Skip links

قصة : دمعة هنية كاملة

 2,946 عدد مشاهداات

📿دمعة هنية📿
تأليف: ⁦♥️⁩زينب الرشيقي &Kawtar Ben♥️

بارت1:

الأمومة جرعة محبة 💐

الامومة جرعة أكسجين جديد 💮

الامومة معادلة ربانية 🔥

الامومة رحيق عيش و زهرة الحياة 🌻

الامومة عنوان 🔥و العنوان اسم و الاسم
💞مي هنية💞

💫💫💫💫💫💫💫💫💫💫💫💫💫💫💫💫

فمدينة من احد المدن المغربية و بضبط فحي عشوائي بالهراويين خارجة بنت فسن السادسة من عمرها هازة فيديها طرف ديال لخبز و كاس ديال اتااي و تابعة واحد لمرا لي بدورها وقفات ملي شافتها جايا و لمعو عينيها ملي شافت شنو هازا فيدها كانت هاد لمرا كلها موسخة و فيها رائحة خايبة و حازمة شعرها بواحد زيف و غليضة و لابسة جوج بيجامات وحدة طويلة حتى لتحث ووحدة فوقها نص كم و واصلة عند ركبة كلها مقطعة و موسخة و ديرا واحد زيف عامر حوايج على شكل سرة و مدوراه على راسها فحال صاك و جلسات فوق واحد لحجرة حتى وصلات عندها ديك لبنية
لبنت :قاتليك ماما هاكي فطري و عطاتك هاد درهم و قاتليك رجعي فوقيتة لغدا تخرج ليك لكسكسو
لمرا:قولي ليها منصيبش ابنيتي مزال تابعاني طريق بعيدة و مدينة جديدة مزال ميمتك هنية غادا تقلب على لجواد
لبنت :(جلسات حداها)و علاش اخالتي
هنية:قولي ليا مي هنية
لبنت واخا امي هنية و لكن نتي فين غادا تمشي واش غادي تسافري
هنية اييه ابنيتي انا غي غادا ومعارفة فين غادا انا غي بنت باب الله و كندق فديور عباد الله و كل و باش يجود عليا عيشة مع وليدات ناس الله يكثر خيرهم
لبنت ؛واش معندكش دااار امي هنية
هنية:؛و كين لي معندوش داار اناا كانت عندي لفيلا و طونوبيل كنت من احسن ناس و لكن داروها لكافارا ب الله داروها
لبنت:كفاش اخالتي
هنية:اييي ابنيتي ولدت لحناش و لفاعي من كرشي ايييه اراااسي و اش داز عليااااا (و بدات كتاكل بلهفة كانو داك لخبز غادي يهرب اما ديك لبنت غي كتشوف ببرائة حتى سمعات ماماها كتعيط و مشات عندها و رجعات عند مي هنية )
لبنت:قاتليك ماما هادي بيجامة سخونة تدفيك على لبرد خوديها و ترحمي على لمرحومة لي خلاتها ليك
لمراة :الله يرحم لعيشين اما لميتين رحمهم الله من هاد دنيا الله

📿دمعة هنية📿
تأليف: ⁦♥️⁩زينب الرشيقي &Kawtar Ben♥️

بارت2:

بقات غادة و كتردد هاد الجملة «اما الميتين رحمهم الله» الشمس حارة فوق راسها و العرق كيتقطر من جبينها زيادة على الحوايج السخان لي لابسة كتجر فرجليها و كيتسمع صوت صندالتها لمقطعة من جنب بقات غادة حتى وقفات قدام بلاكة ديال طوبيس باش تركب فأي واحد جا عالأقل الطوبيس عندو سقف غايرحمها من الشمس لي قهراتها جا واحد و طلعات جلسات المحطة 1.2.3.4 مانزلاتش حيت ببساطة ماعندها فين تمشي اللهم تبقا فهاد الكرسي لي جالسة فيه حتى يجي لي يهبطها منو فلحضة تسدو بيبان الطوبيس و بدا الغوات اكيد عرفتو شكون جا

الكونطرول باش لي ماعندوش ورقة يجفف بين الارض يذلو و يعيرو و كين لي كتوصل بين حتى لضرب طلعو زوج مشاو للور ديال طوبيس فين كيكونو دراري لي مامخلصينش بدات الاصوات كتعلى و الغوات نص فدراري كيطلب و نص لاخر دافع جبهة حيت ببساطة ماعندهم مايصورو من ولد شعب راكب طوبيس باش يوصل لمدراستو قبل مايتسد الباب

الكونطرول: الميمة اري الورقة ديالك
هنية: ماعنديش اولدي
الكونطرول: علاش ماعندكش
هنية: هانتا شوف حالتي اوليدي هاهيا درهم لي عندي
الكونطرول: سمحي ليا الميمة و لكن خاصك تهبطي
هنية: نهبط نهبط اوليدي غير هوا تسامحو مع هاد دراري مساكن شوف شكاير فضهرهم باينة غادين يقراو
الكونطرول: ياله هبطي تشريفة هبطي
هنية: هيا لولة اولدي

هبطات من طوبيس غادة كتجر فرجليها للا مكان غير غادة و صافي جاها العطش حلات ايديها لي عرقانين لقات ديك درهم لي كاينة نضرات بعينيها كتقلب على حانوت تشري منو قرعة الماء الا تعاون معاها

شافتو و دخلات عندو

هنية: عفا وليدي عطيني قرعة الماء صغيرة لساني نشف عليا
مول الحانوت: هاكي الالا
هنية: هاك اوليدي
خدات من عندو القرعة ياله غاتحلها و قاطعها
مول الحانوت: هادي غا درهم خاصك تزيديني درهم خرا
هنية: هيا لي عندي اولدي
مول الحانوت: (حيدها ليها من ايديها) سمحي ليا و لكن انا غير خدام هنا
هنية: على درهم…….واخا هاك الله يسهل

كملات جملتها و حسات بشي حاجة كتخبش فحوايجها من التحت دورات وجهها و شافت ملاك صغير تكون فعمرو 6 سنوات دري صغيور حروفو سمرين لابس توني ديال الرجاء و هاز بيمو فايديه

الولد: هاكي اخالتي درهم مابغيتهاش
هنية: بصح اوليدي
الولد: اه خودي

📿دمعة هنية📿
تأليف: ⁦♥️⁩زينب الرشيقي &Kawtar Ben♥️

بارت3:

لولد :اه خودي انا راني مبغيتهاش
هنية:و نقسموها بجوج صافي
لولد :(حرك راسو ببراءة)واخا صافي
هنية (خدات لقرعة من عند سيد و عطاتو جوج دراهم)هاك شرب نتا لول
لولد ؛لا نتي لولا
هنية:و غادي نوسخ ليك لقرعة

لولد:لااا نتي زوينة بزااف فحال لميمة
هنية ؛ تا انا ميمتك اوليدي
مول لحانوت(غوت )يلاااه حيدو عليا من هنا صدعتوني
تمى داك لوليد خاف و خرج كيجري و تبعاتو مي هنية مسكينة حيث عرفاتو خاف حتى كتوقف مصدومة من لمنظر لي شافت قادامها

كان داك لولد شاد فواحد راجل تكون عندو ديك 34 هاكاك شاد فيه و كانو كيقوليه حميني و دمعو عينيها و هيا كتقول انا مفرشاك برضا و غطياك بيه اولدي و فجأة دازت قدامها سينتة ديال جزء من حياتي لي كلو عذااااااب

@@فااش باااك @@

ففيلا كبيرة فحي راقي جالسة مراة كبير فلعمر نقية زوينة و ديرا سبنية على راسها و شادا القران فيديها حتى دخل عليها شاب (نفس راجل لي شد فيه لوليد صغير دابا ) دخل هو و مرا شادا فيه من شدة بينة مراتو و حاملة و دخلات معاهم بنت اخرى لابسة جلابة و طالقة شعرها و دارو بيها
شاب؛الله يتقبل ا مي
هي ؛امين اوليدي الله يرضي عليه
لبنت:خالتي هنية الله يتقبل سدي كتاب الله بغينا نهضرو معاك
هنية:اييه مرحبا
لبنت2 :ماما خويا و مراتو غيقولو ليك شي هضرة
هنية:توما هضرو راكم خلعتوني
لبنت: ماكين مايتخبا ا خالتي لورث ديال لمرحوم تقسم و هو خلا كلشي غي لولدو و بنتو و نتي عارفة لفيلا صغيرة و انا قربت نولد راك فهمتيني ياك
هنية:واش باغين تبعيو لفيلا و تشريو و حدة اخرى
لولد؛مي غتمشي تسكني عند ختي نادية
نادية: ااايوااا هادشي متفقنااش عليه شتك غي جيتي قدامها و دورتي ليا سمطة
هنية:توما اش سيرين تقولو
نادية:سمعي امي انا داري جي ليها و مرحبا بيك و لكن مشي كل ساعة و ملي تجي تبركي ليا سيمانة الله يرحم من زار و خفف راك عارفة راجلي مايبغي زيادة
لبنت:و لى انا اختي بغيتيني نقابل ليك مك شديها عندك نتي
نادية؛ياك خويا قال غيكري ليها
لبنت ؛لهاد خوك كيطبع لفلوس مفراسكش را عندو مسؤولية و لد جاي فطريق خاص لحليب و ليكوش و زيد و زيد يمشي يكري ليها هيا
هنية؛ياكو اتربيت ياك يدي يااااكووو ا مخلفاااات كرشي هادي هيا تربيتي ليكم

كبرت و قريت ووكلت و شربت هادشي باش تجازيوني
لولد؛وا مي حسي بيا حتى نتي عافاك هانتي غتمشي لدار لعجزة ومرة مرة نجي نطل عليك تما غايعاملوك مزيان
هنية :مطل عليا منطل عليك انا ساخطة عليك اوليدي ساخطة عليك

📿دمعة هنية📿
تأليف: ⁦♥️⁩زينب الرشيقي &Kawtar Ben♥️

بارت4:
و خرجات مي هنية كتبكي و دموع فعينيها خيبة امل كبيرة تعرضات ليها و ماشي من اي حد من ولادها لي هزاتهم فكرشها 9 شهر ربات سهرات و كبرات قرات و وعات حاربات على ولادها و هزاتهم بسنانها باش فاش يكبرو تفتاخر بيهم باش تقول ولدي فلان و بنتي فلانة باش تلقا لي يهزها فكبرها و فعجزها باش تلقا لي تسند عليه من بعد المرحوم راجلها تكبر الحاجة فراسها و ماتكبرهاش فولادها فلخر لقات راسها فزنقة و شكون لي رماها فلذة الكبد ديالها لي كون طلبو عينيها تعطيهم ليهم بلاما تفكر

لقات قدامها الزنقة لي ماكترحمش لقات قدامها العرا و مرحلة جديدة من العذاب لقات راسها مشردة من بعد ماكانت معززة مكرمة فدارها فرمشة عين لقات راسها وحيدة عذاب الحمل و الم الولادة سهر التربية و مرض ولادها حتى حاجة ماشفعات ليها عندهم تمنات لو كان كانت عقيم و ماتحطش فهاد الموقف

موقف بين ليلة و ضحاها مايبقا عندك والو هدا هوا جزاء الام؟ سيري لدار العجزة ؟ هادي هيا نقرا اميمتي و نعوض ليك ! هادي هوا جزاءها

كل هاد الجروح تفكراتها مي هنية و رجعات تحلات من جديد من بعد مادازت عليها سنين شافت ولدها واقف قدامها و حداه حفيدها

حفيدها لي لطال ما كانت كتمنى يكون عندها و يكبر قدام عينيها تسميه هيا و تهزو فاش مو تعيا تربيه كيف ربات والدها لكن لااا كان للقدر راي أخر

نفسو حفيدها لي خافت توسخ ليه القرعة لي شرب منها.
خافت تخلي فيها ريحة فمها الكريهة لي كانت كتغسلو مرة مرة بالماء

الم كبير شق طريقو لقلبها و هيا كتردد جملة «انا راضية عليك»

فطرف لاخر كان ولدها لي عيونو عمرات دموع كيشوف فحالة مو كيف ولات كيشوف بشاعة منضرها طلق ايد ولدو صغير و مشا تحنا عند رجليها لي غير تحطو يديه عليهم بعدات و زاد قرب ليها حنا وجهو لرجليها و شهقات بكائو مسموعة فأرجاء المكان سرعان ماغطا على شهقاتو صوت مي هنية لي كانت كتبكي و تحنات عندو عنقاتو و بقات كتبكي معاه

عناق حار لأم توحشات ولدها لأم قلبها نقي من جهة ابنها لأم عانت من الحرمان طول السنوات السبع

📿دمعة هنية📿
تأليف: ⁦♥️⁩زينب الرشيقي &Kawtar Ben♥️

بارت5:

علي(ولدها) : (كيبكي و فنفس الوقت كيهضر) مي توحشتك امي مي سمحي ليا امي سمحي ليا مي غلطت فحقك امي سمحي ليا سمحي ليا بزاف مي سمحي ليا دعاويك خرجو فيا امي سمحي ليا على كل حاجة امي سمحي ليا توحشتك توحشت صوتك و توحشت نصائحك شكال قلبت عليك امي سمحي ليا راني ندمان و بزاف سمحي ليا را الحرقة كتاكل قلبي من جهتك سمحي ليا امي راني ندمت و مانفعتني ندامة (كيبوس فايديها بجنون) سمحي ليا امي انا لي وصلتك لهاد الحالة سمحي ليا نعوضك على لي فات نديرك فوق راسي غي سمحي ليا

هنية: (كلمات ولدها زادوها حرقة فوق لي عندها زادوها الم على لي كان بدون تفكير نطقات) انا مسامحاك اولدي من زمان انا مفرشاك و مغطياك بالرضى

فرمشة عين سامحات ولدها لي جرا عليها من قاع دارها فرمشة عين سامحات لي خلاها دوز ليالي باردة شتاء حر شمس برد صقيع فالزنقة لي خلاها مفرشة الارض و مغطية السماء حيت ببساطة الام ماكتحقدش على ولادها الام ماكتكرهش ولادها الام كتعاتب كتعير و لكن عمرها تتخلى عمرها تكره و لا تجرح عمرها تأذي فلذة كبدها و عمرها تحقد عليهم و لو بينات العكس و لو بينات الصلابة الا انها كتبقى حنينة و مسامحة

علي: بصح بصح امي سمحتي ليا توحشت حضنك الدافي و شتاقيت لهضرتك ياليتنا بقينا صغار ياليتني ماقلتش ليك ديك الهضرة حشمان من راسي و منك من كلشي الندم كيقتلني ألف نهار الحصرة لدرجة فكرت نقتل راسي
هنية: ماتقولش هاكا اولدي الله يحفضك و ينجيك
علي: خليني امي خليني نهضر انا فرحان مني لقيتك كنت كنخمم الف مرة فاش غانقول لولدي مني يسولني على جداه اش غانقول ليه جريت عليها و انا سباب تامشات ماخليت سبيطارات ماخليت كوميساريات كاع دور العجزة قلبت عليك فيهم و مالقيتكش بغيت نتي لي تربي ليا ولدي و تكبريه على ايدك

‎هنية: انا اولدي انا لي خرجت بإرادتي ماشي نتا انا و ماكين لاش نربيه لك حيت ماحسنتش تربيتي ليك نتا و ختك انا لي مني لافوت نتوما ماعليكم والو
‎علي: سكتي امي هضرتك كتزيد تمرضني و تقطع قلبي
‎هنية: و نوض اولدي نوض شوف ولدك حشومة يشوفك كتبكي
‎علي: غاتمشي معايا ياك امي ماغاتخلينيش
‎هنية: و علاه انا عندي فين نمشي من غير ولدي
‎علي: (مسح دموعو و عنقها و باس على راسها) غانعوضك غانعوضك على كاع لي فات
‎هنية: ان شاء الله اولدي ….شكون هاد البنية زوينة لي معاك و فين مرتك
‎علي: هادي دعاء مراتي و ليلى ماتت فاش كانت كتولد ايوب الله يرحمها
‎هنية: الله اكبر الله يرحمها و يوسع عليها متشرفين إبنتي
‎دعاء: (كانت شادة فايوب و كتمسح فدموعها) الشرف ليا اخالتي
‎هنية: و بنتي بنتي نادية كي دايرة توحشتها

‎علي: مني مشيتي امي و حنا لور لور ليلى ماتت و نادية شدها السكر راها فدارها و تاهيا ندمانة على ديك الهضرة لي قالت ليك سامحينا اميمتي

‎هنية: انا مسامحاكم و راضية عليكم بزوج
‎علي: ايوب اجي تشوف هاهيا جداك لي كنت كنوريك فتصاور
‎ايوب: هاد المرة الزوينة
‎هنية: اه انا جداك (طاحت دمعة من عينيها) كتشبه لمرحوم ماشاء الله الله يحجبك
‎ايوب: (كيمسح دموعها) ماتبكيش كتقول ماما دعاء البكا كيقتل دغيا مابغيتكش تموتي
‎هنية:هههه ماغاتكونش
‎علي: ياله نمشيو امي
‎هنية: ياله اولدي…..الواليدين ماكيحقدوش اولدي (عنقاتو و بقاو غادين فاتجاه الطموبيل) الواليدين ماكيحقدوش ماكيحقدووش

💞💞💞💞💞

‎ 💮مي هنية💮

‎هي امرأة هي ام انجبت اطفالا هم اولادها من لحمها و دمها ربت سهرت تعبت فعلت كل ما بوسعها لكي يكون اولادها صالحين لكن في اخر المطاف طردوها طردوها من بيتها من البيت الذي ضاع شبابها فيه من اجلهم اهذا هو جزاءها؟ اهذا هو جزاء تعبها؟ام سهرها ؟ام تربيتها؟ هي تتساءل فيم قصرت ؟فيم اخطأت؟ فيم و فيم ….؟
‎وهؤلاء الاولاد اهكذا يعاملون امهم تلك المرأة التي افنت شبابها وحرمت نفسها من كل شيء ؟بعد كل ما فعلته من اجلهم طردوها من بيتها طردوها و بكل بساطة.
‎هذه قصة
‎مي هنية وغدر الاولاد
‎ نسرين

‎#النهاية
‎تأليف: زينب رشيقي &Kawtar Ben

Leave a comment