Skip links

قصة : تناديك رغبة عشقي إليك ج1

 6,447 عدد مشاهداات

القصة بعنوان: تناديك رغبة عشقي إليك
نوع القصة :#درامية #واقعية #رومانسية
الكاتبة ✍️: زهور السليماني

ملاحظة ( القصة مقتبسة من الواقع وحقيقية ١٠٠٪؜ )
تيناديك رغبة عشقي
إليك …
بقلم زهور السليماني
البارت ١
حلات عينيها كيتلصقو على صوت مرت خوها علات عينيها فيها وناضت طافجة مين شافتها هاكاك عرقانة دارت لقات ختها باقا شامخة فالنعاس ..
..ويلي عائشة مالكي واش شدك الوجع ..
عائشة .. نوضي راني كنموووت نوضي عتقيني ندخل ندوش ..
ناضت كتجمع فشعرها وكتهضر .. اربي الحبيب وواش قلتيها لفؤاد ؟؟
عائشة .. زينب ( وهي كتعض شفتيفها ) راااه مابغيتش نقولهالو تاندوش باش نيشان نمشي نولد خليه تايتزير فيا ..
زينب .. ( خايفة ماعرفات مادير ) واخا واخا بلاتي نعيط لماما داروري ديرليك شي حاجة وانا غانشعل السخان ..
لبسات عليها البينوار ومشات كاطير للكوزينة وهي كتحيد العمش من عينيها وصلات لسخان هزات البريكة وشعلاتو ورجعات غادا للبيت وشوية تفكرات خسها تجيب البانيو ماعندها فين تغسليها تلفات مارا ورجعات مشات كاذير طالعة فالدروج للسطح فتحاتو وهزات البانيو ورجعات سداتو شافت لقات التلفازة مشعولة عند خوها لي عندو بيتو بوحدو جيهت السطح حلات عليه الباب لقاتو كيشخر ..
زينب .. قاعيدتك هي قاعيدتك اتريكة القنب داكشي باش كيجينا الضو غالي تفو ..
هبطات كترضخ حيت تخسر فيها النعاس مع دخلات لدوش وشعلات فيه الماسخون ورجعات تاكاتشوف الضوء فالصالون لقات مها فاقت جنب عائشة ..
زينب .. يالاه جايا نفيقك، عائشة اجي يالاه غابشوية عليك راه شعلتليك الدوش ..
جروها بشوية مها من جيهة وزينب من جيهة لدوش ..
خديجة .. مشيت ندير ليها شوية دالقرفة فالحليب ودوشي عابشوية هااا لاتجهد ماتكملوووش صااافي …
بقات هي لقات داك البانيو عمر شوية قاتليها تكلس فيه سخون وهزات شوية ديال الشانبوان دارتوليها فشعرها مع كانت ديجا دايرالو كاري دغيا سالاتوليها وهي كترعد خايفة لا تمشي تولد ليها فاي لحظة ..

خديجة خلات الحليب كيسخن ومشات فيقات فؤاد ..
خديجة .. فؤاد وااا فؤاد نوض اولدي راه مرتك كتولد نووض ايوا باش نمشيو نديوها …
فؤاد .. ناض محلوع كيشوف فيها .. فين كيفاش فين راها ..
خديجة .. غابشوية عليك را كاينة مع زينب كتغسليها يالاه انوض هي هاديك جمع راسك ..
خلاتو ومشات كتقلب على الساك لي كانت وجداتو عائشة هادي قبل بسيمانة وهي تسمع تيليفونها كيعط هزاتو لقات نسيبتها ..
خديجة .. الووو اختي فاطمة لا باقي راه يالاه دخلات مع زينب تدوش ليها ايوا يالاه سربي يالاه تجي هو هاداك ..
حطاتو وطلات على ولد ولدها الصغير لقاتو ناعس تكون يالاه فعمرو داك عاماين .. رجعات غطاتو وخرجات مخرجة تيليفون مراا ولدها فبيديها وهازا الساك فاليد الاخرى تاشات زينب مخرجها بالبينوار والفوطة ملويا على شعرها دخلاتها للبيت ..
عائشة .. اححح اوفففف جبدي داك العباياا تمااا ..
زينب .. خسك تلبسي شي حاجة سخونة راه البرد اصاحبتنا
عائشة .. ( كتعصر وتحاول تزيد تصبر ) زييينب غير جبدي جبدي لي كاين وغابشوية باش ابقى امجد ناعس ..
جبداتليها زينب بزربة واحد الكولون سخون وتليكو بالكول سخون مع دابا راه شهر 3 وباقي الحال بااارد وعاد هزاتليها العبايا من الفوق والزيف ديالها فالاسود ..
دخل عندها فؤاد كيطير .. يالاه شنو واجدة ..
زينب .. صافي هاهية خرجاتها معاه غابشوية وهي تشوف فاطمة ام عائشة كاينة تاهية جات ..
خديجة .. ( مع زينب ) سيري نتي مع مرت خوك انا غانبقا هنا نوجدليها الفطور ..
حركاتليها زينب راسها ومشات دغيا دخلات للبيت كتخبط ..
زينب .. ناري ديما واحلة انا ديما يخخخ ..
نهال .. تتت غااابشوييية ااااو ..
زينب .. ونوضي جمعي راسك راه ولد خوك دابا شوية وهو غايفيك ومي كاتصايب الفطور نوضي نتي تگعدي حظيه ..
ناضت طافجة .. كيفاش شكون كيولد ..
زينب .. أنا ..
وخلاتها وخرجات بعد ماكانت لبسات كبوط فوق السروال دالكيطما وخلات شعرها كعكعة هابط لتحت ودارت فوقو زيف غليظ سخون وهزات تيليفونها ومشات ..
لقات خوها لقدام وعائشة وفاطمة اللور كلسات هي قدامو وقلعو بزربة طايرين للسبيطار ..
غير دخلو داوها عند القابلة .. لي كانت نيت ولدات عندها عادي عاماين .. شدها فؤاد فيدو ودور معاها ب500 الدرهم شداتها طالعة ليها الربحة ومشات بسرعة دير خدمتها ..
وزينب كالسة فواحد الكرسي وحداها فاطمة .. وفؤاد غادي جاي وكيسمعو صوت عائشة واصل حتالبرا السبيطار وماشي غير هي وكاين لي كيولد فجهة اخرى وكاينة لي باقي ماشداتها الزحمة يالاه كتمشى سيبيطار الدولة راكوم عارفين .. ماقدراتش زينب تصبر دغيا طاحو دموعها قلبها هشيش وماكاتصبرش على تشوف شي حد مجروح ولا شي حد كيغوت وكيتألم ..
فاطمة .. شش مايبقاش فيك الحال راه الزحمة هااادي ابنتي الزحمة، قلتيليها دعي معاك ..
زينب .. ( كتحاول تمسح دوموعها ) وغير تفك اخالتي على خير ..
فاطمة .. يا ربي يا ربي ..
ناضت زينب كتشوف فخوها وحطات يديها على كتفو .. خويا مايبقاش فيك الحال شوية وتلقاها تفكات غير رتاح ..
فؤاد عقلو طاير هادا هو حال الاب هادي راه الىلادة ومايع ف بحقها غير المجرب ..
ماهو غير شوية تاعيطات القابلة لفاطمة قاتليها مبروك الوليد ..
وهو يطير فؤاد معنق زينب لي تاهية رجعو دموعها فرحة

البارت ٢
حولها للغرفة عادي فيها واحد المرة تاهية يالاه ولدات وحطو قدامها الوليد فكامة .. وزينب حداها كالسة هي وفاطمة اما فؤاد مشا يجيب خديجة والفطور ..
زينب .. على سلامتك اختي ملي تفكيتي على خير وبيخير ( طلات على ولد خرها شحال صغيوور مشاء الله ) وينوو مشاء الله مشاء الله ..
عائشة .. ( وهي مبتاسمة من بعد كاع لي طرا اكيد غير كتشوف ولدك كاتنسا كولشي ) العقبة ليك ازينب مانكونو معاك فعرسك وولادتك ..
طلعات زينب عينيها بفرحة .. امين اختي ..
فاطمة .. راه قتليها واش قلتي لعائشة تدعي معاك ..
زينب .. اودي الحمد لله غير لي تفكات على خير ( بينها وبين خاطرها : وغير كون دعيتي بشي تيتيز )
عائشة .. ههه دعيييت معاك ودعييت ربيي يعطيك شي خدمة تكون مرفحة وشي راجل دايزو الكلام ..
زينب .. لا هادي مانرجعهااش ليك اميييييين يا ربي من فمك للسما ..
فاطمة .. أنا راه خليت باك وعلي ناعسين نخرج نعيطليهوم ..
حركاتليها عائشة راسها وبقات غير هي وزينب فالبيت ..
عائشة .. زينب مديلي داك القرعة ديال الما ..
ناضت عطاتهاليها شربات عاد رتاحت .. اللله ولكن ماتصدقي يا زينب على راحة لي كتحسيها من بعد العذاب وكتكوني خايفة لا يوقعليك شي حاجة ولا لولدك شي حاجة كتبغي تحماقي داك الخلعة كاتزيدليك فالوجع سبحان الله ..
زينب .. راه بورشتيليا لحمي ناري شنو باقي تابعني ..
عائشة .. ايوا لا سربيتي وبرعيتينا بشي عراسية ..
زينب .. اختي زربانة عليا تايتزوج مهدي بعدا لي خاطبين ليه ..
عائشة .. ايوا صافي ضربي حجرتين بعصفور واحد وشوفيليك شي حد من تم ..
زينب .. اختي انا فارس احلامي صعيييب يتلقاااا ( وغمزاتها ) ..

ايوا لي نطولوه نقصروه ونعاودليكوم شوية على راسي .. سميتي زينب .. فعمري 24 ..صراحة يالاه ديت لاليصونص ديالي العام لي فات بروفيسيونيل من بعد ماكنت دوزت التكوين، وحاليا كنقلب على شي خدمة تكون مزيانة والا بلاش منها، مالي انا قاريا شحال واخيرتها نخدم ب 2000 درهم للشهر على قلة العيشة لي عايشا .. صراحة واليديا مامخليني مخصوصة من والو رغم اننا كثار ولكن من الطبقة المتوسطة ولي بغيتها نلقاها .. وداكشي باش فضلت نبقا هاكا حتا نشوف شي خدمة تكون مرفحة .. والا هاني هنايا تايوصل فارس الاحلام، ناري غير كنقولها كنبدا نضحك على راسي راني ساكنة فالمغريب زعما نقصي السلوكية ازينب الله اهديك، ايوا لي فيه شي بلية لهلا تحيد منو، عندي واحد الدوق فالرجال بلى مانقوليكوم، ناس كيبغيوههوم رجال قدهوم باش اعيشو الاحلام وكاينة لي كاتبغيه يكون كبر منها بشوية وانا كيفاش كنبغيه هههه بلا مانقول حسن .. نموووت أنا فمول العقل ومول الرزانة ومول النفخة والرجلة، جيبوليا اخوتي مول الربعين ماكذبوش نهار قالو احبيه أربعيني .. وبعدو ليا من البراهش ومن لي يالاه ناويين العبو ويتفلاو وجيبولي لي عيا من هادشي كامل، لي يخليك تحسي ملكتي الدنيا بين يديك، احح زدت فيه اودي راني عارفة راسي كنتعلق فين تفلق ولكن بيا ولا بيه ياما شفتهوم ايامات التكوين النهار لي كنت نخرج مع البنات ويبانوليا كيوقفو بالطوموبيلات واحد اعميك فلاخور اشمنك يا زين واشمنك يا تبانة كتحسي بالرجولة كون كانت بنادم .. بانليا طولت عليكوم ولكن ختكوم راح طايحة على زنافرها طيحة صحيحة … غير دعات معايا اليوم عائشة تخايلت راسي غير وانا كنشطح فعرسي ونضور ونلقا مول العقل كيشوف فيا وكيضحك .. ونوضي على سلامتك ..
دازت هاد السيمانة مرونة راكوم عارفين مين كتكون النفيسة فالدار ..
هاااكااا ياا ربي حبييت النفيييسة عندي فالبيييت ايييييواااا .. السمانة كاملة وانا نغنيها ..ونزغرت ..
اسوا اسيادنا جري منهنا وجري منهنا ماكاتلقاي تالوقت فين تحكي شعرك، ومع انا البنت الكبيرة ديال الدار مخليين الحمل كولو عليا ومرات خويا لي كانت تعاوني هي لي ناعسة اما واحد ختي الناس عندهوم الخواتات وانا عندي العجولة بحالها بحال داك العجل ماكيفرق بيناتهوم غالموسطاج ..
دخلت مدخلة الكراطن ديال الحلوة يالاه جبتهوم من عند الطيابة الزوهرا صاحبت ماما، دخلتهوم نيشان لبيت النفيسة حيت فهاد الوقت هي لي كاتبقاي تحسي بيها امنة على كاع البيوت .. شفت فعائشة لقيتها كترضع البيبي ديالها سميناه حسام ..
زينب .. 150 حبة من الشكل والكعب جا فيه ثلاثة زايدين ..محسوبين عينيك عليهوم باش فليل ندخل انا ونهال نقادهوم ..
عائشة .. صافي امجد فيناهو ..
زينب .. هزو قبيلة محمد داه كيلعب معاه ..
دخلات عليهوم فاطمة .. راه هدرت مع النكاڤة قاتليك غاتجي غدا مع 3 ..
خرجت خليتهوم مكملين الهضرا ومشيت لقيت نهال مجمعاليا مع بنات خوالي هادي غانوض نتفها مافيهاش الشك ماشداتني غا خولة بنت خالتي ..
خولة .. خليها عليك ..
زينب .. حليب الحمارة ماتنفع ما در ..
خولة .. زيدي زيدي انا غانمشي معاك لاكنتي غاتشوفي مول البتيفور ..
مشات معايا خولة بحال ختي الثانية كبيرة عليا بعاماين .. من الصغر وحنا كابرين وديما مرة تلاقايني عندها مرة عندهوم واخا كيسكنو بعاد علينا فسلا وحنا فبني ملال ولكن كاتلقانا ديما ملاقيين ..
داز داك النهار ودخلنا فاليل لبيت دعائشة غير انا وخولة ونهال صايبنا الكراطن دالحلوة ماسالينا تالشي جوج دليل خلينا عائشة ناعسة هي وولدها نمضت لقيت امجد ناعس فالصالون ديتو معايا للبيت كينعس معايا فليل فهاد الايام اما فؤاد كينعس مع محمد الفوق جيهت السطح ..

البارت ٣

حنا بينا خمسة ديال الخوت فؤاد الكبير فعمرو 35 وموراه مهدي يالاه فالثلاثين وهو لي خاطب وعرسو عندو فهاد الصيف لي نيت كنوجدو ليه وعاد أنا ومورايا محمد فعمرو 21 واللخرة هاد القردة ديال نهال هي الصغيرة وهي المفشة فعمرها 18 يالاه عندها الباك هاد العام ..
ايوا كيفما كيقولو اسيادنا خير الامور اوسطها وانا هي الوسطانية ديال الدار وديما معروف عليا مولات الراي والشوار وداروري الحاجة دوز على يدي عاد تخرج ..
الغدليه كان السبوع نوضاتنا ماما على النبوري، يالاه اكفينا دايرين الرجال للغدا والنسا للعشا وصلني مهدي باش جبنا دوك لي بتيفور ووصلنا نيشان طلعناهوم للسطح لبيت الدراري وتما نيت فالسطح فين كانت الطيابة كطيب .. ورجعت هبطت تصخرت لماما لقيتهوم يالاه جايبين المنصة باش غايديروها حدا باب الدار ورجعت طلاقيت بمهدي شديتو قبل مايخرج ..
زينب .. دور مع ختك ..
مهدي .. ناري ماكاتقادايش ..
زينب .. مالك بغيتيها ترجعها فوجهي ..
مهدي .. ( جبد وحط ليها ميتين درهم ) هاكي ..
زينب .. اش هادشي واش ماحشوماش عليك ..
مهدي .. راه باقي غانعطي لهاديك لي لفوق ..
زينب .. ( شدات لواتها وحطاتهالو فيدو ) الى كانت غاهادي بلاش ماتوصلني منهنا للكوافورة ..
تنهد ورجع جبد زرقالاف وحدا خرا وحطهاليها جمعاتهوم بجوج طواتهوم وحطاتهوم عند سدرها .. ايوا دابا دوينا الله اكثر من متالك ..
مهدي .. سيري الله اعطينا كمارتك ..
زينب .. ( غادا وتغامز عليه ) ايواااا راه نستااهل ما كتر راني كنوجد لعرسك ..
مهدي .. الله اعفو عليك ..
طلعت مع الدروج هاكا يكونو خوت الرجالة بحرا نقاد ونتول راسي باش نبان مولات الدار فوتوني فكولشي الا التاويل .. نخدم ونردم ولكن اجي الصح خاس نبان لالة البنات فالزين والمرشان ..
مع الدخلة سمعت بنات خوالاتي كيجمعو فالصالون دخلت وانا كنبغي نفهم الموضوع لقيت موضوعهوم الزواج طبعا وعندهوم شي لووك لووك من غيرو .. عندنا البنات كاملين لي فالعائلة واصلين سن الزواج ووحدة تفايل على الاخرى وكيشوفو شكون تديه حسن لا من الزين ولا من المنصب ولا من الفلوس ..
شويني فيكوم جيبوليا غير الشيباني وخطيوني .. احح وارا ديك الساعة لما نطرطق ليكوم العوينات .. مشيت عند ماما لقيتها واقفة على شغل يديها .. مامي ساليتليك شغلك كولو ودابا ماتعرفيني مانعرفك ..
خديجة .. اجي لهنا فين غادا ..
زينب .. الله اهديك اخديديج مالي بغيتيني نبان كيجيلالي نهار الدبيحة ..
خديجة .. ( دورات فمها ) وسيري سيري وجري معاك داك الهبلة راه من الصباح وهي تسرسب مابقات كتعرف ماتقول ..
زينب .. لا وااالو مااندييهاااش اماما واش منيتك واش باغا طلاقي العافيا والما نوووون وكحل العيون ..
خديجة .. شووفيي بلا ماطلعيلي القردة ختك رجليك برجليها معامن بغيتيها تمشي ياك ما مع اللفعات دبنات عمتك امشيو اديروليها شي عجب ..
زينب .. تبارك الله قول بنت غاغادا وتشالي باللويز الله اهديك اخديديج راها خبز ربي فطبگو ..
طلعات معايا بقرسة تاغوت … اححح اويلييي ..
خديجة .. يا تديها يا رجليك مايفوتوش الباب ..
غمضت عيني ومشيت نخبط غاتقولولي مالكي مع ختك اودي راحنا ماكانطلااقااااوش خطااان متعاامديااان لااا يلتقيااان .. نهال خفيفة بزاف وافكارها تقول كاتبا فيهوم اتجاه معاكس لزينب هي تدوي فالشرق وانا ندوي فالغرب ولي شافنا يحلف علينا ماشي خوت لا فالزين ولا فالشخصية أنا شعري كحل وهي زعر وانا عيني عسليين وهي كوحل ههه العكس تماما حاجة وحدة لي فينا متساوية هي البيوضية والرقوقية نفس الطايا عندنا بجوج وانا زايدة عليها شوية …
هبطت لقيتها كتبقشش فماريوها … غاتمشي تقادي حالتك ؟ ..
نهال .. غانمشي مع بثينة ..
زينب .. زين قاتليك ماما رجلي برجليك وغانمشيو انا وخولة يالاه نوضي جمعي شراوطك لي غاتلبسي وزيدي قدامي قبل مايبداو الرجال اجيو ..
نهال .. ماشي نتي لي غاحكمي فيا انا غانمشي مع بثينة ..
زينب .. ايوا طلعيها قوليها لخدووووج احبيبيتي وتشوف لما طيباتك نتي بلاصة داك الدجاج لي فالطنجرة ..
خرجات من تم ومشات عند خولة قاتليها توجد راسها ورجعات هي لبيتها لقات كتصفر .. خليها تمشي البعابع لاخلاتها هههه قاتليك ( كتعيبها ) بثيينة ..
جمعت تكشيطتي والحوايج لي غايخسوني تاكادخل عليا طافجة …
شفت فيها كنسد الساك .. اشنو قاتليك خدوج سيري مع حبيبة قلبك بثينة ممم !! ..
قلبات وجها وجاوباتني بالنفخة كتجمع فحوايجها .. هبطو هانا لاحقاكوم ..
مشيت كنضحك .. تي واش عارفة خدوج ولا غاسامعة بيها ههه

البارت ٤

ضحكت ودورت راسي بقلة حيلة ومشات عيطت لخوخة وخرجنا مسلتين مافينا لي تحصل فيا شي وحدة شدينا طاكسي نيشان للكوافورة لي ديجا ريزيرڤينا عندها يالاه نوجدو بثلاثة حيت غايبداو نسا ادخلو بكري راكوم عارفين البرد ويالاه اسالي داكشي مع جوج هي هاديك ..
تقادينا وعدلنا درت غير البروشينگ لشعري كيعجبني نخليه سانبل وطلقتو طويييل واصل للخصر غير لي يشوفو يبقا متبعلو العين وعاد فالاسود غامق معدرت خدوج نهار ومطال وهي تطلي وتبلط لا انا لا نهال لي دارتلو مشيطة خفيفة .. ساليت ودزت ماكيت لراسي ماعنديش مع الماكياج ديال الكوافورات حيت كيرجعوك كشيخة طراكس فزمان المصريات .. ولا بغيتي شي حاجة خطيرة خسك تمشي لشي ميكاب ارتيست واراك لفليسات تحطي الف درهم غير فكمارتك ..
لبست قفطاني فالحزام فالغوز بارد وفيه الزواقات فالشيبي .. وهزيت البوشيط ولبست صباط عالي وشفت فالمرايا احح عليا وخلاص هاكا يكونو بنات الناس المحضيات .. رشيت الريحة ودرت شفت فنهال تاهية جات كتحمقً ماشاء الله وداك الزعورية هابطة معدرت خدوج تخاف علينا وتخاف تدار لينا شي حاجة .. جريتها وقرينا على بعضياتنا اية الكرسي عاد جات تاخولة لي طلعات كتحمق غزالة وعيطت لمهدي اجي جيبنا حيت عارفاه هو لي عندو الخاطر اما فؤاد بلى ماتهضري معاه هاد الساعة ماعارف راسو من ساسو ..
هبطنا عندو خولة بقات كتشووف فيه كان باقي بالكونبلي ديالو حيت كان حضار عند الرجال .. بقات فيا الصراحة حيت خولة من شحال وعينيها فمهدي وبغاتو بصح ولكن للاسف ولي تاحنا تصدمنا مين جا قالينا خويا غايخطب وحدة من مراكش .. كان شافها تم بحكم هو خدم هادي قبل عاماين فواحد الشركة تما ومرفح ديال بصح كيخلصوه تقريبا ملليون فالشهر حيت هو الجيرون تما وواقلة طلاقا معاها وعجباتو وصافي كنا مشينا فشهر حداش خطبناها ليه هي زوينة وتاهي قارية وعائلتهوم لاباس عليهوم خويا طاح عليها نيشان ومن تم وخولة تصدمات وانا كصاحبتي وبنت خالتي بقات فيا بزااف ..
زينب .. عائلة بسمة ماجاوش ؟
مهدي .. باقين عاد غايوصلو ..
سكت وبقيت ساكتة باش مانزيدش نضر خولة كتر وحتا نهال بقات ساكتة عارفة البلان وصلنا كانت دنيا عامرة شوية فالحومة والطوموبيلات واقفين كان تقريبا جواييه المغرب .. الضواو شعلوهوم فداك المنصة والديدجي كيتيسطي الصوت هبطنا حنايا دايرين الزيوف على راسنا فالاسود باش مانبانوش وطلعنا نيشان دخلنا لبيت عائشة نشوفها كانت يالاه سالات ليها النگافة جات غزالة مشاء الله دارت ليها الشدة دالعروسة مع تكشيطة بيضة مرصعة بالجوهر .. بديت نصلي على النبي وبداو تالبنات معايا تاساليت وختماتها نهال مسخوطة كتعرف تزغرت …
ورجعنا عاودنا وثلثنا تادخلات علينا خديديج تاهية مسكسفة ولابساليك قفطانها الموبرا فالكحل ايوا مين داك الزين من داك الجدع بدينا نبسلو عليها انا وخولة اليوم بابا يتلف عندو الزين عندو الحمام دايرو في ضارو تابدات تجري علينا ..
تطلقات الموسيقى والناس بداو اجيو وانا قاعيدتي هي قاعيدتي تقول العروسة مانبغي نخرج تاتكون الدنيا مطرطقة باش ندخل عليهوم كيسندريلا .. وماالي اخوتي مانفرحش براسي خليوني راه الشيباني لي غايفرح بيا باقي ماجا ..
وداكشي لي كان مي تدور وتحي تخرج عينيها وانا والو لاصقة تاهبطنا مع عائشة .. وداكشي لي كان نيت مع الدخلة الانضار كولشي علينا شي يشوف فيا وشي اشوف فعائشة وصلناها للطبلة ديال العائلة حيت مابغاتش دير البرزة ماهو غير سبوع ومشيت انا كنسلم على الناس لي كنعرف تاشفت بسمة هي وماماها وختها ومشيت سلمت عليهوم او جريت الكرسي كلست معاهوم ناس ضحوكيين وكيدخلو للقلب ..
بسمة .. ( كتهضر ومرة مرة دخل شي كلمة بالفرنسية ولا بالانجليزية كاين اي غاتجيه عياقة ولكن هي كاديرها بعفوية وبالعكس زادتها شوية اناقة ) جيتي غزااالة فنة مشاء الله ..
زينب .. شكرا حبيبتي تانتي اعروستنا الزوينة ..
هبطات راسها حشامنة زعما اودي غاكرري ونتي كاديريليا فيها زعما انا اللوسة السوسة
شوية جات حتا نهال وقردات حدانا كتفرنس انا بقيت غير كنشوف فيها مامولفاش ليها وبقات تاهية تجمع وضحك ضرت فيها شي شوفات زعما تشي راه مادوخينيييش ..

البارت ٥
ساا لا السبوع تالنصاصات الليل حييحنا الصراحة وخصوصا كانو الناس قلالل غير اقرب الاقربين ومين كتكوني بين العائلة تحسي براحتك .. طلعت حيدت الشربيل طبعا الطالون حيدتو قبيلة واجيو تشوفوليك الرجيلات مساكن تنفخو وعاد عندي حساسية الى عرقو غير شوية يديرولي اللبايات ..
ماديتها فتاشي لعبة العيا قاتلني بديت نفكر غير فماما واش تابعها حيدت داك القفطان بالزربة وجمعت شعري ولبست بيجامة خفيفة وزوينة بحيث باقين الضياف .. وخرجت نشان عند ماما لقيتها كاتحاسب مع الطيابة .. اودي خدوج لي فيها مامهنيها كاتبغي تسالي الخدمة فنهارها ..
زينب .. ماما الله اهديك خلي كولشي تالغدا انا راه مشيت نعس وتفكرتك ..
خديجة .. سيري جبدي غير لخالتك نعيمة الغطا وشوفي واش يكفيها ..
نفخت ومشيت هبطت جبدت الغطا كنا ديجا جبناه من عند الجارا حيت طبعا ماغايكيفيناش ديالنا وبديت نشوف واش خوالي هوما هادوك كولها فين تلاح وفين تغطا شي ناعس فالصالون شي ناعس فالارض دخلت لبيتي كاع بنات خوالي ناعسين ونهال تاهية هزيت الشارجور لتيليفوني ومشيت لعند عائشة لبيتها حيت تما ناعسة غير هي ومها وكنعسو تانا وماما وبيت ماما كينعسو فيها خوالاتي والرجال خليناليهوم الطبقة لتحتانية كاملة عندنا مفرشة صالات وفيها بيت وحدة بقاو تما …
نضت فالصباح لقيت ماما ناضت شفت الساعة لقيتها التسعود جمعت الوقفة لقيت عائشة كترضع حسام وهازا التيليفون فيديها ..
زينب .. صباح الخير ..
عاىشة .. صباح النور ..
زينب .. يا ختي العيا العيا ..
عائشة .. واييه غير سكتي ..
نضت مشيت لطواليط وغسلت كمارتي وخرجت لقيت كولشي كينوض …
داز كولشي ورجع كولشي بحالو لخدمتو ودارو وقرايتو .. ورجعنا لروتينا الممل بعدا كندوز الوقت مع ماما وعائشة وحاضية امجد ومرة مرة نراري بحسام .. مزال نهال كاتقرا ومابقاليها والو للوطني .. وفنفس الوقت كنوجدو لعرس مهدي لي غايكون فشهر سبعة ..
جا رمضان دوزناه بصحة وسلامة وموراها بقينا حاضيين مع الباك ديال نهال والحمد لله داتو بخير وسلامة .. درنا ليها حفلة وعرضنا على صحاباتها … ومن موراها اراك للتوجاد .. قررنا مع عائلة بسمة العرس غايكون فمراكش .. بحكم تما فين شرا مهدي الدار وتما فين غايستاقرو .. اليوم درنا غانخملو الدار كاملة نضت على سعدي ووعدي وبقيت هاك بالاك سيقناها من الفوق للتحت وجمعنا الصالة سداري فوق لاخور تعاونا انا وماما ونهال وعائشة لي مرة مرة تمشي تشوف ولادها .. جمعنا الصالات بجوج ودزنا للبيوت خملاناهوم وصبنا الغطاوات .. بحكم بغينا نمشيو نخليو كولشي مجموع وغانمشي ندوزو تقريبا داك شهر فمراكش …
نضت للغدليه مشينا للحمام انا ونهال .. ضربنا تحميمة من داكشي حكيتتليها وحكاتليها خرجت كيف البلارة منورة من تم .. عاد رجعنا للدار طلاقينا مع محمد فالدخلة ..
محمد … ياه سبحان الله دابا عاد عرفت عندي غواتات ..
زينب … اسير شوفليك شي شغل وبسع عليا ماعندي خاطرك جيت مهلوكة ..
محمد .. شكون داها فيك ..
ماهضرتش معاه وخليتو كنگ على نهال دايرين كيالقط والفار نهار ومطال وهوما يتجاوبدو ونهار لي تنوض الحرب غاهربي اما انا كانسالي معاهوم بابا ديما جاي من جهتي موسعين عليا .. احح احسن حاجة ماتجي نتي الكبيرة مانتي صغيرة بنادم اخاف منك وفنس الوقت اديرليك القيمة ..
مشيت كملت الجميع ديال حوايجي كانحاول مانسا والو القدية فيها عرس ومراااااكش اهم حاجة لي المرة اللولة كنت مشينا فيها غير نخطبو اما دابا غانمشي ندوز فيها شهر ارا برع …

البارت 6
نضنا على النبوري فؤاد لي غادي اوصلنا غير حنا النسا أما بابا ومحمد غايتبعونا فالكار مزال فؤاد غايرجع حيت باقي عندو الخدمة اما بابا ماعندو لا خدمة لا والو مهني عندو محال ديال النجارة دابا ولا شادو فؤاد …
مع غادين والحر كيتزاد من اقصى حراارة لما كتر ..
وقفنا فالطريق جوج مرات كنرتاحو ماما فيها السكار وخسها مرة مرة ترتاح والا تموت لينا هنا لا قدر الله وزيد الترابي ومرة واحد باغي الطواليط مرة البجغوط باغي ياكل وخويا داير الخاطر ماعندو مايدير
غادا ممزكة على اغاني رحمة رياض كتحمقني وادهم نابولسي وحاطة راسي على جاجة ديال الطوموبيل، ونتخايل راسي كنحب ونبغي .. ايوا ماحبيناش ماحبيناش االلهم نديرو الحب فالهوا … درت لقيت نهال شادا فالتيليفون تميساجا وضحك ومرة تعض على شفايفها .. صغرت فيها عيني لاباس لي ماما بيناتنا اما نشوف اش كدير ..

زينب … اسبحان الله ..

دارو كلهوم شافو فيها وهي تطلع حاجب وهبطت لاخور ..
زينب … سبحان الله اختي ياك لاباس ..
دارت خديجة شافت فيها
نهال شافت فيها نفس الشوفة .. وبقاي حاضيااني تما ماعندك مايدار ..
زينب .. نحضيك ونتقب عيني فيك ايوا من البعد …
فؤاد .. سكتووونا مابقيتو تحتارمو لا كبير لا صغير خليونا غاديين هانين ..

ضربني السمك نيت وانا مالي تهجرو خليها البرهوشة الاخرا شويني فيك …
واخيرا وصلنا للأباغطومون افف .. هبطت كنهبط فالقاميجة لي مسكينة رجعات حالتها كاع تكمشات .. لقينا مهدي كاين تما تسالم معانا وبدينا نهزو فالسيكان .. صراحة الباتيمان وااعرة طلعت عيني كنحول فيها ولايني خويا علم الله شحال اكون طاحت عليه هاد الدويرة ماسولتوش ..
كان موبل دوليكس ونقية دخلة ديالها كاملة رخام ومرايات داكشي واعر مشينا للسانسور وطلعت انا وامجد ومهدي لوالة وشي سكان ومشا فتحلي الاباغطومون ناري كتتتحمقق من لداخل دخلت كنشوف ونبلق فعويناتي ..

زينب .. بصحة اخويا غزاااالة ..
مهدي .. هانتي بقاي هنا غانمشي نطلع الاخرين ..

حطيت من يدي امجد باقي يالاه كيتمشا قدامي وتمشيت تانا كنشوف الدار وندور فالبيوت وااسعة وكبييرة تكون فيها شي 180 ميترو فيها ثلاثة دالبيوت وكويزين وجوج بالكونات واحد على الشاريع فين نزلنا وواحد بحال متهوية بين العمارات وعاد صالون كبير مفتوح على المراح ديال الدخلة دالباب .. فنة فنة حمقاتني ..
وباينة دارها خويا على دوق بسمة حيت مفرشة على حقها وطريقها،، اخخ اودي الفلوس اديرو كولشي ..
غير شوية لحقات علينا ماما ونهال وعائشة تاهوما دخلو مبهورين وغير مصدومين فالدار ..
دخل حتى فؤاد طلع اشرف دار مهدي اما ماما كفضات وناضت تم نيت دير اتاي وسيفطات مهدي يجيب شي حاجة ..
درنا بحل كوتي خفيف ومشا فؤاد رجع باش اشد الطريق لبني ملال ..
دخلت لواحد البيت باينة داروها لدراري فيها جوج ناموسيات فالابيض تاجات موراها نهال وتلاحت على وحدة ..
نهال .. الله من اليوم هادي ديالي ..
زينب .. شتك تيقتي راسك مالها دارك ..
نهال .. دار خووويا ..
زينب .. بزعت ..
درت كنجبد باليزتي رديت شوية الباب كنسمع غير ماما مجمعة مع عائشة وانا بديت نبدل حواجي ولبست بيجامة ديال الدار وتلاحيت فالناموسية طحت مسخسخة ماحسيت تاداتني عيني ..
كنفيق على صوت ماما ..
خديجة .. انووضي ونتيي باغا تشركييي المغرب والعشاا ..
زينب .. ( نايضة مقلوبة ) شحال فالساعة ؟
خديجة .. ساعة لله نوضي نوضي ونتي عجباتك النعسة ..
مشات خرجات وخلاتني ماكرهتش نرجع نعس واه واش هاد الناس ماكيعياوش جمعت داك الشعر اللور ديل ونضت خشيت سندالة ديال الصبع فرجلي افف الحرارة .. خرجت مشيت نيشان للطواليط عاد مشيت عندهوم للصالون لقيتهوم قارمين حدا تلفازة بلازما كبيرة وجابدين على اتاي ..
عائشة .. ( وهي كتشرب اتاي ) النعاسة على سلامتك ..
طاحت كلسات وهي كترجع فشعرها .. الله اسلمك … شوية تفكرات ودارت عند خدوج ..
زينب .. ماما سبحان الله حلمت بحالي جبت مشة للدار ..
خديجة .. لواه نتي تجيبي المعزة .. ( خنزات فيها زينب وعائشة تكرشخات عليها بالضحك )
نهال .. ( دخلات عندنا من البالكون ) وخووتشيي والمنضررر وااااااعر بجهد …

البارت 7
نضت تابعاها تانا نشوف ناري اطلالة وااعرة نيت الضواو عاطيين والشاريع منور الغادي والجاي مع الموبل دوليكس كاتلقا غير الطوموبيلات الواعرين حدا الدار ..
نهال .. احح اختي التيتيز التيتيز ..
تانا حالة فمي .. الحديد الحديد ..
نهال .. تاري الصعد انا هاد الليلة نبات غير هنا باركة عليا ..
زينب .. تفاهمي مع خوك ..
ورجت دخلت هزيت الحرشة كانت دارتها ماما بديت ندهن ونضغم وندوز باتاي كان فيا بوهيووف ..
وفنفس الوقت عيني متبعين مع فظيلة ماعنديش معاها ولكن كاتعجبني بنت الحرام كاتعطي للواحد علاش كيقلب .. تسالات وهي دور ماما شافت فيا .. نوضي جمعي هاد الطبلة وطرفي داكشي ..
زينب .. لقيتيها فيا بنتليك يالاه نايضة منعاس ايوا هايها اخديديج ..
نضت على سعدي ووعدي كنت كتليكوم واعرة تكوني الكبيرة ياك ولكن هادا هو السخط كيرجع الشغل كامل عليك والصغيرة راهية راها مفشة ويديها مايقيصوش الما وااكن هانية منها ظربك منها تعليمة، نمشي حويدگة لدار راجلي ومايلقا فيا مايتعيب ..
( كتغسل الماعن ودندن غامعا راسها ) اييه تلات بيك الايام تاتلقا بعدا هاد الراجل .. وااااا شبااانييي دياالي واجييليي خلاص .. لي شافني كندعي لشيباني يقول غير حمقة ومقطعة الوراق .. وسييرو راكوم نتوما لي حماق اما انا بغيتو مول العقل ومول الرزانة ايمااااا قلبيييي ..
نهال .. اسبحان الله اختي، نتي باينة ضربة جن صحيح ..
زينب .. اضربك نتي اما انا بزاف على لالاه ..
نهال .. ( هزات كاس دالما ) الله استر ..
مشات وزينب كملات دوك الماعن وطرفات الدنيا هاكا قاعيدتها تقدي الشغل وددندن مرة على الشباني ديالها مرة على الخدمة هي وكانتها وشنو يقوليها راسها ..
نهار جديد وصباح جديد واليوم عاد غايحلو عينيهوم على مراكش بصح ناضت زينب هي اللولة وجدات الفطور وقادات وحطات كولشي فالصالون ورجعات دخلات مدرمة على نهال باقا شامخة جراتليها الغطا من فوقها ..
زينب .. نوض نوض نوض نوض نوض ..
ناضت نهال طافجة حالة عينيها فيها .. ماليك وااش هبلتي ولا صربة شي حمار ..
زينب .. وتي نوضي جمعي راسك نمشيو نستاكشفو مراكش نوضي نوضي ( بقات كتجر فرجليها ) ..
نهال .. واااششش نتيي حمااقيتي اوييلي طلقي من رجلييي ..
بقات معاها تانوضاتها صحا ورجعات لبسات سروال سبور فالباج غادي لذهبي والبيل نصكوم فالأسود فيه كتابة فالذهبي وهزات لاطروس دالماكياج مشات كاطير لحمام قبل ماتجيليها نهال وجمعات شعرها كوتشوڤال وبدات تصايب فوجها دارت غير ايكرون بلا لون مع بيضة كاتخاف على وجها من الشمس .. وخلات راسها طبيعية الشفار طوال وكحلين بزيت الخرواع لي ديرليهوم كل ليل والحنيكات حومر بزيت البليدية ( غير بنات بني ملال لي غافهموني ) وشفايف حميمرين ومنفخين شوية .. سالات وخرجات مع نهال لي جات تاهية تقاد مشات رشات ريحتها وهزات الساك والسبادري ومشات حطاتهوم فالباب عاد مشات للصالون لقات مها يالاه فاقت ..

خديجة … صبحنا لله فين غادا ..
زينب .. انا ونهال غانمشيو ندورو فمراكش ..
خديجة .. اييه ومعامن تشاورتو وباكم لي جاي ..
زينب .. خديديج الله اهديك ..
خديجة .. ماكانضحك تبتي الارض لاتمشيو تلفو ..
زينب .. واش من نيتك اماما واش حسابليك بنات عشرسنين خديديج راه قدي تزوجو ودارو الولاد ..
خديجة .. قوليها لراسك نهار جاو فيك دوك الخطاب كون تزوجتي وهنيتينا ..
ومشات اييه كيتي ولاهيلا برداتني احح مااالي يالاه فعمريي ربعة وعشرين شكووون قااليكوم باغا نتزوج انا .. ( عضات على شفايفها ) مين غير لا كان شي تيتيز بوكو عاقة علاش لا ..
خرجات نهال جات تاهية تفطر وصيتها تفطر مزيان حيت خارجين ندورو ماغاناكلو وماغانشريو والو تالقرعة ديال الما غانديها فيدي ..
خدوج تفطر ساكتة وتشوف فبناتها بنص عين كيلبسو السبرديلات من عذرتها تخاف عليهوم جوج عوينات لي عندها ..
خديجة .. عاينو هاينو نخرجو جميع ..
يالاه نايضة وانا نشوف فيها مخرجة عيني .. خديديج كلسي مع عائشة شنو بغيتينا نخليوها بوحدها ..
خديجة .. راها ماتبغيش تمشي اصلا عندها الترابي …
عائشة .. صباح الخير ..
خديجة .. اهاه عمرك طويل ابنيتي حنا غانخرجو نمشيو شوية نشوفو مراكش ..
عائشة .. اهاه صافي اخالتي انا نوجدليكوم الغدا ..
بنفسي الله اعطيك ماتاكلي اعائشة ..كتسولوني علاش مابغيتيش ماما تمشي حيت لا مشات خدووج غانهبطو عينينا الارض وماكاين لا تيتيز لا نبگ ..
البارت 8
مشاو خرجو مع خديجة وحدة منها والاخرى منها وهي وسطهوم حاضية عليهوم العينين داتهوم للمنارة ايوا وبداو اتصورو ويتبوزاو وحديجة دايراليهوم الخاطر .. دوراتهوم مزيان وساراتهوم عاد رجعاتهوم للدار تالعشية جاو سخفانين بالصهد والجوع .. لقاو محمد والأب جا ..
زوبير .. وعلى السلامة زربانين خليونا غاتانلحقو عليكوم بعدا ..
خديجة .. ( شيرات ليهوم ) هاد الجوجة صدعوني مابغيتش نخليهوم امشيو بوحدهوم ..
دخلو كلها فين تلاوحات بعدا يدرو الجهد عاد ناضت لالة زينب حيدات حوايجها ودخلات دوشات خرجات محممة لبسات بيجامة طويلة خفيفة ذهنات واحد صيروم لشعرها وخلاتو مطلوق هاكاك انشف ايوا وتجمعو اتغداو فواحد الجو عائلتي والنشاط والضحك ..
دازت ربعيام اليوم صبحات الحرارة كتشوط نيت كلها فين مليوح خلاص زينب فرشات ليزار فالارض بحكم مهدي باقي ماركب الكليما .. وصلات ديك السبعة .. نوضاتهوم خديجة يالاه اجيو هو هاداك بحكم غايمشيو اتعشاو عند دارهوم ديال سارة يالاه اتافقو على العرس ..
نضت دخلت تاني للدوش الصهد والموت كل شوية تعرقي واخا ماكاتخرج لا ريحة لا والو ولكن مانحملش راسي نعرق ونشف وخصوصا عاد دابا غادا عند الناس دوشت غابالما بارد بلى مانقصيش شعري وخرجت لبسات صاية فايتة الركبة بشوية فالفوز مع شوميز خفيفة فالبيض وفيها طريزات من اليدين فالشويبي .. هزيت البلاك دوزت لشعري دغيا غير شوية .. ودرت دفرة من جنب ورجعتو لجنب لاخور بقا مطلوق .. رشيت رحتي ولبست سندالة بلا وساك صغير فالابيض وخرجت لقيت كولشي نيت قرب اوجد .. تاكانشوف نهال خرجات من طواليط ضارباليك الماكياج ولابساليك واحد سروال مزييير دجين .. اييه تبارك الله
زينب .. شتك نتي مزيزة حسابليك غادين نحضرو شي سهرة ..
نهال .. ونتي شغلك ودخلي سوق راسك ..
زينب .. اهاه واخا ( غوت غوتة وحدا ) ماااااماااا ..
شافت فيا عائشة .. ويلي مالكي كتغوتي ..
خديجة طلات علينا .. مالكي هاوييلي حسابليك عايشة بوحدك ..
زينب .. واجي تشوفي بنتك كيدايرة ..
خديجة طلعات فيها وهبطات .. لا تبارك الله غاتمشي تمسحي داك الكمارة .. وتجمعي داك الشعر ولا نجي نوريك، تبارك الله ..
شافت فيا نهال شوفات دالقتيلة خليها باش المرة الجايا تعلم وتعرف راسها معامن ..
خرج بابا ومحمد وهي هادي مهدي تاني وصل فاياج بفياج ..
استقبلونا فالباب وبسمة تاهية لابسة قفيطين خفيف ..
كانت عندهوم ڤيلا صغيرة .. ومفرشة كاتحمق كان حاضر باها ومها وواحد خلاتها وختها ..
كلسونا فالصالون وكلسنا مجمعين وكلها فين شاد الحتيت .. وانا كالسة حدايا بسمة وعائشة وكالسين نتعاودو ..
تاشوية ناضت كاتعاون فختها وخالاتها حطولينا اناي والحلوة والتقيوتات الاكاجو والبيسطاج والمملحات ..
ايوا وخدمت شوية ديال التاريل والبروتوكول نهز الكاس بشوية وناكل فالتقيوتات كيفما كان الحال البنت خاس ابقا عندها البروتوكول لا فالكلسة ولا فالماكلة واخا بعد المرات كاتشدنا هاديك لي ماكاتعلم ولكن المهيم الواحد اشد فراسو شوية ..
ايوا تجمع داكشي ورجعات تحطات سالاد منوعة كانو جوج ربايع النسا فصالة والرجال داروهوم فصالة ملاصقة علينا ومفتوحة عليها مفارقة غير بالرخام ..
تحط العشا والديسير وتهز عاد كلسنا كنهضرو فالصح القاعا كانو ديجا ريزيرڤاوها بقا غير الحوايج والدهاز لي غانجيبوليها نهار العرس ..

باقي للعرس عشرين يوم واليوم دارت ماما غاتخرج هي وعائشة مع بسمة ومها .. خلاتني انا مع الدراري حاضياهوم جاتني هاديك لي ماكاتعلمش وانا كتجيني بالفيضانات خسني ضاروري النهار اللول بيها نحط تحتي للأرض .. أما نهال تلاحت مع محمد بقيت انا وبابا كنتفرجو شادليا الجزيرة هزيت انا كندور فالانسطا والفايسبوك وكنقلب على شي صالون واعر فمراكش نمشي ليه نهار العرس ..
تاشوية سمعت صوت ديال الزغاريت والتطياط ..
زوبير .. اش هادشي ؟
زينب .. منعرف انا غانشوف ..
مشيت كندردم لي فيا ماكافيني وراسي كيوزوز خسني نبرگگ ..

البارت ٩

خرجت نيت للبالكون تاكانشوف واحد الصالون تحتنا ناري عمرني شفتو ورديت ليه البال طول هاد العشريام لي كنت هنا ..
كنشوف عروسة مخرجينيها بواحد التكشيطة فالابيض والطوموبيلات مزوقين واقفين كيطيطو .. تاخرج شدليها العريس فيديها احح .. انا بقيت بحالي دايرين ليا مسلسل HD تاهزوها ومشا وانا باقا نبحلق .. شوية وهي طيح عليا اييه الكوافورة غير حدا الدار ونيت كاتبان فيها دوليكس .. دخلت عند بابا لقيت امجد كيلعب بتليفونو وخلاص حسام ناعس فرولاكس ..
زينب .. بابا غانمشي نشوف هاد الكوافورة لتحت على حساب العرس خمسة دقايق مانتعطلهومش دير عينيك مع حسام لا فاق عيطليا …
حركليا غير راسو مشيت كنطير حطيت عليا العبايا ديال ماما جيت فيها كيالفار فوسط الخنشة ولويت واحد الزيف .. غاحاطاه على راسي ومشيت هابطة كنجر فرجلي بسندالة ديال الصبع هبطت فالسانسور وخرجت لبرا قطعت الشاريع ودخلت عندها .. عندها داكشي غزال صراحة باينة فيه .. مع الدخلة طلاقاتني واحد البنت ..
البنت .. سلام حبيبة زيدي مرحبا ..
زينب .. وعلكم السلام ..
البنت .. بغيتي تقادي شي حاجة احبيبة ؟
زينب .. لا لا الصراحة أنا جيت عندي غير العرس دخويا حاضرالو هنا وعييت مانقلب على شي كوافور عاد عرفتكوم نتوما كاينين غير هنا حدا الدار ههه ..
البنت .. اه مرحبا حبيبتي مرحبا عتابري المحل ديالك ..
زينب .. شكرا مهيم انا بغيت نسولك على الميكاب لي كاديرو والمشاطي ..
مات جابتلي لي كاطالوك صراحة عندهوم غزال وزايد نيت، حطيت يدي علىًواحد المشطة كيجي فيها الشعر مدرج وكيبقا مطلوق وختاريت واحد الميكاب ثاني معاه وتصاوبت معاها على المهار قاتليا مزيان مين جيتي دابا حيتاش كاتكون الدنيا عامرة وديما كاتخرج العرايس وخصوصا فهاد الشهر .. درت معاها الثمن وكولسي واخا صراحة تقامت عليا غالية تقريبا ب 1700 الدرهم ولكن ماشي موشكيل المهيم طلعني غزالة ..
خرجات من عند الكوافورة ومشات قاطعة الشاريع وفنفس الوقت داتها عينيها لواحد لاجونص يالاه شافتها ديال كراء السيارات بضواو وطموبيلات مستفين حداها وصلات ليها وبقات كتشوف متسائلة حيت يالاه بانت ليها اليوم يمكن عاد فتحات، شافت فطموبيلات يالاه هزات الساروت باش تفتح كتوقف موراها طوموبيل مسطاسيونا فالشاريع، دورات عينيها ورجعات قلباتهوم دون اهمية ودخلات بحالها طلعات كتلعب بالسوارت تادخلات مشات طلات على حسام لقاتو مسيكين باقي ناعس ..
صلات المغرب وكشات كلسات كتفرج من بعد مامشا باها يصلي فالجامع .. تاكتسمع الصونيط ناضت حلات لقات مها وعائشة جاو معمرين فالميكات .. طلاقات ليهوم شدات من عندهوم ودخلو مجمعين على فين مشاو وشنو دارو ..
حطو داكشي فالصالون ومشات مها وعائشة يبدلو عليهوم وهي بدات تجبد اش داكشي تادقات نهال حلات ليها ..
زينب .. فين خليتي محمد ..
نهال .. طلاقا ببابا لتحت ومشاو اضربو شي دويرة .. ( شافت الميكات ) جاو اري نشوف ؟؟ ..
زينب .. رصاي تاتجي ماما ..
جات مها وعائشة فاقليها حسام جابتو كترضعو، وبداو احلو فداكشي وكلها يعطي فرأيو داكشي كولشي تقداوه على دوق بسمة طبعا، وشرواليها كاع لي قالها خاطرو طبعا دهازها واخا هي مامخصوصة من والو ولكن ولا بد من التقاليد، البينوارات والبيجامات والتواب دجلابة والتكاشط …
وجابو معاهوم واحد الخنيشات موراهوم كيجيو لاصقين ليدراجي عاد غايصايبوهوم ..
زينب .. احح انا ناوية نحيح فهاد العرس ..
خديجة .. ( وهي كتجبد ) الناس والدين البنات وانا والدة النگافات ..
نهال بدات تصلي على النبي خلعاتهوم ..
نهال … صلاة وسلاااااام علىىىىى رسووول اللله الاااااه جاه الا جا سيدنا محمد اللله ومعععااااا الجاه العاااالي روروروروروووووي ..
تبعاتها زينب وهي غادا مشات للبلازمة مع مبرونشيها مهدي مع الويفي دخلات لليوتوب وهي طلق الاغنية ديال صفاء وهناء ( خوكوم ) .. اوا وجهدات فيها على الجهد ودارت عندهوم مشات تطير وطيرات الريف من راس مها ..
خديجة .. ارييي لهناااا ..
دارت عندها وغمزات ليها .. قولو لخواتو خووكووم سالاااات عياااقتوووو سواارت قلبو راها عندي ( وهي كتحززم على نصها )) ..
غير بدات الضربة وخوووكوم ااااه وخوكووم البنااات ..
بدات اطلع وتهبط بنصها وضرب بجنابها وكتلوا وتعطي بشعرها تانهال جمعات الوقفة حيدات لاڤيست لي كانت لابسة .. ولواتها فالسما .. وبدات تعطي بنصها تاوصلو للمقطع ديال ..
وبعدوووااا علييه هاداا الوليد راه تاااع مااالييه
وبداو اضربو بشعرهوم الاخرى مقابلة مع الاخرى ياوا وتشوفي الشعورات كيتحيرو ويطلعوً ويهطبو .. ويضرو يظربو بنصهومً شعلو فعائشة العافية وماضت تاحية دردك معاهوم تاسالات الاغنية ..
طاحت عائشة عرقانة وزينب كاتلهت وتشيش على راسها كتحس بالفياضانات من لتحت كيهطلو ( فيها ليغيكل ) .. ونهال يالاه هزات تيليكوموند غادير واحد الاغنية تاكيسمعو الوارت كيدورو فالباب ..
ايوا وتشوووفووو اهاااااا .. ناضوو كيتجاراو نهال طفات دغيا تلفازة ولاحت تيليكوموند طارت للبيت وزينب جمعات شعرها باللهفة ومسحات وجها بالزيف واخا باين حممررررر والعرق هابط وعأئشة حنات راسها زعما كاتقاد فالحوايج دخل مهدي كيشوف ..
مهدي .. السلام عليكوم ( جاوبات عليه غير خديجة وشوية بقا كيشم بنيفو وخسر سيفتو ) اش هادشي كاينة كاينة ريحة الخنز ..
البارت 10
مع سالاها كيسمع الدقان رجع فتح لقاها واحد المرأة ..
المرأة .. خويا عافاكوم راني ملاصقة عليكوم ونتوما دايرين صداع بزاف وعندي دري الصغير مابغاش انعسليا ..
دار مهدي شاف فيهوم عاق بشي حاجة ماشي هي هاديك وهو عاود دار عندها .. سمحيلينا اختي ماعرفناش واش كاينين ..
المرأة .. ماشي موشكيل اخويا ..
ورجعات مشات هو سد الباب ودار بقا غير كيشوف مصغر عينيه ودا عنيه لعند اليتيلكوموند كيمليوح مشا لجيهت التلفازة وهزو مع شعلو وهو يتسمع ..

على مشمووم عياالتو ..
على سواط عيااالااتو ..
على عشااااق صحااباااتو ..
واولي ولي والي واهيا الملا ..
عيتيني بالكذوب يااا حبيبي ..

دغيا نقص وطفا التلفازة .. حشمو مارا ومهدي عاق بيهوم ودار عين ميكة تانطقات خديجة ..
خديجة .. وغير البنات بغاو افرحو شوية بيك وصافي ..
مهدي .. ( ضحك ) اودي هانية هانية ..
ضحك ومشا لبيتر بقات عائشة كتويل وزينب حشمات واخا طالقة مع خوتها ولكن كيجي المرات كتحشم منهوم ..
دخلات لبيتها عيطات لخولة بدات تخاسم عليها باش تجي بحرا يسركلو شوية قبل مايوصل لعرس واعدتها غير شي سيمانة غاتلحق عليهوم لتما ..
دازو الايام ناضو اليوم اضربوها بتسيقة للدار .. ولا بد انقيوها حيت غايبداو اجيو العائلة ..
هزو تاني الصالون وخملوه كامل كلها فين عطات الراس تسيق ولالة الحادگة لابسة واحد الشريط وحازمة على راسها وطالقاليك الاغاني الخاليجية كتمزك وتغني بحلوقها وعندها واحد الصويت .. كيحمق دور ودور وتبقا تغني ديما وكل مرة فين شادها الهايت ..
زينب .. ثااني رااااح ونساااني ذااااك الانااانييي ..
خديجة فرعاتليها مخا ماكرهات تمشي تجبدليها على داك الشعر راسها حازمة عليه بالحامض راكوم كتعرفو الامهات مين كيقربو العرايس والمناسبات كتبغي تحماق ماحيلتها لهنا ولا هنا وكل خطرا دور بلاليست لا تكون نسات شي حد ما تفكراتوش ..
زاااد الجرااااااح جلطة اجتني وغلطة انييي احطهااا بقلبييي ياا صااااح .. هاد الاغنية تبليت بيها ديال بصح ندور ونغنيها وعاد دابا مع التلفازة احح الله على ميوليي .. .. دزت على خديديج فالكوزينة كندن وانا نسمع الهضرة عارفاها من صباح وهي صابرة .. شربت كاس دالما ..
خديجة .. سيري طفي عليا دوك الشياطين .. وبدلي داك الصندالة كنقوليك راه غاتضربي بيها شي زلقة خايبة ..
زينب .. وواخا واخا يوووه ساليت اصلا ..
ومشيت راجعة نقصت شوية وانا نسمع عائشة كتعيط مشيت لقيتها فالبالكون كتجففف ..
عائشة .. هزي هاد الطاس ديال الورد ندوز من تحتو ..
مشيت ليها وهزيتو ناري شحال تقيل مربع وداك البلاستيك القاصح بحال الحديد وبقات هي دوز من تحتو …
زينب .. صافي ؟
دوزات اخر تدويزة وقاتلي صافي يالاه درت غانحطو ماحسيت غازلات بيا داك الصندالة وهو يتطلقلي الڤاز من يدي انا شداتني عائشة من لتحت مع كانت حانية كتجفف ولكن الڤااز تاهو بلاصت مايجي من جيهت البالكون تضرب بالحديدة ومشا لجيهت الشاريع انا طلقت غوتة مع الخلعة وانا نسمع شرشلااااااخ
صافي قلبي خفق من بلاصتو تهريسة ماشي عادية .. مع الطلا كنشوف الزاج ديال واحد الطوموبيل حديدة صحيحة اخواتاتي .. الزاجة ديالها القدامية كاع مشخشخة ماطلقا فيها مايتجمع ..
زينب .. ناري مي مي مشييييتت فيهياااا وااااااميييي ..
عائشة .. ويلي ويلي على مووصييبةةةة …

خرجت بسرعة من البالكون طلاقاتني منو ماما عاد غاتشوف الكارثة وموراها نهال ماديتها فتاوحدة ومشيت كنجري لبست عليا العبايا وحيدت الزين من شعري وطرت خرجت من الدار غادا هابطة …
وصلت لتحت مع الفتحة والتلفة صافي عيني دمعو مع الخرجة مع أنا كنخفف السرعة وملامح وجهي كيوقفو شويييية بشويييية …

البارت 11
واقف داير يديه فجيبو وضام فمو عندو كيشوف فطموبيل ببرود وكيطلع راسو شوية للفوق .. ورجع دار من جنب كيشوف الكوسان عامرين طراب وزاج والورد مزلع فيها تاشوية كيطلع عينو مع الفتحة دالباب ..
قلبي خفق بواحد السرعة حسيتو طلع وهبط .. وخصوصا كنشوف نضراتو نيشان متاجهين ليا ..
أنا رجعت كنترعد ماعرفت واش نقرب ولا نبعد الشوهة مارضيتش مارضيتش .. شفت فجاجة كنلاقاها تشخشخات على الاخررر وعاد طوموبيلا كتحمق وباينة فيها ساوية فليسات ..
يالاه غانهضر كنسمع صوت مهدي لي خلاه ايدور ..
مهدي .. ( كيشوف فيا ) نصر أش واقع اصاحبي اش هادشي ..
صافي انا طلقا دموعي ماقدرتش نحبسهوم البولة شداتني .. والله اخويا مابلعاااني وااحق الله زلقاااتلياا امهدي والله تازلقااتليا ..
مهدي طلع راسو كيشوف مو كاطل ونهال صافي فهم البلان تم نيت عقد حجبانو تم نيت نهض فزينب .. طلعي للفوق يالاه سربي ( وهو كيقرب ليها باش تسمعوًغير هي ) اش هاااد الحالة خارجة بيها طلعييي بحاااالك ..

عرفتي فهاد اللحضة مانتمناش لعودوتي طيح فيها مشيت راجعة وكل شوية وانا نضور نشوف فلي عيطلو مهدي ماعرفتش ماهضرش فخطرا كنشوف خويا كيقربلو وسلم عليه عاد بدا كيهضر معاه .. دموعي طاحو ماعرفتش علاش ولكن مارضيتهاش أبدا .. عضيت على شفايفي وبقيت كنضرب فراسي بشوية .. تفو عليك ازينب تفو تفو ..
رجعت مورا الحيط شوية وبديت نطل غير بنص عين ..
مهدي دخل لديك الاجونس وكنشوفو وهو مشا حل الباب وهز التيليفون كيعيط ودار وهو كيهضر تاحسيت بعينيه قشعاتني بواحد السرعة رجعت تخبيت ورجعت غمضت عينيي وعضيت على شفايفي ..
زينب .. اوووففف ازينب معامن طحتي ..
يالاه غانبغي ندخل وانا نزير على يدي ورجعت تاني درت طليت شوية كاتبان غير عيني اويييلييييي لقيتو باقي كيشوف لا وهاد المرة دااار ابتسامة جااانبييية نااااريييي مييييي ياا ربي نكون غاكانحلم….
رجعت بسرعة كنجري دخلت وسديت الباب ومشيت طلبت السانسور قلبي كيضرب كيضرب كيضرب ودمعة تحبسااتلي ماحملتوووش احصلني ناري شنو غاايقوول عليااا دابا شنووو ..
شوية وهي طلقها بابتسامة كتفكر ابتسامتو الجانبية لي دارها وهو كيهضر فاليتيلفون .. اححح طولتو لي غطات عليها الشمس مين خرجات لعندو والنضاضر لي كان حيدهوم ودارهوم فوق عينو مين جبد اليتليفون اهضر .. التيشورت فالأسود وباين منهوم زغيبات شعرو فالاسود خفاف مع يدو وساعة ديال الجلد فالاسود مزيناهوم لابس معاهوم شورط فالأسود باينين رجليه سمورية فايحة وصحاح .. السانسور تفتح وتسد وهي باقا كتفكر ملامح وجهو ..
تاخرجات ومشات صونات فالاباغطومون مع حلات ليها خديجة وهي تجرها من يديها واحد الجرا وسدات موراها الباب ..
خديجة .. واااش عوورة واااش تشللتي لجد طاسيلت بووووك عجباااتك الشوووهة لييي درتيييي ..
مقدرتش نحبس صافي تجمع عليا كولشي طلقتهوم فوجها دموعي طاحو وبديت نغوت .. وماااااشييي بلعاااااني شنووو واااش ماكااتفهمييش صاافييي عافااااك خليينيي هضرتييي تقاادااتليياااا صاااافييي ..
مشيت غادا وانا كنسمعها كتقوول شكووون بغيتييي اخلصهااا شكووننن رزيتييي خوووك ..
دخلت للبيت وشعطت عليهوم البابب وطحت فوق الناموسية مددة هزيت المخدة ولحتها ضربتها ماعرفتش ولكن اول مرة كنحس براسي تحبطت .. أنااا لي كنديير كساااب لمليوون الف خطوة وحلاات لياا فهاادي وطيحاات بوجهيي الأرض ..
طاحت تكيت هاكاك على ناموسية عارفة شنو تابعيني وعارفة هاد المرة مهدي ماغايدوزهاليش شفت نضراتو حدا عيني ..
بقات هاكاك ودموعي مابغاوش اوقفو ومرة مرة نمسحهوم كنسمع الهضرة ديال بابا ومهدي برا مابغيتش نطلااقا معااهوووم مالاقيا فين نحط وجهي تاتحل عليا الباب ..
عائشة .. االتييتيييز اختيي التيتييز اش داك الخير اربيي والكحل نعاماسي ..
زينب .. شارف غابعدي مني ..
عائشة .. وتي لي شارفة اما هاداك اهزني انا وياك ويهرب بينا اسبحاان الله سيدا حققات فيه مزيان ..
زينب .. عائشة عافاك ..
عائشة … بقيتيي تفاايلي على راسك بالشيباانيين تاهرستي لمو طوموبيل ايوا هالشيباني … طلقاتها بضحكة فالاخير مكربكة تاضحكات زينب بقات تطلقها بشوية تاناضت وهي كتمسح فعينيها ونيفها حمر ..
عائشة … وضحكي ضحكي ونوضي مسحي عليك الخناين نسيتي لموك التوجاد شنو باغا تخليني بوحدي ..
زينب .. ( رجعات تكات ) شنو قال بابا ..
عائشة .. ماقال والو قال لمهدي أنا نخلصو ولكن صدق مهدي كيعرفوو قاليك راه من عائلة بسمة أصلا ..
ناضت طاااافجة … امنيييييين ؟؟؟؟؟!!!!!!

البارت 12

عائشة .. ( فهماتها طايرة وعاقت بيها ) ايييييه ابنتي وداكشي لاش كنقووليك نووضي وجمعي راسك قاديه لابغيتي تديه ..
زينب .. ( قلبات عينيها ) سيري عليا وانا مااالي يكون تامنعرف منين ..
عائشة .. ايوا هااهيي فراسك ( ناضت جمعات الوقفة ) لا تقولي ماقلتهاش ..
مشات خرجات وحلاتني كنخبط .. واش انا فهم وهادي فهم ..
تفكرت ضحكتو لي دار ليا احح كتشدني التبوريشة والدوخة ومصارني كيتقلبو مالي انا مالي .. دابا من عائلة بسمة وشغايكون كيجيها ؟ .. اعودو بالله ازينب راه هرستيلو الطوموبيل هرستهاالو مسكين بقا فيا .. شخشختهالو .. الحاجة لي زادت عجباتني ماتعصب ماوالو بقا غير كيشوف بالسيييف صدمتووو كيقولو قيص راجل فراسو وماتقيصوش فطموبيلتو ..

ناضت الهضرة باقا كاضور ليها راسها ضرها، خرجات حانية راسها لقاتهوم كلها فين تلاح ناعس جاها القنط الصهد وداك قبل العصر وكولها فين مليوح .. لقات غير عائشة كالسة مجمعة مع خديجة فالبيت الصغيرة وكتنعس فحسام ..
خديجة .. نضتي على سلامتك ..
قلبات وجها دايرا فيها مقلقة ..
خديجة .. سيري للكوزينة غاتلقاي حطيتلك الغدا تما لابغيتي تحنجري ..
قلبات عينيها .. ماخسنيش
خديجة .. لهلا موتي ..
خنزرت فيها ناري واش هادو ماعندهومش القلب مانبقا فيهوم تاشوية يحزروني ومي لي ولداتني يا حصرة مشيت على سعدي وعدي نيت راه لاماكليتش نجيبها غافراسي جبت المرا باللحم لي طيبو وگلست ناكل وكنسمع الهضرا تيو تيو تيو ضرت لجيهت البالكون كيبانليا الخيال قربت كنسمع صوت نهال .. بقيت حاطة ودني كنتصنط هاد القردة مانعرف معامن شاداها .. قلبت فمي ورجعت بلاصتي براسها طلعوليا فراسي كاملين .. طاحليا البوگوص ديالي فراسي ورجعت نفكر فيه تاني باينة فيه كبير عندو بعض الزغيبات فشعرو وفاللحية بويض وحتا فالكاريزما ماتفوتيلوش الربعين .. تفكرت كيفاش طحت على سنادري مين شفتو يمكن حيت ماتوقعتش نشوف داك زين كامل .. تفكرت مين عيطلو خويا نصر اححح نصر نصر نصر نصر ..

دخلات نهال من البالكون لقات زينب ساهية مع الحيط ومبتاسمة ..
نهال .. لا دابا تأكدت خسنا نديوك لبرشيد ..
هزات الخبز فوجها .. راه غاتمشها تبعدي مني ولا مايعجبك حال ..
نهال .. ( مشات غادا ) الله استر يا ربي ..

ناضت جمعات داكشي ومشات خارجة وهي طلاقا مع مهدي شاف فيها وهي بقات تشوف فيه ..
زينب .. مهدي سمحلي اخويا على الصباح والله راه زلقاتلي من يدي والله السموحات ..
مهدي .. ماشي موشكيل اختي المهيم جات فالمعرفة ..
زينب .. ( مطقات بلى ماتحس ) فين كتعرفو ..
مهدي .. عمها ديال بسمة …
زينب .. ( حلات فمها عالاخير بقات غير كتمتم ) ا او ش شكان كيدير هنا ..
مهدي .. فتح لوكاسيون ديال الطموبيلات هاديك لي لتحت ديالتو ..
زينب .. هاكااك …
مهدي .. باراكة من الاسئلة وهالعار صافي ماتخملو ماتسيقو خليو الدار هاكا ..
عوجات فمها فيه ومشا بقات شحال ساهية وتفكر ..
دابا هو عمها ديال بسمة وبسمة غاتولي مرت خويا وحنا غانحضرو للعرس مجموعين مشااااء الله عليا شحااال كنفكر ..
مشات كتعض فشفايفها وتبتاسم وقلبها مفرفر لي يشوفها يقول تسطات .. صافي فرفر ليها العقل ..
كل نهار كتفكر فيه وكل نهار كتكون كالسة تاكيديها عقلها ليه دار بحال داك الفارس لي كيبان فجأة وكيسرق للعقل للأميرة وكيمشي، كل نهار تفكر واش غاطلاقاه فالعرس ولا لا وفرحات حيت لقاتو عمها دبسمة ومرة مرة طيح عليها لا يمشي يكون مزوج ولا خاطب ولا مصاحب ولكن كتفكر داك الابتسامة كتنسا كولشي داك الابتسامة حسساتها بحال شي فارة كطل على الفرماجة وحصلها مولاها، وكل مافعقلها واش غاتعاود تشوف الشيباني ديالها ولا لا وهادشي كامل محتافظة بيه لراسها ماقالتو لتاواحد تاعائشة ماعاوداتش جبدات ليها البلان بحيث نسات ومداتش الامر بجدية ..

ايوا الله اجيب لي يحصلنا 🙂

13
دازت ديك السيمانة واليوم جات خالتهوم سلوى ونعيمة وخولة بنتها واكرام ختهوم تاهية وكوثر بنتها دسلوى، وكل نهار ولاو كيتزاد العائلة وخصوصا ماعندهوم فين امشيو من غير ديك الاباغطمون .. ضطر مهدي يكري اباغطومون من نفس العمارة باش اتقسمو الضياف ليها ..
اليوم دنيا مرونة كولشي نايض كاينة الحنة زينب تعصبات كاتبقا ملهية غير مع الفطور والغدا والعشا ديال الضياف ناحلتهوم هاكا ماحليتهوم هاكا كاتعاون معاها غير خولة والهام بنات خوالاتها ومرة مرة عائشة بحكم عندها الدراري ..
وصلات العشية هزات القفطان لي كرات ملوي فالبوشيت ديالو .. وجمعات لي غاتحتاج ومشات عند مها لي غارقة تالودنيها ..
.. ماما هنا غادا الكوافورة غير هنا ..
حركاتليها غير يديها ورجعات دارت لقاتها باقا واقفة .. اش بغيتي ..
زينب دورات صباعها زعما الفلوس .. باش بغيتيني نصايب بصبعي ..
خديجة .. لاش ماگلتيها لباك
زينب .. بحالي زعما ماعارفاهش كيدار
خديجة .. قاعيدتكوم هي قاعيدتكوم تلاگيوني انا لباكوم يخ
حلات الجيب ديال فواطتها وجبدات الفلوس ملوية فرنسات ليها زينب جبدات منهوم واحد 300 درهم وعطاتها
زينب .. اش هادشي
خديجة .. سيري راه مانزيدكش البسييطة هي اللخرة خلي لابغيتي غدا تصايبي .. وماتكتريش تجي ماسخاليا داك الوجه تغسليه عاد تزيدي وماااديريش الكحل
زينب .. وصافي صافي ياااويييلييي
يخ درت غادا بحالي ماطلقلي داك الفلوس غابزز قاليك مانديرش الكحل ولامت قبل مانتزوج ديك الساعة عكروليا فالقبر .. السر راه اطيح على الغزالة واخا دير قبل منو طون دالماكياج .. بقات فالكحل
مشات عيطات لخولة نهال مابغاتش تمشي قاليك غاتصايب غالفدار هناتها .. تحركو للصالون غير لي حدا الدار .. صايبات زينب شعرها ودارليه بوكلي من لتحت وخلات وجها تاتصايبو راسها ماعندهاش الفلوس .. ولبسات القفطان كان فالأبيض وفيه الجوهر فالحمر ومطروز بالذهبي .. لبسات معاه سندالة عالية فالحمر وبدات تصايب الميكاب راسها فالمرايا علاما سالات خولة
كملات وشافت فراسها جات كتحمق مع ماكتراتش الميكاب فوجها وعينيها خلاتهوم عادين دارت غير شوية دالقهوي من الفرق والريسي ودارت عكر فالحممر جات خطيرة طلقاتليك الشعر اوا واجيو تشوفو ..لدرجة الكوافورة بقات حالة فمها نطقات بلى ماتحس ..
الكوافورة .. مشاء الله جيتي غزالة
زينب .. ( وهي مبتاسمة ) شكرا اختي عويناتك
خولة خرجات عندها دايرا ميكاب واعرة وصايبات شعرها سانبل لابسة قفطان بالحزام فالزرق بالسفيفة فالزرق غامق ..
زينب .. جيتي واعرة المسخوطة
خولة .. ( وهي غير كتشوف ) ناااري كون تشوفي نتي شحال جيتي فنة ويلي اصاحبتنا كتحمقي ..
زينب .. ( بفرحة ) حلفي ناااري وترتووني هههه
دارت كتشوف ومع تحريكة الشعر ديالها كيتحرك مع نصها العكر برزليها وجها بواحد الطريقة خطيرة ..
هزات البوشيط ودارت السلهام وهزات قفطانها شوية وخولة دارت الشال بحكم كدير الحجاب ومشاو تحركو خاريجن قطعو الشريع لقاو الطوموبيلات مصافين لي غايديوهوم وخصوصا غايصوكوهوم النسا اما الرجال غايجيبو مهدي فوق العود ..
طلاقات زينب مع نهال وعائشة واقفين كولشي بالقفطان بداو اشكرو فيها .. تاجا عندها فؤاد ..
فؤاد .. زينب هاكي غاتصوگي نتي داك السياط غاتبعي محمد من اللور ..
حركاتلو راسها وشدات من عندو الكونطاكط فرحانة .. دارت عند عائشة ..
زينب .. مين جاب مهدي هاد الطوموبيلات ..
عائشة .. ( غمزاتها ) من عند هاداك لي رزيتيه فوحدة ..
زينب .. ( عضات على شفايفها بفرحة حشمانة ) ويلي سكتي غايسمعنا شي حد ..
عائشة .. شوفليك الناس حشمانين جيتي غزالة لموك تقنتي وجهك ..
زينب .. راني زينة زينة ..
مشاو تحركو تستفو الطبوقة كلها فين تحط وكلها ركب فالطوموبيلات وزينب شدات بلاصتها فواحد السياط فالبلو مارين وااعرة دوزات يديها على الڤولون مبورشة مامتيقاش راه صايگة وحدة من الطوموبيلات ديال الشيباني ديالها .. ركبات معاها نهال وخولة وعائشة ولدها امجد مزال الصغير خلاتو لمها ماغاتمشيش ..
برونشات تيليفونها ودارت الاغنية دزكرياء الغافولي – دارني گلبي ..
قلع محمد هو اللول راكبة معاه مها وخوالاتها ..
وهي تبعاتوًمن اللور وعاد موراها خمسة ديال الذوموبيلات منهوم ديال الشيباني ومنهوم دعمامها ..
مشات طالقة الموسيقى بجهد وكطيط ويزغرتو .. عينيها كيبريو حاسة بواحد الفرحة فشكل قلبها كيفرفر تاوصلو لحدا الڤيلا لي لقاوها كاملة شاعلة ومنورة وكيشوفو النساا خارجين دعائلة بسمة وقفو الطوموبيلات كيطيطو ودايرين السينيال بالضواو ..
وحلات زينب الباب وزادت جهدات فالطوموبيل دارو دائرة كتشطح بيناتهوم وتشالي بالشعورات شوية تسمعو ( اللهم ومصلي علييييه ارسول الله جينا للصالحيييين جينا … ) صوت غليض درجال دارو كيشوفو خوهوم فوق العود ..
تخلطات الدنيا رجال وعيالات وجات الدقا المراكشية ..
وقفات طوموبيلة موراهوم ونزل كيقاد فصدايف ديال الشوميز من الفوق سد الطوموبيل ومشا غادي ..
كانت الدخلة ديال الڤيلا لتحت دايرين رجال والفوق غايديروًالنسا وديدجي مطلوق .. كولشي بدا كيدخل ..
زينب .. عائشة نسيت تيليفوني فاللوطو سبقيني ..
مشات جابت التيليفون سدات وتمات راجها مع الدرجة دالباب ماشافتهاش قصييرة .. وهي تعكل بالطالون مع الجنابي ديال الباب تاكاتحس بيد شداتها من جنبها وطلعاتها شهقات مخلوعة وهي تحس بالنفس ضارب فوجها ..

البارت 14

حسات بيدو على جنبها شهقات تاطلعات راسها كتشوف فعينيه كيدوزو بين عينيها بلعات ريقها وبسرعة نتافضات بين يدو حناكها حمارو بسرعة البرق هو جبد يدو لعندو وهي هبطات راسها تلفات والحروف تلفوليها بسرعة بدات كتلثم ..
زينب .. س سمحلي م مكنتش شفت الدرجة .. ( رجعات شعرها مور ودنيها محرجة وكتهرب فعينيها راجعة اللور ) ..
هز بصوتو عروش عروقها وحرك ليها يدو .. ماشي موشكيل تفضلي ..
صافي ذابت وقلبها كيضرب بواحد السرعة كتقول غايسكت تقدمات تاني بشوية ومشات زايدا مهبطة راسها تاشوية وقفات باش غادخل ودارت لقاتو غادي هابط للتحت ديال الڤيلا وهي تلصق على الحيط شادا فقلبها … ناري مي نااري نااري وااعبااد الله اححح رااسي ااحح قلبي ..
دخلات بسرعة طلاقاتها إيمان ختها دبسمة قبل ماتسلم سبقاتهاليها .. كاس دالما الله اعطيك الستر ..
بقات كضحك إيمان وكباتليها من سيدي علي كاس وعطاتها نزلات عليه فخطرة ..عافاك قوليلي فين الطواليط ..
إيمان .. واش واقعة معاك شي حاجة ..
زينب .. لا لا غير تخنقت ..
إيمان .. عايني أنا غادي نوصلك بشوية ..
مشات معاها تاوصلات دخلات زينب وسدات موراها الباب ..

حسيت براسي تخنقت حطيت البوشيط والتيليفون والسوارت داللوطو وشفت فالمرايا فزكت يدي وحطيتها على عنقي ..
تاسدات عينيها وتفكرات ريحتو وشوفاتو عضات على شفتيفها كضحك وبدات ضرب بطالون بين رجليها ..
عرفتي ريحتو حسيتها دخلات لفوسطي ناري يا خويا مالك على داك الريحة تطيح النسر من السما السابعة .. اما الشدة ديال يدو بلا منقوليكوم جنبي لدابا كنحسو باقي كيوزوز .. كنتوتر مين كنجي للمعقول علاش علاش اكيد غايكون حس عليا ..
طلعت نفس وخرجت من فمي .. صافي كالمي ازينب كالمي اصاحبتنا السيد باين بعقلو ومرزن تصرف بهدوء وبعقلانية واحترام نمووووووت اناا فموول العقل .. حتا الشدة حسيتها بحالي غير تحطااات .. مانديش عليه راه خايف ازير ونتهرسلو بين يدو .. جبدات من البوشيط العكر عاوداتو وعاودات رشات الريحة باش توگض واخا لي طلاقات معاه جابليها التمام ..
تمات خارجا كاتقاد فالقفطان .. لقات بسمة جابوها ودخلوها حشمات على التعطيلة غير گلسات عند مها قرصاتها على الغبرة قاتليها غير داخت ومشات للمرحاض ..

فين عرفات داك الحنة كيدازت طول الوقت وهي عقلها عندو كاتبتاسم بشوية كتعرفو من مور العاصفة والسخفة وكيجيو دوك الذكريات كيدوزو عليكوم بحال نسيم هواء البحر فموسم الشتاء .. بحال هاكا شداتها لحنية لنضراتو ولا لفمو لي كان قريب لوجها تاشافت الشعيرات البويض ديالو ولاباس لي ماقاصوها فوجها .. صوتو زعزعها واكثر حاجة لي زادت جهلاتها تعاملو المحترم معاها شنو زعما مايكونش عقل عليها ولا عرفها ..

رجعو للدار وكلها كيفاش تلاح وهي الليلة كاملة وعقلها معاه … تاتقلبات وشدات فقلبها ونطقات بصوت شبه مهموس .. نصر ..

ايوا اليوم النهار الموعود اليوم العراسية ديال خوهااا .. اراك للجراوات كلها فين غادي وفين جاي وزينب حمقوها وكل مرة مسيفطينها للقاعة تحط شي حاجة تسخسخات قبل ماتوصل العشية وكاتحاول تخلي راسها مزيانة باش تبان زوينة فالعرس حيت اكيد ماغاتفلتش الفرصة من انها تكون واعرة وتسلب نضرات الشيباني لي داليها العقل .. واخا رجعات تحشم تقول عليه شيباني مابيناش فيه نهائياااا ..
وصلات العشية دخلات دوشااات وجمعات التقاتق ديالها هادشي باش تعجبهوم واخا يكون العرس دالوزير راسها هو اللول غير اوصل الوقت تجمع راسها وحويجاتها وتغبر تاكاتصدمهوم مين كادخل عليهوم كيشي اميرة .. طلاقات لفؤاد دبرات من عندو ومن عند مها وباها ومهدي باش يالاه تكور حطة محطوطة .. هزات التكشيطة لي كراتها يالاه جابتها هاد الصباح وكيف العادة غاتمشي معاها خوخة .. وصاتها خديجة باش تلحق نيشان للقاعة حيتاش هوما غايمشيو قبل .. واصلا البنات كولها فين غايمشي يقاد حتا يمشيوًللقاعة حيت خديديج خسها تاني تسد الدار باش مايبقا فيها حد الحوايج والفلوس للاتمشي تهز شي حاجة ..
قفلات على حوايجها وجمعات كولشي التاويل والحداكة وكولشي اتجمع بالوقت باش تاحاجة ماتزهق ..
هبطات هي وخولة ومشات معاهوم تانهال والهام واكرام تقريبا بنات خوالها تما بنات عمتها وعمامها ماعندهاش معاهوم بزاف كلها يمشي فين اواتيه ..
غير دخلات هي كانت مريزيرڤيا طلعاتها واحد البنت لبيت خاص بدات تقادليها الميكاب لي كانت ختارت وعاد بدات تقاد ليها فالشعر .. وقاتليها تلبس التكشيطة باش تكمليها المشيطة ..
فالاخضر الملكي منبت بالذهبي والصفر مع صمطة ديال الصم وسندالة فالذهبي عاد شافت فراسها ..
البنت .. ختي قراي على راسك المعودتين عاد سيري مشاء الله عروسة وصاافي ..
زينب .. ( بفرحة مخلطة بحماس وتوتر ) توترت هههه ..
البنت .. اليوم تجيبليهوم التمام ..
ضحكات زينب وعاودات دارت كيفما كان برزاتليها عينيها العسلييين ودارت عكر خفييف بحالي ماباينش عطا واحد الجاذبية كتر لوجها وخصوصا المشيطة كانت خفيفة والشعر مدرج هابط مع الضهر واااو ..
دارت الاكسيسوار ديالها شوية ديال الذهيبات خدوج مامخلياش بناتها يخرجو خاويين ضاروري ماديرليهوم النغازي …
هبطات عند البنات لتحت حيت هي لي كانت مريزيرڤيا عاملوها معاملة خاصة عكس الاخرين شافوها كولشي بقا مصدوومم ..
الهام .. اليوووووم لاما جبتي الخطااب راك مسخوطة الواليدين

البارت 15

خولة تاهية عاد خرجات من واحد البيت دالماكياج بقاو مصدومين شافو فيها كانت دارت الشدة بالحجاب ديال المناسبات ولابسة تكشيطة فالأسود مزوقة بالنقري بواحد الفصالة كتصطي مع السلهام ديالها من الوور جات فنااا فناا ..
كوثر .. ناري يا البنات اش هاد الزييين احح اليوم مايخلييو مايقولو على عائلة العرييس ..
زينب .. ( بكل ثقة ) ومالهوم راهوم داو خوويا الزين والتبووگييصة الله احجبو اعرفو مين داك الجذع من داك الشجرة ..
زغرتاات نهااال على هاد الهضرة وبدااو كيصلييو على النبيي نشطو الكواافوورات بقاو فرحانين معااهوم .. سالاو وبداو اتسنااو فمحمد غايجي اديهوم .. بدات زينب تغني ليهوم بصوتها الاغنية ديال صفاء وهناء داني وديتو تاوصل خوهوم وناضو منهوم لي لبس العبايات ومنهوم لي لبسو السلاهم بحال خوخة وزنوبة .. وخرجو عند محمد ركبو بدا تاهو يتعنب عليهوم تاضرباتو زينب للقرفادة ..
ومشاو غادين كيصفقو فالطريق محيييحين تاوصلو للكوافورة عند بسمة هوما لي غايجيبوهاا هبطو كيصليو على النبيي وفنفس الوقت زنوبة عينيها كيزكلو وكتقول غاتشوفو منعرف اجي اجيب بنت خوه تاهو .. والو بقات تاخرجات بسمة مشاء الله جات كتحمق صوروها مع مهدي وشطحو تما بالدقة المراكشية وتصافو الطوموبيلات موكب قد السخط مع بسمة عائلتها لاباس عليها تقريبا كاملين عندهوم الطوموبيلات .. وركب كولشي متاجهين للقاعة كيطيطو ..
تاوصلو لتما وهبطو تاني مهبطينها بالزغارييت والدقايقية .. وشعل المصور الكاميرا داخل معاهوم وزينب كل حراكتها كاديرهوم برزانة دايرة الحساب لايكون الشيباني ديالها كيشوفها من بعيد زعما فيلم هندي .. نفخات وتمات غادا .. دخلو للقاعة مع الجوق بدا يغني دخلة العروسة وركبات بسمة فالعمارية وتصافو البنات كيشيرو ليها ..
ودارت زينب مشات كلسات فطابلة جيهت عائلتها لقات خولة سطاسيونات ..
زينب .. جاني الصهد ..
خولة .. غير سكتي داكشي باش تانا كلست خسرت الفلوس على كنارتي مافيا لي يدوبلي هادشي ..
زينب .. انا 3 دالمرات وانا نقوليها ترش عليا غير باش ارصاليا هادشي ..
كلسات حداها عاد كتشوف مها كادور هي ومها دبسمة كيسلمو على الناس ويرحبو بيهوم ..
حطو العروسة من العمارية وداوها لجيهت البرزة كتصور مع مهدي وزينب غير ساهية ودور عينيها بين الرجال لاتشوف صاحب دعوتها مابانش ليها .. حتا دورات عينيها كاتبان ليها جداتها دبسمة وهي توگض .. تاهية باقا صغيرة وشادا فراسها بقات عاقلة عليها من الخطوبة وباينة حارة من عينيها وتمشي وتجي دايرا مابغات ..
خولة .. واش هاديك هي جداتها دبسمة ..
حركاتليها زينب راسها وردات عليها .. يا ختي ماباينش فيها لي شافها يقول مها تبارك الله ..
زينب .. وراه لاباس عليهوم اصاحبتنا اتلقاي عندها الخدامات كيديروليها لي بغات ..
خولة .. زدتي فيه ماشي تالداك الدرجة ..
زينب .. احبيبة راه جدها دايال بسمة كان من دوك المستعمرين الكبار دالمغريب فايامات الاستقلال وبقاو عندو الاراضي وكولشي وراك عارفة الدولة كيفاش كادير لهادوك بحال هاكا ( زعما بشوية ) يعني غاتلقاي عندهوم الاراضي وكادخل فلوس صحيحة جيهت اكادير و44 عندهوم فيرمة تما ..
خولة .. اييه وهانتي تاني مهدي طاح عليها نيشان ..
زينب .. ايوا جدهااا تانتي زعما هي ..
خولة .. كيف كيف المهيم الشان والمرشان ..
محمد .. ( نزل عرقان هو ونهال بالشطيح ) شتكوم نتوما كالسين بحال دوك العكايز غاتكونو شادينها فشي وحدة هنا غاهضرو هضرو ..
زينب .. اجمع راسك اسي ساليت من تحاير وشد قاعك للأرض راه ماما من الصباح وهي تغمز تجي تقجك ..
نهال .. سكتينا ..

هبطات بسمة باللبسة الثانية والجوق لي جابو محييح نيت وكيعرف يلعب كينوض القاع من بلاصتو ..
زينب .. انا تحصرتك غانوض للمرحاض ..

دارتها سبة ونيت تخوي حاجتها تحصرات غالبسطريس لي شدها ..
طلعات لطواليط كان الفوق دخلات قضات حاجتها معذبا نع دوك التكاشط وخرجات حطات البوشيط حدا المرايا غسلات يديها وجبدات العكر الحمر بحكم حسات بفمها نشف مارا من عكر الكوافورة حلاتو دارت وحطات قربات من المريا تمسح لي خرجليها شوية .. حتا كتوقف واحد البنت قاصت بيديها العكر طاح وهي ضور زينب ..
البنت .. ( بالفرنسية مبعككة ) باغدون ..
طلعات زينب فيها ونزلات .. ماشييي موشكيل ( صغطات عليها ) ..
حنات باش طلع العكس مع عفطات على التكشيطة تاكاتزلق ليها يديها وماغاتهبط بصبعها بداك العكر غير على داك البنت من اللور خرطات ليه خطو طويل عريض شاد من نصهها تلتحت ..
ضارت البنت مخلوعة وهي تصدم … وااضفااااك شنووو درتتتيييي نتييي ..
طلعات زينب مطلعة عكرها لي مسكين تهرس بقا فيهااا يالاه شراتو غالي ورجعات شافت فيها .. سمحيلي مادرتهاش بلعااني ..
البنت .. شنووو واااش نتييي حمقة وااش شفتي شنو درتييي ولا لا ( عينيها غرغرو مع عندها قفطان فالباج ايوا تخايلو تكون فيه واحد التخريطة بالعكر الحمر ومن اللور من النص ) عوورة نتييي ..
زينب .. ايوااااا حتاارمي رااسك قتلييك سمحييلليياااا ماشي بلعااني ..
البنت .. وشنو غانديير دابا بسماااحتك ( كترجع تشوف فالقفطان ) شيتتت شييييتتتتت
زينب .. انا اصلا مامضطراش نطلبها منك حيت ماتستاهليش ..
وخلاتها وزادت حيت اصلا مابغاتش تزيد معاها كتر خافتها لاتكون من عائلة بسمة ولا شي صاحبتها وتصدق مزبلاها وهي ماخسها صداع هزات البوشيط وضربات بشعرها اللور ومشات خلاتها كتبخ الدم ..

16
هبطات كيف العادة الانضار عليها كاتحسهوم غايختارقوها .. مشات غادا تاگلسات ..تكتشوف هاديك البنت هابطة ودايرة عليها الشال من جيهت نصها بقات فيها ولكن ماعجبهاش التصرف ديالها .. كون دوات باحترام تقدر تحيد تاتكشيطتها وتعطيهاليها ..
خولة .. فين كتشوفي ..
زينب .. هاديك البنت راهية ..
خولة .. ( شافتها ) ماالها ؟؟
زينب .. قصتها ماشي بلعاني بالعكر من اللور ..
خولة .. ( ضحكات ) ههه اويلي ..
زينب .. والله ..
كيشوفوها غادا لعند جداتها ديال بسمة ..
خولة .. واهياتا مشات عند جدات بسمة ..
زينب .. ( قلبها بدا يضرب ) شكون زعما تكون شي وحدة من بنات ولادها ..
خولة .. غالبا .. واكنًاهم حاجة انها وشات بيك دابا هههه ..
زينب .. براسها تمشي انبگ خسراتليها المورال تفو ..
خولة .. تانتي عادي كاتوقع المهيم غير ماوقع تاشي موشكيل ..

بقات كاتنفخ ماعجبهاش تمشي توشي بيها واخا يكون لي كاين تاديك البرهوشة طلعات ماساهلاش ..
ناضت باش تمشي تصور حدا بسمة ومهدي ونهال من الجهة الاخرة تاشوية عاود ثثاني جا حتا محمد وفؤاد تصورو الخوت كاملين ..
ويالاه غاترجع جرها هاد المرة فؤاد وتاعائشة لي يالاه جات مع الدراري .. وشطحو العائلة كاملين مع بعضهووم واحد الشوية بدا فؤاد اغوت اطلقوليهوم الشلحة وداكشي لي كان نيت .. طلقو الحيدوس ايوا اجي تشوفي ناضو عائلة مهدي حيت من جوايه شلوح بني ملال ..
تجمعوو كاامليين ودارو دائرة كبييرة دالحيدوس ناضت تاخولة كوولشيي وجابو مهدي وبسمة الوسط وبداو اضرو عليهوم كيهزو فيديهوم وكتفهوم ( تحية للأمازيغ – جهة زمور بلادي ) ومهدي تاهو كيحرك اليدين لبسمة لي كتحاول دير بحالهوم واخا اصلهوم من سوس ولكن مابينهوم غير الخير والاحسان ..
زعمو حتا عائلة العروسة ناضو تاهو يحركو فالكتفين وزهات الدنيا .. وبداو كينساحبو شي وحدين حيت الممر عمااار ديال بصح ..
مع الدورة لي غادورها زينب كتلمح جداتها دبسمة كتشوف فيها شوفات مفشكلين .. زينب حنات راسها ورجعات حمرة عرفات ديك البرهوشة غاتكون وشات بيها تعصبات ديال بصح جات تصلحها عوراتها دابا بالمزيان .. مشات كلسات ماحاملاش راسها وكرهات العرس … حيت حتا حبها مابانش ..
شوية جات عائشة كلسات ..
زينب .. فين تعطلتي اصاحبتنا ؟؟
عائشة .. يا ختي راك عارفة حسام رضعتو مزيان خليتو عند ماما مشكينة الله اسمحليا منها .. ( بحالي تفكرات وهي ضحك ) اهه حقااا التيتيز راه بزىرا ناري يا ختي على تبوكيصة ..
زينب .. ( بلهفة ) كيفااش شكوون شمن تيتيز ..
عائشة .. غابشوية عليك هانااري ههه الشويرف ديالك لي رزيتيه مشكين فاللوطو راه واقف مع بابا وباباها ديال بسمة وفؤاد دابا عاد رجع لعندهوم تما ياختي واحد التبوكيصة بلى مانقوليك ..
زينب .. ( شداتها البكية ) وماالو تامادخل ..
عائشة .. هاي هاي قول السيدة باغاه ادخل ..
زينب .. منيتك وانا مالي ..
عائشة .. وباز كمارتك صحيحة ..
بقات كالسة على احر من نار الجمر علاش مايدخل وتشووفوو بغااات تشووفو .. ماكرهاتش تمشي طير وتشوفو كيفاش جا ..
مشات طلعات بسمة وبدلات اللبسة وستفو الطوابل غايتحط العشا ودارو الطابلة ديال عائلة العروسة والعريس بوحدها الوسط هبطو بسمة بالصلاة والسلام مع مهدي كلسو فالطبلة ..
جات مها ديال بسمة كلسات حداها وباها تاكانشوف نصر تاهو وقف قدامهوم وشد بلاصة حدا باها عرفتي قلبي فررفر واخيرا شفتو لابس حطة مقتوولة شوميز فالأسود محلولين جوج سديفات من الفرق مع سروال كلاص تاهو فالاسود والصباط فالاسود اش هاد الزين اميمتي اشهادشي ..
عاد حشيت بالفرحة رجعاتليها كنشوف ماما مشات كلسات وبابا ناري حسدتهوم فهاد اللحظة حيت تافقنا فالدار الكبار لي غايغلسو فؤاد تاشوية شافت فيا عائشة ..
عائشة .. نوضي ازينب
زينب .. كيفااش !!
عائشة .. نوضي نتي بلاصتك هاديك انا ماغانمشيش ..
زينب .. لا اويلي اش كااتقوولي لا لا ماما قاتليك نتي لي غاتشمي

عائشة … زينب نوضي قبل مانتقلق ايواا داباا
نضت عاضا على شفايفي يالاه غانمشي لداك البلاصة تاكتعمرها ختها ديال بسمة وجات جداتها وجدها
شفت فماما ليشافت فيا واحد الشوفة زعما غير رجعي لبلاصتك
عرفتو تحطييت فواحد الموقف لا يحسد علييه تفوو حششمت لاباس لي كان عاطيني بالضهر والا كنت تشوهت بالبيااان
رجعات حناكها حماارو صراحة منضر خايب ولاكن فالعراسات اي حاجة توقعييها الفعيال مابين العائلات غير نتاضريها
حاولات تبردها عائشة .. وماتعشات كاع حيت صافي بصح دابا كرهات العرس كامل
وهو غير تعشا وناض دغبا وخرج بحالو .. كملات داك العرس غابززز غير سالات بسمة بلاغوب صافي خرجو كاملين تستفو فالطموبيلات ومشاو كيطيطو فالشاريع وهي صافي تخسرات كانت كالسة فالطوموبيل القدام حدا محمد وكتشوف خسها غير فاش توصل لدار
صبح الصباح قولي الطهر نايض كولشي مقلوب يالاه كيحطو الفطور دخلات زينب عليهوم مبتاسمة غابزز بواحد البيجامة والصهد كانو غير حوالاتها مجمعين وبناتهوم تما
خديجة .. صباح الخير دوزي تفطري باش نديرو الفطور
حركات ليها غير راسها تانطقات خالتهوم نعيمة
نعيمة .. ايواا يااخوااتااتيي نقوليكوووم بنتي خولة جاو فيها الخطااب
كولشي دار فرحاان
خديجة .. بصاح شكوون
نعيمة .. جات عندي جداتها دبسمة قاتليك بغات خولة لولدها الصغير عجباتها وعطاتني النمرا قاتليك شوفي البنت وردي عليها
خولة .. ههه اويلي اماما شكون فيهوم
نعيمة .. هاداك لي كان گالس معاهوم فالطبلة سميتو نصر
حسيت بودنيا تسمكو فهاد اللحضة

البارت 17

نعيمة .. جات عندي جداتها دبسمة قاتليك بغات خولة لولدها الصغير عجباتها وعطاتني النمرا قاتليك شوفي البنت وردي عليها
خولة .. ههه اويلي اماما شكون فيهوم
نعيمة .. هاداك لي كان گالس معاهوم فالطبلة سميتو نصر
حسيت بودنيا تسمكو فهاد اللحضة .. ماشي تسمكو لا حسيت بالوقت وقف .. ضرت شفت فخولة ضحكات وهي تشوف نهال فيها ..
نهال .. ناااريي مااتقووليليش هاداك لي كان كالس حدا باها ديال بسمة ؟؟؟؟ اوييليي ياا ختيي كيحمممقق نااارييي انا حساتبليااا مزووج ..
نعيمة .. لا باااقي عزري وقاتليك مو شافت خولة من ليلة الحنة وعجباتها وقاتليا شوفي شنو تقول ونرد عليها يجيو اخطبو ..
ناضت خديجة وقفات كتصلي على النبي وناضت نهال كتغرت وكولشي كيضحك خولة حنات راسها عاضة على شفايفها حشمات جوج لي كانو غير كيشوفو اولهوم زينب لي صافي تصمكات أنا عائشة تاهية تصدمات وكتشوف غير فزينب ..
خديجة .. وهااادييي خباااار زييينك ثااااني تبااارك اللللللههه تباارك الله هي شي مناسبة ثاني ..
نعيمة .. على مالي نفلتهاااا خولة تدييه السيد رجاااال ماشتووش تبارك الله كيدااير ..
نهاال .. وااااع عرس ثااني عرس ثااني ..
ناضت زينب تسلتات مارضليها تاحد البال مع الجمامع والفرحة والزغاريت مشات دخلات للطواليط غير سدات الباب وهي تكا عليه عاضا على شفايفها عاد وعات بالصدمة وهي تنزل دمعة خفييفة من عينيها وقلبها كيضرب كيضرب كيضرب .. وكاطلع النفس بزز شدات على قلبها زادو دموعها طايحيين ماقدراتش تفهم احساسها وهي باش كتحس وقفات حدا المرايا كترعد تكات عليها وحلات الروبيني على الجهد باش مايتسمع وهي طلق صوتها كاتبكي وكتغسل وجهها .. شتي كون كاننت تعرفو تزوج ربما كانت تدوزها بجغمة دالما ولكن باش تخطب بنت خالتها ختها وصاحبتها متقدرش تصبر ..
زينب .. حوفيييك ازييينب حووفييك خووفيييك اهئ اهئ هادي ضرييبتك تعلقي برااجل مااشيي دياالك ( كاتعاود ضرب الما فوجها ) شكاانديير انا يا ربييي مال قلبي تاتعلق فيه بحاال هاكااا اهئ اهئ

خولة ضارت فرحانة كتقلب بعينيها على زينب .. خالتي فينراها زينب ..
خديجة .. ( بفرحة كتهضر مع نعيمة ) سيري شوفي منعرف ..
ناضت خولة مبتاسمة مشات حلات الباب مابانتليهاش .. اويلي فيناهييي هااديي ناري واش باقي ماسمعااتش هههه غاتصدمييي ههه ..
تاشوية سمعات الما فالطواليط وهي دق فالباب .. زينب نتي هنا ؟؟؟!

سمعت صوتها باش غانجاوب يا ربي شنو نقوليهااا حاولت نغطي صوتي ونضمسو وجاوبت .. هااناا شوية ونخرج ..
خولة .. هههه وخرجي خرجي تسمعي اخر الاخبار غاتصدميًهههه ..

تصدمت نيت اختي بقاتلي شي صدمة وحداخرا شفت راسي فالمرايا وزدت غسلت وجهي باش مايبان فيا والو عاد فتحت الباب ..
خولة .. ىيلي مالكي ..
زينب .. ( دارت راسها عادي ) مالي كيجيتك ..
خولة .. شوفي عينيك حومر ..
زينب .. بالسيف اختي راه ماناعسينش يوماين دابا العيا ..
خولة .. ( ضحكااات وشافت فيها معليا حجباانها ) ايوااا ياا ختي جاااو فييااا الخطااب ..
زينب .. ( دارت راسها تصدمات زعما ) شكوون ..
خولة .. عمها دبسمة ههههه نااريي يااا حتي ماقوولييش مااقشعتييهش حيت نتي اللولة لي خاس تكوونيي قشعتييه كنعرفك كااتمووتي على بحال دووك الباگس ..
زينب .. ( دارت ضحكة صفرة ) لا ماقشعتش ههه ..
خولة .. يا ختي جات مو لعند ماما وقاتليها باش لابغيت اجيو اخطبوني هههه يمكن شااافني وعجبتو وقالها ليا يااااااي ..
زينب .. ايواااا مبرووووك اختيتو ..
خولة .. ماعرفتش راسي صراحة علاش فرحانة ههه ولكن غانطيير نااريي تيتيز تييتيز وفلووس ناري شبغيت كتر ( طارت عنقاتها ) ماتخافيش غير نتزوجو وثاني نضبروليك من عائلتو ..
دورت يديها مورا ضهرها وطلعت راسي للفوق حبست دموعي ماخسهوومش اطييحو لا ابدا ماخسهومش اطيحو هادي اختي ازينب ختتييي مايمكنش نكوون حسدتها ولا غرت دابا مايمكنش ..
بعدات خولة وشافت فيها .. ناري بنتليا مارة مهلوكة ..
زينب .. واييه عييت وعاد ( استنشقات ) بحالي غايجيني الرواح ..
خولة .. افف وشربي شي حاجة وتغطاي بعدا غير علاما درنا الفطور فالعشية ..
حركاتليها راسها جات خولة دايرا وهي تعاود تشدها زينب .. فرحتليك اخولة والله تستاهلي ..
خولة .. ويا ختي تانزيدوو نشووفوو مزيان باينة فيه كبيير، ( شافت فيها ) ياك قتليك رااه غيير هادوك لي تقيلي تحلمي بيهوممول العقل مول الوقار ..
زينب .. هههه ايوا ماغاتلقاي ماحسن ..
مشات خولة لعندهوم للصالون وزينب ماقدراتش تزيد مشات رجعات للبيت وتكات دموعها هابطين بالسكات، وكتسمع الضحك والتقشاب تاكاتسمع الباب تحل ..
زينب .. ماما انا ناعسة راسي كيضرني ..
عائشة .. ( جات كلسات ) هادي انا ازينب …

البارت 18 ..

عائشة .. زينب قوليلي مالكي ؟؟
زينب .. مالكي والو اعائشة راسي دارني ومافيا لي يهضر ..
عائشة .. زينب قولي بلي تانتي تصدمتي وبقا فيك الخال راه انا لي عارفاك فهادشي كامل ..
ناضت زينب وشافت فيها .. اه اعائشة بقااا فياا الحااال اه حيت عرفتي تصدمت بزااف ماتوقععتشش ماتوقععتش وماشي شي وحدة بعيدة عليا لا خولة اعائشة ( طاحت ليها دمعة من عينيها ) خولة ختي ختي وبنت خالتي تحطيت فواحد المرقف ماتمناهش لعدوك شنو غاتقولي حاسدة بنت خالتي ولا غرت منها اه غرت منها حيتاش حيتاش ( طاحت الدمعة الاخرى ) أنا كنت شفتو اللولة ..
جراتها عائشة ضاماها لسدرها حيت حسات بيها وعرفاتها بلي جاتها صدمة صعيب تعلقي بشي واحد وتبغيه بصاح لو كان طلع مزوج تقدر تقول الحق عليها حيت غلطات ولكن لا هو خطب بنت خالتها ..
مشات دايزة وعوجات فمها ونطقات مع راسها .. الهام .. ماكانش احسابلي لهاد الدرجة محسادة ازيينب حسدتييي صااحبتك لهاد الدرجة طلع قلبك كحل بنت خالتك يا حسرة تفووو صدقو لي قالو مايبغيليك الخير غير واليديك ..
الهام كانت سمعات الحوار ومشات وهي كتلعن فزينب حيت صدماتها وطبعا اي واحد سمع هاد الهضرة غايدي نضرة خايبة على زينب ..

بقيت كنبكي ماعارفاش راسي علاش كنبكي والله ولكن يمكن بصح تعلقت بيه فهاد الشهر لي كل نهار نتعلق بيه وخصوصا نهار الحنة تعطالي واحد الامل قلت يمكن لاشافني فالعرس يقدر تكون بيناتنا شي حاجة ولكن جاتني الصدمة وهادشي كامل والله ماشي حيتاش غايخطب لخولة مستحيل نفكر نحيد لختي شي حاجة ابدا ولكن كيغاندير نشوفو معاها كيغاندير منقدرش نشوف فعينيه منقدرش .. بعدت على عائشة ومسحت خنايني ..
عائشة .. عافاك حاولي تنساي والله حيت بانليا القدية غاتكون جدية يعني مسحي دموعك ..
زينب .. ( شافت فيها عاوتاني بعينيها مدمعين ) علاش اعائشة زهري انا هاكا ..
عائشة .. ( ضحكات كتشوف فعويناتها ) شش ماتقوليش هاكا الحمقة دابا تجيبي سيد سيدو صافي مامةتابش وتكتاب لبنت خالتك حشومة ديري بحال هاكا ماتخليهاش تاخد عليك نضرة هاكا أنا عارفة قلبك بيض وعارفة وحاسة باش نتي حاسة ولكن ماتخسريش ختك ..
طلعات عويناتها الحميمرين والمدمعين .. عندك الحق هاديك ختي وصافي مامكتابش ( طلعات نفس وهبطاتو كتنهد ) غانطمر كولشي وغانزيد ..
عائشة .. هاكا نعرفك ( جراتها باستها من حناكها ) الزييين الزيين الضرااافاااات ..
زينب .. وصافي هههه نوض نباارك لخوولة هههه ..
عائشة .. يالاه دابا ههه ..
ناضت زينب خرجات وعائشة بقات كتشوف وتنهدات .. الله اصبرها يا ربيي..
دخلات زينب دوشات مع الخرجة كاطلاقا مع خديجة .. فين كنتي مخشية نتييا من الصباح وانا نقلب عليك ..
زينب .. مريضة اماما راسي دارني ..
خديجة .. زيدي لهنا نشوف ( قلبات ليها راسها ) احااي شي عرينة هادي عرينة عايني نصايبليك شي كينة دالراس وسيري لبسي حوايجك باش نوجدو يالاه نجيو مع الوقت الناس غايبداو ادخلو ..
حركت ليها راسها ومشيت باقا بالبينوار دخلت لقيت نهال وكوثر مجمعين عطيتهوم بالضهر وبديت نبدل ..
نهال .. انا فرحانة غير حيت عندنا عرس ثااني ..
كوثر .. اححح أنا قلت لخولة فعرسك نضبرو على شي حد من عائلتو التتيز يا ختي ..
نهال .. اه ولابليييك الشوميز مزيرة اففف مت مت ..
كوثر .. ايواا راه ولا راجل خولة دابا ههه ..
زينب .. البنات راسي كيدرنييي سكتوونا شوية ..
نهال .. اجي نتي مالكي هاد النهار ..
زينب .. ( دارت عندها يالاه لبسات السوتيامات وكدخل فالجوهرة خفيفة ) كلت لييك راسي دارنيي ..
نهال .. ( تعصبات ) وماالكي كتغوتي الصعر ..
زينب .. نهااال غااتقودييي ولاا غانخرج فييييك سميييي ..
كوثر .. صافي نهال نوضي يالاه نمشيو نشوفو فين وصلات ماما ..
ناضو خرجو وخلاوها لبسات داك الجوهرة ورجعات شعرها اللور فازة تاتضرب مع ضهرها وكلسات على الناموسية كتنهد مزيرة على راسها ..
دخلات عليها الهام بحكم حوايجهوم كاملين كاينين فداك البيت وهي تشوفها ماعضراتش مشات نيشان كتهز فحوايجها تاشافت زينب فيها .. باقين ماجاو بنات عمامي ؟؟
الهام .. ( ببرودة ) باقي ..
زينب .. فيناهي خولة ..
الهام .. ( بلا ماتشوف فيها ) ماعارفاش نوضي شوفيها ..
زينب ( يالاه غاتهضر تقوليها مالكي كتهضري هاكا تاكادخل مها ) ..
خديجة .. هاكي شربي هاد دوليبران تفشي شوية راسك ..
عطتهاليها ومشات الهام خرجات بقات زينب متبعاها بالعين .. ماما واش الهام مقلقها شي حد ..
خديجة .. منعرف علاش ؟
زينب .. بانتليا ماشي هي هاديك ..
خديجة .. براصها شوفي راسك دابا راش افوت عليك مين غايكونو جايين عائلة بسمة نوضك ..
زينب .. وشكون غايعاونك ..
خديجة .. انوضو لوخرين اتكعدو مالكي اتبقاي خدامة عليهوم السيمانة كاملة ونتي تحرثي بصحتك تاخديتي الدقة كلسي رتاحي وهاك، مالهوم محنيين شغل العگايز ..

البارت 19
بقيت متكية فبلاصتي هازا التيليفون تادخلات عندي خولة ..
خولة .. الزين فين شاداها ..
زينب .. والو اختي هانتي كتشوفي كنتلف الوقت ..
خولة .. كيبقيتي بعدا شوية ؟؟
زينب .. شوية عطاتني ماما واحد الدوا شوية دابا ..
خولة .. قوليلي قوليلي شوفي عندي قفيطين وقندورة قوليلي شكون حسن نلبسو راك عارفة خسني نبان واعرة منعرف يجي ..
زينب .. ( تنهدات وناضت كالسة ) اري نشوف ..
عطاتها بفرحة وهي تحط يديها على القفطان .. لبسي هادا غايجيك زوين ..
خولة .. احح عليك وخلاص .. نتي غاتماكيلي ضاروري ..
زينب .. اوك ..
بدات تحيد خولة باش تلبس وزينب كتحقق فيها ..
شنو زعما لي خلاه يختارها عليا شنو لي زايد فيها هيا وانا مافياش شنو زعما نكون بنتلو ماهياش من مور لي وققعلينا نهار الحنة .. بقيت ساهية تاشفت فخولة ونطقت .. خولة مابقيتي كتحسي بوالو جيهت مهدي ..
شافت الابتسامة بدات تنحى من وجها غمضات عينيها بشدة ورجعات فتحاتهوم وكلسات حدا زينب .. زينب انا الصراحة منكذبش عليك كنت منجاذبة لمهدي بزاف ومن صغري وانا كنشوف فيه داك الشوفة ديال الراجل ولكن هو ديما كانت معتابرني ختو وعمرو ماداها فيا وهانتي كتشوفي دابا ( حركات كتافها ) ولكن الخير فيما اختاره الله مكتعرفيش ربي شنو مكتبليك وهانتي شوفي ربي جابلي راجل كامل مكمول بخدمتو بوقارو بفلوسو بكولشي ..
زينب .. ( ابتاسمات ابتسامة خافتة ) بصح يمكن تعذبتي بزاف ..
خولة .. ختي كولشي كيفوت والزمان كيخليك تنسا كولشي عادي كولشي مع المكتاب .. ( ناضت كاضحك ) ودابا صافي نساي علينا هادشي ووريني وحدة من الخطط ديالك باش نطيحو المرة فخطرة ..
شفت فيها مطول وابتاسمات هاد المرة من قلبي .. وراك طيحتيه عاد ..
ماقدرتش نكمل العضرة حيت الصوت تحبس فيا حسيت باش كانت تحس خولة ونهار قتليها خويا غادي اخطب وقاتلي انا قلبي تهرس وشحال سمعتها داك الليلة فالتليفون كتبكي .. كنت كنقول خويا عمرو عطاها فرصة علاش تشبتات بيه ولكن دابا بصح حسيت بيها ويمكن هي عامات كتر مني اما انا غير فمدة قصيرة حسيت براسي تعلقت ..
يمكن ربي كيعاقب مهدي على طريقي واخا ماليا ذنب ولكن خسني نتحمل هادشي لي مكتاب كيفما قالت الضحكة لي ترسمات على وجه بنت خالتي مايمكنش نكون انا السباب باش تحيد مانقدرش ..

ناضت صايبات ليها الماكياج كاتحاول ضحك وتاهية صايبات لراسها شوية غير باش ماتبانش صفرة وكلسو يهضرو تاجات قاتليهوم خديجة راه غايجيى ناضو كيوجدو هزات زينب البلاطو لي فيه التمر وخولة لي فيه الحليب دار تجمعات وتقادات ومهدي وبسمة جاو لي دخلوها لبيتها باش تلبس حوايجها، عاد بداو اسمعو الدقة المراكشية من بعيد جايا طلو من الشراجم بانوليكوم ومشاو عابطين مع دروج العمارة لتحت ..
وقفات زينب برا حدا خولة بجوجهوم هازين البلاطوات والبنات من مراهوم كيصفقو تاوصلو لقداهوم دقايقة مع طموبيلات وهبطو عائلة العروسة مهبطين الدهاز والفطور فالطبوقك .. هز باه ديال مهدي واحد العود عامر فلوس وبدا يشالي بيه والدقايقة كيضربو وتخلطات الدعوة بالشطيح والزغاريت كاع لي ساكنين تما كيطلو قلال حيت اصلا داك الشيريع راقي .. زينب مبتاسمة للعائلة العروسة لي كيهزو من عندها ومن عند خولة باش ادخلو وكيرحبو ..
تاشوية كاطلع عينيها وكتشوفو جاي يمكن عاد هبط من طوموبيلتو وعينيه على عينيها نيشان .. قوسات حجبانها وهبطات راسها بسرعة بالعة ريقها دارت كتشوف فخولة لقاتها مامسوقاش كضحك للناس .. وعاودات طلعات لقاتو وقف حدا اللوكاسيون ديالو كيسلم على فؤاد وولد عمها كان تما .. ومرة مرك يشوف فيها ..
هبطت عيني بسرعة .. اعودو بالله لا لا راه كيشوف فخولة كيشوف فخولة ..
ماقدراتش طلع عينيها .. كاتاخد نفس وعائلة بسمة كتوقف عليها كتبتاسم ليهوم من لتحت .. تاشوية كتشوف رجلين كيقربو ليها حتا كيوقف قدامها بطولتو ودخامتو حسات بالشمس تغطات عليها .. طلعات عينيها شافت فيها حالاهوم عالاخير .. كترعد ..وكتحس بعينين خولة تاهوما حداها ماقدراتش تشوف فيها ..
فؤاد .. زيد اخويا مرحبا ..
نصر .. باركة الله فيك …
يالاه غايطلع يدو باش اهز التمر تاكاتخوا بيها يديها وكيطيح البلاطو مشعترفالأرض ..

نعستو ولا باقي !
البارت 20

بقيت واحد خمسة ديال الثواني مبلوكية كنحاول نفهم شنو وقع دابا كنسمع خولة كضحك بالحس والبنات من موراها يقولو ويلي ويلي .. تاهزني صوت فؤاد .. ختي واش لاباس ..
رمشت وشفت فيه وحركت راسي باه وهبطت دغيا وانا هابطة زلقات عيني لعندو لقيتو داير ابتسامة خفيفة ورجع جوج خلفات اللور .. هبط فؤاد تاهو معايا وجات تانهال كتجمع ..
نهال .. لا دابا بصح تأكدت راكي مريضة ..
ماجاوباتهاش غير كتجمع بالسكات اما العائلة كانو كيدلخو والدقايقية .. هززها قفؤاد من كتافها .. شنو دابا كتحسي براسك مزيان يمكن غير السهير هاداك مع الدوخة ..
حركتلو راسي درت لقيت كولشي تقريبا كان دخل بقات غير نهال كتشوف فيا وفؤاد مشا هاز داك البلاطو .. جات شداتني من يدي ..
نهال .. زيدي شش بشوية عليك ..
بقات جاراني من يدي وانا هازا الجوهرة من اليد الاخرى وداخلة .. كانو منهوم طلعو فالدروج وكاين لي طلع فالاسانسور حيت الدار قريبة غير فالايطاج الثاني ديال الرجال لي فالايطاج الثالث ..
تسنينا تاجا الاسانسور وركبنا ..
نهال .. مالكي شنو وقعليك اصاحبتنا ويلي ..
زينب .. شش عافاك راسي غايطرطق ..
نهال .. فخبارك هادا هو لي هرستيلو الطوموبيل داك النهار هادي تشويهتك الثانية معاه ..
زينب .. ( بينها وبين نفسها : ماتقوليش الثالثة ) يااه مكنتش عارفة شكرا على المعلومة ..
نهال .. صافي سكتي ههه حرمتي مسكينة على خولة اللحظة كانت نارية تعطيه الحليب هههه ..
زينب .. ( نفاجرات عليها ) واااش اناا فحلييبهاا صاني وااش كااتشوفييني مشوهة وكاتقووليلي خولة الله اهديك ..
مشات خارجة ونهال غير كتشوف .. اش قلت انا دابا ..
داخلة لدار حالتي منعاودش كيدايرا تنيرڤيت ديال بصاح فينما نتلاقا معاه توقع شي موصيبة نورمال منكونوش بجوج، دنيا كانت عامرة صادفت معاهوم مخرجين بسمة من بيتها بحوهرة فالابيض وطالقة الشعر كيزغرتو .. مشيت كلست فكرسي فالدخلة لقيت الدنيا عمرات .. تاكانحط عيني على جداتها ديال بسمة كتصفق فرحانة وكتشوف فبسمة وفجنبها شاداها خولة ومن الجهة الاخرى عائشة كانت غاتكون زينب ولكن بقات لتحت .. ..
زينب .. ( شداتها البكية ) تفو تانا زهري مكوز يخخ وجهي وجه الزبل ..
كلسوها جنب مها حشمانة وجابوليها التمر والحليب تحلي بيه وكيزغرتو .. وطلقو الموسيقى فالتلفازة وسدو الباب من حيت الرجال كاينين الفوق ودايرين الطلبة ..
أنا شافت في ماما وجات عندي .. جا فؤاد عطاني البلاطو وقالي اش وقعليك عويينة ابنتي ضربااتك صحييحة ..
شافت فيها .. عادي اماما هانا اصلا هاد العرس ماعرفتو كيف داز ..
بقات كالسة فالدخلة ماتزعزعاتش، غير كتشوف .. شافت ديك البنت لي خسراتليها الضوسي البارح كانت كالسة تاهية ومرة مرة ضحك مع بسمة .. قلبات عينيها فيها هي سبابها .. وبقات كتشوف خولة جات كتسلم على جداتها ديال بسمة، وتبتاسمليها والاخرى كذلك .. تنهدات ودورات عينيها كتشوف فالبنات كيشطحو مع الموسيقى .. وختها تاشوية وهي توقف وقفة نيت ومشات لببيت هزات واحد الشال ورجعات، قلبات ليهوم الشعبي، وطلقات الشعر من القراصا .. وهي تربط على الخصر ديالها ودخلات لفوسط خالتها وبدات تعطي هاك بالاك .. تابداو اصفقو ليها ويضحكو وفنفس الوقت كتحاول تاهية تنسا وتبرد الغدايد وهي دخل معاها ختها كتهبط بالشعورات ايوا وتشوفيليك كولشي بقا غير حالين فمهوم فالشعورات وفالشطيح .. دخلات تاعائشة بيناتهوم وتزادت كوثر وشوية تالهام ..
غير خولة لي بقات كالسة حدا جدات بسمة زعما دايرة فيها الحشمة .. لخرين حيحو وجات زينب كتجري جرات مها ومت بسمة دخلو بيناتهوم كيشطحهوم وحمات القعدة وبدات تنوض ودور عليهوم وتشطح المراح ديال الدار رجع كيدردج .. بحكم ماخاداوش راحتهوم مزيان فالقاعة وحماو القعدة هنا بسمة عجبها الحال وبدات تصفق وضحك .. وجداتها مبتاسمة ومرة مرة تبقا كتشووووف فزينب .. وترجع ضحك مع خولة ..
اما لالة زينب مابقات داياها فتاواحد تشالي وتشطح ولي بغا يموت يموت كتبرد الغدايد فالشطيح كيف عادتها نهار تشدها ماتخوي تاتحرك النص

هااوركزيي ياهااه هاوشطحيي ياهااه ياولعبيي ياهااه وهياناري

البارت 21
بدا الغدا يتحط قولو العشا طاحت زينب كتشيش وواحد خالتها ديال بشمة قاتليها تبارك الله عليك .. ضحكاتليها وناضت تعاون مها يحطو الغدا كان داكشي كيدخل من برا طايب جايبينو عائلة العروسة .. تحطات ليهوم سالاد كبيرة بلي فخوي دو ميغ وداكشي فن كلسو كياكلو كانو ثلاثة ديال الربايع وعاد مالين دار بيهوم رباعة تقريبا .. دخلات زينب عند بسمة كانت گالسة فالبيت ..
زينب .. سلام ..
بسمة .. ( ضحكاتليها ) اهلا بالزيونات تبارك الله عليك ..
زينب .. ههه ربي اخليك كيبقيتي لاباس كيدازت ليلة البارح ( وغمزاتها ) ..
بسمة .. ( هبطات راسها حشمانة ) لاباس كيف العادة .. عرفتي دابا غادي دخل عندي جداتي وماما وماماك وحشمانة نوريهوم داكشي ..
زينب .. ( باستغراب ) اناهو ؟؟
بسمة .. صباحي ..
زينب .. اويلي واش باقا عندكوم هاد القاعيدة اويلي ..
بسمة .. ماشي انا بصراحة ولكن جداتي مصرة ماعندي مندير حتا مهدي مابغاش غير قتلو لا وصافي باش يبقا فخاطرو ..
زينب .. ماعندك ماديري ضاروري ناغانسمعو للناس الكبار ..
بسمة .. واييه مي حشمانة ..
زينب .. صراحة انا وحشمت دابا بلاصتك ( ضحكات بشوية وكملات حتا بسمة تاكيشوفو نيت دخلات عندها جداتها ) ..
ربيعة .. اهلا اهلا بعروستنا ..
زينب .. بقات كتشوف وناضت حانية راسها راجعا اللور تسنات غاتقوليها شي سلام صدق مشات لنيشان لعند بسمة ماسرطاااتهاش بلعات ريقها ومشات خارجة كاطلاقا مع خديديج ورشيدة مها دبسمة ..
خديجة .. ( بالحس هضرات بالشلحة ماش مايفهموهاش ) سيري ديري الصواب هاحنا راجعين ..
حركاتليها غير راسها ومشات خارجة دخلو وسدو الباب عضات على شفايفها ومشات خارجة للصالون كلسات حدا خولة كانو باقين كياكلو الديسير بليكلاص ..
خولة .. فين كنتي ..
زينب .. عاد فكرتي فيا قبيلة خليتيني واحلة ومشيتي ..
خولة .. اويلي يا ختي ماشتيش نتي الشوهة لي درتي مالقيت فين نحط راسي وعاد انا حشمانة منو وزدتي كملتي عليا ..
زينب .. ( حسات براسها تقرسات ماحملاتهاش تهضر هاكاك ) وخااا هاكاك كون غير بقيتي تهزي معايا غاداكشي ..
خولة .. أنا شفت نهال قلت صافي وعاد مشيت طالعة مع مو راك عارفة ضاروري ماخسني نباليها متولة اخيرتها تشرفني كنجمع التمر منيتك هههه

بقيت مصدومة فنفسي بحالي تقول غير شافت عكوزتها قلبات عليا، ماتوقعتش هاد الهضرة من خولة واخا يكون جا لي كان على الاأقل تهزي معايا غير لي طاح وهي كانت أقرب وحدة ليا، كمدتها فقلبي وسكت نستاهل نيت مي ڤغي ماشي بلعاني درتها ولا حيت شفتو ، راسي كان دارني ومين وقف هاكاك عليا توترت ماحسيتش باش طاحليا البلاطو ..
وصل الليل وصافي ناض كولشي باش غايمشي بحالو .. تسالمو مع بسمة واجيو تفرجو ثاني ففيلم جديد ديال البكا صراحة قاصحة ولحضة صعيبة وتانا اثرات فيا وبديت نبكي غابوحدي انا راه لادبانة تقتلات حدايا تبقا فيا ماكانقدش نصبر ..
وقفت انا وعائشة وحدايا خولة ي ولات ديما فالامام طبعا عادي تستاهل راه غايوليو دار شيخها، جاو بداو كيسلمو علينا وشوية وهي تجي تداك بنت عم بسمة سلمات ودارت فيا غير ابتسامة صفرة ودازت سلمات على خولة اودي غاسيريي ماتسوقليك حد كون مابقيتي فيا البارح كون وريتك، جات جداتها ديال بسمة سلمات على عائشة يالاه غانمدليها حنكي وهي تفوت غاضحك عند خولة، حسيت بالدنيا دارت بيا والموشكيل ان الامر لاحضاتو عائشة وحتا خولة .. لي غير فاتهوم دارت شافت عائشة ..
عائشة .. مال هادي معاك ؟؟؟
زينب .. ( زيرات على يديها كتحاول تصبر غير باش ماتخسرش شي حاجة ) سكتي دابا خلي اللييلة دوز على خير ..
خولة ماعضراتش بقات ساكتة تاخرجنا كولشي ومشيت انا نشيان لبيتي حيدت داك الجوهرة وخبطتها فالناموسية وكنلبس بيجامتي وانا كنترعد عرفتي اكفس حاجة هو بنادم اديرك تحت صباطو بحالي نتي ماكايناش، بقيت كنعض على شفايفي تاخرجو منهوم الدم علاش ديرليا بحال هاكا منعرف بصح ناض موشكيل بيني وبين بنت ولدها ولكن ماشي تالهاد الرجة لوخرا ندوزوهاليها نقولو صغيرة عليا واخا كاتبان قد محمد، ولكنًهي لي شارفة وهارفة لاش ..
عاودت خرجت كنلقا خالتي سلوى غادا بحالها بحكم راجل خالتي عندو الطوموبيل، بقات غير خالتي نعيمة وتالهام غاتگلس . ناويين قاليك عاد غايضورو فمراكش ..
خوات الدار بقينا غير حنا وخالتي وبناتها مع الهام وخلاص عروستنا بسمة ..
وصل الليل بقاو مجمعين كان حتا مهدي وبسمة كالسة حداه وبابا ومحمد وفؤاد كانو مجمعين كيهضرو على العرس ويضحكو وزينب ساهية حدا البينات لي كيهضرو بيناتهوم .. تاشوية ناضت غاتنساحب ..
زينب .. انا غانمشي نعس عييت ..
خولة .. اويلي دغيا !؟؟
زينب .. وي راسي ضارني ..
ومشات غادا ونطقات خولة .. مافهمتش مال زينب هاد النهار ..
الهام .. ( قلبات فمها ) راها مريضة مسكييينك ماسمعتيهاش ..
مدات خولة ماجابت وكملات حتيتها ..
تالشي وقت ناض كولشي معطل بقات غير خديجة كتقرقب فالكوزينة كتجمع باش تمشي تاهية ترگد تاكيجي فؤاد ..
فؤاد .. الوليدة شي كاس دالما ..
خديجة .. باقي منعسيتيش ..
فؤاد .. الصهد كيقتل .. ( شد من عندها كاس دالما ورجع شاف فيها ) اه حقا ماقالش ليك الوليد ؟؟
خديجة .. اش قاليا !؟
فؤاد .. عمها ديال بسمة !! طلب من عندنا زينب ..
خديجة .. اشنووووو !! ..

البارت 22

خديجة .. اشنوووو ؟؟؟؟
فؤاد .. مالكي كتغوتي الواليدة ..
خديجة .. ( هضرت بشوية باغا تنذب ) كيفاااش خطب زينب واش كاتسطا ..
فؤاد .. الواليدة عرفي اش كاتخرجي واش بنتليك دري صغير السيد هضر معايا ومع الواليد باغي البنت وقال نتشاورو معاها ..
خديجة .. وااش هاداك اسميتو نصر ؟؟
فؤاد .. الواليدة قوليليا شنوو الموشكييل مالكي وليتي هاكا !!
خديجة .. الدري خطباتلو مو خولة ..
فؤاد .. ( حك اللحية ديالو ) وايلي مايمكنش ؟؟ السيد راه ماغايكذبش الواليدة راه بعقلو وعارف اش كيقول كيبانليا تخالفو هو ومو ..
خديجة .. ( هبطات مع حنكها كتنذب ) وييليييي على فضييييحة ويليي ويليي ..
فؤاد .. شمن فضييحة اميي الله اهدييك تعيذي بالله مافيها باس كيوقع الغلط السيد راه بغا زينب ماشي خولة ..
خديجة .. ( كضرب ففخضها ) سكت سكت انا ماعندي بنت غانعطيهااالو لماكاتابش لبنت ختي بلاش منو صاافيي ..
فؤاد .. لا حول ولا قوة الا بالله سيري تنعسي هانتي غاتبداي تخربقي ..
مشا وخلاها كتغدد وتمرغض وكتفكر وشنو غادير مع بنت ختها ..

صبح الحال ناضت زينب هي اللولة لقاتها تسعود دالصباح سمعات سقيل باينة كولشي باقي جابد عليه ..
مشات للطواليط قضات حاجتها وغسلات وجها جمعات شعرها كعكة ورجعات للكوزينة كاتصايب الفطور، تادخلات عليها نعيمة ..
نعيمة .. صباح الخير نضتي ..
زينب .. خالتي !! صباح الخير ..
نعيمة .. خدوج باقا ناعسة ..
زينب .. ( وهي كترض المقراش اطيب ) اييه ديكشي لي بانلي ..
نعيمة .. ( كلسات فالكرسي ) احاح ارجيلتي من اطيب ابنتي داك الما اريلي منو شوية ..
زينب .. واخا اخالتي ..
نعيمة .. اييه ففف ماعرفنا هاد العرس كيفاش داز ..
زينب .. ( مبتاسمة وهي كتصايب اتاي ) واييه اخالتي ايوا الحمد لله داز على خير ..
نعيمة .. ( عضات على شفايفها كدور راسها ) اييه اش باقي تابعنا عاد ديك الزغبية اايجيو اخطبوها ..
زينب .. ( باقا مبتاسمة ) ايوا نشاء االله نكونو معاها تاهية ..
نعيمة .. نشاء الله غاتمشي معانا منهنا داروري غاتعاونينا راك عارفة نتي لي عند خولة ..
زينب .. ( تنهدات ) انشاء الله اخالتي داروري ( حيدات المقراش ) هاكي اخالتي ..
نعيمة .. اري الرضىى ..
مشات وبقات زينب ساهية موراها تارجعات كتجبد الفرماج والكوفيتير ..
شوية بشوية بداو انوضو وهي دخل عندها خديجة .. صباح الخير شتك فقتي بكري ..
زينب .. ( وهي عاطياها بالضهر ) ضرباتني الفيقة مابغاش اجيني النعاس ..
خديجة .. ممم ( وهي كتشوف فيها وتفكر فكلام فؤاد لي ماخلاها كاع تنعس الليلة كاملة وهي تخبط ) فيناهي خولة ..
زينب .. ( دارت شافت فيها باش تجاوبها لقاتها كدور فعينيها ) منعرف شتك كتسولي مالكي ..
خديجة .. والو ( خنزرات فيها ) حطي وباركة من الاسئلة شحال فيك ..
مشات خلاتها مصدومة .. مال هادي على الصباح سبحان الله

صايبات ليهوم الشفنج والحرشة وحطاتهوم معروفة بالشهيوات ديديها مايخطاوهاش .. قادات كولشي جا باها كيجمع الصلايا ويشوف فيها مبتاسم .. تبااارك الله على بنتي الحادگة ..
دارت مبتاسمال باستلو اليد .. اخليك لينا ابابا ..
زوبير .. ( بعد ما كلس ) كيصبحتي مزيانة من هادشي بعدا ..
زينب .. البارح راسي كان مطرطق عليا اليوم صبحت مزيانة ..
زوبير .. اوا حاولي على راسك باقين نفرحو بيك ..
هبطات راسها حشمانة .. انشاء الله
ومشات رجعات تجيب الباقي ناضو مالين الدار كولشي ..
كلسات بسمة مع مهدي وبداو اصليو على النبي وزغرتو ليها .. وبداو افطرو وزينب تعرض عليهوم لقاو كولشي واجد ويشكرو فطيابها ..
وخديجة خايفة لايمشي اجبد راجلها ولا ولدها الموضوع كتقول خلي تاتشوف الحل .. غير ناضو وهي تجر زوبير لبيت مهدي وسدات عليهوم ورجعات خرجاتو للبالكون باش ماسمع حد ..
خديجة .. لاش ماقلتيش ليا زينب جاو فيها الخطاب ..
زوبير .. قولي وصلك الخبار يالاه كنت غانقولهاليك شكون ياكما مو ..
خديجة .. النبگ مو راه خطبات خولة ..
زوبير .. كيفاش اش كتقولي ..
خديجة .. ايييه خطبات خولة وزغرتنا البارح وكولشي وردات عليهوم وقاليك راه غايمشيو عندهوم كيفاش ثاني خطب زينب اش هادشي ناوي اديرهوم ضرات ولا ..
زوبير .. مايمكنش كاين شي سوء تفاهم تما السيد راه باغي زينب وقالهالي بفمو مايمكنش غايكذب يمكن مو تلفات وصافي ..
خديجة .. ميييمتي غايقتلني هاد الراجل كنقووليك فك الموشكيل قوليهوم ماعندنا تاشي بنت للزواج ياكما بغيتيني نقطع البزيزيلة لي رضعاتني مع ختي ..
زوبير .. واش نتي شوية فمخك بغيتي نقول لسيد لا سير عند بنت خالتها كنقووليك السيد بااغي زينب وانا غانسول البنت ولابغات مانزيدوه غير الصلاة على النبي ومو راه غير غلطات بلى ماتبقاي ديري فداك الخطط الخاوية عمري شفت شي مرا كتجري على رزق بنتها ..
خديجة .. سمع رزق بنتي اييه ولاكن ماشي على ضهر بنت ختييي نووون وكحل العيوووون يا ايما يدي خولة يا بلاش منو بنتي ماتزوجش بداك الراجل على جنازتي
البارت 23

زوبير .. شششش صافي سووكتي سووكتي حنا غانعيطو للسيد وغانزيدو نتأكدو ..
خديجة .. واخا تأكد مليون مرة بنتي مانعطيهاش ليه ..
زوبير .. ماشي نتي لي كاتقرري تانقولها لزينب هي لي غاتشوف ..
خديجة .. مايكان لا زينب لا والو انا لي كاينة ..
زوبير .. ( تعصب ) سكتييييناااا من الهضرة ..
خرج ورضخ عليها البا ومشا خارج من الدار معصب داز عليهوم فالصالون بقاو غير كيشوفو كانو غير البنات ومحمد الدراري كانو خرجو خرجات خديجة تاهية منوگرة ..
محمد .. دبزتو تاني ..
خديجة .. نوض ضرك زلافتك عليا تانتا تاني ..
كلسات معاهوم وهو ناض تابع باه ..
زينب .. ماما ؟ مالكي ؟؟
خديجة ..( تعصبات فيها ) مامالي والو توضي جمعي عليا هاد الفطور وغسلي الماعن ..
زينب .. ( مارضاتش قدامهوم وخصوصا بسمة باقا جديدة بقات غير كتشوف ناضت حابساها وبدات تجمع فالمعان .. ناضت عائشة حيت بقات فيها بدات تجمع معاها ..
ومشاو موصلين داكشي للكوزينة غير وصلات حدطيت داكشي وهي تسد الباب دالكوزينة ونزلات على وجها جوج مرات تاشداتها عائشة ..
عائشة .. ( غابشوية باش مايتسمعش صوتها ) ويلي يويييليي شكااديري وااش حمااقيتي ..
زينب .. ( كتبكي بالحس وتغوت بالحس ) ماالهااا ديرلييي بحااال هاااكااا مااالهاا واااش خداااامة عندهااا بنااات ختها يديرو رجل علىًرجل وانا ديرلييا كيالخداامة ( نزلااات على شعرها ) عييييت انا من هاد الزبل عيااات لغيييت شي مووصييبة تهزني منهنا نقود بحاااالي ..
عائشة .. شش ششش لا لا ماتقوليشش هاكا رصاااي رصاااي اصاحبتنا ماكاتعرفيهاش راه باينة غير دابزات مع عمي ( جبداتها عنقات ) ششش رصاي رصاايي ..
زينب .. والله عييت بغيت نرجع بحالي اهئ صافي راه بزاف يخخخ ..
عائشة .. شش مابقا والو مابقا قد مافات ..
فكات زينب شعرها وعاودات جمعاتو كتمسع دموعها وعائشة كدور بين وجهها حناكها حومر لقات واحد الخبشة خفيفة خارج منها دم شوية ..
عائشة .. فف مالكي اصاحبتنا تادرتي لوجهك هاكا حرام عليك صافي برااصها خليها تاتبرد ويمشي كولشي وماغاتلقاك غير نتي حداها ..
زينب .. انا غانوريهااا دابا تشووفييي دابا تشووفي ..
عائشة .. صافي ششش ..
سمعوها كتعيط ناضت عائشة كتكمل وجابت كاع الطبلة عاد ناضت خولة تعاونها تالاخير وصلات للكوزينة لقات زينب كالسة وحاطا راسها على يديها عينيها حومر ..
خولة .. ويلي زينب مالكي !!
زينب .. والو اخولة غير معصبة خليني عافاك ..
بقات خولة غير كتشوف مازادتش هضرات معاها ومشات گلسات ناضت زينب على سعدها ووعدها كتكمل الماعن اما عائشة مشات تاني لعند ولادها ..
كنغسل ودموع غير طاييحين صافي تخسر فيا الموراال والله كتشوف واخا تبغي طلعو بنادم كينيرڤيك حتالاخير ..
سالات ومشات دخلات لبيتها تكات تادخلات لعندها بسمة ..
بسمة .. زينب نقدر ندخل ؟؟
زينب تم نيت توگضات .. بسمة !! اه زيدي اختي ..
ابتاسمات ودخلات وكلسات حداها .. مالكي اجي كلسي معانا ..
زينب .. ( ابتاسمات ليها ) والو اختي هانتي كتشوفي مابقات عندنا گانة لحتا حاجة ..
بسمة .. ماتديش عليها راك شفتي يمكن دابرات مع عمي يالاه اجي كلسي معانا ..
ابتسامات .. واخا سبقيني هانا جايا ..
حدكاتليها راسها ومشات وناضت دخلات لطواليط غسلات وجها عاد رجعات كلسات تما حيت الغدا تاجيو الرجال وغاينوضو اسخنو ليهوم الغدا .. يالاه كلسات لقات البنات كيشوفو مع خولة داكشي ديال العرايس وعائشة غمزات ليها كانت كالسة حدا بسمة مشات لعندهوم كاسات بقات مجمعة تاهضرات خديجة ..
خديجة .. بعدا واش رضيتوًعلى نعيمة اكدات عليكوم غاتجي تخطب خولة ..
نعيمة .. اييه داكشي لي كلما البارح وقاليك غير نرجعو لسلا غايجيو ..
بسمة .. انا ديك الساعة نعيط ليكوم على جدة ولي قالتو نقولوليكوم ..
خولة .. ( ابتاسمات ليها ) شكرا احبيبتي ..
بسمة .. ماكاين لاش راك زعما غاتولي مرات عمي ..
هبطات خولة راسها بخجل وكملات بسمة .. شوفي خسك تهلاي ليا فعمي راه عزيز عليااا وتاهو راه مايخسرليكش خاطرك وانا متأكدة اديرك فوق راسو ..
نعيمة .. ايوا صافي حشمتيلينا الدرية دابا ..
ضحكو كاملين وتازينب كاتبتاسم بزز خاسراليها الكانة اما خديجة غير دور وتفكر كيغادير ليها

البارت 24 ..

دخلو الرجال عاد تغداو .. وفلعشية قررو البنات اخدجو خولة بغات تختار من مراكش شافت فيها بوتيكات واعرين .. مشاو خرجو وتازينب خرجات معاهوم، اما بسمة ومهدي خرجو بوحدهوم بقات فالدار غا فؤاد وزوبير وخديجة شادا الولاد لعائشة ونعيمة تاهية معاها ..
زوبير .. شافهوم فالصالون هو يجي يكلس .. خديجة سمعي نقوليك راني سولت الراجل ..
حلات فيه عينيه زعما راه قدام نعيمة لا ..ماداهاش فيها وكمل كلامو .. قاليك هو راه بغا زينب ماشي خولة قاليك وهو قال لمو زينب ماشي خولة يعني السيد ماكيتفلاش وباش غاتجي زينب غادي نسولوها ونتوما فكوها بين البنات ..
نعيمة .. اشش كتقول الحاج ( شافت فختها ) خدوج اش كيقول هادا ..
خديجة .. ( مالقات مادير وطلقاتهاليها ) اه اختي صدق السيد هضر مع زوبير وقالو طالب بنتك مين جا قالهالي قتلو مايمكنش راه كاين شي حاجة راه مو طلبات يد خولة وزوبير قاليا تانسولو وهانتي سمعتي دابا بودنيه ..
نعيمة .. اش هادشي واش هادو كيتفلاو مو تشرف وولدها يغرب ..
زوبير .. أنا بانليا السيد من اللول باغي زينب ولكن نتوما العيالات كاديرو لي فراسكوم المهيم اخديجة مين تجي زينب غانسولها باش نرضو على السيد ..
خديجة .. زوبير انا منغانعطيش بنتي سمعتي صافي ماكاتابش لخولة بلاش ..
نعيمة .. ولاهيلا بصح بغيتي نوضو الصداع بين البنات وبنتي مسيكينة راه طمعناها وفالاخير نقولوليها لا راه بغا بنت خالتك ماجاتش ..
زوبير .. انعلو الشيطان راكوم نتوما دابا باغين دخلو فرزق البنت والسيد الله اهديكوم اهاد العيالات ..
خديجة .. العضرا لي قالت ختي عندها فيها الحق راك شتي دينب وخولة كيف التوميات شنو بغيتي تشوفهوم مقاطعين الهضرا لا صافي الموضوع تسد وحنا غانقنعو خولة بلي مابقاوش باغين بشي طريقة وسالا الموضوع ..
ناض زوبير تاني معصب خرج بحالو وبقاو نعيمة وخديجة كيهضرو ..
نعيمة .. وهادي زينة ثاني العبو ليا انا بالبنت باشمن وجه نهضر معاها انا دابا ونقولهاليها خير مادرتي اختي واللله مافينا لي يحضر على المدابزات دبناتنا حدا عينينا ..
بقات خديجة ساهية تفكر ..

خرجو البنات ومشاو للقيصاريات جامع الفنا فمراكش كيضورو تقسمو اكرام ونهال لي قد بعض مشاو من واحد الجيهة ومشات معاهوم عائشة والبنات مشار ثاني من واحد الدرب عامر تواب ولباس تقليدي ..
خولة .. يااي شوفو هادي ..
الهام .. اييه تجيك هاد جليليبة ..
خولة .. بغيت مورا الخطبة نبدا نلبس غير الجلالب ..
العام .. وشنو راك وليتي مرت الراجل ..
خولة .. زينب كيجاتك ؟؟ ..
زينب .. ( هضرات كتشوف فالجلابة ) مم عادية ماشي شي حاجة ولكن اخولة كيجي معاك الرومي كتر شوفيليك داك الستيل ديال التواراكا اجيك حسن ..
الهام .. اختي السيدة بغات تلبس البلدي باش تعجب راجلها ( ضغطات عليها ) ونتي فين مشاتليك ( ضحكات فالاخير ) ..
زينب .. الهام أنا غير هضرت مالكي كاتجاوبي بهاد الطريقة ..
الهام .. مالها ماعجباتكش طريقتي ؟! ههههه
زينب .. الهام مكنضحكش !
خولة .. ( ضحكات ) هه اويلي البنات منيتكوم صافي بلاش زيدو نشوفو شي حاجة اخرى دينب مالكي اصاحبتنا رخفي غوباشتك حنا غير كنضحكو ..
زينب .. أنا عادية اخولة ولكن الهام هادي يوماين وهي كادير هاد التصرفات ..
الهام .. انا عادية احبيبة غير جابليك الله يمكن مقلقاك شي حاجة اخرى وجاتك انا كنتصرف هاكا ( غمزاتها فالاخير ) ..
خولة .. صافي سكتونا دابا خليونا فرحانين بلا مانتعصبو ..
مشاو لعند واحد مول التواب صاني ساومو داكشي وزينب جاتها بحالي بالغات حيت باقي مادايرا فالطاجين مايتحرق وهي كتقلب على شنو تلبس مور العرس ..
بقاو ثاني كيضورو تاطلاقاو مع البنات لوخرين وكملو خولة شافت واحد الحانوت دالعرايس وحلفات تادخلو ومشاو جميع بقات خولة كتخسر هزات واحد الشوميز دونوي مذهب وااعر ..
خولة .. شوفو ياختي شوفو هه ..
الهام .. زوين ياختي ..
نهال .. ناري ياختي غاتلبسي حداه هادشيي افف ناريي ..
الهام .. صدقات خولة هي اول وحدة غادوق الحلوة بيناتنا ..
خولة .. اويلي سكتي الله امسخك ههه ..
عائشة مشات كتشوف شوميزات لراسها بقات غير زنب كتشوف غير بعينيها هنا ولهيه .. شافت خولة غادا تخلص وخلصات تاعائشة غير خرجو وهي تهضر زينب بعفوية
زينب .. خولة اختي ههه غير كتخربقي اويلي مالكي على هاد الزربة ..
خولة .. ( بعصبية ) زييينب لاماكنتيش حااملة تجي معايااا قولييهاا من اللول مااشي لي ندييه مايعجبكشش مااالكيي ..
الهام .. بصح ازينب زدتيي فييه واااش ماحاملاهاش تزوج ..
زينب .. ( تصدمات وببلعات ريقها بقات غير ساكتة دغيا خطفات عائشة نطقات .))
عائشة .. شهاااد الهضرة البنااات كتقوولو منيتكوم حشوومةة وعييب تقوولووها ..
زينب .. لا بلاتي بلاتي اعائشة ( بعداتها عليها ) داباااا اناااا اه الهام ماحملاتش ختييي تزووش وااش نتي كدويي منيييتكك ..
خولة .. صاافيي داباااا سكتوو ماتزيدووش فييه ..
زينب .. لا غانزييدوو فيه من الصبااح ونتوما ترطااوًعلياااا مالنااا ياااك لاابااس شنوووو ياكما تقللتت علييكوووم شووفي اخولة انا ماحسذااك ماوالو نتي عارفاني انا اكثر وحدة غانفرحلييك والله اجيبليك معاه كل التشيير والله اسعدك وهاد العضرة خارجة من قلبي وربي شاهد عليااا ولكن مزيان على العيب لي خرجتو ..

البارت 25
شدو طاكسي بثلاثة وقاتلو زينب على البلاصة وهي دور للشرجم ..
عائشة .. صافي زينب ماتديش عليهوم ..
نهال .. تانا ماحملاش المنضر شنو هادا اوييلي حسيتهوم بحالي تحاماو ..
زينب .. خليهوم دابا غايكونو كيهضرو فينا انا صدماتني خولة مزيان حسيتها بحالي عرات على وجها ..
عائشة .. اودي قاليك الحمار مشا يشري الگلة فين احلب قبل مايشري البگرا ايوا خليها تانشوفو حريرتها فين زايدا ..
نهال .. زعما لا تزوجات غاطفرو ..
زينب .. نيهاااال صافي سكتي كيبقاو بنات خالتنا ماتقوليش هاكا صافي الله اعاونها ..
كملو ساكتين تاوصلو للدار وطلعو حلات ليهوم خديجة دخلات زينب بلاما تشوف فيها ..
خديجة .. افييين غادااا .. ( شافت فعائشة ونهال داخلين ) فين البنات ..
عائشة .. بقاو كيشريو انا خليت الدراري قلت نجي ..
دخلات ومشات تانهال بقات خديجة غير متشوف عرفات غاتكون وقعات بيناتهوم شي حاجة ..
سدات الباب ومشات رجعات گلسات تاجات زينب هزات حلوة كتنقب ..
خديجة .. شنو شريتي وفين خليتي خولة ..
زينب .. ( بعات داك الطرف وهي تغوت فوجها ) مييييين تجيييي سوليييهااا وعلاش انا غانشريي بنتلييك جاو فياا شي خطاااب ..
لاحت داك الشياطة دالطرف ومشات ..
نعيمة .. اويلي ياكما هادو دابزو ..
خديجة .. منعرف ليها دابا نورييها على هاد الغوات ..
سمعو قاني الصونيت .. هاهوما واقيلة عاد جاو ..
ناضت حلاتليهوم دخلو كيضحكو محملين ..
خديجة .. على سلامتكوم مالكوم جيتو مفارقين ..
خولة .. والو فيناهي زينب ..
خديجة .. راها فالبييت ..
مشات دخلات ومشات عند مها ودخلو حتا لوخرين ..
خولة .. احح ياما داكشي الفن الفن وكون تشوفي داكشي العجب لي لقيت فين تبان سلا ..
نعيمة .. (بقات فييهاا بنتها ) كلسي بعدا ابنتي كلسي ..
خولة .. وبلاتي بعدا انوريك ..
جات خديجة من موراهوم كتشوف وتشوف فختها ومشات تاني عند زينب دخلات لقاتها متكية كتخربق فالتيليفون ونهال كتبدل سدات الباب ودارت عندها ..
خديجة .. مالكي نتي على داك الغوات ماحشمتييش قدام خالتك ..
سدات زينب عينيها وحلاتهوم وناضت بهدوء شافت فيها .. شوفي راني عييت اماما صاابرة تزيدي علياا نغزك غانوض نجمع حوايجي وماتعرفيينيي فيين هزيييت الرااس واقسم بالله تانديرها ..
خديجة .. هاد العياقة لي ولات فيك مين اجي خوك ونشوفو كيفاش غاتحليها معاه ..
زينب .. بمابنتليكش كنرضع صبعي راه فعمري 25 قادا براسي وبالعائلة كاملة سمعتي ومين اجي ولدك انا نقولهالو ..
خديجة .. دابا وليتي تجاوبي معايا كلمة بكلمة ..
زينب .. غير بااش تردي البال شوية حيت شفت بحالي ختك بدات تسدليك العنين راه نرجعو لبني ملال ويتسدو علينا البيبان وديك الساعة عيطي لنعيمة ..
نهال .. دابا صافي سكتووونا ماما عافاك سيري شوفي شكون كيدق راه اكونو الداري ولا مهدي وبسمة ..
مشات خديجة حلاتها تاتنفارد بيها مزيااان ومشااات حلات لباب لقات مهدي وبسمة نيت .. اصلا هاد الايام غير كيتغداو وكيتعشاو وكيرجعو للأوطيل كيخليو غير مالين الدار لي بايتين هنا ..
تجمعو فالصالون كالسين وخولة ناضت تبدل فوسط البيت هي والهام بلى مايهضرو مع زينب اصلا قالبة عليهوم وجها ..
ورجعو كلسو بينما جاو باها وخوتها وتجمعو كاملين فالصالون كيتعشااو تاسالاو يالاه جا مهدي ينوض هو يوقفو باه ..
زوبير .. بلاتي بلاتي نقوليكوم بعدا ..
رجع مهدي كلس وخديجة حلات عينيها قلبها كضرب خايفة لايمشي اقول لي فبالها وهي ونعيمة مزال ماقالو لخولة والو ..
زوبير .. بنتي زينب ( علات فيه راسها كتشوف فيه باستفهام ) راه جاو فيك الخطاب ..
خديجة … زووبيير ..
زينب .. كيفاش أنا ..
كولشي شاف مصدوم .. اييه جا فيك عمها ديال بسمة سي نصر البارح جا طلب مني يدك وقالي نسولك باش لاكنتي قابلة مانزيدو غير الصلاة على النبي ..

Leave a comment