Skip links

قصة : يامنة ج2

 3,132 عدد مشاهداات

👰🏼يامنة sana mina 26👰🏼
سداتي سادتي اعزائي المسافرين المتوجهين الى مطار فنوكوفا موسكو …ربط الاحزمة ستهبط طائرة الخطوط الملكية المغربية على الاراضي الروسية …شكرا …
فور ماسمع ربط الحزام وعدد دقات قلبو كتسارع بزاف كيحس براسو قرب لمصير موتو هههه وناااااري والى ساق الخبار وحمروه ( ردوه حمار وسطهم ) نااااري مجرد مكيفكر فيها تتجيه البكية هههه ….حطت الطيارة الرحال فالمطار …خرج وقام بروتين الاجراءات حتى خرج كان مقطع درجة رجال الاعمال …خرج من المطار لابس مونطو كحل فيه ريش ومقطن من لداخل والقب فيه ريش وتحت منو قبية كحلة بالقب مبطنة بزاف وسروالها فنفس اللون كحل وسبرديلا ايرماكس …لاوي عليه كاشكول ديال الخايط بحكم الجو مثلج بزااف تما
لقا فاستقبالو شيفور خوه ومعاه زوج بوديكارد …ابتاسم ليهم وطلع فسيارة الي كانت من نوع هامر ايتش hammer 2018 كلها كحلة وزاج فيمي مكيبينش …زاد بيه مسافة حتى دخلو لواحد البيست كتدي لغابة …
دنيا مثلجة بزااف …بقاو غادين مسااافة نيت جبدة …
حتى وصلو لقدام واحد الفيرما صغيرة شوي فيها دار لداخل فيلا صغيرة بطابقين وقدامها جردة كبيرة وفجناب الفيلا كاين شجر وربيع جردة كبيرة وعامرة وجنابها ضايرين بولات مزينينها باليل كيشعلو …ضاير بيها واحد العدد قليل من البوديكارد تحت طلب ديالو هو وكون جات عليه ميبغيهمش معندوش مناش يخاف الخوف اخر همو ….
دخلت سيارة من بعد ما حل ليهم العساس الباب ودخلو ….ترجل يوسف من سيارة هاز صاكادو ورا ضهرو …هز عينيه لفوق قشعو كالس فالبالكون …قاد قبيتو وسروالو الي تعنكشو …حلو ليه الباب ديال لداخل….
لقا فاستقبالو واحد من الي خدامين تما ….
القى عليه تحية وسلم عليه ….
يوسف “كيهضر بروسية غير دفيش فكل مرة كيجي عندو ” : فؤاد…
هو : طلع عندو لفوق كيتسناك فبيتو …
ابتاسم ليه …حيد المونطو عطاه ليه يعلقو بحكم الفيلا من لداخل سخونة بزاف …حنحن وحدر راسو وطلع نيشان لعندو …دق الباب سمع تحنحينتو زعما باش يدخل …

شاب في عمر 32 سنة …ذو هيبة ورجولة طاااغية جدا …ملامح سمراء عينيه فحال عينين نسر تماااما وكحليييين ….حجبانو ديما معقودين …قلييييل القلة فين كيضحك …كالس فوق كرسي مقاد مع البالكون حاضي ثلج كيطيح عاد فايق كيشرب فقهوة كحلة وكيكمي فالگارو …ومخنزر عاقد حجبانو …طاوي رجل فوق رجل وفخادو كل فخد قداش ناهيك على دراعو سبحان من صور تلك درعان بديك تورمات الي فيهم بكترت رياضة كتافو عراض وزادو عراضو بيها …لابس ضوني سماطي فالبيض وشورط كحل قصير …
حس بيه …تسناه حتى وقف ليه عند راسو …هز صبعو وشير ليه باش يجي يعنقو وداكشي الي كان… ضار لعندو وعنقو عناق حاار …
يوسف “قرب يموت ههه ” خوووياا توحشتك …
فؤاد “ابتسامة بالكاد كتبان ” : الامور مزيانة ؟
يوسف : كلشي هاني …
فؤاد “رجع عقد حجبانو كالمعتاد ” الوليد ؟
يوسف : مزياان تاهو …
فؤاد : الياس ؟
يوسف : حتى هو مزيان وراه جامع راسو غير تهنى و راوية مكتساليش من القراية غاديا مزيان تهنا عليهم …
فؤاد “عض فشفايفو “مزياان …
كيدازت طريق ؟
يوسف : امم بيخير ….
هز ايديه …وشير بصباعو …ارا دوك الوراق نشوفهم …
يوسف “مااات ” اشمن وراق ؟
فؤاد: “هز فيه عينيه فحال تخنزيرة وهي غير نضرة عادية عندو اما تخنزيرة فهي تطبيق عندو …اشنو مغانشوفش علاش غانسني ؟ …
يوسف”تلفت ليه الهضرة مبقاش عرف اش نطق ” : وااامي 😳
يالاه ها فؤاد مرعب الگروب هههه
👰🏼يامنة sana mina 27👰🏼
خيبة أمل عندما تحلم أحلام وتعلق عليها آمالك لتصل إلى حلمك وأنت تترقب ساعة الأجل. خيبة أمل عندما تخسر ثقة الناس بك لتحاول جاهداً بكل الوسائل أن تعيدها وعندما تعود تفقد ثقتك بنفسك. خيبة أمل عندما تشعر بأنّك قادر على أن تكون زعيم قبيلة وتثابر للوصول لتتزعم أخيراً قبيلة دون شعب.
كان متوقع انه يعطيه الوراق ويسني عليهم بعينيه مغمضين لان من طبعو دييما كيجيب ليه الوراق ولا فاش كيجي كيسني على وراق الي يوسف معندوش صلاحية عليهم وخا بالوكالة …بحيث كيكونو وراق مصير مهم او قرار اهم او شي حاجة كبيرة …كيضطر ساخذ رايو او مشورتو فيها …
فقط كيعطيه تلخيص اشنو فيهم وكيسني بلا ميشوف …
هاد المرة وقع العكس تماااما …
يوسف : اشمن وراق ؟
فؤاد “هز فيه عينيه بنضرة نارية والي هي نضرتو طبيعية ديال ديما واحد اخور غادي تخلعو ” : شنو مغاديش نشوف هاد الوراق الي غانسني عليهم ؟
يوسف : ها اااه احم ايه واخا …يلاه بغا يضور باش يجبدهم ليه من صاكادو ديالو ووجهو ولا صفر فمو كيترعد …ليس بالخوف او وانما الي مخليه فهاد توتر وهو انه مرضاش يدير لخوه هاكا ويحطو فهاد الموقف …غايحس براسو اكبر حمار وقدرو يلعبو عليه وكلشي من باهم …لو ان الامور تحل بعدك طرق مكانوش وصلو لهاد المواصل ولكن شنو السبب الي دفع الحاج رمسيس يدير هاد تصرف اشنو واقع من غير انه بغا يقاد ولدو الي دخل لواحد طريق صعيبة وخايبة ….فؤاد كان من اعز الولاد عند الحاج وكان فرحتو لولة ….
يوسف “كيحل فصكادو وكيتعطل باغي يعيش واخا غير قسمين ديال لمگانة ههههع ” حتى …
فؤاد “ناض كيشوف قدامو ونطق ” غير خليهم …تمشا وتخطاه …”هضر بشوي وهو غادي عاطيه بضهر ….بصوت خشن خفييف مترجل “تبعني نفطرو لتحت …مشا خرج من البيت …
يوسف “بالفرحة غاتزادو واحد ساعتين من عمرو ” واخااا …سد صاكادو …يلاه بغا يخرج حتى صونا ليه تيليفون كان صهيب …
يوسف : اش كااااين فرعتي ليا ك*** بالتعياط الحبس 😡
صهيب : هاناري غير بغينا نشوفوك واش وصلتي ياك لباس …

الياس “لاصق لصهيب عند وجهو ” : سولو اش دار …
صهيب “ضار جيهة الياس ” : ديلمك را حلاقمي دخلتي ليهم تا كحز يعطيك الحبس خليني نهضر معاه …
يوسف “رجع خماس بالغوات خاف لايسمعو خوه ولا شي حاجة والدرب مكيطمنش ” : يااالو ….ياااه ااه وصلت …فؤاد بيييخير هاهو نبلغو سلامكم ان شاء الله انا هابط نفطر معاه …
صيهب : هنن ؟؟ الياس : مالو رجع كي الخماس فسوق الخميس ؟
يوسف : ايييه الو ايييه مشا ريزو وقيلة ايه سلم على الوليد انا مشيت …”هضر بشوييي” ومتهضروش معايا يغرق لبوكم شقف الحبس مالكم مالكم تفو ….قطع عليهم خلاهم غير يبرقو …
صهيب : والله يخرج سربيسك على خير …ناري الكلابي قطع …”ضار جيهة الياس ” معرفت مال خوك ؟
الياس : ههههههه زعزع ليه الكارط مير ههههههه
👰🏼يامنة sana mina 28👰🏼
كان الساعة تشير لثامنة صباحا بتوقيت المغرب وبالبط المكان بمنطقة البادية عند عائلة يامنة …
كالسين كيفطرو قدام ديك الطويبلة صغيرة ديالتهم الي موالفين كيفطرو عليها ديما …هاد المرة داخلين البيت بحكم كان لجو مشتي وقطرات شتاء الباردة والبرد البارد ونقي كاين وريحة تراب عاطية …كيفطرو وحاطين حداهم مجمر زاند دايرين فيه جلفة ديال الحامض باش ميضرهمش راسهم ….وحاطين صينية ديال اتا وجنبها بريق طويل ديال القهوة كحلة معطرة بحبات الهيل وبديانة واعواد القرفة وسكينجبير وخودنجال …هاد العطور كيتقداهم شخصيا اب يامنة من سوق …وطبيسيل صغير فيه زيتون اسود مصاوب فدار منسم بزعتر وزيت زيتون واخر بالهريسة وثوم والربيع مقطع والكامون وشوية تحميرة …وطبسيل من زيت زيتون لمنطقة وبطبوط عاد سخون من ايدياتها …
مصطفى : السيمانة جايا الا زينة جاي خويا ودراري …
يامنة “حدرت راسها بالخجل ” …
زينة “شربت جغمة من اتاي “: ايييه مرحبا بالي جا وجاب …مولاي سلطان مجايش …
مصطفى : مولاي سلطان على مقاليا الحاج عبد العالي ميصيبش مزير مع شغال …مشا يوسف يجيب من عندو الوكالة …
زينة : وزواج بالوكالة ماهو زواج اولدي ويني الغايب حجتو معاه …يصير خير اولدي …
مصطفى : والحاج الي عليه العمدة راه جا ومنردهاش فوجه خويا العزيز الميمة …يسالي امورو غايجي تالعندك …
زينة “كتهضر بالحكمة ” واش نقوليك الي مجا بمحبة ميجي بحزارة …
مصطفى : المعنى…
زينة : تاايجي على خاطر خاطرو والى مهزاتو براكتنا تهزو عينيا غير على انه راجل بنيتي راه من دمك ولحمك ومرحبا بعزيزك والغالي ديالك …
مصطفى : القلب الكبير امي زينة القلب الكبير …
يامنة غير كتسمع وهي مزنگة كثير شي ملي كيهضرو عليه …قلبها كيبدا يضرب بجهد …
زينة : وليني اولدي الى جاو شكون غايجي بعدا …
مصطفى : الخطبة غايجي هو ويوسف والياس ولالة نجود الي ربات ليه دراري والبنت قاليا فالشك …
زينة : مرحبااا… هضر مع عباس يسلفنا دويرة نسيبو الي فطاليان ينقيوها دريات فين ينزلو راه مغايقدهمش هنا …
مصطفى : هضاارت معاه وعطاني ساروت كلشي ناضي …
زينة : صلاة عالنبي الله يكمل بالخير …

مصطفى : امين …”شاف فيامنة ” بنتي خاصاك شي حاجة فلوس متقداي شنو خاصك ..
يامنة “ابتاسمت ليه ” لا ابا هاد ساعة مخاصني والو …
مصطفى : غايجيك فالخطبة حوايج من هاد ناحية متهزي هم والي خاصاتك غانزيدوها ضروري ابنتي …
يامنة / وااخا ابا …
👰🏼يامنة sana mina 29👰🏼
ناض مصطفى استاذن منهم وخرج لشغالو …وبقات يامنة هي وجداها …حتى دخلو عندها بنات جيرانهم وشي عيالات واقفين معاهم من الي تخطبات يامنة كيوجدو معاهم تحضيرات الصدقة والرواح …
نزهة : الالة زينة غاديرو غير صدقة ؟ ضروري البنات يلعبو لا ؟
زينة : ضروري وايه عرس الفجلة هذا …
رجعو العيالات عندهم ثاني كل معاونة فجيه …هذا حال البادية باقين فمنطقة يامنة على تقاليد القديمة وهي توجاد العرس وسط الاهل والاحباب والجيران ولكن بحكم ان يامنة فمنطقتهم معندها غير باها وجداها فالجيران الي تربات وسطهم وعلى ايدهم هما سندها واهلها فهاد اللحضة …
يامنة : ميمة انا غانمشي نرعى البهيمات معندهم مياكلو …
زهور : تي كلسي لارض مبقا ليك خروج فالشمش سيري ديري خميرة بلدية مع العكر الفاسي الي عندك والحمض لرجليك وديري عليهم تقاشر …
يامنة : حتى نرجع عفاك غانتوحشهم وغانتوحش معيزتي 😿…
زينة : غا خليها تمشي دير مبغات مغاتبقاش ديرو خليها تسرحهم تحيد منهم الوحش …
زهور : سارة سيري معاها ومتخليهاش تبقى فشمش …ومتعطلوش غا فجناب هنا …
زينة : سيري الله يرضي عليك ابنتي …
سارة “جاوبت قبل متبدا تعطي فيها بالمعيور ههه ” : ايه يالاه …ناضت يامنة وسارة خرجو باش يرعاو البهيمات …بعدو شوي على دار حتى وصلو لواحد الفدان ( ارض مزروعة ) وطلقوهم …
سارة “كتشير ليها لواحد شجرة ” : يامنة هذاك الولد صلاح ولد الورديغي شوفي فين واقف …
يامنة “ضورت عينيها وقشعاتو واقف متكي عالشجرة وحاضيها من بعيد …عينيه مغرغرين كيحس بحزن كبيييير …يقدر بغاها من قبل يقدر اول مرة شافها وعجباتو بزاف وشاف فيها المراة ديال احلامو ودارو ولكن حتى واحد فينا مكيدي الحاجة الي بغاها بقلبو بسهولة كل وكيف مكتب ليه الله ومقسمو ليه ” ….
سارة : اشنو باغي هذا ؟ يلاه نرجعو فحالنا تنجيبو لبيهمات الفصة …
يامنة : يلاه …مشات سارة كتجمع في البهايم بالعصا ديال مزلاط …هنا استغل الفرصة ومشا كيخطوي بسرعة لعندها …
صلاح : يامنة …
يامنة “كضور بجنابها وكتهضر وعينيها لتحت مباغاش تشوف فيه من خوفها لا يحصلها شي حد وهو مقراش ليها الحساب وخا ولد الدوار ” …بعد عفاك بعد غاتخزج عليا اخويا …

صلاح : يامنة مبغيت والو غير نقوليك الله يكمل عليك بالخير …انا كنت تمنيت تكوني حلالي ولكن مكتابش انا جيت غير نشوفك ونتوادع معاك حيث قريب يخرجو ليا لوراق سيمانة جايا رسل ليا خويا ورقة من اسبانيا ودفعتها لمالين ترجمة وعطاوني موعد ….
يامنة : اه مزيان الله يسر ليك اخويا …بغا يهضر وهي تمشي كتجري ناحية سارة خشات ليها ايدها فدراعها ودفعو البهايم غادين وكياكلو حتى مشاو ….
احيانا كنبغيو الحاجة كيضرنا خاطرنا بزاف اننا بغيناها ومكتابتش لينا شي مرات حتى كنبغيو نعصاو الله وكنحطو عليه هو السبب فالي جرا لينا ولكن مع مرور الايام والزمن وتوالي الاحداث كتخلينا نفكرو ان لكل قدر قدرو علينا الله سبحانه كان فيه حكمة باالغة ونقطة تحول لواحد الحياة او روتين جديد …

#تتمة_البارت_29
تمت راجعة يامنة وسارة وتلاقاو بشي رباعة ديال البنات واي عروسة طبعا لا تخلو من حاسديها وخا غير بضحك المهم ضروري حشيان الهضرة …نقزت وحدة منهم دوات بجهد …
وااااااا يامنااااو …وتي مبارك مدرتي …
يامنة : الله يبارك فيكم العقبة ليكم ….
هي : وسعدنا ماهو كي سعدك فين لقاو فحال سعدك …
يامنة : الله يعطيكم حسن من سعدي البنات هههه
سارة. : لعفوووو كي شتوها كي تخليوها خمسة وخمامس والحرمل فالكمامس ….نبيلة نعلي شيطان مكتوبيش …
نبيلة : ومضنيناها فيامنة هاد سعد كامل سعدااتها رجال يتجاراو عليها منهم صلاح ولد الورديغي …
يامنة “برد ليها الما فركابي خافت لا يحساب ليهم بينها وبينو شي حاجة ..”
سارة : مالو قرب ليك الصگعة 😱…
نبيلة : الله ينجيييني …
يامنة : اييوا مكاتيب اختي نبيلة الله يفرحك ويرزقك سيد رجال …
سارة : داكشي بالمكتاب وموحااال يجيب ليك الله مكتاب يامنة عرفتي علاش ؟ …جرت يامنة وساقت البهايم وضارت عندهم …حيث لالاهم لالاهم وفكلشي فايتاهم زين وهمة وعقل …هاكا ديما لسما رافعة راسها هاكا ديييما جايبة لعز لناااسها …
شافت فيها …نبيلة يااه عاد بانو عينيك ملي خنزرتي المغيمضة ….الله يفرحكم البنات تهلااو …خلات نبيلة دايرة ايدها على جنبها وكتشوف فيها بتخنزيرة الي عاد بانو عينيها فيها بالكشيفة هههه …
👰🏼يامنة sana mina 30👰🏼
فالجيهة لاخرا من فيلا مدينة ازرو فيلا رمسيس الاب الحاج الي خرج قرار مصيري لكلا الاطراف ماشي حتى الطرفين …ممكن تغير حالة العائلة لاحسن او الاسوء …تواحد معارف اشنو مخبي المستقبل …اشنو غايكون ردة فعل واحد شخص الي هو الضحية الكبرى فهادشي كامل رغم صغر سنو الا ان هاد زواج ممكن يدمر ليه حياتو ممكن يزيدو مسؤلية اكبر من المسؤلية الي كان واخذ قبل ميجي لهاد العائلة … في المكتب ديالو كالس على كرشيه شاد ستيلو وكيكتب ف تقارير بعض مشترايات الورشة ديال نجارة الي مشهور بيها الحاج رمسيس فديك المنطقة …حتى دق الباب ودخلت عليه نجود …
الحاج : الحاجة دخلي …
نجود : سي الحاج “حطت ليه القهوة ديالو من بعد ما فطر ” ها قهوتك الحاج …
الحاج : الله يكثر خيرك الحاجة …كلست فالكرسي الي مقابل معاه …دراري فطرو …
نجود : فطرو وخرجو بزوج …
الحاج : مزيان …
نجود : الحاج الى عرف …
الحاج : الى عرف فا انا الي غانقولها ليه …
نجود : لو مدرتيش ليه هاكا …
الحاج : عارفاه غايدير مية طريقة وطريقة باش ميتزوجش علاه مالي انا مجبدتش ليه موضوع زواج ؟
نجود : معارفش بالي بنت عمو ؟
الحاج : لا ومبغيتش نقوليه انا عاطي لعهد لخويا وهو كذلك عاطين العهد بيناتنا منقدرش نطيح بكلمتي …
نجود : الى عرف يقدر يطلقها …
الحاج : من هنا لديك الوقت لكل حادث حديث …الحاجة نجود راه ولا راجل 32 عام خاص يقتح طريق لخوتو …طريق الي مشا فيها خايبة بزاف …راه ولدي ومعندي كيندير ليه مبغيتش نسخط عليه ومبغيتش نتفرق عليه راه كبدتي الحاجة …دخل لديك طريق صعيب يرجع منها ماعليا غير بصبر ونطلب ربي ينجيه من كل شر ….
نجود : والى تزوج غايعرف بالي عندو مسؤلية ويدير بحسابها ويقدر يتهرس طبعو الصعيب وكثير شي لا ولاو عندو دراري ؟
الحاج : واكثر …

نجود : واشنو الي ضمن ليك فؤاد غايقبل ؟
الحاج : عارف اش غاندير الحاجة ….نزلت دمعة من عينيه خانتو …ولدي دخل لديك طريق مبقا يقدر يخرج منها …
بزاف ديال ناس ولادهم كيمشيو لبرا باش يضمنو حياة زوينة ومعيشة الي كيحلمو بيها حتى كيتصيدو فطريق الحرام وخايبة وكيضطرو الوليدين يتقبلو طريقهم مقابل يبقاو ولادهم عايشين ويعيشو كيف بغاو …حتى واحد ملقاها كيف بغاها …فهاد الدنيا ….
👰🏼يامنة sana mina 31👰🏼
على مائدة الفطور ديال صباح …عامرة بما لذ وطاب …بعض ما تشتهي الانفس ليس بكل ما تشتهي لانه الى جينا نحطو كاع الي تشهاه خاطرنا مغاديش تقدنا طابلة …محطوط فيها فطور بلدي على حقو وطريقو فطور مغربي مئة بالمئة …الفطور الي كيعجبو هو شخصيا وعارفينو شنو كيبغي وشنو مكيبغيش بدون نقاش …ماشيين على سيستيم ديالو هو وشخصيتو هو ….محطوط كاس ديال القهوة كحلة بزااف وبدون سكر …شاد صحيفة كسقرا فيها وعينيه منيرين نضرات عندو ديال نسر …عاقد حجبانو …قليل الكلام …شخصيتو طاغية بزاف بلا ميهضر ….
يوسف “جاي ولحق عليه من الفوق ” : سلمو عليك الياس وصهيب …
فؤاد “شاف فيه حرك راسو بشوييي زعما مزيان ” ….كلس يوسف كب ليه كاس قهوة كحلة حتى هو …
حط فؤاد الجريدة وهز صباعو بزوج حطهم على فمو متكي عليهم …هز فيه عينيه نطق ورجع حدرهم كيشرب فالقهوة …الياس يجمع راسو سمعتيني …
يوسف “صدمو ” علاش مالو …
فؤاد “شاف فيه ” : غير وصيتك …
يوسف : ايه وخا كون هاني …
فؤاد : مزيان …رجع شرب كاسو ديال القهوة وهز باكية الگارو هز منها سيجارة حطها في فمو وشعل بالبريكة …جبد منها ونفخ …كيشوف قدامو …مبغيتش نعرف عليه مشاكيل …تفاهمنا ..
يوسف : كون هاني خويا …
فؤاد : تهلى فالوليد ..
يوسف : على راس والعين …
فؤاد “ناض وقف ” سالي فطورك براحتك وتبعني المكتب جيب دوك الوراق نشوفهم وعطيني تقرير …قبل مينطق يوسف …مشا طلع لفوق …معرفوش يوسف واش غايبدل حوايجو ولا يهضر فتيليفون ولا يشوف شي حاجة ويرجع …رجع يفطر ويفكر اشنو يقوليه …هبط معاه صاكادو ديالو …حط الكاس ديال القهوة ….
حك وجهو بايديه وشعر راسو وهو كيفكر اش يدير …مشا لصاكادو جبد الملف ومشا لجيهة ممر المكتب حل الباب ودخل كلس فالمكتب وخا عارفو مزال مهبطش دخل يتسناه …هو الوحيد الي كيدخل اما ممنوع على مخلوق كان يدخل لمكتب من غير . يوسف والي كينضفوه تحت وصاية الرجل الي مسؤول تما ….

واحد نص ساعة حتى شم يوسف ريحة رجالية عااطية نوع sauvage و ريحة الگارو الي جاي كيكمي فيه …حتى دخل لابس قميجة سوداء مطرطقة عليه وصدايفها لفوقانيين محلولين وسروال فصالة فالاسوط وصباط كلاس لمااع … …عينيه بنفس نضرة المعتادة …حتى دخل ومشا نيشان كلس فالمكتب ديالو …
يوسف : هاهما …
فؤاد “عاقد غوباشتو ” شنو تقرير ؟
يوسف : واحد السلعة باش نصدروها كيخصنا نخلصو ديوانة ديالها غالية شوي وباش منواجه حتى مشكيل كيخص توقع على “صرط ريقو ” هاد الوراق …وكاين واحد سلعة جايا من كولومبيا ماليها عطاو شروط وهاد شروط انا مقتانع بيهم مزيانين ولكن خاص تمضي باش تاكد قراري ونعطيه لمجلس الادارة …وشي وراق ديال واحد السلعة ديال الوليد …
فؤاد : غايبقاو هنا حتى نرجع ونسنيهم دابا ممساليش …بقا هنا وصباح رجع …ساط دخان بزاف وطفا لكارو فطفاية و ناض وقف ووقف حتى يوسف …ضار جيهتو …حل صدافي دالكمايم ديال القميجة ومشا قرب ليه هز ايديه ودار وجه يوسف بيناتهم ..
فؤاد “كيهضر بملامح باردة وكيشوف فيه بنضرات صارمة ” : عندك ثقتي العمية …خبط ليه حناكو بشوي ..وضار هز مونطو تروا كار لبسو وخرج …
يوسف كلس فوق الكرسي حادر راسو …حتى سمع صوت طوموبيل خرجت من الفيلا … جبد الفون ودوز الخط لصهيب …
صهيب : اك لباس هل انت في الجنة ام جهنم …
يوسف : شدني الوجع فكرشي اخويا 😐…
👰🏼يامنة sana mina 32👰🏼
حال اي عروس فهاد دنيا كتوجد لنهار ديالها بكل فرح واستعداد …في التقاليد المغربية او بعض المناطق كان زمان كيحضرو لعرس بشهوور وايام قبل وكيف كيقول المثل عرس ليلة تدبيرو عام ….وملي كتبقى شهر او ايام قليلة على الزفة كيتلاقاو الحباب وكيوجدو ليها بضحك ونشاط كل نهار حتى كتعرف القبيلة بالي فلانة بنت فلان راها غاتزوج وهنا كيولي اشهار اما قبل في الفترة الي كيكون فيها تعارف وخطبة يفضل دوز بسرية حتى يتم كلشي بيخير وعلى خير وميكون حتى توابع او عواقب ممكن العين تلعب دور فضهور عرقلات لتوجاد وهادشي علاش
الرسول عليه افضل الصلاة والسلام كيقوليك “استعينوا على قضاء حوائجكم بالكتمان فإن كل ذي نعمة محسود” ….
تفصلنا ايام قليلة على موعد حضور اهل العريس او كتدقيق عم العروس يامنة واولادو …والي لحد الان المسالة غامضة عند عائلة رمسيس ديال ازرو …شكون غايكون بالضبط وشكون الي مغايكونش ؟ واش غاينجح يوسف في نيل مبتغى باه الي لحد الان مفهموش علاش تصرف هاكا مع ولدو وبغا ياخذ معاه الضحية الوحيدة والي ماليها تا ذنب فهادشي كامل غير انها كتعيش ايامها كاي عروس …
سارة : يامنة هاكي هاد الماسك الي صايبت ليك زهور …
يامنة : شنو فيه ؟
سارة : هذا ماسك فيه دوف محكوكة فنص ايترو حليب نيدو فايض وسخون ونص كاس ماء ورد خلطتهم ليك مع غاسول ابيض ودارتهم فهاد القرعة حطيهم فثلاجة كل نهار دخلي طليهم لوجهك وذاتك وخليهم حتى ينشفو وتشللي مزيان وموراها طلي الصقلة …
الصقلة فيها ( معيلقة شبة مطحونة معيلقة نيلة الحرة ومعيلقة حمص مطحون والحنة ومعيلقة عكر الفاسي وصابون البلدي ومعيلقة زيت فليو ) وتشللي ونهار نمشيو لحمام غادي نكسلوك حيث غاتحطي جلدتك كلها ….
يامنة : هههه ولكن راه لحمي كيضرني الى كترت الحكان …
سارة : وغير صبري وخا لحمك رطب هادي عادة باش تمشي لعند سي سيد نقية ورطيطبة باش يلقى مايتلمس ويقيص ويعجن …
يامنة : الله يمسخك فين تعلمتي هادشي ..تسمعك ميمة تبدا بيك ثاني …

سارة : لا صافي هاناري اغير من الفيس بوك ..وصافي دابا ديري هادشي بداي من اليوم را باقي غير ربعيام لعرس ونتي بادية بالصقلة مزيان نيت …
يامنة : واخا …
سارة : اجي مواجداش ليه ؟
يامنة : شكون ؟
سارة : سي لعريس مولاي سلطان ؟ …
يامنة “حشمت ” م معرفتش بيني وبينك خايفة …
سارة : من اش ..
يامنة : خايفة من اول ليلة خايفة لايكون شي واحد كبير ولا واعر …
ويقصحني “حدرت راسها ”
سارة : فاش خدام …
يامنة : قال ليا عمي فروسيا ولكن خدمتو هنا مقابلها يوسف …
سارة : همم مبقا غير ايام ونتعرفو على هاد ولاد عمك …
يامنة : ان شاء الله …
👰🏼يامنة sana mina 33👰🏼
تضارب الافكار وصراعات فعقلو …من جهة خوه الي مبغا يسني ليه على هاد الوراق تتجيه العادة شهرية غا بالخلعة والتوثر ومن جهة كيقوليه واحد الراس قولها ليه والي بغا يكون يكون المهم متخبي عليه تاحاجة وكثير شي ملي نطق ليه جملة “ثقتي فيك عمية ” خلاتو يرجع يعيد حساباتو ولكن من كيتفكر باه كيرجع ثاني لنص وكيتقهر …اشنو ناوي باه وعلاش تصرف بهاد طريقة ؟ فؤاد ليه اكثر من عام ونصف موصلش المغرب …وهادشي كل مرة كيتكرر حتى اصبح كيغيب ويطول الغيبة …
هز الوراق ومشا هز صاكادو وطلع لفوق البيت الي كيجي ليه مرة مرة …حيد حوايجو ودخل لدوش يدوش بما سخون باش يرخي عضامو من تعب السفر ويرخي ذاتو وعقلو من تعب التفكير وكثرة الضغط والتوثر …ويحاول يفكر اشنو يدر واشنو يتصرف …في حالة حصل الورقة …كمل وخرج نشف راسو وذاتو ومشا هز سورفيت مبطنة جديدة فالگري والاسود ولبس تقاشر…
خلا شعرو مخربق بالما … خشا رجليه فبانطوفة ومشا هز الملف… نيشان الورقة ديال موت الحزاق كامل الي خلاها هو هههه …هبط عينيه ولكن هنا كانت المفاجئة …مشا هز الفون وعيط ليه ….
يوسف : الوليد لباس عليك …
الحاج : يوسف ولدي وصلتي بيخير …
يوسف : وصلت صباح عاد ارتاحيت
الحاج “بعد تردد ضغط على قلبو وسول عليه ” : لباس عليه ؟
يوسف : لباس عليه سولني عليك وصاني نتهلى فيك …
الحاج : الله يرضي عليك اولدي رد بالك نتا سير غير فاشنو وصيتك وخلي الباقي عليا …
يوسف : علاش درتي اسمك فالوكالة …امتى بدلها ليك صهيب ؟
الحاج : غادي نضلمك معايا اكثر اللهم خليني انا نتوكل عليه …
يوسف : الى عرف الوليد غادي يتفرق منها بسهولة وخاصة الى كانو عندو شهود بالي مفراسوش …
الحاج : مغادي يدير والو …خليني انا نتواجه معاه …
يوسف : الوليد مع احترامي ليك هادشي ممسلكش غادي ضلم معاك حتى ديك بنت الناس …
الحاج : يوسف الله يرضي عليك اخر مرة نسمعك عاودتي هاد الهضرة غادي نتقلق منك بزااف …كاع الوسائل سالاو ليا معاه هادي الطريقة الوحيدة وزايدون عاطي الوعد لخويا متحطونيش بوجهي من هنا لفاش يعرف لكل حادث حديث …خوك مراتو هي بنت عمو وسدينا ..
يوسف : الي بغيتي الحاج الي بغيتي …
الحاج : مضى عليها ولا مزال …
يوسف : حتى ل عشية يجي يسنيهم ….عمرو فحياتو قرا شي ورقة حتى لهاد النهار …المهم. ا راني باقي شاد نوبة عند عزرين الحاج قربات نوبتي متخممش …الله المعين …
👰🏼يامنة sana mina 34👰🏼
حتى واحد فينا معندو خيار يعيش الحياة الي بغا …كاين الي تفرض عليه يعيش حياة الدل والمهانة وكاين الي عايش حياة العز والكرامة وكاين الي عايش الرفاهية بدون ضمير وراحة البال وكاين الي عايش على قد الحال ومرتاح البال …كل فين تيسرت ليه وتسرحت ليه …وكاين الي عايش فواحد المستنقع ديال دياب الداخل مفقود والخارج مولود …مستنقع اسود فاسود مافيهش ياما ارحميني فيه الغالب هو المعلم والمغلوب هو الميت …
في واحد من اكبر النوادي الليلية الخااااصة جدا كيدخل ليها غير رووس الكبيرة ومكيدخلش ليها من مكان …الي حفات ليه جرية يفكر يدخل لتما الى خرج غير جي عكر ليا باش مابغيتي …هاد المكان خاص بزاف او هاد النادي الليلي …فيه كيسهرو اغلب تجار المخدرات الي معروفين لناس ومكيشدوهمش البوليس… القادرين على الخروج منها فحال شعرة من العجين وفيه تجار الاسلحة و الخ …من الممنوعات والمحرمات …كل وفاش مختص في المجال ديالو…ولكن القاسم المشترك بيناتهم وهو #المافيا ….
في واحد من الجلسات الخاصة واحد الزاوية فيها فوطويات كباار جات معزولة …جالسين فيها ثلاثة رجال وزوج بنات …
جالس في فوطوي وحدو …شاد كارو فايديه وكالس مسرح رجليه كيكمي وقدامو طبلة فيها قرعة ديال الويسكي وفجناب ديالو انواع القطعة …زيتون مخللات وفواكه جافة …هز كاس شرب منو وحطو وجر جرة طويييييييلة من السيجارة ونفخها وعينيه مكيرمشوش كيشوف قدامو وكيحك فلحيتو بصبعو ديال سبابة …
نقز واحد من هادوك الي جالسين معاه …روسي الجنسية …
ايمانوييل : علاش قتلتيه ؟
فؤاد “الصمت كيشرب وكيكمي مجاوبوش كيشوف غير قدامو ”
ايمانوييل : علاااش قتلتيه ؟ باشمن حق ؟ كان ممكن تسولو وبلا هاد التصرفات شنو هادشي فؤاد …
فؤاد ” كما حتى كما على خاطرو شرب ماتبقى من الكاس ضار شاف فهذاك الي حداه والي كيرافقو اسمو فلاديمير ناض كب ليه كاس وهو مكلفش راسو حتى ينوض حدو كحز شوي جيهة ايمانويل …خنزر فيه وحط عليه الكارو شااعل طفاه ليه فوق حجرو حتى غوت لربي الي خلقو …هز صباعو وغرسهم ليه فقرجوطو حتى روحو بغات تخرج ….
ايمانويل : قخخح قحخحخ قحخه لا قحخحخخ …بقا غارسهم فيه حتى قربو عينيه يتغمضو وهو يدفعو بجهد حتى جا طايح ووجهو زرق …لوخرين ضربو طم فحال المعروضين ههه
فؤاد “ساس ايديه ومسحهم بكلينيكس … وهز الكاس سكل عليه وناض جمع الوقفة تبعو فلاديمير…
👰🏼يامنة sana mina 35👰🏼
تبعو فلاديمير تاهو يلاه غايمشي حتى تمات جايا واااحد مولاتي الى قلتي عليها قرطااسة راها قرطاسة بمعنى الكلمة ….طبعا الجمال الروسي طاااغي فديك البلاد …القوق,, التوت ديال بصح …البياض الناصع العينين زرقين … ولكن مسمرة جسمها …
هي طويلة ولكن طولتها موصلتش لطولة فؤاد داك صنديد ضخم الجثة البارد الطبع الساخن النضرة اعصار الغضب …الي كيطبقو نيشان بلا هضرة وتضياع الوقت فالبلابلا ….فورمتها كاي بنت من داك نوع كتلعب عليها وكتهلى فيها باش تبقى بداك القوام الممشوق …والمؤخرة البارزة …شعرها البني دايراه جنب …فمها او شفايفها مرسومين بالعكر حمر مغلوق ماط عطاهم جمالية …بشرة صافية …
لقاتو غادي كيلبس فمونطوه حتى وقفت ليه عند وجهو قربت ليه بزاااف حتى بغات تلاصق معاه …يلاه بغات تبوسو فشفايفو وهو يبعد وتخطاها غادي مخنزر وعاقد غوباشتو مزير على سنانو بالعصبية من هذاك خينا حتى وقفاتو بصوتها ….

هي : فين غادي ؟ انا عاد جيت …
مجاوبهاش تم غادي وهي تجنن …كتمووووت عليه مووت فؤاد شي حاجة مقدسة بالنسبة ليها …مشات كتجري كانت لابسة كسوة كحلة بصماطي وصباط طالون ذهبي …
وصلت حتى لعندو ومشات ليه قدام وجهو ثاني …هييي عطييني وقت علاش كتجاهلني …
فلاديمير : ايشا “غمزها وشير ليها براسو بمعنى سيري حسن ليك ” …
ايشا “حطت ايدها على كتفو دفعاتو بشوي منو وغييير حطتها ماعرفتش كيفاش وقع حتى لقات راسها ايدها تولات ليها حتى تسمعت طرطيقة ديال دراعها ” : اااااااااااااااااااااااااااي اهى اهى ….
شدها من فكها وضغط عليه حتى زادو نزلو دموعها …كتحس غير بانفاسو سخووونة على وجهها اما هي عينيها مغمضين من حر الالم …
دفعها حتى تلاحت لارض تخطاها عينيه حمرين معصب بزاااف …مناش تعصب هو الي عارف وزاد جننو لاخور الي كان غايقتلو لولا لطف الله وتحكم فراسو ….خرج هو وهي بقات تغوت وتبكي بحر الالم ديال ايدها الي طرطقها ليها …هبط لعندها فلاديمير …
فلاديمير : قلت ليك راه عدوه ضصارة عدوووه ضصارة بقيتي حتى جبتيها فعضامك ا انسة ايشا ايفانوفا …”هز راسو” …هزوها ديوها ل بالنيتسا “المستشفى” …
👰🏼يامنة sana mina 36👰🏼
مشا لسيارة ديالو وركب فيها …خلا فلاديمير فسيارتو وصى على الي يتبعو حيث دعوة مكتعجبش فهاد الفترة بينو وبعض الاشخاص شي مشاحنات …ورك عالكسيراتور وزاد طار حتى تهزت طوموبيل وخلاو روايد بلاصة لحموم …
فلاديمير هز الفون وتاصل بواحد الشخص …الو …ايلاف …
ايلاف : رد ليه البال راه تصرفاتو غايجبوها ليه فراسو …
فلاديمير : معصب هاد الايام مبقاش كيتحكم فتصرفاتو بزاف …
ايلاف : الي عليك ترد ليه البال هو مننا وفينا عارفو مكيخافش ولكن راه كيبقى عضو معانا وروس الكبار عزيز عليهم مغايبغيوش واحد فخدمتو عندنا توقع ليه شي حاجة …حتى نساليو شغل الي فكولومبيا ونجي لعندو …
فلاديمير : وخا سي ايلاف كون هاني …قطع معاه …
هو بقا مكسيري وغادي مسافة طويلة شوي حتى دخل لبيست المؤدي لدارو …سمع العساس صوت السيارة عرفو هو حل ليه قبل ميوصل …بقا غادي حتى دخل نيشان لداخل …
دخل لدار …حيد المونطو ولاحو وهو يوقف فالنص …عينيه حمرييين بكترة ماكما فداك الگارو والشراب …غوت غوتة وحدة بسمية يوسف الي فشلو ليه ركابي …يحساب ليه كشفو …
يوسف : ااااايما الحبيبة شكون قالها ليه ؟؟ ماعرف باش تبلى مشا كيجري هبط لعندو قبل ميزيد تعييطة الثانية ويصدق طالع لعندو موريه الشمس ف مالاوي …
يوسف “هبط لعندو لقاه واقف صدرو منفوخ عينيه منيرين ” : نعام خويا …
فؤاد “شاف فيه ” جيب الوراق نسنيهم ليك صباح قبل ميطلع نهار تكون شاد طريق لمغريب …قاليه هاد الهضرة ومشا جيهة المكتب …
ضرب ضورة ورجع طلع جاب الملف وهبط كيجري ويولول سمع الفون كيصوني خلاه وهبط لعندو بجرا …دق ودخل لعندو المكتب …عطاه الملف …
فؤاد “حجبانو عاقدين حداش وشفايفو كيتورمو حيث ضاغط على سنانو ..شد الملف حلو مشا لستيلو ديالو هزو وبلا ميشوف فالوراق كيهز فيهم غير من لتحت كيسني يسني يسني حتى حبس واحد اللحضة …هز عينيه نيشان فيوسف مخنزر … …شاف فيه …
فؤاد : هادو وراق كثار على الي قلتي ليا …
يوسف : غير حيث وراق ديوانة فيهم بزاف والباقي عادي ووراق السلعة ديال الوليد راك عارف هو معارفش بالي نتا الي مكلف بيها خاصة داك نوع ديال العود كيجيه من البرازيل عارفني غير انا الي مكلف …
فؤاد “كيشوف فيه يشوف حتى حذر راسو وسنا عليهم كاملين جمع الملف سدو بالزربة وعطاه ليه …كيهضر معاه وعينيه مكيشوفوش فيوسف …” : دير شنو قلت ليك تفاهمنا …

يوسف : صافي كون هاني …
فؤاد : عندي شي مشاكيل هنا مخاصكش تكون هنا …رد البال لدار وخوتك والوليد …مبغيتش نجي لقا المشاكيل فوجهي …مخلي خوتك على راحتهم …متخلينيش نضطر ندير كاميرات فالفيلا ولا مراقبة ليكم كلكم … يوسف : لا لا غير تهنى وايلي …
فؤاد : ورجع حيد داك الوشام من لحمك …مبغيتش نتفاهم معاك حيث بعقلك …
يوسف “حدر راسو ” : واخا …
فؤاد : تصبح على خير …
يوسف : تصبح على خير …ابتاسم ليه وخرج من المكتب طلع نيشان لفوق البيت حط الملف فصاكادو وحيد القبية الي لابس بقا غير بسروال قطن والفوق عريان …صونا ليه الفون ثاني …جاوب مشربن …
يوسف : الله يلعن سلسفيل بات مات مك البغل الكيدار الدحش الكارووش …
صهيب : عنديلمك الحماار …
يوسف : غانرجع صباح نركل طاسيلتك غا صبر …فرعتي ليا **** خربقتي ليا الكارط مير بتعياط واش لديلمك مالكم كديروها بلعاني …
صهيب : حق ربي حتى غير خفنا عليك يوقع ليك شي مشكيل …امضرا …
يوسف “عاد سرا معاه راه سلك منها بيخير …طلعت معاه الباردة ورجع سخف ” يااااااااااااخووووياااااو خوووووووياااااو خوياااو …
صهيب : اولدي …
يوسف : ياااااااويلاااااي ويلااااي ويلاااااااي …
صهيب : ابنتي …
يوسف : ههتهتهتهاهتتتت هنتتتتت …
صهيب : اش كاين الخراااا …
يوسف : صلي عالنبي …
صهيب : عليه الصلاة والسلام …
يوسف : بارك ليا سربيسي اللول خرج على خير ….
👰🏼يامنة sana mina 37👰🏼
مع توالي الايام والتحضيرات من جيهتهم فرحانيين ومقاداهم فرحة وتوثر العروسة الي غادي تفارق دارهم الي تربات وسطهم ووسط جيرانهم حتى هما …تربات وسط دوار وشكون ماعزيزاش عليه يامنة بنت مصطفى حفيدة مي زينة القابلة ديال دوار القديمة …
دخل عليهم مصطفى مع داك الصباح عاد جاي من الجامع صلى الفجر وراجع طوالة عاد وصل لدار حتى بان ضو …لقاهم عاد كالسين كيتسناو فيه باش يفطرو نفس الروتين الي تعودت عليه يامنة هاهي قريب بزاف تودعو …
مصطفى : صباح الخير …
بزوج : صباح الخير …كلس كبت ليه قهيوتو كيف العادة …شد الكاس شرب منو وحطو …هز ايدو حطها فوق كتافها …
مصطفى : بنتي الله يرضي عليك نتي غاتمشي لدار راجلك دارك ودار عمك ابنتي الله يرضي عليك ماشي من لول تحي تشكاي ولا تغضبي فعائلتنا المراة خاصها تكون صبارة وصبارة ماشي جوج كلمات تعيطي ليا …نتي غاتمشي لدار عمك قبل من كلشي يعني فحالي فحالو والي ضراتك شكي عليه هو …وصبري لراجلك هو را وخا قوصيح شوي وليني نتي متعصايهش وسمعي ليه ….
انا كنعرفك صبارة مكتهزيش العين طبعك بقاي عليه ابنتي وميخصك حتى خير …ولد عمك منك وفيك …من الخير وربي غايرزقك براجل من دمك ومكاين ما حسن من خيرنا …هاد العاهد ابنتي راه قديييم بيني وبين عمك وهو متوارت عندنا فالعائلة …عمك الله يطول فعمرو تزوج ببنت عمنا نيت غير انا الي سلكت حيث مكانتش عندنا شي بنت العم كلهم كبر مني غير هي الي كانت قدها قد الحاج …ولدات هاديك البنت صغيرة راوية على كبر شوي هي والياس …
ربي مرزقهاش الولاد حتى دازت خمسطاش ل عام عاد خرجت تولد براجلك وتبعاتو يوسف من بعد عامين… عاد جاو لاخرين من بعد اعوااام تاهما حيث تعطلات فالولاد تاني …ولكن ربي بغاها قبل متكبر البنت فحجرها …باش نوريك ان من بعد الصبر صبر صبر كيعطي ربي الفرج …صبري ابنتي وزيدي فصبرك راه ربي كبييير ….”مسح دمعة من عينيه ”
وخا غاتخلي علينا دار خاوية ابنتي ولكن هذا المكتاب …المهم عندي غاتعيشي وسط الخير وهادشي كيتمناه اي بو لبنتو …
يامنة “دموعها دايزين وحادرة عينيها كتسمع ليه حتى ناضت باست ليه ايديه “: واخا ابا كون هاني اهى اهى …تبعتها زينة حتى هي بدات تبكي وتنوح على فجيلتها …حتى سكتتها بزز …
مصطفى “ناض كيمسح فدموعو ” : مي زينة براكة من البكا عينيك طابو هذا هو المكتاب غذا ولا بعدو غادي تمشي لعند راجلها …
زينة : وشكوون غايقوم بيا وشكووووون غايسخن ليا الما وشكووون غايمد ليا تيمومة …ياوشكووون غايضحك معايا وينعس ليا عند راسي …يااا وشكووون غانفيق مع الصباح
شكوون ياو شكووون غايعمر عليا دويرتي شكون “دموعها دايزين وعينيها حمرين حتى لونهم الاخضر ولا مشعشع ” …يااا كبدتي
ماهي هنا ولا لهيه يااااا كبدتي غادي طول طريق عليا وخاصني ليها جوج كيران وشوف تشوف …يا ضو عينيا المرضية… قلبي ماهو هاني عليها ..يا فجلتي منعرف ليها غير انا وشكون يهز ليا ونهز ليه هبالو …يا خلات علينا دويرة سي مصطفى وليدي خلات علينا البراكة …يا بقاي ياااا بنيتي مقديت على فراقك …اسي مصطفى قلبي ممهنينيش عليها …
يامنة “كتبكيييي تلاحت عليها معنقاها وكتنخصص معاها “: صافي مغاديش نمشي اهى اهى هاني معاك معااااك اهى اهى …
👰🏼يامنة sana mina 38👰🏼
مصطفى : ههه يهديكم الله راها عند عمها ووسط عائلتها اما حسن من دمها ومنها وفيها ولا البراني يتكرفص عليها …
زينة : البراني كيكون حسن من الي منك وفيك الخير الي تلقاه فالبراني ماهو فالي من دمك …ابنيييتي وكيما قرب الوقت قلبي كيضرني عليييك افجيلتي …اربي هاد الفجلة عنداك يخليوها تلوا ويكحال لونها …
مصطفى : الله يهديك …هههه الحمد لله على كل حال هادي حال دنيا ربي معانا …كل ورزقو ورزقها مع ولد عمها …يالاه انا مشيت لسوق مع سي لعاطي وولد ف البيكوب باش نجيبو ديك الضروبة من سوق “الضروبة هي عجلة او عجل او ثور ” وغايجيو باش يبنيو الخزانة من اليوم باش كلشي يكون ناضي والكراسا ويقادو جيهة العيالات …وعيطو لدريات يفرشو دار لاخرا را بعد غذا يكونو هنا …
يامنة “مسحت دموعها وهي وسط حضن جداها ” : و واخا ابا …سلم عليهم وخرج …واحد شوي حتى جات زهور وسارة ثاني يعاونوهم …كلسو نيشان قدام طابلة …
زينة : لفعة سيري ديري الما يطيب وعجني مخمار وعجني طرح الملوي والمسمن نتي ويامنة …
سارة : وخا مي زينة …”مشات تجري دير شنو قالت ليها يلاه بغات تنوض يامنة تبعها وهي تحبسها زينة” …: كلسي وسمعي من زهور اش غانقولو ليك …جلسات لارض حداهم …
زهور : هانتي فاول ليلة عقلتي اش قلت ليك ياك …خليه هو يتصرف …وعنداك من يبان ليك ديالو تغوتي ولا تهربي …
يامنة : اويلي علاش 😟
زهور : ايوى شوف ليك غير دكرناه خافت ماعساك كون شافتو مباشرة …يا هااه متخافي مدهشي را صعيب فلول وفتالي ايعجبك …
يامنة “مبقاتش فجلة ولات مطيشة كلشي ولا حمر فوجهها ” ..اننن
زهور : يا مي زينة البنت تزيزنت غير من الهضرة عليه وتي را البنت عقوووبة …
زينة : ههه راها متعرف لداكشي… مزيان من فقهتيها …بنيتي سمعي اش قالت ليك …ومن يجي يدخل عليك خزني داك سروال باش نشوفو ونرضى عليك …ونوضي خودي من عند لفعة ديال سارة الما ديري فيه شيح وتوضاي بيه وسيري لبيت سبقينا هاني تابعاك …
يامنة “مفهمتش ولكن دارت شنو قالت ليها “…من بعد شوية دخلت لبيت وتمت داخلة مي زينة وزهور منعت زهور على سارة باش دخل عليهم سدت البيت وراها شي الي خلا يامنة تخلع ومتفهم والو …
زهور : حيدي سروالك وكيلوطك ونعسي ايامنة ..
يامنة : علاش ؟

زينة : ديري اش قالت ليك …حيدت سروالها وحناكها بغاو يطرطقو حشمانة بزاااف …جابت ليها زهور ايزار حتى نعسات عاد غطاتها وحيدات الكيلوط …جابت ليها مخدة دارتها تحت منها وعلات رجليها …جات زينة هزت ليزار وخا كبرات باقي كتفرز وتشوف …جابت زهور البيل وشعلت عليها ضو حتى قلبتها …هزت زينة راسها …
زينة : نوضي الكبيدة الله يرضي عليك ابنتي نوضي الله يفرحك دنيا واخرة ونعم البنات وتربية …الله يطمن قلبي عليك …ناضت يامنة لبست …عرفت بالي قلبوها وخا زينة متاكدة من بنتها …ولكن زهور كانت ضمن شهود بانها بنت بنوت …جرتها لعندها باست ليها جبهتها …
زينة : هانتي الولادة لولة ليك انا نولدك ونوقف عليك وخا كبيرة باقي نولد قبيلة …الى مولدتك انا منسمح ليك هاا …
يامنة : وخاا امي ههه ..
مي زينة وااااموووي زينة سولي داك شيخ الغفر ولا العمدة ديال صعايدة واش غايقيصها عاد نشوفو الولاد عههههه
👰🏼يامنة sana mina 39👰🏼
على قطرات المطر الخفيييفة جدا …رائحة التراب المبلل التي تبعث في نفس الانسان الراحة …الي كتحسي بنقاء الطبيعة فيها والي كتميز بيها هاد المدينة وهي النقاء والجو الي كيعطي راحة وهواء بارد ونقي …كان الصباح …الفطور فالكوزينة كيوجد فانتظار ينزل الحاج والدراري الي تصادف ايضا بالي صهيب بايت تما ….
كل مرة واش… كيبات تما ولا فبارطما ديالو في فاس …ولا فالفيلا وحتى هو عندو بيت جنب بيت الام ديالو الي مخلاوهاش دراري تمشي معاه واكثرهم الوحش الي كيولي طفل قدامها وميهزش فيها العين نهااائيا …
الحاج الي كان فالبيت ديالو كيجود القران مع الصباح …ما تيسر من الذكر الحكيم …كمل وناض لبس جلابة مليفة غليضة سخونة فالبوردو مخيطة بسفيفة ملكية فالابيض وسروال قندريسي مع تقاشر بيضين وصباط موكاسان فالابيض لون سفيفة ….لبس نضاضر شوف ديالو وهز التسبيح فايديه ودار طاقية فالابيض مطرزة بالبوردو …حك شوية المسك وسما الله وهبط ….
دخل المكتب ديالو فانتظار تعيط ليهم نجود باش يفطرو ويتجمعو دراري …يلاه كلس حتى دق الباب ودخل كان مع وصلتو جا نيشان من مطار فاس سايس دخل لعندو ديريكت …
يوسف : صباح الخير الوليد …
الحاج “ابتاسم حتى بانو سنانو ” : اهلاااان ولدي الحنين على سلامتك …
يوسف ” مشا باس ليه ايدو وراسو كيف العادة ” : كي وليتي شوية …
الحاج : بييخير الله يرضي عليك …امتا وصلتي …
يوسف “عبر ليه بايدو ” عاد دابا جيت نيشان من المطار …
الحاج : كيفاش ركبتي بكري …
يوسف : ركبت قبل تلاتة صباح فطيارة خاصة رسلني ليها …
الحاج : دغيا رسلك مالو اش كاين …
يوسف : ماعرفتش عندو شي مشاكيل سنا ليا الوراق بالخف ورسلني مغايكونش فموسكو هاد الايام داكشي باش …
الحاج : اممم …”حك على لحيتو الكثيفة البيضة بالشيب ” ..
يوسف “بدون نقاش وصل عيااان ميت مسالي سخفان كلشي تلاقا عليه باغي غير ينعس ” هاهي الورقة الي عليا درتو ونتا وشطارتك الحاج …غانمشي نعس عيااان …مخلاهش يهضر حدر راسو وضار خرج من المكتب مخليه …

يوسف : خليتك نتا وضميرك الحاج …الله يحضر سلامة وصافي …تم غادي حتى وصل لدروج وهو يتلاقا بالياس وصهيب عاد نازلين …
صهيب : هايهاي هاي هاي على سي الحاج …على سلامتك …
يوسف : لا رد …كيتسنى فيهم يكملو باش يطلع يصهط مفقووووووص …
الياس / خويا امتا وصلتي …
يوسف : عاد وصلت بغيت نمشي نعس …
صهيب : مالك ايوسف …
يوسف : “تنهد ” انا اكبر حمار …خلاهم ومشا طلع …
صهيب : ياه عاد عرفتيها 🙄…
👰🏼يامنة sana mina 40👰🏼
نزلو دراري وجا الحاج لحق عليهم ضروص العقل كيبانو ليه …وسنانو كيبانو مستفين بكترة مكيضحك ومع مركب فم كيبانو بيضين ومستفين …غير كيضحك وفرحاااان وتقولي معندوش سوق فداك البركان الى فات حتى ناض العافية ومتقدهمش …تيلعب معاه بالنااار …كلس كيضحك حطت ليهم نجود الفطور وكلسو يفطرو …حتى سمعو صوت الهضرة عند الباب …حتى جات كتجرييي شعرها كيطاير وتضحك …
راوية “عنقت باها من لور ” : بابااااااااا …
الحاج : اه اه اه هههههههه اهلان اهلان بنتي الكبيدة على سلامة …
راوية : الله يسلمك …
الياس : اهلاااان سلوم تريسيان …
راوية : تفوو عليك …مشات لعندو عنقاتو حتى جمعها معاها بصلية تا بان ليها ضو كيضرب …
الياس : يسمح مك گرينك دفلي عليا تيهبط يوسف ابلاتي …
راوية : اسمح ليا هاناري …
سلمت على صهيب تاهو عنقاتو …صوصو …
صهيب : مك انا على سلامة …
الياس : اقلبي عليا تنوصلها لجهات العليا …
راوية “تخلعت ” : الا غاكنضحك معاك والله 😰بابا هضر معاه ….
الحاج : والله يالعجل ومتفرق عليها تنتفاهم معاك …
راوية : هههع عجل …فين يوسف …
تم يوسف هابط من سمعها لابس سروال قطن بيض وتيشرت كحل …هاني ازوينة هااني …
صهيب “ضار جيهة الياس ” تا ياك مشا ينعس …
الياس : باقي شي حد غاينعس هاد الايام خلينا نعيشو ايامنا خليييييييينا …
يوسف : مكاين بو نعاس مجانيش حتى ليل باش نعس نيشان …ناضت راوية مشات تجري لعندو تلاحت عليه عنقاتو …خويااااا …
يوسف : عنكش ليها شعرها …بنتي على سلامتك …
راوية “من بعد ماكلسو فطابلة مجموعين ” : ايوى اشنو كاين ؟ مقلتو ليا والو جايبيني… جي فالويكاند …شنو جاري ..
الحاج “تقاد معاها وعاود ليها اشنو كاين “….
راوية : لا رد بقات غير تندغ فالماكلة وتحنزز فباها …
الياس : تا شكون دار ليها پوز هادي …
صهيب : شكون شرط ليها CD
يوسف : نغز الخرية توگض معانا …راااااوية …
راوية : هااا نعاام ..
يوسف : داكشي الي كاين وجدي لعندك شي قفطان ولا داكشي الي تتلبسو …

الياس : سلوم تريسيان خاصها ستة ميترو ديال توب …
راوية : ولكن الى عرف ؟
الحاج : حتى نقضيو الغراض …
راوية : وعمي معارفش اشنو غادير والى صدق فؤاد جاي راه هو مكتعرفش امتا كيجي فاي لحضة يكون هنا …
الحاج : لا مجايش غير تهناي …
راوية : ماعرفت ابابا …انا غاتبقا فيا البنت …اجي شحال فعمرها …
الحاج : صغر منك بخمس سنين …
راوية : mais nooooon بزاااف باقي صغيرة …
الياس : كيتك البايرة …
صهيب : عههههههه
راوية : بزاااف عليك انا راه غانقرا مستقبلي هو لول ماشي فحالك ماشديتي الاجازة غا بزز الكسول …
الياس . : غانوض نضرب حبك تيبان ليك الخدير …جمعي راسك وحتارميني …
يوسف : اليااااااس راوية جمعو راسكم وكونو تحشمو اش هاد البسالة يلاه فطرو وسدو فامكم 😡…
راوية والياس : وخا سمح لينا …
👰🏼يامنة sana mina 41👰🏼
الفرحة ديال العرس كتكون مرة وحدة فالعمر واخا يكون زواج ثاني ثالث ديما فرحة العرس الاول كتكون وحدها …طبعا لان العروس كتكون اول مرة ليها وخاصة وهي بنت كتكون فرحة مخلطة بتوتر ودقات قلب كتسارع …
كان الصباح …الجو زوييين مشمس بعد ايام دازت ديال شتا فديك المنطقة …باقي دنيا مغيسة …كان اب يامنة واقف قدام باب دار مصايبة ومشطيبة دنيا ومقادة الخزانة او البنية …واقفين العيالات قدام الباب ويامنة لداخل فبيت باها هي وجداها ….خرجت سارة لعندهم …
مصطفى : هاهما جايين …بانت ليهم زوج طوموبيلات من نوع كاتكات واخرا رينج روفر داخلين لدوار والدراري صغار تابعينهم كيتجاراو حتى قربو لدار عاد بعدو …
كانو العيالات هازين طبسيل تمر معمر بالكوك ملون نضرا للحالة متسمحش باش يكون لوز …وابريق ديال البديع فيه الحليب بما زهر بجنبو كيسان ديال البريق …ومريشات عامرين بما زهر …غير وصلو وهما يبداو يصليو عالنبي ويزغرتو …حتى وقفو …هبط الحاج بجلابة فالمسكي وبلغة صفرة …ومعاه يوسف بقميجة فالابيض وسروال كحل فصالة وصباط كحل لامع …وراوية بجلابة ديال مليفة فالبيج مطروزة بالطرز الفاسي وطالقة شعرها وبوط فالمارون ….والطموبيل لاخرا فيها الياس بقميجة كحلة وسروال دجين وسبرديلا …وصهيب بكومبلي فالاسود …ومعاهم نجود …الي حتى هي بجلابة جوهرة فالاخضر فاتح بالتحتية ديالها فالابيض …دايرة شال فلون التحتية مزوق بلون جوهرة سخون …وكاب على كتافها …
الياس مشا حدا يوسف وصهيب وراوية تستفو كي العزاية ههه …
الياس : احح داك تمر المعمر …
صهيب”ليوسف ” : تا ضرب ليا عالزين كاين فهاد البلاد اعشيري
يوسف : من الي وعيتي وبلغتي ونتا باغي تخطب هلكتينا فصحتنا بهاد الهضرة …
صهيب : غا باش تسكت الوليدة والوليد …
راوية : واااعر هنا بغيت نشوف المعاز والبهايم 😻…
الياس : شوفي غير فالمراية وغادي تشوفيهم …ايه تهضري نملخ ملتك وسط شي خرية ديال البهايم ودي متعاودي ففرنسا …
الحاج تعانق هو وخوه وهو يتقابل مع ولادو زيدهم سلمو عليه واحد تابع لاخور وحتى نجود …
مصطفى : مرحبا مرحبااا …عطاوهم الحليب وتمر وبداو كيرشو عليهم من بعيد بالمريشات …حتى دخلو والعيالات يزغرتو ويصليو عالنبي محمد عليه افضل الصلاة والسلام …دخلوهم لدار المجاورة الي كبيرة ومصلوحة بحكم مولاها كيعيش فالخاريج كان بالفرحات عليه يسلفها ليهم ونيت يضورو بيها وينقيوها …دخلو لداخل وكلسو فواحد صالون كبير ومصلوح مزيان بالنقش وصباغة ديال تدلاكت مفنين فزواقها …
حاطين صينيات كباار ديال برارد اتاي

مصطفى : على سلاامتكم ومرحبا بيكم اوليداتي …
الحاج : الله يبارك فيك اخويا …فينهي بنتي يامنة …
راوية : اه اعمي بغينا نشوفو مرات خويا …
الياس “تيهضر مع صهيب ويوسف بشوي ” : غاكتقول هاد الكلبة هاكا تيشدني الوجع فكرشي اخويا …
يوسف : ترجل نعلديلمك روي ستون وهنينا تيدوز كلشي بيخير …
صهيب : فرح ونشط وشطح …”هز راسو لسما “ياااربي يكونو شيخات ياربي …
مصطفى : ايييه هاهي نعيط ليها هي ومي زينة ..
الحاج : وخير ماتعمل ….
#تمشى بخطوات سريعة كيقرقب بصبطاو فالممر المؤدي لمكتب ديالو …دق حتى حنحن ليه ودخل …
فلاديمير : نعماس …
فؤاد “هز فيه عينيه مخنزر ” : داك صباط لمرة جايا منسمعش صوتو هنا …
فلاديمير : وخا سمح ليا …
فؤاد : الاسبوع جاي وسط سيمانة بضبط مع صباح لفاس نيشان …
فلاديمير : وخا غانمشي نعطي تعليمات دابا …حدر راسو وخرج من المكتب …
فؤاد “ساط دخان لگارو بزااف وعض فشفايفو كيشوف قدامو بنضراتو شرسة “….
👰🏼يامنة sana mina 42👰🏼
ريحة الماكلة بدات كتعطي …ريحة الطياب وتوجاد بدا كيعطي …ناس داخلة خارجة عندهم …جو حميمي بزاااف فداك الدوار بيناتهم ….كيكون العرس ضروري تلقا دار عامرة فاليومين الي غايكون فيها العرس الي فعائلة يامنة كايوجد على حقو وطريقو …بفرحة وتوثر مخلطة …ولكن من جهة دراري كاين نوع من الخوف وحتى الحاج بنفسو متوثر ولكن ملي عطا كلمتو مبقا عندو ميدير …الكلمة هي الكلمة وخاصة انه داخل فتحدي كبيييير مع ولدو الي بغا يحطو امام الامر الواقع ولكن غااافل على ديك اليتيمة الي غادي يحطها فابشع موقف وهي عند بالها حاجات وضن اااااخر تماما ….
مشا اب يامنة باش يعيط ليها ويجيب معاه حتى الجدة زينة …
دازت تقريبا نصف ساعة حتى تم داخل وتابعاه يامنة الي تبدلت تمااما بالوصفات الي كانت متبعة يوم عن يوم ومواضبة عليهم والي قالوها ليها ديرها وطبقها بالحرف الواحد …حتى بان عليها السر ديال العروسة وطبعا هي زوينة بزاف جمالها غنوج مبطبط…تقول ماشي بنت ديك المنطقة …زاد صفا ليها وجهها وتشققات ديال حناكها مع البرد وتمارة ديال شقا اختفاو ورطاب ليها وجهها …حناكها فحال وريدات حمرين …شعرها الي صاوبوه ليها …لابسة قفطان جوهرة براندة ديال لكروشي ( الكروشي كيديرو بيه راندة ناهيك على راندة الي بالابرة هاديك كتكون غالية ) نضرا للحالة المادية ديالهم …
لابساه فالمسكي ودايرة شال فنفس اللون …وبليغة فرجيلاتها كيبانو مزنگين حتى هما ( وصفة الخميرة الي عطيت والحامض ولعكر الفاسي وصابون بلدي كتخليهم فرجليك وتلبسي عليهم تقاشر وتباتي بيهم وصباح تمشي لحمام هما الي كيعطيو هاد نتيجة والى معندكش عكر فاسي كديري يا تحميرة او دوا الحمر…) …
مدايراش نقطة المكياج فوجهها غير ملامحها كانو كافيين وموفيين …مبغاوش يديروه ليها حتى تنقش باعتبارها غادي تبرز غير برزة وحدة بلبسة وحدة …وحتى تمشي عروسة عند راجلها عاد تزوق ليه وتماكي ليه وتلبس ليه الي بغات وبغا …ضنهم شيء والواقع شيء اااااخر تماما …
شادا فدراع جداها وجايباها معاها …حادرة راسها وشادة بالايد لاخرا شالها لا يطيح ليها من على شعرها البني …
زينة “عند باب صالون ” : سلاام عليكم …
الحاج “ناض كيحضك لعندها سلم عليها من راسها ” : اهلاان وسهلا بالحاجة زينة ..صحة لباس …
يامنة “تحدرت باست ليه ايديه ”

الحاج “مبهور بيها كتبان كبر من عمرها ” : مااشاء الله على بنتي ماشاء الله …اجي نعرفك على ولاد عمك وبنت عمك …والحاجة نجود عگوزتك بالتربية …حدرت عينيها ودخلات شادة فجداها حتى كلستها …وناضو دراري واحد تابع لاخور كيسلمو عليها باحترام حيث اكبر سنا ولازم يجيو حتى لعندها …عرفهم عليها واحد واحد وشكون هو واش كيدير حتى لنجود وشكون هي …وصلو لعند يامنة …
يوسف “كيشوف فيها غير من حناكها حيث حادرة عينيها حشمانة بزاف كترعد وفمها حتى هو …” ختي يامنة ! …مد ليها ايدو …متشرف بيك ابنت عمي …
يامنة “مدت ليه ايدها سلمت عليه مشافتوش حتى كيف داير …حشمانة وكترعد حيث الانضار عليها كعروسة وشكون وكيفاش دايرة …طبعا شيء طبيعي ” شكرا خويا …
ناض الياس حتى هو سلم عليها باغي غير يشوفها كيف دايرة داك نص الجمال الي شاف بغاها تهز عينيها باش يكمل نص لاخور هههه …ناضت راوية …
راوية “كتشوف فيها حمقتها غير من شوفة لولة واشنو لابسة ” ختي يامنة بنت عمي ههه تشرفت بيك …
يامنة : حتى انا ختي راوية …
نوضها باها باش تسلم على الحاجة نجود حيث فمقام الام ديالها واكبر شيء طبيعي تنوض لعندها هي تسلم عليها …
نجود : مااشاء الرحمٰن…سلمت عليها ورجعت لبلاصتها حدا جداها وراوية…
وجد اتاي وتوزع عليهم …كالس الحاج حدا خوه كيناقشو امور الخطبة والعرس الي غايكون فيومين …وصا الي يدخل حوايج الخطبة الي تقداهم الحاج بمساعدة نجود والمكياج بمساعدة راوية ..وجد ليها وشرا ليها كلشي من الف الى الياء ..كاع الي تحتاج باش منهم الي يتحط فالدفوع والباقي غادي تلقاه فبيتها فالفيلا …
والسؤال يبقى واش بيتها جديد او البيت ديال شيخ الغفر ديال فؤاد ههههه
👰🏼يامنة sana mina 43👰🏼
توزعت الحلوى الي محطوطة هي والفاكية عليهم كاملين …صهيب جنب الياس ويوسف جالسين كي الامانة …يوسف الي مرة مرة كيهز راسو فيامنة كيزيد يتزير وكتزيد تازمو خاصة انها فرق كبييييير بينها وبين خوه …ليس بالعمر وانما بديك البنية ديالو هو ضخم الجثة مقارنة مع بينتها هي وخا غليوضة شوي ولكن شتان الفرق بين بنياتهم بزوج …غير شوفة منو الى شافتو تخلعها فمابالك لو وقفت حداه …ياترى واش غايكون وحش قدامها ولا غادي يكون حنون …طبعا فنضر يوسف الاحتمال الثاني مستبعد …
اما راوية ملي سلمت عليها وهي لاصقة حداها كاتهضر معاها باش تطلق شوي فالهضرة وتحيد منها الحواجز الي باقي بيناتهم ….
راوية : حبيبة ديالي علاش حشمانة منا ؟
يامنة : لاا ههه
راوية : متحشميش انا بنت عمك وفحال اختك متنسايش عندنا كنية وحدة وعندنا دم واحد احبيبتي ..الي بغيتي تسولي عليها انا نجاوبك والي احتاجيتيها انا معاك وخا غادي نغيب عليكم فالدار لهيه ولكن غانجي مرة مرة وغانجي فالعطلة …وخا …
يامنة : واخاا هههه …
“راوية شير ليها الياس باش دير شنو قاليها فميساج الي رسلو ليها فتليفون” …احم يامنة ..هانتي متحشميش هزي عينيك وشوفي لهيه كاين الياس وصهيب وخا ماشي شقيقنا ولكن مربي معانا تاهو خونا وتاهو حسبيه ولد عمك …هزي عينيك وشوفي فيهم متحشميش راه غادي تولي تشوفيهم ديما معاك فالفيلا …
يامنة “جاوبتها براسها بنعم وهي تهز عينيها شوي بشوي شويييي بشوي حتى استقرو عليهم ”
الياس : وااااكواك واك واك تا ضرب ليا على توت البري الي غايكون مرات خوك …
صهيب : تا والله تاتستاهل هاد المعركة كلها هاد الفريز تاع سويد بربي ميخرج من دائرة رمسيس غايتكرفص عليه البراني اييييه صدق من قال خيرنا مايديه غيرنا …ضرب عالعينين عااارت الله هادي كتجي لرمسيس هههه كلشي عينيه كحلين حتى ليها هي …
يوسف “تايحنزز فيها تاهو ” : قاليا الوليد كتشبه لمها ..
الياس : وااممزوج غا خويا حق الرب المعبود 😻…
صهيب : تا هادي كون انا فؤاد منخرجهاش من البيت ومنخرجش حتى انا …شغاندير بزنقة وبرا وكلشي عندي تا را ديسير استوائي هادي ..
يوسف : براكة من تعناب يعطيكم الزعل الكيادر زمو عينيكم راها مرات خوكم الكبير نعلديلمكم ….
👰🏼يامنة sana mina 44👰🏼
وصل وقيتة الضهر وناض الحاج ومصطفى يصليو فالجامع جماعة …وخلاو البقيك فالصالون …كالسة نجود حدا مي زينة كيهضرو ويناقشو امور الزواج ويتعرفو على بعضياتهم اكثر …
زينة “كتشوف فدراري ” : هذاك الشهيب هو ولدك …تبارك الله …
نجود : ايييه وهادوك الياس ويوسف ..يوسف هو الي مورا فؤاد والياس هو الي قبل من راوية …تبارك الله عليهم مربيين مكيهزوش العين فباهم ولا خوهم الكبير الي غايكون راجل بنتنا يامنة …يامنة سمعت الهضرة وهي ترجع حدرت راسها …فور مكتسمع سيرتو وسميتو كيضرب قلبها بجهد حتى كطلع معاها سخونية لحناكها ووجهها …
زينة “نيشت على الياس ” : هذاك الوليد شحال دخل ليا لخاطري …
نجود “شافت فين نعتت ليها ” ايييه الياس هههه هذاك هبيل عشرة فعقيل ههه …
زينة : الياس تبارك الله تبارك الله …الياس ..
الياس “شاف فيها ” نعام اميمتي ..
زينة : زيد اولدي لهنا حبني ( حبني هي بوسني ههه ) زيد تبارك الله تبارك الله …
الياس : حبني 😳…
صهيب : وييييييع ههههههههههههههههههههه
يوسف : ههههههه سير سلم عليها سير حبها هههههه وامي هههههه
الياس : هااانااري اش نحب ..
نجود : سلم عليها هي حبها يعطيك غامتاكل نتا وداك العقل الي عندك ..
ناض مشا لعندها عاود سلم عليها وهي كتشوف فيه وتعنكش ليه فشعرو …عز عليها بزاف دخل ليها لخاطرها وزينة من نوع الي كبير فالعمر وممكن الي دخل ليه لخاطرو كتعيط ليه يسلم عليها وضحك معاه …
تبارك الله تبارك الله شحال دخلتي ليا لخاطري ياولدي جيتيني كيفك كيف الفجلة ..
الياس : شكون الفجلة هههه
زينة : الفجلة هي بنتي يامنة حيث بيضة وحنيكاتها حمرين دايرة فحال الفجل ..
يوسف وصهيب مبقاوش صبرو طرطقو بالضحك …الفجلة 🤣🤣🤣🤣🤣🤣🤣🤣🤣🤣🤣🤣🤣 صهيب : وامعاااائي تشتتو اربي العالي …
يوسف : حق ربي تا هاد ضحك الي غانضحكو غايخرج فينا متني متلت ابلاتي …يا زيدناااااي … ضحك ضحك …اش قالت ؟الفجلة ؟ 🤣🤣🤣🤣🤣🤣🤣🤣🤣🤣🤣
👰🏼يامنة sana mina 45👰🏼
تعالت الزغاريت وصلاة عالنبي …فانتظار احضار العروس من مراكش من عند الكوافورة طبعا بتكاليف اهل العريس ..شافت راوية حالتهم متسمحش ليهم يجيبو كوافورة او تمشي عند وحدة مختصة ..شافت حتى انها مغاديش تبرز بعدة لبسات …بقات فيها واضطرت تديها هي وشيفور ونجود لمراكش باش تقاد ليها وتلبسها عالاقل تزف زفة زوينة باعتبارها بنت عمهم منهم وفيهم بغاوها طلع زوينة وتكون ليلة العمر …وتحس ان عندها عائلة وماشي يتيمة …
وبقاو دراري مع الحاج واب يامنة وسط رجال والطلبة الي كيقراو ويجودو بعض من سور القران الكريم …الصدقة كانت فالنهار وفالعشية كاينين العيالات وضريب صداق اي غايتكتب عقد نكاح بوكالة من العريس بدون علمه ههه …هذا هو تخطيط الي كاين لزفاف …وهادشي الي جرا …حتى وصلت العشية وتجمعو نساء فالبنية حتى هما …وبدا شطيح والضرب فانتظار قدوم العروس ….
هادشي كامل كيوقع ومول شي مفخبارو والو هادشي كامل جاري وهاد الاحداث غير فوجه باهم مقادرينش يهضرو ولا يتكلمو وفوجه هاديك الفتاة الطفلة الي عزات عليهم تخسر فرحتها …وهي معالماش بالي غايجرا ليها واش غادي تبقا عندهم كزوجة اخ ولا غايتحدى الاخ باه وتوقع معجزة …
حتى هو ضحية وخا عصبي متسلط وقاصح بزاف وخا غامض شرس وحش الا انه عندو الحق يعرف و يكون موافق وراضي ولكن دخلو العادات والتقاليد والعهد فوجهو …
بعد ساعات واخيرا وصلت سيارة العروس الي جايا مزوقة والكلاكسون خدام …خرجو العيلات على برا كيطبلو ويزغرتو ..تحل الباب وخرجت راوية بقفطان موبرا فالغوز مطرز بالارجونتي وطالقة شعرها الي صاوباتو بصباط طالون فلون طرز وصاك ديالو …ونجود بقفطان فالبيج مطرز بالذهبي وشال فالذهبي وكاب فالبيج …شادة راوية تيليفون كتصور وتفيلمي بجانب المصور الي كايفيلمي حتى هو …
كان مقرر تكون صدقة وعشا خفيف حتى تغير المخطط بحضور اهل العريس …
مصطفى”عينيه دمعو ” : الحاج لهلا يخطيك اخويا العزيز خيركم كتير اخويا فرحتو ببنتي الله يفرحكم …علاش عذبتو راسكم …
الحاج : يامنة بنتي ماشي بنت خويا ومرات ولدي …خيري هو خيرها وخير راجلها هذا …
مصطفى : لهلا يخطيك الحاج …

الحاج : يلاه ندخلو حدا العدول سي المختار …تعانق هو وياه …كانو بزوج فابهى حلة بجلالب المليفة غليضة وبسفيفة ملكية وبلاغي بخدمة الايد …الحاج فاللون ازرق واب يامنة فالابيض …دخلو لصالة الكبيرة بجانب العدول …حتى دخلت العروسة الي كانت الوصف ديال زوينة قليل فحقها …بقفطان فالگرونة مطرز بالصم ذهبي ومشيطة مطلوقة ومبوكلي ومكياج سموكي ابرز لون عينيها الخضرين …عكر گرونة ماط وفغاجو فالخوخي …تقادو ليها الحجبان شوي وبزز بطليب من راوية عاد باش قبلت …
داخلة حادرة راسها وبجنبها راوية والحاجة نجود وجداها الي لابسة دفينة فالموف ولاوية عليها شال فنفس لون …شادة فيها نجود وغاديين ورا العروسة حتى دخلت واستقرت جنب باها …شاداها القفقافة …
العدول : شكون وكيل العروسة ..
اب العروسة : انا اسي الحاج …
العدول “شاف فيه ” : غيير مبغيتش نخسر الحاج عبد العالي اما سي مصطفى البنية باقي صغيرة على السن القانوني …
الحاج : الله يكثر خيرك مرديتيهاش فوجهنا …
العدول : قلتي عندك وكالة من سي العريس …عطيني الوكالة …”عطاه الوكالة حتى قراها وبدا فمراسم العقد ” ودابا ابنتي قابلة بهاد زواج برضاك ياك ما بزز عليك تا حد ابنتي …
يامنة “ساكتة كترعد مجاوبت غير بزز وبصوت خفييييييييف ” ا اه ق قابلة …
العدول على بركة الله …استانف المراسم حتى كمل وهز روجيستر ديالو عطاه اب يامنة ليامنة وعطاها ستيلو …سنات وايديها كيترعدو …حتى كملو المراسم …
العدول : مبروك عليك ابنتي الله يجعلو زواج مبارك ومسعود بارك الله لكما وبارك عليكما وجمع بينكما في خير ….
كانو غير العائلة الي كالسين فداك الصالون حتى تمت المراسم وهي تنوض الجدة زينة زغرتات بصوت عيان حيث كبيرة ولكن فرحتها بحفيدتها الي حضرت لعرسها وشافتها عروسة فرحة لا تقدر بثمن عندها وكتشوف انه دابا عاد تهنات عليها 🤷🏻‍♀️
👰🏼يامنة sana mina 46👰🏼
داز العقد بسلام وبفرحة عارمة من جيهة العروس …وبقلق وتوتر وفرحة وخا هاكاك من جيهة اخوان العريس حتى من الاب فرحان وممسوقش لردة فعل ولدو الكبير كانه متاكد غادي يكون قابل وبالفرحات …غريييب امره …
بدا ضريب وشطيح…تعالت زغااريت من عند عيالات الدوار الي عرضو عليهم …بداو اللعابات بالغنا والي فيها الحال من الدقة اللولة ناضت تلوز وهالي بدا يسخن عندها الطرح ويسخن ليها راس بدات كطلق شعرها شوي بشوي باش توجد لجدبة …وهالي جرت صاحبتها وبداو يلوزو …مع طرح بدا يسخن مع تلواز كيتجاهد وشتيف وردح خدام ….هالي جابت جفنة وطلعت فوقها مع وحدة من اللعابات كتشقلب ولاخرا كتشتف على جفنة …. كانو دراري فالبيت لاخور الي فالدار ويامنة فالصالة والعيالات برا الدار فالبنية …
مشات زينة لالياس لقاتو خدام تيشطح بكتافو باغي ينوض ويوسف تيحمر فيه باش يجمع سوق من الفضيحة ويترزن ولكن الي فيه ممهنيه كثير شي شعبي جاب ليه تمام …ولانه كون صداقة سريعة مع ميمة زينة …ناضت كتعكز شوي بشوي حتى لعندو ….
زينة / نوض اولدي …
الياس : فين نمشيو ازين 😻…
ناض وقف وهي تجرو داتو حتى لفين كيضربو قريب ليهم …وتقابلت معاه وبدات تشطح ولانها جدات يامنة ويامنة فرحتها الوحيدة فرحانة بعرسها بزااااف اكثر مكيتصور وفرحة عيالات زمان لا تقدر بثمن …كيترجموها فشحال من حاجة وهذا الي جاري مع زينة من فرحتها بحفيدتها ناضت تشطح وخا كبيرة فسن ….هزت جلايلها بشوي وبدات تشالي بايديها وتشطح وتهز فبوطها بشوي …وتغني. …
سعدي يالالة وفرحي يالالة وجوجت بنييتي وحيدت لومة عليا …
الياس : ههههههههههههههههههههه حيدتييييي لومة امي زينة راه كاين بات مات لومة سييييييييييييير هاديك هاديك …شدت ليه فايديه وبداو فشطيح هاك بلاك هاك بلاك …حتى بغا يسخف وهو يشطح لقا مابغا ….

ناضت راوية حتى هي معاهم كتشطح وتصفق بايديها …والعروسة جات نقاشة كتنقش ليها وهي مزال حادرة راسها وسااكتة مبتاسمة غير شوي …القلق وتوتر مسيطر عليها بزااف …حتى كملت ليها النقاشة حيدت ليها الحنة بدمليج ديال ذهب وغسلت ليها بما زهر ونعناع …
وهي تجي راوية كلست حداها …حتى سولتها …وبحكم تشغلو وتشطنو فالتوجاد فديك اليومين …
راوية : يامنة شايفة راجلك ياك ؟
يامنة “جاوبتها بالنفي وبخجل طااغي جدا ”
راوية “تصدمت كيحساب ليها مورينو ليها معرفت متقول ” اويلي معمرك معمرك ؟
يامنة : والله “كتلعب بشفايفها بتوتر …
راوية : mais noooon تت بففف اوكي ..نوريه ليك احبيبة ؟
يامنة “ابتاسمت وحدرت عينيها ونطقت ” قلبت عليه فالفيس بوك وانستغرام ملقيتوش وبا قاليا حتى تجيو وتوريوه ليا …
راوية : ولكن كيفاش قبلتي بالزواج ونتي عمرك شايفاه وخا ولد عمك …
يامنة : حيث هاكا تربينا فبلادنا …
راوية : وقرايتك حبستيها عادي ؟
يامنة : لا قاليا عمي غادي نكملها ..
راوية : ان شاء الله غاتكمليها احبيبتي وانا معاك …مهم “جبدت ايفون ديالها ودازت لتصاور حتى لقات صورة بالكشيفة ديالو حيث هو من نوع الي مكيبغيش تصوار بزاف وفييين وفين ” امم هاهو …
يامنة “غييييير شافت صورتو وحيث هو قليل فين كيضحك ..كانت صورة ديالو مع الحاج ودراري وراوية مصورين صورة جماعية كلشي ضاحك الا هو مخنزر طبعا هي غاتبان ليها تخنزيرة ولكن هاديك هي نضرة العادية ديالو مع الاسف …قلبها بدا يضرب بجهد وزاد توتر ديالها والخوف اكثر من ليلة العمر ” …
👰🏼يامنة sana mina 47👰🏼
اصبح يوم جديد …الصباح الموالي ليوم الزفاف والصباح الي غادي يشدو فيه طريق والي غاتودع فيه يامنة الاهل والدار والدوار والمنطقة والبلاد الي تزادت فيها وحلت عليها عينيها والي مسقط راسها والي كبرت فيها ودوزت فيها طفولتها الي مكملتش وتغتاصبت بمبدا وصولها لسن الزواج فعادتهم والي خاصها تزوج قبل متوصل عشرين عام ….
كان قريب العصر …من بعد ما رتاحو من تعب العرس والنشاط …هاهما الان واقفين عند الباب…
الحاج : هادي سنة الحياة اسي مصطفى غذا ولا بعدو تزوج وهي ممشات عند حد غريب …
مصطفى : عارف اخويا عاارف وفرحتي كبيييرة الي غاتكون عندك وتناسبنا وربي ميحاشمنا الحاج …
يامنة مزالها عند جداها كتعنق فيها وتقول معنقت كيتباكاو بزوج وخا غادين يجيو عندها نهار السابع ولكن فكرة انها غاتخوى عليهم دار الي عمرها غابت عليها حتى نهار فحياتها هاهي غاتغيب يمكن العمر كامل ويمكن مؤقتا تاحد معارف اشنو مخبي المستقبل …
يامنة / اهى اهى ميمة ..
زينة : انا راااضية عليك ابنتي دنيا واخرة انا راضية عليك اكميشتي …ربي يحفضك ويفرحك فحياتك ..صبري ابنيتي “دموعها دايزين ” صبري وزيدي فصبرك راكي وسط حبابك واهلك ووسط ناسك كوني مرضية ولااا تحاشمينا ابنتي ..انا مغطياك ومفرشاك برضا …بقات تعنق فيها وتبكي معاها حتى خلات الي حاضرين كلهم يتباكاو وبينهم سارة صاحبتها وزهور الي رافقوها طول فترة وجودها …ملي حلت عينيها ووعات ….
نجود : هادي حال دنيا الالة زينة هادي حال دنيا وسنة الحياة وبنتي يامنة غاتكون بين عينينا وسط احبابها ومع راجلها ان شاء الله …بقات توادع معاهم والحاج ودراري معاهم كيتسناو باش يتسرو فطريق …
الحاج : غاتشرفونا ان شاء الله نهار سبع ايام غايجي شيفور يجيبكم ضروري …
مصطفى : واش نقوليك في امانة الله من هنا لتما بيناتنا انصال نشوف مع الحاجة زينة ونرصيو الامور هنا ولكل حادث حديث …
الحاج : وعليه ان شاء الله …كنا ناوين نديرو عرس تما وليني ناجلوه من بعد بينما تيسرت امور دراري ويكون كلشي مسالي …
مصطفى : ان شاء الله ….
فهاد الاثناء كانو واقفين دراري حتى صونا تيليفون يوسف هزو وهو يشرع عين عين عين عينه من عينيه …حتى بغا يهبطهم لارض …هاااويلي …
صهيب : اش تما ؟
وراه تيليفون …

صهيب : “شرع عينيه “يااا باااااطل …
كحاز يوسف حتى بعد عليهم باش ميسمعوهش …وهو يجاوب وضروري يجاوب والا خلا عشتو غاتكون حتى فتيليفون ….احم ا الو …خويا لباس عليك
فؤاد : علاش مكاينينش فالفيلا ؟
يوسف : اااا غير احم غ….
فؤاد : وسط سيمانة غادي نكون تما عندي منقضي …نعاود نفكرك مبغيتش لقا مشاكيل تما تفاهمنا ؟
يوسف “تفافا تفتف هبل تدعق مبقا عرف ميقول فشل حتى بدا تيخربق خاصة من سمع قاليه غايجي وسط سيمانة ” قول وحق ستييين حزب😳😳😳😳
👰🏼يامنة sana mina 48👰🏼
سبحانه وحده هو القادر على ان يبيتها في شأن ويصبحها في شأن …من قال ان يامنة القدر غادي يبدل حياتها بين ليلة وضحاها …فاحداث دازت بشكل سريع شوي …من ناحية الخطبة وزواج …الزواج الي جا فشكل غريب نوعا ما طبعا بعدم وجود العريس فجنبها …والي مشافتو غير فالصورة فقط …والي فالحالة طبيعية …يكون بجنبها فالبرزة …حاضر معاها فالخطبة …ليلة العمر …مضى على العقد بنفسو وخط ايدو هو شخصيا …عايش معاها اجواء العرس بشكل عادي …ولكن وقع العكس تماااما …بدون الحضور ديالو …
هو شيء طبيعي ايضا لو فعلا كان ممساليش واضطر يعطي الوكالة عن رضاه الي ينوب عليه ولكن الي معارفاهش يامنة واهلها انه. لااا علم له بتااتا بالي غايتزوج وتزوج وخطبو ليه وقرر باه عليه كل شيء وهو عند بالو شخص اعزب تماما …ولو كان شخص مسالم كان ممكن يتصلح الوضع ولكن هو شخص غير مسالم عصبي عنيف وحش بمعنى الكلمة …حتى انه مكيخليش مجال لنقاش الى كان عارف ان النقاش مع طرف الاخر عقيم مكيضيعش معاه الحجرة …
يامنة وفؤاد شخصيتان معاكستان تمااااما بكل ما تحمله الكلمة من معنى مع الاسف …وهذا قدر ومكتوبهم بزوج تربطو بدون رضاهم التام …
بقات يامنة فحضن جداها كتبكي وتشم ريحتها الي غاتوحشها …حالها حال اي عروس كتودع اهلها فاتجاه بيت الزوجية وحياة جديدة …ناضت من حضنها ومشات لعند صاحبتها الي رافقتها طوال مشوارها فالدوار وصديقة طفولة ودراسة صديقة بمعنى الكلمة …تعانقو بالبكا والنواح …وزهور نفس الشيء …
زهور : بنتي الله يرضي عليك والله يوقف معاك …راكي بنت مرضية ودرويشة وتستاهلي ماحسن الله يفرحك …توادعت معاها …حتى خرجت وخرجو معاها كاملين حتى وصلت حدا باها …
يامنة : بااا 😢…تلاحت عليه عنقاتو وحتى هو حتى هبطو دميعاتو كيجريو …
مصطفى .: الله يرضي عليك ابنتي ويسر طريقك والله يبعد عليك ولاد الحرام ويفرحك فحياتك …الله يرضي عليك …
باست ليه ايدو وباس ليها راسها …كانت لابسة جلابة فالمسكي ديال جوهرة بالتحتية ديالها فالابيض مخيطة بالراندة ودايرة شال فالمسكي على شعرها الي مصاوب وبليغة فنفس اللون سوميلة ديالها عالية وجلابة طويلة شوي كتهزها بايديها …رجيلاتها فيهم الحنة باقي جديدة وحتى ايديها …وصاك فايدها …
الحاج : يلاه اخويا خلينا ليكم راحة باقي جايات وجايات والله يدوم المحبة ولهلا يحاشمنا وبنتك بلا منقوليك يكفي هي بنت خويا راها بنتي …

مصطفى : الله اودي الله يسر طريقكم …جاو دراري وراوية سلمو عليهم …كانو من قبل حطو فاليزات حوايجها وكاع دفوع الي جاها جمعوه وداره ليها فكوفر طموبيلات …ركبت فالطوموبيل وهي كتشوف فدارهم والي توادعو معاها دموعهم دايزة …وجداها الي كتبكي وتنوح متكية على زهور شادينها …ومصطفى الي شاد فراسو بزز …حتى تسالمو معاهم وركبو فسياراتهم وزادو ….
رحلة يامنة الاولى تبدا ….
👰🏼يامنة sana mina 49👰🏼
من بعد وداع الي طااال بزاف وطبعا غايطول ماشي ساهل تودع اهلك فخمسة دقايق ماشي ساهل تودع بلادك مسقط راسك وتمشي تبدا حياة جديدة كلياااا والي ماعرفناها واش غاتكون عادية ولا خايبة ولا ولا …الله وحده يعلم….
قبطو طريق وخرجو من دوار ….كانت يامنة فالسيارة مع نجود والحاج وراوية …والسيارة لاخرا كان سايقها صهيب وحداه يسوف الي توثر بزاااف وغير مزاد تعصب حتى مبقاش كيهضر غير كيخمم …والياس الي راكب لور …
صهيب : ماعرفتيش علاش جاي ؟ هادشي مفاجئ اصحبي ممولفاش ليه …
الياس : هو راه كيجي فاي لحضة توقع يجي ولكن ملي مشا عندو يوسف قال بالي ممساليش ومشطون تما مضنيناهش غايجي…
يوسف : “لا رد ” …
صهيب : مصييييبة كحلة والله انا مهامني غييير ديك البنت والله ماتستاهل هادشي حق الله …
الياس : وباقي صغيرة متقدرش عليه حنا رجال وكنخافو منو دايرين ليه حساب وهي قد الكمشة اصحبي …
يوسف : بفففف اربي ما سكتو خليونا شادين طريق تنوصلو يرحم باكم خليوني غييير نفكر …
صهيب : فكر فكر اصلا الحزاق رايب على ديلمنا رايب غاسير عالله …نيت نسوق بخاطري …
من بعد ساعات ديال طريق والتوقف من اجل الراحة والاكل ساعات وهما شادين طريق حتى وصلو لمدينة ازرو الجميلة …كانت يامنة ناااعسة تكات على راوية بدون متحس وحتى هي خلاتها على خاطرها …حتى تسمع كلاكسون وتحل الباب …وهاهي غادي تخطو اولى خطواتها بهاد المنزل الي اول مرة غادي تعرف دار عمها عن قرب ….
راوية “كتفيق فيها بشوي ” : حبيبة ديالي يامنة فيقي هاحنا وصلنا …
نجود : الله يرضي عليك طلعي معاها لبيت الي قاديناه وعاونيها حتى تنعس …
راوية : وخا ميمة …يامنة حبيبة …
يامنة “بدات كتحل عينيها مغمضين عاد كيستوعبو شوي بشوي حتى حلتهم وضارت جيهة راوية ” : هممم …
راوية : صباح الخير هههه يلاه هبطي هاحنا وصلنا لدار …يلاه حبيبتي …

يامنة “ابتاسمت ليها ” : واخا ههه …تشبحت شوييي وهي تهبط …وصلت سيارة صهيب حتى هي دخلت وهبطو دراري …ضارت هي كتشوف فالفيلا قداش وداكشي الي ضاير بيها ومستوهة مبهورة فالي قدامها …حتى …
راوية : يامنة حتى لصباح ونوريها ليك يلاه طلعي ترتاحي فبيتك ههه …جرتها ودخلو لدار لداخل ودراري كل مشا طلع لبيتو حيد حوايجو وتلاح ينعس …اما هي فا خذاتها راوية حتى مشات بيها لواحد الجناح فيه بيت كبييييير جهزوه بكل شي جديد …ناموسية جديدة ..
بلاكار جديد كبييير لاصق فالحايط وبيت صغير فيه العلاقات فحال دريسينغ …وبلاصة الصبابط …فراش جديد فيه الوان ناعمة ومناسبة ليها كعروس باقي جديدة …وفجنب البيت كاين دوش كبيييير حتى هو مجهز …
حتى من المنتوجات ديال الاستحمام والعناية بالوجه والجسم والبشرة شارينهم ليها …كل الي تحتاج وتحل عليه عينيها موفرينو ليها …موجدين فحال الي غاتجي اميرة لقصر ناويين كلهم يحطوها بين عينيهم باش تلقا جو حميمي وسطهم ويعوضوها على الحرمان الي عاشت فيه …
ولكن واش غايعوضوها بالامان الي كانت عايشة فيه ؟ …
راوية : هانتي ها بيتك وها دوش راك شفتيه …سيري لبلاكار غادي تلقاي بيجامات سخان وجداد حيدي غييير تيكيت الي فيهم ولبسيهم بصحتك وراحتك هههه ونعسي مع راسك صباح تلقايني عند وجهك باش تفطري ونوريك دار كااملة ونعرفك على ناس الي هنا واخا ؟
يامنة : وخاا ههه شكرا وتصبحي على خير …ابتاسمت ليها وخرجات خلاها باش ترتاح …
👰🏼يامنة sana mina 50👰🏼
اصبح يوم جديد ملييييئ باحداث كبيييرة ممكن توقع وممكن لا من يدري …اول ماحلت عينيها حلاتهم على صوت تقرقيب …كانت ناعسة ببيجامة فالغوز وتقيشرات فالابيض …جامعة شعرها ضفيرة ودايراها جنب …ضورت وجهها لقات راوية كتقرقب …حتى ضارت عندها …
راوية : صباح الخيير يلاه نوضي غسلي واجي نهبطو …لبسي غير بينوار ديال بيجامة وبانطوفة وهبطي عادي …
يامنة : وخاا ..ناضت دغيا دخلت لدوش قضات حاجتها غسلات وجهها وخرجات لبسات بسنوار البيجامة وخرجت هي وياها من البيت هبطو لتحت نيشان لطابلة ديال لفطور لقات غير الحاج ونجود ويوسف اما لاخرين باقين مهبطو …
راوية : صباح الخير …اجي كلسي هنا …كلستها فكرسي جنب كرسي خاوي الي بجنب الحاج والي هو نفسو كرسي فؤاد …
الحاج / صباح الخير ابنتي …
يامنة”مبتاسمة وحنيكاتها موردين ” : صباح الخير عمي …بداو الفطور حتى لحقو عليهم البقية …كملو واستاذن يوسف باش يهضر مع باه على انفراد …
في المكتب …
الحاج : كيف طرا وجرا حتى تنازل يجي المغريب عجيييب …
يوسف : راه ديما كيجي هنا اشنو الي غريب غير هو كيطول …
الحاج : مرحبا بيه خير البر عاجله نيت …
يوسف : الولييييد …
الحاج : اشنو ؟ يوسف سير قضي شغالك الله يرضي عليك ودخل سوق راسك ماشي شغلك بيني وبينو واياني واياك تعاود دخل بيني وبينو غادي تشوف شنو غاندير يلاه تيسر …
يوسف “بقا يعض فشفايفو بعصبية لو كان شخص الي قدامو غير باه كان تيرا فيه وسط راس ولكن تتجي فالوليدين ومعليه غير يحدر راس ” وخاا الي عجبك …ضرب ضورة وخرج من المكتب حتى تلاقا فطريقو يامنة وراوية خارجة بيها لجردة ديال لفيلا …
راوية : غادي لفاس ؟
يوسف : غادي نشوف لخدمة تانرجع فالعشية …”شاف فيامنة ” يامنة مغاديش نرحب بيك حيث دارك هادي نتي ختنا والي احتاجيتيها قوليها متحشميش ومتخافيش كلنا معاك وحداك واخا “حط ايدو على كتفها ”
يامنة “ابتاسمت ليه ” وااخا صافي …
يوسف “ضحك ليها ” : ضوري غير بشوية عليك هنا را كبير بزاف لا بغيتو تمشيو تبعدو عيطي لالياس ولا لواحد من العساسة يحضيكم …
راوية : تت غانضربو غير شوية من بعد نضربو تالهيه متخممش …”ابتاسم ليهم واستاذن خرج ركب فسيارتو وانطالق بسرعة حتى طارت طوموبيل من بلاصتها وخلا الغبرة وراه ” …

راوية “لبسو مونطويات عليهم ” : هناا لابيسين ولكن خاوي حيث بارد الحال …وملي كيكون الثلج مكنعمروه حتى لصيف …
يامنة “اسئلة بريئة ” : كتعومي نتي ودراري ؟
راوية : ضرووري ههه ولكن فؤاد مكيخلينيش نعوم ب بيكيني خاصني نعوم بحوايج مستورين..
يامنة “قلبها بدا يضرب حتى بان في حناكها ” : همم ااه …
راوية : ويييينوو تزنگات ملي سمعات فؤااااد ههههه …
يامنة “حدرت عينيها وضحكت بعفوية ” : هههههه ..
راوية : اممم صافي هنا وهنا فين كنتغذاو شي مرات ولا نتعشاو ولا نكلسو مجموعين الى كان زوين الجو مهم هنا كلسة كااملة كيكون حتى فوطويات فالصيف يعني قولي صالون فجردة هههه …
يامنة ” شاف واحد الدار من بعيد ” : اشنو هاديك الي تما …
راوية : هادييك فين كيترينيو دراري وحتى انا شي مرات فالصباح وحتى ملي كيجي راجلك احبيبة حتى هو كيتريني فيها الحديد بلاصتو خاصة ديالو كاينة تما …بقات توريها بعض من اركان الدار حتى جاهم البرد ودخلو نيشان الكوزينة عند نجود الي كانت كتوجد فالغذا…
راوية : ميمة اشنو كتوجدي لينا …
نجود “شافت فيامنة ” : ليوم لول عند عروستنا غادي ندير ليكم دجاج معمر بالفيغميسيل والكبدة وزيتون والحار …مفور ومحمر…ب صلاد ديال الخضرة جريدة وشلايض لاخرا وطبعا كاين حتى زعلوك …ولكن حتى لعشا فاش غايكون كلشي مجموع لغذا غانديرو غير طاجين لحم بيناتنا وشليضات خفاف
راوية : اممم اح اربي …سعداتنا دزنا فوجه يامنة…
يامنة : ههههه
نجود : سيرو كلسو تما حدايا بينما عمرنا براد اتاي ونجيو نجمعو بنما وجد الغذا ….
#يتبع….

Leave a comment