Skip links

 3,616 عدد مشاهداات

# الجديييييد
قصة قصيرة :

قصة مقتبسة من الواقع فيها عبرة لأي بنت و اي أم و اي مرأة ….. كاينة لي كتسمع زواج كيحساب ليها الدنيا زوينة و بلي غتعيش حياتها بحال المسلسلات حتى للأخير كيتصدمو صدمة العمر مزال مكيديرو فالطاجين ميتحرق كتمشي تحط ليهم فالفايس متزوجة يهديك الله اختي واش نتي مزال معاقلة تا على سورة لي خطبك و وصلتي لزواج ياد؟؟؟ هادشي غير شوية من لي غندوي عليه

# مقتطف من القصة :

مشات لكوزينة تدوز هادشي بجغمة د الماء و العريس دور راسو شافها مكايناش و هضر مع مو و لكن لسوء حظو و لحسن او لسوء حضها كانت رجعات و سمعات كلامهم لي تغرس فقلبها بحال لموس و كملات تصنات و هي مخبية مور الحيط

ايمن : الوليدة تهلاي فراسك ها هي عندك ديري بيها لي بغيتي

حفيظة بتاسمات برضى و زادو طلعو ليها الكرايد : اوا لواه اولدي بنت ناس و انديرها بحال بناتي

باس ليها راسها و تكلم : انا مكتهمنيش كتهميني غا نتي تبقا ليا غير ميمتي على خاطرها تقلقك ولا شي حاجة جمعي ليها حوايجها و سيفطيها لدارهم

حفيظة ضحكات بشر و بانت فعينيها شوفة الغدر : هههههه كون هاني اولدي انتهلا فيها

قصة : زواج الزربة
بقلم : فرح حدادي

قراءة ممتعة ا زوينات 😘 متنساوش دعمكم ليا بتعليقاتكم زوينين و ارائكم

🤵زواج الزربة 👰
ج:1
بقلم : فرح حدادي

الزواج كيما معروف عليه هو حياة جديدة بين شخصين كيتشاركو فيه الحلوة و المرة … كيما هو عمر جديد …و ولادة جديدة ….. الزواج ديال الدوام ماشي ديال فترة معينة ….و لكن شنو الى كان هاد الزواج مزروب ؟ و لا مبني على الطمع ؟؟

فدار كبيرة مجموعين ناس من مختلف الاعمار … ناس هاد العائلة لي كتستقبل مناسبة جديدة و هي عرس وحدة من بناتهم … كولشي مجموع و العيالات كيقادو فالحلاوي بشكال و الانواع حتى نقز احد افراد العائلة مخاطب العروسة لي هي بنت خالتو

رضى : مسمحت ليك ا بشرى الخائنة سمعتي برى و نسيتي العشرة

تكرشخات العائلة بالضحك و هوما عارفين مزاحهم المعتاد و بقاو شاديين فييه و هو كيقول ليهم انجيبها كاورية انا كااع اشبغيت المغربية و هااكا داز الوقت فتوجاد الحلاوي و التقشاب حتى تسمع صوت الهاتف بشرى لي كيصوني

رضى : ليعطينا معامن نهضرو تا حنا

بشرى : ههههه ليعطينا كمارتك خشي فوجهك و سكتنا

رضى : ههههه اودي هاد الحلوى قاصحة و محلواش بغينا الحلاوة

حادة ( ماين العروسة و هي كضحك ) : هههههه دبا نزوجوك غا سكتنا قتلتينا بالنكير

رضى : ههههه بغيت شلحة انا جيبو ليا غا شلحة و رجعو لور

نساحبات بشرى من قدامهم كتهضر مع خطيبها لي مكاملاش 15 يوم باش خطبها داز داكشي بزربة و الآن مبقا ليهم والو للعرس كتهضر معاه بحشمة مزال مزاعماش عليه اكيد مغتزعمش عليه و هي معرفاتو حتى خطبها الخطبة حتى هي مزروبة بحكم هو ساكن فبرا و خاصهم ضروري يكتبو باش يطلع ليها الوراق ….داكشي لي خلاهم يزربو واخا هي كانت رافضة هاد الزواج من الاول غير مها لي سمعات برا و قنعاتها حيث باغا توفر ليها مستقبل زوين و تهنى من جيهتها
بعد تلث ايام غتكون خطوبة كبيرة نيت و غتكتب كتابها و العرس لي بشطيح و الرديح قررو ميديروه حتى لصيف فاش يرجع العريس من برا هاد العريس لي كان كيبان ميحركش البيضة من بلاصتها و غا ساكت و لي يقولوها يحدر راسها و يقول واخا

داازت تلث يام و جا نهار الموعود لي كتبات فيه كتابها و تسمات على دمة رجل لي ولات محسوبة عليه

كانت بشرى مقادة مصاوبة بنت الشعر كحل و رطب حتى لطرمة و اليعيون كبار و كحلين عيبها الوحيد هو غلضها حيث كانت غليضة كثر من القياس و كدير النظارات لعيونها …كانت كتبان فأبهى حلة بتكشيطتها الصفراء و تاج العرايسات لي فوق راسها وصلات لقدام بابهم هي و عريسها أيمن و دخلو هي و ياه مشادين فيدين بعضهم و تسمعو الزغاريت و الصلاة و السلام حتى دخلو لبرزتهم و بدااو العائلة بشطيح و مع عائلتها شلوح حوريين مكاين غير ليعطيك الصحة دايرين احيدوس و هازين طعارج و طارات مكتلقايش شي حد كالس لارض كولشي محيح لا من الكبار لا من الصغار و هنا ناضت العروسة و العريس حتى هوما دارو حقهم
…… دازت الخطوبة الكبيرة فأمان الله كولشي ضاحك كولشي ناشط و مشا العريس و عائلتو لدارهم بحكم معتابرين العرس الحقيقي مزاال مدارش و الأم مزال مدارتش لبنتها كاع لي تشهات فخاطرها…. مزال مشداات لا دهازها لا صداقها لي قدام العدول قاليها ايمن تقول بلي خداتو حتى يمشي يخدم تاني و يعطيه ليها بحجة مبقاوش عندو دبا هاد الشئ لي تقبلاتو العروسة بحجة هاد الاخيرة ديال ” المرأة لي متصبرش مع راجلها ما مرة ما حتى حاجة ” دبا غتبقا فدار مها حتى للعرس الكبير عاد غتمشي لدار راجلها و لكن واش داكشي لي غيوقع نيت ؟؟

🤵زواج الزربة 👰
ج:2
بقلم : فرح حدادي

اصبحنا و اصبح الملك لله

الروينة صابحة فالدار و العروسة حيدات مكياجها و حوايجها و لابسة بيجامتها محزمة و مرزمة لشقا و معاونينها افراد عائلتها شي كيخمل شي كيسيف حتى جمعو البيوت و قادوهم رجعوهم كيف كانو و هاكا دااز عندهم نهار …. لي يمشي لدارو مشا و لي بغا يبقا يعاون بقا نهار كامل داز غير فتخمال حتى للعشية دقو الضياف بالباب لي غا مشات تفتحو بشرى لقات عريسها الحاجة لي خلات خدودها يحمارو بالحشمة و نطقات بسلام مبتاسمة …. كان جااي غير هو و مو … لي تحنات بشرى باستها من يديها و دخلو

حفيظة ( ام العريس ) لي كانت كتشوف فيها غا من تحت عينيها مع ابتسامتها الصفرة : ليرضي عليك ا بنتي

دخلو و كيف من عادة عائلة بشرى اكرام الضيف و هادشي لي دارو مخلاو محطو تجمعو على كاس د اتاب و حديث يجبد حديث و العريس غا ساكت و كيسمع قليل فين كيهضر حتى دوا مع نسيبتو جابد الموضوع علاش جاي

تحنى باس ليها يديها و تكلم : يااودي كيف كتعرفي دبا نتي وليتي ميمتي داكشي باش تنا غنجيك لصراحة و غنطلب منك واحد الطلب و لكن مديريهاش مني قلة الصواب

حادة هنا دخل معاها زايد و راسها ضرها زعما شنو يكون باغي يقول ليها ؟؟

حادة : الله اولدي مرحبا قول متحشمش الى قديت عليها مرحبا

ايمن : كيف كتعرفي ا خالتي دبا بشرى مراتي على سنة الله و رسوله

حادة : اييه اولدي صلى الله عليه و سلم

ايمن : و انا بقات ليا 20 يوم و نرجع لميريكان و بغيت نطلب منك واش يمكن تمشي معايا بشرى لدارنا حتى نبغي نمشي و نردها ليك تكلس معايا فهاد المدة

سكتات حادة لمدة و من بعد تكلمات : اودي اشغنقوليك هي دبا ولات مرات بالحق و بالقانون و ليني الحاصول خليني حتى نتشاور مع باها يجي لعشية و نرد عليه

هنا بااس ليها ايمن راسها : لهلا يخطيك عليا ا ميمتي صافي غنتسنا جوابك

توادعو باش يمشيو بحالهم و ايمن فاش بغا يسلم عليها سلم عليها من وجهها و طبق قبلة فخدها الحاجة لي خلات وجهها يولي كي ماطيشة حشمات بزااف و بالخصوص هادشي جديد عليها دخلات لبيتها و حسات بقلبها غيسكتو بالخصوص فاش كتفكر شنو لي تابعها

🤵زواج الزربة 👰
ج:3
بقلم : فرح حدادي

تشاورات المرة مع راجلها و وافق على طلبهم بحكم دبا ولات مراتو و عتابر من حقو يبغي يجلس مع مرتو

الغد ليه جمعات بشرى حوايجها كتسنى فعريسها يجي …لابسة جلابتها البيضة و بلغتها لي كتبين حنة رجليها من الجناب

جاو سلم عليهم و تغداو عندهم و مشاو متوجهين لدارهم لي مجموعة فيها العائلة عدوزتها و تلاثة لوايساتها وحدة مزوجة لصحراء بولادها و غترجع لدارها و زوجات ساكنين مع مهم وحدة صغيرة و وحدة مزال مصخرش ليها الله فزواج عاد العدوز

داز نهار عادي عند بشرى لي كانت غير مجمعة فيه عند العائلة و هي لي دارت ليهم العشا و لكن الحاجة لي صدماتها هي عدوزتها

حفيظة : اوا ابنتي كترتي لحم مالك على هادشي كامل فطاجين ؟؟

بقات كتشوف بصدمة هادشي غير هي عند بالها مكتراتش و لكن دغيا نقدات الموقف

بشرى : غير سمحي ليا ا خالتي غير مزال معرفتش القياس لي كديرو

حفيظة : اوا خصكي تعرفي

كان حتى واحد متكلم ولا دوا كياكاو عادي و ساكتين و حتى واحد مدافع عليها معطااتش للأمر اهمية هي الاخرى و بدات كتاكل عادي حتى سلاو و جات وقيت النعاس و هنا دخلات فبشرى الخلعة ديال المعقول …. ليلة لي كانت مخلوعة منها شحال هادي ها هي جات

دخلات لدوش و العدوزة حاضياه من البيت شنو كدير غا بنص عين و كتحدث مع بناتها

حفيظة مخاطبة بنتها الصغيرة : جري شوفي شنو كدير فالدوش

مشات بنتها و رجعات كتجري

سلمى : راه بغات تعوم

حفيظة تنهدات باستهزاء : اممه تعوم من دبا مالها اشدارت بسلامة حتى من ولدي مزال مدخل لعندها

نغزاتها سهام بنتها المتوسطة : سكتي سكتي دبا تسمعك

دخل أيمن على مراتو للبيت ضاحك ناشط مااشط … علاش لا و هو ليوم اياكل الحلوى و ياخد دااكشي لي بغاا ….دخلها فلول بالكلام زوين و الحلو حتى دوبها و بداا فالتهامها بادي من فمها حتى لتحتها و خروج دم خلاه يرضى بافعالو و ليني لي كان داعقو هو تزيارها لقاها مزيرة كثر من القياس معارفش بلي عندها البكرة مطاطية و هاكا دازت ليلة دخلتهم مع بعضهم

و هاكا داازت كل ليلة من لياليهم الخمس الأولى لي ايمن مكيخلي ليها حتى فين تستاراح فيهم كل ليلة خدام ممراعيش ليها و لكن الحاجة لي شوشاتو كل ليلة فهاد الأيام كيخرج ليها فيها الدم و هادشي دعقو و خلاه يفكر يمشي معاها لطبيبة تشوف شنو السبب

🤵زواج الزربة 👰
ج:4
بقلم : فرح حدادي

مشااو لعند الطبيبة و هنا خبراتهم بلي نوع بكرتها مطاطية و بلي دااكشي عادي هاد نوع د البكرة شي مرات كتبقى حتى لشهر عاد كتحيد بشكل كلي ….

رجعو لدار و هاكا دازت باقي ايامهم …. الحاجة لي دعقاات بشرى فيهم هو اكلهم لي هي ممولفاش بيه …. يفطرو بالخبز و الزيت … يتغداو بالخبز و الزيت …يتعشاو بالخبز و الزيت ….و قليل الى داارت شي حاجة كتبغي بشرى تنوض دير شي حاجة و مكتخليهاش العدوزة و غير حاضيااها

طلع لبشرى هادشي فراسها فقالت تنوع شوية

بشرى : خاالتي هانا غنوض ندير المسمن

حفيظة هنا خنزرات فيها تخنزيرة وحدة حتى ديك الضحكة الصفراء لي كانت كدير مبقاتش فوجهها : حنا مكناكلوش المسمن

وسعات فيها بشرى عيونها كتكدب عليها فوجهها بعدا فااش كانو كيجيو ضياف لعندهم لدار و كيديروه ليهم كيدخلو فيه طول و عرض سكتات مجاوباتهاش

نهار اخر لبسات جلابتها و لوات عليها زيفها حيث قاليها ايمن يخرجها للقصارية يشري ليها شي كسوة فرحات حيث اول مرة اتخرج معاه

غاديين فطريق و هي مقاداها فرحة علاش لا و هي زمانها فجنبها اي وحدة كتحلم براجل جنبها و ها هي لقاتو مشااو للقصارية و هي خير تشوف بعينيها و هو حداها قليل فين يهضرو ولا يتكلمو حتى دخلو لواحد من المحلات و بشرى مع الغلض لي فيها حاجة مجات قدها و لي قيصاتها تجيها صغيرة و لعريس غير يشوف و شوفة ناقصة فعيونو …خرجو من المحل من بعد فاش ملقاو والو و هو يهضر و با ريتو سكت كلامو بحال سهم تخشاا فيها و هو كيعيب فيها عين باين بلا حشمة بلا حيا

أيمن : خاصكي ترقاقي هاد الغلض لي فيك راه ممسلكش

سكتات و سكتات و الهضرة فحلقها وحلات متلات جاوبات لا بإييه لا بلا و قلبات عليه وجهها حتى كملها و جملها مكفاهش هاادشي زااد فتعياابو ليها

ايمن : حتى نضرات غا نرجع من المانيا ندير ليك العدسات

وصلو لدارهم و كيف العادة قهروها هاد الناس غير بجوع و المشكل كولشي كاين و الخضرا غير كتخسر كيرميوها غير فثلاجة

ناضت تجمرات على درعانها و نصبات طاجين هاد الاخيرة لي ولا غا هو باش كتعتق راسها الى داروه فالغداء ميديروش فالعشا و الى داروه فالعشا ميديروش الغداء اما الاكلتين الأخرين غا الخبز و الزيت

زواج الزربة 👰
ج:5
بقلم : فرح حدادي

بشرى فكعانة على الهضرة لي سمعات من راجلها و ليني اشغدير هادشي لي قسم عليها الله ها هي كدوزو دخلو لبيتهم مهضرااتو مكلماتو و ليني الكلب فاش يلغي حااجتو كيقول هااو و هاادشي لي دار ايمن لي بدا كيقرب منها و يحاول ينسيها بكلامو

ايمن : مبقا ليا واالو و غنرجع لألمانيا

حط يديو على كتفها جارها لعندو و بتاسم فوجهها

ايمن : مغتوحشينيش ا زين ؟؟

دارت ليه ابتسامة من فوق القلب و هو جرهاا لعندو معنقها و باسها ففمها باش يتبع لهادشي قبلات ممتالية خاضتهم لشيء لي كان كيوجد ليه ….واخا مكانتش باغا و هضرتو جارحاها و لكن كيبقى راجلها و دنوبو فوق رقبتها الى بغا حقو و معطاتوش ليه واخا هي مباغاش و هضورو جارحينها و مزقين قلبها

دازو هاد الايام و اليوم نهار لي غيمشي فيه ايمن بحالو جمعات ليه حوايجو و كولشي ستفاتو ليه و دارو فطنوبيل سلم عليها مودها و مخلي ليها فجيبها 12 الف … 12 الف و غيخليها و لكن حرام واش تشكات ولا قالت زيدني حيث بنت الخير قانعة حيث بنت باها الكريم جاوها كافيين و مشييطين و لكن لي متسرطاتش ليها هي فاش سلم على مو و هي كتبكي عليه و جبد من جيبو 2 د المليون زرقة كتنطح لخرى و تكلم مع مو

ايمن : هاك ا مي هاد البركة واخا قليلة فحقك لي خصاتك شريها واها غير زوج د المليون مكاين مدير ليك

وسعات عيونها بصدمة على كلامو الأخير واش هدا لي قاليها مزير ؟؟؟ واش هدا لي فلوس صداقها معاطيهومش ليها

مشات لكوزينة تدوز هادشي بجغمة د الماء و العريس دور راسو شافها مكايناش و هضر مع مو و لكن لسوء حظو و لحسن او لسوء حضها كانت رجعات و سمعات كلامهم لي تغرس فقلبها بحال لموس و كملات تصنات و هي مخبية مور الحيط

ايمن : الوليدة تهلاي فراسك ها هي عندك ديري بيها لي بغيتي

حفيظة بتاسمات برضى و زادو طلعو ليها الكرايد : اوا لواه اولدي بنت ناس و انديرها بحال بناتي

باس ليها راسها و تكلم : انا مكتهمنيش كتهميني غا نتي تبقا ليا غير ميمتي على خاطرها تقلقك ولا شي حاجة جمعي ليها حوايجها و سيفطيها لدارهم

حفيظة ضحكات بشر و بانت فعينيها شوفة الغدر : هههههه كون هاني اولدي انتهلا فيها

زواج الزربة 👰
ج:6
بقلم : فرح حدادي

شنو غتسبق و شنو غتوخر شنو غتقول ؟؟ و شنو غدير ؟؟ لا بل شنو غدير اي وحدة كانت فبلاصتها ؟؟ واش تجمع دبا حوايجها و تمشي لدارهم ولا كي غدير تصرف ……بقات كتجري لبيتها و دموعها شلال كتبكي و تنذب على زهرها العوج و الزواج لي مربحات منو حتى فايدة …….و الزوج لي تبزز عليها من طرف مها و قالت ماشي مشكيل نقدر نرتاح و نتهنا و بعدا ياك قاليها غير ايبغي يمشي لبرا غيرجعها لدارهم حتى يخرجو ليها الوراق علاش مها مبغاتهاش ترجع لعندها ؟

ليل كامل مشافتش النعاس ولا غمضات عينيها بقات غير مصدومة معرفة مدير عقلها تبلوكا

6 د صباح ناضت من بلاصتها غسلات وجهها و حاولات تصرف عادي حتى الى رجعات لدارهم شنو غيقولو عليها الناس ؟؟ و شنو غيقولو على عائلتها و المطلقة فمجتمعنا كتعامل بحالها بحال شي سطل مثقوب غير صالح للاستعمال

رجعات لبيتها غير جالسة و بعد نص ساعة تفتح عليها الباب بجهد

حفيظة : واش هادي هي العروسة نتي بسلامة اتبقاي لينا غا ناعسة ولا شنو نوضي ديري شي شغل الى عندك

بقات بنفس وضعيتها كتشوف فنقطة وحدة الحاجة لي خلات حفيظة تعقد غوباشتها

حفيظة : اوا ليستر حتى منلقاش الفطور واجد و ديك ساعة نتفاهمو

مجاوباتهاش تاني و لكن ناضت من مكانها توجد لي تطلب منها فهدوء تام بينما حفيظة صونات على ولدها لي كان يالاه غادي للخدمة

حفيظة : الو ولدي ديك المرة عندك مشيرة ولا ماعرت مالها يا ولدي خطية خطية و نزلات علينا كون ديتي غا بنت الخياطة بعدا

🤵زواج الزربة 👰
ج: 7
بقلم : فرح حدادي

يوم بعد يوم و المعاناة كيتزادو و يتزاد معاهم النقير الضغط و الستريس من داك اليوم و هي على هاد الحال حتى من مها حرمات عليها زيارتها قايلة ليها بصريح العبارة ” فاش تزوجتي بحالا متي عائلتك تزوريهم غير فالعزو اما باش تمشي غير هكاك ممنوع ” و المشكل مكانت مكافية حتى مع العدوزة تزادوها لوايسات بزوج و لي فالصحراء لي كانت تبان ليها ضريفة و ليعمر ليها الدار خرج منها العجب ليوم بالصدفة خلات هاتفها محطوط و دخلات تعوم بان ليها صوت الميساج و هزات الهاتف حتى كيبان ليها من عند أيمن و دخلات سمعات للأوديو الأخير لي خلاها توسع عيونها

أيمن : صافي غير شوفو كيديرو ليها ترجعوها لدارهم طلعات ليا فراسي بنت الخياطة راه باقا كتسيفط ليا لدابا فاش نرجع غنتزوج بيها

صدمة مور صدمة خلات قلبها يضرب بقوة و دموعها يزيدو ينزلو على خدودها كيف الشلال و هي كتسمع الهضور لي كيتقالو عليها لواه معفونة مكدوشش ياااك هي شحال من مرة كتبغي دوش و دور فيها عدوزتها …لواه مكتعرفش طيب ….ياك هي لي مكتخليهاش طيب ….لواه عورة ….. غليضة

المهم مخلاوش فيها غير لي نسااو فالمعياار و الكدوب و هنا صافي غدير سطوب اصلا علاش هي صابرة ؟؟ وااش الراجل لي عاطيها وجه و من مور ضهرها حوايج اخرى ….ولا العدوزة لي مكتخلي ما تحط ليها ….ولا يااكما على زين ماكلتهم ولا على التهلية لي مهلين فيها و هوما حتى الماكلة كيخليوها بالجوع و حتى الى بغات دير شي حاجة يوقفو عليها كي الحلاقم لواه كضيعي و كضيعي

سيفطات لراسها دوك ليزوديو و عاودات سيفطاتهم لمها لي شبعات بكا و كتقول ليها جمعي حوايجك و اجي و تطلب منها السماح و ليني تاني خافت تخرج و يلسقو فيها الفساد ولا شي حاجة اخرى حيث كولشي توقعو من هاد القوم

زواج الزربة 👰
ج: 8
بقلم : فرح حدادي

و حتى الى حصلوها بغات تخرج يتحاماو عليهم و هوما كل وحدة قدااش و هي غير بوحدها ….فالأخير تافقات مع مها غتهضر مع العدوزو تقول ليه بلي غير بغات تشوفها حيث هو لي كيبان فيه شوية الضوء واخا حتى هو بخبيزتو تحدثات معاه و قالت ليه واالو نشوف بنتي و حتى هو بحالا حس و لكن حيث عارف الحلاقم لي عندو فالدار قال اللهم يوصلها ولا يبقاو حتى يوقع شي مشكيل

كان يالاه كيهضر مع مرتو بلي غيديها تشوف مو يالاه بداات فالنقير و خو يحمر فيها حتى دخلها سوق جواها اما بشرى غير قاليها اتمشي تشوفي فرحات و مقداتها فرحة

هزات ساكها الصغير دارت فيه غير واحد القفطان مها لي خيطاتو ليها بالثمان خافت لتهز حوايجها لي اصلا كولهم تقريبا مها لي دارتهم ليها و تعيق بيها لفعة لي ساكنة معاها خطاتو ببيجامة و ةلبسات جلابتها و هنا حفيظة دخلات عليها لبيتها كدخل لبيتها بحال لكوري وقتما بغات بلا استأذان

حفيظة و عيونها خارجين ناوية على خزيت : فين غادية بداك الساك ؟ و شنو دايرة فيه ؟

بشرى : شنو بغيت ندير فيه غير بيجامتي لي غنبدل بيها

جا وقف حتى لعدوز قدام لباب و غوت عليهم

العدوز : يالاه واش غنبقااو هنا ؟؟

دغيا ستغلات الفرصة هزات سااكها و خرجات ركبات معاه فطنوبيلتو

حفيظة : قلة الترابي قولي بعدا غير بسلامة قبل متمشي واخا مناقصني بسلامك الماء و الشطابة طالقة على البحر

بعد مدة زمنية وقف عبد الهادي قدام دارهم يالاه خرجات ناطقة بسلامة ا عمي الشخص الوحيد لي عمرو وصلها فديك الدار حتى قاطعها بكلامو

عبد الهادي: خفتك ا بشرى غا لا تمشي و مترجعيش

سكتات و حنات راسها : دخل تغدا بعدا ؟

عبد الهادي : لا شكرا خاصني نمشي

و تحرك من تما مع تسمع السرسار مع قفزات حادة من بلاصتها لي منين و هي تبكي غير تلاقاو عيونهم عطاوها لبكا مع بعضهم و هوما معانقين

🤵زواج الزربة 👰
ج: 9
بقلم : فرح حدادي

بعد ساعات و ساعات فيهم بشرى خوات كاع لي فقلبها عاد حسات بالراحة و حسات براسها مزيان و هنا هضرة كتجبد هضرها

بشرى : علاش امي مبغيتينيش نرجع عندك فاش مشاا هو بحالو ؟؟

حادة : هاويلي انا ؟؟ انا لي قال ليا داك ولد الحرام بلي نتي لي بغيتي تكلسي مع عدايزك

بشرى : و حتى انا قاليا بلي قالت ليك موك غير كلسي مع عدايزك بلاما ترجعي

حادة : اوا شووف لييك ولد الحرام ليشد فييهم الحق واحد فديك الدار انا بغيت ذنوبك يخرجو فيهم

حطات ليها حادة الدجاج محمر لي كانت وجداتو على قبلها حيث قالت ليها بلي قتلوها غير بالجوع فديك الدار و دخلات فطبسيل تقول عمرها شافت نعمة و نيت عمرها شافتها معاهم كلات بخاطرها مكابن لي ينغزها و يقوليها بركة عليك د الخبز باش ترقاقي ولا لي يقول ليها شربي غير جغمة د الماء متكتريهش لدرجة شي مرات كانت كتشرب فطواليط فاش يضرها لعطش

شبعات و بداات كتفكر معاناتها محسات غير بدموعها كيخرجو مرة اخرى و شهقاتها ايضا

بشرى : هئ هئ هئ ضلموني ضلموني ا مي

حطات راسها فحجر مها لي كتبكي حتى هي و بدات كدوز فيديها على شعرها

حادة : انا غير فاش رجعوك ليا حمدت الله و شكرتو

هنا سيفطات ليه كاع ليزوديو دياولو هو و ختو

بشرى : ليعاونك اولد الناس براتي توصلني تال الدار مبغيت منك والو بغيت غير طلاقي

🤵زواج الزربة 👰
ج: 10
بقلم : فرح حدادي

و شكون قال الوقت مكيداويش و شكون قال جرح مكيبراش ؟؟ واخا كيبقا أثارو ….

بعد مرور عام …. بشرى ليوم ولات رسميا من النساء المطلقات فمجتمعنا …. هاد العام لي داز كانت رجعات فيه بشرى لقرايتها تكملها ….كان زواجها و طلاقها درس بالنسبة ليها و لي هو عمرهاا تزرب فشي حاجة كيما كانت و متخطي الخطوة حتى تعرف فين حطاتها …فهاد الوقت بالضبط لقات عائلتها واقفة معاها و مساعداها و بالخصوص ولد خالتها غير كتحتاج شي حاجة فوراق دراستها و فديال طلاق كيقضيها ليها …واقف معاها الوقفة ديال الرجال

كاانت كيف عادتها خارجة من قرايتها حتى شافت اتصالو و جاوبات و هي مبتاسمة

بشرى : ا فين ا رضى

رضى : هههه ا فين ا زوينة ؟

بشرى : انا يلاه خرجت من لافاك

رضى : انا قريب لتما تسناي نجي وصلك

بشرى : بلاما …

مجات فين تكمل كلامها حتى سمعات الكلاكصون د السيارة دورات وجهها لقاتو فاتح زاج و كيضحك و الكيت بلوتوت بودنيه

قطعات الخط و طلعات معاه من بعدما سلمات عليه بيديها

رضى : ندوزو لشي كافي بعدا ؟؟!! بغيت نهضر معاك

بشرى : و لكن وقت الغدا هدا ؟

رضى : اذن نتغداو برا انا انعلم خالتي

بشرى : و علاش منتغداوش فالدار يالاه معايا نتا ؟

رضى دوا بجدية : بغييت نهضر معاك راس فراس

بلعات ريقها من كلامو و عقلها غرق فتساؤلات شنو غيكون بغا يقول ليها ؟؟ وافقات على كلامو كتقنع راسها بلي ولد خالتها و مدام قاليها هكاك الى و الموضوع مهم بالنسبة ليه

قضاو طريقهم فالحديث و الكلام حتى وقفو قدام ريسطو راقي غير شوفة فيه خلات بشرى توسع عيونها
و دارت عندو بتساؤل

بشرى : واش متأكد باغينا نتغداو هنا باين عندهم داكشي غالي

رضى ضحك على كلامها : هههه مافيها باس بنادم يتهلا فراسو مرة مرة

جلسو تماك خدااو شنو يااكلو و تغداو فجو لا يخلو من الضحك و التقشاب الريسطو كان جا حدا البحر

بشرى هنا حنحنات و نطقات : احم …فاش بغيتيني ؟؟

رضى : نمشيو نجلسو حدا البحر بعدا و نهضرو فراحتنا ؟؟

بشرى : اهااه !! مرحبا

🤵زواج الزربة 👰
ج: 11
بقلم : فرح حدادي

داكشي لي دارو نيت الجو د البحر كيضرب فوجوههم و هوما متأملينو حتى حنحن رضى قبل ميبدا كلامو و دوا مزير على يديه من الغيرة

رضى : احم سمعت بلي تخطبتي ولبارح ؟؟

بشرى : اه و لكن مقبلتش …عارف لي داز عليا ماشي ساهل و صعيب نعاود نرتابط مرة أخرى

رضى هنا شد ليها فيديها صادمها بحركتو الحاجة لي خلاتها بعدات يديها و الخجل كسا وجهها المطيبز

رضى : شوفي ا بشرى مبغيتش نعاود الغلط زوج د المرات

وسعات عيونو كتسمع لكلامو حتى كمل و صدمها

رضى : صراحة انا كنت حاط عليك العين قبل متزوجس منين كنا صغار و عمرني زعمت نقولها ليك

وسعات عيونها من أعترافو و تلبكات معرفاتش شنو تقول

رضى : فالأول فاش سمعتك قبلتي تزوجي متقبلتهاش كنت باغي نجي نصارحك و لكن راكي عارفة ديك ساعة مكنتش موظف رسمي كنت يالاه كندوز السطاج الحاجة لي خلاتني نتراجع ….نهار سمعتك غطلقي قدماا كنت معصب من شنو دوزو عليك قدما كنت فرحان حيث حسيت بلي باقي عندي أمل نتجمع انا وياك ….. و من بعد قلت تاني بلي خاصك وقت و لكن فاش سمعت جاوك الخطاب مبغيتش نعاود الغلط لي درت

دوز يديه على راسو و نطق و هو كيسرط ريقو بالاعتراف لي خازنو فداخلو سنين

رضى : شوفي ا بشرى انا كنبغيك و بغيت نتزوج بيك و معنديش مشكل تكملي قرايتك مغنمنعكش منها الى قبلتي بيا و انشاء الله ميخصك حتى خير

وسعات عيونها من اعترافو و حسات بقلبها كيضرب و هي كتلعن فيه فدماغها فين كان باعترافو شحال هدا ؟؟ و هي لي كانت كتبغيه حتى هي و لكن القاعدة كتقول ” لا يجوز انتظار شخص لم يطلب منك ذلك ”

فنفس الوقت كان عقلها كيسرد ليها احداث تجربتها الأولى لي عاشتها الحاجة لي خلاتها تردد تجاوبو يالاه نطقات أنا …… حبسها بيديه

رضى : مبغيتش نسمع جوابك فكري عاد جاوبيني

بشرى : خاصني الوقت

رضى : و انا غنتسنااك

بعد نهاية حديثهم توجهات لدارهم مها و خالتها كاانو عارفين شنو كاين و لقات عندهم خالتها نيت فالدار بعدما سلمات عليهم و جلسات بقاو كيتغامزو عليها بيناتهم و يضحكو حيث قبل ميدوي معاها رضى دوا مع عائلتها أولا

بعدما توجهات لبيتها خالتها ” سليمة ” كتنغز فختها

سليمة : سيري سيري تبعيها

🤵زواج الزربة 👰
ج: 12 و الأخير
بقلم : فرح حدادي

حادة دخلات لعندها كتضحك فوجهها

حادة : ههههه هانتي شنو درتي ؟؟؟

وسعات بشرى عيونها : فرااسك !!!!

حادة : ههههه من شحاال هادي

بشرى هنا لتازمات الصمت فقط حتى قاطعاتها مها

حادة : شوفي ا بنتي كان ناس كتمر من تجارب فحياتها يمكن تكون زوينة يمكن تكون خايبة و فالأخير كيبقاو بزوج زوينين حيث كنستافدو منهم …و لكن مخصناش نخليو نقطة سوداء تحبس عندها حياتنا و البشر طوب و حجر كل واحد كيف داير كاين زوين كاين الخايب ….فكري فهضرتي مزيان حنا فالزواج لول زربنا و كنت انا من الاسباب لي خلاتك توافقي عليه و لكن دبا انخليك نتي تقرري شنو بغيتي فكري و خودي وقتك عاد تجاوبي و رضى حنا كنعرفوه مزيان ولد الناس و مغيخصرش ليك

حركات ليها بشرى راسها فالإيجاب : يكون خير ا مي

حادة ببشارة زوينة على وجهها : ليرضي عليك ا بنتي

دازت سيمانة …فهاد الوقت بشرى فكرات و عاودات فكرات عارفة بلي الحياة مكتوقفش عند واحد و مدام باغية من خاطرها علاش غترفض عطات موافقتها لرضى هااد الأخير لي بغا يطير بالفرحة و مزربوش هاد المرة خداو وقتهم فكولشي فتوجاد و رضى مخصرش ليها غير كيبجد من جيبو و تا حاجة منقصاتها …عوضها على زواجها الأول و كاع لي تشهات خاطرها و لي كيكون فالعراس داروه …. تزوجات بيه و كان ليها نعم الزوج و كانت ليه نعم الزوجة و معاه حسات بمعنى الفراش ماشي بحال راجلها الأول لي كان غير مدرم و على دكر هاد الأخير ربي خرج فيه دنوبها كاينين ناس كيوكلو موحامي باش ياخدو حقهم و هي وكلاتهم لله و خرجات فيهم دعوتها كان مع عائلو فالسيارة غادي بيهم يحوصو و دارو كسيدة مو مشات لدار الحق و هو تشلل من رجليه و المرة لي عول توقف معاه غا شافتو تشلل مشات و خلاتو و هادي دعوة المظلوم لي ربي مكيخيبوش….

بعد مرور تلاث سنوات على زواجهم

كل وااحد كيف جاه زواج …كاين لي جاه بالغلض و كاين لي بالرق و هادشي لي وقع لبشرى بعد زواجها وولادتها و بفعل الرضاعة فورمتها تقادات و ولات رقاقت مبقاش غلضها كيف كان حيث الرضاعة هلكاتها ..حاجة وحدة لي بقات هي هي هوما حنيكاتها المطيبزين …زادتزيانت و الدنيا تقادات ليها و كيما كيقولو بعد الشتاء كيجي الربيع و ها هي الآن كدوز فربيع حياتها
بشرى دوزات الإمتحان د الأساتذة و كتسنااهم يصونيو عليها كل مرة كتفقد هاتفها الخوف … الخلعة و …التوثر حتى سمعات صوت الميساج دغيا فتحات هاتفها حتى رخات جسمها بخيبة أمل كان الميساج من زوجها ماشي داكشي لي توقعات

رضى : توحشتك ا حبيبو

يالاه بغاات تجاوبو حتى وصلها إيمايل دخلات ليه الحاجة لي خلاتها تغوت بفرحة

بشرى : واااااااااااااع

ولدها لي كان فعامو الأول قفز من نعاس فاق كيغوت و مشات كتسكت فيه و دوزات الخط لراجلها لي دغيا جاوبها

بشرى : وااا كنحمااااق عليك معرفتش شنو درت فحياتي حتى عطاني الله راجل غزاال فحاالك

رضى : ههههه بلاتي بلاتي بشوية على قلبي … شنو سباب هاد الفرحة

بشرى : تقبلت فالكونكور د الأساتذة

رضى هنا بدا كيضحك حتى هو فرحان ليها : ههههه مبروك عليك فرحت ليك خااصنا شي زردة دايزها الكلام على هاد الحساب

بشرى : هههه هي نوجد ولدي العشية و نلبس حوايجي نتسناوك تخرج معانا

عقد غوباشتو من كلامها مخنزر : و الولد هو لاش ؟؟!!

بشرى : هااويلي من نيتك ؟

رضى : ديك عند مي ولا عند مك و وجدي ليا رااسك الكتكوتة د قلبي العشية نرونوها انا وياك

بشرى : هههههه فين غادي تديني ؟؟

رضى : ههههه و عمري ديتك لشي بلاصة و معجباتكش ؟؟

بشرى : ماااااح عليك ا زوين ديالي

رضى : ههههه ديك البوسة خليها حتى لدار و عطيها ليا بغيتها مباشرة

بشرى : هههههههه

#النــــــــهــــــــــــاية

كنتمنى القصة تكون خفيفة ظريفة على قلبكم ❤️
و تكونو فهمتو المغزة منها و ستافدتو 😘 الزواج ماشي لعب مكنزربوش فيه و مكنتنازلوش على حقوقنا فيه …قبل متخطي الخطوة ديما عرفي فين غتحطيها و نتلاقاو فجدييد أخر انشاء الله