Skip links

قصة : لا تخبئ الكلام 2

 4,009 عدد مشاهداات

🌸 الجزء 26 🌸
⁦✍⁩بقلمي……………………زهرة محمد
*لا تخبئي الكلام*
هـــــا انا اعود لعالم الحب مرة اخرى
خــــــايف ،مــتردد ،حـــــائر
لا أريـــــــد أن أعود لعالم غريب
لا أريـــــد أن أعيد التجربة .
اتعبني قلبي كثيرا
يريد لا يريد يريد لايريد
سأتركك ياقلبي تختار
و تتحمل أنت المسؤولية .
اه من قسوة قدري وحيرة قلبي
لااعرف الى اين امضي
لا زلت أتذكر ..
من ماضيَّ الأليم ..
يوم اللقاءْ .
ياسر جالس فلقهوة شارد الذهن حاط قهوة كحلة قدامو و عقلو حاير امام قرار معارفش فين غيوصلو و خايف يتاخدو و يلقا راسو أمام عواقب وخيمة القرار نوعا ما مخيف و ممضمونش و غيحتاج يضحي على قبلو و هنا عرف بلي شحااال الحيرة ثقيلة على صدر الإنسان واخا كتبقا لحظة تغيير في أمور حياتهم و خصوصا في المشاعر
مع أذان المغرب ناض هز سوارتو و مشا خلص خرج من باب القهوة و تاجه لطوموبيلتو و مشا لدار و فطريقو جات فبالو سامية لي ولا كيفكر فيها أغلب اوقاتو خدا تلفون و منتابه مع طريق دوز نمرة و تاصل بيها …..
ياسر….. الو سامية
سامية(يلاه صلاة المغرب و جالسة تفرج ) …… سلام اهلا خويا لباس عليك
ياسر(مصدوم من الكلمة ) …… خويا!!!
سامية……. هههههههههه فحال خويا
ياسر……. ما خوك ما فحال خوك المهم كيف دايرة لباس وليتيي شوية
سامية…… شوية الحمد لله شكرا
ياسر…….. سامية مسالية غدا بغيت نشوفك إلا ممكن
سامية….. كيفاش؟؟؟ علاش زعما؟ !! بغيت نقول
ياسر…… اش باغا تقولي
سامية…….. غتكون رانيا
ياسر…… لا بغيت نشوفك بلا ما تكون

#تتمة
سامية…… ولكن!!!
ياسر…… عفاك غادي غير نهضرو و ختاري القهوة لي بغيتي و ندوز ناخدك و نمشيو
سامية…….. لا لا لا لا متجيش عندي غدا نصيفط ليك ميساج و نقوليك فين
ياسر…… واخا الالة لي بغيتي
سامية….. اوك يلاه سمحلي غنقطع ماما كتعيط يله “بغات تقطع”
ياسر….. سامية ~~~ سامية…… نعم
ياسر…….. شكرا حيت وافقتي
سامية……. ماشي مشكيل يلاه بسلامة
سامية مشات تشوف مها اش بغات دخلات عندها لبيت لقاتها مهبطة لحوايج من لماريو قالت لك بغا تجمع حوايج شتا و تخلي ديال شتا
صالحة(تالفة بين الحوايج ) …… دوزي تعاونيني و شوفي اش باغا تخلي و عطيني شنو مبغيتيش نطلعو لبلكار لفوق
سامية……. واش هادا وقت طويان اماما واش مكتعيايش
جلست فوق ناموسية مربعة رجليها و بدات طوي و تحط فجنابها و تعزل حوايج لباردين من سخان بقات ساكتة ساكتة ساكتة حتى طلقتها قد راسها…
سامية…… ماما.. علاش عمرك عودتي لي على بابا راني كبرت زعما
صالحة( قندشات ديال بصح) …… نوضي تهزي ما طوي معايا ما نطوي معاك
سامية (كطوي و تهضر) ….. مالكي كتغوتي راه غير سولت عمري شفتو و لا عرفت عليه شي حاجة
صالحة …… معندك ما تعرفي عليه و بدلي الموضوع راه معندي دماغ لهضرة لخاوية
سامية(سمعات طابليت كتصوني تنهدات و ناضت و غادا و كتهضر ) ….. واخا اميمتي لحاجة لي تقلقك مكيناش
صالحة…… سيري غيكون غير خوك سربي قبل ما يقطع..
سامية (هازة طابليت مقابلاها مع و جهها ) …….. سلام خويا
ياسين….. يلاه تفكرتي عندك خوك إلا معيطتش متعيطتوش
سامية……. ختك كانت مريضة يلاه وليت شوية
صالحة…… اري طابليط نهضر مع وليدي
سامية …….. هاكا ماما حتى تسالي و نهضرو
صالحة(شداتها من ايد بنتها ) ……. سلام وليدي لباس عليك
ياسين…… الحمد لله اميمتي و نتي لبااس عليك اش كان ضار سامية
صالحة….. غير سكت خرجاتها مني جاب لي الله غير صاحبتها و خالها داوها لي لكلينيك
عاودات ليه اش طرا لسامية و وقفة صاحبتها و خالها و كيف حسات ملي ملقات لي يعاونها من غيرهم و كتقول ليه ديك ساعة كون غير كنتي حدايا…
ياسين…… هادشي كلو طرا و أنا مسايق خبار…
صالحة….. غير مبغيتش نشطنك احبيبي
ياسين(حس براسو تنيرvا ) ….. وا مي إلا متنشطنتش بيكم بيمن غنتشطن آخر مرة امي ديرو هاكا المهم أنا غنمشي داير مع واحد سيد قولي لسامية من بعد و نتاصل ليها..

🌸 الجزء 27 🌸
⁦✍⁩بقلمي……………………زهرة محمد
*لا تخبئي الكلام*
فقلبي يحتفظ بكل تنهيدة من تنهيداتك الباسمة منها والغاضبة.. لقد اشتقت حتى … ألم نتفق على أنك لن تسرق مني كلمات المرور لتعبر بها إلى غيري؟
جالس في القهوة كيتسنا سامية و كم هي طويلة سااعات الانتظار يلاه جبد تلفون يتاصل بيها حتى بانت ليه جاية و باين فيها مرتابكة حيت اول مرة تكدب على مها و معرفااش حتى علاش تصرفات هاكا و زادتها خارجة بلا ما تقولها لصاحبتها و هما معروف عليهم مكيخبيوش على بعضهم …
ياسر شخص زوين و رزين و ميمكنش متزعطيش فيه و راجل يوقف معاك وهو طاح فسامية رغم انو زواجو واقف فطريق انو يتقرب منها وهو مزال معارفش في غيرسي واخا تاصلات مراتو تصلح الوضع و طلبات منو يرجع و لكن شي حاجة لداخل مخلاتوش يمشي
رمقاتو و جات لعندو مبتاسمة و مدات ايديها سلمات عليه
سامية …. هاي لباس عليك
ياسر (صافحها) الحمد لله و نتي بخير
سامية ….. هاحنا مزيان شادانا الخلعة
ياسر ……. علااش مالكي
سامية …… مبقا وااااالو و يعلقو لينا النتائج فهاد يومين
ياسر …….. هههههههه نااااجحين غير وجدو لينا زردة و اتا متسالوني غير لكادو الالة
سامية ( مزال شاد فيها التوتر كل مرة تلعب ب ايديها و لا بشعرها ترضو ورا ودنيها ) ……. شكرا اخويا بارك الله و فيك
ياسر …… ياك قلت ليك متبقايش تقولي خويا واش كتشوفيني خوك؟؟!!
سامية ….. لا راه غير من باب الاحترام و صافي
ياسر …….. حتارميني ولكن بلا خويا
سامية (قلبها كتحس بدقاتو فحلقها) …….. واخا على راحتك
ياسر (تنهد) …… رااحتي معاك داكشي لاش بغيت نشوفك
سامية (ابتسامة صفرة ) …….. شكرا شكرا اوا كيف دايرة مراتك لباس عليها و ولادك ؟؟؟؟
ياسر ……. لباس لباس
سامية …….. الله يخليهم ليك
ياسر …… آمين شكرا
سامية ……. مزال مطول هنا في المغرب
ياسر …… مزاال هاد ساعة يكما طلعت ليك فراسك
سامية ( كتوضح لي و هو ساهي فتعابيرها ) …….. لا زعما توحش بنتك و مراتك شحال قدك تبقا هنا بعيد عليهم
ياسر ……. بنتي نتوحشها و لكن مرتي مدارت علاش نتوحشها مات قلبي من جيهتها
سامية ……. و علاش اش طرا

#تتمة
سامية ……. علاش اش طرا ؟؟؟!!!
ياسر ….. قولي اش مطراش (قلبو عامر و رتاح لسامية يعاود ليها) منين غنبدا
سامية …….. الا بغيتي ترتاح عاود من لول الا كان ممكن بطبيعة الحال و قبل ما تبدا عرف بلي ربي كيدير لي فيها الخير
ياسر ……. عندك الحق هي مستعدة تسمعي لي و تعطيني خاطرك
سامية …… غير بدا انا مستعدة نسمعك ياك حنا اصدقاء
ياسر (ضحك من قلبو ) …….. وي اصدقاء (للحظة بقا مركز فتفاصيل جمالها و مشاعر غريبة جتاحت قلبو ) …. كنت كنبغيها و مضرتش بيها في القهاوي مشيت نيشان لدارهم خطبتها بعدما شفتها و شافتني كان زواج تقليدي توسطو فيه ناس كانت كتبان ضريفة و بنت دارهم خليتها عام مع دارهم و جيت ديتها
سامية (متبعة معاه ) ……. اوا
ياسر …. محرمتها من حتى حاجة حقوقها موفرها ليها و لكن ربي ملي كيبغي يعدب النملة كيدير ليها جنحين و هي غير ولدات الولد و بدات تشوف فوق مستواها و لات باغا تعاند لي مع الامارتيات صحباتها مرة يقصرو و تجيني حتى نص ليل و نقول نصبر على وجه دراري و لكن مؤخرا كترو المشاكيل و لات باغا الفيلا و طوموبيل اخر موديل و محبساتش هنا ولات تقارني برجالات صحباتها هنا حلفت عمرها لكانت لي مرا
سامية و تعجبت ملي سمعت بقات غير حالا فمها و تحاجي و تفك مع راسها كيفاش وحدة قدرات تخسر واحد فحال هدا……. فيها خير الانسان يقول الحمد لله و الله يفرجها المهم قبل اي قرار فكر فولادك
ياسر …… ولادي هما لي رابطيني حيت الا كان الفراق مستحيل نخليهم ليها سامية ….. صراحة ولادك متخلاش عليهم و فنفس الوقت متبعدهمش على مهم
ياسر ….. من نهار جيت عمرها سولات فولدها هادي ماشي فحال الأمهات لي عندهم الكبدة على ولادهم
سامية …… الموضوع كيحير صراحة و بنتك شحال عندها؟ ؟؟؟
ياسر ….. أميرة عندها عامين (تنهيدة ألم)
فقلبي يحتفظ بكل تنهيدة من تنهيداتك الباسمة منها والغاضبة.. لقد اشتقت حتى … ألم نتفق على أنك لن تسرق مني كلمات المرور لتعبر بها إلى غيري؟

🌸 الجزء 28 🌸
⁦✍⁩بقلمي……………………زهرة محمد
*لا تخبئي الكلام*
عندما يسدلُ الليلُ ستائرهِ بألوانها السوداءِ المخملية، ويُقبل
القمرُ مختالاً مرتدياً عباءتهُ الفضيةَ، وتأوي الطيورُ إلى
أعشاشها تحتضنُ صغارها برفق وحنيةَ ويزحفُ الصمتُ
بخطاهِ الواثقةَ يسودُ الهدوءَ الكرةََ الأرضيةَ، تنامُ أعَينُ البشرِِ
مطمئنةَ وعيوني على النومِِ عصيةََ أبقى وحيدة أنا ها هنا
أجترُ آلامي وأحلامي المنسيةَ، فتعالَ أيها القمرُ نتسامر
، أُسردْ لي حكايا العشقِِ الخرافيةََ لعلي أغفوْ بين يديكَ فقد
سئمتُ الأيْدِي البشريةََ واتخِذُكَ أيها القمرُ صديقاً ولا يفرقنا
سوى رب البريةَ، فأنت يا قمرُ لا تعرفُ الغدرَ ونحنُ أيدينا بالغدرِ سـخيةَ
ياسين غير قطع مع مو و مبقات عندو كانة لخروج تاصل بعصام و لغا لميعاد لي كان بيناتهم … سيزار(كلبو ) مركن فبلاصتو عطاه ماكلتو و مشا شعل تلفازة يتلاها بيها على ما طاب نعاسو دار فيها clé USB تفرج في فيلم seule au monde(تفرجو فيه زوين البناات ) بقا يتفرج حتى وصلو ميساج في جمايل فيه
(bonsoir Mr. Jéspère que vous vous portez bien, je tiens à vous remercier pour ton soutien et ta serviabilité. )
مرحبا كنتمى تكون مزيان، كنشكرك على مساعدتك و الخدمة ديالك
تبسم مع كل حرف كيقرا فيه واخا محتواها لا يستدعي الضحك و لكن صاحب رسالة يمكن عندو مكانة خاصة خلاتو يتبسم و يفرح برسالتها رغم أن الأمر عااادي ياسين كان مستلقي على لكنابي غير كمل رسالة عتادل في الجلسة و حتى لقا صباعو مشاو مباشرة للرد باش يجاوب
ياسين (كيكتب)…… لا شكر على واجب آنسة و هذاك مجهودك كانت ثمرة نجاحو ليوم
نور (كتكتب ) …. لولا دعمك و مجهودك مكانش تحقق حلمي
ياسين …….و شنو كان حلمك؟ ؟
نور……. نكمل الماستر في الولايات المتحدة الأمريكية
ياسين …….. و علاش متكمليش هنا
نور …….. usa أول دولة في العالم مختصة في دراسة علوم الرياضيات
ياسين….. بالتوفيق و حظ سعيد
نور (كتكب ) …… شكرا و سمحلي سهرتك
ياسين(يكتب) …. لا عاادي ونستيني
احمرت وجنتاها من الخجل و توقف الكلام و زاد صمت الليل و احتبست الانفاس
‏يا صغيرتى ابتسامتك التي تأتي على خجل ترهق عيناي تآملا بجمالها
نور(اكتفت بابتسامة )…… تصبح على خير
ياسين….. و انت من أهل الخير

🌸 الجزء 29 🌸
⁦✍⁩بقلمي……………………زهرة محمد
*لا تخبئي الكلام*
رغم الانكسار هاانا اقف مجددا كجمال تلك الورده داخل كتاب قديم جمال روحك رغم حزنهم
#كجمال #توهج_حبك داخلي انت الذي لازال حبك يزهر بداخلي ونسيانك شي محال رغم امتلاء هذا العالم بالاضواء ان داخلي ينطفئ … #حروف_البنفسج #حروف_الجنتين #جنون_القلم
فبيتها كتكسل كطرد لعيا و لكسل و فايقة نااااشطة و حيدات عليها الغطا ووناضت غسلات وجهها و جات خارجة من الحمام تلقات أسعد واقف كيتسناها تخرج..
أسعد….. كنتي كتولدي
نور(واقفة و شادة لباب ) …….. قققووول غغير صصبباح لخخير ييا اااحسسن ااخ ففي الععالمم
أسعد…… حيدي حيدي ندخل راه غتعطليني (جاي داخل لحمام و ضار شاف فيها) ..شتك فايقة بكري و ناشطة ماشي عوايدك
نور …. بببان لي للججو ززويين و غننللببس وو نممششي نندير ريااضة ححدا للببحر ⛱
أسعد…… مممممممم البحر حاولي متعطليش ديري حسابك نتغداو مجموعين
نور(ماشية لبيتها) وووخا
مشات نور لبيتها حلات لماريو بقات واقفة شحااال حتى طاح اختيارها على كيطما فرمادي فاتح و فيها سينتا بيضة فجنب لبساتها و لبست سبرديلتها و جمعت شعرها ذيل لحصان … هزات تلفونها اكتيفاتو مع كيت بلوتوت و دارت لموسيقى و خرجات …
نور خدات طاكسي حتى لبحر و احساس الراحة من بعد الامتحانات عندها نكهة خاصة وصلات لبحر و شغلات موسيقى و بقات كتجري و نسمات البحر كضرب فوجها و الفرحة مقداهاش دوزت نص ساعة حتى لمحت شخص مألوف و مستحييييييل تغلط فيه بقات تابعاه… حتى وصلات عليه و تشعبقات فيه كيف القردة
نور (نزلت لأرض) ……. خججارررج بببلللا بببي
جون(خلعاتو ) …… نتي منين نزلتي(كيضور فجنابو ) من امتا و نتي هنا
نور…….. ههههههههه ششو كككيف ووليتي صصفر مممالك شششفتي ججنية
جون(شاد جهة قلبو ) ……. نتي لخرا لي
نور …….هههههههههه زززيد ززيد ننتتممشاو سسسخخفت ممن ججري
جون (كيتمشاو) ……. حتى انا عيييت زيدي نفطرو جاني جوع
نور…….. ووواو ععلى ححسساببك
جون (معنقها و كيتحتو) ……. على حسابي فحال ديما غير زيدي
نور و جون داخلين من باب القهوة و ناس قلال كل واحد و فين جالس كاين لي كيقرا جورنال و كاين لي مقابل مع البحر و كيرتشف قهوة صباح … دخلو و شدو بلايصهم بقاو مجمعين و كيضحكو حتى بانت ليهم ضرسة لعقل و هادشي مر على أعين شخص لي بقا غير كيشوف….

🌸 الجزء 30 🌸
⁦✍⁩بقلمي……………………زهرة محمد
*لا تخبئي الكلام*
بـين الـصداقة والـحب نـقطة ٠ إن تـجاوزتها غـرقت فـي الـثانيه ، وخـسرت الأولـى
رانيا هاد الأيام تعرفت على واحد توتوز في الفيسبوك وولات
غير شادا تلفون متفرقوش كتسنا منو ميساج باش تجاوب في البلاصة ولات حاضية تلفونها فحال دري صغير حتى هي جات نوبتها و لقات لي شغل يالها و تفكيرها و حتى هو في المقابل غمرها حب و اهتمام و الكلام الحلو 😍😍 و هي فوقت لي كتميساجا معاه تاصلات بيها سامية ابيل فيديو فلواتساب
سامية( مجبدة فبلاصتها كانت 10ونص د صباح غير فاقت خدات طابليت تاصلات ب رانيا لي شحاال مهضرت معاها 📳 )…… فينك اصحبتي اشمن ارض شداك لباس عليك
رانيا ……. وونتي لباس عليك و خالتي لباس هااااني موجودة غير دار
سامية ……… الحمد لله و داركم سافا نتي فين غاطسا اغلب لوقت كنتاصل كنلقاك مشغولة كتهضري مع شي حد
رانيا(كضور فعينيها و كتهضر بشوية ) ……. لهضرة ماشي فتلفون حتى نجي عندك فلعشية و نعاود ليك
سامية…….. و هي مقفراها ابنت حمد
رانياا ( واقفة فلكوزينة و كتلعب بلكيت) …… ههههههههههه سيري سيري خليني نغسل لماعن حتى نشوفك و نهضرو
سامية……… مممممم يا خبر بفلوس بكرة ببلاش مبعيدة غير تادلة ارنوش
رانيا…….. ههههههههههه يله سيري باي
سامية……. كتصدريني هههههههه دقتك صعيبة ابنتي بسلامة
قطعو على بعضياتهم و كل وحدة مشات تقضي لي عندها و رانيا ولات غير تبربص ولات لاعبة طوم و جيري مع مها غير صونا ليها تلفون مشات تجري تخبا فلبيت و جاوبات
رانيا(بصوت أنثوي ) …. االوو
شخص(جالس فمكتبو و رد عليها بصوت رجولي روماانسي ) …… صباح الخير زوينة لباس
رانيا…… الحمد لله و نتا لباس عليك
الشخص (كيضور بلكرسي ) …..ملي سمعت صوتك وليت بخير
رانيا(حشمت و قلبها كيفرفر ) هههههه شكرا
الشخص(بحب ) …….ههاااهي حشمت تاني قطعي دابا تموتي لي و أنا مزال باغيك
رانيا……. و راه نتا كتحشمني
الشخص……. امتا غنشوفك ديري وقت نتلقاو واش غنبقاو نهضرو غير فتلفون ا رانيا
رانيا(ودنيها غيطرطقو بلحمورية ) …… و راه حتى نلقا الوقت المناسب و نعلمك واخا
الشخص (تنهد)……. واخا الالة حتى تلقاي الوقت لي يناسبك المهم هاني مشيت عندي اجتماع حتى لمن بعد
رانيا(بقلق) ……. تقلقتتتيي؟؟؟!!!
الشخص………. لا ممقلقش غير عندي شي خدمة يلاه زوينة ديالي تهلاي فراسك حتى لعشية
رانيا(مشبعااتش من هضرتو ) ……. واخا بسلامة

قيّدتني بك حتى وإن لم تكن موجوداً أستشعر طيفك معي مهما كنت بعيداً. الحب أن أكتفي بك ولا أكتفي منك أبداً. أحبتتك جداً لدرجة أنه عندما تغيب عني، يغيب معك كل شيء

🌸 الجزء 31 🌸
⁦✍⁩بقلمي……………………زهرة محمد
*لا تخبئي الكلام*
الاهتمام
من أجمل الاشياء التي تقدمها لمن تحب
وأجمل شيء في الحياة
ان يكون لديك ذلك الشخص
الذي يحبك بصدق ويهتم بك
ياسر من نهار خرج مع سامية و مفارقاتش خيالو لحظة عزم يتقرب منها حتى يملك قلبها و لكن الحاجز مزال واقف بيناتهم كيفكر يمهد الموضوع و كيدير يشوفها مرة أخرى بقا يفكر كيف يدير أول خطوة يتفرق على مرتو و لكن غيبقا مشكل ولادو مغيقدش يبعد عليهم بقات فكرة تديه و فكرة تجيبو حتى ضرو راسو و قال ينوض يبدل ساعة بختها حتى يصاوب الله يلا جا خارج من صالون حتى تساطح مع رانيا جايا عندو….
رانيا(جايا تجري ) خالي واحد طلب و متقولش لي لا
ياسر(معندو خاطر) …….. رانيا بلا ما تبرزطيني غير سيري خليني عليك
رانيا……. عفاك عفاك بزز باش طلبت ماما و وافقات قالت لي إلا غيديك خالك سيري و لا مداكش ريحي فداركم
ياسر…… و سيري ريحي فداركم و هنيني
رانية( غادا لبيت و ساخطة على الوضع)……. واش صاحبتي و هي الوحيييدة منشوفهاش نهار و ما طال و أنا محبوسة فهاد دار كون درتو لينا وأد البنات و لا هاد الحبس
رانيا حيحات عليهم تصوط و تنفخ غير راسها و ياسر غير سمع باغا تمشي عند صاحبتها و تبعها لبيت و تكا على الباب
ياسر(مغلض صوتو و هو لداخل خاصو غير جناح و يفرفر) …… شفت لسانك طوال اسليعفانا نوضي تكعدي إلا بغيتي تمشي و لبسي معاك طه غنخرجو هاني سبقتك تفوتي 10 دقايق بقاي نتي و ياه تم
ناضت تحنقز تلبس و جرات ولد خالها زربات عليه لبساتو و عاد لبسات هي مشطات شعرها خلاتو مطلوق و فردة تانية ديال صباط لبساتها عند عتبة لباب لقات خالها مديماري ركبات طه لور و هي لقدام …. دقايق حتى وصلها عند باب العمارة نزلات بعد ما عطاتو لوقت لي رجع ليها فيه طلعت كدق ووحلات ليها صالحة….
صالحة(حلات لباب و كيف شافت شكون بتاسمات )…… سلااااااام بنتي رانيا دخلي مرحبا دار داركم
رانيا( دخلت و سلمت عليها سلام نسائي) …… ترحب بك الجنة ا خالتي
دخلوو لصالون كيسولو على احوال بعض و الصالحة كتسول على احوال والديها و بالمناسبة تعاود تشكرها على وقفتهم معاها
رانيا…….. هذا واجب اخالتي و سامية ختي ماشي غير صاحبتي
صالحة…….. الله يدومها محبة ابنتي
رانيا(كدور عينييها ) خالتي فين رانيا
صالحة…….. غير في دوش راه قريب تسالي.

#تتمة
سامية خرجات من دوش لابسة حوايجها مشات لصالون لقات رانيا جالسة كتشرب اتاي مع مها و كيقرقبو ناب و يضحكو و نضمات ليهم
سامية (كتصاوب زيف حياتي ) …… ضحكوني معاكم
صالحة…… كنعاود ليها على المونيكة الكحلة لي كنت نحط ليك ملي كنتي صغيرة إلا بغيت نطلع لسطح( كتشوف فرانيا و تهضر)… و مكانتش ابنتي تململ تبقى تم كيف الأمانة اااايييه على دوك ليام
سامية(كتصدر فمها) …….و نوووضي تفكري ليام فطرح رفيسة لي موصياك عليه الجارة راه قريب تولد
صالحة……….الله يتبثنا على الشهادة نسيييتها
سامية…….. شفتي جماعة و نسيتي راسك
صالحة(جمعت الوقفة) ……. كولي ابنتي متحشميش تي صوخري حدا البنت الحلوى ربي لما كولي
رانيا…… الله يخلف اخالتي راه كناكل
مشات صالحة لكوزينة توجد دقيق عندها كوموند طيب 5 كيلو د رفيسة لجارتهم قريبة تولد و لبنات بقاو عاطيينها لجماعات
سامية ……. هانتي جيتي حتى لبين ايديا غتعتارفي بلا عصا و لا حتى حاجة
رانيا(معرفت منين تبدا ) ……. سميتو غيث زوين يا ختي كيحمق ااااااااح ا قلبي
سامية …… و فين عرفتيه؟؟!
رانيا……. في لفيسبوك اختي(كتنهد و تعاود) .. خدام موثق مصواب و الأدب خلاني دايبة فيه عينيه فمو لحجبان كلللشي محطوط فبلاصتو سبحاااان المصوور من لخر توتوووووز
سامية……..و من لخر جمعي راسك و شتك بديتي دفكي و نتي عارفني حب سلوكة معنديش معاه
رانيا…….. و متحطمينيييش حرام عليك
سامية…… أنا نصحتك و نتي تعرفي و يكون حداك و ياربي يصدق!!
رانيا……. متخافيش هو ماشي فحالهم قاري و واعي ماشي مبرهش قالي بغيت نشوفك و نتي غتعاونيني
سامية…… فاش غنعاونك اصكعة ليام؟ ؟؟
رانيا…… دار كيتيقو فيك ميقولوش لا الا خرجتي معايا
سامية(دايرة ايديها عل حنكها)…. ياك الالة باش لخلاو ضاربونا نتخلاو بجوج 😏
رانيا ……. و ياااك صحابات في سراء و ضراء بليييز🤗
سامية(ممطمنهاش لهاد خونا ) . …. و غير الله يخرج هاد الحريرة على خير.
مسكين ياسر موقف لا يحسد عليه الله اخرج حريرتو على خير😢😢 زعما اقدر اصدق الاحساس ديال سامية او يصدق هاد غيث كيضحك على رانيا🤔🤔

🌸 الجزء 32 🌸
⁦✍⁩بقلمي……………………زهرة محمد
*لا تخبئي الكلام*
مُتعبةٌ جِداً فقط !! لأنه بِي أنت وطامتِي الگُبرى .. أنّگ داءٌ تفشى في أدقِ تفاصيل حياتي ولم أملگ لهُ دواءً بعد•
نور جلسات و مرضاش البال للعينين لي كلاوها ملي دخلات و ايدين جون معنقينها جلسو و ضومونضاو فطور و هما عاطيينها غير لضحك و صوتها مسموع فلقهوة و جون مسكتش من نكت شوية حطو قدامهم لفطور و بداو ياكلو و يضحكو و يهضرو حتى صونا تلفون عند جون مكالمة من مديرو تاصل بيه على ود الخدمة عندهم ديفيلي حيت هو مصور فوتوغرافي أو مصمم ويب محتاجين ليه ضروري شيء لي خلاه يستأذن من نور و يمشي و هي بقات حانية راسها على فطورها مفتوحة ليها شهية شوية شمات عطر مغريبش عليها تغلغل في دماغها كتنشوا خلا قلبها يشطح صالصا حتى وقف عليها كيف ملك الموت عاقد غوباشتو و جورنال في ايديه ….
ياسين(مفقوص من طريقة ضحكها و زيادة على هذا طالبة جامعية )….. سلام عليكم آنسة نور
نور( خلعاتها هيبتو و تخنزيرة لي داير فيها حيت عمرها حققات فيه ) اااسستتاذ ووو ععلييكمم سسسلاام
ياسين (باقي بنفس شوفة لي يبردو الما في ركابي) …… واخا عارف ماشي من حقي نهضر معاك بخصوص تصرفاتك حيت هي كتبقا خاصة بيك كتبين مستواك الاخلاقي شوفي ا آنسة ملي كندخلو مكان عام كنحتارمو ناس لي مشاركينك فيه باش تسببي الازعاج لناس هنا مكيبقاش شيء خاص بيك لهذا من حسن حظك هضرت معاك كأستاذك و كنعرفك مزيان اما لو كان شخص آخر غيسمعك هضرة مغتعجبكش ..
نور من كثرة صدمة حلقها نشف و متحركاتش و حتى هو مخلاش ليها الفرصة فين تجاوب و لا يسمع ليها و دخلها بدون مقدمات فركع القنبلة فوجهها و مشا معصب منها حيت إلا زاد بقا غيسمعها شي هضرة لي غتخليها تبكي معجبوش الحال حيت ناس لي كانو جالسين شافو فيها شوفة ناقصة زاد بطوموبيلتو حتى لدار و نور مزال تحت تأثير الصدمة بقات كتشوف فجنابها و حشمت فحوايجها و لكن هادشي كلو سبابو داك صفرييط ديال جون و ياسين ضغيا هجرو ليها و زاد شربات كاس لما يهبط ليها الفقصة ..
عند الرحيل لا تضيع وقتك في البحث في أحشاء اللغة
لإنتقاء كلمات الحب أو الإعتذار أو الوداع، فكل الكلمات التي
تولد لحظة الفراق، إنما هي مجرد محاولات فاشلة لتبرير
وتفسير هروبك.

🌸 الجزء 33 🌸
⁦✍⁩بقلمي……………………زهرة محمد
*لا تخبئي الكلام*
ياسين حنين و خير دليل كيفاش كيتعامل مع سامية هو من الرجال لي كيقدّر المرأة و كيحتارمها و متبع قول النبي صلى الله عليه و سلم “رفقا بالقوارير” مكيبغيش يكسر خاطرهم مهما كان صايك و كيفكر مع راسو ..علاااش غوت عليهاا علاااش بفففف … هو لي زاد عصبو كتر طريقة تعاملها مع جون و قربو منها لهاد الدرجة و كيفاش دخل معنقها ياسين معرفش لاش هضر معاها بقا غادي و يلوم نفسو شاف صباح داز مهواش مشا نيشان لدارو بقا فيها حتى لعشية دوش حيد ستريس حتى سمع صونيط ديال باب دار….
ياسين (حاط فوطة صغيرة على عنقو و حل الباب ) اهلا اهلاا صاحبي دخل دخل
عصام (سلم عليه و دخل ) ….. افين غابر العيان كنتاصل و مكتجاوبش يكما مريض؟ ؟؟
ياسين…. ما مريض ما والو غير لعيا
عصام……. ووالخدمة سالات و عيان
ياسين……. حتى الملل كيعيي … شي قهوة نقصرو عليها بلاي ؟؟
عصام…… واخا غطير علينا نعاس منقولش لا
ناض ياسين لكوزينة يصاوب لقهوة مع تصميم الاوروبي صالة في كاين عصام مقابلة مع لكوزينة و بقاو يهضرو
عصام…. فخبارك الرحلة لي منظمة الجامعة؟ ؟!!
ياسين……(حاط ايديه بجوج على لبوطاجي) لا اشمن رحلة تاني
عصام(كيبرونشي لخيوط ديال لبلاي مع تلفازة) ….. رحلة خاصة لشعبة الرياضيات رفقة الأساتذة ديالهم ليوم غيصيفطو ليهم ايميل هادشي لي سمعت!!!
ياسين…… (ما طاز ليه سفر مكرهش يبات يصبح يلقا راسو في المغرب ) …..من عندي أنا غير بصحة و راحة
عصام….. و غير سول فين غاديين بعدا بلاصة زوييييينة صراحة كون منك نمشي.. 3 يام ترتاح و لجو زوين فهاد الوقت
ياسين (جاب لقهوة و جلس حداه ) …..قول اسيدي فين غيمشيو ؟؟؟!!
عصام….. بلاصة كتعجبك و مزال مشفتيهاش
ياسين(شرب من قهوتو و ضغيا حطها ) …….لاااااااا متقولهااش… شاموني!!!
عصام …….. هي هاديك (كيشوف اشمن فريق غيلعب بيه )…. اشمن فريق غتختار؟ ؟؟
ياسين …… ليفربول …. و امتا غيمشيو ؟؟
عصام(مد ليه مليطا…… la semaine prochaine je pense الأسبوع الجاي يمكن
ياسين ….. و حتى لداك الوقت يحن الله …. لعب لعب شحال ما خسرتي ههههههه

🌸 الجزء 34 🌸
⁦✍⁩بقلمي……………………زهرة محمد
*لا تخبئي الكلام*
أحببتك بسرعة هائلة ,لذا باتت فكرة نسيانك أو الإبتعاد عنك فكرة مستحيلة .
رانيا……. متخافيش هو ماشي فحالهم قاري و واعي ماشي مبرهش و دابا قالي بغيت نشوفك و نتي خاصك تعاونيني
سامية…. و قبل الالة ما نغامر معاك انشوف تصاور مولاي سلطان كيف داير واش يستاهل و لا لا
رانيا جبدات تلفونها و بقات توريها تصاورها و قلبها دقاتو غيوقفو بالفرحة و ابتسامة جميلة مرسومة عليها و عينيها مرسومين فيه القلوبة كتشوف فغيث فارس أحلامها لي كانت كتمنى و سامية كل ما تشوف صورة كتزيد من الشبه لكبير لي عندو حتى نطقت اسمو الكامل
سامية(دارت ايديها بجوج على فمها من صدمة ) ……. غيث الذهبي الصقلي 😲
رانيا(صدمة HD بصوت يكاد يسمع ) …. كتعرفيييه؟ ؟؟؟!!!
سامية كضحك واش غيث الذهبي الصقلي؟ ؟؟؟؟؟
رانيا …… هدا اسمو بالكامل؟ ؟؟
سامية كضحك حتى كترجع بلور و كتشوف شحال دنيا صغيرة و كتشوف غيث لي فارقتهم معاه الأيام هاهو ليوم نقدرو نقولو حبيب صاحبتها و رانيا مفاهمة والو زي الاطرش في الزفة تزيرت و كدور فعينيها و بغات تعرف منين كتعرفو
رانيا(بقلة صبر حتى قربات تبكي) ….. و هضري خلاص راك سكتي لي القلب فين كتعرفيه ا سامية؟
سامية….. اوا يا لالة غيث عشير خويا من الإعدادي و الثانوي نجحو بجوج في لباك ياسين مشا لفرنسا و غيث مشا لكندا من تما مبقيت شفتو ولكن صورتو متخفاش علي حيت كان كيبقا معانا فدار بزااف و الله يعمرها دار..
رانيا (تعجبت من هاد الصدفة متوقعتهاش)….. شوفي دنيا مطيحتني غير فصاحب خوك (شداتها من دراعها )… عفاااك عاودي لي عليه
سامية…. اح على الحب اش دار فيك هادي غير مزال مشفتيهش و اش وقع نتي لي عودي لي احساسك!!!!…
رانيا (قدات لبركة و سرحت فى عالم الهوى 😍) …… اش غنقول ليك دابا جالسة معاك و كنفكر فيه احساس زوين كيخليك طيري بالفرحة كنبغي كل لحظة نسمع صوتو متشوقة نشوفو لدرجة كيشاركني كل تفاصيلو ااااااااه اسامية متصورتش نطيح فيه بهاد سرعة و هضرتو موزونة كل على بعضو حلو
سامية ……هادشي كلو طاري فيك و أنا مجايبة لدنيا خبار
رانيا…… و مكنتش ضاناه غيبغيني و نبغيه نسحابو غير كيتفلا قلت ندوز بيه الصيف و دابا بلا ما تنسيني و عاودي لي عليه ختك أنا
سامية …… ههههههههههه شحال تخلصي؟ ؟؟؟
رانيا (دارت فيها شوفة شيطانية) …… بيزنيس تو بيزنيس بايبي (غمزتها) ..

#تتمة
رانيا ….. بيزنيس تو بيزنيس بايبي
سامية……. ههههههههه هادشي ولا فيه البيزنيس قولي اختي نسمع اطربيني
رانيا ….. نتي تعاودي لي على غيث و تسهلي علي نعرفو كتر و حتى نتي نهار تحتاجيني ازين غتلقايني واقفة معاك وقفة رجل واحد
سامية…… مكدبوش لي قالو * ومن الحب ما قتل* انا الا عاونتك حيت صاحبتي ووختي و معندنا غير بعضيتنا …
رانيا(عنقتها بكل حب) …. معرفتش بلا بيك اش ندير
صحابات بقاو هاكا على جماعة و لحتيت و عاودات ليها على غيث الحوايج لي كتعرف على انو يتيم الابوين و رباتو غير جداتو و كان وحيد والديه يعني معندو لا خوت لا والو و عندو واحد خالو ساكن فمدينة أخرى … شكراتو ليها و تمنات ليها الخير معاه و رانيا زادت طمنات كتر …
شوية حتى صونا لرانيا تلفون و كان خالها جا يديها..
ياسر (كيهضر فتلفون ) …. يكما ناوية تباتي؟ ؟!!!
رانيا…… صراحة و الله مكرهتش مطلبش بابا يخليني بليييز
ياسر(جالس فطموبيل و ولدو ناعس لور ) ….. هبطي قبل ما نطلع ليك
رانيا…. صافي صافي هانا هابطة
ياسر….. يله طلقيني..
سامية ناضت لبسات و مشات لكوزينة سلمات على صالحة و جات لقات سامية لاحت عليها لكاب و شال ليضربها لبرد حيت دوشات هبطات مع صاحبتها عند لباب غير وصلو لقاو ياسر مزال فطوموبيل ضار يشوف سمع الخطاوي لقا رانيا شادا فصاحبتها و وقفو حداه و هو غير شاف سامية نزل يسلم عليها حتى هي فرحت ملي شافتو
ياسر(سلم عليها بلا بيز و هي مركت فحوايجها و عينيه فعينيها )…… لباس عليك
سامية ….. الحمد لله و نتا
ياسر…… هاحنا كنعديو
رانيا…… يلاه ازين تهلاي فراسك… (تفكرت) …. فخبارك غيعلقو نهار الثلاثاء .؟؟؟
سامية ….. كدوي بصح يعني بقات 3 يام(توترت)
رانيا(رجعت عنقتها) ان شاء الله خير متخافيش
سامية(جمعت عليها لكاب حيت حسات بلبرد) ان شاء الله اختي
ياسر(وجه كلامو لسامية)…… يلاه سيري طلعي راه لبرد عليك
سامية….. يله بسلامة عليكم ملي توصلي صوني علي
رانيا و ياسر متحركو حتى شافوها طلعات عاد زاد خلا لعجاج وراه شوية رانيا عاد انتابهات لطه لي ناعس لور
رانيا… مال حبيب طاطاه ناعس
ياسر…… ديتو لبارك بقا يلعب حتى عيا و فطريق نعس
و صلو هز ولد دخلو ينعس و هي دخلات كانت 9 د ليل بدلات حوايجها و غير تأكتيفا لويفي و بدا يوصلوها لميساجات من غيث كتر من 10 اتصالات و الرسائل بلا عدد..
قفرتها المسخوطة #يتبع

🌸 الجزء 35 🌸
⁦✍⁩بقلمي……………………زهرة محمد
*لا تخبئي الكلام*
لا تبالغ في صرف الألفاظ الجيدة، تمرّن على الكلمات
الخادشة قد تحتاجها يوماً ما. إن ساعة من ساعات هذا
الضعف الإنساني الذي نسميه حب تُنشئ للقلب تاريخاً طويلاً
من العذاب. الناس يعشقون الكلام وأنا لم أكن أبداً أميل إلى
الثرثرة، أديرُ حواراً مع نفسي بداخل نفسي و لكن غالباً لا
تخرج الكلمات من شفتاي
نور بقات تمشا جنب لبحر و تفكر فكلام ياسين لي مفهماتش علاش هضر معاها بديك طريقة و حسات براسها صغيرة قدامو و هي مقصداتش تهضر و ضحك بصوت مرتفع هي هكا مولفا مع جون كتخلص من اي قيد أو شرط رغم التلعثم لي عندها … و هي مزال كتمشا دازت من حدا جماعة شباب باسلييين بقا ينكو عليها و يسدو عليها طريق…
الشخص 1 (كيشم فشعرها ) …..شعرك زوين هدا اصلي و لا ملصقاه هعهههه(نتفها حتى تقصحت )
نور حسات بخوف و معرفاتش اش دير قالت تكمل طريقها بلا ما تهضر و لا تجاوب فيهم شي حد و كل ما دير خطوة كيسد طريقها واحد فيهم
الشخص2 ….. فين غادا مزال متعارفنا؟ ؟
الشخص 3 يصفر ويعيط على متر ناجوغ يقووليه واحد حورية بحر هاربة ليكم هنايا
نور عقلها حبس و كتسمع غير تصفار فودنيها بغات تجبد تلفون تاصل بخوها ملقات كيف دير و معرفتش كيف تصرف حيت عمرها تعرضت لهاد الموقف للحظة استجمعت قواها و غوتت llllllaaaaaaaaaache mmmmmmmoi
Ssssssalopppppppare
صدى صوتها و كلماتها المتقطعة و صراخها خلات ناس تجمع و تنتابه ليها و الأشخاص لي عاكسوها ستفزاتهم بغواتهم لدرجة واحد فيهم صرفقها حتى طاحت و ماجاو فين يوصلو عندها حتى هربو جاو ناس قلال كيتمشاو نوضوها و كلشي كيسول دقة وحدة….. واش لباس عليك؟!!
يكما سرقو ليك شي حاجة….. واش نتاصلو ب لبوليس
نور غير كتبكي و بدات تسوس حوايجها و تحسس فوجها
امرأة….(كدوز ايديها على شعرها بكل حب)….. بنتي كيف كتحسي يلاه نمشيو لمركز شرطة بلغي بيهم (نور كترعد) …. متخافيش غنبقا معاك حتى توصلي لدار اجي معايا نوصلك لمركز و تما يديرو الإجراءات اللازمة اجي بشوية عليك متخافيش
ركبو سيارة و طريق كلها و نور عينيها منشفوش من دموع حسات براسها ضعيفة معرفتهش بلي أي بنت تكون فبلاصتها غتعرض لنفس الموقف

#تتمة
أسعد مشا لمركز الشرطة كانت عندو أولى قضاياه بقا خدام عليهم و حتى هما السبت كيكون عندهم داخل كتر من الخارج بقا صباح كلو وهو من ملف لملف كيشوف المجرمين لي روشيرشي شوية حتى دخل عندو المساعد بعد ما أذن ليه يدخل و علمو بلي كاينا شي بنت برا وومعاها مرا بغاو يقدمو شكاية
أسعد(بكل جدية) …… مقالوش شنو نوع شكاية؟ ؟؟
المساعد…… لا اسيدي ولكن غالبا سرقة و لا اعتداء
أسعد…… دخلهم بسرعة(بقا حاني راسو خدام فواحد الملف حتى سمع دقان ) …. بلا ما يهز راسو امرهم بالدخو
دخلات نور و سيدة لي معاها شادة فيها و معاهم المساعد عطا تحية مجددا باش ينتابه ليه و غير هز عينيه و تصدم من البنت لي قدامو ناض وقف بزرربة و نطق اسمها بكل خوف …
نووور
أسعد(اسئلة متكررة ) ….. اش وقع؟ ؟!! شكون قرب ليك؟؟؟!! هضري!! دويي!!..
نور جوابها هو لبكا مقدرت تنطق بحتى كلمة هضرت فبلاصتها غيير السيدة لي جات معاها
المرأة… سي الكوميسير راه عاكسوها شي دراري و واحد فيهم ضربها مجينا فين نوصلو عندها حتى هربو
اسعد (هز راسو فيها )….. شكرا على المساعدة يمكن ليك تفضلي تمشي إلا حتاجيناك نتاصلو بيك
المرأة……. منقدرش نمشي أنا واعدتها نبقا معاها حتى نوصلها لدارهم
أسعد…… حنا غنقومو بالواجب خلي المعلومات ديالك في الإستقبال…( بغا يخوي المكتب باش ختو تقدر تعاود ليه)
ضرب الجرس نادا على الحارس يمشي مع السيدة و ياخد معلوماتها في حالة حتاجوها و طلب منو يسد وراه الباب و ميخلي حتى حد يدخل عندو.. رجع عند نوؤ لي طيبات صباعها من كترت توتر و كل مرة تقفز كتحسهم فحال باقين معاها
أسعد……. أنا معاك حتى حد ميقرب ليك متخافيش(عطاها تشرب) … حاولي تهدني و عاودي لي اش وقع من لول و بشوية عليك
نور(كتحاول تجمع تنخصيصة) اهى اهى ككككنت كككنتمشى فففجججنب لللبببببحر حدددا ققققققهوة(………) ححححححتتتى مممممممعرررفتتتش ممممممنين خخخرججو كككانو 3 بببببببقااااو يييييتتتتحررررشو بببي و وووووواحد سسسسرفقني
أسعد(شاف حنكها لقاه متورم تعصصب و عينيه حمارو ) سرقو ليك شي حاجة قولي…
نور حركات راسها بلا..
أسعد …… الله يلعن الحمار تاع بوهم متخافيش دابا غنعطي الأمر بالبحث و غيمشيو يسولو و تقدر القهوة يكون عندها نظام المراقبة و الشارع تما فيه كاميرات(جلس حداها و تكاها على كتفو) ….. هدا لي بكاك و الله مندوزها ليه غير رتاحي الحمد لله جات على قد هاكا
نور…. دددديني لدددددار ععععفااك
اسعد …….تسناي غير نلبس جاكيط و نهز سوارت نوصلك
نور(بتعب)….. وووواخخا ضرني رررراسي ببببغغغيت نننععسس

أسعد شد فايديها و مشاو خرجو متاجهين للباب طلعو فطموبيل بقاو ساكتين حتى وصلو لدار مع دخل غمز غيثة لي شافتها و باينة فيها باكية و بغات تبدا تسول دخلها لبيت ديالها و دخلات وراهم باش تحاول تعرف اش طاري
غيثة …….. رورو مالكي احبيبة(شافت وجهها مطراسيين فيه صباع و خرجت عينيها) اااييه شكون ضربك؟؟!! (شدات أسعد من دراعو) شكووون ضربها؟؟؟؟؟!! هضضضر
أسعد(هضر بشوية)….. غيثة بلا غوات بدلي ليها حوايجها و خليها ترتاح و خرجي نهضرو.

🌸 الجزء 36 🌸
⁦✍⁩بقلمي……………………زهرة محمد
*لا تخبئي الكلام*
العتاب جزء من حبي لك فانا اعاتبكي لاني احبك وليس لاني
اكرهكي ، فحبك داخل قلبي لم ولن يقل ابدا اخاف ان
اعاملكي كما تعامليني فأجرحك كما جرحتيني.
بدلات حوايجها و غير تأكتيفا لويفي و بدا يوصلوها لميساجات من غيث كتر من 10 اتصالات و الرسائل بلا عدد..
و غير مشات لبلاصتها و طفات ضو صونا تلفون جاوبات..
غيث لا سلام لا كيف دايرة بصوت خلا طبل ودنييها يتزعزع…. فييييييييين كننننننتتتتتتتتتتتتي؟ ؟؟!!!
جملة خلات رانيا تفافا و تبدا ترعد واخا غير فتلفون و مفهمتش شنو سبب هاد العصبية حسات بعرق بارد فجسمها وعدم اجابتها خلاتو يزيد يتعصب
غيث….. رررراني ييمممكن سولتتتك ……. فييييي ن ككننتيي؟ ؟؟!
رانيا خافت تصماك جاوبات و قلبها كيفرفر بغات تصرط ريق لقاتو نشف
… كنت عند صاحبتي و دوزت عندها العشية
غيث (كيمشي و يجي فبيتو) …… و مفكرتيش فهاد الحماااار لي كيتسنا فيك و معارفش اش واقع ليك؟ ؟؟
رانيا…. رررااه غيير نسيييت مدرتهاش بلعاني
غيث (جلس فطرف ناموسية و كيهز فرجليه ) ….. و شنو درتيها بصح ملي باغا تخرجي قوليها و لا معندك في سوق و عااارفاني كل شوية نسول فيك
رانيا ….. راه مقصدتش..
غيث(بابتسامة باهتة و صوت عيان ) …. بصح كون كنهمك مغتنساينيش كيف أنا مكنساكش واخا سيري ابنت ناس تصبحي على خير و سمحي لي صدعتك (قطع)
رانيا رجعات تصوني لا مجيب تقطع و ترجع تصوني غيث يشوف اتصالها خلاها هكاك كدرس تولي تعلمو كيف كيعلمها
وصلات 1 ليل و مزال كتصل عالله قلبو يحن عيات و هي تصيفط ليه اوديو
رانيا ….. غيث (مع نطقت اسمو بدات تبكي ) .. اهى اهى سسمحلي مقصدتش عفااك جاوبني اهل اهى
غيث متكي فناموسيتو و حاط ايديه و را راسو مجاهش نعاس حتى وصلو ميساج فلواتساب سمع لاوديو و هو يتخطف كمل لاوديو و قلبو ضرو حيت بكاها
غيث كيتاصل و كيتسناها تجاوب بصوت حنين … علاش كتبكي؟ ؟
رانيا (بصوت باكي و مبحوح )… و نتا مبغيتيش تجاوبني سااعة و أنا كنصوني اهى اهى
غيث ….. شووووو حبسي من لبكا وراه نتي درتي علاش دابا نساي لموضوع و هذا كان عقاب باش متعوديش
رانيا….. و راه ققللت لييك سمحلي وومبغيتيش(كتنخصص)
غيث(بقلة حيلة) .. . دابا أنا لي غالط الالة نوضي غسلي وجهك من دموع و متقطعيش خلي الخط
رانيا…. واخا..

#تتمة
غسلات و جهها و جات بزربة مبغاتش تعطل عليه و كتنفس بصعوبة بحكم عندها الحساسية إلا بكات كيصعاب عليها التنفس لعنين ضغيا تنفخو يا ربي سلامة .. رانيا تخشات فلكوفرلي و جاوبت
رانيا …. الو
غيث…. سافا شوية
رانيا(كتهضر مخنوقة ) …. الحمد لله شكرا
غيث ….. مبيناتناش ا رانيا
رانيا(كتفشش عليه)…. علاش كنتي معصب عمرك تعاملتي معايا هاكا
غيث….. دابا أنا إلا كنت خارج كنعلمك و لا لا ؟؟؟!!
رانيا(بحزن كاعتراف بخطأها ) ….. كتعلمني 🙁
غيث….. كنقولك فين غادي و فين جاي حيت كنهمك كيف كتهميني مكنبغيش نخلي بالك مشغول… الالة تاهت و لقيناها حطي راسك فبلاصتي نخرج عند صاحبي و تاصلي تشدك العلبة الصوتية و الواتساب مخدامش عادي عندك ؟؟!!
رانيا(صوت طفولي) ……. لا معادييش و لكن أنا مقصصدتش
غيث(كيساير فيها)…….. وااااااخا الالة المرة الجاية متعوديش باش منتقلقش انا و نتي متبكيش صافي متافقين
رانيا….. صافي متافقين و لكن قولي علاش تعصبتي؟؟؟
غيث (تنهد ) ….. زعما معارفاش؟ ؟!! اش درتي خلتيني كنفكر فيك كنتعصب هاكا ممم
رانيا….. هههههه مدرت والو يقدر يكون غير اعجاب و ضغيا يطفا؟؟!
غيث…. شعليه متخليهش يطفا من اعجاب لحب و عشق أنا عجبتيني بنت زوينة و ضريفة اش بغيت كتر من هاكا
رانيا سكتت معرفت باش تجاوب للحظة خافت تخوض هاد التجربة و تجرح..
غيث ….. هاااااهي حشمت تاني .. باش نبين حسن نيتي خليني نشوفك و نهضرو و اللقاء المباشر ماشي هو تلفون
رانيا….. منقدرش نشوفك فهاد الأيام مبقا والو و يبانو نتائج الباك غير نجح و نشوفك
غيث…… ماااشي مشكيل ان شاء الله تنجحي و نحتافل أنا و حبيبتي
رانيا (إحساس غريب حساتو ملي سمعت هاد الكلمة معرفاتوش حيت أول مرة تعيش هاد الاحساس زوين و مخيف فنفس الوقت ) …. إن شاء الله
غيث….. جاك نعاااس؟؟؟!
رانيا….. عينيا كيتسدو
غيث …… أنا بعدا مسخيتش بيك و مكرهتش نبقا نهضر معاك و لكن راحتك عندي اهم سيري تصبحي على خير ❤
رانيا(كتفوه) ….. و نتا من أهل الخير
و في نفس البيت و في الغرفة المجاورة لغرفة رانية جالس ياسر و شاد الهضرة حتى هو مع سامية و كيهضرو ابيل فواتساب..
سامية(كتكحب ) …….كح كح كح كح
ياسر…… امالكي ياك لبااس؟ ؟؟؟؟!!!
سامية….. يمكن ضربني لبرد
ياسر…… حنا شهر 6 اشمن برد كاين؟؟؟
سامية……. كح كح كح دوشت قبيلة و ملي نزلت مع رانيا كان محرك البرد و شعري كان فازك
ياسر(قندش عليها ) ……… و دابا نتي بعقلك لي هابطة لزنقة و يلاه مدوشة

سامية……. و مجاتش صاحبتي جات عندي و منهبطش معاها واخا تكون في لموت..
ياسر…… الله يحفظك اش جبدنا لشي موت؟ ؟!! مكاين حتى دوا فدار
سامية……… كاين و معندييش مع دوايات كنعيفهم 😳
ياسر…… كنحس براسي كنهضر مع بنت سبع سنين نوضي شربي سيرو يفوتك لحال يلاه تهزي
سامية…….. ااااووووووف فحالك فحال خويا ياسين
ياسر…… بقاي تأفأفي علي نوضي و زيدون أنا ماشي خوك …انا ياسر …

🌸 الجزء 37 🌸
⁦✍⁩بقلمي……………………زهرة محمد
*لا تخبئي الكلام*
طريقتي في الغضب من الأشخاص انتقامية جدًا، أتوقف تمامًا عن النظر في أعينهم..
قالوا ضربة بدمها ولا كلمة
بسمها 🐍
نور يومين مخرجاتش من دار بقات كتفكر فطريقة لي هضر معاها ياسين و النظرة الغير مفهومة لي دار فيها …جالسة فبيتها و شادة بين ايديها كتاب كتقرا فيه و كل مرة تفكر لكلمة لي متصرطاتش ليها …
تصرفاتك كتبين مستواك الاخلاقي…. جملة خلاتها تشوا مأترش فيها الشخص لي ضربها و خلاها تبكي قدما حفرت فقلبها ديك الكلمة غير تفكرها و تبغي تاكل جنابها.
نور فقدت تركيزها في قراية الكتاب ناضت لبسة صندلة ديال داار و هزت حاسوبها و خرجت عند ختها..
غيثة (سمعت خطواتها و بقات كطرز و هضرت) …… رورو العشا على حسابك ليوم و مكرهتش اختي لكراطان من ايديك(هزت عينيها شافت فيها ) و كتري الفرماج
نور …… ممممممن ننننيتك ببباغانني نطططيييببب للليككم
غيثة(كضححححك ) ههههه و ماالك كيجي من ايدك زوينين ضغياا 15 دقيقة هاهي واجدة حيدي لعكز و سيري راه شويه تنساي لون لبزار كيف داير
نور…. لونو كحل مناسياهش… حطات الحاسوب فوق طابلة دزاج ووتاجهت لكوزينة ….. ووووواشش كككلشي ككاين
غيثة…. كلشي فثللاجة .
نور كيف دخلات لكوزينة لبسات طابلية و بدات توجد فلكراطان و قدات الخضرة بعد ما سلقتها نص سلقة في ماء مملح دارت جميع الخضر الموجودة عندها فلمول و حكات عليها لفرماج مزيان و دخلاتها لفران و خلاتها على نار هاااادئة
و هي كتوجد و ديك الكلمة كضور فراسها …وجدت صلاد فروي و دارتها فثلاجة حتى عيطات ليها غيثة تشوف دقان فلباب…
خرجات نور قاصدة لباب و تنكر ….
نور (حلات لباب) ……. دددابا نننتي غغير تتتبدددايي طططرزي و مممممتململييش منن دديك لببللاصة( أسعد دخل و سد وراه و بقا غير كيشوفيهم سلم عليهم و جلس يرتاح )
أسعد… مال الأميرة ديالي مقلقة ؟ ؟؟
غيثة……. و دارت لينا لعشا خاص كلشي يسمعنا(مدات ليها تلفون) ….. هاكي هاكي تاصلي بالجزيرة علميهم
نور (هزت مخدة من كنابي و شيرات عليها ) ههههههه ههههاددي ههي شششككرا
نور ….. خخخوييا ححبييبي سير ددوش ببباشش ننتتععععشاااو
أسعد …… ههي شي كراتان هدا ا رورو
نور جلسات حدا غيثة و حلات الحاسوب تشوف اش طاري في مواقع التواصل الاجتماعي…… ووهو للللي كككننعرف ننندددير
أسعد……. ممممممم 10 دقايق هاني واجد..

نور كطابي لمود باس ديال لفيسبوك و تحلات الباج و بدات هابطة و كتشوف حتى صادفت الاعلان في صفحة الجامعة عن تنظيم رحلة خاصة لطلبة العلوم الرياضية و أساتذتهم و من بينهم ياسين و غير كملت قراءة الإعلان ميلات فمها و قالت
نور…….. ببقققاااو لللييينا غغغغير الررررححلاااات!!
غيثة سمعت غير الكلمة لخرة و استفسرات منها …. اشمن رحلات؟ ؟؟؟!!
نور ……. مممنظمين ييييوم 14 يييناااير رحلة إلى شامونيه لطلبة و أساتذة
غيثة(بفرحة ) ووااااااو شامونيه هي غتمشي؟ ؟؟

🌸 الجزء 38 🌸
⁦✍⁩بقلمي……………………زهرة محمد
*لا تخبئي الكلام*
#الرحيــل و #اللقـــاء
كلمتان مساويتان في عدد الأحرف كل منهما يحدث ضجة بنفس الحجم في القلب لكن في إتجاهين مختلفين الرحيل يبقى مؤلماً حتى اللقاء واللقاء يبقى مفرحاً حتى الرحيل فكل من ذاق حلاوة اللقاء لم يسلم من مُـرّ الرحيل وبين هـذا وذاك أحاسيس وذكريات.. #اتوجعت_من_ايه
نور عاجباها الرحلة حيت كتموت على شي حاجة فيها طبيعة كتخليها تهدن و لكن مبغاتش تمشي على ود ياسين و على ود معاملتو آخر مرة ولات تفادا اللقاء معاه … ولات تحلم به من آخر لقاء كان بيناتهم …
نور (باصرار)……. للللااا ممغغنممشيش حححتتتى يكككون أأأأسعد كككوننجي ووو نننمشيو مممجموعععين
خرج أسعد من دوش كيشمر فنيفو و جا جلس مْسرَح رجليه كيرتاح من تعب نهار..
أسعد(جمع رجليه و وجه كلامو لنور)…… أنا بلا ما تعولو علي فلكونجي من هنا 6 شهر عاد نقدر ناخدو الخدمة مزيرة و فديك الوقت غيجي شتا ا رورو و نتي كتعجبك طبيعة من رأيي سيري هادا هو الوقت المناسب ..
غيثة بغات نور تبدا تعول على راسها و تشوف ناس جداد متبقاش منحصرة في جون لي كتجيه الخدمة و كيطول كتحجب فدار..
غيثة ….. و هادي هي الفرصة تعرفي على ناس جداد و تعرفي على طبعهم ووتشوفي بنات لي قدك كيفاش كيفكرو متبقايش سادة على راسك نتي في عمر الزهور عيشي حياتك قبل ما تولي ضركة لي داز من حداك دكيه…
نور…. بببقا للليك غغغير تتتقوللي رررراني ششششوكة حححمار ععععطاوها للليه يييشمها ووو كككلاها
اسعد و غيثة ماااتو بضحك على تشبيه لي عطات لراسها معرفوها منين جابتو مكتحكش بمغاربة كاين غير جون فرنسي الأصل
أسعد…… هههههههههه شكون كيعلمك هاد الهضرة و لي شافك يقول ساكنة في بجعد(تحية لناس بجعد)
نور(حتى هي قلبتها ضحك ) …… ككككانت ممماما الله يرررحمها كككتقولها لبببابا
غيثة(بحزن) ……. الله يرحمها
أسعد …… آمين يارب و إلا بغيتي تفوجي سيري مبغيتيش بقاي تحسبي شحال من شعرة فشعرك
نور…… حححححتى نننشوف
غيثة (حطات داكشي لي في ايديها ) …… نوضي حطي لعشا و من بعد و شوفي
أسعد…… نووضي الله يرضي عليك راه عيان باغي نعس
حطات نور العشا و كلاو في صمت و كل واحد شنو شاغل بالو و لي شاغل هي كيفاش تقدر تشوف في استاذها مرة أخرى
لا يوجد توقيت خاطيء لإتخاذ القرار الصائب! خذ قرارك بشجاعة ولا تتعذر بالوقت! #اتخاذ_القرار

🌸 الجزء 39 🌸
⁦✍⁩بقلمي……………………زهرة محمد
*لا تخبئي الكلام*
صالحة واخة ياسين خدام و ممخليهاش مخصوصة من شي حاجة و لكن عودها مولفش راحة كتحرك مرة مرة فشي مناسبة كطيب .. الخدمة لي كبرات بيها ولادها و خلات ليها صمعة زوينة بين ناس و كل عائلة تشكرها حتى ولا معروفة بخدمتها النقية و البنة في ايديها بين ناس…
سامية مكونيكطيا حتى بدا تلفون دار كيصوني و صالحة تغوت عليها من لكوزينة تشوف شكون …
صالحة ( من لكوزينة كتغوت) ….. و سااامية شوفي شكون ونتي غير تشدي داك المشقوف و تصماكي
سامية (نايضة و كتكتب لرانيا) ….. و سمعتو سمعتو حطات تلفون فوق رخامة و جاوبات … الو سلام
سيدة… وعليكم السلام ابنتي هادي نمرت صالحة لي كطيب
سامية…. اه اخالتي هي شكون نقوليها
السيدة…. قولي لها فاطمة عندي عراضة و بغيتها طيب لي إلا كاينة دوزيها لي
سامية ….. واخا تسناي نعيط ليها(حطات تلفون و مشات عندها ) …. ماما تلفون واحد لمرا بغاتك تكلمي
صالحة(كتمسح ايدها ) …. مقالتش اش بغات
سامية….. و هضري اماما و تعرفي
خرجت هزت تلفون و جاوبت على سيدة صالحة(بكل ادب و نخوة) …. الو السلام عليكم
السيدة …. و عليكم السلام لالة صالحة لباس عليك
صالحة…. نحمدو الله و نشكروه
السيدة…. لالة صالحة عندي واحد صدقة و ناس شكروك و بغيتك ديري بنة ايديك الله يجازيكك بخير
صالحة …. مرحبا الالة غير قولي لي امتا و فين و شحال دناس
صالحة و السيدة مينة تافقو على كلشي و متحاشموش على الثمن و كيف قطعات لقات سامية كتهضر مع ياسين و علمهم بلي غيسافر واحد 4 يام مع الخدمة ياسين
صالحة غير قطعات لقات سامية كتهضر مع ياسين و علمهم بلي غيسافر واحد ربع يام
صالحة جات جلسات و خدات طابليت تهضر مع ولدها واطمأن عليه ….. و فين غتمشي اوليدي مزال مغتجيش و راه توحشناك
ياسين داير لكيت كيحط حوايجو فماكينة صابون و دارها ضور و دخل لبيتو يكمل هضرتو …. غير رحلة خاصة لطلبة دياولي نظمتها الجامعة ووغير نجي ان شاء الله نهبط نشوفكم
صالحة…… الله يديك فنجا و يجيبك في نجا اوليدي و تهلا فراسك
سامية ملي سمعاتو مسافر و هي ترنح عليه بغات تعرف ديطاي ديال ديطاي … سامية من ورا مها كتغمز فيه ( زعما فين غادي عرفات إن في الموضوع ) صالحة ناضت تكمل شغالها و سامية فرزات ياسين غيقول لي كاينة و لي مكيناش..

🌸 الجزء 40 🌸
⁦✍⁩بقلمي……………………زهرة محمد
*لا تخبئي الكلام*
صالحة غير ناضت تقدي شغالها و سامية تربعت و قدامها طابليت مع خوها تشوفيه و تهز حواجبها بمعنى وقعتي و محدش سما عليك و هو خلاها حتى تقدات في الجلسة وقمعها ههههه
ياسين(بصوت حاد و مخنزر ) …… راه صيفطت لمي شي حاجة سيري معاها تاخدهم من لبوصطة و رضي ليها البال و عاونيها شوية وانا فينما نتاصل نلقاك مجبدة و هي في الكوزينة نوضي عاونيها يلاه تهزي تعلمي ما ينفعك
ياسين نبرت صوتو عندها ميزة خاصة يكون يضحك معاك و ضغيا يجمعها خلا سامية مطرطقة عينيها و حالا فمها و حتى قطع خلاها مفاهمة والو بقات غير كتشوف هو غير قطع و بدا يضحك و يهضر مع راسو … ياسين كيقاد فحوايجو نقيين فلبلاكار… ملقيتي معامن تلعبي ابنيتي يا سامية هههههه راه أنا لي مربيك مع قالها جات عينو على صورتهم بثلاثة حاطها فوق لكوافوز قريبة ليه وقتما توحشتهم يشبع عينو بيهم حتى يحن الله و يكون وسططهم
بقا يضور و يجمع و يقاد دارو باش إلا سافر يخليها نقية جاه جوع و مشا يصاوب ليباط بطون و سيزار حتى هو يضور معاه من بلاصة لبلاصة عيا و مشا تركن بعد ما حط ليه ماكلتو حط ليباط و كوكا قدامو يلاه دار لفرشيطة لولة فمو و ناض جاب بيسي يضرب طلة على لائحة الطلاب لي غيسافرو حل سيت الخاص بالجامعة كيشوف و كيحقق وويقرا أسماء الطلاب و مبانتش ليه اسم نور التاقي بقا يقلب و واااالو مكيناش معجبوش الحال ملي ملقاهاش كمل ماكلتو و هبطها بكانيط كوكا ووناض حط طبسيل فلافابو تفكر عصام يتاصل بيه هز تلفون من فوق لبوطاجي و دوز نمرتو و كيتسناه يجاوب
عصام(مجبد كيتفرج فلم اتش نقص من صوت تلفازة ) ….. oui bonjour الو سلام
ياسين….. سلام سافا بخير
عصام….. الحمد لله و نتا بخير جمعتي لي خاصك
ياسين……. الحمد لله مزال مجمعت واالو مزال مبرزط مع سيزار معرفتش معامن نخليه
عصام…….. اوووووه نسيناااه …
ياسين….. مناسيهش مكنبغيش نسافر على ودو
عصام …… مكاين لاش تهز الهم غدا صباح ندوز نجيبو عندي و وجد ليه امورو
ياسين…. مبغيتش نصدعك معايا ا صاحبي
عصام…… مبيناتناش حنا صحاب مكاينش مشكل
ياسين (تنهد تنهيدة ارتياح) ……. الله يحفظك غدا ندوزو ليك وونشربو قهوة… حيت départ(الانطلاق) .. حتى لعشية
عصام …… و عليه غنتسناك

🌸 الجزء 41 🌸
⁦✍⁩بقلمي……………………زهرة محمد
*لا تخبئي الكلام*
نعم انـا هي تلك #الأنثى بكـل المقـاييس والتـفاصيل
#عـنيده ،،، لـ أبعـد الحـدود لا احـب #التصـنع ولا النـفاق
ربمـا قاسيه احـيانا ولكـنني حـنونه #هـادئه دائماً اعترف
أنني #مـجنونه جـداً ومـشاغبه ولكنني واضـحه بمـشاعري مـع انـي اعشـق الغـموض نـعم انها #انـا
غيثة حارت مع نور كاع الطرق و الأساليب دارتهم معاها باش تقنعها تسافر ا واااالو بلا فائدة و أسعد ملاهي مع الخدمة مهضرش معاها خلاها على خاطرها و لكن غيثة طاحت ليها على دواها شكون من غيرو ليي غيقنعها و يخليها تقبل بلا ما تناقش معاه (اااايه هو هداااااك عليك نووور )
تاصلات بجون و عاودات ليه لي كاين و خلات عليه لباقي…
نور غير جلسات فدار و ولات ضور من بيت لبيت و حاضية مشها(🐈) مرة ضحك معاه و مرة ضارب معاه على حساب لكانة ملي كملات امتحاناتها يلااااه سلات لتلفازة و بدات تفرج في أفلام الرمانسية ههههه و بصدفة لقات اسم فيلم كوري و لجمالية صدف كذلك هاد الفيلم كيحكي عن طالبة و استاذها ان هاد الطالبة مشاغبة و متهاونة و كدير غير المشاكيل إلا انو استاذها بغاها كيف ما هي.. و للحظة نور سرح بيها خيالها لتفاصيل ياسين عينيه و فمو ونيفو و كيفاش تيكون ملي يتعصب و ملي يضحك و رسمت ابتسامة على محياها فاقت من أحلامها على صوت تلفونها لي صونا و طارت عليه تجاوب ملي شافت شكون
نور(كتلعب بشعرها باقي متأثرة بالمشهد) …. ننننسسيبتتيني هههاددي هههي صصصصصحبة
جون…… هههههههههههههه رورو كنقولو سلام
نور …… ااااشش ببغيتي لللاشش مممتاااصل
جون….. بغيت نسول فيك توحشتك و نعرف الجديد و ملي مكتسوليش كنعرفك دايرة شي مصيبة
نور…. مممددرت وووالو غغير ددار
جون…… مممممم و هاد دار حاضياها مخدمينك عساس عليها… سمعت بلي كاينة شي رحلة ما رحلة مغاداش؟ ؟!
نور ….. كككايينة ووو مممغداش ححيت مممكنننعررف حتتى ححد
جون…. ووهادي هي الفرصة تعرفي على ناس كاااع هادو لي غاديين كيعرفو بعضياتهم
نور ….. وووواش ااانا شششكيت عععليكم… ننتتسنناك ححتى تتتجي ووو نخخرججو كككيف مممواالفيين..
جون….. أنا مطول الغيبة هاد المرة ا رورو يمكن عام ولا عامين خاصك تسافري تشوفي ناس و يشوفوك ناس معرفتي يطيح فيك شي حد و يهنينا منك هههههههههههه
نور …… عععععام (عينيها عمرو بدموع ) شششوكة مممببقيتش غغغنششوفك

جون……. راه أنا لي منقدرش نصبر و منشوفكش يا أحلى و أغلى صديقة القلب الطيب… و على ما ساليت الخدمة بغيتك تبدلي الجو و متقنطيش و تجددي الطاقة دنيا مكتوقفش مغتسناكش تفكري نهار الا مشا مكرجعش حتى تلقاي راسك معشتيش حياتك…
ديما جون كيزمطها مكيخلي ليها ماتقول كتشوف حتى تعيا و تلقا كلامو صح و لكن هو عندو لكود ديالها كيدير ليها طلامس مكيخلي ليها ماتقول و هي غير تسمع
جون ….. شفت فسيت ليوم آخر أجل سيري و أنا متأكد غيعجبك الحال صافي!!!
نور….. ووواخا و إإإلا ممممعجبببنيش الللحححال تتتجي و تتتخرررجني
جون….. d’accord ma princesse 🤗 (حسنا أميرتي )
ألم تكن غريبة هذه الصداقة بيني وبين هذا الشاب على ما
كان بيننا من الائتلاف والأختلاف.. أكانت صداقة خالصة ام
كان وراءها أكثر من الودّ الذي يكون بين الأصدقاء.. صديق
نافع خير من عشرة عديمي الجدوى. أخبر صديقك كذبة فإن
كتمها أخبره الحقيقة
داكشي لي غيوقع فهاد الرحلة ربي لي عالم ههههههه #توقعاتكن

🌸 الجزء 42 🌸
⁦✍⁩بقلمي……………………زهرة محمد
*لا تخبئي الكلام*
ﻛﺎﻧﺖ ﺗﺤﺎﺩﺛﻨﻲ ﻭ ﻫﻲ ﺷﺒﻪ ﻧﺎﺋﻤﺔ ..💔
ﻭ ﻋﻨﺪﻣﺎ ﺍﺳﺄﻟﻬﺎ ﺇﻥ ﻛﺎﻧﺖ ﺗﺮﻳﺪ ﺍﻟﻨﻮﻡ ..ﺗﺠﻴﺒﻨﻲ ﺑﺤﺮﻭﻑ ﻣﺒﻌﺜﺮﺓ ﻻ ﺃﻭﺩ ﺍﻟﻨﻮﻡ .. ﺇﺑﻖَ ﻫﻨﺎ ﻭ ﻣﺎ ﺃﻥ ﺗﻜﻤﻞ ﺟﻤﻠﺘﻬﺎ .. ﺣﺘﻰ ﺗﻐﻂ ﻓﻲ ﻧﻮﻡٍ ﻋﻤﻴﻖ .. ﻟﻘﺪ ﻛﺎﻧﺖ ﺗﻌﻠﻢ ﺍﻧﻬﺎ ﻃﻔﻠﺘﻲ ﺍﻟﻤﺪﻟﻠﺔ .. ﻛﺎﻧﺖ ﻛﺜﻴﺮﺍً ﻣﻦ ﺍﻷﺣﻴﺎﻥ ﺗﺘﺮﻛﻨﻲ ﺍﺗﻜﻠﻢ ﻣﻊ ﻧﻔﺴﻲ ﻭ ﺗﻨﺎﻡ .. ﻭﺍﺣﻴﺎﻧﺎً ﺍﺧﺮﻯ ﻛﺎﻧﺖ ﺗﻮﻗﻈﻨﻲ ﻣﻦ ﻧﻮﻣﻲ .. لأﺣﺎﺩﺛﻬﺎ ﻻﻧﻬﺎ ﺗﺸﻌﺮ ﺑﺎﻟﺤﺰﻥ ﺍﻭ ﺍﻟﻤﻠﻞ ﻭ ﻫﻲ ﻋﻠﻰ ﻳﻘﻴﻦ ﺑﺄﻧﻲ ﻟﻦ ﺍﻧﺰﻋﺞ ..
ﻻ ﺍﺩﺭﻱ ﺇﻥ ﻛﺎﻧﺖ ﻫﻲ ﻣﻦ ﺗﻮﻗﻈﻨﻲ ﺃﻡ ﻗﻠﺒﻲ ..!
ﻟﻜﻨﻨﻲ ﻟﻢ ﺃﻛﻦ ﻣﺴﺘﺎﺀً ﻣﻦ ﺫﻟﻚ ﺃﺑﺪﺍً ..
ﻻ ﺃﺩﺭﻱ ﻛﻴﻒ ﺍﺳﺘﻄﺎﻋﺖ ﺍﻥ ﺗﺰﺣﺰﺡ ﻗﻠﺒﻲ ﺭﻏﻢ ﺛﺒﺎﺗﻪ ﺍﻣﺎﻡ ﺍﻟﻜﺜﻴﺮ ،
ﻟﻢ ﺗﻜﻦ ﺍﻷﺟﻤﻞ ﻭﻻ ﺣﺘﻰ ﺍﻷﻛﺜﺮ ﻋﻘﻼﻧﻴﺔ ، ﻟﻢ ﺍﺗﻤﻜﻦ ﻣﻦ ﺍﻟﺘﻌﺎﻣﻞ
ﻣﻌﻬﺎ ﻭ ﻟﻜﻨﻨﻲ ﺗﻌﻠﻘﺖ ﺑﻬﺎ ﺃﺷﺪ ﺗﻌﻠﻖ. 💙️ !
غيث ولا مدمن الهضرة مع رانيا مينعس حتى يهضر معاها ساعات طوال زادو تعلقو ببعضياتهم كتر و لقاااات علامن تفشش
(و لي لقات علامن تفشش و متفششتش الله يعطيها الحكة و قلة ضفار)
ولا عارف عليها كلشي من نهار تزادت حتى لدابا عرف صاحبتها الوحيدة سامية و معوداتش ليه بلي راه كيعرفوه … وحدة ليل و مزاااال كيهضرو ومبخلوش على بعضهم بكلام الحب ووالغزل ..
غيث متكي فوق نموسيتو و داير ليكيت صون فيل بصوت خلا قلبها يفرفر ….. حبيبة مبغاش تنعسي وحدة و عشر دقايق هادي ..
رانيا …… إلا جاك نعاااس سير غتكون عيان مع الخدمة !!
غيث ….. أنا كنهضر عليك خايفك تمرضي و نتي اش كتقولي اما انا معنديش مشكل مولف
رانيا…. اش مولف؟ ؟!! تسهر مع لبنات فتلفون ياك!!!
غيث (طلع ليه دم كيحاول يبرد ) ……. واش نتي سكرتي ولا مالك
رانيا……. نسولك و جاوبني بصراحة … كتخوني؟؟!!
غيث…… واش داك المخ عندك مخدامش ولا خارج كونجي واش نهار كلوو و انا كنهضر معاك و زيدي عليه ليل و غنخونك و امتا كنسالي باش نعرف وحدة أخرى راه ملي عرفتك تحد لي لجدي العرف شوفي منبغيش نسمع منك هاد الهضرة مزال باش منتعصبش و راك شفتي عصبيتي كيف دايرة …
رانيا…… هههههههههههه كتولي زوين و نتا معصب ههههههههههه
غيث ….. ياك الالة !!!
رانيا ……. ههههههههه لا لا ضحكتك حسن
غيث(بتاسم نصف ابتسامة) …… هههه و امتا شفتيها؟ ؟؟
رانيا …. ديما فاش كنهضرو ابل فيديو
غيث…. و شنو كيعجبك ثاني؟ ؟؟
رانيا….. كلشي و صافي
غيث…… كنتسنا غييير امتا نشوفك احبيبتي مبقيتش قادر نتسنا كتر
رانيا….. مبقا والو احبيبي.. غدا بليل غيلوحو نتائج و نجح إن شاء الله و نخرجو
غيث …….. ان شاء الله شنو بغيتي نجيب ليك فلكادو ؟؟؟

رانيا….. لي بغيتي احبيبي ماشي مشكيل إلا شفتك هداك اجمممل كادو
غيث……. ااااح اقلبي شهدو ياناس هاد لبنت باغا تقتلني اش هاد لحلاوة كلها اعباد الله
رانيا ….. هههههههههه ههههههههههه و باركة عليك من لحلاوة دير ليك سكر و أنا منبغيكش تممرض
غيث…… كنبغييك ❤
رانيا ….. اا اه مجاكش نعاس
غيث ….. علاش كتهربي،؟؟؟؟!! الا معجباتكش منبقاش نقولها
رانيا …… ولااا راه زوينة غير ملي كتقولها كتوضرني مكنبقا عارفة ما نقول 😭😭
غيث…… ملي زوينة قوليها لي مزال مسمعتهاش منك و بغيتها تكون خارجة من قلبك
رانيا جاب ليها لبكية حيت لكلمة مساهلاش كتحسي بقلبك سيقف من الخفقان و يخرج من بين اضلعك كلمة تخلي رجليك متابتينش في الأرض و شفتاكي ترتجفان عند النطق بها غيث كيتسنا و هي ساكتة
غيث …… صافي بلا ما نبرزطك سيري تصبحي على خير حتى لغدا
رانيا(مشعراتش و لكن القلب فاز بالمعركة مع العقل ) بصوت أنثوي لي كيخليه بلا عقل سمع من محبوبتو ….. كنبغيييك😍

🌸 الجزء 43 🌸
⁦✍⁩بقلمي……………………زهرة محمد
*لا تخبئي الكلام*
أبي إن قلبي قارب على النهاية فقد تعبت من الأنتظار لعل
يوماً تأتي فيه لو في حلمي لعلك يوماً تأتي إلي وتضمني إلى
صدرك الحنون فقد أنتهت الدموع من كثر البكاء دون جدوى.
سامية غير قالو ليها ليوم غيعطيو النتائج في الموقع الإلكتروني بليل و الخلعة شاداها ملي فاقت و قلبها مقبوط عليها و حابسة دمعتها قدام مها غير بزز… ولات فحال الحاملة لي قربات تولد غادا جايا لطواليط جات جلسات على طابلة لفطور و مقداش تاكل دير ضغمة و تبقا فمها شحاااااال صالحة شافت بنتها ماهياش و سولتها حيت طبيعي قلب الأم كيحس
صالحة…… بنتي سامية اش كاين؟ ؟؟ مفطرتي كيف عوايدك ما والو و حتى حق شهر لي كدير ليك هاكا يلاه مشات
سامية(غير قالت ليها اش كاين و دموعها نزلو ) …. ماما أنا ديما كنجيب مزيان و كنفرحك ياك اهى اهى ليوم غيعطيو النتائج في ليل و خاصني المعدل مزيان و خايفة منجيبش مزيان
صالحة……. و مالكي مسبقا لعصا على الغنم شوفي ابنتي أنا هاد الباك لي يمرضك لي معندي ما نكجدر بيه و لي بغاها ربي هي لي كاينة نوضي غسلي وجهك و استغفري الله و زيدي فطري أنا انوض نضور بدار باش نخرجو نتغداو يلاه يلاه أنا معنديش لولاد لي يبكيو على كارطونة نوضي نوضي سربي نضورو و نشري لبنتي حويجات الصيف حتى إلا جا خوك ان شاء الله تلقاي باش تخرجي و يلاه الله يرضي عليك ( ناضت لكوزينة و كتهضر) … راك بنتي كيف ما كان الحال
سامية(مقتنعاتش بلهضرة مها حيت حالها حال أي بنت باغا تحقق حلمها ناضت لحمام تغسل ولخاطر مكاينش )…. هانا نايضة نتوضا وونصلي ضحى هزات صينية و تبعاتها … كون غير خليتيها حتى نشوف النتيجة و نخرجو بخاطرنا..
صالحة…… غدا ان شاء الله غنمشي عند سيدة لي عندها العراضة يكما نسيتي و انا يا لالة باغا نخرج مع ينتيي بلا نتيجة طلقي راسك و بلا كترة الهضرة

سامية حطات لبلاطو في الكوزينة و مشات تجر فرجليها لحمام غسلات توضات و صلات و لبسات جلابة لكريب في لموف بارد قصيرة من لتحت و حتى من ليدين جمعت شعرها غزااال و جلابة مع لاطاي ديالها جات خطيييييرة

و حتى صالحة سالات شغالها و لبسات جلابة لمليفة بفولارها و خرجات مع بنتها يضورو و يتغداو وتخرجها من الجو لي كانت فيه خداو طاكسي نيشان لمول يضورو و يتفرجو كيف ناس يخرجو من هاد المحل و يدخلو لاخر حتى وصلو لمحل الذهب كيشوفو من زاج الخواتم و سنسلات و كورميطات و مناقشين كل وحدة تقول هدا زوين لا هذا زوين و يضحكو و دخلو عند صاحب المحل يشوفو الاثمنة حتى تصادفو مع شخص الذي لم يكن في الحسبان …

#تتمة
غير دخلو لمحل ديال الذهب لقاوه كيسلم و غادي فحالو مع غيخرج هو و لدو بانو ليه داخلين هو يوقف يسلم.. شافوه و عرفهم و عرفوه
ياسر …. السلام عليكم لباس الحاجة ( الصالحة عقلات عليه و كيفاش متعقلش و هي نهار الصعيب لقاتو فجنبها )
الصالحة….. نحمدو الله و نشكروه لي لقا صحيحتو يقول الحمد لله العائلة الكريمة بخير
ياسر…. الحمد لله الله يطول عمرك
ياسر جاتو الفرصة حتى لعندو يشوف ليي شاغلة القلب و العقل بلا موعد و أول مرة يشوف سامية لابسة لبلدي و و حنا عارفين جلابة كيفاش كتبين المحاسن ديال البنت بقاا يشوف فحال عاد شافها خافتو يشوها مدات يدها و قالت السلام …
سامية(بابتسامة)…… السلام عليكم خويا لباس عليك رانيا و خالتي و عمي لباس عليهم
مع قالت خويا ياسر فاق من سهوتو و بدا يضور فجنابو عرفها دارتها بلعاني بان ليه غير ولدو طه أمرو يسلم عليهم حتى هو وودعهم و غادرو المكان فرمشة عين و مشا معصب و حااااول ميبينش اما كون ديك لحظة تشعلي حداه وقيدة يتفركع اما هي تعمدات تقول ديك الكلمة باش يجمع عينيه لي كانو غيكلوها دارت تبعاتو بلعين حتى خرج …دخلو لقلب المحل يسولو على واحد السنسلة عجبات سامية مها لقات الثمن مناسب و قالت هادي فرصة تاخدها لبنتها قبل ما يعلنو على النتائج بغات تفرحها كيفما كانت النتيجة قيساتها عليها جاتها كتحمق جمعها ليها الذهيبي فبواطة و عطاهم لاكارت فيزيت …
الذهيبي …… لمحال محالكم الحاجة مرحبا بكم في اي وقت ووالثمن مناسب بغيتي تبيعي تشري مرحبا
الصالحة….. إن شاء الله اسيدي الله يجيب التيسير الله يعاون
خرجو من عند ذهيبي و مشاو يضورو يشوفو حويجات خداو علاش قدو و تافقو يمشيو ياكلو الحوت سامية بحكم أنها كتخرج شوية و عارفة المحلات و هي جيبيها حتى الماكلة و مبقاش ضحك داتها لمحل نقي و كيجيب الحوت جديد فطريقهم غاديين يشدو طاكسي مع ركبو قالت لمول طاكسي فين غاديين سمعت تلفون فصاك كيصوني جبداتو و جوبات …
سامية بانت ليها نمرت فرنسا عرفاتو خوها….. الوو خويا
ياسين كيهضر و هو معصب من آخر مرة مرضات فيها ختو ولا كيخاف…. فينكم سااااااعة و أنا كنصوني فلواتساب
سامية…. غير خارجين اخويا و نسينا متصلناش بيك المهم لباس عليك
ياسين(كيسد فباليزتو و محاملش هاد رحلة من الاصل) ….. الحمد لله و نتوما؟ ؟ الواليدة حدااك؟!
سامية…. الحمد لله اه ها هي (دوزات ليها تلفون )
صالحة…… االو وليدي لباس عليك
ياسين….. وي الوليدة لباس عليك؟ ؟، فين خارجين
صالحة…. غير يضربنا البرد شوية و ناكلو حتى حنا برا كيف ناس

ياسين…… بصحتك اميمتي ياك تنقولك خرجي و نتي لي مكتبغيش المهم متمشايش بزاف حاولي على ركيباتك و بصحة و راحة تهلاو فبعضياتكم
صالحة….. الله يعطيك الصحة اوليدي الله يرضي عليك حتى نتا رد البال لراسك
قطعات مع ولدها و رجعات لسامية تلفون و سولاتها على البلاصة فين كاينة جاتها طرييق طوييلة
صالحة (قربات لعند ودنها و هضرت ) …… واش مزال طريق طويلة
سامية….. لا لا ها حنا وصلنا كتهضر مع مول طاكسي …. دور على ليمن ووقف اسيدي
مول طاكسي ضرب سينيال على ليمن ووقف حدا محل زوين خاص بالأسماك هبطو بعدما خلصوه و توجهو للمطعم يشوفو فين يجلسو قررو يبقاو على برا حيت كان الجو زوين رحب بيهم النادل و خلاهم يرتاحو عاد جاب ليهم القائمة باش يختارو قيد الطلبات مشا…

🌸 الجزء 44 🌸
⁦✍⁩بقلمي……………………زهرة محمد
*لا تخبئي الكلام*
سامية قاتلاها الخلعة ووتبكي و رانيا سايرة تمعشق في ركاني ههههههه نساااات بلي ليوم إعلان النتائج لاعبة قاش قاش مع مها و باها دخل لبيت تخرج تمشي لكوزينة تحفا ليها الجرية تمشي لطوالييط المهم تهضر مع غيث …
غيث صايك غادي لخدمتو و فطريقو ليها كيهضر معاها…. حبيبة قلبي صباح الخير
رانيا(بابتسامة فيها مزيج من الحشمة و الحب ) ….. صباح النور حبوبي لاش متاصل دابا؟ ؟
غيث …… اش هاد الهضرة كيفاش لاش متاصل يخ منو و عيني فيه
رانيا…… و لاااااا مفهمتينيش و قصدت لاش متاصل و نتا صايك و أنا دييييما كنقولك متاصلش بي و نتا في طريق
غيث….. حبيبتي خايفة علي ممم
رانيا(محساتش براسها و بدات تغوت)…. شنو منخافش عليك و دابا نتا صايك و تركيزك ماشي فطريق شوية حتى سمعات فران صيك ساد الصمت في تلفون شوية تقطع الخط
رجعات تصوني ا وااالو لااا مجيب و الشيطان كيفرح فهاد اللحظة كاع الأفكار طاحو عليها تلفات بيها لرض معرفت لمن تاصال معرفاتش فين تمشي و لا تجي و عطاتها لبكا واش دار كسيدة وفحالة خطير و لا مات هزات تلفون و بدات تاصل بيه كيصووني و مكاينش لي يجاوب مبانت ليها غير سامية تاصلات بيها مجوبتهاش فلواتساب تاصلت بيها على رقمها الخاص…
سامية(كتاكل و جبدات تلفون تجاوب ) …. الو حبي فين
رانيا(كتهضر و تاكل فضفارها ) ….. ناري عتقيني غنموت
سامية(سولاتها مها بعينيها شكون قالت ليها رانيا) مالك اش طاري
رانيا….. كنت كنهضر مع غيث وهو كان غادي الخدمة حتى سمعت صوت لفران و دابا مكجوبش معرفتش اش ندير
سامية(كتهضر بشوية ) مغيوقع والو و معندك ماديري ماعرفاه فين خدام ولا فين ساكن و حتى إلا عارفة غتمشي تقلبي عليه سيري جمعي خناينك و تسنايه حتى يتاصل
رانيا….. واش أنا كنقولك سمعت صوت لفران ونتي كتقولي لي سيري تسنايه
سامية(كتهضر و تعبر بايديها ) …… شوفي نسالي لغدا و نجي عندك يلاه قطعي ايدي عامرين
سامية قطعات و حطات حداها تلفون و كملت غداها و مع لكاالم فداك المطعم تاكل ضغمة و تعرفها منين دازت داكشي لي مكلاتوش في لفطور عوضاتو دابا مكاين غير الله يعطيك الصحة و جات مقابلة مع لباب حاضية داخل و الخارج وحتى لواحد شوية سهاااااات فواحد السيد كبير شوية داخل هو بنت صغيرة شوية شي 16 عام و دري صغير تكون عندو شي سبع سنين بقات كتشووووف كيفاش داخلين كيضحكو و دري ينقز و شاد فايد باه و هي لي عمرها عرفت لمست الأب كيف كتكون و كتقلب بين ثنايا ذاكرتها فلم يكن له مكان حاولات تخيل شكلو و ضحكتو و تصرفاتو

و تصرفاتو ملقااااتش لقات غير مها و خوها واصدقاءها و أين صورة الأب؟ ؟ عيات تفكر فلخر حدرات راسها و هاد المنظر كان كفيل يسد ليها الشهية

🌸 الجزء 45 🌸
⁦✍⁩بقلمي……………………زهرة محمد
*لا تخبئي الكلام*
نور من بعد ما هضرت مع جون و ضورات هضرتو فعقلها تسجلات في الرحلة و اقتنعات بلي العمر مكرجعش و جات الفرصة حتى لعندها لاش ضيعها
قرأت يوماً أن الفرصة لا تأتيك مرتين.. قد تكون هذه الفرصة مستقبلك..سعادتك..حياتك.. فلا تضيعها مهما يحدث لأنها قد لا تتكرر مرة أخرى!!
خرجت من دوش لابسة بينوار بيض قصير و فرحانة حيت غتسافر جبدات باليزة متوسطة الحجم حلاها فوق ناموسية و حالة بلاكار و جالسة تفرج فيه معرفت منين تبدا حتى جات غيثة تشوفها فين وصلات لقاتها مزال مبدات
غيثة (متكية على لباب) ….. نور شتك باقي مجمعتي حوايجك راه مبقاش لحال ضورات راسها فلبيت كتشوف لباليزة خاوية و هي شعرها مزال سارد كيقطر دورات راسها و مشات عندها
نور(زفرت الهوا بقوة) ….. اوووف مممعرررفت مممنييين نننبدا ممممعطططلة و ممممجمممعت وووالو
غيثة(شداتها من كتافهاا) …… غير جلسي جمعي شعرك و نتي خارجة من دوش و لبالكون محلول تصدقي غادا مريضة
اشنو غتاخدي معاك؟ ؟
نور(ميلات شعرها جنب كتنشف فيه) …. كككساوي رراه صصصههد و بببااالللغينات غغنندي ددددجين وووااحد ووو هههداك تتتتيششورت لببيض ووو صصصافي
غيثة …. كيفاش صافي غتدي سورفيط ضروري منها مريحة و لتبغيو تكتاشفو لبلاصة تلقايها و كاسكيط اكسسوار فبواطتو و لمكياج فصاكو لوازم دوش حتى تنوضي تجمعيه سربي سربي باش نشف ليك شعرك
نور….ناضات لبسات بلخف كسوة و جلسات قدام المرايا تسنا ختها تصاوب ليها شعرها دهناتو بسيرو و خدات غيثة سيشوار صاوباتو ضغيا خلاتو سامبل صاوبات مكياج خفيف و جمعات لي خاصها و باست ختها
نور…… ممممعععرررففتش ككون مممكننتيش ممعععايا ااااش ننندير(عاودت باستها )
غيثة….. نبغي نشوفك فرحانة سيري و دوزي وقت زوين و رجعي عاودي لي على تيتيز ههههههههه
نور…… هههههههههه
دخل أسعد لقاهم يضحكو و بقا يشوف فيهم حنحن و تقدم لجيهتهم
أسعد…. إلا زدتي دقيقة غيمشي عليك لكار و بقاي تكركري معاها هنا
غيثة…. غرتي غرتي ههههههههههه يلاه احبيبتي باش متعطليش على الوقت
نور…… ااانا ووواجدة ييييلاه (هزات صاكها على كتافها و جرات باليزتها)
الأخوة وطن وأنا من دونهم غربة😍
ركبو فطموبيل غيثة لقدام وونور لور مخدمين اغنية سعد انتي باغية واحد و كيغنيو و فرحانين و ناشطين حتى وصلو لنقطة الانطلاق كار واقف و الأغلب طلبة راكبين و المكلفين بالرحلة كيقيدو الأسماء نور ودعات خوتها و تمناو ليها رحلة سعيدة حطات لباليزة في المكان المخصص و طلعات كتشوف فزملاءها حياتهم بابتسام

حتى لقات بلاصة خاوية و جلسات و ماهي الا دقائق و تنطلق الرحلة إلى شاموني و لكن مزال شخص ملتحقش واش دار بناقص الله

🌸 الجزء 46 🌸
⁦✍⁩بقلمي……………………زهرة محمد
*لا تخبئي الكلام*
ياسين من عادتو كيوصل في الوقت و هي من مبادؤو الغير قابلة للتغيير احترامو للموعد عندو شيء مهم و لكن ليوم غييير حيت طاكسي لي ركب فيه كانو غاديين في أمان الله حتى وقف و مبغاش يديماري مول طاكسي كيضور لكونطاك و حلفات ديك لبرويطة لديمارات ياسين كان مبرد حتى قال ليه شيفور…
مول طاكسي(مزال مضارب مع لكونطاك ) ….. سيدي إلا ممكن تهبط تدفع نشوف واش طاكسي غيديماري
ياسين…. نعم!! مسمعتش اش قلتي؟ ؟ ( هو سمع بغا غير يتأكد
مول طاكسي….. من فضلك تهبط تدفع باش نشوف واش يديماري لي طاكسي
ياسين مجوبوش سلم امرو لله و هبط يدفع غير حشم حيت راجل كبير اما كون كان شي حد صغير غيهبط و يخليه … جمع القاميجة خافها توسخ ليه و دفع ليه و شيفور كيحااول ا وااالو مبغاااش بقا شحااال يدفع واحد المسافة ا والو بدا يعرق و طلع ليه دم ديال بصح مشا لعندو هضر معاه…
ياسين….. شوف اشريف عيط لديباناج يهز ليك هاد طاكسي
مول طاكسي…..واخا اسيدي سمح لي عدبتك… مد ليه كلينيكس و اعتاذر منو
ياسين خدا باليزتو و مشا ساخط ما حيلتو تعطل ما حيلتو تسخسيخا لي دازت عليه جبد تلفون يتاصل بصكع ليام ديال صاحبو قال بلا ما يوصلو يعدبو و فضل ياخد طاكسي و لكن العداب مكتوب على عصام
ياسين….. الو فينك
عصام…….. هانا مونس مع صاحبي جديد
ياسين……. و نوض جي عندي راه طاكسي طاح اونمبان و باقي حاصل في شارع (………….)
عصام(غير قال ليه حصل و جمع الوقفة)……. هههههههههه وباااينة هاد الرحلة من اولها قطع قطع هاني دابا عندك
عصام هز سوارت سد على سيزار و مشا طاير عند صاحبو ديمارا و مشا طاير عندو حيت عرفو معطل وصل الشارع و نقص سرعة و بقا غادي و راد البال لقاه واقف حدا واحد الشجرة
عصام (خرج راسو من شرجم ) ……. و طلع اصيكع طلع
ياسين ( طلع و قرودة جامع لفنا كينقزو فوق راسو ) …… عصام الله يرحم الوالدين لما صوك و نتا ساكت
عصام ……. ها هو ساكت(مقدرش يحبس ضحكة ) هههههههههههههههههه
ياسين(شافو يضحك و حتى هو ضحك بلا هواه )……… ههههههههههههههه والله الا كترة الهم كضحك زيد زيد راه زوينة هي الا لقيتهم مشاو
عصام …… لا لا ميمكنش يمشيو

و هما كيهضرو حتى تاصلو بيه المسؤولين على الرحلة و خبروه بلي راه كيتسناوه و مجا فين يقطع حتى كان عصام وقف قدام الكار ودع صاحبو و اعتادر من المسؤولين و طلع الحافلة و غير شافها دار نصف ابتسامة بانت ليه بلاصة خاوية حداها و مشا جلس و رجع راسو لور يحاول ينسا هاد ساعة في الجحيم لي دازت عليه

🌸 الجزء 47 🌸
⁦✍⁩بقلمي……………………زهرة محمد
*لا تخبئي الكلام*
غيث كان فسلامة الله كيهضر مع رانيا حتى خرج قدامو طريبورطور خلاه يضرب فراان صيك حتى كاع ناس لي في الشارع ضار قطع تلفون يهبط يشوف هاد الكيدار لي حرق ضو و كيقلب على عزارين فين غادي خبط الباب و قصدو شنق عليه …
غيث (شنق عليه و هبطو من طريبورطور ) …….. واش زااا…..ل بوك مكتشوفش ضو شاعل
سيد …… خويا سمحلي راني زربان غنهز رحيل لشي ناس و معططل
غيث (طلقو و بدا كيهلل عليه )…… سمحلي اش ندير بيها ااه واش غتصاوب هاد جرا لي درتي
تجمعو ناس و بداو يطلبو فيه و لا هاد غيث بغا يبرد قالك واااالو لبوليس يحضر يقيد كوسطا المهم يطبق القانون مول طريبورطور يطلب و ناس يزاوكو و هو شااعل حتى دخلات واحد السيدة باينة فيها خاااترة و علامات الوقار في وجها
السيدة (شداتو من دراعو بحنية باش ينتابه ليها)…. ولدي الله يرضي عليك هو غلط و البوليس إلا حضر غيديو ليه باش يسترزق الله و إلا كانت شي خسائر مستعدة أنا نخلصها الله يرضي عليك
غيث غير حطات السيدة عليه يديها ضار عندها و غير قالت ليه الله يرضي عليك و هو يبرد حيت قليل فاش كيسمعها بحكم والديه ميتين رض شعرو لور و ساط الهوا من فمو و ضار خنزر فيه……. سير غير فحالك و سمعني إلا بقيتي على هاد الخفة راه عزراين كتقلب عليه اولد الحرام من فعلك سير غبر ورجع شاف في السيدة … شكرا الالة مبغيت حتى تعويض
مشا طلع طموبيلتو و مشا لخدمتو دخل الشركة لقا تحية و دخل المكتب بعدما وصى الكاتبة تجيب ليه قهوة جبد تلفون يتاصل برانيا لي عرفها غتكون مشوشة عليه غير دوز نمرة و جاوبت
رانيا تخلطات عليها فرحة و خلعة و الهضرة هربات ليها و قلبها غيسكت من كثرت ما كيضرب غير باش تقول الو لسان تربط و عطاتها لبكا و فبكاها صوتها كيولي مبحوح و ديك البحة كدبحو..
غيث (مبغاهاش تبكي عزت عليه) …… شووووت لا كتبكي دابا أنا بخير راه موقع والو كاع داك الخوف خرجاتو بكا رانيا حبيبة الله يرضي عليك سكتي و هضري معايا
رانيا (بالغوات حتى زاد صوتها بح )….. ووااااااااش سااااااعة معررررفتك ميت ولا حي و لا فسبيطار مفكرررتييييش هاد الكلبة لي بقات مشطونة عليك
غيث…… علاش اش غيطرا الله يهديك
رانيا(زادت جهلات عليه ) ….. واش سمعت صوت لفران و نتا كتقولي لي اش غيطرا ليك ( نقصات من حدة الصوت) … واش مكنهمكش
غيث…… حبيبة قلبي سمحي لي راه واحد الحمار حرق ضو و فرانيت عليه و تلاهيت والله ما قصدت

رانيا بقات غير كتسمع و مجوباتش و كتشوف كيف كانت حالتها قبل ما يتاصل و كيفاش ضغيا تعلقات بيه و رجعت تبكي و تنخصص
غيث(ضرو قلبو عليها تنهد ) ……. عمري كنبغيك و منقدرش نعيش بلا بيك حبسي من لبكا إلا كتبغيني
رانيا(كتمسح دموعها) …… راه هما كيهبطو بوحدهم
غيث….. واخا الالة نوضي غسلي وجهك و شربي و تهدني و نسالي و نعاود نتاصل بيك واخا !!!
رانيا…… واخا …
ناضت رانيا لحمام تغسل هزات راسها في المرايا كيبان ليها نيف حمر و لعينين منفوخين و الحالة حالة الله هزت الفوطا كتمسح حتى سمعت صونيط لباب حلات كان خالها و ولدو دخل سلم و طه لصق فرانيا كيقوليها
طه(كيجرها من سروالها) ….. طاتي طاتي علفتي(عرفتي) سكون سفنا فلموول ؟؟؟
رانيا (كتقلدو) ….. سكون سفتي احبيب طاتي
طه …. سفنا صاحبتك مع واحد المرا و سلمنا عليهم
رانيا….. اااااه شفتو سامية؟ ؟
طه …… اه هي هههههههه طاتي طاتي صاحبتك قمر
ياسر ضار شاف ولدو اش قال و بقا مصدوم فيه اما رانيا كاااع داكشي لي بكات ضحكاتو ممع طه

🌸 الجزء 48 🌸
⁦✍⁩بقلمي……………………زهرة محمد
*لا تخبئي الكلام*
صالحة قادوها عينيها فين كتشووف بنتهااا لتافتت للوراء لقات شخص عاطيها بظهرها جالس على الكرسي وحاط ولدو فوق رجليه كيلعب معاه وهاد الاخير كيخربق ليه في لحيتو….تلقائيا حسات بالنقص لي راود بنتهاا ….هزات قطعة من الاكل وتما غادا بيها لفم بنتها باغا تضحكها …..بعد مقدرات ترجع الابتسامة لوجه سامية و ربي كبير ستأذنات منها ومشات للمغاسل تغسل صالحة كفضات على يديها و بدات تغسل ايديها و تعاود و تشم لتبقى فيها ريحة الحوت سالات دارت ايديها تحت المجفف الآلي و كتسناها تبدا تنشف و جات خارجة من الباب حتى تصاطحات معاه هزات عينيها تعتاذر ولكن كان للقدر حكايات أخرى بقات كتشوووف … و تزيد تحقق واش هو؟؟؟ و زعما ذاكرتها مخانتهاش!!!! رغم مرووور هاد سنين كلها و تعجبت ولكن شامة لي تحت دقنو لي ميزاه خلاتها تأكد و هو عرفها وخا التجاعيد لمرسومة على وجها بقات نظرات وتأملات بيناتهم خلات صالحة و سي حسن يتفكرو أيامهم كيف كانت و فرمشة عين كلشي تهد و مشا سي حسن في نظراتو ندم على أيام مشات و مغترجعش أما هي كانت نظرة كره و احتقار و نكران الجميل نكرانو لوقفتها معاه فيقهم من سهوتهم غير ولدو كينادي عليه بغا حتى هو يغسل لقاتها فرصة تخرج عند بنتها و ترجع تنسا هاد الشخص لي شافت هاد جوج دقايق و لي كتحاول تتناساه هادي 18 سنة
وصلات عند سامية و استعجلاتها تمشي تغسل
صالحة …… يلاه ابنتي نوضي غسلي خلاص باش نمشيو
سامية( وقفت ) ….. واخا و رضي البال لصاك مغنتعطلش(هزت حامضة حكات بيها ايديها باش تنقص ريحة)
مشات سامية و كتعلي اديها لفوق باش ميقيسهاش لما دخلات لقات سي حسن كيلعب مع ولدو بلما كيرش عليه فوجهو وقفات و بقات كضحك هما حسو بخطاويها و عطاوها طريق و بقا كيشوووف فيها عرفها كاين شبه كبير لي قدر يعرفو أما هي لا حيت أغلب ملامحو غطاتها التجاعيد و اللحية بتاسم فوجها و طأطأ راسو و خرج معندوش الوجه باش يزيد يشوف فيها…
سالات سامية لغسيل و خرجت لقاتها مها خلصات و كتسنا فيها عند الباب حيت مبقاتش حاملة تشوف فوجهو و كدعي فخاطرها لا سماحة لي كان حيلة و سباب فلي شتت شملهم
توجهو لدار وصلو صلاو الظهر لي أذن عليهم ووهما خارجين
يارب وإن كنا صامتين فإننا نتألم، وإن كنا لانُبدي فإننا نتأذى، وإن كنا نظهر الطمأنينة فإن قلوبنا تتصدع من الخوف، كن معنا يالله فأنت وحدك تعلم وهم لايعلمون …… كفوفها متجهة للسماء و الدموع تجري على الخد و هي كتفكر لي داز و ما لقات لا حنين لا رحيم سوى مولانا…
#فلاش_باك

#تتمة
#فلاش_باك
صالحة بعدما طلبات طلاق مكانش في نيتها طلق بصح بغات غير تهددو و ميبقاش يسمع لختو لي بغات تخرب بيتو هزات حوايجها و ولادها و مشات عند جارتها تجلس عندها لي حتى هي غير بوحدها ووغتعمر عليها دار و كانت عارفة صالحة نية والله يعمرها دار رحبات بيها دوزات عندها سيمانة و قالت غيكون لعن الشيطان بدات جمعات حوايجها باش ترجع سلات و جلسات هي و لالة زينب على صينية اتاي مجمعين حتى كيسمعو دفوع ناضو يطلو و يشوفو شكون دار لي وصلها الدفوع
صالحة(حطات سامية لي كانت مزال فلكماط و ناضت طل ) …… لمن دفوع الالة زينب؟ ؟؟؟
لالة زينب(مع كبر سن النظر عندها ضعيف ) …… و غير اجي ابنيتي راه لعينين ما شافو لي والو
صالحة….. دفوع خارج من العمارة عندنا شكون غيكون تزوج ياكما ولد مي مينة لي ميريكان
لالة زينب(بتعجب) …… علا هو امتا جا يا بنيتي
صالحة…… و انا غير قلت حيت هو لي عزري
لكارو عند الباب وهما يتحتو و يحاجيو و يفكو حتى بانت ليهم زاهية خارجة بتكاشطها تصلي على النبي و عائلتهم خارجين من دار تابعينها يصفقو و يغنيو و خارج سي حسن لابس جلابة مخزنية تقول عزري صغير و يتباها قدام الناس ضحكة باينة فوجهو حتى لودنين و ختو واقفة حداه تصفق ووتعيط على لي يعاونها صالحة غير شافتو و خرجو عينيها تسد عينيها و ترجع تحلهم و تقول فخاطرها… لاااا لا حسن ميديرهاش و يخليني و يخلي ولادو لاااااا لا حسن ميديرهااتش هبطت من شرجم و بدات ضرب فخاضها على شوهة لي تشوهات
صالحة(دموع مخرجوش من قوة الصدمة) ….. اويييييلي على شوهتي اوييييلي
لالة زينب(كتواسي فيها ) …… و سكتي ابنتي سكتي غتخلعي لبنت
صالحة……. لمن نعاود شوهتي لمن(بدات تنوح و تعدد عليه وهو حي ) … دار علي ضرة و أنا ما عليلة و لا عاقرة سمع لختو و دار ريها و أنا و هاد لولاد فين نصدو و أنا معندي لخوت لا والدين كلش عطا خدو لتراب
لقلب عمر و عطاتها لبكا و لالة زينب تصبرها و تقنعها بلي المكتاب ممنو هروب خاص غير صبر بكلمات منها خلاتها تهدن شوية و قصحات قلبها و عرفات دموع معندهم باش ينفعوها
صالحة(كتعصر الهضرة ) ……. كيفما بدلني و عمرو لبقا لي راجل و ولادي نهزهم و منخليهمش ليه و غندقو من الكاس لي شربني منو ليوووم دازت يومين و مشات عند العدول تسول على راسها باش طلق ليوم قبل غدا …
#الآن
سامية كدق باب بيت نعاس عند مها باغا تستأذن منها باش تمشي عند رانيا ….. ماما ماما
صالحة …… دخلي ابنتي لقاتها هازة تسبيحها وو جها باين فيه لعيا
سامية……. حبيبتي ياكما مريضة باينة فيك عيانة

صالحة……. لا لا معيانا والو غير ضروني شوية ركابي خديت دوا و غنعس دابا ان شاء الله على ما أذن العصر
سامية…. و نعسي ترتاحي و أنا غنمشي عند رانيا نشوفها و نجي
صالحة…… و سيري و متعطليش و دي معاك سوارتك مقاداش نوض نحلك
باست ليها يديها و مشات عند رانيا تعرف أخبارها و تلف عندها الوقت على ما وصل ليل و يبانو هاد النتائج حيت ملي كتكون كتسنا شي حاجة كيطواااال الوقت

🌸 الجزء 49 🌸
⁦✍⁩بقلمي……………………زهرة محمد
*لا تخبئي الكلام*
سامية رجعات لبسات جلابتها ووهزات سوارت و خرجات تمشات حتى وصلات لدار صاحبتها و حطات صبعها على سرسار مهزاتوش و ما حل عليها غير زين المسرار جاي و ينكر …. امااالنا كتسالونا الكرا
ياسر بلا يعرف شكون هدا لي ايدو تشلات على سرسار حل لباب بجهالة حيت مولفين دراري درب يلعبو هاد اللعب الباسل
ياسر (حل لباب و غير شافها و عقد غوابشو) …… امالك على داك صونيط تابعينك شفارة
سامية دارت هكاك حيت تاصلات بيها و قالت ليها مكاين حد فدار قالت تصدعها ب سرسار حيت عرفاها مكتحملوش متوقعاتش ياسر غيكون و ملي شافتو حشمات و هبطات راسها لرض و حتى هو ما قاليها دخلي لا والو خلاها واقفة في الباب و عيط لرانيا
ياسر ….. رانيا رانيا جات شافتو مغوبش … نعم اخالي
ياسر….. علمي ناس ملي يصونيو يحسبو 5 ثواني و يهزو يديهم
سامية مرضااااتش تمنات لو الأرض تشق و تصرطها و لا هاد الموقف لي حطات راسها فيه جات راجعة فحالاتها و هي تشدها رانيا
رانيا…. اويلي اصحبتي غتدي عليه راه غير هبيل راه أنا كيدير لي كتر من هكا زيدي زيدي و نتي غديري لي فيها ظلموني
ياسر مشا ليصدق مْخَرج شي هضرة كبر من راسو و سامية بزز باش دخلات جراتها نيشان لبيت و سدو لباب باش يهضرو على خاطرهم و غير دخلو سامية معجبهاش الحال يهضر معاها بديك طريقة
رانيا….. وصافي بلا ما تقلقي منو راه معرت مالو ليوم ملي رجع و هو مغوبش و حتى ولدو برزطو ضاار فيه بقا يبكي حتى نعس
سامية (كتغوت) …… هداك ولدو يضبر معاه اما أنا مبينيش و بينو و راه خويا مكهضرش معايا هكاك
رانيا…. و صافي مسحيها في عفاك غنمشي نعمر ليك اتاي لي كيعجبك نتحتو عليه صافي
مشات رانيا تعمر اتاي و لقات ياسر كيشرب في لكوزينة لقاتها فرصة تهضر معاه تعرف علاش تصرف مع سامية هكاك
رانيا …… اش داك المعاملة تعامل صاحبتي بيها مالها اش دارت ليك و لنفرض غلطات متهضرش معاها هكاك
ياسر…….. مناقصكش اسامية مغتجيش تعلميني كيفاش نهضر مع ناس
رانيا……انا رانيا اخالي و هاديك صاحبتي و كتر من ختي ماشي صواب تعاملها هكاك فدارنا و تخليها تبكي مالها اش دارت كاااع على ود السرسار ماشي حنا لي نعاملو ناس هكا
ياسر خرج من الكوزينة غادي لصالون داز على بيت بانت ليه جالسة و باينة فيها مقلقة بلا ما يحس خطوات رجليه وصلوه عندها حنحن باش تنتابه لوجودو

ياسر (تنادم معاه الحال) ….. سمحي لي مقصدتش نهضر معاك هكاك غير كنت معصب سامية فحال إلا هضر مع الحيط إلا جاوبو تجاوب حتى هي …. جلس قفازي و تقابل معاها….. ياك المسامح كريم و أنا كنطلبك تسمحي لي و الله مقصدت و نتي متأكدة منبغيش نشوفك مقلقة و نتي قيمتك كبيرة عندي
سامية…….. والا بغيتيني نسمح لك خاصني نعرف شنو سبب هاد التغيير (شافت فيه بنظرات خلاتو نسا سميتو ) …. ياك حنا أصدقاء
ياسر(وقف كيشوف بنظرة عتاب)…. ملي تلاقيتك قبيلة فلمول كيعيب فيها كيرقق صوتو .. خويا لباس عليك نننننننن
سامية بلا ما تشعر ضحكت كأنو فهمت سبب هاد المعاملة و قالت واخا يكون لي يكون ميهضرش معايا بديك طريقة
سامية … احم احم يلاه كنتي كتعتاذر شتك رجعتي تغوت تاني
تقرب منها باسها فراسها و عتاذر منها لثاني مرة و خرج لصالون تكا حدا ولدو و هي خلاها حلا فمها و الفراشات و العصافير يغنيو
شمس سطعت والجو جميل هذا اليوم
وفراشات قد قالت هذا فصل الصيف
ياسر……… راه هاد ناس لي كيقراو القصة عاقو و نتي مبغاش تفهمي راه 1000 مرة كنقولك انا ما خوكش ههههههههه ناري سيد جهل

🌸 الجزء 50 🌸
⁦✍⁩بقلمي……………………زهرة محمد
*لا تخبئي الكلام*
لا يوجد حب من اول نظرة يوجد تألف أرواح و تكاتف وليس كل حب من اول نظرة يدوم ابداً فربما يزول بسقوط النظرة تلك ويدوم التألف والتأنس وسكن الروح للروح .. 🌷🌷💮
نور كانت جالسة جهة شرجم دايرة لكيت كتصنط للموسيقي و حاطة راسها عليه و مشافتوش لا امتا وصل و لا امتا طلع حيت كاينة فجهة شيفور ماشي جهة لباب حتى حست بشي حد جلس حداها ضارت تشوف شكون لي غيتقاسم معاها 5سوايع د رحلة ضارت و ياريتها ما ضارت لقاتو حتى هو كيتسناها ضور عندو بتاسم ليها ووهي التوتر لبسها و بقات غير كضور فعينيها و بدات تشوف من تحت لتحت و بدات تهضر بينها وبين راسها…
نور…… واش انا زهري فيه !!!! و يضحك فحال إلا مادار والو
خنزرت و رجعت ضارت تشوف طريق و ياسين حاضيها اش كدير و يبتاسم غير بوحدو اما هي مكرهتش تقب سقف ديال لكار متبقاااش حداه غير ملقات جهد جبدات من صاكها قصة كان هداه ليها جون و جات الفرصة تقراها و تونس بيها يلاه حلات صفحة الأولى كان مكتوب فيها كلمات من جون…
غاليتي الجميلة اهديكي هاته القصة لتعلمي بين ثنياها أن لكل بداية نهاية و ليست جميع النهايات جميلة و مفرحة مع نهاية هاته الكلمات بدات كتقرا صفحة ورا صفحة و القصة أكثر تشويق و اثارة و رومانسية و ياسين فايت ليه قاريها و عارف نهايتها و بغا يعطي رايو واخا مطلبتوش
ياسين مربع يديه و مسرح ظهرو على الكرسي …… نصيحة مني بلا ما تكمليها نهاية مغتعجبكش
نور(هزات حاجبها و عينيها مزال على القصة) ….. ششششكرررا ععلى النننصيحة ووواخا ممممطلبببتهاااش
ياسين(كان متوقع رد فعلها و بدا يضحك هههه ) …. و نخافك تبداي تبكي حيت نهاية مأساوية
نور….. ووو اانا ككنععاود نشششكرك ووو خليني نققرا رراه مممبغيتش نننعرف النننهاية
ياسين(شاد فيها ) …… إلا بغيتي نقول ليك النهاية معنديش مشكل
نور( بدات كتعصب و جاها صهد طلعات ايديها خدمات لكليما ) …… أستاذ ياسين من فضلك !!!!(ضارت تشوف واش كاين شي كرسي خاوي ولكن الحافلة ممتلئة عن آخرها )
ياسين…… أنا غير نصحتك نتي حرة
مع هاد الكلمة دار غطاء العين على عينيه و قاد راسو ينعس و نور حداه كتقرا معطاتش اهتمام لهضرتو بل زاد شوقها كثر على كيفاش غتكون هاد النهاية المأساوية دارت جميع الاحتمالات فبالها ….و القصة غدا و كتزياان و الحب الكبير بين البطل و البطلة حتى ولات عندها أحلام اليقظة تمنات تكون فبلاصتها شوية هزات راسها تشوفو مالو سكت مبقاش برزطها لقاااتو نععس و رجعت حنات راسها تاني تسافر بين السطور 3

سوايع و نص دازت و تقول واش عيات و لا ملات حتى وصلات النهاية محسات غير بدمعتها تجري متوقعاتش البطل يموت و يخلي حبيبتو بوحدها…
صعب الوداع في الحب.. الأصعب أن ينتهي الحب دون كلمة وداع.

#تتمة
ياسين بدات تزيرو بيبي و بدا يلعب برجليه حيد الغطاء على عينيه شاف نور كتمسح فعينيها مركزش معاها و ديك بيبي جات فوقت غير مناسب نهااائيا بقا على داك الحال حتى بان ليه واحد من المشرفين و عيط ليه يجي عندو
ياسين….. واش مغديروش استراحة وقت طويل و حنا راكبين
المشرف ( مهبط راسو عندو ) اه اسيدي 5 دقايق و نهبطو السائق غيدخل لباحة الإستراحة دابا
ياسين بتاسم ليه ابتسامة شكر و مشا و كانت دقايق قليلة حتى الحافلة دخلات لباحة و لي راكبين كيستاعدو ينزلو و منهم ياسين لي عندو حالة الطوارئ ههههههه ….الحاافلة وقفات و كلشي داير البادج ديالو و بداو يهبطو و هما فرحانين و مستمتعين كيضحكو وقف ياسين و نور حتى هي و كتجمع قصتها في صكادو و هازا تلفونها ياسين قدامها و هي وراه هو مشا بخطوات سريعة لطواليط و هي اكتفت تغسل ايديها و وجهها و خرجات لقات كراسى من الخشب على برا كان شوية البرد و فضلات تبقا على
خرج من الحمام بعدما غسل وجهو و عينيه كيضورو يقلبو عليها بانت ليه جالسة بوحدها و مشا وقف حداها و خدا الإذن بالجلوس هزات راسها بقات كتشوووف فيه و ملقات متقول تحنى عندها
ياسين (قرب ليها كتر) …… واش مسموح ولا لا ا آنسة
نور (بدون وعي) ……. مممممسمووح
جر لكرسي بكل هدوء و جلس جبد تلفون حطو فوق طابلة حيت ملي جلس شورط تزير شوية و هي كتراقب حركاتو كأنها مرفوووعة كتشوف قدامها شاب زوين و جنتلمان و أي وحدة تعجب بيه نور نسات و لقلوبا ترسمو فعينيها و هو كيشوف فيها هاز حاجب و ابتسامة جذابة مرسومة فوجهو حتى ضور راسو يكتاشف أرجاء المكان..
ياسين……. الجو زوين كيجيب الجوع
نور………. ححححتى حححااجحة ممممززويينة بببقينا ببببجوع ( هزت كتافها غير راضية على الماكلة لي دايرين )
ياسين(وقف غادي لداخل) ……. تسناي أنا جاي

Leave a comment

  1. قصة زوينة معرفتش واش كاين كمالة حيت أول مرة نقرأ قصص هنا