وفدار مسخوطة الوالدين لي عاد كاتحل عينيها وتجبد فمكانها ،شافت ليمن وشافت ليسر مابان ليها حد فالبيت غير هي دغيا توكضات وتمات خارجا تا سمعات رقية كاتهمس لخدوج وتحني ليها بقات يامنة واقفة وكاتصنت عليهم …

رقية : هانتي يا بنتي وجهك نقيه ،ماتتعرفي واش تلاقي بيه ، ويلا فاتك عكوزتك باللبسة فوتيها بالنظافة

ها تاحراميات غايبداو 😂

🌙️حديث ومغزل 🌙️
🌹بقلم أسماء 🌹
🌸الجزء10🌸

رقية : هانتي يا بنتي وجهك نقيه ،ماتتعرفي واش تلاقي بيه ، ويلا فاتك عكوزتك باللبسة فوتيها بالنظافة ،ويلا فاتك بالعلم فوتيها بالخلق ،ويلا فاتك بالحكمة فوتيها بالصنعة ،ولد السبع عمرو يطلع مشحاح ،والدفلة عمرها تجيب تفاح ،تا انا فاش بيت نتزوج قالت ليا مي الله إرحمها كبير العرش لا طيعو ،وكبير الكرش بالرخس بيعو، زينة السواق قعادو ،وزينة الفراش ولادو ،ولاتبقاي كيف القنية عاطياها غا للولاد ، واحد جوج باراكا

يامنة : “خرجات لعندهم ” إيوا زيدي أمي وصيها بلي عيب الفاكية البرقوق ،وعيب النسا لي تطيب والذوق ،وعيب الرجال الفقيه فالسوق وفالصراحة تواتيتو طاح الحك وصاب غطاه

رقية : شوفي أديك هاه سيري عيطي للتيباري قولي ليه بلي خدلج باغا تزوج وبغات شي راجل يكون معاها يالاه طيري من قدامي

يامنة : “قالت فراسها هادي خدمة نقية” خدوج واهياتا
خدلج : نعام

يامنة : دخلت عليك بالله واش هادي حالة لي بغات تزوج سيري حيدي الكحل لايكحال سعدك لبسي لبيض إبياضو ايامك وضفري سوالفك تا هاد ولد الفقيه ملي يشوفك يصلي على النبي

دوراتها خدلج فدماغها وقالت بلي ختها عندها الحق لبسات الابيض وكحلات عينيها ، اما يامنة مشات عند تيباري خبراتو بداكشي باش وصاتها مها وهي تم غادة قاصدة طريق الدوار كلسات فوق حجرة كبيرة وبقات تسنا فالخطاب يجيو كانت ملوية فملحفة كحلة مكايبانو منها غير العينين حتى بانو ليها جوج رجال ومرأة بقات كاضور فعينيها حتى وصلو حداها عاد نطقات

يامنة : الفقيه لي تسنينا باراكتو دخل للجامع ببلغتو اش هادشي اسي الفقيه ؟

الفقيه : ياك لاباس الالة شكون نتي

يامنة : انا الفاء بنت الفاء ،اصلي من الشرفاء، وحديثي قرفة ، نسقي بالسطل ونغسل بالمغرفة

الفقيه : “بخوف” تسليم يا مالين المكان

🌙️حديث ومغزل 🌙️
🌹بقلم أسماء 🌹
🌸الجزء11🌸

يامنة : التربة تضحك على الغربة ،والمكتوب يضحك على الخطبة ،الحرث بالقمح والزواج بالرضى، الحرث بالنية وحتى الزواج بالنية ،ولي ماعندو نية ماتصحلو لا وليد لا بنية ،الزواج للمرا سترة ، وللراجل مقاام ،ديها بنت الأصول راه زمان معاها يطول

مرت الفقيه : نتي باش عرفتي قاصدين الزواج ؟؟

يامنة : وفين عمر جوادي كدب عليا ؟ إوا ولدكم باقي صغير وباقي مشاف عقايب الدنيا وبغيتو دفنوه مع بنت رقية ؟

الفقيه : “رجع للور خايف منها عاد تكلم بلهفة” و و وومالها بنت رقية ؟

يامنة : “تنهدات وحركات راسها ” اححح ولدكم راه العريس السابع لي جا يخطب فيها ،وهي فينما يجي شي حد يخطبها كاتلبس عليه الأبيض مكادوز تا يوماين ويتوفى

مرت الفقيه : “شهقات بصدمة” اويلي على وليدي مسكين

يامنة : إوا يا سي الفقيه عندها واحد ختها لفعة شيطانة كاتجمد الماء فالسماء وتكحل بالعما

الفقيه : السلامة يا ربي

يامنة : ونزيدك ديك التريكة لي باغي تخطب كاع مدارو الخير حتى فباهم عمرها عيطات لباها بالواليد كايتعيط ليه غا بالتيباري

الفقيه : إوا حنا مانحكمو تا نتأكدو

يامنة : سير أخويا تأكد ولا تحزم بحزام راشي، نتا تحزم بيه وهو يتقطع بيك ،ولا تخطب من لي مايسواشي ،نتا طلع بيه وهو يطيح بيك ،غير هو عرفت بلي غير هاد الوليد لي عندك وضرني خاطري عليه

بعدما لعبات ليهم الشيطانة بعقولهم خلاتهم يسبقو رجل ويوخرو رجل ولايني دارو راسهم ما سمعو والو ومشاو يخطبو تا يشوفو واش كلمة الشوافة صحيحة ولا لا

لا يا بناتي لا تيقوش فيامنة لي قاري الحيلة فالخر هو المخدوع ،ولي أخلاقو زينة يبقا بين الناس مطبوع، ولي داير النية يعيش وراسو مرفوع ،ولي كلامو حلو يعيش بين الناس مسموع ،ولي خادم على آخرتو دينو مدفوع ، ولي داير النية يعيش وراسو مرفوع ، ليوم يامنة تضوي بلسانها وغدا تضوي بالشموع ياكو هههه

🌙️حديث ومغزل 🌙️
🌹بقلم أسماء 🌹
🌸الجزء12🌸

بقات متبعاهم بعينيها تا شافتهم قربو يدخلو للدوار ناضت وهي ضربها بجرية بلهفة وانفاسها مقطوعين

يامنة : هادشي لي جريت عليك ليوم اخدلج كاع ماجراه الخيل فالتبوريضة

دازت من طريق مختاصرة مدة قليلة تا لقات راسها قدام لباب دفعاتو ودخلات كاتنهج والعرق منها يقطر

رقية : كاتجاراي مع الكلاب ؟

يامنة : “باقا كاتنهج وتهضر” لا لا لا عاد .. عاد جيت من قبر با الله إرحمو قاليا بغيت بنتي خدلج تزورني

خدلج : اويلي تي فين شتيه ؟

رقية : وباك راه شابع موت تحت الأرض

يامنة : لا دزت عندو لقبرو وبقيت تانقرا عليه الفاتحة مع أنا وصلت لديك إهدنا الصراط المستقيم وهو يخرج عندي خيالو قاليا بغيت تزورني بنتي قبل ماتزوج

خدلج : با مسيكين الله إرحمو ويوسع عليه

رقية : إوا غا سيري زوري باك ابنتي تي لي غاتدي لأجر

بعدما خرجات خديديج سمعو دقان فالباب ناضت رقية تحل وسمعاتها يامنة وهي ترحب وتزغرت باش تطرطق القلب للعديان كلسات يامنة كاتسناهم فلبيت هي والتيباري بعدما حيدات لتامها ودارت فراسها مرزنة

رقية : مرحبا مرحبا بضيف الله

تيباري : وزارتنا الخير والبركة اسي الفقيه

الفقيه : الله يكبر من مقامكم .. لالة رقية تي عارفا لاش جايين طالبين فيد بنتكم ماشناها ماعرفناها غير كلمة لخير لي وصلاتنا عليها

رقية : إوا مانلقاو ما حسن من مقامكم

الفقيه : اوا فينها خدوج

يامنة : فالقبوووور

مرت الفقيه : ياربي السلامة

رقية : ألا غير هو مشات تزور باها مسيكين أنا نعيط ليها ونرجع الدار داركم

مشات رقية وهي كاتندب على الشوهة أما تيباري معروف عليه مسكين سمعو تقيل وبقات الشيطانة كاتشوف فراجل ختها ساكت ومكايطلعوش الحس

يامنة : “بمكر ” سي الفقيه ولدك فاش خدام ؟

الفقيه : فلاح فالصيف يتسنا الصيف من العام للعام باش يجمع حصادو وفالشتا كايحطب العواد ولا كايكلس فالدوار

🌙️حديث ومغزل 🌙️
🌹بقلم سمسم 🌹
🌸الجزء13🌸

يامنة : “كاتهضر وتعوج في فمها” إوا الراجل ماكلتو مرة ، وكلاسو براا ، وملي يشد الدار يتحول لضرة ، يا إما يديها ويقد بيها ولا يخليها فدار والديها

مرت الفقيه : “هضرات من تحت لسانها ” حنا يا بنتي ولاد لخير والخمير غير مابغيناش نبانو الفم المسدود ما دخلو دبانة وخلينا من دقان لباب

يامنة : أنا لي قصدت والمقصود الله ،بلي زين اللقمة لي بالعرق تاكلها وزين الراجل لي يخدم فكل حال وزين الكلمة لي تقولها وتفعلها وزين الزواج فالعشرة ماشي فقلت وقال

الفقيه : “كاينعت ليه لتيباري” واش هدا باك ابنتي ؟

يامنة : راجل مي إيه أمي مسيكينة وشحال داز عليها ،جرحوها وقالوليها بايرة وعمرك ربعين ،بكات بالموع حتى تحرقو لعينين ،قالت علاش يعايروني برزق مامدوليش رب العالمين ؟ وجا واحد قالها وليتي عكوزة غير ماطمعيش فالبنين ، والثاني قالها انا ندي بنت العشرين ولي بحالك راهم منسيين! بكات وقالت واش هادو مسلمين ؟ فاتو ليالي وشهور وسنين ،وهي عايشة مع المنافقين والحكارين تا جاب ربي واحد الراجل وتزوجها وهي تولدني انا وخدلج بالفرحة مسكينة قتلااااااتو

مرت الفقيه : “بدات ترعد ويدخلها الخوف” نوض نوض نمشيو

دخلات رقية مع خدلج لي كانت لابسا كولشي بيض غير شافوها وساعو عينيهم وخافو على ولدهم طلبو تسليم وهوما يخرجو مخليين رقية وخدوج مفاهمين والو أما الشيطانة فبقات تقلي السم بالفرحة عاد ناض تيباري وهضر مع رقية

رقية : هادو مالهم ؟

خدلج : ماتكون غا بنتك مولات الفعايل

تيباري : ختي رقية دارو فيك خير ملي مشاو ، انا كنت بغيت نقولك بلي ولدهم زيزون مايدوي ما يتكلم ،ومشحاحين على طرف دالخبز مايعتقوك واخا تكوني تموتي قدامهم

يامنة : اهااااااا شفتي امي نهار قلت ليك هاد تريكت الفقهة مارتاحيتش ليهم ؟ الله إحفضني ليكم وصافي

خدلج : “تغرغرو عينيها” هي بقيت بلا زواج ؟؟

بقات فيكم خديديج 😢 موجدة ليها زهر حسن من هدا لي فات 😍

🌙️حديث ومغزل 🌙️
🌹بقلم سمسم 🌹
🌸الجزء14🌸

خدلج : “تغرغرو عينيها” هي بقيت بلا زواج ؟

يامنة : كون تفاهمات العروسة والكنة يمشي إبليس للجنة

خدلج : عرفتي ياون نشد داك اللسان نقطعو من الجدر ونعلقو باش يفهم الفاهم ويتردع الضاسر ،شفتي أمي ولد الفقيه شحال زين ولايني الحسد عما لشي ناس العينين

يامنة : الحر يبقا حر والرجلة راها بحر والرجال ماشي بالمظهر ،بالكلمة ماشي بتخراج الصدر ،وفالشدة تلقايه هو الأول ماشي يعطيك بالظهر (شدات سوالفها وكاتشوف فيهم وتهضر) وراه الحداكة ماشي هي طلوق الشعر ، والحرة ماشي بالفم المحمر ، شوفي مخك باش معمر مابقاتش فبايرة لي بقا باير يزيد يصبر ويصبر

رقية : مايتهنا الزوفري من همو تا يلقا البايرة لي تلمو

يامنة : فيناهو التيباري ؟

رقية : مشا بحالو

يامنة : تا داك الشارف الهارف شحال فيه ،حج وشرب زمزم وجا للبلاء متحزم

رقية : يابنتي مايقد عليك غير لي خلقك ضحكي ليه فوجهو وتنبحي ليه مورا ضهرو

خدلج : مي واش نمشي هكا ولا نلبس الحايك

رقية : غا هوكاك ابنيتي تنا نرمي عليا غا السبنية

يامنة : فين غاديين ؟

رقية : ياو ملي خرجت نعيط على خدوج من القبور خالتك كلثوم عرضات علينا دايرة صدقة

يامنة : صدقة ؟؟ هــادي خـدمـة نـقـيـة (:_ ياك امي غير لبارح نتفتيها وليوم تاكلي من يديها ؟

رقية : حنا جيران واخا نتقاتلو يدوز نهار نرجعو السمن على العسل

بكري كان الجار يسول على جارو ، ويسول واش عشاه دارو ، مايفوت النهار حتى يعرف اخبارو ، حيت عشا جارو قبل اهل دارو ، فالشدة يوقف معاه ويخبيلو أسرارو ، أما دابا الناس بالفلوس طارو ، واش النية لي مشات ولا ناسها لي سارو ، فين الغاشي لي كانو على المحبة يغارو ؟ سلكنا يا ربي من هاد الوقت وبعد علينا مرارو

تهليت فيكم أجزاء وتفاعلو معايا بالآراء أجيو ناقشو هاد الصدقة بااااينة غاتقلب كناازة ليوووم إطيح الروح والناس تهتف راااه راااه والغووت وراه اشكووون منوض روينة وشكون من غيرها بنت رقية 😂

🌙️حديث ومغزل 🌙️
🌹بقلم أسماء 🌹
🌸الجزء15🌸

وصلات الوقت المعلومة وتزينات رقية مع وريداتها وشقو طريقهم لدار كلثوم ، الطريق كولها وهوما صاقلين حتى يامنة نعلات الشيطان وسدات فمها بسبع قفال ، دخلو لمجمع النساء وكلسات رقية وخدلج مع العيالات يتبادلو الحتيت أما لالاهم يامنة كلسات بعيدة وكاتشوف فالأرض ، حمدتك يا ربي وشكرتك تابت وشربات عقلها والشيطان كالس بعيد مصرفق مافمش ومابغاش إتيق ،
يامنة ترزنات وثبتات وتغامزات عليها العيون ، العيب هو ملي مافهماتش شوفات النسا وبقا عقلها كايغني الملحون ،

حطات لالة كلثوم خيرها ونشرات خميرها وكاع عيالات الدوار تجمعو على الماكلة من غير يامنة شافتها واحد السيدة وطلبات منها تكحز تشاركهم العشا

المرأة : إوا كحزي تعشاي أزين البنات

يامنة : لا أخالتي ماعطانيش خاطري ناكل عزا الميت وهو باقي حي

المرأة : الميت ؟؟ تي اشمن ميت ؟

يامنة : وعلاه مال كلثوم تا دارت الصدقة ؟ راها كاتفرش لسي بوشعيب مسكين تسيفطو حسي مسي

المرأة : اهااا وانا نقول

رمات يامنة البخور وسط لمجمر وخلاتهم يشعلو وتشد فيهم العافية المرأة لي عمرات ليها يامنة راسها كالت الكلمة وسط العيالات خلاتهم ياكلو فخير كلثوم وينعلو فيها إوا كلثوم جات محزمة وبغات تشارك العيالات فالكلسة تا سمعاتهم ياكلو فلحمها وسط دارها

…..1 : إوا شتيلك لكلثوم حلمات وتيقات الحلمة دارت شرع يديها وقالت لعزراين ما عرفتي والو

…..2 : إوا هانتي تشوفي ياختي دير الخير فالكلب تصيبو ،ودير الخير فالرخيس وتسنا عيبو

…..3 : راه بنت الأصل توكلها الخبز حافي وتصونك وقليلة الأصل توكلها لحم الكتف وتخونك

كلثوم : “دايرة يديها فودنيها وتغوت ” الله أختشي أنا تفكرت الواليد وبغيت نترحم عليه وانا جامعة عندي الكافرة على ختها الذيب ذيب ديما نيتو مخدوعة والكلب كلب واخا يرضع مع السبوعا

🌙️حديث ومغزل 🌙️
🌹بقلم سمسم🌹
🌸الجزء16🌸

كلثوم : “دايرة يديها فودنيها وتغوت ” الله أختشي أنا تفكرت الواليد وبغيت نترحم عليه وانا جامعة عندي الكافرة على ختها الذيب ذيب ديما نيتو مخدوعة والكلب كلب واخا يرضع مع السبوعا والسبع سبع عمرو مايعاشر الضبوعا

المرأة : فيناهيا ديك الشيطانا لي رونات الجماعة

وفيناهيا نيت راها دارتها قد راسها وهربات فنص الليل ماخافت لا لوحوش لا لحلوف عطات رجليها للريح حيت عارفا حبل الكدوب قصير قالت اللهم ناكل الدق من عند رقية فالدار ولا ناكل الدق من عيالات الدوار وراه معروف لي مزيان راه مزيان على طول الزمان يقسم معاك الحلوة والمرة ، فرحي بولد الأصل وفوتي عليك هاد الزريعة المرة ، لي تربا على القدر والهمة موحال ينكر معاك العشرة

إوا هاهي يامنة زرعات العيب وحصدات عارو حسات براسها عيات لا جهد يجري ولا لسان يتكلم كلسات للأرض والدنيا كولها ظلام بالخوف سدات عينيها وتكمشات فشالها ، والبرد كايقلب غير منين يدوز ليها

هدوء خفيف ومسيطر على المكان ، حتى سمعات حس إنسان يتنفس فوق راسها جمدات فبلاصتها وبلعات ريقها فينك يا لساني أجي عتق إلا لقيتي ماتعتق ، غير تكلم صوتو رعدها

….. : شكون نتي ؟؟

يامنة : وشكون غانكون ؟ بنت ولية نثوة

الراجل لي وقف عليها كان هاز فيديه فانوس مضوي المكان ،ضارت يامنة تشوف شكون هو حتى قشعات الخنجر فجنابو أصقلاات

يامنة : إلا عندكم الخنجر والسيف أنا عندي غير لسان سابقني للمزية والخطية

…… : لسانك حصانك إلا صنتيه صانك ويلا خنتيه خانك

يامنة : وانا لساني طالب معايا الشرع أنا نبغي نتوب وتقول هو واش بغا يتردع

….. : فين جات داركم أبنت الناس ؟

يامنة : وكون عرفت فين جات كاع ماتلقاني هنا

….. : قبيلتي قريبة من هنا يالاه تباتي يصبح الصباح ونرجعك لخيمتك

يامنة : لااا ثن لااا داري تستر عاري

🌙️حديث ومغزل 🌙️
🌹بقلم سمسم 🌹
🌸 الجزء17🌸

….. : ديري عقلك فين غانلقا دارك فنص الليل

يامنة : لي لقا راحتو فالهبال ماعندو مايدير بالعقل

…. : إييه الدنيا تا واحد ما فاهم مقامها فيها الخايبة تسكن فالقصور والزوينة تتلاوح بين الديور

يامنة : فيها غني حياتو ظلمة ، وفقير عايش بالكلمة

….. : فيها لي مريض عايش هاني ومول الصحة عايش مهموم

يامنة : فيها لي درتي فيه العيب وعدرك ، وفيها لي درتي فيه الخير وغدرك

….. : فيها لي داخلو معفن ولباسو نظيف ، وفيها لي لباسو راشي وداخلو عفيف

يامنة : فيها لي عندو الولاد وعايش وحداني وفيها لي وسط حبابو عايش هاني

….. : فيها الغم والهم الجوع والدم

شافها مجاوباتوش واخا رتاح لكلامها تحنا الراجل وقرب الفانوس لوجها مايخفاش عليه زينها وصغر عمرها ولايني لسانها كبر منها لقاتو ولد الناس وركبها فخيلو وهو يشد بيها طريق الغابة حتى بداو يبانو ليهم الديور عاد تنهدات يامنة براحة ووراتو فين جات دارهم بعدما وصلو نزل من العاود وعاونها وشد بيديها حتى نزلات ، دقات لباب وهي تحل رقية حالتها حالة بالدموع غير شافت بنتها وهي وتعنق فيها وتبوس

رقية : حمدتك يا ربي وشكرتك رجعتي ليا شيطاني

يامنة : ياك أمي كون ما هاد الراجل كون كلاوني الدياب

جات رقية تشكرو وهو يتبلع لسانها ووساعو عينيها واش هدا ولد السلطان بشحمو ولحمو واقف قدامها ماجات فين تهضر تا ركب خيلو ومشا

يامنة : مي مالك شفتي جنون

رقية : كون غا كانو الجنون ومايكونش ولد سي زرهون

يامنة : زرهون ؟؟ السلطان ؟؟

♡بقلم أسماء العمراني ♡
🌸الجزء18🌸

فقصر مولاي السلطان زرهون ، سلطان لي علم لولادو الحشمة والرجلة والقدر تصحو ليه جوج ولاد كبيرهم تاشفين مقابل القبيلة وسكانها كل ليلة يدوز عليها دار بدار يوكل الجيعان ويشرب العطشان يشبه للتمرة فزينو وشهامتو حلاوتو تدي المرار … وصغير السلطان هو الغالي هو عسل الشهدة بيه كاتداوا الأضرار وفقصر مولاي السلطان هو الراي وهو الشوار … كالسين فجريدة لي فالقصر يتحتو على نص الدين ويتشاورو مع باهوم

تاشفين : ملي خممت مزيان أمولاي لقيت بلي الزينة زينها ماينفعهاش لقيت بلي إلا تزوجت وحدة من القبيلة غاتعرف قيمة دارها وماتنكرهاش

السلطان : الزواج ما فيه عيب ولكن أتاشفين الناس أجناس فيهم المعدن المصدي وفيهم الذهب والنحاس اعرف باش غاتزوج قبل ما يطيح الفاس على الراس

تاشفين : أنا عارفها أمولاي وديتها تال دارها ملي شفتها وهضرت معاها نويتها حلالي على سنة الله وخاتم المرسلين وماعليا غير نجيب الوالدين ونضربو الكحل فالابيض ونعيشو هانيين

السلطان : إوا أش غانقولك المرأة سلطانة والراجل هو التاج هي بلا راجل حيرانة وهو بلا مرأة محتاج ، نتوكلو على الله

الغالي : أنا ماعاجبني هاد الزواج باغي تزوج وتعطي قيمة لحاجة ناقصة فالميزان ، غدا ترخسك نتا وتطلع لراسها الشان

تاشفين : هداك زهرك المعوج الناس باغا تزوج ونتا تفرج

السلطان : ضربت كفي بكفي وخممت لقيت بلي قلة الشي ترشي وتخرج من الجماعة ، ولي هرب من زواج هرب من الطاعة زيد أولدي ماتدي غي لي تشهيتي

خرج السلطان ومعاه رعيانو بعدما جهز دفوع الخطبة وعمرو ضهر الخيل والخير والخمير كايفيض ويسيل ، ختار وتخير من ثوب الحرير ، لي تكسي الغير والكبير ، توكل على الله مول التيسير ومشا مع مترتو تاج اللوز وولادو الغالي وتاشفين قاصدين القبيلة ، يخطبو بنت رقية

♡الأجزاء الأخيرة ♡
🌸الجزء19🌸

‘ الوردة لي يشموها كاع الناس تمشي منها الريحة ‘
الهضرة سطر والمعنى بحر …

يا لالة أم سيدي لي بغا يسافر يختاري الطريق المعلوم ، ولي بغا يشري يعرف يسوم ، ولي بغا يتزوج يختار أحسن قوم ، بالمحبة والقدر العشرة تدوم ، عمرك تحكم حتى تعرف الظالم من المظلوم ، ولا تكلم حتى يكون كلامك مفهوم ، شوف السماء وشوف النجوم ، شوف الشمس وشوف الغيوم ، كل شيء فيد الحي القيوم ، استغفر ليه يمشي المرض وتمشي الشدة والهموم ، لي قلبو بيض يطلع بلا سلوم ، والغدار ما عليه لوم …

وصل السلطان لدار رقية وبقا السم كايتقلا فالعديان ، منهم لي ندب ولي حماق ولي رما راسو وسط الوديان ، أش وقع حتى تزوجات الغدارة سليطة اللسان ، بسيد الرجال ولد السلطان ، هادي ماطيح لا فبال إنس ولا جان ، هاد سراقت البيض طلعات سحارة طلبو التسليم من أهل لمكان

أما رقية لي حلات لباب وشافت أهل الخير ، طالبين راغبين فيد يامنة لولدهم لكبير ، أشمنك يا عسل مقطر وأشمنك يا حرير ، لسانها تبلع ماعرفات واش ترحب بيهم ولا هوما لي يرحبو بيها

رقية : مرحبا مرحبا بسيدي السلطان

♡داخل لبيت♡

يامنة : مي أجي مشطي ليا هاد الشعر المخبل شفت رتيلة عششات فيه هاهوما ولادها كايطلو عليا

خدلج : وفينك أرقية أجي تشوفي لحناش كايتجاراو فراس هاد اللفعة

السلطان : واش هادو بناتك الالة رقية

رقية : “حشمات” إيه أسيدي مات المرحوم خلا ليا جوج بنات

تاج اللوز : وحنا بغينا بناتك يكونو عريسات لولاد السلطان

رقية : “بعد مدة طويلة من الصمت” يايايايياياياي روروروروروروري

يامنة : هاويلي ياكما مي حماقت وسايرة تزغرت غا بوحدها

خدلج : اجي نخرجو نشوفو مي مالها

خرجو لقدام لباب وتصدمو ما حلفو عليها غير السوق لي تنشرات قدام بابهم هزات خدوج عويناتها ورمقات رعيان القبيلة واقفين ….

♡ بقلم سمسم ♡
🌸الجزء20🌸

هزات خدوج عويناتها ورمقات رعيان القبيلة واقفين كايشوفو فيهم بآعجاب مكاين لي ينكر زين بنات رقية ، أما يامنة مايطيحو عينيها غير على البيض وافر نقزات عليه قفزة وحدة وريوكها يسيلو

يامنة : اش هاد الخير ماتكون غير شي حسنة درتها فحياتي وربي جازاني

رقية : “مخنزرة فيها” يانوضي الله إكلسك فوق جمر

تاشفين : الدنيا فيها حتى لي يعطي لكلمة ويوفي بيها

سمعات هضرتو وصقلات هاد الصوت ماغريبش على مسامع يامنة هزات راسها بالعرض البطيء وتلاقاو عينيهم فنظرة طويلة أبلغ من أي كلام ، الفرحة لي خلات قلبها يفرفر بين ضلوعها طيحو الدموع من عينيها دغيا مسحاتهم ورجعات يامنة القديمة

يامنة : نتزوج بيك ولكن بشرط

تاج اللوز : كاينة لي عرض عليها ولد السلطان الزواج وباقا غاتشرط

السلطان : خليها أتاج تكلم وتشرط

يامنة : بغيت … تحضر ليا نهار عرسي جبل ديال البيض
كولشي شاف فيها مستغرب ومصدوم واش هدا شرط أما رقية مسكينة طاحو ليها الدموع بالفقصة مالقات كيف دير تندب ولا تنقز عليها تريشها حتى تكره البيض وما جا منو

تاشفين : هههه ألالة نعمر ليك القصر بالبيض

الغالي : هههه حتى تبيضي

☆بعد شهر ☆

تزوج تاشفين بيامنة وحتى الغالي لي كان يقول مانديهاش من القبيلة تزوج بخدلج لي أسراتو بزينها ماخلاو لينا مانقولو من غير الله إكمل عليهم بالخير ، يامنة مولات اللسان السليط جا لي يحدهم ليها غير شوفة منو تخليها تكمش فحوايجها وتشد الركنة ، أما خدوج رزانتها مازادوها غير همة وشان وعلاو مقامها فقصر السلطان …

يامنة : وياكم ديرو راسكم فيا أنا عارفا راسي بلاصتي فجهنم غير هو ماعرفت واش غايحطني ربي فالسخون ولا فالدافي ، ولكن بفعايلي باينا واش أنا لي غانكون الكسالة ديال أبو لهب ، راني دايرة كيف عقرب الجامع نضربك من تحت الحسيرة وماتعرف الضربة منين جاتك …

♡ الـجـزء الأخـيـر ♡

هدا زمان يامنة لي مشا وعمرو يرجع … أما دابا مشات البركة من الديار وتبدل الميزان … تشوف السماء تمطر والتراب عطشان … الفلاح يحصد والسبول فرغان … المرأة المستورة قسمها مايبان … والعريانة يدورو بيها النسور والغربان …. الزين مخبي والفاسق يبان … كاين بعض الناس أضعاف الإيمان …. الجيب عامر والراس فرغان … وكاين ناس قهرهم الزمان … اللسان معسل والقلب قطران .

♡ تــمــت و الـحـمـد لـلـه ♡

قصتنا سالات ، وجمعات الكالات ، وضارت على الكروبات 😂

♡ لي عجباتها تخلي كليمة فحقي وفحق حكاية يامنة ولي ماعجباتهاش تقولها تا هي مرحبا والف ، غانتوحشكم وإن شاء الله تبانو فالجديد ♡

اترك تعليقا