Skip links

قصة : زوجة للإيجار 1

 4,638 عدد مشاهداات

💫زوجة للإيجار💫
✍الكاتبة كوثر الزهراوي✍
💥الجزء-1-💥
“كم الحياة غريبة !!! تقولين قد صدمت جداراً ، وبعدها فجأة يفتح أمامك باب”
فمدينة مراااكش الحمراء …مدينة البهجة والسرور…مدينة سبعة رجال الله يعطينا بركتهم…وبالضبط فحي من الأحياء الشعبية كاتمشا إمراة كبيرة شوي فالسن لابسة جلابة فالموف وهازة سااك أسود فيدها اليسرى واليد اليمنى هازة بيها بلاطو ديال الحلوى مكون من كعب غزال…بريوات…محينشات وحلاوي معمرين باللوز …وجنبها كان ولدها اللي يكون فالعشرينيات من عمرو ( تقريبا 26 عام ) لابس كومبلي فاللون الأبيض وماشط شعرو مطلعو للفوق …هاز مشموم ديال الورد فيديه وفرحاااان … تمشااو مسااافة وسط داك الحي وهوما يوقفو قدام دااار …
الأم : هي هادي الدار ا ولدي المهدي …
مهدي كايدوي وحشمان : هي هاادي ا ماما…هنا كااينة العروسة ديالي …
الأم : ممم العروسة ديالك ايوا زييد نشوفو هااد عروسة الغفلة اللي عجباتك وتسطيتي عليها زييد …
مهدي ضحك وقال : يله انا اندق …
الأم : ايوا دق شنو كاتسنا …
مهدي : وااحد اثنان ثلاثة هاني (دق ورجع ورا ماماه مخليها هي فالواجهة)
تفتح الباب وهي تبان بنت فالعشرينيات من عمرها شافت فيهم وقالت : اهلا مرحبا اخالتي كاتقلبو على شي حد …
الأم : تبااركلله زوينة ا ولدي زوينة وااش هي هادي …
مهدي : لا ا ماما رااه …
الأم : تباركلله زويينة غزاالة ماشاءلله …
مهدي : ا ماما راه مااشي هي … هادي راه مرات خووها …
الأم جمعات ضحكتها وقالت : كيفااش هادي مراات خووها ( جمعاتها معاه بقرصة لفخضو وقالت : ديك الساعة قولها ليا من اللول ولكن حتى انا ماعاندي عقل دايرة راسي فيك وجايا معاك وانا ماشفت حتى هاد العروسة كيف دايرة …)
مهدي كايكمد فالقرصة وكايقول : غادي تعجبك ا ماما غادي تعجبك احح ضريتيني …
الأم شافت فالبنت وقالت : ايوا شنو ابنتي اتخلينا فالباب …
بنت : لا حاااشا تفضلو دخلو …
دخلاتهم للصالون وجلسو ..شافت فيها الأم وقالت : نتي عروسة فهاد الدار ياك ؟؟
بنت : اه انا مرات ولدهم الكبير … نتوما اكيد جايين على قبل لوستي مريم …
نقز مهدي وقال : اه على قبل لالة مريم …
الأم نغزاتو ودارت خنزرات فيه وقالت : وييلي على لالة مريم…
مهدي : احم زعما مريم مريم حنا جايين على قبل مريم …
الأم : شنو سماك الله ابنتي ؟؟
…. : انا ليلى ..
الأم : ليلى عيطي لينا على شيخك ولا عكوزتك ولا رااجلك بغينا شي حد كبير معاامن ندويو ابنتي …(كاتدوي وتدور رااسها فالدار وفالصالون …)

زوجة للإيجار💫
✍الكاتبة كوثر الزهراوي✍
💥الجزء-2-💥
الأم : بنتي ليلى عيطي لينا على شيخك ولا عكوزتك ولا رااجلك بغينا شي حد كبير معاامن ندويو (كاتدوي وتدور رااسها فالدار وفالصالون …)
ليلى : واخ ا خالتي …(ناضت خرجات من الصالون وخلاتهم ..)
الأم : واااتباركلله دار عندهم كبيرة وفيها ثلااثة د طبقات علم الله شحاال فيها من بيت الفوق والسطاح باينة ايكون مشمس وزوين و وااسع اممم ..(دورات وجهها شافت فولدها لقاتو كايتبسم ..) الأم : يااا ويلي حنا ملي دخلنا ونتا مشرع داك الفم …ضرسة العقل بانت ليك ويلي جمع فمك حتا نشوف هادشي اللي ختاريتي وااش عجبني ولا لا …
مهدي : غادي تعجبك والله ا ماما …
الأم : ممم هاحنا انشوفو …
تسمع صوت خطوات قريب للصالون …
مهدي : ها شي وااحد جاااي …
الأم دارت تشوف شكون وهي تخرج عينيها وبدات ترعد وتقول : بسم الله الرحمااان الرحيم اويلي شكووون هااادي واااش من الجن ولا من الإنس …
دخلات بنت لابسة بيجامة مقطعة وشعرها مخربق ومنتووف بحالا ضاربها الضوء 🤣 هازة فيديها مووس وعينيها عاامرين بالكحل ودايرة عكر كحل ف شفايفها …
الأم : مهيدو ولدي…شكووون هاادي اويلي 😱😱
نطقات وقالت : انا العروسة ا خاالتي (كاتدوي وتلعب بالموس فيديها…) مهدي كايترعد وكايقفقف غا وحدو ويقول : لالة مريم شنو هااد الحالة دايرة فرااسك 😱
مريم : مهيدو جيتي تزوج بيااا ياااحليلي …انديرو الولاد ياااحليلي انطلع للعمارية ولكن بلاااتي نقتلو هاااد العقروشة هي اللولة يااك هادشي اللي اتافقنا عليه …كولشي نبغيه الا العكوزة 😡
الأم تخشات فولدها وبدااات تغوت : اويييلي اويييلي بغااات تصفيها ليا …
مهدي : اويلي ماماتي … مريم شنو وقع ليك مااشي هاكا كنتي لبارح …(كايدوي ومخشي فماماه)
مريم : ولكن انا ديما هااكا يااك دييما (دارت كاتشوف فالتلفازة اللي كانت معلقة فالحيط وبدات تدوي وتقول : مالكي نتي شنوو بغيتي شنو شنو بغيتي العريس ديالي والله مانعطيه ليك مهيدو ديالي …شوي مشات للحيط كاتبوس فيه وتعنق ههه وتقول : توحشتيني المصطفى …اييه اييه وااخا …) الأم كاترعد خايفة : اويييلي مانكسااابش العقل انااا مانكسااابوووش هنننن اويلي جاايا للموت برجلييااا ويلي ولدي نهار بغا يخطب مشا لوحدة مسكونة وحمقة ومقطعة الوراق اويلي على ضحكتي اويلي على شوهتي …
مهدي : والله ا ماما لالة مريم ماكانت هاااكا …
الأم جمعاتها معاااه بقرصة عاود وقالت : نوووض نووض نهربو بعضامنا صحاااح …شووف البنت رااه كاتدوي مع التلفازة وكاتبووس الحيط ومسمياه المصطفى…اويلي البنت بحالا ضاربها الضوء شوف شعرها وكمارتها …
مريم : اجيييو اجييو هزووني معاكم فالعمارية هزوووني هزووني …

💫تتمة💫
الأم شدات فولدها وخرجو بالجرا لقااو الباب محلوول ماوقفو حتى خرجو من الحي ههه ….
مهدي كاينهج : هوووف مسكينة لالة مريم مانعرف مالها …
الأم كاتجر فولدها وتقول : زيد زيد عند الفقيه مباارك يفوسخك ليا …
مهدي : ولالة مريم …؟؟
الأم سلتات سباطها وبدات تعطيه العصا لقرذافتو وسط الزنقة وتقول : نهااار نسمع من فمك هاد لالة مريم ندير ليك السودانية ففمك اولدي مهيدو .. زييد زيييد …
مهدي : ايي احح اي عظامي ا ميمتي …
الأم : زيد عند الفقيه زييد …بغااو يرزيوني فيك عوينة وحدة اللي عندي الله ياربي … حسدووني عليك الله على وليدي زيد عند الفقيه مبارك زييييد …
مهدي : الفقيه مبارك غادي يضربني تاني بديك العصا ديال الزيتون …
الأم : وااازيييد عند مبارك …

❤ زوجة للإيجار ❤
✍كوثر الزهراوي✍
💥الجزء -3-💥
نرجعو للدار عند مريم🤣
جالسة فالصالون مفرقة رجليها وحاطة قدامها دااك البلاطو ديال الحلوى اللي جاب مهدي وكاتاكل فالبريوات وفكعب غزال وتبنن …وقفات عليها ليلى وقالت : مااشي حشوومة علييك خرجتيهم كيف الحماااق …
مريم هزات فيها عويناتها وقالت وفمها عاامر : دييما كانقول لداك مهدي يبعد عليا …كانقول ليه مابيتوش وهو تسحاب ليه غا كانضحك معااه مشا وجاب مو وجاااي قاالك يخطب … ياك جاي كايضحك وهااني هجرتها ليه هههه
ليلى بغات تدوي ولكن جابت ليها ضحك بداك الشعر وديك البيجامة وداك الكحل اللي فالعينين …
ليلى : نااري علييك هههه اري اري بعدا دوقيني …
مريم : حيدي حيدي هادشي ديال العروسة هههه
ليلى : لاواااه النم ههه
تسمع صوت من وراهم : اشمن عرووسة …. ليلى : خالتي زهرة رجعتي …
مريم : ماما…
الأم زهرة : اويلي شنو هادشي ومنين جا هاد المشموم ديال الورد ..وهاد الحلاوي …
مريم كاتغمز فليلى باش تسكت ولكن واالو …
ليلى : خالتي انا نقول لك…واحد سيد جا وجاب مو باش يدويو ف مريم ولكن هي كيف العادة خرجاتهم كايحسبو خطاويهم ….
الأم زهرة : ويلي ويلي عاود تاااني … شنو درتي هااد المرة ..ولا صافي صافي بااينة غا من حاالتك شنو درتي فالناااس …
مريم هزات عويناتها فيهم وقالت : انا فطريق والزواج فطريق آخر… ومااابااغاااش نتزوج ا عباد الله ياما أحلى الحرية ….
الأم زهرة دارت شافت فمرات ولدها وقالت : حتى نتي ا ليلى عاونتيها هممم
ليلى : انا مادرت واالو ا خالتي غا حليت ليهم الباب فاش جاو …وفاش كانو خارجين عاود حليتو ليهم صااافي …
الأم زهرة حطات يديها فوق راسها وقالت : انا هزييت يدي معااكم …
💥تسمع صوت رجولي من وراهم💥
….. : شنو وااقع الواليدة ؟؟ مال الباب ديال الدار محلول …؟؟ الأم زهرة : سول مراتك وختك شنو وااقع اما انا ماعاندي مانقول ليك اولدي عثمان .. عثمان : اش كاااين ا دوك جنيات …
مريم : واالو اخويا حبيبي …
ليلى : واالو اراجلي حبيبي….
مريم هزات حلوى وشافت فيه وقالت : تبغي حليوة …

❤ زوجة للإيجار ❤
✍كوثر الزهراوي✍
💥الجزء -4-💥
❌فمكااان آخر فالمدينة❌
💥وسط شركة وبالضبط فالمكتب ديال المدير العام💥
واقف شاب فمقتبل العمر…طويل ومفورمي… بشرة بيضاء وعيون عسلية …شعر أسود كثيف مطلعو للفوق ولحية خفيفة …حجباانو معقودين كايشووف فالتيلي ديالو ويمشي ويجي بعصبية فالمكتب …
….. : واصااحبي يهديك الله رااه جبتي ليا الدوخة …جلس للأرض ا فاروق …
فاروق بعصبية جاوب وقال : كيفااش بغيتيني نجلس ونتهدن وانا يله جاتني خبارها بلي كانت فالسبيطار … علااش ماقالو ليا واالو علااش بففف … ولكن ديالهم هي اللخرة معاايا ا عمران …عقل هاني فين قلتها ليك …
عمران : راااه مابغااوش يخلعووك يمكن داااكشي بااش …
فاروق : وراااه الواليدة دياالي هاديك ..ايلا ما تخلعت عليها علاامن انتخلع مثلا هممم ؟؟؟
عمران : تهدن راااه ولات بيخير … ياك دوات معااك وطمأنتي عليها …
فاروق عيا ومشا جلس فالمكتب ديالو وحط راسو بين يديه وتنهد بعيااء وقال : ايييه دويت معااها ولكن رااه ماغادي يهنا ليا باال حتى نمشي نشوفها …
عمران : نفكو المشكل اللي عندنا هاد الأيام فالشركة ونمشيو بزوووج عندها وااخا …كون ما كان الحضور ديالك مهم كون مشيتي ولكن نتا عاارف هااد المرحلة منااش كاندوزو …
فاروق : ااه عندك الحق …
عمران ناض وقف حتى تم خارج وهو يرجع شاف ف فاروق وقال : يااك بعدا نتا مستعد لكلامها وإلحاحها عليك باش تزوج وتدير وليدات وعائلة همم …
فاروق تكا فوق الكرسي الخاص بيه ورجع راسو للور وقال : بلاما تفكرني فداك الموضوع … من نهار مات الوليد وانا كانسمع هاد الجملة ديال امتا نشووفك اوليدي مزوج وبدارك ومراتك … مابغااتش تفهم انني مااباغيش نتزوج وماكانفكرش فيه كاااع ..ماكانشوفش رااسي مع وحدة طووول العمر …بففف الحماااق هادا …الواحد هو اللي يكون ديال رااسو حر … عمران : ودب نشووفو وااش غادي تبقا حر طول حياتك …مهم تهلا الساط … دب انا خاارج عندي غرض مع وااحد الكليان خاصني نتلاقا بيه …
فاروق : الله يعاون …

خرج عمران وهو يهز فاروق تيلي ديالو ودار أبيل فيديو مع الأم ديالو …
الأم جاوبات : ولدي فاروق ..الحبيب ديالي لاباس عليك ..
فاروق : بيخير الواليدة نتي كيف بقيتي شوي …
الأم : راااني بييخير والله هانتا كاتشوف حمدلله…خواتاتك معايا و حتى خالتك نعيمة وبنتها هاجر جاااو عندي ماخلاونيش وحدي الله يكثر خيرهم…
فاروق : ماغاادي يهنا ليا باال حتى نجي نشووفك … غير نحل شي مشاكل وهاني معاك …
الأم : لا اولدي ..نتا عندك خدمتك فمرااكش وحنا هنا ف فالرباط الحال بعيد قاابل خدمتك الله يرضي عليك اناا رااني بيخيير .. رااه باالي انا اللي معااك ..نتا وحداني تم ..كون تشووف غا شي بنت الناس تعمر عليك الدار وتديرو وليدات ونشووفهم قبل مانموت …
فاروق : بطوولة عمرك الواليدة ..صااافي ماتعييش رااسك بالهضرة …هاد الموضوع ماشي وقتو دب …
الأم : هاك هاك خالتك نعيمة بغات تدوي معاك …
فاروق مسح على لحيتو بتوتر وقطع …
نعيمة : اويلي مالو قطع اختي خديجة ؟؟؟
الأم خديجة : يمكن غا الريزو دب يعاود يتاصل ودوي معاه …
نعيمة : ممم الريزو واخ …
❌#عند_فاروق❌
قطع الخط عن قصد مافيه مايتصنط لكلام خاالتو اللي فكل مرة كاتمعني ليه على بنتها هاجر باش يتزوجها …
فاروق : الحمااق معاكم الحماااق .. (هز تيلي ديالو وسوارت الأوطو وتم خارج من المكتب كايسوووط وكاره الوضعية اللي محطوط فيها دب …)

❤ زوجة للإيجار ❤
✍كوثر الزهراوي✍
💥الجزء -5-💥
الحيااة غريبة بزاااف … ديما الحاجة اللي كاتعلق بيها وكاتبغيبها بزاااف فغالب الأحيان ماكاتكونش ليك…ولكن الحاجة اللي كاتكرهها وماعاندكش سوق فيها هي اللي كاتلقا قدامك … هادشي ماشي عكس او قلة الزهر …هادشي هو مايسمى بقدر الله … ونتا خااصك تآمن بيه وتبغيه سواء عجبك او لا ….
وصل الليل والساعة كاتشير ل 10:00 … فتحات الغرفة ديالها ودخلات ملوية ف فوطة ومغطية شعرها كانت يله دوشات حيت الحالة اللي دارت فراسها الصباح بااش تخلع الخطاب كانت حالة يرثى لها هههه مشات ديريكت للبلاكار جبدات ملابس داخلية وبيجامة سخونة وتقيشرات …نشفات راااسها ولبسات حويجاتها وهزات سيشوار ( مجفف الشعر ) ومشات قدام المرآة كاتنشف فشعرها وتشوف فرااسها …
مريم بنت فعمرها 21 سنة كاتقرا فالجامعة ديال الإقتصاد…هاد العام عندها ليصونص (الإجازة) … كاتبغي رااسها لدرجة كبيييرة … عاايشة حيااتها وضااربة دنيا بركلة … كاتعيش الدقيقة بالدقيقة وكاتستمتع بأي حاجة كاتديرها فحياتها … ماشي من نوع البنات اللي غير كايوصلو 20 عام كايبداو يفكرو فالزواج وتكوين أسرة .. هي بااغا تكون ذااتها …وتكون عندها قيمة فالمجتمع .. وتبني شخصية خااصة بيها وحدها … بااغا تساافر تكون حرة ..تكتاشف ارجاء العالم…تعرف على ثقافات جديدة … هي بنت شقرااء عويناتها كباار مشفرين…بشرتها بيضاء ..طايتها مقادة ..ماطويلة ماقصيرة وماغليضة مارقيقة جسم صحي وكولشي مقااد فبلاصتو ..عاطيها ربي قبول وجهها منور وديما مبتاسمة …ولكن اللي جبدها ماجبد خير ههه وبسباب زينها وظرافتها اي واحد شافها كايبغي يتقرب منها ويدير معاها علاقة كيف كانقولو حنا يتصاحب معاها ولكن هيهااات معاامن هووما .. كاتندمهم على النهار اللي فكرو يشوفو فيها شوفة عوجة …اما الا زغب الله شي واحد ودار الصواب وجا يخطبها خلات عليه ههه كاتصيفتو بلا هواااه وكايندم على النهار اللي جا فيه يخطب ههه …
سمعات الدقان فالباب سكتات السيشوار وناضت تشوف شكون لقاتو خوها عثمان …
مريم : خوويا هادا نتاا دخل …
دخل عثمان وجلس فوق السرير وداار ليها اشارة باش تجي حدااه …
عثمان : داكشي اللي عاودات لي ليلى صحيح ؟؟؟
مريم : ااه اخويا ..السيد ديجا دويت معااه وقلت ليه مابغيتش وكانقول ليه يبعد عليا ولكن هو جا وجاب مو وانا عطيتهم علاش كايقلبو …

عثمان : هههه ياك كانقوول ليك ماتبقاايش تديري للناس هاكا …حنا عارفينك مااباغااش الزواج والإرتباط دب صافي فهمنا ا لالة …اللي جا غادي نردوه …ولا نتي عندك فالقاموس ديالك اللي جا ندموه ههه
مريم : رااه ايلا رديتوهوم ايعاودو يرجعو مرة اخرى ولا يقولو ليكم خليو العروسة تفكر … اللهم نسيفطوهوم فمرة وحدة عمرهم يفكرو يرجعو ههه
عثمان : وشنو بيتي تبقااي حتى تبوري حداايا هنا همم
مريم : ههه أفضل ليا نبقا بايرة حداك هنا…عندي خويا عثمان كبر مني كايبغيني وكايقدرني …وعندي ماما زهرة الله يخليها فوق رااسي ويطول فعمرها …وعندي مراات خويا ليلى اللي فمقاام ختي وكثر وزيد على هادشي كااين الفنيكيش ديال محمد أمين ولد خويا الحبيب ديال عمتو هههه
عثمان جرها وعنقها بيد وحدة كايضحك اما مريم فحتى هي بادلاتو العناق ….
عثمان : شفتك كاتفوهي ههه …
مريم : فيااا نعااس خدمت اليوم بزاااف هههه
عثمان : وااخدمة واشمن خدمة عندك ههه يله تصبحي على خير …
مريم : ونتا من اهلو ههه

❤ زوجة للإيجار ❤
✍كوثر الزهراوي✍
💥الجزء -6-💥
💫#عند_فاروق💫
موقف الأوطو قدام الفيلا ديالو وجالس وسطها سااهي ما هي الا لحظات قليلة حتى سمع صوت الباب اللي جنبو تفتح وطلع حداه عمران ..
عمران : كنت عارف انلقاك هنا …
فاروق: عمران ؟؟؟
عمران : علاش ماكاتجاوبش على اتصالاتي …
فاروق : تيليفون ناقص ليه صوت …
عمران : كاتفكر فيها يااك ..نفس الموضوع د صباح !!!
فاروق : الشوفات ديالها فاش كاتشوف فيا وكاتطلب مني نتزوج وندير الولاد ماكاتحيدش من باالي …ودب فاش مرضات خلااص …بفف والله بعض المرات كايقول لي واحد الراس نمشي نضبر على شي وحدة نتزوج بيها ونحطها قدامها باااش تفرح وتهنا ولكن انا ماشي ولد الحرام باش نتزوج بوحدة ونتكرفس عليها ..ماغاديش نبغيها وماغاديش نتوافق معاها وماغاديش نقدر نعطيها الحياة اللي كاتمناها …انا راااه مااشي ديال الزوااج ماكانحملش نحس براسي مربوط بشي وحدة طول العمر بففف
عمران : عندك الحق …
فاروق : انا مرضت والله ..ملي كانصارحها بهاد الشيء كايبقا فيها الحال …ولدرجة واحد المرة قالت ليا يله نمشيو عند شي فقيه تسحابها واش مخطي شي حاجة ولا مسحور داكشي باش ماتزوجتش لحد هاد العمر …
عمران : ههه واا رااه شرفتي نييت ..
فاروق : 29 عام هي شرفت ؟؟؟ واش من نيتك … راني يله غادي نقول بسم الله فالثلاتينات ..
عمران : بففف والله ايلا هااادشي كايضر فالراس …
فاروق : ههه اجي شنو درتي نتا فموضوع هبة …
عمران : بعد غدا عيد ميلادها ..وانا موجد ليها مفاجأة ..
فاروق: سعداتك عندك الخاطر لهاد الشيء ههه
عمران : الحب هاادااك اححح الحب الساط…ملي غادي تبغي شي وحدة غادي تفهمني ..غادي تولي تدير شي حوايج ماتجيش على العقل …
فاروق : لاا مستحييل هههه ساليت حتى مشاكيلي بقا ليا غا الحب … نتا محظوظ تلاقيتي بديك البنت صدفة ..لقيتيها بنت دارهوم ومربية فحالها قلالو …
عمران : واااش غادي نبقاو وسط طوموبيل …ماغاديش تدخل فحالك ؟؟ فاروق : ههه يله يله مرحبا بيك الساط …
عمران : هههه لا لا اخويا جيت غا نطل عليك ونمشي لداري ههه
فاروق : وبااااز لكمارتك هههه 💚#عند_مريم💚
بعد ما كملات هضرتها مع خوها عثمان تلاحت فبلاصتها كاتقلب على النعاس ههه يله بدا كايشد فيها وعويناتها بداو يتسدو وهو يصوني تيلي ديالها …
مريم : الله يلقيها ليكم (هزات تيلي ديالها وهي كاتفوه وقالت : الو الموصيبة د هبة …شنو خاااصك فهاد نصاصات الليل هممم ياكما بايتة كاتحلمي بيا …)

❤ زوجة للإيجار ❤
✍كوثر الزهراوي✍
💥الجزء -7-💥
مريم : الله يلقيها ليكم (هزات تيلي ديالها وهي كاتفوه وقالت : الو الموصيبة د هبة …شنو خاااصك فهاد نصاصات الليل هممم ياكما بايتة كاتحلمي بيا …) هبة : كانصوني على عمران ماكايجاوبش …
مريم : شكون هاد عمران ..؟؟
هبة : ايوا صاافي خلااص عليا ا مريم من هااد ضحك الباسل ديالك …
مريم : ههه الله يلكيها ليك نتي وداك عمران ديالك مفيقاني من نعاس بااش تقولي لي هادشي همم
هبة : وملي ماجاوبنيش طاار نعاسي ..
مريم : وانا ماالي حرمتيها عليا …
هبة : واااحشوومة عليك شدي معاك ستون ..
مريم : ا لالة انا ماسوقيش نتي اون كوبل وانا سيليباطير وهادشي كايعني انني خاصني نعس ونحلم احلام سعيدة ونتي تبعي داك عمران ديالك اللي فضحتيني بيه …
هبة يله بغات تدوي وهي تنتابه لأبيل دايزة ..
هبة : هااهو كايعيط كايعيط قطعي قطعي …
مريم : الله يتبعك البلا ( تلاحت وسط فراشها كاتقلب تااني على النعااس وكاتدعي على صاحبتها وعلى فعايلها ههه) 💫💫💫💫💫💫💫💫
❤يوم جديد صبااح جديد❤
فاقت مريم كاتكسل …ناضت دارت روتينها الصباحي ..غسلات سنيناتها و وجهها طرفات حالتها..لبسات حوايجها عبارة على سروال جينز فالأسود مع جوميز فاللون الأبيض طويلة حتال جيهة الركبة…ولبساتسبادري اديداس بيضاء…مشطات شعرها الأشقر اللي كان متوسط الطول وسرحاتو وخلاتو مطلوق على راحتو …هزات ساكادو ديالها حطات فيه كتوبها ومستلزماتها وشنو خاصها وخرجات من بيتها هبطات للتحت لقاتهم مجموعين على طاولة الفطور جلسات فطرات معاهم ناض عثمان كايوجد راسو باش يمشي لخدمتو وناضت هي باش تمشي للجامعة ديالها … فباب الجامعة وااقفة بنت سمراء البشرة لابسة سروال جينز مع تريكو عريض فالرمادي .. شعرها القصير مطلوق واصل حد كتافها هازة ساكها وكاتشوف فساعتها وكأنها كاتنتاظر شخص يجي … تنهدات حنات راسها وعاود هزاتو وهي تقشعها جااية ونادات باسمها …
….. : مرياااامة ❤❤❤
مريم : الله يلقيها ليك ا هبة المسخوطة …بسباابك مانعسن حتاال 03:00 د صباح …
هبة : احح عليك ههه المسامح كريم
مريم : شوفي رااسي كيف شي بيضة خاامجة غادي ندخلو ونجلسو اللور ونعس …
هبة : اويلي لا ههه باغا نعاود ليك شنو قال لي عمران بارح …
مريم : حيدي بالاكي عليا …

❤ زوجة للإيجار ❤
✍كوثر الزهراوي✍
💥الجزء -8-💥
#عند_فاروق💥
فاق على صوت التيلي ديالو اللي كان كايصوني…طل واذا بيه كايلقا الواليدة ديالو هي اللي كاتصوني …جاوب مخلوع وقال : الواليدة ..ياك لابااس …
الأم خديجة : لا ماكاين واالو اولدي ههه ماتخافش ..مهم انا اتاصلت بيك باش نخبرك بلي غدا نشاءلله انا و خالتك نعيمة وبنت خالتك هاجر غادي نجيو عندك …نتا تم عندك الخدمة بزاااف وعارفاك توحشتيني وبااغي تجي تشووفني ومالقيتي كيف تدير انا انجي عندك …
فاروق : اييه ا الواليدة مرحبا على راس والعين …
الأم خديجة : اييه الله يرضي عليك …
قطع فاروق وتنهد وصونا فالحين لعمران وقال : الو صاااط صاافي مشيت فيها …
عمران : مالك ؟؟ شنو وااقع ؟؟ فاروق : جايا وجااايباااها معااها ماغادي تمشي من هنا حتى تزوجني بيهااا ماافيهاااش…
❤#عند_مريم_وهبة❤
هبة : عرفتي بقيينا كاندويو تقريبا حتاال وقت متأخر من الليل…
مريم : واااش هااد عمران مااناويش يتزوج بيك ؟؟
هبة : ورااه يله عااام باش تعرفنا ا صاحبتي … عقلتي بحاالا غا لبارح شفتو فديك الحفلة …
مريم : وصااافي ماتندمينيش حيت جبدتك ..اتبداي تاني تعاودي لي قصة حياتك معااه ..
هبة : مااالك هاااكاا ماالك ماعاندكش مع علاقات والحب …خاصني نبدا نعيط ليك بوجمعة يخخخ
مريم : هبة ..غادي نضربك حتا تضوري …
هبة : لا لا ماتضربينيش دب رااه عندي موعد مع عمران …(بدات تدور فعويناتها وكملات كلامها وقالت : غادي نخرجو نتغداو بزوج …
مريم : يوحل ليكم نشاءلله …
هبة : مجرمة 😒😒
💥فالحي ديال مريم💥
دايزة ليلى هازة فيديها تقدية …لابسة جلابة وجامعة شعرها على شكل كعكة مهملة وهازة بزطامها فيديها …كاتمشى فاتجااه الداار حتى كاتسمع صوت ترجي وبكاء …دارت شافت لقات جارتهم ابتسام …
ابتسام : هاا العااار اسييدي صبر عليا غااا هاد شهر عاافاااك اهئ اهئ
شخص : فرعتي ليا رااسي بهاااد صبر عليا صبر عليا ..والصبر عندو حدووود …
ليلى مشاات عندها كاتجري وقالت : ابتسااام ختي ماالك يااك لابااس…
ابتسام : بغاا يخرجني يااختي من الدااار قاالك بغاا فلوسو د الكرا ..ماعرفتش سنو غاادي ندير انا وساارة اهئ اهئ اهئ …
ليلى : مااتقووليش هاااكا اختي رااه حنا معاااك اويلي عنداااك يتسحااب ليك بلي بقيتي وحدك فهاد الدنيا …
ابتسام طاحت على كتف ليلى وبدات تبكي …

❤ زوجة للإيجار ❤
✍كوثر الزهراوي✍
💥الجزء -9-💥
دغيا دااز الصباح عند البنات فالجامعة و وصلات وقيتة د الغدا …تيلي د مريم كايصوني …
مريم : الو ليلى …ااه انا جااايا دب للدار واخ دب ندوز نجيبو معايا …
هبة : اتمشي ؟؟ مريم : اه مرات خويا قالت لي ايلا كنت جايا ندوز نجيب محمد أمين من مدرسة …
هبة طلات على الساعة ديالها وقالت : حتى انا انمشي هادا هو الوقت اللي دايرة نتلاقا فيه مع عمران ..يله باي الغزالة ديالي…
مريم : يله باي باي المصعورة …
هبة : ههه حرام واااش تقولي كلمة مقاادة بداك الفم ههه
مشات مريم دازت للمدرسة ديال ولد خوها محمد أمين وخداتو وتمات رااجعة للدار ..غير دخلات جراتها ليلى للكوزينة …
ليلى :نااري كوون تشووفي شنو وقع ل إبتسام مسكينة …
مريم : ماالها ابتسااام اويلي ياكما سارة وقعات ليها شي حاجة ..ولا داك الكلب ديال طليقها جااا لهنا ؟؟ شنوو وقع شوشتيني ؟؟
ليلى : جااها اليوم موول الداار بغااا يلوح ليها حواايجها للزنقة بقاات فياا …
مريم (شدات فرااسها حيت ابتسام من نهار جات لهاد الحي وهي ويااها صحاابات ومقربة ليها ولبنتها الصغيرة سارة … تفاهمات معاها مزيان بحكم انهم مفاوتين غير بسنوات قليلة ..) مريم : انااا انمشي عندها ندوي معاها …وايلا اقتضى الحال انجيبها لعن
نا لهنا للدار ..ماما وخويا مايقولو ليها واالو هي عزيزة عليهم …
ليلى : ورااه ماااشي هادا هو المشكل …المشكل فداك الكلب دااك ولد الحرام اللي كانت مزوجة بييه …رافع عليها دعوة بااغي ياخد ليها بنتها ساارة كاذب على المحكمة وقال ليهم بلي ماكاتعاملهاش مزياان وبلي مخليااها بالجوع ودب ايلا خرجات من الداار غاادي تجييه ساااهلة ياخد ليها بنتها … مسكينة غااادي يشويها فيها الله يشوييه …
مريم : ايخصني نمشي عندها نشوووفها ضروري …
ليلى : سيري سيري…
خرجات مريم ومشات عند ابتسام للدار دقاات وحلات ليها الباب وهي تلااح عليها كاتبكي …
مريم : صاافي اختي الله يستر عليك ماتبكيييش ….
ابتسام : واااش فراسك شنو وقع ا مريم ؟؟
مريم : عاوداات لي ليلى وجيت كانجري …فين ساارة ؟؟
ابتسام : وكلتها ونعسااات دخلي دخلي …

دخلات مريم وجلسات هي وابتسام فالبيت اللي كان متوسط ومفرش و متوسطاه تلفازة …
ابتسام : صااافي مشييت فيها اختي مشيييت اهئ اهئ انا يله ضبرت فخدمة فواحد المخبزة اهئ وقلت نجمع الفلوس ونعطيه الكرا ديالو ولكن هو مابغاااش يصبر عليا اهئ اهئ دب
مريم كاتبطب عليها وتوااسيها وقلبها كايتقطع عليها وعلى حالها …
ابتسام : غادي يااخد لي بنتي غااادي ياخدها …ملي غادي يشووف بلي مابقااات عندنا دااار غادي يستخدم هادشي ضدي اهئ اهئ وغادي ياخدها لعند مرتو الجديدة ….

❤ زوجة للإيجار ❤
✍كوثر الزهراوي✍
💥الجزء -10-💥
ابتسام : اهئ اهئ كووون غير كااانت عندي شي داار …اهئ اهئ ماكانش ياخد لي بنتي …
مريم : تيقني بالله اختي …ايكوون خير مايقدرش يااخدها ..مايقدرش …
ابتسام : اهئ اهئ ملي يشووفني انا وياااها فزنقة بلا داار بلا واالو ايااخدها لياا …
مريم : ولكن الحضانة كاتعطا دييما للأم ….
ابتسام : اييه الحضانة كاتعطا للأم ايلا كاانت عندها دااار تعيش فيها هي و ولادها وكان عندها مصرووف باااش تصرف عليهم …مااشي بحاالي انااا اهى اهئ يله ضبرت على خدمة فالمخبزة وقلت مصروفها انعييش بيه انا وبنتي ودب خرجات لي هاد المشكلة د الدار من جنب …اهئ اهئ نمشييي نبوووس بنتي ونتواادع معاااها قبل لا يجي ولد الحرااام يااخدها …اهئ اهئ ( طااحت على كتاااف مريم وبدااات تبكي …) 💥#عند_هبة_وعمران💥
كايتغداو وسط ريسطو وكايدويو ويتعااودو واي وااحد شافهم من بعييد غادي يعوف انهم كووبل باااينة ….
هبة كاتضحك وتشووف فيه …
عمران : ايوا هاادشي اللي كاين هااد الساعة ههه
هبة : ممم شنو خبار الأم ديال الصديق ديالك ..كنتي قلتي ليا بلي كانت مرضات مسكينة ؟؟؟
عمران : ااه الأم ديال فاروق …هي ولات بييخير حمدلله ….احم ولكن هو مشكلتو مشكلة ونييت ..هو مشوش وانا مشوشني عليه…
هبة : عاود لي يمكن نقدر نعاونك …
عمران : ا لالة عمران من النوع اللي ماكايحملش شي حاجة سميتها الزواااج … ماكايشووفش رااسو مع شي وحدة طوول العمر …
هبة : كايحس بلي يمكن يمل منها ومعااها يااك ؟؟ عمران : Exactement …
هبة : احم ونتااا ؟؟؟ وااش كاتفكر بحاالو ؟؟ عمران شاف فيها وتبسم بجنب : كولا حاجة ووقتها الغزالة ديالي …
هبة خدودها توردو ههه وقالت :احم ايوا كمل …
عمران : الواليدة ديالو بغااااتو يتزوج …ديما موضووع زواج كاتجبدو ليه …كاتقوول ليه بغات تشووفو مزوج وتشووف ولادو …راك عاارفة الأمهات كيف داايريين ومع هي مريضة فاروق كاتجييه طاايحة يبقا دييما كايكسرها …مؤخرا رااه مرضااات و لام نفسوو بزااف ظن انو هو سباابها …
هبة : ايوا يتزوج … يشووف شي وحدة يتزوج بيها ورااه ممكن مع الوقت يبغيييها … هنا غاادي يكون عطا فرصة لراسو باش يبغي ويكون دار الخاطر حتاال للواليدة ديااالو …

عمران : وااكانقوول ليك عمران والزواج خطان متوازياان لا يلتقياان كاتقولي لي يتزوج … هو ديما كايقولها ..كايقول بلي ايلا تزوج شي وحدة غادي غير يظلمها وصاافي ..
هبة : بففف مشكيلتو معقدة …
عمران : وغاادي تزيد تعقد حيت الواليدة ديالو جايا عندو غدا وجايبة معااها بنت ختها ومن دييما كاتلمح ليه عليها وبما انها جااية غدا وجايباها معااها فأكيد اتنووض شي قربالة على هاد موضوع الزواج … هبة : اتبغي تزوجو لبنت خاالتو باااينة …

❤ زوجة للإيجار ❤
✍كوثر الزهراوي✍
💥الجزء -11-💥
عمران : ورااه كايقلب على شي طريقة بااش يدخل لمو انو فكرة زواجو مامنهاااش … وانا فاروق صااحبي مستحيل يتزوج بديك هاجر …
هبة : هي نتااا كاتهرفها ممم سمعت هااجر …
عمران : الغيرة تااني ههه ا لالة غا كووني هاانية هااد الساعة عيني كاتشووف غاا وحدة وهاهي جالسة قداامي…
هبة : ههه شووف انا مؤخرا شفت واحد الفيلم دب فااش عاودتي لي على صاحبك جات فبالي فكرة ولكن غا كانضحك هههه
عمران : قوولي يا لالة قوولي ههه
هبة : احم شنو بان ليك هاد صاحبك فااروق يضبر على شي وحدة تلعب دور الزوجة ديالو خلال هااد المدة اللي غادي تجي فيها الواليدة ديالو لعندو …
عمران : هههه من نيتك كاين شي واحد كايتزوج بلا خبار مو …كيفاش زوجة ديالو ؟؟؟
هبة : غادي يقول للام ديالو انو هاد البنت تعرف عليها وبغاااها وبلي البنت مقطوعة من شجرة ماعاندهااش عائلتها ودار هو ويااها العقد صاافي بلا عرس بلا حفلة وايقول ليعا بلي بغا يديرها ليها مفاجئة…وهنا الأم ديالو غادي تهنا عليه وغادي تحيد من بالها فكرة زواج من بعد مدة تمشي البنت فحالها تغبر وقولو بلي ماتت ومن وراها صاحبك زعما ماغادييش يبغي يتزوج شي وحدة اخرى من غير مرااتو …وهنا صاحبك يتهنااا ومايبقاااوش يجبدو ليه موضوع زوااج كل مرة ههههه
عمران كايشووف فيها كاتضحك اما هو فكايدورها فرااسو …
هبة : مم مالك ا عمران …شفتك سكتي ..ياكما ديتي علياا رااه غير كانضحك …
عمران كلاامها كايدوور فباالو …وكايحللو وينااقشو …
هبة : وااش نتا كاتفكر فكلامي …
عمران : بحال هااكاك …
❤#عند_مريم❤
خرجات من عند ابتساام ضاارها خااطرها علييها …كاتشووف فيها مسكيينة كاتعذب وهي ماقاادرة تدير ليها واالو … دخلات للدار وتلقات ليها ليلى …
ليلى : دويتي معااها ؟؟ كيف حالها دب …
مريم تعصبات : كيفاش غاادي يكون حاالها كيف الويل …ديما كانقوولها ليكم البنت تكون رااسها تخدم تقراااا ماااشي تبع راااجل …راااه الرجال مااشي كولهم ظراااف راااه ولااد الحرام مقطرييين ..هاهي تزوجااتو ووهباتو رااسها فاللخر مشا عند وحدة اخرى ..وماكفااهش هاادشي غاادي يحيد ليها حضاانة د بنتها حيت مول الكرا ايجري عليها …(بدات تبكي وطلعااات لبيتها بالجرا …)
ليلى تنهدات عرفااتها بقاات فيها بالجهد ولكن ماعاندهم مايديرو ليها …
🔥#عند_عمراان🔥
بعد ماتغدا هو وهبة وصلها لبلاصة قريبة لدارهم وحطها ومن بعد دااز للشركة عند فاروق …دخل للمكتب عندو لقااه كايوقع على شي ورااق ….

فاروق هز رااسو فيه وقاال : شفتك كاتفرنس شنوو وااقع ؟؟
عمران : لقيت ليك حل لمشكلتك …
فاروق : هههه من نيتك …
عمران : كنت مع هبة دب شوي وقالت لي كلاام ثار انتبااهي وقلت نعاودو ليك وعطي رأي ديالك …
فاروق : القضية فيها كلاام النسا …ايوا شنو الحكاية اللي حكات ليك الخطيبة ديالك المستقبلية …
عمران : قبل مانعاود ليك الحكاية نقول ليك عنواانها …
فاروق شااف فيه باهتمام وبدا كايحك فلحيتو الخفيفة وقاال : اهااه القضية فييها عنوان !!
عمران : زوجة للإيجار….

زوجة للإيجار ❤
✍كوثر الزهراوي✍
💥الجزء -12-💥
عمران : قبل مانعاود ليك الحكاية نقول ليك عنواانها …
فاروق شااف فيه باهتمام وبدا كايحك فلحيتو الخفيفة وقاال : اهااه القضية فييها عنوان !!
عمران : زوجة للإيجار….
فاروق : نعاام نعاام ماسمعتش مزياان …
عمران : ههه غادي نضبرو ليك على شي زوجة هانتا سمع مزيااان ( هنا عمران عاود لفاروق الفكرة اللي قالت ليه هبة كااملة ..)
فاروق : دب نجيب انا وحدة على اساس انها مراتي ومن بعد مدة نصيفطها فحالها ونقول ليهم رااه ماتت ونمثل انني حزين عليها وبأني ماباقي بغيت حتى وحدة من ورااها …
عمران : هااانتا فهمتي البلاان … وهنا الأم ديالك غادي تسد عليك موضوع زواااج اللي داير ليك عقدة فحيااتك …وغادي تهنا وتهنينا معاااك …
فاروق : واااش من نيتك …
عمران كايشووف فيه متردد وقال : غا زعم السااط واللي ليها ليها …اذا مابغيتيش رااه غادي تزوج ديك بنت خالتك …
فاروق : بففف ماعرفتش …
عمران : ايوا فكر مزيااان قبل لا تقول ليك الواليدة ديالك هاا السخط ها الرضى تزوج بنت خالتك …مهم انا قلت ليك دب غادي نمشي للبيرو ديالي عندي شي خدمة …فكر مزيااان …
🌼الرباط🌼
الأم د عمران خديجة كاتجمع فحويجاتها …
هاجر : خاالتي عطيني نعاونك …
الأم خديجة : لا لا ابنيتي انا جمعت كااع داكشي اللي خاصني …نتي جمعتي حويجاتك …
هاجر :ااه اخالتي …
الأم خديجة: فين ماماك …؟؟
تسمع صوت الخالة نعيمة من وراهم : هااني اختي رااني كنت كانجمع شي حويجات وصاااف …
الأم خديجة : انا انمشي نصلي ومن بعد عاد نحطو الغدا …
هاجر : وااخ اخالتي …
خرجات خديجة من الغرفة وهي تجر نعيمة بنتها وقالت : شوووفي بلاما نبقا نوصيك راااه غدا غادي نشدو الطريق لعندو …
هاجر : صاافي ا ماما ماتخاافيش هااد المرة غااادي يطيح فالشبكة …
نعيمة : ديما كاتقوولي هااكا عمرك طفرتيه …
هاجر : لا دب غير كل مرة انا وااثقة …
نعيمة : راااه دجاجة بكاامونها ايلا فات حتى مشا ليك دااك الزين وديك الهيبة وديك الطوولة والتجريدة راااك ماعندك زهر وعمرو يكون عندك …

❤ زوجة للإيجار ❤
✍كوثر الزهراوي✍
💥الجزء -13-💥
هاجر : وااخ ا ماما صاافي اوووف … واكن حتا نتي عاونيني… دوي مع خاالتي تقنعو وتبزز عليه واااه …
نعيمة : ورااه عييت ندوي معااها وكااتقولها ليه ولكن سيد مانعرف ماالو هو والزواج كيف مش مع فاار يخ يخ ولكن ماتخافيش …مانمشي من هاد الدنيا حتى نردك عروسة ليه ونخليك كاتلعبي فخير وخمير ولد خاالتك …
هاجر عينيها كايخرجو منهم القلووبة فرحااانة بكلام مها وكاتقوول : نشاءلله انشااءلله …
💥#عند_مريم💥
جالسة فبيتها كاتكتب وااحد درس كان فااتها حتى كايصووني ليها تيلي ديالها …
مريم : الوو هبة …
هبة : الحووب لاباس عليك …
مريم تنهدات وقالت : حمدلله …
هبة : مالك شوااقع صوتك جاني ماشي حتاال لهيه …
مريم : بففف تعقلي على ديك السيدة اللي ساكنة قدامنا ابتسام اللي عندها بنت اسمها ساارة …
هبة : ماالهاا ؟؟
مريم عاوداات ليها كووولشي …
هبة : مسكينة الله يكوون معاااها …
مريم : بقاات فيااا قداااش كون غا لقيت كيفاش نعاونها ولكن الغالب الله …مهم بعدا نتي كيفااش دوزتي الغدا دياالك مع حبيب القلب …
هبة : داااز زويين وبزاااف ههه الله يجيب ليك حتا نتي شي حد يبدا يخرجك ويساريك وانا فينما نصوني ليك نلقااك مخشية فبيتك …
مريم : شكيت عليك اختي ؟؟
هبة : ها القميع تاني ههه ممم مريم شحال غدا فالشهر …
مريم : 26 شهر 4 علااش ماالك ؟؟؟ الحب تلفك على التاريخ والشهر ..
هبة : هااا همم لا واالو واالو …يله بااي حتى نتلاقاو غداا فالجامعة بااي الزين …
مريم قطعات وبدات تضحك : هههه الحمقة تسحاب ليها نسيت عيد ميلادها …
💥#عند_فاروق💥
جاالس خدااام على واحد المشروووع وكلام عمران كايدوور فباالو … تخايل ايلا الأم ديالو حطااتو قداام الأمر الوااقع وقالت ليه ها السخط ها الرضاا تزوج بنت خاالتك …هااادشي مستحييل هو ماكايتصورش رااسو مع وحدة عمرو حتى دوا معاها 5 ديال دقايق مقاااادة … ناض من فوق البيرو ديالو وخرج توجه الأسانسور ( المصعد ) وهبط للمكتب الخاص ب عمران …دخل بلا متيدق لقااه كايتواادع مع وااحد الزبوون …
عمراان : ماالك جااي كيف شي صااعقة ههه
فاروق : احم صااافي موااافق …ضبر ليا على شي زوجة …
عمران : هاااااه ههههه صافي وافقتي
فاروق : وشنو بغيتيني نديير مثلا …علااه اللي سمع هضرتك يقدر يقول لاا …
عمران : هههه دب منين غادي نضبرو على هاد البنت …
فاروق : ماسوقيش نتا وحبيبتك فكرتو ففكرة ايوا دب طبقوها …
عمران : كاتقصد المدام ديالي المستقبلية …

❤ زوجة للإيجار ❤
✍كوثر الزهراوي✍
💥الجزء -14-💥
عمران : كاتقصد المدام ديالي المستقبلية…
فاروق شااف فيه باستفهاام وقال : ماتقوولهاااش …
عمران : غدا عيد ميلادها وغادي ندير ليها مفاجأة ونعرض عليها الزواج …
فاروق : سعدااتك بهااد السهوولة …
عمران : سمح ليا اخويا اناا بااغي نتزوج وندير الولاد نتاا معقد من هااد الموضوع تسحاابلك نااس كااملين بحاالك ههه واصلا مابقييتش قااد نصبر نبقا بعيد على الحبيبة ديالي ههه
فاروق : وطحتيي طيحة خاايبة
عمران : العقبة ليك هههه …
فاروق : شنو دب غادي تضبر ليا على شي وحدة …
عمران : وااخ صافي صافي دب نشووف مع هبة ونرد عليك الخباار …
فاروق : وااخ صااف …بالمنااسبة مبرووك مسبقا …
عمران : بااقي كااعما شفنا جواابها وااش موافقة ولا لا …
فاروق : بااينة اتواافق علاه فين اتلقا شخص فحاالك … واصلا بااينة فيها كاتبغييك حتى هي ولا مستحيل تبقا معااك هاد المدة كاملة …
💥💥💥💥💥💥💥💥
داز النهااار عاادي عند ابطاالنا وجااا يوم جديد …اليوم اللي غادي تجي فيه الواليدة ديال فاروق وخالتو وبنت خاالتو وكذلك اليوم اللي غادي تحتافل فيه هبة بعيد ميلادها ❤❤
وااقفة كيف العادة قدام الجامعة كاتسنااها …دورات وجهها وقشعاتها جااية لابسة سروال جينز أسود مع شوميز سوداء وفيست من الفوق …طالقة خصلات شعرها كيف العادة ووجهها مادايرااش ليه ميكااب بزااف مقتاصرة على كريم للبشرة وماسكارا وكلوس …
مريم : صباااح الخير …
هبة : ايهاااي كاتباتني ليا منورة ليوم شنو كااين ؟؟
مريم : ممم لا وااالو …
هبة : اممم ايوا زيدي زيدي ندخلو…
مريم عاارفااها مفقصة على حساب اليوم عيد ميلادها وتسحاابها بلي نسااتها …
مريم : مالكي كاتنفخي ههه
هبة : شووفي نتي مانسيتي واالو اليوم….
مريم : مممم واالو كوولشي عندي مانسيت واالو …
هبة : ممم وااخ يله ندخلو….
💥#عند_عمراان💥
وقف السيارة ديالو قدام الفيلا د فاروق هبط ومشا دخل …دق وفتح ليه فاروق الباب …
عمران : صباااح الخير ..
فاروق : اهلااا ا صاحبي صباح الخير …دخل دخل لقيتيني كانفطر …
عمران دخل ومشا جلس فوق الفوتوي وهز تيلي ديالو كايقلب فيه …
فاروق جااي هاز كاس ديال القهوة شاافو وقال : ماالك تاالفة ليك شي حاجة…
عمران : نمرة د واحد بنت سميتها مريم صاحبة هبة …

❤ زوجة للإيجار ❤
✍كوثر الزهراوي✍
💥الجزء -15-💥
فاروق جااي هاز كاس ديال القهوة شاافو وقال : ماالك تاالفة ليك شي حاجة…
عمران : نمرة د واحد بنت سميتها مريم صاحبة هبة … لبارح فاش تلاقيت بهبة خليتها حتا مشاات لحمام وهزيت تيلي ديالها وخديت نمرة هااد صاحبتها …
فاروق : وااش هادشي صااحبتها المقربة …
عمران : اااه قريبة ليها بزااف داكشي علاش خديت نمرتها وغادي ندوي معاها باااش تعاوني فبلان اللي غادي ندير ل هبة فالعشية …
فاروق : اوووهووو على العاشق الولهان … سير على الله …
عمران : هههه
❤#عند_مريم❤
هبة : لااش جايباني لهنا يله نمشيو ل Amphi الدرس مابقا ليه واالو ويبدا …
مريم : جلسي جلسي …
هبة : جايباني للحديقة فهاااد الوقت وباغاني نجلس …العجب اختي نتي ماموالفة ليك كاااع تعطلي على الدرس …
مريم : اشنو فيييها ايلا تعطلنا نهاار وااحد على الدرس هممم
هبة : وعلاش انتعطلو بسلامة ههه
مريم : حيت اليوم عيد ميلادك 😍😍😍
هبة بصدمة : واااش تفكرتي هه تسحاابلي نسيتي …
مريم : وانا نقدر نسااا عيد ميلاد اعز صديقة ليا …
هبة دمعو عينيها بفرحة وعنقااتها …
مريم : هاكي هاا الكادو دياالك …❤❤ نتمنا يعجبك …
هبة خدات من عندها الكادو وحلاتو كانت صورة وسط كادر غزاال فاللون الأصفر …صورة كاتجمعهم بزووج معانقين وكايضحكو …
مريم : عجبك ههه
هبة : بزاااااااااف شووووفي جيناااا زويينين وكانضحكو …افضل واروع هدية غااادي نعلقها فبيتي ههه
مريم : عيد ميلاد سعيد وكل عام وانت بخير وصحة وسلامة الحبيبة ديااالي …
هبة : ناااري اول مرة نسمعك كاتحلوني وتقااادي فالهضرة هههه
مريم : وراااه غير حيت اليوم عيد ميلادك … غدا ماباقيش تسمعي هااد حبيبة ماكاين غا المسخوطة الحمارة الموصيبة هههه
هبة : هههه
(هنا صوتا تيلي ديال مريم هزااتو وجاوبات : الو…)
عمران : مريم سلاام ؟؟؟
مريم : شكون معايا …
عمران : اناا عمران صديق هبة …ايلا كانت هبة حداك ماتخليهاااش تعرف بلي انا اللي على الخط …

❤ زوجة للإيجار ❤
✍كوثر الزهراوي✍
💥الجزء -16-💥
عمران : اناا عمران صديق هبة …ايلا كانت هبة حداك ماتخليهاااش تعرف بلي انا اللي على الخط …
مريم : احم نعااام كانسمعك …
عمران : اليوم عيد ميلاد هبة وانااا بااغي ندير ليها مفاجأة داكشي بااش بغيتك تجيبيها لي لواااحد البلاصة اذا كان ممكن …
مريم : واااخ صااافي …
عمران : شكرا بزاااف انا نسيفط لك العنوان والساعة دب فميساج …
مريم : واااخ …
هبة : ماالك معاامن …
مريم : لا غا ليلى هااادي …احم نسولك ا هبة … عمران اللي ديما كاتعااودي لي عليه نتي متأكدة انووو كايبغيييك ياااك …مايقدرش يدير شي حااجة تآذيك …
هبة : هو كاايبغيني بزااف انا كانشوف هاادشي من خلال تصرفاتو ونظراتو…. ملي غاادي تعرفي علييه غااادي تأكدي بنفسك …ولكن …
مريم : ولكن شنو …؟؟؟
هبة : هو نسا عيد ميلادي …دويت معااه صباااح ومابارك لي مااوالو … ولكن عااادي اكيد ايكون مشغوول مع خدمتو …
مريم تبسمات وقالت : ايوا يله يله نمشيو تعطلنا على الدرس… اااه ومن بعد بغيتك تمشي معاايا لواحد بلاصة نقضيو وااحد غرض ل مرات خويا ليلى وااخا ؟؟؟
هبة : واااخ …(هاازة كادو اللي عطاتها مريم وكاتضحك…)
هبة : شوفي شوفي كنتي رقيقة هنا ههه
مريم : ايوا قدااش بنت لييك دب ههه
هبة : ربيتي الصحة هههه
مريم : الله يمسخك ههه
💥#عند_عمراان💥
قطع وسيفط ميساج ل مريم فيه العنوان اللي غادي تجيب ليه هبة والوقت… ومن بعد انضم لعمران اللي كان جالس كايفطر …
فاروق هاز كاسو د قهوة كايشرب منو شافو وقال : امضرا شنو قالت لك …
عمران : وافقات بطبيعة الحال غادي تجيبها …
فاروق : شنو صاافي عولتي ….
عمران جبد من الجيب الأيسر ديال جاكيط علبة صغيرة وفتحها قداام فاروق وقال : كيجااك …
فاروق : مانعرف لهاادشي انا ماعااانديش مع هاااد تخربيق …
عمران : وااش انا كانقول ليك غااادي نعرض الزواج على الدرية وكانورييك الخاتم ونتا كاتقول لياا تخربيق هههه ( حط العلبة اللي فيها الخاتم فوق الطبلة…)
فاروق : الله يعاونك وصاافي ههه هادشي اللي نقدر نقول لك …
عمران : هههه أميين …بففف جاني صهد (حيد جاكيط ديالو وبقا جااالسة مع عمراان مدة كايدويو ويتحدثو …)
فاروق : مهم انا غاادي نمشي للشركة دب …
عمران : حتا انا غادي نوض عندي مايتقضا …ولكن قبل انمشي للحمام ..

ناض عمران مشا للحمام وفاروق ناض يبدل عليه بااش يخرج للشركة ولكن قبل ماينوض قشع العلبة اللي فيها الخاتم فوق الطبلة هزها وحطها فالجيب الأيمن ديال جااكيط د عمران وقاال : ياا ودي على اللي بغا يتزوج حط الخاتم ونساااه … من بعد مشا طلع للفوق يبدل عليه ….

❤ زوجة للإيجار ❤
✍كوثر الزهراوي✍
💥الجزء -17-💥
عمران مشا للحمام قضا غراضو وخرج مشا توجه هز جااكيط ديالو لاحها فوق كتافو وهو يباان ليه فاروق هاابط من الدروج لابس سروال جينز مع شوميز وفيست فاللون الأزرق ..ماشط شعرو كيف العادة ومطلعو للفوق ودااير سااعتو وكاايدوي فالتيليفون …
فاروق : وي الواليدة اناا غادي نجي نااخدكم من المحطة …
عمران : شنوو صاافي جاايين …
فاروق : رااه شاديين الطريق مابقا ليهم والو ويوصلو … مهم غاادي نشووف كيفااش غادي نشرح للواليدة هاد قضية ديال انني مزوج بففف غاادي نلعب هااد اللعبة ونجرب حظي وصاافي …
عمران : صاافي وكون هاااني انا فأقرب فرصة نضبر ليك على شي وحدة ثمتل معااك هااد الشيء …
فاروق : اوووك يله سير نتاا باش ماتعطلش …
💚#عند_مريم💚
بعد ما سالا الدرس خرجات هي و هبة وشدو طااكسي عطااتو مريم العنوان وانطااالقو …
هبة : شمن غرااض انقضيو ا صاحبتي ؟؟؟
مريم :صبري ودب تشووفي …
هبة : مم وااخ …
عمران طلع لسيارتو ومشااا للبلاصة اللي داير فيها مفاجأة ل حبيبتو هبة …و فاروق مشا للشركة وقع على شي ورااق ومن بعد مشااا ديريكت للمحطة باش يجيبهم للدار …
🖤فااروق🖤
وااقف متكي على السيارة ديالو دااير نظاظر د شمس كايشووف فباب المحطة حتى كايقشعهم جاايين هازين الأمتعة ديالهم …
الأم خديجة : ولدي حبيبي ..توحشتتتك (عنقااتو وهو بدورو بادلها العنااق وبااس رااسها وقاال :حتى انا الواليدة ..نتي لاباس عليك كيف بقيتي ..جاوباتو وقاالت : ملي شفتك وليت فأفضل حال …
فاروق :الله يخليك ديما بيخير ( شاف خاالتو ومشا سلم عليها ودور عينيه جيهة هااجر مد ليها يديه سلم عليها وهنا هي بحااالا قال ليها كانبغيك ههه السيدة ولاات حنرااا والقلووب كايخرجو من عينيها وقلبها كااايضرب …شافتها مها نعيمة ونغزاتها وقاالت : تبتي وترزني ….)
فاروق : يله طلعو ناخدكم ترتااحو …
الخالة نعيمة : اييه اوليدي والله حتى عيينا …
طلعات خديجة لقدام حدا ولدها ونعيمة وبنتها هاجر طلعو اللور …
نعيمة : شووفي تبااركلله على طوموبيل كيف داايرة …
هاجر : سميتها رونج روفر ا ماااما …
نعيمة : اييه هاادي تعرفي سميتها … وكيفاش تطيحي ولد خالتك وتخليه يتزوج بيك هاادي ماتعرفييهاااش …
هاجر دورات وجهها كاتشووف ف فاروق كيفااش أنيق وجسمو ريااضي ومقاااد …بقات مقابلاه حتى ديمارا وانطاالق فاتجاه الفيلا ديالو ….

❤ زوجة للإيجار ❤
✍كوثر الزهراوي✍
💥الجزء -18-💥
❌#عند_عمراان❌
وصل للمكان هو الأول …كان ريسطو استأجرو على قبل هااد اليوم … تم دااخل واتاجه لوااحد الممر وهو يلقا شخص وااقف …
شخص : كوولشي وااجد كيف طلبتي مووسيو عمران …الضوء الخفيف والورد الأحمر اللي طغاا على المكاان …الصور رااه حطيناهم فين قلتي لينااا والفيديو رااه وااجد …
عمران : مم مزيان بامكانك تمشي …
💥#على_برا….💥
وقف الطاكسي وهبطو البنات …
هبة : شنو جينا نديرو هنااا فهاد الريسطو ؟؟
مريم دارت شافت فمول الطاكسي وقالت : عافاك اخوويا وااش يمكن ليك تسناني هنا واحد شوي …
مول طاكسي : واخ اختي …
مريم جراات هبة ودخلو …
عمران كاان لدااخل هز تيلي ديالو طل على الساعة لقاا هادا هو الوقت اللي غادي تجي فيه هبة …خشا يدو فجيب الأيسر ديال جااكيط لقاااه خاااوي …
عمران : لاااا مستحيييل (حط يدو على رااسو تفكر فاااش جبد الخاتم وراه ل فاروق ومن بعد حطو فوق الطبلة …)
عمران : صااافي انااا نسيييتو فوق الطبلة تفوووو على زهر .. (دور وجهو وقشع مريم وهبة دااخلين …تخبا وهو يصوني لمريم وخبرها تجي عندو …نعت ليها الطريق منين تدوز ومن بعد قطع …)
هبة : اويلي فيين غاادية ومخلياااني هناا …
مريم : تسناايني هااني جاايا …
مشات مريم تبعات الطريق اللي قال ليها عمران تدوز منها ولقااتو …
عمران : نتي مريم يااك …
مريم : ونتا عمرااان …
عمران : شووفي اختي وقعاات وااحد المشكيلة …
مريم خرجات فيه عينيها وقالت : اويلي اشمن مشكيلة ياكما شي فخ هااادا (حطاات يديها على رااسها وقالت : وانا تايقة فيك وجاايبة البنت لهنا…شوف والله لابقاات فيييك …
عمران شاف فيها وتنهد ههه تماما كيف وصفاتها هبة كاتعطي احكام مسبقة وتعااملها خطيير ههه
عمران : تهدني اشمن فخ ولا حماااق …اليوم انا كنت معول نفاجىء هبة بعرض زواج …بغيت نتقدم ليها …
مريم ملي سمعات هااكا عااد تكالمات وقالت : ااااه …ممم ورااه نيت رااه طولتو فعلاقتكم صراحة احم واااخا انااا ماعاندييش مع هاااد الحماق ديال الزواج والعلاقات ولكن صاحبتي كاتبغيييك وعلى مااابان لي حتى نتا كاتبغييها داااكشي علااش الله يكمل بيخير …
عمران شااف فيها وضحك نسخة طبق الأصل على فاروق حتى هو جبد ليه الزواج يخسر معااك ههه

❤ زوجة للإيجار ❤
✍كوثر الزهراوي✍
💥الجزء -19-💥
عمران شااف فيها وضحك نسخة طبق الأصل على فاروق حتى هو اللي جبد ليه الزواج يخسر معااه ههه
مريم : وشنو المشكل فهادشي …
عمران : الخاتم نسيتو فالدار …كنت حااطو فالجيب الأيسر ديال جااكيط جبدتو وريتو لصاحبي وحطيتو فوق طبلة ونسييتو …
مريم : وقلبتي مزيااان يمكن تكون هزيتيه …
عمران : لا انا متأكد خليتو فالدار …دب انا غادي نمشي نجيبو لاهي نتي هبة …
مريم : مممم بلاتي بلاتي …ايلا مشيت انا عند هبة وبقيت شااداها هنا غااادي تشك بلي كاينة شي حاجة وغاادي تبدا تسولني وانا فمي ماكانشدووش غادي نطلق ليها شي كلمة ونخسر ليك مفاجأتك … سير عندها نتا دب ولاهيها وقول ليها بلي هااادشي مفاجئتك وعطيني انا العنوان ديال هاد الدار ولا السوارت نمشي نجيب ليك الخاتم ونرجع ….
عمران : غااادي تديري فيااا خير كبييير …هاكي هااا سوارت الفيلا رااه ديال صااحبي …
مريم : الفيلا د صاحبك وسوارت عندك ؟؟
عمران : اااه راااه داك السيد بحال خويا داارو هي داري و داري هي داارو …شوفي دخلي اتلقااي العلبة فوق الطاولة …
مريم ملي سمعاات دار صاحبو ترددات …
عمران : ماتخاافيش ماغادي تلقااي حتى شي حد فالدار …
مريم : واااخ …
خرجات مريم كاتجري طلعات للطاكسي اللي كان كايتسنااها وعطاتو العنوان ديال الفيلا اللي عطاها عمران وانطاالق …اما عمراان فكااان لداخل مشوش وغااافل على انو فاش مشا للحمام فاروق خداا العلبة وحطها ف الجيب الأيمن ديال جااكيط …تنهد ومشا عند هبة يفاجئها من جهة …ومن جهة اخرى يلاهيها حتى تجيب مريم الخاتم باش يفاجئها ويعرض عليها زواااج …
💥#عند_فاروق💥
فتح الباب ودخل ليهم الأمتعة ديالهم حطهم عند الباب …
فاروق : دخلي الواليدة مرحبا بييك فداارك …
الأم خديجة : الله على راااحة الله…
نعيمة داخلة وكاتطرطق فعينيها وتشووف فالفيلا …
الخالة نعيمة : ولدي فااروق آخر مرة فاش كنا جينا عندك ماكنتيش فهاد الفيلا ؟؟ ولا كذبت ؟؟
فاروق : اااه هادي مؤخرا عاااد انتاقلت ليها …
الخالة نعيمة : ودياالك يااك اولدي …
هاجر : بطبيعة الحااال ديالو ا ماما ههه
فاروق تنهد وعض على فكو من دااخل صاابر على هااد جوجات على قبل الواليدة ديالو …
فهاد الأثناء الطاكسي كان يله وقف خلصاتو وهبطااات هزاات عينيها فالفيلا يله بغاات تدخل وهي تحس بقلبها كايضرب بجهد …تخلعااات …احساس ماعرفااتوش منين جااها …

مريم : اووف ياربي السلامة شنوو هاادشي …مريم ماتخاافيش رااك اتدخلي تهزي الخاتم وتخرجي ماشي غادي تحاربي … (دوزات بعض خصلات شعرها ورا وذنها وتوكلات على الله وخطات اول خطوة ….)

❤ زوجة للإيجار ❤
✍كوثر الزهراوي✍
💥الجزء -20-💥
#عند_فاروق❤
صونا التيلي ديالو وجاوب ….
الأم خديجة : شنو اوليدي مالك ياك لاباس …
فاروق : لا واالو غير كايعيطو ليا من الشركة …
الأم خديجة : اييه اوليدي خليتي خدمتك ومشاغلك وجيتي حتى خديتينا من المحطة وجبتينا للدار …
قفزات الخالة نعيمة وقالت : ايييه شفتي كون كنتي مزوج وبمراتك كون راااه كاااعما بقيتي مشغول معانا …كون تلقاات لينا هي وكون لقيناااها معانا دب وجدات لينا غا كويس د أتاي وجلسنا مجمعين عليه اوليدي …
فاروق كايشوف فخالتو وكايخنزر …كون ماكانت مو كون وراها كويس ديال أتااي كيف داير …
الأم خديجة : ايييه اوليدي كانبقاااو ساااكتين ساكتين حتاال لخر وكاندويو على نفس المووضوع …علااش ا وليدي علااش مابااغيش تقول بسم الله وتزوج … كاااينة البنت اللي تهزك وتديرك فوق راااسها وتدير ليك وليدات وتعمر عليك وماتخليكش وحدااني هااكا …
فاروق كايشوووف فيهم كايمعنيو ليه على هاجر بنت خالتو اللي كانت وااقفة فالجنب وكاتبسم غير وحدها … تفكر كلااام عمران على زوجة للإيجار… هز رااسو وشااف ف مو مقلقة وماعاجبها حال يله بغااا يدوي وهو يسمع الباب ديال الفيلا كايتحل ….كولهم دااارو شاافو فالباب باستفهام ….
💥#عند_عمراان💥
مشا للبلاصة فين وااقفة هبة وهو يغفلها وجا من وراها وهمس فوذنها وقااال : مرحبا بالحبيبة ديالي …
هبة سمعات صوتو وهي تفرح : عمراااان هااادا نتااا …
جبد واحد شريط وهو يغمض ليها عينيها …
هبة : شنو هاادشي ههه وفين مريم حتى هي معااك فهاد البلان ههه
عمران : اكييد …علااه نتي شنو تسحاابليك … غاادي نسا اليوم اللي جيتي فيه لهاد الدنيا همم ( باسها فخدها وجرها من يديها وتم غااادي بيها فداااك الممر حتى خرجو فبلاصة كبيرة على شكل قاعة مزينة بالورود …والأضواء الخاافتة …وقفها فمكان محدد وحيد ليها الشريط اللي على عيونها وهو يطلق فيديو قدااامها كاان فشاشة كبيييرة …)
هبة مصدووومة حااطة يديها على فمها كاتشووف فالشاشة الكبيرة قداامها مطلوق فيها فيديو كايضم صورها من وهي صغيرة حتى كبراات ..صور ليها وهي كاتضحك وهي كاتلعب وهي فرحااانة …صور ماكانتش ضااانة بلي عندها لقاتهم تم ههه كيفاش دار عمراان حتى ضبر عليهم الله وعلم …
هبة دارت شاافت فيه بعينين كولهم حب وعشق وقالت : عمرااان كيفااش درتي حتى لقيتي هااد تصاور زوينين …
عمران قرب ليها كايشوف فعينيها وقال : الحب كايخليك تدير اي حاااجة….

هبة تلاحت عنقاااتو وهو بدورو حاوطها بيديها وزير عليها وهو يحس بشي حاجة فالجيب ديالو الأيمن …حط يدو وهو يلقااا العلبة اللي فيها الخاااتم …همس وقال : فعايلك هادو ا فاروق ….

❤ زوجة للإيجار ❤
✍كوثر الزهراوي✍
💥الجزء -21-💥
هبة تلاحت عنقاااتو وهو بدورو حاوطها بيديها وزير عليها وهو يحس بشي حاجة فالجيب ديالو الأيمن …حط يدو وهو يلقااا الخاااتم …همس وقال : فعايلك هادو ا فاروق ….
هبة بعدات عليه وقالت : شنو قلتي ماسمعتش ؟؟
عمران بعد شوي وضغط على وااحد الزر وهو يشعل الضوء وهي تبااان القااعة كاااملة …وبانو تصااور اللي كانو معلقين فالحيط …
هبة عاااود شاافت صورها هي وياااه وتصدمااات بقااات كاتدور عويناتها من صورة لأخرى …فرحات بزاااف … وملي جات تدور تشوووفو لقاااتو راكع على رجلييه ومقدم ليها خاااتم وسط علبة صغيرة …
فاروق : تقبلي تزوجي بياااا …
🌼#عند_مريم🌼
بعد ما وصلات للفيلا جبدات سوارت اللي عطاها عمران وحلات الباب …غير هزاات عينيها كااتشوووف شااب وااقف قداامها وجوج عيالات يكونو كبار فالسن و بنت تكون قدها فالعمر واااقفة فالجنب …فالأول ضنااات انو غلطاات فالفيلا حيت عمران قال ليها بلي دااار خااوية ماغادي تلقا حتى حد….
مريم : نااري ياكما غلطت فالفيلا …ولكن مفاتيح رااه عندي والباب تحل ….
فاروق كايشووف فيها باستغرااب وكايقول مع رااسو شكووون هاااد الغريبة اللي جات وحلات داارو … ومنين جااوها السوارت …
نطقات الأم خديجة : وليدي شكووون هااد البنت …؟؟
الخالة نعيمة : وراااه هااادي ماااشي اي بنت …علااه ماكاتشووفيش اختي خديجة البنت عندها المفاتيح د فيلا …
هاجر كاتطلع فيها وتهبط وتخنزر …
فاروق مشا قرب ليها ويله بغا يسولها شكوون هي وهي تقفز مريم وقاالت : احم سمحلي اخويا ايلا قاطعتكم ولكن انا راااه سيفطني عمران حيت ….
فاروق غير سمع ديك سيفطني عمران وهو يقاطعها ماخلاهاش تكمل كلامها وقال : زيييدي زيدي جيتي فوقتك …
مريم : جيت فوقتي ؟؟؟ كيفاش؟؟؟
فاروق شابك يديه مع يديها وجرها وهي مصدوومة ماافاهمة واالو …وقف قداامهم وقاال : الواليدة كانقدم لييك مرااتي …
الأم خديجة مصدوومة وغا كاتشووف ….
الخالة نعيمة : هيييييء اويلي …
هاجر : لااا مستحيييل …
فاروق شاااد فيديها ومزير علييها ومقربهااا جيهتو امااا مريم فغااا حالة فمها مااافااهمة وااالو … كاااع دااك الكلام و ديك الهضرة دياالها تقااادات ليها …ماعرفاااتش علااش ولكن حساات بلساانها تربط وقلبها كايضرب فالتسعين …

❤ زوجة للإيجار ❤
✍كوثر الزهراوي✍
💥الجزء -22-💥
💫 عند عمران وهبة 💫
عمران راكع على رجليه وكايشووف فيها ومنتاااظر جواابها … هبة تصدمااات حطااات يديها على فمها بدهشة …
عمران : تقبلي تكوني رفيقتي وشريكتي فهاااد الحيااة …
هبة كاتحرك راااسها بالإيجاب ودموووع الفرحة هاابطين من عيونها …
عمران : هههه ايوا جاوبي خلاص رااه رجلي تكواانسات راني مامواالفش هااادشي ههه
هبة : ههه اه اه اه مواااافقة مواافقة ….
عنقااااتو ومدات ليه يديها ركب ليها الخاااتم …
عمران باسها فراااسها وقال كانبغيييك بزااااف …
هبة : حتى اناااا كانبغيييك بزاااف هههه اروع هدية اروع مفاجئة ❤❤❤
عمران : فرحاان حيت عجباتك الغزاالة ديالي ههه
هبة كاتشووف فالخاتم اللي فصبعها وكاتبسم …
هبة : ايييه ايوا فين هي ديك المشاغبة ههه ضحكات عليا وجابتني لهنا ههه
عمران عااد تفكر مريم : بفففف سيفطها للفيلا عند فاروق تجيب الخاتم غادي تكون تلفات وحماقت بالتقلاب عليه وهو هنا …
هبة : كيفااش ؟؟؟ اينا خااتم ؟؟
عمران : زيدي يله نمشيو عندهم وفالطريق نعاود ليك شنو وقع …
❌فالدار عند مريم❌
واقفة ليلى فالكوزينة كاتنشف يديها خرجات لقات ولدها محمد أمين كايلعب وسط الداار …
ليلى : محمد أمين نووض سير عند جداتك زهرة رااها فالسطاح …سير لعب حدااها خليني بااغا نسيق …
محمد أمين : واااخ ماماتي …عمتي مريم بااقي ماغادي تجي …؟؟
ليلى : دب تجي وتلعب معااك يله سير طلع …(سمعااات دقان فالباب)
ليلى : شكوون ؟؟؟
سمعات صوت بااكي جااوب وقال : انا ا ختي ليلى ..
حلات وهي تلقا ابتسام هازة بنتها سارة وكاتبكي …
ليلى : ابتسااااام …ختي مااالك ياااك لاباس …(قشعات صاك فيه حوايجها محطوط عند الباب وهي تشهق …)
ابتسااام : خرجني من الداااار اختي اهئ اهئ …مالقيييت فين نمشي وقصدتكم نتوما الدااار الكبيرة اهئ اهئ اهئ ….

❤ زوجة للإيجار ❤
✍كوثر الزهراوي✍
💥الجزء -23-💥
❌#عند_فاروق❌
بعد ماقال دااك الكلام …سكت وبقااا مقابل الأم ديالو بغاا يشووف ردة فعلها …
الخالة نعيمة بغاات تااكل رااسها ومابغااتش تيق هااادشي شافت فختها خديجة وقالت : اويلي يااا ختي خديجة نتي كاااتشووفي فهاااد المنكر وساااكتة ماابااغة تقوولي حتى شي حااجة …اويلي على ولدك مزوج …
هاجر مصدوومة : ههه لا لا ولد خالتي فاروق غير كايضحك معاااكوم واقيلا ههه لا هااادشي مستحيل …
فاروق : ماكاين لا ضحك لا وااالو انا مزوج وهادي مراتي …
الأم خديجة شافت فيه وقالت : خسااارة فيك ومشات طلعات للفوق …
فاروق : الواليدة اجي نفهمك …
الأم خديجة عطاتو بالضهر وطلعات للفوق …
فاروق : بففف
الخالة نعيمة :فهمنا حنا هاادشي …
فاروق : خالتي رااني محتاارمك …شدي فمك هااد سااعة رااه ماعاندي خاطر …
مريم هنا بحال الى صرفقتيها …تنترااات منو وقالت : واااش جهلتي ولا شنووو ؟؟ كيفاااش مرااتي …
هاجر : هيييييء شوفي اماما على اسلووب كاتدوي بيه معااه …
فاروق كايشووف فيها تسيفاات غمزها بااش تسكت واالو هي عاااد ماازايدة فييه …
مريم : لااش كاتغمز فيا شنو بيني وبينك …
فاروق خافها تفضحو قداامهم وهو يجرها …
فاروق : اجي ا حبيبة اجي نمشيو للبيت …
مريم : اويلي فييين جاارني …فين غااادي بيا هادا ا عيباد الله …اشمن بييت ؟؟؟
الخالة نعيمة كاتشووف فيهم وتقول : ويلي على منكر وعلى فضييحة …
فاروق خدا مريم لبيت دخلها وسد …
مريم : اويلي نتا شنووو كاتدير ؟؟
فاروق : بففف على ماركة عمران مالقا غا وحدة فحالك يسيفطها ليا …
مريم كاتشوف فراسها وفحوايجها : اويلي على وحدة فحااالي …واااش من نيتك ابنااادم …
فاروق : اييه لزمي حدودك ودوي مقااادة …
مريم : وعلااش اندوي مقاادة معاااك هممم شكوون نتااا بالسلامة ؟؟؟ شكون ؟؟؟
فاروق : انا هو اللي مستأجرك باش تلعبي معاايا الدور …
مريم : مستأجرني …انا … واااش طاايح على رااسك ولا الشمس دوخااتك ..ولا شاارب شي حاجة …حيد باالاك تفووو حيد باالااك عليا بييت نمشي فحااالي …
فاروق : كيفاااش بيتي تمشي فحااالك …راااك ا لالة مراتي دب قدااامهم …
مريم : مراتك ..لاواه مرارتك …حيد بالاك …

❤ زوجة للإيجار ❤
✍كوثر الزهراوي✍
💥الجزء -24-💥
فاروق : كيفاااش بيتي تمشي فحااالك …راااك ا لالة مراتي دب قدااامهم …
مريم : مراتك ..لاواه مرارتك …حيد بالاك …
فاروق : اش هااد الألفاظ …كيفاش مرارتك …
مريم : اوو ماعرفتيش المررارة مسكين المررارة بحال الطيحال بحال الكلوة عضو من جسم الإنسان ونزيدك هاد المررارة كايحيدوها النااس بزاااف حيت كاتكون زاايدة نااقصة بحااالك كنس ناااقص …حيد حيد نمشي نقلب على الخاتم ونغبر كمارتي من هنا حيد …
💥#عند_عمراان💥
وصل هو وهبة لقدام الفيلا ودخلو كايتجاارااو …وصلو الباب وبداا عمراان كايدق …
هبة : ياااك كاتقول لي بلي عندك الضوبل ديال السوارت ؟؟ لاش كاتدق دب ؟؟
عمران : ورااه السوارت اللي عندي عطيتهم لصاحبتك …
شوي تفتح الباب …
هبة همسات فوذن عمران وقالت : شكون هااد ختنا …؟؟
عمران جاوبها وقال : بنت خالت فاروق …
هبة : ويلي عائلتو جااات …وصحيبتي فيينها …؟؟؟
عمران : اهلا هاجر …عمران لدااخل …
نطقات الخالة نعيمة : ايييه لداااخل مع هاااديك البنت ..اويلي ياا وليدي نتا صاااحبو وخليتيه يتزوج بلا خباار ميمتووو …حشووومة هااادشي حشووومة ….
عمران : يتزوج ؟؟؟؟
هاجر : ايييه علااه مااشي قال لينا بلي ديك البنت اللي زعرة مرااتو …
هبة : زعرة اويلي مريم هاادي …
الخالة نعيمة : هاااكاااوا و سميتها مريم من الفوق …
دخل عمران وهبة للفيلا حتى كاتباان ليهم مريم خاارجة معصبة …وفاروق من ورااها …
عمران : جري شدي صاحبتك نمشي نشووف انا العجل الآخر شمن موصيبة داار ….
مشات هبة كاتجري جراات مريم …
مريم : نتيي هناا هممم فين هو دااك خطيبك …داك الحبيب ديالك عمران سيفطني لهاد مرشيش …
هبة : اجي لهنا وسكتي ياااهاد البنت …
#عند_فاروق💥
فاروق : اش هاااد البنت جبتي هممم تقاداو البنات فهاد الدنيا مابانت ليك غا هااادي تجيبها تلعب معايا هااد اللعبة …
عمران : كيفااش كيفاااش …؟؟؟ راااه ماسيفط حتى شي حد ا صاحبي …
هنا عمران عاااود لفاروق كوولشي وبلي مريم جاات باش تقلب غا على خاتم حيت كان كايضن بلي نسااه هنا … شرح ليه وفسر ليه كوولشي …
عمران : فهمتي دب شنو وقع …ونتا غير شفتي البنت فالباب تلاحيتي عليها وقلتي ليهم هادي هي مراتي وماخليتيها حتى تشرح ليك شنو واااقع …
فاروق شد فراسو وقال : مشييت فيها … دب هووما شاافوها …كيفااش غادي ندير ؟؟؟
عمران : والبنت ماعرفتش وااش تبغي تلعب معااك هااد الدور ولا لا ؟؟
فاروق : موووصيبة هااادي …

❤ زوجة للإيجار ❤
✍كوثر الزهراوي✍
💥الجزء -25-💥
💫#عند_مريم💫
مريم : لااش كاتسكتي فيا من قبيل همم ؟؟ ونتي اصلا شنو كاتديري هنا ؟؟ ياك خليتك فالريسطو ؟؟؟
هبة : الخاتم اللي جيتي تقلبي عليه صدق عند عمران …ماقلبش مزيااان الجاكيط ديالو …
مريم كاتدوي وتعيب عمران : قلتها ليه وقال ليي راااه نسيتو فالدار وسيفطني لهنا …بففف شتي كون مانتي والله مانجي لهنا … شنو بعدا قبلتي بيه …؟؟؟
هبة : اااه قبلت ههه شوووفي خااتم شحاال زوين ( كاتوريها فيديها )
مريم : ايوا مزيان يله دب نمشيو فحالنا …زيدي …
هبة : اجي شرحي ليااا شنو وقع بعدا ؟؟
هنا دخل عليهم عمراان …
عمران : انا انشرح ليكم …
مريم : على سلامة الخطيب ديالنا …يااك قلتي لي دااار غادي تكوون خااوية ؟؟ كيفاش صدقات عاامرة ؟؟ وداااك الحمق ديال صاااحبك شااد لي فيدي وكايقول ليهم هااا مراتي ها الحبيبة ديالي ؟؟ واااش هارب من سبيطار الحماق اللي شافها كايردها مرتو ولا شنو ؟؟
عمران تنهد وعاااود لييهم البلاان من اللول حتااال اللخر …
هبة مصدوومة : نااري ا عمران ماضنيتش انك غاادي تاخد هضرتي على محمل الجد …
مريم : اذا الفكرة دياال زوجة للإيجار فكرة دياالك …موصيبة نتي وخلاص …
هبة : ورااه غا شفتها ف فيلم وصافي …مالي انا اللي اخترعتها …
عمران : انا وياه صباح دوينا فهاد الموضوع وقلت ليه بلي انضبر ليه شي وحدة تلعب معااه هاد الدور … فاش شاافك دااخلة ضن انني سيفطك على قبل هااد البلان …
هبة : ايوا ودب شنو ايوقع ؟؟؟
مريم : كيفاش شنو غادي يوقع …صافي سيد شرح لينا سوء الفهم اللي وقع ..صافي فهمنا …دب غادي نمشيو فحاالنا …
هبة : اويلي على غادي نمشيو فحااالنا … راااه دب مامات فاروق وخالتو وكوولشي ضانين انك نتي هي مرات فاروق …كيفاش اتمشي وتخلي الوضع هاكا …
مريم : وانا مااالي همم ؟؟ انا اللي قلت ليه يكذب على مو ؟؟؟
يتبع…..

Leave a comment